عزيــزي القارئ فضلاً وَ ليسَ أمراً أضغــط تصويت
لنـــشر المزيــد من احــداث الروايــة
فستان أحمر
تحسين لقمــان
صحت واني خايفة : ياسمين !
ميادة: ياسمين شبيج شنو هاي
السجينه عفيه شنو تخبلتي
ياسمين :أسفة بس مجبورة
ميادة: ياسمين صحصحي اني صديقتج شبيج ياسمين
تتقرب علية وَ ألسجينة بيدهه وَلا كأنما كاعده احاجيهه ياسمين فعلاً بهــاي اللحظات متغيرة
مو مثل ياسمين الي اعرفها ، البنية الي بصفي تأشرلها عليه بمعنـى تقربي اكثر واكثر
وتأشرلها بأن تستـعجل اكثر واكثر بمعنى ماكو وقت بعد •
وَاني المسكيــنة احاول وياها و امسح بعــرك كصتــي
مياده : ياسمين استهدي استهدي بالرحمن ياسمين اني مياده اي اي مياده
اتعوذي الشيطــان لا تخلي ينــام بعقلــج
ذبت السجينه من ايدهه وتقربتلي اخذتني بحضنهه وتبجي بكل قوة عدهه
خوف، قلق، توتر عـرك جسمي دموع عيوني
كلهن أجتمعن بية
ياسمين : ماعرف ماعرف شلون انضحك عليه ماكدر ماكدر علياء ماكدر
حاضنتني بكل قوه عدهه واني مستغربة ياعلياء
عرفت رأساً علياء هيَ هاي البنيه الي بصفنة
بوســط الدموع دخلت الشرطية وياهه اثنين گالت : وتالي وياجن تضلن هيج صياح وعياط
وحدة منهن باوعت للگاع وشهكت حيل كالت : عزه عزه سجاجين بالسجن ,
كوثر نادي نادي على القطاع
رفعن رفعن الايــادي •
ياسمين وخرت مني وباوعت عليها وكالت بصوت مهزوز : انتي شفتي السجينه بالكاع ماشفتيهه
بيدنه قانونج المعترفه بي مشي
عدل عيوني انتي •
علياء اباوعلهه تقربت عليهه شاورتهه ماعرف شنو همسة بأذنه من حجي
بس كل العرفته من ملامح الشرطيه الي بدت تتجمد وتميل للعصبيه عرفت أنُ علياء شمرتلها
كم تهديد بس ماعرف منو علياء وشنو السوته لياسمين وليش هيج صار •
اما البنات الشرطه واكفات وملامحهن بارده كأنما عدهن علم بكلشــي
واكفه اني بصف ياسمين وَ ابلع بريگــي واترقب كل الحركات , اباوع لعلياء وخرت من الشرطية
اخذت من عدهه السجينه سدتهه وحطتهه بصدرهه
الشرطية دارت وجها بعصبيه وطلعـت ماعرف شنو صار وشنو سوت علياء وياهه ,
تقربت عليــاء من عدنه باوعتلي وكالت : ديربالج على روحج يحلوه
وباوعت على ياسمين : للأسف ماثبتي ولائج النه تموتين حالج حال الي قبلج واوعدج موتج
على ايدي , تقربت وحدة من الشرطـة وصاحت:عليــاء للسجــن كافي فوضى وعرامة هنا
تقربت الشرطية الثانية اخذت عليـاء وَ طلعت بسرعة من الحمامات
وَاني الخوف ماكلني اكل، خــايفة أصبح الصبح وماطلع سالـــمة
تقربن من عدنه الشرطيات واخذنه بسرعة من الحمام
مرينه بنفس الممرات وَ اني وياسمين وحده تباوع على الثانيه اني عيوني تسولف وحيدهه تسئلهه
ليش هيج ياسمين ردتي تنهين حياتي شسويتلج ماتوقعت منج الغدر •
وهي عيونها واضح عليهن الاسف والندم بس شنو يفيد بعد ياسمين •
