اصدقائي الحَلوين مساء العافية عليكم ..
ادعوا الجميع لمتابعة بيج الروايات الموجود في الفيس بوك فقط، راح اتواصل وياكم بكل الروايات من خلال البيج ، الرابط موجود بالبايو على حسابي الواتباد
عزيزي القارئ فضلاً وَليس أمراً أضغط تصويت لنشر المزيد من احداث الروايه.
فستان أحمر
تحسين لقمان
وجاوبتها بتعلثم: سجى ..!
جاوبتني وهي مبتسمة: ألنا حديث ثاني غير وكت ..
گرصت خدي بسهولة وكأنما لم يكن شيئ وأختفت من كدامي بأركان البيت
وجهت نظراتي لمهرة والحقد متوغل بداخلي عليها، طلعت علجهه و طگته بحلكة ،تقربت مني : يؤبرني شو مهضوم
وَ ألّي وراها يضحك على تصرفاتها كأنه يشوفهه ممثل تلفزيوني مقتبس شخصية موسى الحلاق , خلّت
ايدها على جتفي و كعدتني على الكرسي:
كالتك اللعب وياية صعب مو
سيطرت على نفسي و غيرت الحديث: شنو شعورج و احساسج من تشوفين الكل يتألم ويتأذه
جاوبتني والضحكة تارسه وجهها: ليش اكو احلى من الوجع , آه اي والله
ردت اسولف سوالف المظلومين منها بس .. قاطعتني وسألتني ببرود: شنو عندك هنا ؟
حنظل: شميت ريحتج وجيت
جاوبتني بكل أستهزاء : الضاهر حضرتك جلب واني مادري ؟
حنظل: والجلب يحب الفار مو بيده
غيرت كلامها وسألت عنج!
مهرة: ميادة الشريفة شنو اخبارها ؟.
حنظل: قبل لا تكولين اسمها على السانج بسملي افضل
مهرة: والله مسكين انت ماخذلك وحده منومتهه عند جملة من الزلم ..
حنظل: السفالة شتصير منج ؟
ضحكت بصوت متقطع وطكة اصبع ولحنت جوابها : احبها وتحبني ياوويليي
حنظل: المطلوب مني شنو هنا ؟
ماشبعتي من السويتي بيه
تقربت علية , رفعت صدرها بدشداشتهه وكالت: يعني تعترف اغتصبتك؟ وبيه كل الخير .
فتحت قبضة كف ايدي من العصبية لأن مجبور اتحملها والا بودي انام عليها و امحيها من الوجود
جاوبتها : لو بيج خير, جان واجهتي القانون الّي شردتي منه
مهرة : خيري على كد حالي يعيوني , ووجودك هنا منفذ حلو لنعوف شغلنا ونهتدي على طريق الصالحين
رفعت تجاعيد جبيني وجاوبتها: يا طريق صالحين تحجين عنه ؟
مهرة : نبوك وننهزم وننساك وتنسانة
حنظل: وضحي اكثر ؟
مهرة : بوگة بيوت تسوة هلي وكرايبي
حنظل: عندج اهل والله كلش زين !
مهرة : وليش ماعندي ؟ ليكون العركچي بنظرك منتف من اصله ؟
حنظل: جا ما عرفوا يلزموج ويربوج ؟
مهرة : وشبيها تربيتي ؟ اذا على الفاظي وهزات جتفي وطكات اصبعي ابداء حرية شخصية
لو الا تكون شخصيتي مثلك او غيرك؟
حنظل: منو غيري؟
جاوبتني بطريقة مستفزة : الى ينكطون شرف
حنظل: وشنو المانع تكونين شريفة ؟
مهرة : وشنو المانع تتعرى وياية وتصكلك بيتين بيرة ؟
حنظل: وترديني اسوي شي غلط ومن اساسه حرام ومابي ذرة شرف ؟
جاوبتني : اويلي يمه جا تريدني اتلون واصير شريفة وادعي الاسلام وانا غير شكل ؟
ماكو غلط وحرام غير بس الّي متلونين بحياتهم يعيوني
حنظل: عوفي التصنع وكوني شريفة وعلى طبيعتج !
