عزيزي القارئ فضلاً وَليس أمراً أضغط تصويت لنشر المزيد من احداث الرواية .
فستان أحمر
تحسين لقمان
امشي بالشارع و الكره و الحقد كُله ملتم على روحي , تركتج بأصعب ضرف يمر عليج
واني ادري كلش زين انتي اطهر مخلوق ممكن اشوفه كدامي بس شنو بيدي , ما بيدي شي ياميادة حكم القوي على الضعيف ياخذ كلشي
مسحت دموعي بيدي الترجف و مرت من يمي سيارة طيرت تراب الكاع ، ألّي متجمع سنين وسنين بكل ركن شارع
خليت ايدي على خشمي و عطست و مرارة كلبج ودموعج و لهفتج على فراشي لچمة بلعومي بكل حرارة
نفتحت الجامه وبينت ملامح الشخص الي يسوقهه
و بصوت خشن كال: اركب , من دون ما تلتفت ليورة .
فتحت الباب وركبت بسرعة , اباوع على ملامحة شلون كبران وصاير معدل .. هذا سلطان الي يصير اخوية .
ماعرف شلون من ارجع احجيلج عن نفسي و افهمج كل ماذكرته عني هو كذب بكذب!
اجت ببالي صورتج من راحت هيماء عنج ومن حضنتج بليلة عرسنا , ماتحملت انهاريت على دشبول السيارة و سلطان يهدأ بيه
سلطان: اها افه حنظل هيج عاشكها
جاوبته من بين انهياري: لك هاي الهوى مالتي ! اكثر ياخوي من عاشكها
الاولى راحت وهسة ميادة هم راح تروح ؟
سلطان : اها شو ارفعلي راسك لك
سلطان يسولف ويايه وانا ما اسمع شي بوكتها، صوتج ، عطرج , انفاسج و حركاتج ,كلشي مسيطر عليه .
مد ايده سلطان على وجهي ورفعه شوية شوية , شاف حالي الّي مشيب
وشخط سيارتة وكال : جوز دموع الحبيبه سهلة يخوية سهلة تهون على النفس والايام والساعات
بس تعال وحاجيني من تروح امنا الي ماشبعنا من حضنها و لا لحظة كعدنا وحجينا وياها، سولفلي بوكتها منو يوكف دموع العين , منو منو ياحنظل ؟
جرني من ياختي لصدرة وبجينا بكل حرگة , بجينا بجية طفل ستوه نولد على الدنيا
و بالكوة اتحمل جرة الايد والضرب على الضهر . هو يدك على جتفي و اني احضن بي اكثر و دموعي تهل على وجناتي
ثنينا كلوبنا ملچومه . مادري ميادة من اشوفج واسولف تعذريني لو لا ماعرف اي شي ..
اندك تليفون سلطان و ابتعدت عنا وجاوب تلفونة واني افتح جامة السيارة , احاول استعيد نشاطي وقوتي بس ياقوة من بعدج ميادة ياقوة فهميني ..
اسمع سلطان يحجي بالتلفون بلهفة ممزوجة ببسمة وبفرح , باوعتله
همس بصوت ناصي: قبل قبل ينطينا البيت
ابتسمت راح يكون عندي بيت يلمني اني واخوية , ويلمني وياج بس مو هسه نصبر وبس
فززني سلطان بضربته على جتفي وهو يصيح : و البيت صار النا وما ننطي والبيت صار النا وما ننطي
حنظل : شلون صار النا ؟
سلطان : ولأفرحك اكثر بدل البيت بيتين صارن
حنظل :شلون ثنين فهمني خليني افتهم عليك !
سلطان : بيت العركجية مو جان ايجار
حنظل: اي وكعدت بي البنات بس لا صار شي
سلطان : خيي ثول ماريد , البيت صار الك . والبيت الي ردنا من الاء خانم صار بأسمي
رغم حيلي رايح بس فرحت هواي يا ميادة , البيت ألّي كعدتكم بي صار بأسمي وبضمانتي و يعني لا ابو ايجار و لاغيرة
دقايق خيم على وجهي الحزن شلون بيج انتي من تعرفين البيت الساكنة بي بيت عركجية !
مايهم يا ميادة مادام صار باسمي معناها صار بأسمج ماضي البيت يبقى ماضي .
سلطان شغل اغنية يداوي بيها جروحة واني رچيت راسي على الباب وغمضت عيني
وبوكتها تمنيت ماكعد بعد لأجل ماتذكرج ..
