رواية فستان أحمر الفصل السابع 7 - بقلم tahsin_luqman

عزيزي القارئ فضلا ً وَ ليس َ أمراً أضغط تصويت،
لنشر المزيد من أحداث الروايه،

       فستان أحمر
                    تحسين لقمان

جَرني للبيت وَ أني وراه أتعثر وَصلنه للهول دخل وصاح

: ياسمين حضري جنطتج وجنطة مياده ترحون ويايه للبصره

اني وسمعت هيج , انغمه عليه مباشرتاً , لكيت روحي بغرفه سوده نايمه على جربايه من حديد ,

واكو جسم خشن كدامي , محطوطه عليه وصله بيضه وبي ضوه ابيض كمت من الجربايه

تقربت باتجاهه , وَ كلت : منو انت ,

حرك راسه يمنه ويسره ماحجه اي شي مديت ايدي على الوصله البيضه جريته حيل كمزت

رئساً طلعلي وجه رجال جبير بالعمر بي شخطات وجروح عميقه رفع راسه حط عينه عليه

وصاح بوجهي : تعاي مياده تعاي تعاي اني راح اصير قريب عليج

بلعت ريكي من الخوف وكلت : منو انت ، منو منو
انفجر راسه كدامي بسرعه ,

كمت على حيلي وصحت : منو منو شنو هاي

اجتي ياسمين تركض : أسم الله أسم الله الزهره كابوس كابوس حبيبتي اوكفي اجيبلج مي

راَحت ركض جابتلي كلاص مي وَأجتي : هاج هاج شربيلج شويه يعمري

اخذته منهه وايدي ترجف وراسي كلش مصدع واحسه راح ينفجر ,

شربت من المي وكتلهه : عفيه وين الحجي شنو نروح ويا ماكو والله ولا اروح ,

ياسمين : مياده معقوله الج نفس تبقين هنا يم امج ,

مياده : ومنو كلج ابقه يمهه واذا تحبيني عفيه لتكولين كدامي هاي امي أني امي ماتت

وراحت •

حطت ايدهه على جتفي وكالت : انتي هسه مقهوره وضايجه ارتاحي شويه ,

ونروح ويه الحجي افضل منا وداعتج

مياده : شدتحجين ياسمين شلون نروح ويه الحجي , وهو منو وأروح ويا ماريد اي شي هسه

تماره مو ابوهه ذبهه بالشارع وكامت تبيع علك ومي ومدري شنو وَ الله رفع من حياتهه

من الاسوء للافضل ودزلهه ولد الحلال دكاتره والحمدلله كدرت تعيش نفسهه ,

جوز اني يصير ويايه هيج وجوز الاكثر •

ضربتني على جتفي وكالت : تماره بنفسهه كالت شفت الويل والعذاب بالشارع وتماره

ابوهه ذبهه بالشارع يعني تخله عنهه ماعدهه احد وين تولي البنيه شنو تنتحر فأنجبرت تشتغل

بالشارع وتبيع علك , بس انتي الحجي موجود يمج ويكدر يعيشج

صحت عليهه : كافي كافي سكتي الحجي موجود ,

اسئلج سؤال منو يكول فلوس الحجي حلال ها منو يكول حلال فهميني ,

شو كله عرك ونسوان ولعبان نفس وين الحلال بالموضوع ,

ياسمين اذا العنتين مالتج صم حلكج بجم محبس ذهب ومدري شنو اني ميمشي عندي هذا الحال

ياسمين : بس الحجي دكتور باطنيه ماما، وراتبه خير من الله وعيشته هناك تختلف ماكو بنات

ومدري شنو بس مهره هناك وجم بنيه وهم حبابات ليش اجذب عليج °

مياده : ياسمين اني معليه ماروح لا ويه الحجي ولا أي بشر اني كايمه الم ملابسي واطلع بره

