عزيـزي القارئ فضلاً وَ ليسَ أمراً أضغط تصويت لنـشر المزيــد من الروايــة
فستان أحمـر
تحسين لقمان
البــارحه طال التفكير بيه وكلت خلي اشوفه
عقجت حواجبي وَ كتله : شكو
ضياء : اطلعج منا بس بشرط نزوج
أجاني صوت من وراية قريب علية: مياده
درت وجهي لكيته حنظل !
تقرب علينة أكثر وَ گال: أشتغل بره وجبيني كل يوم يعرك في سبيل اطلعج منا واجي
ألگـــاج تتمعشگين •
دار وجهه يريد يروح صحت بي :لحظة ميصير هيج تروح من دون ماتفتهم
أجـه الشرطي علية بسرعـة : تفضلن كدامي السيارة على الباب
ياسمين صَاحـت : حنظل ماكو شي تعال زياره للسجن وتفاهم
أباوعلـة عصبي وبالـگوه يتنفس جر نفس حيل وَذبة على ضياء وراح ، باوعت على ضياء وَ أني أكـول بگلبي ويني وين الــزواج
مشينة كلنه بأتجاة السيارة
وصلنه الهه قبل لا أصعد رفعت راسي للسماء باوعت على الشمس والغيم شوكت بعد أشوفهن
ما أعرف جريت نفس بكد ما أكدر وَ صعدت بالسيارة وَ عيني على الهوى شلون يلعب بالشجر
أجنـي كم شرطية من الي أجن ويانة صعدن بالسيارة وَ سدن الباب
حركت السياره بينة وأحنة كل وحدة بيـنة بالگـوة تجر النفـس
ياسمين: شفتن الله مايتـرك ظالم يعيش
ثرية : أصحح عبارتج اكثر والقانون مايترك ظالم يتنفس الهوى
عقجت حواجبي وكتلهه : وَ برأيج أحـنه ظالمات أو مظلومات •
ثريه : اكيد مظلومات •
ياسمين : لعد شعدنه بالسجن اذا على حجيج شنو نبيع حب شمس اخ يلساني اي واللة
ثريه : احنه هـم ظالمات بس من نــوع ثاني
مياده : شلون من نوع ثاني ليش الظلم بي انواع
ثريه : اي وَ هواي
مياده : مثل شنو عــاد
ثريه : احنه ظالمات نفسنة
تواجدنه بهيج مكـان ختامة السجن أو الموت •
ياسمين : بس بنفس الوكت مجبورات لو عدنه مكان جان ماضلينة بهيج مستنقع لو برأيج اني
وغيرنه من البنات راضيات بـالوضع برحابة صدر •
مياده : صح كلام ياسمين اغلبنة مجبورات وَحده لو أثنيـن تعترف انُ هي جاية برجليه لهنا
ثريه : متعرفن تسولفن خطأ مو هيــج
ياسمين : شلون بله ام حسين
مياده : ام حسين منو
رفعت حاجبهه هزته ونزلته: فراشة مدرستي
بأيــام الابتدائية
طگيـته بضحكه كدام ثريه رأساً باوعت علية وَ كالت : عقلنه وين
صح انجبرنه بس عقلنه وين
سؤالي اللة خلق ألـنة العقل اعتباطاً لو لا بي فائدة نرجعله بوكت أختيار قراراتنة
صفگت ياسمين وكالت : برافو برافو وعيني اذا انتي وجهج مصخم وملطم
والبوب كلهه مسدودة بوجهج شترجعين
لعقلج ماتكليلي
ثريه : من المحتمل اذا رجعنه لعقلنة جوز يعني فعلاً أنطانه حلول ونتائج غير هذا المستنقع
مياده : راح اجي وياج
أبــوج تعارك ويه امج علمود سلفة وصار الصار وأطلكـوا وادهور حالكم وخالج گـام يطالب
بحقه وهو من وصلج لهذا المستنقع لنفرض افتراض علمود اجي ويــاج
لو لو رجعتي لعقلج وحاجيتي شنو القرار الي راح ينطـي الـج غير
بس الاجبار ان تجين لهذا المستنقع علمود تزودين امج واختج وخالج فليسات •
ثريه : اشتغل مجدية او أبيع كلنيس أو أي شي تره هواي اكو شغل شو مصعبات السالفة
اباوع لياسمين كومة جف ايدهه وسوتها بوجهه : من امداج تضلين غبرة ماما هو وينة الشغل
فهميني وينه تردين تحصلين ربع هزي
بيج و ماهزيتي •
مياده: ثريه هو كلامج يعني شويه صح بس مجديه تره تماره ماعرف تعرفيها لو لا
هم جانت مجديه وتگـول شفت الويل بالشارع واذا على سالفة الكلنيس وغيرة
تره فعلا الشارع ميراد •
ثريه : وَ الحل شنو جاوبيني تشدين وصلة وتهزين خصر لو شنو
