فستان أحمر
" النهـاية
تحسين لقمـان
صاح: رايح اكمل دراستي
وانتي كملي مسيرتج القذرة،
صحت: شنوو! !
حنظل:مثل ماسمعتي ماكو داعي اعيد
فتح الباب وتركني بنص الغرفة لا اني راجعة ليورة ولا اني رايحة وراة،
وصل لنهاية الدرج درت وجهي على الجرباية
لفيت روحي بسرعة وطلعت
ميادة:حنظل حنظل انتظر اسمع
صاح:شأنتظر شأنتظر ولج شأنتظر
شأسمع بس بس لا أكعد اسمع قصة
من عرضتي نفسج للأغتصاب
بس لا اكعد اسمع كلماتج الــي ماله معنى
لا لا تتوقعين مني هذا الشي
كمل كلامة وَ ضرب الباب بيده، حطيت ادية على اذناتي رجفه قوية تسير بجسمي
ماعرف ماعرف شنو اسوي
صفگ ايده وصاح: اني رجال رجال رجال
قرب وجهه على وجهي
وصاح بنصه: اني رجال رجال رجال فهمي فهمي
ماتحمل ماتحمل مرتي الگاه بهيـج وضعية
شلون ترديني اكضي ليلي وياج
اباوع منا ومنا، ثريه واكفه تبجي بهدوء وياسمين تبجي وحاطة ايدهه على حلكهه
طلعت شهگتي حيل وَ صحت: اني شنو ذنبي
شنو ذنبي فهمني
قابل اني الفتحت صدري اله
قابل اني اني البللت شفايفي علمود يجي
هذا الساقط يتلذلذ بيهن احجيلي قابل اني برضاتي رحت لحظنــة ولو اريد اتمعشـك
واصير حالي من حال البنات الوياية جان ماساعدتك وساعدة روحي بطلعتي مناك
واحد واحد بالكون منكم يحس بيه
وترة اني بشر بالجذب بالجذب ضوگوني طعم
الحلاة بالجذب حتى لو ربع ساعة
بنص صياحي وانهياري راح لمعرض الهول لزم باب الباب كسر الجام بيده تكسر
وهو يصيح: ليش ماگلتي
ليش ماحجيتي مهرة معلمتج على لواتاته مو
تقرب بوجهي لزم شعري بيده
اجتي ياسمين بأتجاهي تصيح:اتركهه للنبيه اذا انت رجال وابن ابوك روح للعار
الـي أخذ شرفهه روح حاسبة •
صاح:لج اخ لو كدامي قابـل ابقي عايش
اشرب من دمه فاهمه لو لا،
جر شعري ورجع صاح: ومن هاي الساعه الكدامج تنسين بشر اسمة حنظل مر كدامج
صحت:وخر وخر عن شعري وين تريد وين فهمني عايفني ورايح مو لعبه بيدكم اني
اصحى اني انسانه مو سلعة •
هد ايده وراح بأتجاه العلاگه مالته شالهه وهو مخبوص وصاح: عمي كريم بنتك حطيتهه
يمك والبيت بيتكم رايح اني
ركضت وراه لزمته من ايده واني
منهارة: حنظل اني ميادة
الكتلهه احبج، الطبعة شفايفك على رگبته
الكتلهه للموت وياج، الكتلهه انسي الماضي
وابدي وياية من جديد
وين عايفني
حنظل وروح اختي الصار مجبوره عنه
ليش ليش أتركوني وحدي
جر ايده بعصبية وراح عني فتح الباب الخارجيه ركضت وراه واني أتعثر
عيوني ماسكتن من الدموع ، رجفه بجسمي تزيد بكل خطوة اكثر واكثر اريد الحك
عليه اريد اصيحه مديت راسي من الباب لگيته رگب تكسي وراح، مديت ايدي وصحت بعلو
صوتي: حنظل لا لا حنظل لا تعال تعال
وكعت بالكاع يم الباب واني ادگ على وجهي وأصيح بعلو صوتي: ليش اله اني ليش
ولج يادنيا اخذي روحي شعندي باقية
لحد هاي اللحظه ولكم ارحموني ارحموني
وينج يهيماء وينج تعاي شوفي اختج شصار بيها
اخذيني وياج فدوة ماريد ماريد اضل
ثرية اجتني تركض شبگتني بكل قوة واطبطب على ظهري علكيفهه تبجي و تنوح ويايه
شتسوي هاي المكروده شتسوي
ثرية: اهدي اهدي احنه وياج ماتركناج احنه خواتج
وخرته عني وصحت بيها: ماريد ماريد احد كلكم نفس الطينه سودتو الدنيا
ارحموني شسويتو شسويتو بيه لخاطر
اسلامكم ارحموني
اجتي ياسمين حضنتني والدموع تهل على وجناته تواسيني بجم كلمه
ابتعدت عنهه وگمت على حيلي واني اروح منا ومنا توازني مو ذاك الكد: مو اني الاغتصبت روحي مو اني العرضت نفسي لهاي الدروب
مو اني وروح اخيتي مو اني
ياسمين:احنه وياج واحنه مصدكين مو انتي. بس كافي روحج أنهدت
سحبت رشح خشمي ومسحت الطالع بيدي وصحت بيها: وهو وهو كليلي وهو مصدكني لو لا
يابنية كليلي يابنيه تتمنى
ليلتهه هيج كليلي يابنيه ولكم تسولفلي
على الستر ويسترني
دكيت صدري بيدي اليمني وصحت: وينه الستر كليلي اخذ حاجته وتركني مفضوحة الصد ،والزند
ياسمين:اهدي ميادة حالنه من حالج احنه
بس اهدي
ثرية: ياسمين شلون تهدأ ماتكليلي، شكد ماتحجي حقهه
بس ميادة شمدرينه احنه بحنظل هيج يكون
ياسمين:ولو ندري ياعيني بهذا الشكل يكون اكيد مانقبل لعد شنو احنه مانكيف نفرحلج.
