رواية فستان أحمر الفصل الثامن 8 - بقلم tahsin_luqman

عزيزي القارئ فضلاً وليسَ أمراً أضغط تصويت لنشر المزيد من احداث الروايه،

         فستان أحمر
                        تحسين لقمان

وَ الدم يجري من حلكه وذني يسحلن بي طالعات بي لكبل ,

اباوع عليهن اخذنه سحل لبيت من ذني البيوت فتحتلهه الباب وحده من البنات ومهره سحلته

سحل ليجوه ورجعت سدت الباب ورجعن ركض ليجوه ,

اني تفاجأت منو هذا الرجال المكتول وليش مهره بالذات تسحل بي وليش خايفه ,

كومه اسئله اجتي بالي , وحايره شنو جوابهن , سديت البرده ورجعت لفراشي غطيت راسي زين

قريت اية الكرسي بسرعه ثكلن عيوني ونمت نومه عميقه ,

فزيت على صوت الباب تندك 

مياده : منو على الباب,
اجاني صوت ياسمين وهي تصيح

ياسمين : لج بت الاوادم كومي يمعوده كلهه كعدت بس انتي يلا منتظراتج اني

والبنات خلي نتريك  •

مياده : جايه جايه هسه وراج ,

كمت من فراشي بسرعه عدلت شعري وملابسي رشيت عطر وطلعت للحمام مالتنه ,

الطابق مالتي اني وياسمين والحجي بي حمام مخصص النه ,

دخلت اله تمضمضت وطلعت ,

سمعت ياسمين تصيح

ياسمين : لج صخيمان يمعوده متنه جوع نزلي 

نزلت الدرج واني اكلهه : نزلت والله نزلت , تقربت ليكدام عليهم وكلت 

مياده : صباح الخير 

صابرين العبده : هلا عيوني هلا هاي شبيج نايمه لحد ألان شو انتي لا كلاص بيره ولا هم يحزنون

شبيج متوثه لحد ألان , اباوع عليهن كلهن يضحكن ويشاقن كامت مهره وكالت

مهره : هسه شويه شويه ندربه عيوني ، وخروا عنهه بعدهه خطار , تعاي كعدي بمكاني اني متريكه من الصبح

ياسمين : ها ها مهره بيمن متريكه , وغمزتلهه 

صابرين العبده : صايره تتريكين من ورانه بيمن بيمن ولج مهراوي 

كلت بكلبي  جماله يدلعوهه مهراوي دخيلك ربي شهل الناس " جريت القوري وكعدت اصب الجاي واكل , 

ياسمين : مياده عيوني 

رفعت راسي وكتلهه : ها عيوني ياسمين
 
ياسمين : هاي البنيه  الي بصفج نوكيا السمره الي حجيتلج عنهه 

باوعت عليهه سمره كلش , بس جمالهه كلش حلو ومعانيهه حلوه كالت : هلو مياده 
مياده : هلو حبيبتي شلونج 
نوكيا : والله ياعيوني هذا الاسبوع كلش تعب بتعب وفوكاهه اجانه الحجي 

شلت كلاص الجاي شربت منه شويه وكتلهه : ليش تعب يمه شو انتي تشتغلين الشغل هذا ومحد جابرج 

ياسمين : مياده مياده مو وكت الحجي تريكي هسه 

نوكيا : حبيبتي انتي بعدج جديده شويه شويه تتعرفين علينه هسه تريكي انتي الف عافيه 

رجعت باوعت على الصينيه وبديت اكل والبنات يشاقن ويضحكن ,

كملت ريوكي كمت شلت الصينيه اني والبنات واجتمعنه كلنه بالمطبخ هاي الي تمسح الكاونتر