دخلنه لقطاعنة وقعنه ودخلنه للسجن باوعتلي وكالت : بس اسمعيني وافهميني وداعت ابوج مجبوره مجبوره
باوعتلهه بنظرات كلهه عتب وقهر وضيم : ليش ياسمين شنو سويتلج
مافد يوم سمعتج كلمه بحقج مو زينه جنت حاسبتج جزء من حياتي تــاليهه هيج تسويــن
تقربت مني وَ حضنتني عرفتهه بدت تبجي جريت حسرة وهمست بأذنهه : ليش ياسمين شنو الجبرج فهميني اطعنين صديقتج
وبمثابة اختج طعنه وبيدج هم •
وخرت عني لزمت ايدي وجرتني بأتجاه جربايته , كعدت عليهه اشرتلي بيدهه بمعنى اكعد
رفعت رجليه وتربعت عليهه رفعت راسي ليفوك بأستقامه واني اباوعلهه
بوجه متروس تقاسيم الخذلان •
ياسمين : اسفه
مياده : ياريت يفيد الاسف ياسمين لو من غريب اي بس منج لا
شعر راسي أجه ينط على حيلة من شافج •
ياسمين : أنجبرت مياده اي انجبرت بلزمة السجينة
وانجبرت بدخلتي للحمام واخطط عليج اني وعلياء
حطيت ايدي جوه حنجي باوعت منا ومنا ام فاروق تشوخر والبنات كلهن نايمات ,
كتلهه : شنو الجبرج ماكو غير الفلوس معقوله ماكفتج الفلوس الي اخذتيهن من حجي مطلك
ومهـره معقولة ماصارتلج عبرة ياسمين شسوتلج جمع الفلوس بس فهميني هاي اها اها الفلوس هنا
حطتج يلا خليها تفيدج واطلعج منا •
رفعت ايدهه وَ لمت اصابعهه بمعنى شويه شويه گالت : ثقي بية مو فلوس انتي حجيتي ويه مهره بالتلفون وعرفتي اختج
يمها الله أعلــم شنو مسويهه بيها •
عقجت حواجبي وكتلهه : اي اني عاد اختي گلــبي طاك عليهه ومفحم تفحم انتي ياسمين شنو
عندج هناك فهميني فهميني متكدرين تحجين لأن متأكده جوابج راح يكون الفلوس ,
اباوعلهه باوعت منا ومنا وشهگت كالت : امي امي
وحطت ايدهه على وجهه وبجت بكل حرگه
تخنگ بصوتهه علمود البنات ميحسن على الصوت•
اصعب شي يمر بـالأنسان يريد يطلع قهره وضيمه و يعبر عن داخله بـس يخنك بصوته خوفاً
لايسمعه أحــد وَصلت هاي الــمواصيل البجية بالسجن محسوبة عليج لازم تتلفتين يمنى ويسرى ,
تتأكدين محد كاعــد وتبجيــن •
ماعرف ياسمين شنو قصدت بكلمة أمي
أمها الباعتهه معقولة رجعت ادور عليهه بعد
ما أفترت بمحطات الدنيا معقولة ندمت ورجعت نادمة تبحث عن بتها بكل مكان وكل زاويه
حطيت ايدي على رجلهه وگتله بهمس ناصي: شبيهه امج ياسمين
رفعت راسهه مسحت رشح خشمهه الي بده ينزل على حلگهه : موجوده موجوده مياده بعد كل هاي
السنين المنبوذه المرت عليه طلعت
موجوده حية •
تقربت منهه وَ حطيت ايدي على جتفهه كتلهه : معقوله وجود امج حاليا بحياتج شجعج
على ان تكتليني
حركت راسهه لليمنى ولليسرى بمعنى لا , هزيت راسي ووكتلهه : لعد
ياسمين : طلعت كل هاي السنين تشتغل بمصر يم جماعة مهره
حطيت ايدي على حلكي كتلهه : بمصر مصر نفسهه
ياسمين : اي مصر نفسهه , خارج العراق تشتغل كل هاي السنين ومهره مرهمتله السالفه