ياسمين : انتي شو طلعتي من المحكمه صرتي لا انتي ولاغيرج أم الدبــك لاتنسين روحج
الله يرحم جنتي تلزمين البيرة واطكيهه على صدرج وتنزل مثل الشلال على باقي صدرج
ثريه : ياسميــن شو سكتي
مياده : لاتستحين من ماضيج انتي جنتي
مسيرة مو مخيرة
ثريه : والناس الهه الظاهر شمدريها بوَضعي
وها ها اكبر دليل القانون تذكرن كلش زين كلام
الظابط گال القانون مايفتهم هذا الحجي •
وجودكـم بهذا المستنقع جريمة يعاقب عليها القانون •
ياسمين : بس عاد من هذا الحجي الاعوج والقانون عيني فدوه لطولة ولعرضة لمن هو هيج نزيه
وشريف من يشوفج بالشارع مايلمج ويحضنج ويكعدج بمكان محترم بدال
هـذا الشرف الي يبيعة عليج •
ثريه : رحمه لربج هي وحده اثنين مثل حالتنه وبعدين اكلج الجذب صاير بلاش
شيعرفون عن مصدر كلامهه صح لو جذب •
ياسمين : لعد لزمي وصلتج ولزمي سرة
محد يفيدج غير الوصله •
وطكته ضحكه بوجهنا باوعت على الشرطية حاطهه ايدهه على حنجه وَ تباوع علينه رجعت
باوعت للبنات اشرتلهن بحاجبي عليهه
ياسمين : مضيعة شي بينة واني مادري
: والله ياحبيبتي كاعده افكر واجر حسرات على مستقبلج الراح وشبابج الي كضيتي بالوصلة
ياسمين : اعوف الوصله وعيشيني انتي مابيهه شي تره
ضحكة ثريه واني ابتسمت الشرطيه گالت: بعيني دكي بابي وراح تعرفين أثيـر
شلون تتلگـاج ذاك الملــگة .
ياسمين : والله والنعم منج ومن ملگـاج بس اني شمدريني بابج ويــن، منا و أخذيني وياج
طكيناهه ضحكه كلنه وحده من الشرطه گالت لأثير: عوفج منهن بنات ما متربايات ترة
صاحت ياسمين : والله ياحبيبة كلامج عين العقل شكد كتلهه لأمج ربينه زين تره عگـبه نعكس
تربيتج
الشرطيه : شتقصدين
ياسمين : عيوني كلامي واضح وضوح الشمس تربيتنه التحجين عنهه هي ترباة أمــج
اثير : زهره شجاج عوفي البنات حطيتي گـورج وگـورهم
عرفني عليــجن تره طريقنه طويل •
ياسمين : اني ياسمين و هاي المسكينة ثرية وَ هاي الشريفة ميادة
اثير : شنو قضيتكم شنو تشتغليـن
ياسمـين: عيوني نشد وصلة على الخصر . كلاص بيره , ساجده عبيد وَ عـاد يمج الحساب
أثير : مامتحسفه ياسمين على شبابج الــراح
ياسمين : اكيد متحسفه گـضيت عمري مدفونة بين حضن هذا وذاك بس كـليلي انتي الي مثلي
ومثل وضعي وين تروح
اثير : هواي اكو حلول
ياسمين : مثل شنو اللة يخليج
اثير : تره هسه ابسط شي على الي اشوفه العالم
تطلب خدامات أشتغلي خدامه
ياسمين : ولعد اني شنو جنت أشتغـل چايچي بالسوك غير خدامه وشوصلني لهـذا الـدرب باعتني
امي لأبو البيت وها هاي كدامج أنلعب بحالي لعب
اثير : انتي قبل شويه تحجين عن القانون والقانون الله يسلمج هو شمدري بيج المفروض
منج ومن الكل من صار وياج هذا الشي تحاولين تشردين من عنده وأدگـين باب القانون مو تضلين
مستمره بأفعالج بأبـشع مايمكن وتذبين اللوم على القانون والقانون
ياسمين : ودگـيت بابكم شراح تسولي تسجنوهم واني وين راح اروح
اثير : هنا المشكله بعد صارت قانونيه جوز من الممكن يلگالج وظيفه محترمه من المحتمل
يتعاطف ويـاج ويحولج على مؤسسة قانونية تره القانون كل حروفه المكتوبه هي عباره
عن التعاون والعدل والمساواة وياج وغيرج •
ثريه: قانون هسه مو قانون ليش متصارحين نفسج زيــن
مياده : صحيح كلام ثرية
اثير : شلون يعني مو قانون
ياسمين : اوضحلج السالفه , انتو لو قانونكم قانون فعلي وحقيقي جان مو احد موظفيكم
يلعب على الحبلين ايد وياكم وايد ويه القتلة •
اثير : تره كلمتج جبيره هاي , منو الي من عدنه حط ايده بأيد أسيادكــم