وهاي الي تمسح الارضيه , اني وصابرين العبده اخذنه قسم المواعين وبدينه نغسل بيهه ,
 
صابرين العبده : غرفتج حلوه لو لا

مياده : اي حلوه انتي شنو شايفته 

صابرين : لا ماشايفته بس شنو رأيج انُ انتقل يمج بالغرفه من اصير وحدي بالغرفه

اضوج وحتى ماكو شي اسوي والله ,

مياده : اي عادي بس من هسه اكلج حبيبه  لاسوالف البيبره وسوالف

شغلجن تجيبي يمي  *

صابرين : سهله هاي يلا خل نكمل ونصعد لغرفتي ننقل ملابسي يمج

مياده : تمام يله 

وفعلا كملنه كل شغلنه جوه ومهره تفتر علينه ابد ماوكفت اي دقيقه , باوعت على صابرين كتله
مياده: ها نصعد هسه
صابرين : يلا يلا بسرعه قبل لاتجي مهره علينه

صعدنه رئسا لغرفة صابرين وبدينه ننقل بملابسهه 

مياده : عندي اقتراح خو مو نضل كل شويه نروح لغرفتي ناخذ ملابس ونرجع لهنا 
صابرين : اي وعيوني شنو اقتراحج 
مياده : عندج جنطه مال سفر 
صابرين : اي اكيد عندي هو اني كل اسبوع اروح لمحافظه

استغربت عقجت حواجبي وكتلهه : ليش عود كل اسبوع بمحافظه يعني شعندج هناك

صابرين : حبيبه اني اطلع محافظات ماطلع ليله مال زعاطيط ومادري شنو

مياده : انتي شكد عمرج صابرين

صابرين : يطلع بالتلاثين 

مياده : وليش تشتغلين هيج يعني انتي هسه شنو ناقصج 

صابرين : انتي شنو بس لا من جماعة الشرف والحرام والعيب

مياده : ليش تضوجون كلكم من احجي وياكم هيج , هي غير هاي الحقيقه 

صابرين : شوفي عيوني مثل مالغايب عنده عذر اني هم عندي اعذاري

وحياتي الي عشتهه ضيم وقهر 

مياده : يعني هسه اني هناك هم تعرفت على بنات كلجن نفس القوانه مجبورات

وماعدنه احد وماعدنه مكان  •

صابرين : لان هاي الحقيقه , يعني اني لو عندي ام واب بيهم خير جان مالكيتني هنا عايشه ,

مو صح  •

مياده : والله ياحبيبتي اني ماعرف عنج شي وَ شو كلجن طلعتن مجبورات 

صابري : اي فعلا كلنه مجبورات  راح اسألج سؤال 

مياده : سألي

صابري : انتي هسه مجبوره لو جايه هنا بكامل ارادتج 

مياده : باوعي مو انتي لتقيسين نفسج عليه , اني الوكت والدنيا مالتي غبره ,

خلتني اوصل هاي المواصيل •

صابرين : واحنه أنكس منج 

مياده : تكدرين تحجيلي شنو صار وياج لو لا 

صابرين : اني ماحب اجامل يعني بصفتج شنو واحجيلج وانتي مصارلج غير بس البارحه

واليوم هنا .

مياده : باوعي منا ورايح راح تنامين وياي بنفس الغرفه لتقارنيني بالبنات البقيه او العرفتيهن

بحياتج اني بنيه لا أحد لمسني ولا طخني وماعاش الي يطخني ويوصلني 

صابرين: صلوات صلوات 

مياده : ها شكو شنو شفتي نور بوجهي واذكرتي النبي 

ضحكت وكالت : لا واخيرا لكيت شبه الحجي ثنينكم نفس النعثله 

ضحكت من كل كلبي وَ كتلهه : اول مره تصادفني وحده وتغلط على الحجي 

ضحكت وكالت : شو انتي مكبرته لراس الحجي , تفله بحلكي ماخلي 

هي وكالت هيج نمت بالكاع من الضحك وهي تسويلي :أسم الله أسم الله يمعوده والله شو بس انتي مكبره راسه 

مياده : هو مو المسؤول عليكم شعجب متخافين من عنده 

طلعت العلج من حلكهه سوته طوبه وكالت : انتحر اذا اخلي ثور يحكمني ويقودني والله يالله