وصلنا البيت و نزل قبلي سلطان ماعرف شنو حجه ويا الحرس , كلش زين حتى الاء خانم عندها حرس
تقربو عليه و سلطان فتح الباب وكال : مجرد يسدلك عينك
عقجت حواجبي وكتله : ليش ؟
جاوبني وهو يحك لحيته: الاء خانم ماتثق بسهولة فالمكان أمن وكل غريب تتعصب عينه ويدخل .,
الي وراه كال : سلطان بسرعة , الخانم ماتقبل نفتح الباب كل هذا الوكت
باوعلي سلطان بمعنى فضها , نزلت من السيارة بسرعة وتمشيت بأتجاه الباب
الولد كال : اوكف بمكانك .
تقرب عليه بخطوات مملوئة خوف على قلق و توتر , معقولة الاء شي جبير لهاي الدرجة يخافون عليها من الي يدخل ويطلع !.
شد عيوني واختفيتي ياميادة وحل محلج الضلام , اي لا تستغربين معتبرج الضوة ومعتبرج كلشي موجود بمحيطة نسمة روح .
سلطان:يلا محمود دخلنا وكفتنا بالشارع هم غلط
محمود : عباس فتش حنظل على طريقتك يلا بوية استعجل
ماحس الا ايد كامت تلامس مواضع جسمي , و هنا ثار الفضول عندي اشوف الاء خانم اكثر و اكثر !
على الاقل اعرف حراسج ذوله على جمالج لو على مالاتج ,ابتعد عني وكال: تمام بابا
عقجت حواجبي وبلعت ريكي يا بابا هذا ؟ جاوبه
محمود: تمام بابا
كال لسلطان: تفضل كدامي , سمعت صوت رجلين سلطان تمشي كدامي
و انا لزمني محمود وهمس بأذني: تمشي ويايه خطوة خطوة لتستعجل
همستله: الاستعجال مو خوش رجال
رجع همس: عندك الخانم , تكره الاستعجال بحيث حتى على مشيك تنتبه
حنظل: الله يحفظها الكم
محمود: و لك هماتين، لا تنسى منا ورايح بمثابة امك تصير
مشينا للباب الداخلية واني اردد بداخلي هم عوزها تطلع امي خانم , ولو هي بقت على هاي كلشي صار وياية بالمگلوب
انفتحت الباب و ضربتني ريحة البيت ، احس نفسي بمصنع جكاير على كد ما الريحة تسطر سطر
الضاهر الاء خانم هم ملچومة ...
صاح واحد منهم : محمود شسم الولد ألّي وياك
سلطان جاوبه : سجل تاج راسك ,وضحك
محمود: سجل يمك حنظل اخو الشفية مال الاء خانم
اسمع صوت عالي، اغاني و هوسة قوية بكل زوايا البيت , بس ماكدرت اميز اي شي غير بس ريحة الجكاير الجانت محتله المكان بكثرة
جرني محمود من ايدي و همس بأذني : اكعد و انلصم . ومن دون أي حرف كعدت وانا متوتر
سلطان يحاجي محمود بمواضيع ماتفرق عن مواضيع مطلك واعوانه .
وويا كل هاي الهوسة سمعت صوت خطوات اقدام تنزل من الدرج
اجاني محمود : تفضل وياية للمخزن
حنظل: رحمة لدينك هسة شنو ملبسني هاي على عيوني صدك جذب
محمود : الي يريد شي يتحمل كلشي يلفهيم
جرني من ايدي ودخلني بالغرفة , ريحة اوراق ممزوجة بريح قوطية بيرة مفتوحة
فززني صوت انوثي ناعم : على الميز الايمن , كعده
كعدني على كرسي الميز , سلطان اسمعه: الاء خانم الا يطلبه السانج يصير
جاوبته: الي يريده الساني تصم حلكك وتستجن بصف اخوك
ابتسمت لا اراديا , والله طلعتي مو هينه الاء خانم , كعد بصفي سلطان وهي كالت: محمود تكدر تفصح عن عيونه حاليا
حسيت محمود يتقرب مني , واني كلبي زادت نبضاته وخر العصبه عن عيني و هف عيني جمال رباني
العيون الوساع والشعر الاشكر والوجنات المورده
كالت : عينك لتنصرع
حنظل: شايف وعايف , لتخافين
الاء خانم : متاكد
حنظل: الي يعيش يم مطلك كلشي يشوف ويعوف مو صح ؟
الاء خانم: سلطان اخيك مبين عليه , شارب حليب لواته
ضحكت وجاوبته : بس مثل طعم الصدر ماكو
ضحكت وكالت: فدوه لعينك , بس لا صدر مهره ، تره بي ريحه ..