ياسمين : شتدرين عيوني شتدرين نايمة ورجليج بالشمس فحـبيبـتي اذا انتي ترديني التجأ للقانون
من يصير القانون نزيه وعادل بذيج الساعة مو بس ادك بابه لا وداعتـج أنام گبــالة
اثير : حبيبتي ياسمين القانون من يوم يومه عادل وشريف وما يتغير حرف واحد بي بس گولي احنه
مايعجبنه العجب وراضيات بشغلنه ليش مدگـين باب القانون على هدفين هدف علمودج
وهدف تفضحين ذوله القتله وبنفس الوقت الموظفين العدنة المتعاونيـن وياكم
ياسمين : اموت بنفــس اللحظة
اثير : شلون تموتـيـن
مياده : المشكلة ذوله ناس عدهم فروع خير من الله نخاف على نفسنه لا أقل ولا أكثر
وترة على بالج يعني اذا حجيت راح تحميني شنو الي يضمن ان اني راح ابقه عايشه ومستقره
صاحت الوراهه: والله حبيبتي ليش اجذب عليج هو كلامج نوعاً ما صحيح
وَ أثـير تره حقهه البنيه كاعده تگلج اموت
واني اگـلج شنو تفكيرهه تفكر انُ تنسجن سنه سنتين وَ تطـلع ولا تموت وهي
ماشايفه لا خير ولا بركه من دنياهه •
اثير : اي ياعيني هسه حتى لو أجي وياج تره هم من راح تطلع من السجن هم راح ترجع لهاي
الطينه وينعاد كلشي يعني اني سؤالي لشوكت تبقيـن هيج منا ومنا
مياده : مادري شگـول و شحجي بس لازم من القانون يحط طريق وَ أتجاه صحيح لكل بنية
أو ولد يتعرض للأنتهاك من قبل أهلة أبسط مثال نوكيا السمرة بنية ويانة اهلها لعبو بحالها لعب
وطردوها خارج البيت وحضنوها القتلة
ياسمين: بلة هاي من يوم يومها شالعة گلبـي
ميادة: شوفي مقصد كلامي الي تتعرض للكتـل وَ الطرد من اهله وين تتوجه وين تـروح
ثريه : بكل بساطه يرحن لنفس الطريق الي احنه مرينــة بي
مياده : معناهه العدد كاعد يزداد والبنات كاعدات يكثرن والفساد كاعد ينتشر اكثر واكثر
اثير : الحل الاتجاه للقانون
ياسمين : نموت
مياده : صح نموت بس على الأقل نموت موتة شريفة
ثريه : شلون يعني
مياده : على اقل البنيه الي مثل دربنه واجهة وصبرت وشردت من واقعهه وَ أتجهت للقانون
وحتى لو ماتت فخــلي تفتخر أنُ هيَ ماتت
هي وَ شريفه وَ كرامتها عال العال •
افضل من حضن لحضن
اثير : وماعتقد اذا توجهتي للقانون راح تموتيـن ما أعرف ليش حاطات هذا المعتقد بعقولجـن
ياسمين : ميادة انتي خبله كلنه نخاف من الموت منو الي تروح برجليها للنار متوهمه ميادة
ثريه : صح كلام ياسميـن خاصةً الي تدري انُ أذا راحت تموت الشافتة عيونة خلتنة نحسب كلشي
مياده : لعد شنو بس لا تردن تگـضن العمر كلـه من حضن مطـلك لحضـن غيرة
و بس لا تردن العمر كله من طگــة أصبع
لطگــة البيرة •
اني مستعده أموت بكرامتي وبشرفي ولا أموت هيج ولو هو ياشـرف ضــل
أباوع لأثير مدت أيدهه علية وگالـت: الدنيا شكد قاسيه وياج
باوعت بعيونهه : هواي فوك ماتتصورين •
اثير : مغتصبيج يعني متقربيلج شنو قصدج ياشرف ضل
ضحكة رأساً جاوبتها ياسمين : الكدامج كلنه ناموا ويانه اشكال والوان والي تعارض تنذب بره
بالشارع يتكفل بيهه الشارع عاد لو ياخذهه لمجرى الخير لو لمجرى التعاسة
مياده: تدرين احنه مفروض نتكرم
اثير : منو انتو لتحجين بأداة نكرة
مياده :أحـنه المغتصبات مفروض نتكرم لصبرنه على كل ألـم صار بجسمنة
لكل سرعه وَ قوة دخلت احشائنه
لكل ضربة على وجوهنا
لكل عصرة صدر
تحسين بيها روحج تريد تطلع
لطبع سنونهم على جلودنه
لكل جرة شعر
لـكل حجاية يهمسة يم أذنج
" اسكتي اسكتي بت الزنى , اسكتي صلفه ، اتحملي بت الكلب
لكل بوسة مطبوعه على الخصر
وتدرين شنو ..