تردين تجين ويايه هلا بيج ونتشارك اللكمه والميه متردين مشكلتج هاي

شسويلج ضلي مجلبه بفلوس الحرام *

ياسمين : صعبه أترك هاي حياتي مو بيدي , يعني اني سنين اكل واشرب براس ام مازن والحجي

تاليهه اجي اخونهم واغدر بيهم واكسر ضهرهم واولي وياج بعد مصار بيني وبينهم زاد وملح

عذريني والله ماكدر صعبه كلش عليه ،

مياده : اكلج عيوني اني المن متعبه روحي وياج هو شو من يوم يومنه نعرف هاي السالفه ذيل

الجلب ماينعدل ابد ضلي بالزاد والملح مال الحرام

ياسمين : مو تزعلين عليه بس ماكدر اخونهم

مياده : يعني انتي تخافين من الحجي وام مازن ان تخوينهم وتغدرين بيهم والله الي خلقج

وانطاج كل هاي الحبشكلات العقل والعيون والحلك والايدين مافكرتي بي ماكلتي حرام

ماكلتي هذا الله عكبه اوكف بين ايديه شنو اجاوبه من يكلي شنو اعمالج بالدنيا ؟

ياسمين : والله عيناي الله ممقصره ويا بشي صلاه اصليه بوكتهه ومينقص منهه اي شي وكامله

مكمله احسن من هواي ناس , واذا على هاي السوالف ربج رحمان و رحيم و غفور

مياده : هاهيَ عيوني براحتج , كايمه اني انزل ابلغ الحجي

ياسمين : واني كايمه احظر جنطتنه

مياده : ليش شكو

ياسمين : انتي شنو مخبله والله يالله تنزل الحجي تبلغه تريد تطلع ماما هذا الحجي فكي عقلج زين تهي بهي

مياده : مو بكيفه نازله هسه واريد اشوف ياهو يوكف بوجهي

ياسمين : بكيفج يعمري نزلي بس تعمين على روحج

ماسمعت كلامهه درت وجهي باتجاه الباب ورحت فتحته ونزلت ,

ليجوه لكيته كاعد على التخم بالهول ومصعد رجليه والريمونت بيده يباوع مسلسل عراقي ,

كتله : حجي ممكن شويه

عدل كعدته حنحن بصوته وكال : تعاي كعدي احجي

مياده : اني اريد اطلع

عقج حواجبه وكال : وين وين اطلعين خير شنو

مياده : اوكف لتاكلني

صاح : الفاظج يلكعبه انتي شنو من طينه متكليلي

مياده : المهم اني ماجايه أتعارك كل الي اجيت

عليه ان ابلغك راح اطلع من البيت لاريد شغل ولا هم يحزنون

كام على حيله وصاح : طلعه منا ماكو وانتي هسه ترحين تلمين هدومج انتي وَ المطموره ياسمين

ترحين ويايه •

مياده : يعني شنو جبر اروح وياك ووين ماخذني وياك وبصفة شنو رايحه وياك غير افتهم

الحجي : عندي اقتراح انتي مو تردين شغل تشتغلين ؟

مياده : اي اكيد اريد وين الجديد بالموضوع ,

الحجي : الجديده بالموضوع ان ُ ترحين تشتغلين يمي وهم خدامه

مياده : اريد اشتغل خدامه عادي بس يمك لا منو يكول فلوسك حلال

بعدني مامكمله كلامي تقرب عليه وضربني راشدي بكل قوته صاح : لهنا وبسج عاد انتي شنو كل هذا الضرب وواكفه جدامي تتراددين لج اني اكبر زلمه