باوعت على سعدي وكالت : سمعته سعدي شيكول جا انا شنو هسة يمه . شريفة واشرف من الكل بس المصيبة تدري وين ؟
حنظل : وين ؟
مهرة : انكم تشوفون الشريف مجرم ومتعصب وعركچي و زاني
حنظل: وين الشرف بهزات خصرج لو نومج ويا الزلم ؟
مهرة : اذا على هزات الخصر فهذا فن يبعد جبدي
واذا على نومتي ويا الزلم مجرد ونسة
وكلاصات البيرة تره اعتبرها كلاص زبيب
ردت احجي قاطعتني وكالت : وبالنسبة لاهلي كلهم واصلين مو شرط اوصل مثلهم بطريقتهم
شوية نسوي تغيير بالعائلة شتكول سعدي
سعدي: الكافر صعب يهتدي
حنظل: وصرت كافر لأن سألت عن شرفكم ؟
سعدي : تصير كافر من تطغي على غيرك و تحبسوهم بأسم الشرف والقانون والنزاهه وكانه احنا الخربنة كلشي
مهرة : تردونة نمشي على عقائدكم وكلام جبيركم , صعب هذا الشي
حنظل: لعد منو الخرب حالنا غير نماذجكم ؟
سعدي: احنا على كد حالنا نشرب نتونس ومستعدين نطلع ونصيح بعلوا صوتنا ياناس احنه عركچية
تريد الخرب حالك ؟ ادليك بي؟ روح لمكان السلطة و هناك راح تشوفه بعيونك الثنين
حنظل : ماكو فرق بينكم !
مهرة : احنا دنكول نبوك ونركص ونشرب , اما الي تكول عنه شريف و متقي الله فهذا الله وكيلك
يبيع مصلايته وبفلوسها ينام يمي اه اي والله ..
حنظل: لكيتي اعذار كلشي بس شنو عذرج لشغل الحرامية التردين تبوكيهن بيها ؟
مهرة : ماجاوبتك بعذر, اخذه منطق يروحي .
حنظل: السوالف وياكم عقيمة .
سعدي: نفس عذر الكافر من يريد يدخل الدين
مهرة : هاي هم انتم يحنظل من تنحصرون عذركم كالعادة سخيف مثل افكاركم
حنظل: اعيد سؤالي شنو خطتج ؟
مهرة : نبوك ويتوكل كل واحد بدربه
حنظل: والضمان ؟ شلون اثق بيج
مهرة : مو بحالك انا, لو ما البوگة تسوة ما اخذوك من الشارع ومخبوصة ادور عليك تمام؟
حنظل: اشاركج بشرط , ميادة والي وياها خط احمر وانا اكون حر طليق ما أتقيد بشي!
مهرة: خطتي اكبر من هلنموذج التافه مصممة على الهروب وبس !
حنظل : شردتي بالدنيا , الاخرة وين تودين وجهج ؟
مهرة : دينك بجيبك ..
واي سعدي اخذ حنظل
لغرفته يرتاح شوية وحضرولنا كعده على هوى الله
حنظل: افتهم موافقة على شرطي
مهرة : ماعتبرته شرط . وها لك خمس مثاقيل ذهب ك هدية
انتهزت الفرصة وكتلها: ليش راح نبوگ ذهب؟
جاوبتني وهي واكفة : من نكون على الغدة العصفورة راح تسولفلك
تركتني وراحت تغني بزوايا البيت وخلتني حاير بكلشي بأي طريقة ممكن اقنع بيها الغلطان على الصح ؟
تنصحه يكلي تكرهني تحجيلة ايه يكلك منو كال انا مسلم ! ..
يازمن شتراويني من عجايب بعد ؟
قاطع افكاري سعدي : استاذ لو سمحت تجي وراية للطابق العلوي غرفتك وحمامك هناك
كلت بكلبي اي عاد يحنظل صرت استاذچي هاهيَ خربت السالفة گتله: امشينا يابَ امشينا ولا يهمك
مشيت كدامه للدرج وانا مهموم , ضايع كل بالي يمج يروحي
نشفت دموعج ؟ اكلتي تغذيتي ؟ شنو صار بحالج !