حنظل: اضاهر كبرتي على صدرها
ضربت الميز وصاحت: محمود ، انطيني الصور
باوعت لمحمود واني مستغرب حط كدامها البوم كامل من الصور , فتحت اول صفحه ودارته عليه
وكالت : اول ثلاث صفحات تعرفهن ؟
حنظل: اعرف الصفحات لو ألّي بيها
رفعت روحها و قربت الكرسي من الميز عليه وهمست : على فكرة مهما تسوي يضل دمك ثكيل
حنظل: الخفه تركتها لاهلها
الاء خانم :الصورة الكدامك تعرفها صح ؟
وجهت عيوني للصورة وياريتني ماموجهه صورة امي ام الگلب الطيب عيوني بسرعة البرق تلالن بالدموع ..
دنكت راسي على الصورة وشميتها , اوف يايمه شسوة بيه الدهر وبعدج عني
: مشتاقلها مو
باوعتلها بعصبيه و جاوبته بنتر : وينها امي
الاء خانم : تريدها مو
جاوبتها : امي وين كاعد اكول
الاء خانم : اذا العنب عالي شلون توصله
حنظل: دكيت الميز وصحت : امي وين
الاء خانم : شوية شوية يوصله , اكلب الصورة لصفحه اربعه و ثلاثين
عقجت حواجبي و بلعت ريكي
كتلهه : صبري اله حدود لا تحاولين تلعبين ويايه
دكت الميز وصاحت: ان هددت ثاني مره , جكارتي تطفه بالسانك
رجعت نظري للالبوم , ولگيت صورة لأمي شلون واكفه على عوجيته والتعب ماكلها اكل
و حنجها المدكوك دكات زرك تعبان يا بعد كلبي , شصاير بحالج يحال الجان زاهي بحب ابوية
شصاير بروحج يلروحج الجانت ترفه ويانه من الصغر ؟
غمضت عيني بنفاذ الصبر . نزلت دمعتي على وجنتي و مسحته بيدي , مو هينه ولا سهله تنحرم من امك
لان حبيت حب صادق ! لان فكرت احب بنيه عابره من يمي , اخسر امي وابوية واخوية و مستقبلي ؟
معقولة هي هاي التضحيه عن الحب الي گضيت كل عمري اسمع عنها!!!
كلبت الصفحات وكل صفحة صورة شخص و كل تفكيري صار يكول ذوله ناس ورطهم الدهر ويا الاء خانم ..
وصلت للصفحه الرادتها و كالت : باوع للصورة واتمعن بيها يحلو
باوعت عليها بنظرات هادئه وصارت صورة مهره كدامي, رجع بيه شريط الذكريات لأيام گبل شلون
خلتني الليل ما انامه وجسمي كله ملجغ والدم يسيل منه و شلون جنت اتوسل بيها تعوفني بحالي وتعتقني بس شيفيد !
الاء خانم : اضاهر عرفتها , ولو منو ينساها
حنظل: شنو قصتج وياها , هاي الهوسة كلها علمود تشوفيني مهره
الاء خانم : كتلي تريد امك واني اكلك اريد مهره وكلما بطريقة بعدها
حنظل: مافتهمت شلون يعني
الاء خانم : نكدر نكول عملية تبادل اني اخذ الي اريده وانت التريده
حنظل: الي افتهمه رايده مهره ؟
الاء خانم : بأي شكل من الاشكال , حيه او ميته ما يهمني
حنظل: و برأيج لو ادري بيها جان من زمان لكيتيني مسلمها للقانون
: انت وقانونك الربع دينار هواي عليكم
حنظل: معناها ماتحبين المثاليات
الاء خانم : كلش ماحبها , اعرف مكانها وين
حطيت ايدي جوة حنجي وكتلها: اذا تعرفيها ليش مادزيتي الشفيه الي يمج محمود لو مو كدها
الاء خانم: الاء من تلعب , تحب تلعب علكيفها , و ها بتفكير وتركيز .
انت بالنسبه لمهره ، جوهرة
حنظل:يعني؟
الاء خانم : مهره كاعده تدور عليك وهسة هي بحاجتك اكثر من اي وكت مضى عليكم
لان زلمها مفلسين ..
حنظل: وبشنو مهره تحتاجني هسة
الاء خانم : عندها ست بيوت جاهزات للسرقه مال واحد صايغ ذهب و بحاجة ولد جسمه مرتب
حنظل: وها تريد تستعمل جسمي ك اداة تدخل بيها للبيت !