مشورب من يوكف كدامي يبول على نفسه تاليه أنتي تجين توكفين هيج كدامي

رحت ركض للغرفه , أركض للغرفه وامسح بدموعي وادردم ويه نفسي : كافي انتن كله

من وراجن كلساع وتنزلن وتبينن ضعفي كدامه •

دخلت للغرفه وَ كتلهه : كومي حضري جنطتج موافقه اروح

ياسمين : من البدايه وكولي عليمن هاي العياره والاكشن كله والله يالله

صحت عليهه : البيه مكفيني سكتي عاد

ياسمين : من راح ترحين هناك راح تحسين بفرق شاسع بس العله ، عندج مهره كون تحبج

وادخلين كلبهه بسرعه عاد انتي وشطارتج ,

مياده : معليه لابمهره ولا نيشان مره خدامه رايحه اني

أباوع على ياسمين تحرك بشفته منا ومنا هزتلي جتف

وكالت : عيناي يمه يمه العرامه والله يالله يوم العلم فلوس حرام وتعوجين بحلكج وَ كذا

مياده : لعد شسوي اني امام الله ورسوله معليه بأي شي يصير وَ بأي شي أستلمه

ياسمين : تعاي عيوني تعاي نلم ملابسنه احسللنه

رحت للكنتور فتحته و طلعت هدومي اصلا قليلات ماعندي ملابس هواي ,

مياده : اكلج اني ملابسي قليلات شاخذ متكليلي ,

ياسمين : يمعوده اني صح عندي ملابس راح اخذ قليلات لان اصلا بس نروح هناك نلكه غرفه

كامله مكمله , ومهره هاي الملابس تلزمهن هي والجنط تحركهن حرك

استغربت اكو واحد يحرك ملابس كتله: لحظه شنو السالفه ليش تحركهن

ياسمين : ماما مهره عدوهه الي جاي من ام مازن او الي قريب من ام مازن تكرهه كره

لام مازن هسه كليله , مستعده شتشوفين راح تكلج , شيطان ولا ام مازن

ضحكت وكتلهه : يعني صدك واصله لهل درجه ليش هاي العداوه والكره بيناتهم

ياسمين: لج عيوني يوم من الايام مهره سكرت عاد مهره من تسكر متشوف شي كدامهه

لو مدري منو يطلع ، الحجي شكده شكبره ميكدر يوكف بوجهه

مياده : معقوله مهره اقوه من الحجي

ياسمين : اكيد اقوه لان مهره عيناي وراهه ضهر يكسر ظهور

مياده : يعني اكو غير الحجي

ياسمين : حبيبه هسه شعلينه احنه المهم عاد سكرت مهره وكومي اخذي رجال ام مازن ودخلي للغرفه

مياده : لحظه منو رجال ام مازن

ياسمين : لج انتي شكد غبره هذا أياد ابو المشكله , هو نصيحله رجال ام مازن

لان الوحيد يدخل على ام مازن من ناحية الفراش واللهم اعوذ منهم

ضحكت وكتلهه : خرب يومج على هاي سوالفج اي ومهره اخذت اياد ودخلت للغرفه وشصار

ياسمين : اجتي ام مازن ادور على اياد بين الموجودين ماهو اياد مالكته , صاحتني كتلهه

بالغرفه اخذته مهره ودخلت , هي عيونهه صارت بكصته عيني مياده تشوفين ام مازن بين الناس

واكفه وادك بالباب وتصيح : ساقطه بت الكلب طلعي زلمتي ,

ومن هاي السالفه تكافشن من الروس وحده تجر بالثانيه ولهذا اليوم وحده تضوج من الثانيه ,

ضحكت وكتلهه : كبر يتعاركن على رجال شكد ساقطات

ياسمين: بيج خير احجي هذا الحجي كدام مهره حرام اله تعفصج وتحطج جوه أبطه

مياده : والله يالله بس انتي مكبرتهه هسه تطلع انكس من ام مازن

اباوع على ياسمين صفكت بيدهه وكالت : لج هاي مهره علنيه كلش يعني صدك انكس من ام مازن

تفتحين الثلاجه البطاله مصفطتهن واذا ماكو مي رئساً تجر قطيه تكسر وتشرب

خربت ضحك على كلامهه كتله : هاي مهره امريكيه بس بنسخه عراقيه مصغره

ضحكنه سوه وكالت : يمعوده هسه يجي اليوم الي تضوكين كلشي

كتلهه : اكلج انتي بس لا شاربه

ياسمين :بس بيره ماشرب غير شي , واشرب بس من اطلع برزق يعني من تجيني ليله بيهه رزق اشربلي قوطيه وَ أولي