صحت بعلو صوتي:ولجن كتلتـني يسترج ومايتركج تاليهه طاح الفاس بالراس
شگيت زيجي وصعدت راسي للسماء وصحت:ربي ربي إلهــي تدري انت تدري مو بحرارة ولوعة
صدري انتقم من كل واحد اخذ شرفي انتقم من كل واحد عذبني وشفت الويل بسببة
ربي انت مو موجود فوك وتشوف و اكو ملائكة تشوف الصار خليهم شاهدين شاهدين
وكعت بالگاع وميلت راسي لليمنى واليسرى واني اردد جم بيت حافظتهن بأيام المناسبات بدار الايام
كل حيـل ماعندي بعد
اجاني رفيق يركض اول ماشافني دموعه هلت على وجناته:ميادة ميادة شنو شنو فرح فرح
رفعت راسي وكتلة :اي يرفيق ونعلگ صواني شموع مو
جاوبني وهو يصفك:طا طا فل فله فله
فرح فرح فرح
ميادة:رفيق طلع جذاب عافني وراح كسر
ظهري رفيق رفيق
لزم اديه وحضني، احس اكو هوى على شعري حار عرفته ينفخ بنفسه ويمسح بيده التراب عن شعري
بنص هوستي واني أگول بگلبي احنه المخابيل يرفيق وانت الصاحي والله
رغم حضنه الجبير ورغم قساوة الدنيا
والبشر ويا بس حضنه دافي
دندن بصوته: دللول للول دللول اي اي دللول يرفيق يرفيق دللول
نام نام نام اي نام نام يرفيق نام
اني اني اي اي اني امك امك يرفيق
اجتافي تهتز من كثر البجي على كلماته وكلمات امه المرحومه الي لحد الان يتخيله بالـه
و على خنگات الدنيا ويايه، گومني من الگاع وهو يهمس علكيفه يم أذني: كلنا كلنا كلنا اي اي كلنا
لازم نموت نموت ما ما نستحق نستحق اي نستحق نعيش عيش ععي عيش عيش
اسمع بواجي ونوح ياسمين وثرية مادري على حظهن على حظي الماضاك طعم الراحة
اسمع ابوية بغرفتة يبجي
كعدني رفيق يم باب المطبخ حط الدبدوب بحضني وگال: موسى موسى موسى هاي فرح
فرح فرح ميادة ميادة البارحة البارحة
البارحة اختهه
دم دم دم دم
حطيت موسى بصف رفيق، وحطيت ايدي على وجهي وانهاريت بالبجي أسمعه يگله: موسى موسى أكعد من الموت الموت الموت
من بين دموعي گتله:رفيق ماكو واحد من
الموت يصحى
صفگ ايده، هز راسه لليمنى و لليسرى وصاح:بس بس يجون بالحلم بالحلم تدر تدرين تدرين ميادة
ميادة اي ميادة بالحلم تجيني تجيني فل فله فله اي اي فله تطب تطبع تطبع بوسة بوسة
تگلي تكلي تكلي رفي رفيق رفيق هاي هاي اي هاي بوسة بوسة بالهوى بالهوى تشمرها وتروح.
هز راسه لليمنى واليسرى وگال: ملعونة ملعونة
احبها احبها احبها
يبجي ويضحك، وعلى ضحكاته اضحك، گلت بهمس لو فله موجوده وتشوف حالك
هيج جـان ماتت رأساً
دخلت ثرية كعدت يمي وگالت: الكاتبة ربج يصير كومي سبحي واحنه هنا خواتج لا تاكلين هم
ضحكت بوجود الدموع: اسبح و يروح كلشي
بهاي السهوله تضنيها ثريه
معقولة اسبح وتروح بوسات حنظل
معقولة اسبح وتروح انفاسه الحارة من يم الخصر
مسحت دمعتهه وگالت:على الاقل تتخفف
ميادة:والگلب
شلت ايدي ودگيت گلبي بكل قوه عندي: وگلبي وگلبي والعطب الـي بي
ولكم محروك محروك
تشوفون شي ينحرگ كدامكم تطفوا بسرعة
وگلبي والله محروك تعاي طفي بنفخه بنفختين
عفتهم وگمت على حيلي صعدت للغرفة، فتحت الباب باوعت على الفرشة متخربطه ، الريحة
متروسة رحيته تقربت للدوشك وخرت اللحاف ودخلت كل جسمي جوه اللحاف،
رجليه قربتهن بأتجاه رگبتي
وغمضت عيني نزلت دمعه، تغاضيت عنهه
وخليتهه تنزل على راحتهه، تمنيت انام والنومة تكون طويلة اكعد بعد اشهر مار الحلو والمُر بيهن،
سحبت رشح خشمي ونمت. كعدت على همسات رفيق وخرت اللحاف وگعدت عدل
رجعت شعري ليورة گتلة:رفيق شعندك هنا
هز راسه لليسرى واليمنى گال:تلف تلفو تلفون تلفون اي اي هذا تلفون تلفون
فركت عيوني بسرعة گتله: ياتلفون احجي
علكيفك وين ياسمين ثرية
رفيق: تلفون تلفون الو الو الو، جاب جابت جابته اي اي جابته بنيه بنيه گالتلي كالتلي هذا هذا
لميادة ميادة دزه دزه حنظل حنظل حنظل
صحت: شنو شنو حنظل دزلي تلفون وبيد بنيه
كمت على حيلي، الم صار بمنطقة الرحم رأساً
صحت : اخ ياسمين ياسمين لحكيلي
رفيق:وجع وجع وجع يا يا س سمين ياسمين
اضحك على رفيق ابجي على الالم الصار بيه گتله:فدوة صيحلي ياسمين بسرعة
راح ركض طلع وهو يگول كلمات مامفهومه يجيبها منا ويردهه منا، كعدت بالگاع من الالم