كل هذ الوجع بجف و من يعض جلدج وَ يجره جر بجف يتفنن بيج يحب يشوفج تصرخين وَ تصرخين بكـل قوة عنــدج
ومن ياخذ عذريتج
تحسين نتلة نتلة قوية مشت بكل جسمج •
جرتني ياسمين لحضنهه وبجينه بكل حرگـه , اسمع الشرطيات يبجن على بجينه وَ يونن على
ونينه شنو بيدهن , الوجع مايحس بي غير راعيه
وبوسط الدموع صار هدوء كلش كلماتي جانت كفيلة أنُ تسد كل
حلك يفكر يحجي شي , وَ أخذتني ألافكار طول الطريق شنو السبب ألـي خلة ثريه تكون بهذا
الحال وبهذ الحجي معقوله ندمانه على كل شي مر بيهه وألـة ياسمين متقلبة بكلامها
ماعرف شكد من الوكت مشت بينة السيارة خليت راسي على متن ياسمين وَ غفيت غفوة متلاشية
كل الجوانب ، صحيت على صياح أثير تكعد بينه كعدنه واحنه وحدتنه تباوع بوجه الثانيه
وبعيونه خير من الله اسئلة ، السؤال الواضح علينه شنو راح يصير بينة بعد .
نزلنة مـن السياره ودخلنه ليجوه تلگتنه ألـي على الباب توقيع وبصمه وبعدهه تفتيش جان أنضباط
بهذا اليوم قوي ماعرف شنو السبب , وصلنه للباب الثاني مال السجن هم وقعنه وبصمنه بعدهه
كالت وحده بيهن : ياقطاع ماما
صاحت الورانه الشرطيه : سته قطاع سته حبيبة
صاحت هاي الي على البـاب : قطاع ستة للساحة مكان الحرف
أستغربت رأساً عقجت حواجبي ياساحة ياحرف باوعت على ياسمين وَثريه مستغربات نفس ما
اني مستغربه من الوضع كله , أخذتنه الشرطيه بممر طويل هدوء كلش بعدهه فتحت باب ألنـة
وطلعت كدامنه ساحه كلش جبيرة كالت : استراحه عدكم قطاع ستة دورن على سجينات القطاع مالتكم وتعرفن شنو تسون يلا
لزمـت أيد ياسمين وَ مشينه بالساحة كل وحده تباوع بجهه
الساحه عباره عن سجينات اباوع لليمنى مره جبيرة فارشه وصله وعليهه گـطن مادري شتسوي
بي كلش أشتغربت شنو يسون ذني , صاحت ياسمين : ام فاروق ام حمزه
تعالن بنات ذنيج لكيتهن •
باوعت لياسمين وين ما مأشره صارن كدامي رحنه بأتـجاهن بسرعة
ثريه : يصير نكعد وياج ام حمزه
التفتت علينه وَ گالت : منهو هذا يا ثرية
كبر لفج •
ام فاورق كامت على حيله بوستنه وحده وحده باوعت عليه وكرصتني من خدي
گالت: وجهج بي وجع مال سنين بشرني بنات الحكــم شنو شطـلع
ثرية: يصير نهلهل
ام فاروق: تره اني كاعده على نار ادعيلجن هواي بشرني عاد
مياده : خاله الحمدلله الحكم جان مؤبد
ام فاروق : ياحبيبتي واخيراً صلوات صلوات
ورجعت بوَستنة وحدة وحدة ام فاروق مرة طيبة وعلى نياتهه بس لأسف أجـاهه ولد طايــح صبغة
وهو من وصلهه لـهذا الــدرب •
ام حمزه : جا صلوات عليمن بس لا أزوجت لاله
أستغربنه منو لاله كتلهه : ام حمزه خاله يا لاله هاي
ام حمزه : تضحكين عليه خايبه لج هاي صديقتج العضد مالج شدراني اني شسمه
ضحكنه وكتلهه : قصدج ياسمين
ام حمزه : لا لا مو العود الثانية
ضحكت وكتلهه : ثريه لعد
ام حمزه : اي هاي هاي البت فلك طرج الاسامي كلهه تسمين هذا
طكيناهه بضحكه كلنه رغم ألوَجع والالم المر بينه بس شنو نسوي غير بس نتأقلم ونعيش باقي
حياتنه ويه واقعنه نفس ماهو .