مياده : والله مادري شكول زين هم اكو بنات اكثر منج

ياسمين : لج يا اني ياصخام اصلا اني الكدامج شي قليل هسه ترحين هناك وتتعرفين

على نوكيا السمره وشوفيهه شلون تشم

مياده : ولج شنو هاي نوكيا

ياسمين : هو اسمهه نوكيا السمره ماشي عليهه هناك

مياده : خطيه لاعبين بأسم البنيه لعب , جماله انوبه تشم

ياسمين : هناك البنات صدك ونسه ضحك وسوالف والحلو بالموضوع كلشي علني يعني لاسريه ولاهم يحزنون ,

مياده:والله مادري شكلج عاد انتي تهزين براحتج

ياسمين: لامو شغلة أهز وكذا لا بس هناك مهره تغني والبنات هم وتاخذين راحتج هناك أكثر

مياده : هناك جم بنيه

ياسمين :هناك خير من الله اعتقد 8 بس هسه جوز كثرن لا ماعرف

مياده : انتي صارلج شكد من تاركتهم يعني مارايحه هناك

ياسمين : يمكن مايقارب شهرين او تلاثه

مياده : والله مادري شكلج كون كلشي تمام هناك

ياسمين : لتخافين الحجي هناك , فركت وجهي وكمت من يمهه بدلت ملابسي وهيَ نفس الحال

بدلنه وكملنه كلشي على حسب الاصول واخذنه جنطنه وتوجهنه لباب الغرفه فتحته

تماره : ها ها راح ترحون

ياسمين: مثل متشوفين تموره حبيبتي

تماره : ياسمين حبيبتي ماعرف شلون راح اكدر على افراكج بس كل الي اريدج تعرفي ان ُ انتي باقيه بالي,

مياده : وصح اني تعرفت عليج بأيام قليله بس الله يشهد كلش حبيتج وانتي طيبه وحبابه

ودائما راح ادعيلج الله يبعدج عن كل مكروه

كرصتني من خدي وحضنتني كالت : يمه يمه اروح فدوه للبنوتات

وخرتني من حضنهه وكالت : انتي هم انسانه طيبه واتمنى ماترحين بس شنسوي الدنيا كاتبتلج هيج والله

كريم مع الف سلامه يروحي والله يكتبلي العمر واشوفج مزوجه ومستقره

ابتسمت بوجهه ورحنه اني وياسمين من الدرج لكينه الحجي واكف

كال : ها يابه نتوكل بس اجيب المفتاح واجي

راح الحجي للغرفه وطلعت أمي كالت : تمنيت تكعدين ويايه وتفهميني ونتعاون اني وياج ونبني مستقبلنه

تفلت كدامهه وجريت ياسمين من ايدهه وطلعنه للحديقه هي رئسا صاحت من ورايه

: هاي هيج مياده أتفلين كدامي لج الجنه تحت اقدامي روحي يمياده ماراضيه عليج دوم

ماجاوبتهه ابد ، ضحكتني الجنه جوه رجليهه الجنه تكون تحت رجلين الام الي متقيه الله

وصاينه بيتهه وجهاله مو جوه رجلين الام الي جايبتني للدنيا بالحرام

وذابتني بدار الايتام, اجه الحجي باوعلي من فوك ليجوه اسمعه يدردم

: هاي الملابس كون تنحرك مو تلبس , باوعت على ملابسي كلشي مابيهن حلوات ,

عاد اني هم ذبيتله كلمه بصوت ناصي : هاي العالم شلون تلبس دداديش ماعرف يحسسوني رايحيين يحلبون صخول