واني اميل وجهي منا ومنا ، اجتي ياسمين تركض
حطت ايدهه على وجهي واني اعصر بتقاسيم
وجهي من الوجع گالت: شبيج شنو الصارلج
جاوبتهه واني أصيح من الوجع:مادري ياسمين وجع كلش مادري ماعرف
لطمت على وجهه وكومتني دخلتني الحمام الفوك، كعدتني على الغربي و نزعتني هدومي،
لگينه دم شويه والوجع يسطر الف سطرة غسلتلي بمي دافي وهي تگلي: شويه سكتي
لا تونين جنج ارمله، ياماطلع دم وطلعت
خيستنه شو بس عاد •
جاوبتهه واني حاطه ايدي على الخصر: ولج ياسمين ماتحمل ماتحمل وجع فضيع
ياسمين: جا البارحه مصارلج شي نمتي كعدتي
كمتي تنزفين عاد تزعلين ترضين
حتى بيت رحمج يمشي بالمگلوب •
اندگت الباب صاحت على الباب: منو ، منو
اجانه صوت ثرية:اني شبيه ميادة نزلني رفيق
جاوبته ياسمين وهي تضحك: ماكو شي عيناي بس المجرى طگ وكاعده اشتغل بي
ثريه من يمهه: دهر دهرج ياسمين
ياسمين: ثرية احمي الجاي بروح موتاج بين مانزل
اسمع خطوات ثريه على الدرج عرفتهه راحت
كومتني ياسمين بعد ماغسلتني ونظفتني راحت جابت دشداشه حلوه بس مستعمله
مادري منين تجيبهن لبستهه واني ساكته
كتله: ياسمين شنو هذا الالم الصار بيه
خاف صاير بيه شي
ميادة: شيصير بيج، بس عيوني انتِ من السابق مفشوخة والبارحه مفشوخة وانتي جديده
على هاي دروب
هزت جتف و هزت حواجبه وطلعت صوت بحلگهه: شويه شويه تصيرين استاذه
وضحكت ابتسمت على سوالفهه، نزلتني وياهه علكيفهه بايه بايه تلگتني ثرية من الدرج نزلني
كعدني على ميز الاكل، رفيق بباب المطبخ وابويه بالغرفة نايم وشابع قهر
ثرية:ابوج المسكين نايم كلت خلي اخذه انظفة
هزيت براسي والدمعة متجمعة بعيني، كالت ياسمين:الرجال شرد بدل مايضب البراغي
صاحت ثرية:ياسمين الوكت كلش نحس
مو وكت ضحكج
جرت اديه وكالت:احنه وياج وايد بأيد شنو عبالج الدنيا وكفت من راح حنظل
متوهمة شو ستوهه بدت الدنيا
ياسمين هزت جتف وگالت: اي ام الچعچ جا غير بيت بلاش اجاج وين تحصلي
ميادة: شسمة بنات كعدت من النوم رفيق بيده تلفون ويگول حنظل دزه
ياسمين ضحكت وگالت: يلا استفادي بيت وتلفون جا كون
كل اليرحون من حياتنه ياخذون گفاهم
الاگشر ويبقون النه خيراتهم •
ضحكت وكتلهه: هو تلفون وماعرف استخدمة ترة
ياسمين: والي يمج شنو طرطور دجيبي وشوفي شلون افرج ويا فر معدل
ميادة: حتى تلفون تعرفين
جاوبت ثرية: والي يرحم والديج هي الـي تشيل قناني ماتعرف للموبايل ياسمين مصيبة عيناي
ياسمين صفگت ايدهه وشهگت : عيني ام الدواهي ام الدك نسيتي ايامج
لو نسيتي اسمج ثورية الدنبكجيه
وهم ثورية بالواو •
ثرية: غير رزقنة وهسه صفينه لا دمام ولا غير
ميادة:بنات لازم نشتغل بعد اذا حنظل
وراح لازم نحط ايدينه على بعض
ياسمين: وشنو نشتغل برأيج
ثرية: اني البارحة مريت على فريز الثلاجة لگيت بي لحم وهسه على طاري الشغل ليش ما نسوي
كبه وكشمش وجم بصلايه ناعمه ونبيع
ياسمين: سبحان الله من الدك للف الكبه، فدواتج عيوني
ميادة:ياسمين اهم شي نشتغل ونجد من عرك جبينه مو عرك ابطنه من الدك والركص
ياسمين: وياجن اني شنو تبيعين وياجن، قابل ارجع اركص هاي الا اذا جنت مگروصة
ميادة: قبل لا نشتغل لازم نعرف كلنه احنه بنات وحيدنة ندير بالنه ع نفسنه افضل
وماصفى النه غير بس هذا البيت
واذا على ابوية رجال يومين
وكالت ياسمين:رايح لگبره •
ثرية:انتي بيش مفاوله على الرجال
ميادة: لا صح كلامهه بوكتنه حالياً مطلوبة من عدنه الجرأه والصراحه ابويه لاحول ولا قوة
ومقصد كلامي منعتمد عليه لازم
على نفسنه وبس
ياسمين: وانتن عايشات اللحظه تردن
تعيشن من الكبه
ثرية: نحصل الالف الالفين
ونقتصد بأكلنه لحد ما الله يفرجها
ميادة: كل وحدة بينه تسوي شي وتبيع علمود ربحنه يكون اكثر ثرية الكبه وياسمين تخيط
واني اودي الكبه ابيعها واشوفلي منا منا حتى لو اتبوش وادفع عربانه
ياسمين: من طاحظ الدنيا الغبره اي والله الي تلتف على البشر لفات الحيايه
ثرية: گايمة من هسه اسوي ، بس فدوة منو تطلع تجيب مواعين كراتين شلون نحطهن
رادت ياسمين تحجي رأساً كمزت: اني اطلع واجيب ماكو وحده بيكم تطلع