ام فاروق : لا لا ام حمزه رادت تهلهل لأن خطيه الجابهن هنا وعدم شبابهن أنــحكم مــؤبد
ام حمزه : ومنو مؤمل بس لاهو العدم شبابهن هو هذا ياشباب وحدتهن تشيل ماعون ينكسر
شو هاي ألابره لظميهه خايبه ثريه مدري شسمـج أنساج يالله
مياده : لا خاله مؤبد مو مؤمل يعني يضل طول عمره بالسجن
ام حمزه : مـو بنات فلك طرجن اي والله
حبستـن الرجال سنين
تقدمت ياسمين عليها وكعدت بالگاع وكعدنه احنه هم كلنه
ثريه تلظم بألابرة وَ أحنه ملتمات داير مدايرهه
ياسمين : خاله الي يسوي الحرام والي يأذي غيرة اكيد مقامه الاول والاخير لو السجن لو الموت
مياده : ولتنسين ام حمزه شسوه بينه احنه المسكينات كدام عينج راضيه بالصاير بينه
ام حمزه : لا أدوخني ام فاروق ام فاروق
فتحيلي المخده الثانيه
ابتسمت وكلت لأم فاروق : خاله شنو تسون شو مخاد وكطن الله يستر
ام فاروق : باوعي حبيبتي هنا عدنه نظام مره بالاسبوع نطلع بالساحه نمارس بيهه الي يعجبنة
هاي الي تخيط ملابس والي تندف مخاد وغيرة بعد والبنية الي ماتعرف تلتم داير مداير الي
تشتغل الشغله تتعلم منهه اني جنت هنا ماعرف اندف واسوي الكطن ضليت ويه ام حمزه شسوي
اسوي والحمدلله صرت توب
ياسمين : زين فدوه خاله هاي السوالف ماتوكل خبز
ام فاروق : ماتوكلني هسه بس من اطلع عگـبه على الاقل متعلمة شغلـة هسه اعرف اخيط واسوي مخاد والحمدلله
ثريه : زين هاي لشوكت تضلن هنا كاعدات
ام حمزه : ثريه كملتي الأبره لو لا
جا هي ابره ماتلضميها البت طلعت حولة
غصيت بالضحك بسرعة وَ ياسمين تباوعلي وتضحك والمسكينه ثريه تحاول تجيب الخيط
بدائرة الأبرة الى أن أنلظمت ألابرة
وَ مشت بينه الأيام بهذا السجن الروتين يتكرر عليه وعدد البنات يزداد مايقل ضياء أجاني
مرتيـن ورفضت اللقاء بـي لأن أكيد جـاي على مسألة الزواج شتوقع من أنسـان حط أمة بالسجن
وَماعرف شنو صار بأختـي لا حنظل ألي اتواصل وياية وَ لا أبوية سأل عليه طول هاي الفتره كأنما أفتهم منهم مابيدنة شي كملي و الله كريم
اني وياسمين وثريه كملنه سبعة أشهر أنجاز كل وحدة بينة هو واسينة التبجي
و صبرنه الأجتي جديدة على فــراك الشمس والهوى , رتبـنة غراضنة والدموع توكع على وجناتنة
عرفت بهاي الساعة كل اللحظـات الي مرت عليه سهله أمـا لحظة فـراك أم فاروق وام حمزه وبقية
البنات من اصعب اللحظـات وكفتهن وطيبتهن وكرمهن ماينسي أبــد
رجعت ملابسي للسجينات الي عبارة عن دشداشة وَ أخذت دفتر نوارس بعد ماتوسلت بأنعـام لأن
اكو اوراق اريد اكملهن اريد اعرف الاوراق المكتوبه وره مانطقوا الحكم بيهه منو كتبهن
أبـاوع لياسمين وثريه واكفات يسلمـن على السجينات وحدة وحدة رحت وراهن أمشـي
وكل وحدة أطبــع بوسة على وجنتهه وهي نفس الحالة كأنما هاي البوسة راح تضل مطبوعة
على جلد وجهي وتضل ذكرى عميقة•
وصلت لأم فاروق شبگتهه بكل قوه عندي
وبعدتهه عني
ام فاروق : مياده يابنتي انتي ربي يحفظج ويحميج وتشوفين باقي حياتج وتنسين كل
محطة بحياتج مشيتي بيهه صيري قوية ولعبيها صح ولا تتوقعين عمرج راح
كلش متوهمة صدكي واعتقدي يابنتي مرات تجي لحظه من اللحظات تغير مسار حياتج كلهه
بلمح البصر وتنسيج كلشي •
نزلت دموعي على وجناتي وأجتافي تهتز ويه الدموع
ماعتقد فد يوم راح اضوك هاي اللحظة الـتحجي عليهه ام فــاروق