سعدي : هنا بالبيت نظام صارم على الكل يمشي
اتمنى تمشي بي من دون ازعاج للنُزل الموجودين !
حنظل: البيت ايجار لو شنو ؟
سعدي : استاذ هنا اقوى شخصياتنا متواجده فا اتمنى متكون مصدر ازعاج لغيرك
هزيت راسي وانا مستغرب من شوكت مهرة صارت بهيج اسلوب وامكانية عالية ، صدك الفلوس تغير الواحد . ..
جاوبني سعدي وهو يفتح باب الغرفة : الفلوس تغير مقام الشخص من عادي الى شخصية يخشى منها الجميع
حنظل : عفوا ويامن تحجي سعدي
تقرب علية وهمس بأذني: النفسين متعبر عليهم , من تحجي بكلبك لتحرك شفايفك
حنظل : دكتور نفسي انت ؟
سعدي : تفضل غرفتك والحمام مقابيل الغرفة و جارك بالطابق البروف عبدالرحمن
حنظل : بروفيسور ويشتغل وياكم ؟
سعدي : اخذ راحتك بعد ساعة امرلك
راح سعدي وانا سديت باب الغرفة , الاثاث يفتح النفس ، باوعت على الجرباية وتذكرت
جربايتنه يميادة ورجفتج بيدي وضحكنا وكلشي بيج حلو شوكت تنتهي هاي المهزلة و ارجع
لأحضنج وتضحكيلي واضحكلج , اخ ميادة احس كل هذا حلم مو مستحيل بس صعب تحقيقة .
بدلت ملابسي ولبست دشداشة البيت الكانت مكوية ومعلكة ورة الباب وصار ماكو فرق بينهم وبيني
اتقبلت فكرة السرقة والحرام معندي اي منفذ يامياده اطلع منه غير بس اسايرهم واكمل شغلهم
ونروح انا وياج لبر الامان ونتسامر كل ليالينا , طلعت للحمام وويا طلعتي انفتحت باب البروف
كال : مسيو استاذ
جاوبته : اهلا بيك , وياك حنظل
حك سكسوكته واخذ نظرات يمنى ويسرى : اسم مميز . بس استنتج ردود جديدة
حنظل: شلون يعني بروف
رحمن : مثلا لتكول اهلا بيك جواب نمطي مأخوذ من دمية البشر
كول ردود جديدة مثلا اهلا وياك حنظل
حنظل: وهسة انت ضايج لان رحبت بيك بطريقة تقليدية ؟
رحمن : كل الراحة لك يا، عذرا ماهو اسمك؟
جاوبته: حنظل
رحمن: اذا وقت ممتع مرحب بك
حنظل : تشبهك كون مسيو
سوالي حركة الاوكي بأهامه معناها انعجب بردي , كملت طريقي وانا اتفرج على كل شيئ غريبة كل دار من بعدج يمياده .
غسلت وطلعت من الحمام لكيت سعدي يدك بالباب
: تفضل سعدي انا هنا
سعدي : حمام الهنا استاذ , عندك شي ارتاحيت؟
حنظل: لا شنو صار؟
سعدي : بدل اراويك الحديقة و غرفتنا الصايرة تحت الارض .
حنظل : مافهمت!
سعدي : استاذ البيت الي ساكنين بي هو من احد البيوت العامرة بالخير بذاك الوكت لان صاحبه المرحوم مخدرجي خارج البلد
حنظل : وهسة البيت بأسم منو ؟
سعدي : من تنزل تعرف اكثر , اخذ راحتك
كلت قبل لا يتغده بيه اتريك بي , تركته ورحت . حفظت نمطهم مو مهم التحجي والي تعبر عنه
المهم تسمع وتطيع . فتحت الكنتور زي الملابس حلوة ومريحة لبست دشداشة جديدة
وتوجهت لباب الغرفة
جذبني باكيت الجكاير باكيت صغير على ميز الخشب اخذته بحسبة يصبرني عليج .
و فتحت الباب لكيت سعدي كدامي كال : شغلنا حلو ونظيف لان اساسة السرية والنزاهة
جاوتبه : يانزاهه وانتو تردون تبوكون بيوت ومن غير سوالف الشرب والمخدرات والقتل
سعدي: اكو احلى من هذا ؟
حنظل: ما گتلي البيت لمنو هسه؟
سعدي : بلغتك اهم شي السرية , تفضل انزل
نزلنا وواحد يحاول يرتاح للثاني ، طلعنا للطارمة
سعدي : الحديقة كُلها كاميرات ويعني المكان امان ..