لازم ندير بالنه اكثر ، مجهول مستقبلنه ومجهولة ايامنة، موتنه بلحظه
ياسمين: ترة احنه ماكاعدين بحصار يحلوة شو سويتيه ضلمه ودليله اعمى
صحت بيها من كثر ماجزعت: اختي ماتت، وايام ابويه معدوده على الي كاعده اشوفه بالحمام
ورجلي الاگشر عافني وراح
ورفيق مخبل مخبل تعرفين شنو مخبل
واحنه بنات سمعتنه زفت زفت ناقصتنه سمعه
حصار مو حصار الكل الصاحي والنايم
لازم يتقبل يومه وينزرع بالگاع
لحد يتوقع مهره تتركنه ولحد تتوقع المسؤولين على مهره يتركونه بحالنه، ناخذ الحذر
افضل من ما اخسرج واخسر ثرية
انتهبت الهه دمعتها وكعت، كملت كلامي لهثت بسرعه لأن على حد صيحه
گامت حضنتني وگالت: هاهي هاهي
ثريه جابتلي كلاص مي واطبطب على ظهري سحبت روحي منهن واني اشوف رفيق نايم بباب
المطبخ والذبان ملتم عليه يكسر گلبي
فوك ماهو مكسور
دخلت لغرفة البنات فتحت الكنتور فردشت الغراض والملابس بي لكيتلي عبايه
حطيتهه على راسي وطلعت
شلت اديه نضفت عيوني من الدمع اليابس، رحت لغرفة ابويه لگيت ريحه قوية تقربت منه بسته
من راسه وكتله: هسه ارجع اروح للمحل واجي
انظفك
اشرلي براسه وبأنفاس تعبانه، كتله: حنظل حط يمك فلوس او انت عندك فلوس
اشرلي على الميز بصفه رحت بسرعة
فتحت الباب واخذت خمسه وعشرين
رحت فتحت باب الهول والباب الخارجية وتوكلت على الله، وكفت بباب البيت رفعت راسي للسماء
وگلت بصوت مسموع علكيف: ربي لا تخليني وحيده ولا تخذلني بديت وحدي ومتوكله عليك
جريت نفس من الهوى، انتهبت لمكاني طبگت الباب زين لفلفت روحي بالعباية وتقدمت ليكدام
وزعت نظراتي منا منا المنطقه سكنيه
وماكو محلات
لگيت شايب كاتله الضيم:فدوة حجي وين الشارع العام المحلات
جاوبني وهو يحط الجكاره: بجيبي، بابا ياشارع يادنيا جايتني عليه هو اني مسلوك سلك
ابتسمت على شكله وكلامه وعرفت انُ الرجال مثلي وجوز اكثر مني ملتفه بي الدنيا ومكسرته هلتكسر ومكعدته بالدربونه
لگيت اطفال يلعبون توكي، رحت يمهم
:خاله حبيبي وين الشارع العام
جاوبني واحد بيهم يحجي ويأشر: خاله ذاك وينه
مياده:زين خاله متندل محل يبيع مواعين هيج
شي
صاح: تردين مواعين احنه جيران لو شنو
انتي مو بت ابو سعد
عقجت حواجبي وكتله: يا ابو سعد
جاوبه واحد ملابسه ملوخه طين وهو اصلا مادري شنو: لا ولك بيت العركچيه شالو
وخلو بيتهم للأيجار
رجعت ليورة واني الصدمة ماكلتني اكل ، يا ابو سعد وشنو عركجيه والبيت الكاعده بي اني شنو!
طلعت مره لابسه دشداشه نيلي دلعه صاحت بيهم يدخلون رأساً لفيت روحي ورحت للشارع العام وين ما الطفل دلاني
امشي واني افكر واطلب الستر اليه وللبنات مابيه حيل بعد صدمات، وصلت الشارع باوعت على
الجهه اليمنى لگيت گهوه مال شباب وكلهم ملتمين درت وجهي ورحت لليسرى امشي وعيني
بالكاع اخطف النظره واباوع للمحلات، لكيت محل بي نسوان يشترن منه بقوليات مادري ليش
أمنت ودخلت گلت بهمس: عمو عندك مواعين نحط بي كبه للبيع
باوعتلي مره جبيره من النسوان الموجودات گال:باباتي قصدج سفري
ميادة:مادري عمو هي مواعين كون احط بيهن وابيع
نزلني سفطه مال مواعين جبيره گال : ذني الدسته بألف
وهذا نايلون عمو تاخذي تحطي فوك المواعين
المره گالت: عوفهن سيد نبيل اني اعلمه، باوعتلي وگالت:شوفي يمه هذا الماعون سفري من فلين
تحطين الكُبة بي من ينترس تحطين هذا النايلون فوكاه وكلش محكم وأمني حطي بالمجمده او بالفريز
ابتسمت الهه وكتله:مشكوره خالة
طلعت الفلوس من ايدي وكتله: هاك عمو
گال: ماعندج صرف بويه
هزيت راسي بمعنى لا، گال : روحي بوية هو الف محلله وموهوبه
ضليت صافنة بوجه، تشكرت منه واخذت المواعين وطلعت بسرعه گلت
بكلبي: والله زين الدنيا طيبه بيها جم واحد نعمه
بديت امشي بسرعة لأن الوكت مو لصالحي خاف يصير شي وهمزين ماطلعت ياسمين جان جابتلي
ولد الكهوه وولد الشارع للبيت تلزمهم
سرة بحجة تاخذ رزق •
وصلت البيت واني اتلفت خاف اكو عين عليه احد مراقبني بعد حفظت سوالفهم وصرت ماخذه عين
الاعتبار منهم، دخلت البيت طبكت الباب وقفلته بسرعة، اخذت نفس علكيفي.