كلهه وين وعد منو تشتغل ماعرف ماعرف •
صارلهه من اسبوع من الجماعه الي هناك مختلفين عليهه ودازيهه لمهره وواضحه يمياده
انُ هو ملعوب من مهره •
اخذت نفس وَذبيته ماعرف ليش جنت خايفة وليش بنفس الوكت هادئه وعلى طبيعتي
كتلهه :وماعرفت ليش دخلتي سالفة امج بأن تردين تكتليني
عدلت روحها وكالت : والدتي حاليا دتتعذب حالهه من حــال اختج
تقربت مني واني اترقب حركاته باوعت منا ومنا كالت بصوت ناصي كلش : الحيطان الهه اذن
اضاهر مهره رادت تذب تهديدات بسيطه الي والج ماعرف شنو فائدتهن ولا أعرف شنو تقصد بيهن
مياده : وامج كليلي شنو بس لا حنيتي الهه على الي سوته بيج
لو منج اتبره منهه واتفل كدامهه واكمل حياتي •
ياسمين : تكدرين تكتلين كلشي وتكرهين كلشي بس هاي العاطفه من ناحيــة الام ماتكدرين
ماتكدرين مهما جانت مسويتلج ثقي بالله مرات افكر اتخيلهه أن ُ هيَ ميته ومدفونة دموعي تنزل
مباشرةً شحال لو وحدة تخابر وتكلي اذا متسوين هيج وهيج امج تروح بالرجليــن
مياده : اصحي اصحي ياسمين هاي العاطفة كتليها بسببه انتي هنا اي هنا لو ما امج وطمعهه
بالفلوس جان انتي حالج حال البنات دارسه وواصله
بس الظاهر العاطفة تعمي العيون •
سكتنه اثنينه بللت شفايفي وكتلهه : وبعدين انتي ردتي تكتليني ردتي تمحيني والله شنو
علمود تحافظين على وجود امج واني شنو
واختي شنو مو مبرر هذا ياسمين مو مبرر ابد
ياسمين : أسفـة على كلشي كل انسان يمياده يمر بلحظة غضب وتصدر من عنده تصرفات
مـا مسيطر عليهه كلش اسفه ولو
اعرف الاسف بعد مايفيد •
هزيت راسي : اختي شنو صار وياهه فدوه
شتعرفين معلومه انطيني والله گلبي يريد يطلع ليكدام وَ راسي مــااحجيلج عنة
راح ينفجر من التفكير اي كلمه اي كمله حلوه كولليها كليلي اختج بخير •
لزمت ايدي وعصرتهه دنگت راسها : اختج ماعرف شنو اكول بس هاي المرة مياده احسهه
ناويه على الوداع كل الاعرفه محتــاجه دعائج اي ادعيلهه مياده وبيج ومادعيتي ربج قادر على كل
شي يحب الانسان الي يتودد عليه بالادعيه •
ويحب الأنسان الي يذكرة بيج ومادعيتي وسألتي وطلبتي من عنده يرجعلج اختج سالمة غانمــة
مياده : اخاف اي اخاف اخاف تموت والدعاء بعده مامستجاب
جرتني لحضنهه حضنتهه وَ بجيت بكل حرگه ومواقف تمر على بالي عشوائيه ساعة اتخيلها
مذبوحه وَ كدامي وساعه الگاهه طايره بالسماء تأشرلي بيدهه مع السلامه يمياده ,
شكد صعبه ان يوصل الأنسان لمرحلة يخاف يدعي وَ الأصعب أنُ يمر بمرحله صعبة ومحد
يحس بصعوبة هاي المرحله غيرج انتي وَبس
وخرت راسي من حضن ياسمين وگمت على حيلي رحت على حربايتي ودموعي امسح بيهن
حطيت راسي على المخده وذبيت جسمي بهيئة عاديــة طبيعية غمضت عيني وَ دمعتي نزلت
على وجناتــي حسيت بحرارتـه
وَصلت بية المرحله تعبت أنُ أشيل ايدي وَ بجفه