حنظل: وليش هاي الحماية والكاميرا ماعرفت انا لحد هسة !
سعدي: ذكرتلك اهم الشخصيات الفكرية نازلة وياك بنفس البيت منكدر نفرط بحياتهم
حنظل: وسبب الغرفة الي تحت الارض شنو ؟
سعدي : تفضل استاذ من هذا الممر , جوة التارتان باب خشبيه تنزلك ألها
هاي الغرفة نجتمع بيها وكل مخططاتنا هنا , وتعرف استاذ ولد الحرام هواي اهل القانون من يكبسونا ماعدنا ملجئ غير هلغرفة
اباوع لكلامة وعقليتهم وطريقة تفكيرهم مال كاعدين كعدة عرب وورقة وقلم حاسبيها حساب
معدل , شال قطعة الثيل الاصطناعية و نزل ، قدملي ايده و نزلت وراه , الغرفة مخزن كتب هواي .
لكيت ميز و الكاعد عليه البروف , سعدي: بروف اعرفك حنظل .
باوعلي واشار بأيده على الكرسي: تفضل دقايق وتجي مهرة
حنظل: شلونك بروف
رحمن : مسيو حنظل اهلا
كعدت وانا اتمعن تفاصيل البروف , رجال جبير والشيب نابت بنصف وجناته ..
بيمن هددوك اكيد بأحبابك هو شنو يبقي الواحد من عدنا غير احباب الكلب والروح كتله: مبين عليك صاحب ثقافة حلوة
جاوبني بكل برود: واي شنو ؟
حنظل : وواعي هم
البروف: أي؟
حنظل: السؤال الاهم , ليش مضيع مكانتك هنا !
ضحك وكال : بشنو مدحتني قبل شوية ؟ مثقف وواعي صح ؟
جاوبته : بلي صح
البروف : ومكاني غير هنا وبس , مكان الواعي والمثقف بكل مكان مظلم
حنظل: انت مكاعد تهديهم انت تساعدهم !
البروف: اساعد مقابل اعيش وبس
حنظل: وربك تقابلة بأعمالك المنحطة؟
البروف: الرب لازم يتقبل فكرة اكسر واجبر , اساعدهم احصل سيئة و اوعي احصل حسنة وهاي معادلة حلوة ..
حنظل : مو انت التفرض نفسك على الرب !
البروف: هاي فلسفة الكون والبشرية وخلاص
احاول اسحب بالسانة اكثر كلام , بس دخلت مهرة : جاهزين ؟
حنظل : لشنو؟ هو انا نزلت هنا اشوف البيت شو رأسا صار شغل واجتماع !
جاوبتني: اتعلم الاستراحه هنا قليلة يهمنه الشغل وبس
واذا على الراحة جايتك اسكر واتونس ويا بنياتنه
حنظل: حياتج بيرة وركص وبس
البروف : تفضلي مهرة شرحي الخطة وقتي ثمين
مهرة :عدنا ست بيوت صاحبهن صايغ ذهب وكل واحد مأجر ومو بس اله اكيد ويا شركاء مايهمني
من هذا الحجيته غير بس اخذ اليّ بداخل البيوت
حنظل: جوز كل بيت حافي منتف ؟
البروف: سؤال ذكي !
مهرة : مختار المنطقة يصير صديق الصايغ و عندة معلومات واسعة والذهب موجود بس قليل الا البيت السادس والاخير ، خير الله كله بي
البروف: وليش الصايغ اختار البيت السادس ! جوز يكون فخ للسارق؟
مهرة: المختار صديق الصايغ ولتخاف ماكو أي فخ .