تلگتني ثرية: لو ماخذتني وياج خو مصار شي
دخلت للبيت وكتله: تعالن تلاحكني مصيبه جديده
ياسمين لطمت على صدرهه وصاحت: شصار بعد
ميادة: هذا البيت طلع لناس عركچيه و هم دك وركص
ثريه صاحت: شلون شلون ولعد حنظل شلون
ميادة: ولج ياحنظل ماتكليلي ولجن البيت خاف يهدون علينه واحنه وحيدات
ياسمين:على حجيج هذا نفتهم حنظل وياهم
لطمت على وجهي وكتله: ولج شدراني وياهم مو وياهم منين اجتنه هلمصيبه لازم نطلع منا بنات
ياسمين صاحت: لا مانطلع البيت مأجري ايجار وسواء جان عركچيه ماعركچيه احنه شعلينه
ميادة: والعالم وسمعتنه احنه ناقصات
حجي ياعيني
ياسمين: الزلمه يحجي كدامي
وخلي يشوف الفتيله وين تجي سنتر •
ثرية: واني اكول البيت بي ملابس و بي روح مو مال متروك وتاركي للايجار
ياسمين: ولننسى الاثاث التخم يعني واضحه
حنظل ماخذته مهره
ميادة: ولج مرة تقود رجال شلون
صارت هاي ماعتقد ماعتقد
ياسمين: مو وكت بجي ونوح فكري بعقلج
وشوفي كلامي صح
ثرية: التلفون الجابه الج وين
رفعت راسي وكتلهه :فوك بقه
ياسمين وكالت: ونفتهم من سالفة الموبايل نتواصل ويا من خلاله لو شنو
ثرية: لا ماعتقد هيج، ميادة تواصلي ويا رسائل بس لا توضحيله اي سالفة ولاتوضحيله احنه
درينه
ميادة: وهو اني وين اعرف اكتب يعني
اعرف هذا الاكدر عليه
غمتني ياسمين وصاحت: عفيه گصه شايله طن فگر عليمن مادري
ماهتميت لكلماته لان الي راح يصير مهم اليه مامعروفه نهايتي وبيد منو
گمت على حيلي صعدت ليفوك بسرعة،جبت التلفون هو وباكيته نزلت حطيته بحضن ياسمين
كالت: و اني عبالي صرصور طلع لمس
ابتسمت وكتلهه: علميني ترة ماعرف زين
فتحته اليه وعلمتني شلون افتحه واسده واگلب بي، فتحت مادري شنو وگالت:الموبايل بي خط
كاتبلج رقمه وكاتب على اسمة زوجي
ثرية: عشتو زوجي، لو زوجي ويسوي ويايه هيج اكطعه وصل واذبه لجلاب السود
ياسمين:و تعاي تعاي ثريه مسويله فيس
ابتسمت عليهن شلون فرحانات
واني كلشي ماعرف من ذني
ياسمين: زين هسه هو سوه خيرات الله كله
ماگـال الفيس يشتغل على الانترنت
ثريه كالت: مادري شگلج يلا هسه نعمة من عده
سحبت التلفون منهن
وكتلهن: ماعدنة وكت لا تنسن ماعدنه
فلس ندبر بي روحنه لازم من هسه نبلش
گامت ثرية ورحت وراهه للمطبخ وبدينه نشتغل نلف بالكبه بعد ماسوة الحشوة وسلگت اللحم
كعدنه بالكاع وبدينه نلف بيها
كالت: الي نحصله منه نعمة حمدي ربج وشكري
ميادة: خلي نسوي عشر مواعين كل واحد بي خمسة واروح للسوك ابيعهن والي يجي نعمة
گالت: تندلين السوك، هسه لو اكو بوشية
جان لبستي
ميادة: ماندل السوك بس الوادم برة ترة اكو بيهم زين الحمدلله اشوفلي ابن حلال
يأجرلي تكسي واروح
ثرية: يلا نلف بيها علمود گبل يرحن للسوك
بدينه نحشي العجيـن باللحـم والكشكمش وشوية كرفسات وعلكيفنه بسالفه بضحكة بدمعة ،
ساعه تحجيلي على امها شلون طيبة وشلون جانت تحتويهم بس الابو فرق بينهم
و الخال دهور حالهم على الفلس •
بديت احجي لثرية على اختهه ملاك، وخطية هي بين التبجي وبين التبتسم وشتريد اتسوي حقها
تتعب في سبيل تسدد خالها يامسكينة اي والله،
كملنه الكبه ولفيناهه بالنايلون مثل ماعلمتني المره
كتله: ثرية بيش ساعه هسه الحك اروح لو لا
ياسمين جاوبتني من الهول: عيوني ساعه عشرة اني أكول روحي وكت ضحى
وصدك كمت لبست عبايتي ولفيت روحي زين، خلتلي الكبه بعلاكه لفيتهه جوه العباية و كتله: ثرية ثرية ابويه يمج فدوة اعتبري ابيج
اشرتلي بيدهه على عيونهه معناهه من عيوني ، رأساً درت وجهي على الباب وطلعت فتحت الباب
الخارجية وطلعت اخذت نفس شهيق زفير باوعت منا الاطفال ماهم َ قريت بگلبي سورة
الفاتحة وتوجهت للشارع العام اجاني ولد اسمر، ملابسة على كد حاله گال: خالة تكسي
گلت بگلبي معقولة الكبر بين عليه صرت خالة وباجر شصير بيبي، گتله: فدوة خالة السوك
وين صاير
گال: خاله السوك منا تصعديله تكسي
گتله: وشكد الكروه
گال: هي خمسة آلاف قابل شكد
فريت راسي منا ومنا رجعت
كتله: شدعوه اني اروح بتلاثه وارجع بتلاثه
باوعلي وگال: شو صعدي خاله وراهه
اروح لجهالي بقت عليج
راح لجهة السايق يصعد بيهه رحت فتحت الباب وكعدت بالسيارة واني اتلفت خايفه
اول مرة اطلع هيج حطيت العلاكه
بصفي ومشت بيه السيارة
تمشي واني اباوع على الجامه اتفقد الناس اتفقد طبيعتهم الدنيا مو امان كلشي اتوقع بعد،