الاء خانم : ابوس ذكائك
حنظل: وانتِ ؟
الاء خانم : والعكس اصح يحلو , انت اداتي علمود اوصل لمهره
حنظل: والمقابل امي ؟
الاء خانم : و حبيبتك السابقة
عقجت حواجبي وكتلها: شمدريج انتي
الاء خانم : الي يخص اليشتغل وياية يخصني .
حنظل: شنو الي يضمن احصل امي ؟
الاء خانم : لتخاف تحصلها لان حاليا ثكلن ايديه من الدولار مو بحال وحده مجدية
سهم وصاب كلبي من سمعتها: امي مجدية !
الاء خانم : كل هالخير الي تشوفه من دموع امك بتقاطع الشوارع
خليت ايدي على راسي وفركت وجهي بكل قوة و رأسا نترت بيها: شوكت نبدي
الاء خانم : من تنتتهي الضمانات
حنظل: ياضمان
الاء خانم : ان خنت العرض ياحنظل وحاولت تلعب وياية بالختلات
حنظل: شيصير بوكتها
الاء خانم : بكل سهولة تقرا الفاتحه على ميادة والي وياها
حنظل: انتي شنو فرقج عن مهرة ؟
الاء خانم : هواي اكو فرق , ذيج تشرب عرك و اني اشرب جكاير اسبين
حنظل :موافق على كلشي المهم البيت الي صار بأسمي يتسجل بأسم ميادة
الاء خانم : البيت الي باسم اخوك راح يعيش هو بي وبس اما انت يمي , و بيت العركجية صار بأسمك
ان تحب تسجله باسم مياده مايهمني المحامي يتكلف بهاي الامور التعبانه
حنظل: زين تعترفين بوجود المحامي
سحبت نفس من جكارتها وكالت : هذا لوكي لا اقل ولا اكثر
حنظل : يتلوك لامثالج مثلا
الاء خانم : لا للقانون
حنظل : شوكت تبلش الخطة؟
الاء خانم: محمود حط المخطط كدامي
اباوع لمحمود شلون يركض ركض في سبيل يأدي نداء الخانم
جاب المخطط من البوفيه الكبيرة , فتحته وكالت: الكدامك ست بيوت هذا نموذج
بسيط من مخطط مهرة هي ساكنه ببيت قريب على هاي المنطقة
نكدر نكول ونخلي احتمال اكبر راح يكون شريكها الاكبر مختار المنطقة
حنظل: الي افتهمه ان البيوت بمنطقة وحده
جاوبتني : بلي بمنطقة ، لواحد صايغ ذهب
والباقيات تابعات اله , مهرة كل الي راح تسوي تنهب البيوت بنفس الوكت واليوم
حنظل: شلون راح تسيطر عليهن كلهن
كالت: بقاعدة اكس (x) و (y) راح تدخل عنصر بأكس يساعدهه باستخراج قيمة واي
حنظل: دوخه هاي وربي
الاء خانم: بسهولة البيت الاول راح تدخله وتخلي اهله تحت التهديد وتمنع كل مخرج الهم
تستعمل واحد منهم بأي اداة يوديها للبيت الثاني
وهنا البيت الثاني راح يدخل الولد بمثابة جوارين ومنهم وبيهم وهي بهاي السهولة راح تدخل ويا وعلى هذا الحال راح تدخل كل البيوت
حنظل: اعتقد الجهه الي راح تسنده جهه جبيره لان مخططها يحتاج زلم خشنه
الاء خانم : مايسندها غير ياسين الكبابجي , ولد هتلي يتضاهر فقير بمنقلة الكباب على العالم
بس هو من اخطر جهات السرقة
حنظل: وبين هاي الهوسة كلها شلون تردين
تسيطرين على مهره من خلالي
حطت ايدها جوه حنجها , ابتسمت ورفعت حاجبها الايمن : هه لان بسهولة راح اصير كدامها
عقجت حواجبي وكتلها : اي؟
كالت : الرابع بيتي يحلو
ابتسمت على طريقة تفكيرها ومخططها
كتلها : معناها البيت الرابع التابع للصايغ هو الج
قاطعتني : اي اليه , بين قوسين نكول فاره ولگت جبنه الها مجرد مهرة تدخل على البيت و تسيطر على العائلة راح اكون اني كدامها
حنظل: اذا البيت الج ف اي عائلة ؟
الاء خانم :لان ياعيوني الكدامك مو غبرة , مأجرة البيت لعائلة خدام اليه
حنظل : الي افتهمه راح تسيطرين عليها من خلال العائلة
الاء خانم : هيج امور لازم تتعلم يعمّ ماتنحجي بوسط
لازم الشباك والباب مسدود مو صح؟
حنظل: لنفرض بعدنه بثاني بيت والجوارين حسو او صار شي
الاء خانم: اولا ماراح تكون هوسة ومحد راح يسبب بأي انتباه للثاني لان كتلك هذا مخطط من اهم المخططات لمهرة
ثانيا الجهه الي ساندتها ماتسند اي مخطط اذا مو تفكير طويل
واضافه مايكمل كل هذا حسب مهره الا بوجودك
حنظل: شمعنى بوجودي و يا خانم بأنما تكولين البيت الرابع هو الج فهو ميه بالمية راح
تدخله مهره فأنتظريها هنا وبس ...!