ماما اكو روس اعلى من عنده هذا هيج أنطي بيره مكاسره يصيح دخت 

مياده : انتي هم تشربين 

صابرين : وشبي الشرب عيوني انتي شايفه من تحطي بحلكج وتكعدين تهزين

على اغاني سعدون جابر وسعد البياتي اويلي الله
 
ضحكت وكتله: ها يمعوده ستوب ستوب , ليروح ياخذج الواهس وتكومين تهزين هسه 

ضحكت وكالت : انتي شنو سالفتج 

مياده : يمعوده بليل قبل لننام نكعد ونحجي تدللين من عيوني  

صابرين : يله خل نطلع الملابس مره وحده من اكلج يلا رئسا نسحبهن على الجنطه 

قربنه الجنطه من حافة الكنتور وفتحنه الباب صابرين كالت " يلا " رئسا جرينه الملابس كلهن

على الجنطه , من كثر الملابس الجنطه صارت ثكيله , اخذناهه سحل , لغرفتي كتلهه 

مياده : انتي يلا اشتغلي بيهه سفطيهن بأي خانه تردين 

صابرين : وانتي وين رايحه 

مياده : نازله يم البنات اشوفهن شديسون
 
صابرين : ماشي يلا اني دقايق ويمكم هسه رئساً اشمرهن بالكنتور واجي 

ابتسمت بوجهه ونزلت ليجوه بسرعه  لكيت ياسمين واكفه بالمطبخ كتله 

مياده:ها شو وحدج

ياسمين : البنات كاعدات ويه الحجي بالغرفه واني ونوكيا راح اطلع بالحديقه اكعد,

مياده: عادي اجي اكعد وياجن وهم اتعرف على نوكيا اكثر

ياسمين : اكيد تعالي ويايه امشي بس عفيه جيبي ماعون البرتقال ورايه ,

باوعت على الكاونتر لكيت ماعون برتقال اخذته ورحت وره ياسمين بسرعه , 

نوكيا السمره : هلا والله هلا بمياده عيناي 

مياده : طبعا كتله لياسمين اجي وياهه اكعد وياجن شويه جوه خنكه

وكلت هماتين اتعرف عليج •

نوكيا السمره :  يمه فدوه للبنات اليحجون كل الهلا تعاي كعدي كدامي ,  

كعدنه على الثيل ياسمين بصفي ونوكيا كاعده كدامي كالت

نوكيا: انتي شكلج ما هاويه العيشه مالتنه شنو الجابرج هنا

مياده: اكيد ماريد عيشتكم لان هي اصلا حرام وغلط الي دتسوو 

نوكيا: اني ماريد ادخل بيج واكعد استشرف براسج بس كلماً وحر باختيار حياته الي يريدهه

مياده: اكيد حر بس مو معناهه يختار حياة الغلط الي تعصي رب العالمين

نوكيا : من هسه اكللجياها اذا ضليتي هيج ماراح تعيشين بالحياة

مياده: على حجيج كل البنات الي مثلي ماتن واندفنن

نوكيا : اي كلهن مدفونات يتحكم بيهن الاخو ويتحكم بيهن الابو ونهايتهه تنزف لحضن واحد

نفس عقيدة اهلهه وهي كلشي مامفتهمه من حياتهه   

مياده:كلش متوهمه منو كلج كل الي عايشات يم اهلهن بهيج طريقه خلاص هنه اندفنن 

نوكيا : لان الصار ويايه كلش كافي انُ اعتقد كل الاهل هيج 

مياده : وشنو الصار وياج اكيد راح تكولين مجبوره وماعندي احد نفس القصص الي داير مدايرج