أمسح دمعتي مابيه اي حيل بعد ,
غمضت عيوني محاولة ان اشرد من هذا العالم من هاي الناس الظالمه ,
ام فاروق : عفيه ام حمزه هاي ميادة تعبانه سويلنه الريوك انتي
اسمع ام حمزه تردهه : گايمة گايمة يمه عيارتجن ,
أها أوَعن وَ شهدن عليه سويت الريــوك لحد اطالبني بغده عيارات •
درت وجهي لگيت نص النسوان كاعدة ونص لا وام فاروق لابسه جادر الصلاه وكاعده تسبح ,
درت وجهي على ام حمزه وين ماهيَ لگيتهه تروح بأتجاه الثلاجه طلعت منهه البيض والطماطه
ابتسمت على بساطة هاي المره رغم السانها الجارح بس عمرها جبير وحي الله بالكبار ,
گمت على حيلي ومشيت بأتجاهه صحت : صباح الخير تركي تركي عيني تركي ام حمزه جاية اني
باوعتلي وگالت : اها من البدايه واكومن لو اله اتعبن رجيلاتي بنات وكت وجه وموبايل
استغربت من كلمتهه من الوجه اباوع لأم فاروق تضحك وجــم بنية ضحكن كتلهن : شنو الموضوع شتقصد ام حمزه
ام فاروق : عوفج منهه بلشي بشغلج يوم ,
وحده من البنات كالت : هاي سالفة الوجه سالفه طويله بس جانت هنا ويانه بنية بالسجن تحجيلنه
عن يومهه كله على الفيس فأم حمزه بوكتها جانت كاعده صاحت بيهه
وشني هذا الفيس ذيج على صلافتهه كالت خاله فيس تطبيق وكلمه بالانكليزي معناه وجه
وام حمزه من ذاك اليــوم تنسى اسمه فيس فتگول وجه
ضحكت وكتلهه : نست الفيس ومانست الوجه
فاتت من يمي وطگت اصبع ضحكت من كل كلبي على حركتهه كالت : بنات الملهى تحجن بسيرتي
ام فاروق : تخبلتـي ام حمزه تعاي استچني بصفي
اباوعلهه واني شابعه ضحك على طيبته وفطرتهه الله يعلم يامصيبه جابتهه هنا لهــذا الـسجن
الاكشر مادري شلون ناس بهيج عمر يتحملون العيشه هنا ,
كعدنه جم مجموعه من البنات ورحنه كلنه سويه بفترة الصبح النظام يصير هيج كل خمس بنات
يطلعن سوه للحمام وترافقنه شرطيات اثنين ودائما فترة الصبح تكون هوسه
كل الي فهمتــة من البنات الي قبلي انُ هاي الهوسه نتيجة عمليات التفتيش لـن اكو قطاعات
تصير عليهن بلاغات فتحضر بنيه بمرتبة ضابط تفتش كل السجن هي ومرافقاتها
دخلت للحمام غسلت بأسرع سرعه عندي وطلعت وكفت بالباب يم البنات لأن الي تكمل تطلع تنتظر
بالباب تكتـمل مجموعة البنــات يلا يرجعنه •
كملت مجموعة قطاعنه وَرجعنه نمشي شرطيه كدامنه والثانيه ورانه واحنه بالنص صايرات
وصلنه لقطاعنه دخلنه لنفس الغرفه ولنفس الهوى بديت اشتغل بسرعه لململت الطباخ وبديت احظر
الريوك ساعدتني جم بنيه وحده منهن اسمها زينب اسمهه حلو وهي حلوه اصلا ,
كملنه الريوك وكعدنه نتريك سفره وحده والجامعنه سوالف ام حمزه وام نبيله
ام نبيله هاي اول مره اشوفهه كدامي ومنطلقه بالحجي
ماسولفنه على الاسباب الي جابتنه هنا ومصيرنه شنو بعدهه بالعكــس جمعتنه الضحكه والسالفة