مسافة شوية طويلة وگال الولد: خاله لهنا وانتي منا تمشين
فتحت العلاكه طلعت منها الخمسه وعشرين
اخذ منها تلاثه ورجعلي الباقي،
نزلت من السياره اني والعلاكه واباوع منا ومنا ناس هواي وَ أطفـال كومة
مشيت شويه ليكدام بين كل الناس، واني اوزع نظرات خاف مهره، او اي احد يطلعلي لگيت
حجيه جبيره بالعمر حاطه طشت كدامهه وبيهن جم سمجه وتبيع بيهن رحتله
كتله: حجيه اني عندي كبه وين ابيعهن
منو يشتريهن
باوعتلي مدت ايديهه بجيبهه طلعت من عنده باكيت جكاير ورثت جكاره
وگالت: تعاي حبوبه تعاي كعدي بصفي
بسطيهه وطبيعي
والشراي حياه الله
باوعت للكاع كلهه تراب
كتله: خاله فدوة وين ابيع هنا شلون
اكعد على التربان
هزت ايدهه وگالت: الكاع كاع الله جيبليج
كارتونه من الزبل الوراي وحطي وكعدي
باوعت على وراهه لكيت كراتين وگـواني مشمره من البسطيات اخذتلي كارتونه ورجعت بصفهه
حطيتهه بالكاع وكعدت طلعت المواعين وهي تباوعلي و احس اكو عيون هواي
تباوعلي من الناس الي تمر
فرشت العلاكه بالكاع وبديت اصفط عليهه
المواعين گالت: يمة بيش الماعون تبيعينه
ميادة:حجية مادري شكد ماينطوني نعمة
گالت:لازم تحطيلج سعر، اذا اول يوم سويها افتتاحية لوجه الله وبيعي الماعون بألف
حسبت المواعين عشرة وكل واحد الف نعمة عشرة الالاف ولا كلشي ماكو
كعدت بصف الحجيه واني اشوفه شلون تحجي ويه الناس الي تبيعلهم السمج وشلون من يعاملوها ماتتنازل عن الربع
ميادة:شسمج خاله
باوعتلي وگالت: يمة اني ام رافد الشهيد
حطيت ايدي جوه حنجي
وكتله: الله يرحمة، لعد ليش تبيعين سمج
ام رافد: همَّ الاهل ييمه كلهم يطشرون نصهم يسكنون النجف اسم الله على عمرج ونص
يطشرهم هذا الوكت الاغبر، وراح وليدي الوحيد رافد وصفيت اني سنين بين السوك والسمجات
الطيبات الساترات عليه من بيعهن
نفضت خشمي وَ كتله: الله يرزقج خاله من خيراته
كاعده احجي اجه رجال جبير بالعمر
كال:ام رافد السماجه شلونج يابَ
ضلت ترحب بي وتلگتة ذاك الملگه
اجتني مره اخذت اربع مواعين الف الحمد لله والشكر، شوية شوية مشت عندي الكبه وخلصتها
وشكرت ام رافد وصبرتهه على فراگ ابنهه واخذت فليساتي ورجعت للبيت واني فرحانة
وبكل خطوة اخطيها احمد الله واشكره على كل نعمة تجيني وراح تجيني هسه واله بالايام الجاية
وصلت البيت تلگني الحبايب بضحكه وسالفة ومي بارد يبرد الگلب، دخلت على ابويه نايم
عفتة نايم بلكت النوم بالنسبة اله يرتاح بي ويگدر ينسى آثار حب امي وَ فراگ أختي هيماء
كعدت يم رفيق شويه گتله: محتاج شي رفيق
رفيق: سلا سلا سلامتج اي اي سلامتج
جك جك جك جك
ميادة:رفيق حاول منا ورايح تتعلم تلفظ مثلنه
رفيق: ها ها اي اي مثلكم اي مثلكم الفظ
گمت من يمه وصعدت لغرفتي اني وحنظل
فتحته لكيت الجهاز كدامي صاير
عفته ورحت جوه اللحاف انام لأن تعبانه من الشغل بعدني مانايمة و سمعت هزات خفيفه جايه
من الميز رفعت راسي لگيت الجهاز
الشاشة تنعلك وتطفي
گمت على حيلي وگلبي يدك بس لا الجهاز احترك عزه العزاج ميادة
فتحته لگيت رسائل مكتوب عليهن زوجي
بللت شفايفي ورجعت لجربايتي
ضغطت على الاسم طلعلي رسايل
_ميادة ديربالج على نفسج وماراح انساج ابدا مهما راح يصير بالايام الجاية
وانتهت رسالتة بكلمة " بگل _ حنظل
أحبج
ابتسمت رغم الدموع الوكعت على وجناتي، بس شنو افتهم من رسالتك هاي ياحنظل
لاهي اعتذار ولا هي تبرير على السويتة
من بعد مانمت ورحت لعالم ثاني كعدت ومشت بيه الايام بين الشغل وبين متابعة البنات
الضويات نطفيهن ساعة ثمانيه بليل ونترك الضوة مال الحديقة مفتوح
علمود خاف حرامي يحسب حساب ان البيت متروك ويطفر علينة
گمت اودي الكبه وارجع وبدربي اودي قطع النسوان الي يجيبنهه لياسمين خياطه، و يجي ذاك الظهر ومن ارجع
من بيت ام روزه اجيب خيوط بكر
لياسمين والگه ذاك الولد مرتب وكاشخ واكف باب بيتنه و جوارينه اطياف طالعة باب بيته تنظف
الباب الخارجيه
و مناك جم زلمه يباوعون عليهم ويهزون بيدهم، قطرة دم مابقت بيه هاهي َ انتهينه سمعتنة فوك
ماهيَ طين صارت أضرب بعد، رحت للباب بسرعه وصحت: لج يمعزاية يمصخمه تصخمين
وجهنه فوك ماهو مصخم
والولد بكل صلافة يگلي: گليلي من الاخير بيمن تمشين كارت اسيا لو فلوس حُمر يشبهن شفايفج