نوكيا : لا كلش متوهمه اني برجليه اجيت لهنا

مياده :  ماخفتي ربج 

نوكيا : الصار وياي حددلي هذا الطريق وماله أي بديل 

كاعده احجي جان تكول ياسمين : زين احجيلنه الصار وياج شنو ,

اني صح اعرفج بس ابد ماعرف امورج الخاصه
 
نوكيا : منين احجيلكم من ابوبه واخواني الي كابلوني يحركون بجسمي 

مياده : اي غير مسويه شي

نوكيا : انتي اذا شريفه ومن هل سوالف صيري انسانه لان الشرف ميفيد وحده ,

يعني حتى لو جنت مسويه شي وين انسانيتهم يحمون بالخواشيك والسجاجين

ويكعدون يجون بيه ها وين وين •

مياده  انتي مسويه شي لو لا احجيلنه عاد  

نوكيا :كل السويته بحياتي من جنت صف سادس اعدادي جان يصادف أخر يومين من

الامتحانات ,طلعت من المدرسه اني وصديقاتي مثل كل يوم اله بهذا اليوم اختلف ,

اذا اريد ارجع للبيت لازم ادخل بأفرع علمود اوصل للبيت ,

جنت امشي وياهن وصلنه وحده من صديقاتي اني وايه لبيته

وطلعتنه امه تشكرت من عدنه ووكفتنه لازم نشرب مي ,

يعني رداً للمعروف السويناه ويه بته •
 
علا : شكرا ماماتي نوكيا الله يوفقج وينطيج الصحه والعافيه ويرزقج بأبن الحلال 

اني ابتسمت وخجلت نوعا ما لان فعلا بهيج مواقف ماعرف ارد ولاعرف احجي

حتى بيوم عيد ميلادي ماحب احتفل لان ماعرف ارد على الكلام , فكالتله ايه 

ايه : لا خاله هي غير اختنه شنو تتشكرين من نوكيا  

نوكيا : خاله غير اختنه شنو تتشكرين من نوكيا

وعاد هي ابتسمت بوجهنه ورحنه رجعنه للبيت وايه خربانه ضحك كتلهه

نوكيا : لج شبيج فحطتي من الضحك 

ايه : لج انتي شايفه نفسج شلون صار وجهج ويمه يمه , حطت ايدهه على بطنهه

وضحكت 

نوكيا : ولج شنو بس فهميني 

ايه : لج شنو تعيدين الكلام ورايه انوبه يربي يمه يمه بعد ماتحمل

اني حطيت ايدي على حلكي وضحكت

كتلهه : بس لا عدت الكلام وراج 

هي تضحك وتكلي : لج عدتي مثلي وبالحرف هماتين 

ضربته على جتفهه وكتله : غبره غير تكليلي تضربيني علمود الحك على الموقف

يربي شكد فشله خرب بحضي الاعوج  

كاعده تحجي ايه وجان ينكطع طريقنه بسياره سوده نزل منهه ولد يصير اخو صديقتي شمس

لان الولد اعرفه من يجيب اخته للمدرسه تقرب علينه وكال : شلونج نوكيا 

اني استغربت بوكته رئسا كدت ايد ايه ومشينه بسرعه لان ولد لاعرفه ولاهم

يحزنون شنو واكفه ويا بنص الشارع •

قاطعت كلامهه وكتلهه : صح صح كلامج بس شبيج شردتي على ألاقل اوكفي وافتهمي منه

نوكيا : لاعيني عرفه ولفه المهم بنات عاد مشينه اجه لحكني لزمني من ايدي

وكفني وكال : بس شويه ما راح أخرج بس أريدج تاخذين هذا رقمي واتصلي

عليه باقرب وقت  •

ايه رئساً كالت : انت متستحي شنو اعراض العالم عندك لعبه 

كال : لتصيحين ومعليج اني وياهه حاجي , هاج الرقم انتي 

صَيحت بوجه : شنو انت شبيك خبل , هو صوجك لو صوجي اني الواكفه ويه واحد مثلك ناقص 

درت وجهي وكدت ايه من ايدهه ومشيت وضل هو ورايه يلعن ويسب بأيه ,

وايه تصيح : شكد ناس وصخه دخل واحد يوكف ويه اخته يصير جاكي شان بس بنسخه عراقيه 

ضحكت عليهه  وضلينه نمشي الى أن وصلت ايه لبيته ورجعت اني للفرع الي يطلعني كبل على

البيت مالتنه , اني وكاعده اتمشى ماحس اله وهو طابك سيارته وواكف كدامي ,

: ماتروحين منا اذا ماتاخذين الرقم  

نوكيا : خويه شنو السالفه هسه اني قابل اعرفك مروتك ماريد لارقم ولاشي لتروح تجيبلي مشكله