ياسمين باوعتلي كالت : انتي ويامن تحجين

اسمعه يكول : هين هين صخول مو

صعدنه بالسياره وام مازن واكفه بالباب تبجي وتماره تسكت بيهه ,

كلت بكلبي : لجنهم وبئس المصير ليوم الدين ماسامحج ابد ,

تحركت السياره ومشت بينه مسافه بعيده والحجي عالك اغنيه لسعد الحلي بدايته

" مادري يايمه شجرالي " وطول الطريق يباوعلي بالمرايا ويعدل بالشماغ ,

وياسمين كالت

ياسمين : اني جعت تاكلين ويايه كليجه

مياده : لج احنه طلعنه سوه منين جبتي الكليجه

ياسمين : حجي فدوه لطولك انطيني العلاكه الي محضرهه مال الاكل

الحجي : اتمنى من ذولاك الناس من يجوعون يكولون تعال ناكلك ,

كمل كلامه وغمزلي , حرام لو ماخاف على روحي جان غميته ذيج الغمه ,

صاحىت ياسمين :يحسون حجي يحسون عن قريب دنيطيني العلاكه بطني ماتت

الحجي : روحج بالاكل هاج يابه هاج ,

ياسمين : حجي عند البطون تعمه العيون اعذرني عيناي

بدينه ناكل اني وياسمين اذكرت سالفة زيد كلهه من راد ياسمين ,

باوعت على ياسمين اشرتلهه •

وكتلهه : تعاي هنا كلش تقربي مني اريد اكلج شي مهم,

ياسمين : خير يا ستار احجي لج وكعتي كلبي

مياده : لا ماكو شي بس مروتج نصي صوتج شويه هذا الموضوع حساس

اشرتلي براسهه معناهه اي

كتلهه : تعرفين زيد انتي ومنين تعرفي

ياسمين : اني شايفته بس ماكاعده اذكره وين

مياده : حاولي تذكرين لان الموضوع كلش مهم مو شلون ماجان

ياسمين : والله ولا كاعد يجي على بالي بس اني شايفته انُ يشتغل ويانه من بعيد بس ماذكره

بالشكل المضبوط المهم احجي شبي ,

بس لا سوالج شي

مياده : والله ياسمين الولد كلي اني معجب بياسمين واريدهه الي

ياسمين : لاهاهيَ مابقه غير بس زيد وشناقصني اني وازوج هسه سكتي عفيه سكتي

مياده : تقدمه لخطبتج من عندي بجف وموضوع اهله بجف

ياسمين : عزه بعينج حتي اهله تعرفتي عليهم

مياده : لايمعوده هو حجالي المهم , الام خاينه الاب وطارديهه بره والاخت مكتوله موت والكاتله

ابوهه , وهسه الاب محكوم مؤبد بتهمة كتل بنته , والتجاره باعضاء الانسان وبموت الولد الي

نامت ويا *

ضربت رجله وصاحت بصوت عالي : لج هاي شلون صار هيج

الحجي : ها ها شبيجن , عفيه بنات متعلمات على الصياح ساقطات دخل نوصل

واعيد تربيتجن من جديد ,

مياده : ماكو شي حجي بس هاي ياسمين خطيه كرصتهه بگايه

ياسمين : مو بگايه مدري شنو توجعني حيل

الحجي: هو انتي كلشي يوجعج من يوم علاقتي بيج لهذا اليوم تصيحين •

اباوع على ياسمين خجلت وبلعت ريكهه واني درت وجهي على الجامه من الخجل والحجي

ولايمه السالفه مشغل الاغنيه ويردد وياهه ,

رجعت باوعت على ياسمين كتلهه : نوصل واكلج عيوني هنا منكدر نسوي اي شي ,

هزت راسهه ورجعت نفس ماجانت , ضليت اباوع للطريق , صحراء وبيهه خيم اذكرت ماما منى

من جانت تحجيلنه قصص انُ ذني الخيم يصيحولهم اهل البدو اباوع عليهم حاطين

تانكي ومادري شنو ضليت افكر ذوله شلون يعيشون هنا وشلون يتحملون حرارة الصيف ,

مشت بينه السياره ونزلنه يم سياحي،

مياده : عفيه سئلي الحجي شكد بعد ونوصل هسه حتى تكسرنه تكسر

ياسمين : هو هم هيج , حجي حجي فدوه لطولك شكد ونوصل

الحجي : هاي بويه راح نوصل اقل من الساعه هناك واصلين ,

ياسمين : مياده البصره طريقه يضوج كلش يمعوده الف الحمدلله من وصلنه

مياده : يلا هم صدك الف الحمدلله

شربنه عصير برتقال اخذناه سفري وبدينه نتمشى بحديقة المطعم لان تعبنه من الكعده هم شويه