و من ندخل البيت الخامس راح ندخل للسادس من باب الحديقة لان اكو باب يطلع
على البيت السادس مباشرة وماندخل الا بمساعدة اهل البيت الخامس
البروف: شكد تستغرق هاي العملية
مهرة : بنفس اليوم
البروف : صعب هيج كلش , لازم تباتين بالاول وتدرسين للثاني والثالث وتشوفين صعب او سهل العبور
وبهيج حاله زلمنا راح يكونون وراج انتي وتعبرين لكل بيت يحل مكانج جم زلمة خشن
يسيطر على العائلة
مهرة: اذاً نبات لازم ندرسها بشكل صحيح
حنظل: ووجودي شنو فائدته
مهرة : راح تلبس قاط ويتعدل شكلك ويتنور وجهك بالعفة وتدخل البيت الاول بحجة رش مبيدات وانا وياك مساعدتك
مجرد نسيطر انطي ايعاز لخارج البيت يدخلون ورانه ونسد البيت وبهيج حالة سيطرنا على كلشي
حنظل: كانه الخلقني ماخلق غيري !
البروف : اكو الارتب بس مو نفس ميزاتك
حنظل : شلون يعني
مهرة : بكل بساطة الفقر والاخلاق طالعة على وجهك
ردت احجي بس البروف
كال: الكبابجي حضر الزلم لو لا
حنظل : ياكبابجي ؟
مهرة : هذا رجال من اخطر الناس الي تبوك
كل اسبوع يسكن بمنطقة ليل ونهار يفتر بيها في سبيل
يجمع معلومات عن المنطقة ووين ماكو فلوس حلوة..
وعندة زلم خير من الله ويكدر يساعدنة
دخل علينا سعدي وبلغنا : الغدة صار جاهز
على سفرة تليق بيكم موجوده بالحديقة .
كامت مهرة وكالت : تفضل بروف خلينا نتغدة , ويلا عيوني حنظل
طلعنا من الغرفة وبدينا نتمشى بحديقة البيت , البروف يورث جكارته ومهرة تحجي ويا سعدي
وانا ميادة افكر بيج وبس , شلون بيج اتخلى عن امي
وارجعلج , يلحبج ماكلني! صاحت مهرة : ابو الشباب حضر روحك الضهر تتعلم شلون ترمي
نفضت التراب الّي برجلية وكتلها : شنو ارمي شنو فائدته استعمل السلاح ؟
مهرة : لنفرض انحصرنا حصرة الجلب بالجامع وين ننطي وجوهنا غير نكتل لو ننكتل !
البروف طبطب على ظهري وكال : مو شي جبير مجرد تتعلم تدافع عن نفسك وبس
كتلهم امرلي لله وسكتت كلبي ماينطيني احجي حرف واحد ولا بيه ابد . معقولة حبج يروحي قيد
لساني وكلبي و عقلي يفكر بيج وبس , كعدنة على السفرة ومهرة عدها متحلى الكعده اذا ماتشوف
قواطي البيرة كدامها ولو كان الامر عادي جان عفصتها للقوطية وعلجتها بحلكها
يحجون سوة وانا اكل بالموجود , كل لكمة انزلها بمعدتي انويها الج بأضعاف اضعافها , اتغذي واكلي يروحي .
بلكت انجمع بيج بكشخة جديدة وحياة جديده ..
من مسكتي ايدي حاولتي تمنعيني ماروح واكعد
اسمعج وتفهميني عنج
ثقي لحد هسه اتلمسها وابوسها .
كملنا الغده وتوزعنا على البيت واحد يغسل وواحد ينظف سنانه
وكفت على المغسلة غمضت عيوني وتمنيتج تكونين بصفي تلزميلي الخاولي انشف بي
ومن اكمل اطبع شفايفي على كصتج واشم ريحة ركبتج
ويوسوس الشيطان براسي وبراسج وننسى كلشي ...
غسلت وطلعت لكيت مهرة كدامي كالت : تفضل جاي , نومي , بيرة . ويسكي، خالتك ، شتريد موجود عيناي
حنظل: زين تعرفين النومي
مهرة : نطلع هسة ادربك ؟
حنظل: منو يدربني انتِ ؟
مهرة : نروح لمزرعة الحجي وهناك نتدرب .