جاوبتها بقمة أنهياري : ام فاروق لا تتوقعين مني انساج أمـرلج كل فترة لحد مايوم تصيرين يمنة
وناكل وياج على نفس الصينية ربي يطول بعمرج
ام حمزه : واني هنا زَراعة فجل مابيجن وحده تاخذني وياهه يلنادرات
ضحكنه كلنه على سوالف أم حمزه رحت شبگـته وبوست بيهه هواي
أطبطب على ضهري وتگلي : دعواتي وياج يوم بعد يوم والله بنات طيبات
وعلى نياتجن لاتنسن زورني هنا بالسجــن •
ياسمين : شلون شلون أنسى ام حمزه غير انتي الروح والريه
ام حمزه : السانج دخيل ربج بكدج اني ماينسمع حسي ثريه ثريه وينج جا مـا تشبكيني
غسل اي والله •
أجتهه ثريه وهي تضحك : شلون شلون ماشبگج
شبكتهه واحنه نباوعلهه سمعنه ام حمزه تگلهه:
مو تزوجين تره الرجال نعوص نعوص
ياسمين بين الضحكة گالت : فدوه خاله نعوص شنو
ام فاروق : قصدهه يتنعوص
ضحكنه ضحك لأول مره يطلع من كلبنة , توجهنه بأتجاه الباب كأنما عرايس
وكفت ام حمزه وصاحت : اوكفن لاتطلعن سون سون دائره وداعية عـاد
ام فاروق : ام حمزه فدوه مو وكتج خلي البنيات يطلعن يشمن هوى الله
ام حمزه : سكتي انتي هوى الله طاير هو هذا وينه
رجعت صاحت : الصواني الصواني وين جيبلي جم وحده
جابت جم صينيه من البنات ووزعتهن على الواكفات واحنة بس نباوع بعيون فرحانة
ام حمزه : وداعيه وداعيه هاي خلي نفرح بيجن
اها بنات
وحده تضحك وحده مبتسمه
وبصوت واحد : ها ها
وعيني وماي عيني يا عنيد يا يابَ
عيني وماي عيني يا عنيد ياياب َ
ردن ردن ورايه فضني •
عيني وماي عيني شنو شنو
كلنه جاوبنة : ياعنيد يا يابَ
اها ياعنيد يا يابَ تسوى هلي وَ كـل الگـرابه
شنو شنو
كلنه : ياعنيد يايابَ
صاحت : يلا يلا الصفگة وياية
ياعنيد يايابَ
دخلت بالنص وتأشر بيدهه وتحرك بحاجبهه منفعلة بكلمات الاغنيه
عيني وماي عيني يا يا شنو
ياسمين : ياعنيد يايابَ
تقربت لياسمين وهي تهز رگبه وأحنه نضحك
تسوى هلي وكل الگــرابه منو منو
احنه : ياعنيد يايابَ
ام حمزه :
كلبي كلبي ارد اكصه بموس يا عنيد يايابَ
والله واجوي بمجانه
اها اها وبعد شنو ام فاروق
ام فاروق وهي تضحك : شنو شنو
راحت عليهه وهي تهز جتف :
دلاني على دروب ياعنيد يايابَ
ام فاروق جاوبتها بين الضحكة والصفگه: ياعنيد يايابَ وشبيها هاي الدروب
ام حمزه وهي تهز رگبة
وتلحن الاغنيه: كلها مهانة •
عيني وماي عيني ياعنيد يايابَ
واحنه رأساً كملنه : تسوى هلي وكل الگـرابة
ام حمزه : ياعنيد يايابَ
دخلت انعام وصاحت : السيارة وصلت يلا بنات نتوجه للمحكمـة بعد وأم حمزة لمي بناتج عـاد
ضحكنـة وَ رجعنه سلمنه عليهن بضحكه ودمعه صعب فراگـهن عليه كلش
وصلنه لباب الغرفة رجعت باوعت عليهن وحده وحده وطلعت بسرعه
مشينـة بالممرات واني اباوع على الحيطان وَ أكـول بكلبي منو راح تطلع ويانه اليوم يارب الطف
بعبادك . اباوع بوجوه ياسمين وثريه مبتسمات وفرحانات فعلا شعور كلش حلو من تكونين طليقه
حره متحرره من أي شي بعد وصلنة لنهاية السجن طلعنه وصلنه للسيارات صعدنه بسرعة
صارت أثير بوجهنه صاحت : ياهلا ياهلا
الف الف مبروك شايفات كل الخير بنات
سلمنه عليهه وعلى البقيه نباوع على ايدينة مابيهه اي قيود بعد نكدر نحجي ونضحك وَ نأشر
براحتنـة فرحانات فرح كلش جبير •
اثير كالت : الاهل منتظريكم بالمحكمه
عقجت حواجبي وكتلهه : يـا أهل الله يسلمج