الزينه اباوع لثريه تاكل وعينهه منزلتهه بالسفره عرفتهه ضايجه حقهه تضوج هاي البنيه شنو ذنبهه
انحرمت من ام واب على جم فلس وهاي اختهه المسكينه المدمنة على الحبوب ماعرف
شنو اكول وشنو احجي
صبيتلي كلاص جاي ورجيت روحي على الحايـط
اشرب جم رشفه منه وَ اباوعلهن بتأمل جانت كل وحده تريد تحجي الي بداخلهه اطلع الوجع
بس الظروف ماجانت تسمح . انفتحت باب السجن وَ كلنه وجهنه عيونة عليهه دخلت انعام
وكالت : مياده ثائر تفضلي المحامي
كامت ام فاروق على حيليها واني وياهه البنات كلهن استغربن شنو الموضوع اترخصت منهن
وتوجهت للباب صاحتني ام فاروق راحت للجربايه لبست شيلته
وكالت : وياج فدوه حتى لو بالباب اضل واكفه ماعندي اي مشكله فدوه
انعام ": تره المحامي مالته انتي شكو عيوني هاي مؤسسة حكوميه قانونيه
مو گهوة العزاوي كدامي ميادة •
باوعت لأنعام وكتلهه : وبلغي المحامي مالتي ماطلع منا اذا متجي ويايه ام فاروق
كامت ام حمزه : اواش اواش صلوات على نبي
عين حسد من الصبح انتي انعام بكد بنتي لا
تشوفيني بالسجن تدرين بيه ادور على الصغيره والجبيره في سبيل ابقه هنا
ام فاروق ماتنكسر كلمتهه
تروح ويه هاي الصغيرة يعني تروح •
يلا تحركي ام فاروق •
صاحت : بنات بنات
جاوبنها الكــل " ها ها أم حمــزة
بوسط وجود أنعام ووكفته من حاطة ايده على الخصــر وتباوع
ام حمزة : والسجن ألنة و شنو
جاوبتها ياسميــن بطگة أصبع: وَ ماننطي والسجن ألنة
لزمتني بسرعــة ام فاروق من ايدي ومشينه طلعنه من السجن ويه انعام , طول الطريق
مافكرت شنو يريد ضياء وليش داز عليه بهيج وكت لا كل تفكيري ام حمزه هاي المره الجبيره
الي توكف للتحبه والماتحبه شنو سبب وجودهه هنا ماعرف ماعرف وليش كالت لانعام ادور
الصغير والجبيره •
بعد ماطلعنه من القطاع وصلنه للغرفه بصمت ووقعت
ام فاروق : اني مادخل هنا ابقى
باوعتلهه وكتلهه : ماعرف شنو اكول بس الله يساعدج
نزلت دموعه وكالت بغصه : حاولي من اطلعين بيج عطره اني أم حســـي بيــة ميــادة
مسحت دمعتهه وفتحت الباب دخلت كام على حيله وكال : صباح الخير يابَ
ابتسمت بوجهه : صباح النور خوماكو شي
شنو صار على قضيتي
ضياء : تعاي اخذي الاوراق وشوية انطي مجال للمقابل
مياده : عفواً أذكرك بكلامك كلما نركز على قضيتنه الاساسيه نتقدم اكثر تفضل اسمعك
اباوعله باوعلي بشك سحب شهيق زفير وكال : القضيه شبه راح تنسد
مياده : يعني راح نطلع منا
ضياء: القضيه مال جنسيتــج ماگلت قضية الدعارة
مياده : مو دعارة أختار كلماتك واي يالله بس شلون راح تنسد وين القانون النزيه
أباوعله جمع الاوراق لملمهن وگال : معارفنه هواي وناسنه هواي لاتخافين من هاي الهوسه كلهه
بس لازم تعرفين ابوج دفع فلوس هواي لثائر وأدنى اقالاته للجنة التحقيقه بأنُ هو المزور وانتِ خــارج قوس عن هاي العمليــة