حنظل: حجي مطلك ؟
مهرة : ياسين ، رجال روحة بالاسلحة
اباوعلها شربت استكان الجاي مرة وحده
وكملت : توكل , اليوم روحك املخها بالطلق
ضحكت عليها ورحت لغرفتي عدلت شعري وطلعت يم الباب الخارجي . لكيت سعدي كال : ديربالك لا تأذي الشاع، وغمزلي
جاوبته : انام ويا جلب ولا وياها .
ضحك وراح , ضليت اروح واجي بمكاني شوية واجتي لابسة الصاية سودة وعطرها سابقها بأمتار
وصلت يمي وكالت: الطريق حلو وشوية ينعس بس لا تشيل هم اضمك بصدري وجوه صايتي وانومك
رغم ان هي متوحشة وصبيانية ومتتفاهم بس مبين كلبها طيب و ماعرف ليش حسيت هيج!
سألتني : ها ابو الشباب نكضيها صفنات ؟
حنظل: لا لا يلا نتوكل
طلعت كدامي شغلت سيارتها واجه رجال جبير عليه همس : كاردينا , ديربالك من مهرة اختبار الك لتكشف نفسك
عرفته من طرف الاء خانم , حنحنت بصوتي كلبت شعري لليمنى حركت رجلية لطريق السيارة وانا
اكول بكلبي اشوف تاليها وياج يمهره . صعدت والملعونة فرحانة وكانه رايحة حفلة .
كالت : ببالك اغنية تسمعها
كتلها : شغلي التردي , مابواهسي شي
بدأت تسوق وتغني ووره كل موجات صوتها الي اشبه بصوت رجال
مهره : تحبها مو ؟
حنظل : مياة؟
مهرة : سجى !
حنظل : تساليني احبها بعد الصار بيه !
مهرة : الحب ماينسي مهما صار مو صح ؟
حنظل: سجى ماضي وبس ..
مهره : ماحنيت الها ؟ لو مصار الي وياك جان انتو متزوجين
حنظل : ولد الحرام فرگونا و الله حاطه وياهم , اطلب طلب
باوعتلي وكالت : اطلب حنظل . كول
باوعت لعيونها ولاول مره اشوفها حلوة ومدبدبه والعيون وساع وجمال الخدود تفاح محمر بالجديد
مسحت كل هاي الافكار وكتلها : فتحي الجامه وخليني ارتاح
سوت الكلته الها , و كلامها يرن بعقلي معقوله لو ما احد طلع كدامنه جان هسة احنا متزوجين
هو احنا انا وياج سجى شكد حلمنا وشكد طلعنا سوه اخ اي والله
تتذكرين من مرينا يم باب حلاق وعلى بابه صورة طفل . كلتي : هذا ابني انا وياك
بوكتها ابتسمت بوجهج وضميتج لصدري وكتلج ان شاء الله ليش لا
ابتعدتي عني وضربتيني بجتفي وتكولين بحدة : شوف شوف اكله لتكول ان شاء الله ما معلية احسك جذاب معناها متسوي شي
متصدكين ياسجى غير بس من احلف بيج وبس , و الا طلعتنا على شط العرب ناخذ هوى
ونايمة على جتفي تكليلي جتفك مليان حنيه مليان . اضحك على سوالفج وماضحكنا غير الحجية الي مرت من يمنا
: حبها ولك حبها , دنيا ضلمه . وانتي رديتيها بالسانج الناعم : لا بيبي حبنا طاهر ..
فرت ايدها وجاوبتج : اوي بيبي . زين من الوليد متحمل لسانج
اخ يا سجى حجية مشيبه ماتحملت السانج الي ينكط عسل . شصار بحالي وبحالج هسة
. قاطعة تفكيري مهره : تعرف تقنص؟
حنظل: قناص قصدج ؟
مهرة : اي تعرف لو لا؟
حنظل: اكيد لا , ومن هسة اتفق وياج اي استخدام للسلاح ماستخدمه مجرد بوكت الحاجة .