ضحكت وكالت : أهلــكم منو يعني توصلون وتسلمون عليهم بنات أمانة شنو تحتاجن بلغني
والله طيبات وَ مـا نــاقصجـن شي بس الدنيا غبره ومشت وياجن بالمكلـوب
ياسمين : والله عاد اليوم لأهز جتف للصبح
اثير :ها ها رجعنه
ضحكنه كلنه رجعت كالت : عيني هاي شغلتي مارتاح اذا ماهز شويه يمنى يسرى
وَ مشت بينة السياره والبسمه مرسومه على شفايفنه واللمعه تضوي بعيونه
ماعرف شكد مر من وكت ووصلنه اول مانزلنه دخلنه للمحكمة بسرعه
اخذتنه اثير للقاعة وقعنه وبصمنه وانطينه تعهد خطي ماأعرف شنو فائدتة
بعدها كملنة كلشي وشبكتنة تلاثتنة گـالت : حاليا أنتـن أحـرار اتمنى متعيدن الغلط
لأن الانسان مفروض يتعلم من اخطائه •
دارت وجهه على الباب وگالت: السلامة ترافق كل وحدة بيجن
باوعت على ياسمين وثريه
ثريه تبجي بهدوء رحت بسرعة شبكتهه رفعت أيده اليمنى وَ أطبطب على ظهري وتكلي : طلعنه طلعنه مياده صفينه بعد ميادة
مياده : اي اي بعد ماكو مطلك ولا غيره
انتهى كلشي
ياسمين : احلام ورديه ما أريد امشن خلي نطلع عفيه اثير وين حنظل الباقي
جاوبتنة أثير بأبتسامة : عيني بره واكفين
اخذت ثريه من ايدهه وياسمين كدامنه تمشي طلعنه من القاعه والدمعه بعيني
رشح خشمي ينزل على حلكي امسح بي وميخلص صار كدامي حنظل داير وجهه
وكفت بمكاني واني اباوعله وَ أني أتمـعن بكل تفاصيله عضلاتة سمارة عيونة الحلوة
الجكارة حاطهه صفح
وضايج من الدنيا صحت: حنظل حنظل
باوعلي رحت اني والبنات بسرعة بأتجاهه
وصلت يمة رأساً شال ايده راد يشبكني رجعت
ليوره هو حس گـال : من فرحتي كمت ماحس
على نفسي عذريني ميت هلا
واخيرا طلعتي يايابَ •
ياسمين : وهذا فرحنه واليحبنه يفرح ويانه اها اها وهذا فرحنه
اجه صوت من ورايه : يفرح ويانه
باوعتله ابويه ابويه كريم كاسيته رحتله ركض رميت جسمي بحضنه مكعدي على كرسي دفع
ابوس بي بكل مكان وابجي وخرت راسي اباوعلة تعبان حيل لزمني من وجهي
وكال : واخيراً يابوية شفتج بدنيتي
قبل لا أموت واخيراً بويه
مياده : شلون شلون اعوفك وحدك شلونك بويه
شصاير بيك وين الوجع كلي وينة
بجه بكل حرگـة وجرني عليه يمسح براسي اجتي ياسمين صاحت : ها ها اليوم نفرح ندك ونركص مو نبجي بس عاد كافي دموع شلونك عمي
كريم كاسيته : هلا يابَ هلا منو أنتي
جاوبتة: ياسمين صديقتي نفس القضية وذيـج البنية ثرية
ثريه : شلونك عمو
وتقربت علىه جرت ايده رادت تبوسهه گلها: أستغفر الله لا بنتي سلامة خير وبركه
عليجن بنياتي
اجانة حنظل ماعرف ويـن جـان : كملت كلشي حاليا ظهري يون من التعب
يلا بنات يلا حجي نوصل للبيت ونشبع سوالف
وفعلاً أخذنـة حنظل وطلعنه من المحكمة صعدنة تكسي بالگوه كفانه ثريه دحست روحهه على رجل
ياسمين واني بصف بابا حنظل بالصدر كاعد بكل هيبه وراسه رافعة ليفوك واشوفه
ياخذ نفس من الجكاره ويباوعلي بالمراية
وصلنه البيت واني مشتاقه ومفتقده رفيق , اول مادخلنه صار بوجهي
لابس دشداشه بيضه وطالع مرتب اول ماشافني صاح : جك جك قطار قطار الفرح الفرح الفرح اجوي
رحتله على السريع من فرحتـي شبكته بكل قوه واني أگـلة: اي اي اجه الفرح الفـرح
وخرني عنة ويسوي داير مدايري : جك جك جك جك
ياسمين : هاي شنو شصاير خطيه شبي هلولد
مياده : قصته طويله بعدين تعرفن
حنظل : ادخلن ادخلن جوه البيت بيتكم بعد