ضحكت ضحكة مابيها فرق عن ضحكة ياسمين , صفكة ايدها وكالت: المشكلة انت ذكي بس عندك خيط غباء لتكلي شلون
ركز ماما ركز اكدر اسوي اي شي بس مهرة متاكده منها ماتبدي بهذا المخطط الا بوجودك
حنظل : جاهز اني خليني اروحلها وديني الها
كامت على حيلها ,اشرتلي بمعنى اوكف , وكفت
كالت : يصير الصبح وتروح بستايل وشكل جديد
يختلف عن هذا الي انت بي, وبخطة كامله مدروسة لان اول سؤال راح ينسأل عليك: شلون وصلت الها!
باوعتلي وكالت: عسى انشالله يزلك السانك وتكول تاج راسي الاء خانم وصلتني!
ضحكت وكتلها:عاد مو هلثخن
طبطت على ضهري وكالت : ان وصلتلي مهره لأسوي حياتك جنه
وخرت ايدها وكتلها : تره متزوج
ضحكت وكالت: اخر همي الي متزوج لان يكولون المتزوج يصير زفر صدك عود ؟وغمزتلي
ضحكت وضحك سلطان صدك يخلق من الشبه اربعين نفس الطينه هي وشلة حجي مطلك
بس العجبني بيها خفتها وفطنتها عكسهم الاغبياء وشويه و كالت: محمود , اخذ الاثنين
لغرفهم الجاهزه نلتقي بليل نكمل تدريب وتتوكل
حنظل: متفقين , ان خنتي اخونج تمام؟
صاحت: محمود شوف شغلك
اخذنا محمود من الغرفه بشكل اعتيادي كأنما صرت واحد منهم وبيهم
صعدنا الدرج وانفصلنا اني وسلطان بعد ماكالي كم كلمه ماسمعت زين لان حجاهن على السريع ..
دخلت لغرفتي و رميت نفسي على الجربايه من دون ان افكر انزع ملابسي او اسوي اي شي لان التعب فول عندي
مادري هالتعب ضيك الخاطر من دعواتج يروحي لو من افعالي اليومية كاعد ادخل بيهن
حطيت عيني على السكف واجيتي ببالي لا اراديا ياسجى اي الله يذكرج بالخير
شكد حبيتج ولحد هسة ياسجى كلبي ينزف بحروفج بس الدنيا صدك عوجة و ماتفتهم ابد
من فرقتنا عن بعض , جنتي شمحلاج صدك .. !
طير كرخي ويفتر كدامي , اتذكر من جنه نتمشى بحدائق ابو نؤاس وايد تشبك ايد و عين تتغزل بعين عند الملگة
سجى : حنظل حنظل
كلتي اسمي ورحتي كدامي افتريتي مثل طفل اشترى ملبس العيد جاوبتج بلهفة
: روحة لحنظل كولي عمري
ضحكتي على كلامي بوكتها لان مامتعوده تشوفيني هواي بالواقع
سألتيني: شكد تحبني ؟
جاوبتج واني اسيطر على موقفي : احبج اكثر من حبج لأبوج
لان ماكو شي عندج اغلى واعز من والدج , وبكل لحظة حلوة انقلب عليه كلشي ولتصير مجزرة جبيرة
بيني وبين ابوج , حبج ياسجى خسرني هواي منهم اهلي , مستقبلي .
لأتفاجئ بوكتها ابوج هو .. ماريد ماريد اخ يابوية اخ يا بال اهدأ ونام شيخلصك يالليل شيخلصك .