والحمدلله طلعتي من السالفه
مياده : وَ أختــي
جر نفس وكال : شبيهه
مياده : البارحه مهره رادت تكتلني عن طريق بنية ويايه بالسجن اسمها ياسمين ووحدة ثانية علياء
عقج حواجبه وَ ضرب الميز بسرعة: جنت ادري جنت حاس زين شصار كليلي
هزيت راسي بمعنى لا رأساً كتله : لتقلق عليه أما بالنسبه لأختي ماعرف اي شي
حط ايده على الميز وركز عيونه عليه وگال : حجت وياج مهره شي
هزيت راسي وكتله : اي اي حجت گالت اختج يمي بس جانت تصيح اي تصيح
من بين كلامــي وَ نظراتـي ألــة نزلت دموعــي اباوعله مد ايده يجيبه طلع كلينس
وَ گال : هاج مسحي دموعــج يابَ وَ ادعيلهه ادعيلهه مايفيد البجي
گمت على حيلي وكتله : فدوه مخنوگه تريد شي ثاني
گام وگال : سلامتج
مياده : سلملي على ابويه وحنظل ورفيق
ضياء : لتتوقعين اترك قضيتج مادام مظلومة اطلعج منا يعني اطلعج
مياده : الكاتبة الله يصير
درت وجهي ووصلت للباب درت وجهي عليه وكتله : اكو مره بالباب تريد تشوفك
تقرب لحافة الميز وعقج حواجبه رفع ايده بمعنى منو
فتحت الباب مديت راسي لگيت ام فاروق كاعده بعتبة الباب كومتهه علكيفي
اباوع للشرطيه كاعده تخابر وخاله هاي المره بالگــاع صدك ناس بله ذوق ابد
كالت : يمه ماريد ادخل يلا كملتي نرد لسجنه
هزيت راسي بمعنى لا
مصره على انُ أخليهم يلتقــون عسى ولعل تنجمع الگلــوب
دخلتهه للغرفه شهگت بسرعة ووكعت بالكاع تبجي اما ضياء اباوعله نزلت دمعتة
وَ بسرعة دار وجهه على الجهه الثانيه كال بصوت رج الغرفه رج : طلعي بره ماريد ماريد اشوفج
صاحت : آنــه آنــه أمـك الربيتك بيدي
اشيلك بيدي واسويلك دللول دللول
يضيو نام يضيو يبني نـــام •
صاح : وانتي نفسج البگتيني
اخذت موضع السكوت لان كل كلمه عندي خلصت
دموعــي ألــي بقن وبــس
كالت : آنــة الادعيلك بالرزق آنــه الادعيلك بالحلال يكثره عليك ربي وربك
شلون تريدني أبوگـك قشمرتك مريتك لك يمه ضيو انه امك تعال ليـة أشبگنــك
صاح : واني متبري منج ليوم الدين
هيج ام ماتراد •
دار وجهه اباوعله يبجي لملم اوراقه وتوجه لباب الغرفه جرته من رجله وكالت كلمات مستحيل
انساهه مدى حياتي لأن تركن أثر كلش جبير بگلبي . يمه ضيــاء اني امك امك لا تـتركني
وَ أجيتك واعتذرت ومياده شاهده يمه اني الربيتك يمه انــي ام وَ أمك تعرف شنو امك
وحك الخلكك ما مادة ايدي طول
عمري لا على فلوســك و لا على فلوس غيرك
نزلن دمعاتي أكثر من السابق على كل كلمه كالتها ام فاروق معقولة وَصل الحال للأم ترگـع وتسحب
رجل ابنها تتوسل بي أما هو بكل برود
سحب رجله ودفعهه بيده
شهگت ام فــاروق شهگة تحمل كل ألم گلبــها
نزلتله بسرعة وَ سحبتهه لحضني وصحت بي: اني گلبـي من يمي انمرد هم حاسب
روحك انسان الله يلعنكم كلكم نفس الطينه .