 
كال وهو يفرك بوجهه : اذا تاخذين الرقم متصيرلج مشكله,

يلا عاد بسرعه العالم تباوع علينه واخاف عليج  •

نوكيا : لنفرض اخذته بيمن اخابرك شنو براسي غير ماعندي تلفون 

كال : دبري هاي الليله بأي موبايل خابريني معليه , بين ماباجر اجيبلج جهاز بيدي 

كتله : هسه انت ليش تريد اخابرك شكو شصاير صاير شي بشمس واني مادري 

حط ايده على جتفي وكال : رايح اني خابريني بأي طريقه دار وجه

وركب سيارته وراح , والله عاد اني فتحت جنطتي حطيت الرقم بنص الكتاب

ومشيت للبيت وتعرفون سوالف البيت طبخ وتنظيف ومادري شنو التهيت عن سالفة الرقم

وماخابرته الى ان صارت الدنيا ليل اذكرته دخلت لغرفتي طلعت الرقم من الجنطه ضليت صافنه

عليه , هسه شلون اخابره وشيريد مني , والله بنات بيومه جانت هواي اسئله بالي المهم عاد

نزلت ليجوه لكيت ماما كاعده اطفي بالاضويه 

مال البيت كالت : ها شو كاعده 
كتلهه : ماما وين موبايلج اريد اراسل صديقتي على الواجب 
باوعتلي صفح وكالت : ادري بالمدرسه ماكلتيليه اريد الواجب تجين يمي وبتالي الليل تفكين

حلكج وتردين تنقلين الواجب عفيه بنات وكت امشي امشي يالغبره موجود على الميز بسرعه لا تتأخرين 

ابتسمت بوجهه ورحت كبل للمطبخ اباوع يمنى و يسرى ماكو احد ,

اخذت الجهاز ورحت وره ممر المطبخ دكيت الرقم بالجهاز وخابرته كتله : الو 
كال : نوكيا لو منو
نوكيا : اي اني احجي بسرعه 

سدي هسه اني اخابرج عندي خدمه , والله عاد رئساً سديته وضليت اباوع منا ومنا

خاف احد يجي لان اخواني مو بشر ذيابه حرام ايدهم والسجاجين ميتفاهمون ابد , 

والله عاد بنات خابرني وعرفني على نفسه طلع اسمه مروان ,وطالب كليه 

قاطعتهه ياسمين وكالتله : طالب كليه ويتحرش ببنيه 

هي ضحكت وكالت : لعد هسه الحجي مالتج مو دكتور باطنيه وشغله كله عرك وبيره ونسوان

مو احنه منريد نحجي ماماتي •

ضحكت وكتلهه : والله ولا عاب السانج كملي كملي 

كالت : اي بنات والله كتلجن تعرفت عليه وطالب كليه ومن هل سوالف بالاخير كتله

اني مافارغه شنو تريد كال  

مروان : اني ارديج اعشكج عشك بس الله يدري بي شكد , ماعتقد اكدر اكمل حياتي من دونج 

نوكيا : لحظه ستوب هو انت قبل شويه تعرفت عليه وتعرفت عليك شلون عرفتني

وشوكت حبيتني شنو شبيك  •

مروان : لج بابا اني مسودن بيج والحمزه , غير يوميه مانام اذا مو شمس تحجيلي عنج

وتكعد تسولفلي على شعرج وطوله وعيونج شلون تخطيهن بالكحل , وها وشلون تحبين اللون

الاحمر , اعرف عنج اشياء اكثر منج وحق الخلقج 

نوكيا : هسه اني لازم اروح باي 

والله عاد سديته منه لان بنات اني احجي ويا واباوع منا ومنا خايفه لا يروح واحد يلكفني

من اهلي , ورحت وديت الجهاز لامي ونمت واجه ثاني يوم ورحت للامتحان من حليت وصلت ايه