نحرك روحنه , الى ان صاح الحجي : يلا بويه امشونه نروح علمود نوصل ونرتاح

هم صدك صعدنه بالسياره بسرعه وكبل اول ماحركت السياره ,

حطيت راسي على الجامه ونمت نومه عميقه , الى ان كعدت على صوت الحجي يصيح ,

الحجي : يلا وصلنه كعدن شنو ماخذجن سبي

مياده : يمعود لو ماخذنه سبي هم أرحم شنو من طريق متكلي موت تعب

جر حسره وكال : هي لو الناس تمشي عدل وتخليني اريحهم من هذا التعب بيدي

بس اخ يادنيا منو يقبل •

ياسمين : يقبلون حجي يقبلون

باوعت على ياسمين صفح وكتله : انتي ليش متسكتين , رئساً عوجتي حلكج

دخلنه بستان جبير بي أربع غرف , عمال كومه كلهه من شافت السياره بدو يتقربون باتجاه السياره ويصيحون

" هلا بيك هلا

" هلا بيك حجينا هلا هلا نورت الديره اليوم

" لك عبيسان اجانه الحجي اليوم ألحك جيب حمديه واذبحه جوه رجلين الحجي الحك يابه الحك

باوعت على ياسمين

كتلهه " لج شنو حمديه بشر ولج بس لا تذبحون مره يا يا

ضحكت وكالت : لا عيوني هنا الصخول يسموهن اسامي حمديه ومدري شنو صابرين العبده تعرف اساميهن

الحجي : بسجن من الحجي ماتشوفن زلم كدامجن , اطبك السياره يم الباب وتنزلن كبل

للبيت والي ترفع راسهه اطر راسهه طر

اني من يمي خفت جسمي كله يرجف، طبك السياره وكبل اني وياسمين فتحنه الباب وركضنه

ركض ليجوه , دخلنه لكينه سنك وكاونتر كتلهه

مياده : هاي تاليتنه ندخل مطبخ كبل

ياسمين : لج شو مهره ماهي معقوله طالعه

مياده : والله عيوني كلشي تتوقعين على الحجي الي حجيتي كمت كلشي اتوقع

ياسمين : بله تعاي ورايه نروح للهول

تمشي كدامي واني امشي وراهه طلعنه من المطبخ مشينه ممر طويل سمعنه صوت ديجي

عالي وطك اصابع وضحك مو طبيعي •

مياده : يمعوده وين رايحات تعاي نرجع صدك جذب

ياسمين : لج لتخافين جوز كاعدات يدربن

مياده : هسه شنسوي

ياسمين : ندك الباب قابل اكو غير هذا الخيار

دكينه الباب مره ومره ثانيه محد فتحهه النه رئسا
كالت ياسمين : نحسب للتلاثه وندخل وشيصير خل يصير

مياده : يلا

كلنه بس واحد ودخلنه بسرعه , صارت بوجهنه مجموعه مال بنات وحده كايده الثانيه ويهزن هز

ياسمين انتعشت كبل طفرت على وحده سمره كلش كابلتهه وتهز وياهه

ياسمين : تعاي تعاي مياده هاي صابرين العبده

اباوع على صابرين العبده تتقرب عليه وتلم بصدرهه ليفوك وتهز بركبته ,

صابرين العبده : هلو عيني هلو عصفور جديد هذا , جديده قديمه

مياده : مافتهمتج عيوني

ضحكت ضحكه طويله وكالت : يمه يمه العياره اوي فدوه اروح لهل خدود

صاحت عليهه ياسمين : لا لا عبده تره مياده جديده وخدامه

صابرين العبده : لج عيني ركصي ركصي وعيشي الدنيا مثلنه دتعاي تعاي

جرتني من ايدي واني بس اباوع حطتني بنصهن وهنه التمن عليه وحده تهز جتفهه ووحده تضربني