خله وطلع ام فاروق ذابه راسهه بحضني وتبجي بكل حرگـه وتصيح : شفتي شفتي يمياده هذا
الحملتــة تسع شهور شفتي شفتي يمياده •
وخرته علكيفي مسحت دموعهه وكتلهه : اذا ماضل احد الج اني بنتج واني سندج
ولو اني حالي تعبــان بس هذا الاكدر عليه
مــواقف صعبه تمر علينه وَ صعبه نتقبلها من كثر ماهي جامده وبيهه شبه الـموت
تعرفت على كل البنات الي بالسجن كل وحده قصته تختلف عن الثانيه ماعرف اواسي هاي لو اواسي ذيج .
مشت بيه الايـام واني بأحضان ام فاروق وبسمات ياسمين ودمعات ثريه الفقيرة
الى أن وَصلنه ليوم واحد وَ عشرين سبعة مشينه بالممــرات مال السجن اني وياسمين وثريه شبه ميتات
متوجهات للمحكمه
قرار نطق الحــكم بحــجي مطلك •
طول الطريق افكر معقولة حــجي مطلك راح يتعاقب على كل شي سواة من جرائم وافعال
قذره بحقي وبحق هواي بنات لو راح يطلع حاله حال البقيه الي أنسجنو يومين وطلعوا
معقوله كلام ام حمزه يطلع صح من كلتلي : السجن بس للفقير
القوي يطلع منه ليله لو ثلاث ليالي وَ بس •
ويانه ضياء واربع شرطيات ووحده برتبة ضابط , كلنا صعدنه بالسياره وتوجهنه للمحكمه
الطريق معروف بطوله و طســاتة أما احنه وحده تباوع بالثانيه واني انطيهن ابتسامة
احاول انطيهن جرعة امل رغم الخراب البيه •
وصلنـه ونفس الامور القانونيه بس احنه ضلينه كاعدين بالــقاعة الى ان حان الوقت
اباوع لياسمين متوترة ومن ورة خشمها جايه للمحكمه حقها عــاد هي اغتصبها وتزوجها و لعب بحالها الله يعلـم شصاير بكلبها
كلنا ساكتات لأن أي شي ماعدنه بعد •
الشرطي فتحلنة قاعة المحكمـة وَ دخلنه ويانة المحامي ضياء اباوع منا ومنا ماكو حنظل
ولا ابويه ماردت اسأل لأن الساني ثگل بعد ,
شويه والشرطي الي على الباب صاح المتهم مطــلك حسون
گلبي دگاتة تتســارع، حلگي مابي ريــك
صار يابس، كــل ذكريات ليلتة الوصخـة تجمعت
بعقلــي
هو ودخل ياسمين گامت على حيلهه وصاحت بعلو صوتها : يلعنك الله ياجلب
شسويت ها شسويت ركضت وره الفلس مثل الجلب من يركض وره العظام
بشرني سوتلك شي الفلــوس خيس وَ عفن بالسجن
ضياء : ياسمين ياسمين سكتي تره يطلعوج
ضياء يهدي بياسمين واني اباوع لحجي مطلك لحيته كبرانه ووجهه مورم ماعرف متعارك او
مادري شصاير بي ماعرف , كاعد ومنصي راسه ماعرف شنو افتهم من هاي كعدته
معقوله هو حاليا ندمــان على كلشي سواة بينا وبغيرنة
چفلنه صوت الشرطي من رحب بدخول القاضي والمرافقين الي ويا وگفنه احتراماً الــة
الى ان وصل للكرسي كعد و گــال : تفضلو
لبس نظارته باوع على القاعه كلهه فتح الملف الكدامه شال الجاكوج وضرب الميز :
بسمــه تعالــى بدأت الجلسة
حجي مطلك أسمعة يگول " يالله
ياسمين همسة : يذكر الله بأي عين مادري
القاضي : هدوء رجاءاً كـل من يحاول أن يقلل من المحكمـة العراقية بوجود القاضي يعاقب قانونياً
و نعم نبدأ بالمتهم مطلك حسون
كام وكف وكال: نعم سيدي
القاضي : محاميك وين