دفعت ياسمين للبيت وسديت الباب بوجهه لأول مره بحياتي أكون بهاي الدرجه من العصبيه
وارفع ايدي وأضرب ياسمين الي هي اكثر من صديقه اخت و أم بس من حرگة گلبي
ياسمين: الولد جاي على سنة الله ورسولة يتقدملي انتي شعليج
صحت بيها: لج يتقدملج بنصاص الظهاري، ولجن اني شگايله شحاجيه فهمني فهمني تعرفين
اطياف شافتكم تعرفين اطياف منو ولج
الحفافه هاي الحفافه
شلت اديه ولطمت على وجهي وصحت:تعرفين شنو الحفافه يعني نسوان المنطقه من الليل للنهار
يمهه ولجن صرنه بالرجلين رحنه
بالرجلين لحكيني ثرية
ياسمين:سويتيها فاتحة الولد جاي يخطبني
صحت: منين منين عرفج وانتي لاطبه ولا طلعة منين فهميني، ليش ليش تسون هيج بيه اروح بعز
الحر متحملة نظرات الشارع كله في سبيل ناكل خبزة الحلال واستر عليه وعليجن وانتن شنو
تسون هيج تجازيني ياسمين هيج فهميني
دخلت بالهول واني وراهه
صاحت:اعرفه ما عرفه المهم الولد جاي يخطبني والظهر مو الظهر شنو نسيتي يوم زواجج
لطمت على وجهي وصحت بعلو صوتي فز عليه رفيق: ولج اني ازوجت على شنو غير استر عليه غير طالبه الستر اليه والجن قابـل اني تزوجت علمود
اتمعشك علمود احب ولو ما انتي
وثرية الطلبتن مني
وتعاي فهميني هذا الجاي يخطبج بس لا رجال شايفته ولج ياعريس هذا الي يسمعني حجي وكدامج يطلب النومه مني بحظورج
ثرية صاحت: ياسمين تردين ترجعين لطگات الاصبع وشرب العرك وهزات الخصر الباب يوسع جمل،
يكفي الصار بينه والزمن الاغبر الطشرنه أطشر
كعدت بالگاع والدموع تهل على عيونه واجتافه
تهتز من كثر البجي من كثر روحي طيبة رحتله وحضنتنه وبجينه ثنينه سوه مايهمني هسه غير
سمعتي العالم والسوك مايرحم هي وحاضنتني تگول من بين دموعهه: بس ردت انستر لا أقل ولا اكثر انتن خواتي وماكدر بلياجن
ثرية تقربت من عدهه وهمست:ياسمين الي تريد الستر مو تنستر برجال سگط طايح حظه
سكتنه بعد ماشفنة وضعها خطية بين البجي والضحك، وهي سدت الموضوع بعد ماعتذرت
ورجعت حياة كل وحدة بينة وماربحنة من عملة ياسمين غير بس نظرات الشارع وكلام الناس
الصاعد والنازل علينه انواع التهم وانواع الغلط بس شسوي گمت الف روحي بالعباية واشوف
الشارع من يفرغ اطلع ابيع وارجع للبيت بسرعة
ماعرف شكد مر علينه جم يوم وكعدنه كلنه
عصرية ملتمات وابوية بوسطنه يسولفنة على ايام گبل وَ حب الشمس حار بيناتنه
من فائز عنده آلة مال حب شمس ومسويلة كشن صغيرون يبيع من عنده للناس
كريم: چنت شاب صغير بناتي مو مثل هسه حيلي رايح، عمجن بذاك الوكت يصيحوله نسر المنطقة
من كثر ما البنات يرجفن مني
ياسمين بين الضحكه گالت: يگولون محمود ابو العباس بشبابة مايلحكك
وضحكنه كلنه گال: أها عاد انتو ماتصدكون تدرون بناتي جنت كله من اطلع من الشارع كل بنية تشوفني تبجي تبجي موت
ثرية: شسالفة عمو منو طالع كدامه
صفگ بيدة وگال: وكولي ليش
ياسمين: واي ليش يالله
كريم: من كثر الضحك علية
هو وگال هيج ذبيناهه بضحكه طالعة من كل گلبنه
وياسمين لازمه بطنه وتضحك وثريه ادك بالكاع
ساعه اضحك على موقف ابوية وساعة اضحك على ذني المنجطلات بالگاع
اندكت الباب وگمت على حيلي
لبست العباية وطلعت ثرية كالت:اجي وياج
ميادة: لا ضلي هنا اشوف منو واجي
طلعت گلت " منو منو اجيت دقايق
تقربت من الباب وفتحته لگيت ولد ووراة سيارة بيضة مبينة سيارتة وبيده اوراق كومه
گال:مساء الخير خوية، بيت ميادة
عقجت حواجبي يابيت هذا
كتله: اني ميادة، بس كاعده ايجار مو بيتي
گال:تفضلي خيتي هذا ظرف من المحكمة العراقية وبأيد زوجج حنظل من كتب الحاكم الشرعي
بس وقعيلي هنا بيدج
جريت القلم من عنده واديه ترجف من الخوف والقلق والتوتر يا حاكم شرعي ياحنظل ياظرف يامحكمة
حطلي أصبعة على الورقة بيها مربع صغير سويت علامة صح وشخطته من جوه حتى التوقيع
بالگوه طلع من عندي، جريت الظرف واني گلبي يدك من الخوف سديت الباب صارت بوجهي
ثرية اجتني ركض:شنو شبيج لونج مخطوف
ياسمين: شكو بنات منو على الباب
تقربت من عدنه كتلهن: اجه ولد وبيدة ظرف يگول من حنظل وحاكم شرعي ومادري شنو
جرته ياسمين مني ، شگت الظرف
واني حسيت گلبي أنشك
حطيت ايدي على گلبي و اني ابلل بشفايفي من الخوف والتوتر، اباوع لياسمين تقره بصوت
ناصي رأساً باوعت على الورقه شهگت
وباوعتلي
هي وباعتلي حسيت كأنما الدنيا أنتهت •