على جتفي ووحده تتقرب عليه وتدفعني ,

طفه الديجي واجتي صيحه عاليه

: الحجي هنا بالهول كاعد بسرعه تبدلن , وترشن عطر وتحظرن نفسجن تسلمن عليه وتكعدن يم

ماكو وحده تتحرك من عده اذا ماحاط بصدره خمسه وعشرين فاهمات لو اعيد ,

كلهن كالن اي وكلهن اطشرن بقينه اني وياسمين وهاي البنيه تقربت عليه اباوعله

لابسه فستان فضي مفتوح من جهة الخاصره لنهاية الرجل كالت : عيوني انتي مياده ,

وتباوعلي من جوه ليفوك وتأشر باصبعه *

مياده : اي اني مياده انتي منو

كالت ياسمين : مياده هاي مهره ومهره هاي مياده خدامه جابه الحجي

اباوعلهه زين مربربه ومكياجه طوخ الحواجب دبل تقربت عله وشمتني من جتفي

كالت : شو اشم ريحة ام مازن البايره •

ضحكت ياسمني وكالت : لا لا هي هم مثلج تكره ام مازن اطمني

مهره: اي عود هلو بيهه كون تسمع الكلمه ومتضل متفنكحه

مياده : والله ياحبيبتي اني ماشتغل عندج اني خدامه عند الحجي عندج شي لتحجين ويايه لا

روحي للحجي واحجي ويا وهو عود يجي يبلغني

ياسمين : ها ها مياده

اباوع على مهره طبكت حواجبه •

وكالت : اها حلو وعندج السان , شوفي حبيبتي
وبدت تتقرب عليه واني ارجع ليوره حصرتني

بالحايط حطت ايدهه على حايط •

وكالت : خاف عبالج تخوفيني بالسانج الله شاهد بجكارتي ازرفه زرف هسه اني ماريد اهددج

بسلاح ومدري شنو لا متوهمه كلش اني مو مثل ام مازن وتهديداته الفاشله , ني مره ايدي

والسجينه وها ها خاف عبالج اضربج لا ماما اجلخج تجلخ وسئلي الي بصفج شسويت بأم مازن

شالت ايده وحطتهه على صدري ضربتني عليه علكيفه

وكالت : وهنا عندي كله تهز هذا الي ميهزه مصيره الشارع وطبه مرض ولتكليلي

الحجي اثنينكم برمشة عين احطكم بجوله •

دارت وجهه عني وراحت بلعت ريكي وباوعت

علي ياسمين : ولج هاي تاكل بشر
ضحكت ياسمين كالت : شعبالج عيوني

مشى الوكت بينه بين سوالف وضحك تعرفت بس على صابرين العبده شلون ما جان الى ان صار

الليل وكلما راح بغرفه , غرفتي وحدي وياسمين نفس الحاله , دخلت الغرفه حلوه ونظيفه

واني كلش تعبانه الطريق طويل رئساً ذبيت جسمي على الجربايه ونمت ,

فزيت على صوت بالحديقه بلعت ريكي وكمت
اسمع بسبسه مال بنات , ورجال صوته ناصي كلش

وخرت البرده علكيفي شفت مهره وبنات اثنين يسحلن برجال فاقد

ملابسه مشككه وكل جسمه دم , والدم يجري من حلكه وذني يسحلن بي

يتبع ...
لاتنسوا التصويت والتعليق لنشر المزيد من احداث الروايه،
حساب الانستكرام الرسمي:tahsin_luqman4
مع خالص مودتي لكم
تحسين لقمان