حجي مطلك: هــاي زعابيلكم القانونية ماتمـشي عندي شتريد تنطق انطق لا محامي ولا غيره
كامت ياسمين وصاحت : عار عار تبقى عـار ياكلب
بعدهه ماكملت كلامهه صاح القاضي: بنتــي أقدر الظروف المريتي بيها لكن التزمـي بالصمت
التفت على حجي مطلك وگال : افتهم من كلامك شنو
حجي مطلك : افتهم الي تريده كلمتي وحده وواضحه وضوح الشمس. ويابَ حضرة القاضي
وحـگ نجـوم الليل خيارة بحلك القــانون
أصــم حلگة وحلـك الي يحجي بــي
القاضي : لو لا المستندات القانونية الملـزم بها لوضعتك طعام للكلاب يومياً
سؤالي لك تنكر أم تــؤيــد الافعال التي كُتبت في الملفات المرفقه لدينا من أغتصــاب الفتيات
عراقيـات الجنسية، و الملفات القانونية المزورة وَ عمليات القتل والتجارة بالبشر وأضافة لذلك
التجارة بالكحول غير المشروعــة
تنكر أم تـــؤيــد
ضحك وگال : قاضي دمج والله يالله
بــلي اؤيد شراح يصير
اباوع للقاضي سد الملف فتح الملف الي بصفه :گال
بسمه تعالى ننطق قرار الحكم وقوفاً
وكفنه گلنا بحركه من الشرطي
صــاح القاضي بصوت عالي واني الرعشة سارت بجسمي
نظراً للملفات المرفقة لدينا التي تبين وتوضح توضيحاً جيداً أفعال المتـهم مطـلك حسون التي
تنتهك معايير المجتمع العراقي وتؤذي مصلحة الفرد العام وَ أضافة الى كلام المتهمات كل من
مياده ثائر كاظم وياسمين علاء خلف وثرية عباس عبد الى اللجنه التحقيقية التي يثبت ماقام به
ونظراً الى ادلة الأمن المختـص بقضايا حقوق الانسان التي أيضا تؤكد على مافعـل
وأضافة لذلك نظراً الى كلامه امام حضراتكم من المتهمات ومن المرافقين لي من اعضاء الهيئة القضائية
بالاعتراف بأنه من قام بكل الافعال التي ذُكرت
وبذلك قررت المحكمة العراقيـة وبموجب القانون المعنون لدينا وبموجب السلطات العليا
بالحــكم على المتهم مطلك حسون
بالاحكام مـــؤبد •
ويعيش القانون العراقي
رفعت الجلسه
ضرب الميــز بالجاكوج و گــام
ثريه صاحت بين الدموع : القانون عاش عاش للأبد
اباوع للقاضي مر من يمه
وگـال : غدوا خيــار يم ضابط كرار •
خله وطلع .
وفوك كل هــذا ماسكت رأساً صاح حجي مطلك: تندمون تندمون ياسفله يلعنكم الله
اخذو من القاعه بعد ماصار صراع وَ صياح
ماعرف أبتسم لو احــزن ماعرف اي شي
طلعنه من القاعة درت وجهي على البنات فرحانات وحده شبگت الثانيــة
ووحدة تهمس بأذن الثانيــة كلمة حلوة
اجاني ضياء گال : شويه بس اتنـاقش وياج
اجه واحــد من الشرطــي بأتجاهنه بمعنى مايصير ضياء رأساً طلعلة البطاقــة مالتــة
مشيت شويه عن البنات
گال : الي عليه سويتة وَ أني اعرف حياتج كلها
البارحــة طال التفكير بية وگلت خلي اشوفه
عقجت حواجبي وَ كتله : شكو شنو صار عفية
ضياء : اطلعــج منا بس بشرط نتــزوج
أجاني صوت من ورايــة قريب عليــة: مياده
درت وجهي لكيــتة حنظــل !
يتبع
لاتنسوا التصويت والتعليق •
نلتقـي في بارت جديد
للمتابعة في الانستكرام:tahsin_luqman
دمــتم سالمـيـن
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!