صديقتي للبيت , وهم اجه وكفلي بالفرع الي وكفلي بي من انطاني الرقم

كال : اني اول مره بحياتي اشوف كمر يطلع بالنهار ,

ماعرف شلون اوصفلجن خدوي شلون يصيرن حمر من الخجل 

ياسمين : خجوله عيني خجوله نوكيا افندي 

نوكيا : سكتي ولج شوفيني شحلاتي ارد الروح

المهم بنات عاد بهذا اليوم انطاني جهاز لونه اسود كال  على هذا نتخابر,

وليش اجذب عليجن اني هم مشاعر انزرعت بداخلي تجاهه مو بيدي السالفه ,

اخذت التلفون منه وضميته بنفس الكتاب ورجعت للبيت نوعا ما فرحانه ومشت الايام

احنه نتخابر  واحلى  علاقه جمعتني بي وحبيته حب مو طبيعي واذا تسألني وحده بيجن

وهسه احبه لو لا اي احبه واموت عليه وكلبي بعده ينبض بي , بس اااه يادنيا ااه 

مياده : شصار 

نوكيا : فد يوم اخذت كتبي ورحت للصاله وحطيتهن على التخم وموبايلي الي جابه الي ,

حاطته بين الكتب واهلي بالهول بس امي وابويه ومعلين الصوت مال التلفزيون , واني كاعده اقره

دك عليه اني رئسا باوعت ليوره شفت ماكو احد وذوله ملتهين بالتلفزيون رئسا جريت الموبايل

وجاوبته وضليت احجي ويا عادي ماكو اشكال ونفس كل يوم ، بنات ماحس اله وبابا يصيح يم اذاني " هاي شنو بت الكلب "

دموعه كامت تنزل حطت راسهه على خدهه وشهكت شهكه بس الله يعلم بيهه شلون جانت

قويه , حضنته اني وياسمين •

وكلتله : كافي حبيبتي كافي انتي ماسويتي شي غلط كافي عيوني مسحي دموعج 

كالت : والله حبيته وراد يكمل كليه ويتقدملي الله لايسامح ولا يغفر لكل من فرقنه ووكف بطريقنه

ليش هيج ليش هم اهلي وكفوا ضدي شتوقع من الغريب يامياده وانتي تكليلي اكيد مسويه شي

 
مياده : كافي حبيبتي كافي اهدي , ارتاحي شويه وكملينه 

ياسمين : واذا متردين تكملين عادي لتكملين اهم شي انتي يروحي 

مسحت دموعه وكالت : لا لا اكمللكم بنات لزمني ابويه واني على المكالمه اريد افهمه اريد ابلغه

اريده يكون صديقي اريد احجيله بس للاسف مانطاني اي فرصه جرني من شعري للهول

انواع السب والغلط , والصياح والعياط وامي توخر بي وهو ولا يمه الراشديات ماعرف منين

تجيني , وامي تكله : احمد احمد مروتك اتركه هسه نفتهم منهه منو 

باوعلهه تفل عليه و ضربهه راشدي وكال : طول عمرج غبره هم حاسبه روحج ام يا كلبه حايره بالمسلسلات وبنتج تتمعشك 

جان هذا اول يوم ابويه يمد ايده على امي ,

امي مريضه ضغط وسكر صارت عندهه ردت  فعل راحت كعدت على التخم وهو واكف عليه

دفرات ووين بطني براسي و راشديات وغلط وسب،  شفت انسان ثاني ولا كأنه ابويه الي نفسه

من جنت صغيره يشيلني ويصيح يم اذني "يابه البنات سبعه واكول اكليلات "

أسمع امي تصيح راسي راسي احمد الحكني وهو ماكو فاقد عليه مندمج عليه بالضرب

واني احير وين احط ايدي بس اريد أحمي روحي منه

الى ان جرني من شعري شمرني بالحديقه وركض على الغساله جاب الصونده

مالتهه واني اتوسل بي يتركني ليسويلي شي وهو ولايمه شال الصونده ويضرب بيه بكل

مكان وبكل منطقه بجسمي الى ان حسيت جسمي خلاص فقد بعد ماتحمل اي ضرب

خلاص تعب مايكدر يقاوم اي شي استسلمت لكل الضربات وعيوني مغوشه ,

سمعت اخويه فهد اجه يكله :يابه شبيهه شنو مسويه شبيك يابه كول يالله ,

وهو يجاوبه : اكفخه لك اكفخه هاي الساقطه كاعده تتمعشك  لك اليوم احركه حرك 

اخويه اباوعله بعيون مغوشه , يشيل رجليه ويضرب بطني ، وحلكي يجري منه الدم اريد

الكه الرحمه يمهم بس ماكو اي رحمه , مياده الحجي وجماعته الي تكولين عليهم ميخافون الله