بس لا تردون اعزمكم على بيتكم
ضحكنه ودخلنه ابويه گـال : من رخصتكم بس تعبان خلوني أمدد
أستغربت من تصرفات أبويـة شبي هيج رحتلة اخذته بالعربانه دلاني بالغرفه مالتة
دخلت و َمددته على الجرباية واني اباوع على البيت كلش غريب عليه كتله : بويه شبيك تعبان
جر حسره وَ كـال : هيماء بويه ماخذه حيلي كله
اول ماسمعت اسمهه وكعت دمعتي درت وجهي على الباب وطلعت بسرعه لأن بس ابقة حيلي يطيح
صار بوجهي حنظل : لتنسين وضع رفيق
شنو مو وكت أحضــان
أستغربت من كلامة عقجت حواجبي وكتلة : شبيك تره هو الولد مريض
حنظل : وكل مريض ينحضن رايح لغرفتي فوك أبـدل علمود اطلع وراية شغل
اباوعله عافني وراح وهو بس ينفخ گلت بكلبي تعاي يمياده وطلعيلـج كلب ثاني بعد
اباوع ماكو ياسمين مشيت شوية لگيت ثرية بالمطبخ ردت أدخل يمها
اندكت الباب باوعت ماكو أحد منو يفتحهه ثرية باوعتلي وَ گالت: روحي فتحيها وأذا هـاي من ورة الباب وَ شوفي منو
باوعـت للدرج حنظل تـأخر مانزل طلعت للحديقه وصلت للباب گلت: منو على الباب
ماكو أي أحـد محد جاوبني فتحتها بسرعة
طلع بوجهي ضياء ابتسم اول ماشافني گـال: شلونج مياده غير من سمعت بالخبر
رأساً اجيت گلبـي طاك عليـج اكو احد جوه بالبيت
كاعده احاجي اطرده لايسوي مشكلة
اجه صوت من ورايه جفلني تجفل
باوعت حنظل طالع بالفانيله وعضلاته بارزه اكثر تقرب علينة بسرعة
بلعت ريكي رأساً صاح:منو على الباب
مياده: مجدي هسه يروح
حنظل:لعد شبي وجهج مخطوف
صاح ضياء:حنظل يابَ حنظل هذا أني ضياء
اباوع لحنظل عيونه صارن بگصته شريانه من يم الرگـبه بين أكثر تقرب بسرعة بأتجاه الباب
نتل ايدي اليمنى وضغط عليهه بكل قوه
مياده:ايدي ايدي
گلي بهمس:أدخلين ليغاد للداخل بسرعه
عتيت ايدي من ايده وصاح صوت رج البيت رج: ضياء خوماكو شي يابَ حظرة القانوني
ختلت وره الباب علمود اسمع شنو راح يحجون لأن شكل حنظل عصبي كلش،
ما أعرف ليش هو صاير هيج وشنو المتغير بي
أسمع ضياء يگله:مياده جاي عليهه بلا زحمه
صيحلياهه ماكدرت احجي وياهه قبل شويه
أباوعلهم من زرف الباب اشوف حنظل سحب هوى نفخ خدوده وضربه بعكسه بكل قوه، رأساً طلعت وراه
حنظل: أبن الكلب واكف كدامي وبكل عين كاعد تگلي طلعلي عرضك احجي ويا
ضياء:ضربتك هاي اردلكياهه بالقانون وخلي ايدك بذيج الساعه تفيدك
جريت حنظل من ايده: مروتك مايدري وحجه هيج امشي امشي ادخل
ضياء: خلي يولي هلمعفن چبينه
دفعني بكل قوه وراح دخل ليجوه وهو يطلع السانه يعض بي يدردم بكل سرعه بكلمات بالگوه أكدر افتهمهه: أبن الزنى، أبن التاجر
امشي وراه واني اهدي بي صحت بصوتي: ياسمين ثريه يمعودات أنهـد البيت علينه تعالن
رحت وراه دخل الـغرفه راح بأتجاه نضيده مال
فراش وكعهه بالكاع دوشك وره دوشك الى أن طلع كدامه مسدس صغير شهكت بسرعة وحطيت
ايدي على حلكي اخذ السلاح وطلع موجر للشارع اركض وراه اريد اصيح اريد اعيط ماكدر احس
لساني أنبلع،وصلت وراه للشارع لكيته لازم ضياء من ياخته وحاط المسدس براسه
ويگله:لك تطلب عرضي وكدام عيني
روحك أطلعهه اليوم •
يتبع ..
لاتنسوا التصويت وَ التعليق •
نلتقي في بارت جديد
للمتابعة في الانستكرام:tahsin_luqman
محبـتي وَ سلامي للجمــيع
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!