مهرة: شرأيك تتعلم تضرب بالقناص ؟ اشوفه حلو عليك
حنظل: متفقين عادي , ماحس الا مهرة ضغطت بانزين و بين السيارات تمشي وتصيح
الشارع اليه ابو السايبه , وانا اهدء بيها وهي تكلي : خواف مو كلبك النستله انساه ويايهز
حنظل: يمعودة راح ننكلب صفطي على جهة
تروح يمنى ويسرى وتضحك بعلو صوتها , ابو سايبه ورانا دكلها هورن وهي طلعت راسها
وصاحت : لك ابو الاصفر ابلع وردي احسلك يلخنيث
جريتها ليجوة وانا اتوسل بيها تمشي وتسوق علكيفها روحي رايدها لتكلبينا
وهي مامهتمه لوجودي شغلت الديجي وطلعت دمج اغاني وتهد الستيرن .
تطك اصبعتين وتهلهل وتغلط على اكبر مشورب يمر كدامها
شكد ياميادة عرفنا انا وياج مهرة بس كلش بيها جانب مخفي
. متمردة وعصبية وسريعة التفكير .
شخطت السيارة ووكفنا : وصلنا يمدبك ، انزل فضني
انا مدبك ؟ باوعت لروحي هاي شنو عليمن غلطت , نزلت كدامي وشالت السويج
وصاحت : احسب للتلاثه واقفل السيارة والزوج يطلع منها
طفرت منها بسرعة , خبال مهره عالم مختلف !
صحت بيها : تخبلتي انتِ . هاي شلون راح نتدرب امشينا نرجع
تقربت عليه وهي تطلع لسانها تبلل شفايفها: الي ينفرد وياية يطبع ملكيته عليه , وغمزتلي
ضحكت وكتلها : مهره رحمي حالي ويلا نتدرب
كالت: شبيك ماما انت ليش تعنفص ؟ افتح ايدك شو يلا
استغربت وفتحت ايدي الها . حطت سويج السيارة وكالت: ها ابااا
وهسة السويج بيدك طلع القناص ووراية يلا
ابتسمت على شكلها وتصرفاتها و ماخفي كان اعظم . طلعت القناص من جنطة السيارة وجرتني
بين الحشيش داخل البستان باوعت للمكان شبه مهجور
ومحد اكو مجرد سيارات قديمة كلش هواي مطعجة .
تقربت على السيارة وطلعت من جيبهه طبشور وخطت حرف اكس وسوت دائرة صغيرة على وحدة منهم
ورجعت وكفت يمي انطيني القناص , اخذته مني ونامت بالارض وهي تكلي عكس ايدك يثبت
بالارض علمود تسيطر اكثر
ورجليك اياك يتحركن , واهم خطوة ميصير تتحرك اي حركة لان من الممكن يشوفك قناص
العدو حسب الي فهمته الاثنين عدهم قناص . كامت على حيلها وخلتني انام على الكاع ونامت بصفي مدت ايدها الناعمة على ايدي
وبحجة تعلمني تتقرب مني اكثر , وهاي اولها وحدة غيرج تلمسني !
عطرها سطرني وتعاطفها طغى عليه ! كالت سيطر وعد للاربعة وارمي
وفعلا صوبت مخرج الطلقة بصورة صحيحة وضربت طلقة وكانما اعلنت عن بداية جرائمي ..
حطت ايدها على جتفي ودفعتني على الحشيش وهي تضحك وتدحش صدرها بجتفي .
قربت راسها من راسي وعيونها تلمع على شفايفي
عرفت التريده غمضت عيوني . ماردت غيرج تاهذ مكانج لكن المكتوب يختلف عن ما نتمنى .
ماحس الا سلاح انسحب علينا
كمنا من مكانا مفزوعين .
سلاح على راسي وراس مهره , ومهره تمتمت
و واحد منهم يحاجينه: اولاد العري ما تزنون الا هنا .
راشد لك راشد وينك
اربطهم وصورهم
مهرة صاحت: ولك مابقه الا الجراوي تتمرجل علية .
تقرب عليها وبعكس السلاح على راسها ضربها
دار وجهه بأتجاهي
غمضت عيوني وتسارعت انفاسي ...
يتبع ...
___________________
توضيح: كل حوار الشخصيات ليس مسؤل
عنها ولم يمثل رأي ابداً
لتنسون متابعة بيج الفيس بوك الخاص بكل الروايات ومن ضمنها فستان احمر ، الرابط بحسابي على الواتباد
وللمتابعة على الانستكرام: tahsin_luqman
اشوفكم بالف خير ببارت جديد ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!