نهضت من الجرباية ونزلت أدور على المطبخ اخذتلي كلاص مي من البراد وانا اصعد صارت الخانم بوجهي
: ورقة طلاق ميادة باجر تكمل وانا اختار الوكت المناسب وارسلها لبيتهه
حسيت رجلية تعبن ومابيه اوكف بعد، لزمت الباب وكتلها ليش اطلقها؟
: اللعبة تكول هيج . و ابتسمت بوجهي وراحت
صعدت للغرفة و غمضت عيني بسرعة ماريد شي بعد العالم كله حقد وكره ، نمت وماكعدت الا على همسات محمود شربني انواع من البهارات بحجة الاء خانم
توصي الكل يشربها تخاف احد من شركائها يمرض , تعاي يامهره وتعلمي لو هيج العصابة لو ماتنراد
صبحت عليهم بالخير و تقربت مني الخانم: تمشي بين البيوت وهمّ راح يعرفوك و ياخذوك ولا تكلي منمه , لان الجماعه جماعتها
ثانياً وين مياده والى اخره تنكر وتكلّهم ماعرف , ولو مهره تعرف بس المهم ، عليك تنكر وبس
وبعدها مهره راح تختبرك هواي في سبيل تعرف انت فعلا ولائك الها مو لغير جهه ف كون فطن وذكي بأي حرف وتصرف تسوي
اهم شي تعرف كل اعزاز كلبك راح يكونون بأمانتي و لتخاف , راح اتواصل وياك عن طريق
رجال اربعيني من زلم مهرة ف لاتستغرب
وكلمة السر كاردينا, مجرد تسمعها معناها من طرفي
مدت ايدها بجيبي وخلت جيس نايلون كالت: هذا فلاش و غمزت .
ضحكت وكتلها: شسوي بي؟
: اكيد اخاف عليك من الايدز هه
رحلة موفقه حنظل ..
ابتسمت بوجهها ماعرفت عنها شي غير بس انُ هي دارسة كلشي بأدق التفاصيل
درت وجهي كاعد اطلع , صاحت من يمها: من ياخذوك حاول تسوي نفسك مستغرب وتصيح لان راح ينتبهون على اقل تصرف تتصرفه
من دون ماجاوب كملت مشي لكيت سلطان حضنته و ابتعدت عنه تلاگت عيونه وماعرفنه شنو نكول
لبعض غير بس الله وياك , رحت امشي وكل المشي بالي يمج يا مياده شنو سوت بيه شفايفج ورجفة السانج ..!
ماحسيت على نفسي الا واصل المنطقة و دخلت الفرع واني خايف شفت هواي زلم عرفتهم لمهره لان الطيور على اشكالها تقع
انتبهت لواحد شوية سمين يحجي وحده بس من ضليت اخطف نظرات اله عرفته يحجي عن طريق سماعة
اكيد هاي فرصتي الي اثير انجاذبهم اليه !
عديت بكلبي للثلاثه و بديت اركض واني اتلفت عليهم واحد واحد وماحسيت الا انلزم من كدام وانسحل للبيت
ما انكر ياميادة ردتج تكونين بصفي وتغامرين ويايه بدموعج الحلوة بس الظاهر مالي نصيب بعد وياج , صياح و مرافس بيني وبينهم
ماكان يهتمون الا كعدوني على ميز ,. وطلعت عليه مهرة
: العار ما يموت مو صح ؟
نسيت وضعي ونسيت على شنو جاي كل الي تذكرته صراخج على كلشي
صحت بيها :قسم قسم لأشرب من دمج
و بكل هداوة ثقي بأسم الجلاله
صفكت ايدها ورفعت صدرها وصاحت ماما سجاوي
عقجت حواجبي شنو كاعد يصير رجعت نادتها بأعلى صوت : سجى ماما وينج دخلي
صوت الكعب يعزف من يمشي والعطر أحتل المكان وطلعت عليه سجاوي بأحلى ستايل ملابس !
قدمت المي وكالت بنبرة رجفت گلبي:حنظل ياهلا والله
وبتعلثم جاوبتها : سجى ...!
يتبع ...
____________________________
لا تنسوا التصويت والتعليق ..
نظام النشر بين يوم و يوم في تمام الساعة 9 ليلا
تابعوا حساب الواتباد لأن راح يتم التواصل وياكم من خلال المنصة
وللمتابعة على باقي مواقع التواصل الاجتماعي
الفيس بوك: تحسين لقمان
و الانستكرام: tahsin_ luqman
ألتقيكم بألف خير ببارت جديد .
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!