همَ الي داوني هم الحضنوني هم الشافوني و همَ  الي عالجوني

همَ الي كعدوا سمعوني همَ وهمَ وهمَ •

مياده : طبعا نفس الموقف هم ذاك اليوم  الحجي مطلك شاف  مازن راد يعتدي عليه ضربه طلقه

وياسمين مو كليتيلي اي زلمه يشوف هيج عرضه ميتحمل مو صح لو لا  

ياسمين : اي صح

نوكيا : هاي مو افعال الزلم , الي تعتدي على الحب ومو من افعال الزلم من يعتدون على مره 

مياده : زين بعد كل هاي المصاعب وضربوج واذوج شنو صار بيج شلون وصلتي لهنا   
 
نوكيا : اتفقوا بيومه ابويه واخواني يضلون طول الليل يضربون بيه

الى ان اموت افقد من الحياة, ويذبوني بستان الحجي مطلك،

ماجنت اعرف اي شي عن هذا السبتان ,  عاد شالوني حطوني على ميز الطعام وامي ادك على

راسهه وترجف اسمعهه تصيح عليهم وَ أسمعه تصيح لله تكله

" ربي احميهه الي بس هاي البنيه اليه •

ربي ارحمهه خليه تحت رحمتك •

هاي كلماته لحدلان حافظتهه ما نسيته ابد , اباوع عليهم وَ اون من الوجع ماكدر احرك اي شي من

جسمي خدي يرجف و دموعي احسهن بيهن حراره من ينزلن الدم من كل مكان يطلع , 

اباوع عليهم واكفين على الطباخ و لازمين خواشيك وسجاجين يحمون بيهن ,

وابويه يكلهم " عفيه عفيه بالزلم لاترحموهه ابد  "

وفعلا هم ماقصروا والله لايسامحهم ولايوفقهم بحياتهم التموا عليه وكلهم نفس الوقت واحد

يحط السجينه وواحد يحط الخاشوكه احس روحي تصعد للسمه وترجع اليه

بنات متت واني عايشه ثقوا بالله متت واني عايشه محد رحمني ابد,

الى ان فقدت بيدهم خلاص عيوني ثكلن اخر شي شفته امي اجتي ركضت عليه

تصيح " بنتي راحت بنتي راحت وخروا ذكروا الله "

شويه وتجيني تلزم أيدي ابويه دفرهه من بطنه ووكعت بالكاع واني رحت لعالم ثاني ,

صحيت على نفسي لكيت روحي بيدين مره جبيره لابسه شيله بيضه تصيح باذني أسم الله الرحمن

وَ تبارك الرحمن بنتي اصحي انتي يمي ماكو احد "

باوعت منا ومنا وجع بجسمي مو طبيعي لكيت غيوم وشجر عرفت نفسي اني

بستان حجي مطلك الي كالو عليه , 

لا ارادياً بسرعه ذبيت جسمي عليهه واني ابجي بكل قهر واني

اكلهه " الله موجود الله ينتقم منهم "

وخرتني من حضنهه كالت

" ميستاهلون هاي الدموع ابد ولجهنم انشالله , كومن ندخل جوه 

اباوع على ياسمين دموعه تنزل بشكل خفيف ، كومتهه ودخلنه جوه واحنه نحاول نبتسم على

الوجع والقهر الي سمعنا من نوكيا , اباوعلهه تهز ركبه ويه صابرين العبده وتضحك ,

كلت بكلبي " لاحول ولاقوة الا بالله العلي العظيم "

رحت مريت على الصاله سمعت صوت مهره والحجي يحجون ردت ادخل بسرعه

بس وكفت من سمعت مهره ذكرتني

مهره : حجي اليوم ضروري تطلع مياده ويايه علمود نبوك بيت

أبو سالم قبل ليسافر ,وَ ماكدر اطلع البنات البقيه تعبانات 

رجفه مشت بجسمي سريعه ,

                         يتبع .....
لا تنسوا التصويت والتعليق لنشر المزيد ،
حساب الانستكرام الرسمي:tahsin_luqman4
مع خالص مودتي لكم
                      تحسين لقمان