ثرية:شكو يمعودة هبطتي گلوبنه
ياسمين: حنظل ميادة حنظل
من كثر خوفي نزلت دمعتي
كتله : شبي احجي شكو
رجعت ليوره وگالت:طلگج طلگج وانطاج كلشي
هي وگالت طلگج عيوني ثگلن
حسيت غواش صار بيهن الگاع افترت ياسمين اشوفه فوكاية واني جوه ياسمين
لزمتني ثرية بسرعة: اسم الله ، اسم الله
ياسمين ياسمين لزميهه ويايه البنية وكعت روحه
اسمع كلامهم واني الكاع تفتر بيه اريد اركز
اصحصح اكثر اريد اصيح اريد اعاتب الدنيا ماكدر وكعت على طولي وكعدت على بجي ابوية
يم راسي ورفيق الي يمسح بوجهي گعدت على حيلي راسي مسطور من الوجع والالم
عيوني نزفن بالدموع تقربت مني ثرية
وكالت: احنه وياج وياج لا تخافين ولا تنكسرين
من بين الدموع فتحت حلگي الي عباره عن مروره قوية: يابنية تقبل يصير بحالهه هيج يثرية يابنية
ليش ليش اني هيج يصير ولكم والله شريفة والله محد مسني غير بس هلقذر الي لف الدنيا
عليه وعلى ابويه واختي وبوجود امي
ولكم ليش محد رحمني فهموني ليش ليش
شلت ايدي و وضربت وجهي بكل ماكدر وثرية تثبت بيه واني اضرب بروحي واصيح فهموني شسويت
ولكم ازوجت زواج حياه الله وتاليهه انهجر من اول ليله واطلك وراهه بجم يوم تحت مسمى
الشرف ولكم يارجوله عدكم فهموني
ياسمين:اهدأي اهدأي احنه وياج
واطبطب على ظهري وتبجي وياي صحت بعلو
صوتي:حنظل حنظل عتبي عليك تتركني بهيج ظرف وانت تدري كلش زين شرفي شلون انوخذ
مني فهموني شنو ذنبي عوفيني اني اتعلمت على كفخات الدنيا البنات غيري شصاير بيهن فهميني فهميني
رفيق: ما ما ما تن ماتن اي اي ماتن ماتن طا طا
بحر بحر بحر دم دم دم
گمت على حيلى وصعدت الدرج دخلت غرفتي واني بحال مهزوز، شبه ميتة عافني اي عافني
طلكني، هه هسه مطلكه اني
جريت التلفون فتحته دست اتصال على رقم زوجي ادك ماكو ميجاوب رأساً ينرفض
عرفت من ساعته حنظل خلاص لازم امسح املي منه بس هذا مجرد كلام
الگلب صعبة صعبة امسح الامل منة فتحت فرشتي وغطيت بنومة عميقة
ماتمنيت الاگي الخير من اكعد
تمنيت ماكعد وبس
لأن هذا العالم قذر بكامل أصنافة •
نمت وكعدت على صوت مره بيتنه، استغربت منو هاي عدلت روحي، ضميت التلفون جوه المخده
اريد انساه واريد انسى الجابه اليه
من اليوم اتوضح اليه من هسه دربي طويل و ماعرف شنو يصيرلي بعد
رجعت شعري ليورة مسحت الدمع اليابس ونزلت واني احاول ابين قوية وعلى حيلي
بس الگلب والعيون يفضحن •
طلعت المره من نزلت مالحگت عليهه ثرية دخلت وگالت: صارت علج بحلگ بالمنطقه سالفتج
باوعتله واني خايفه: ياسالفة شكو بعد الصار
ثرية: ام رياض بذاك الفرع تگول اختجن ميادة اطلگت خطيه جيرانكم اطياف تگـول اني واغسل برة طبگت سيارة من المحكمة وتگـول واضح طلكها رجلها
ماتستاهل ميادة الصار وياهه
لطمت على وجهي وكتلهه: ياويلي ياويلي سمعتي صفر صارت ولكم ناقصين حجايه احنه
ياسمين:الصار وياج هو مكتوب من ربج مو اول واخر وحده تطلگين وهاهي َ حنظل انسي
صحت: حنظل اسمه ماينذكر هنا بعد ، والعالم شلون بيه بسمعتي الصارت على لسان اليسوه والمايسوه
الناس ماترحم ماترحم تموتج وانتي عايشة •
ياسمين:انتي هسه تلزمين عده لا طبه
ولا طلعة منو يشوفج لا تاكلين بروحج
ميادة: وشنو هاي النوبه عدة
ياسمين: سامعة التطلك تلزم عدة
ميادة: ومنين ناكل منين نعيش
ثرية:من جيبي غير سوالف ياسمين بعد
ميادة: بنات اكو شغلات أهم عيشنه ومصدر رزقنه ميصير يوگف مال اكعد واخلي وحده بيجن تطلع
ماكدر ماكدر هسه اني اطلگت مامعروف
بعد شنو مصيري ولا مصيرجن
نقتصد منا ورايح اكثر علمود نجمع
خيرات الله ونطلع لغير منطقة احسن حل
تقربن مني حضنني ودموعهن تهل على وجناتهن واني تلگيتهن بحضني الي احتوى دموع كل بنية
صارت بوجهي حتى دموع ام فاروق ميصير اضعف حياتي مجهولة، العاطفة لازم ابعدها عني واتصرف بكل عقلانية
وبمرور يوم علينة بدينة نرجع نشتغل وبديت ارجع ابيع و َ الحجي يزداد يوم عن يوم ،
مر شهر عليه كل يوم حجاية عني تطلع
"المطلگه
" يدخلن زلم عليهن بليل
"شغلهن ورة العشرة
" البارحة شفت كية اخذتهن ساعه بالتسعة بليل ورجعن تالي الليل
" اطلع اذب الزبل الگه بطالة العرك بباب بيتهم، بنات سزز
و بعد الاكثر من هذا سمعت واني كل هذا الف روحي بعبايتـي وامسح دمعتي
وادوس على كلشي وأكول الله وياية الله كريم ، بس هيهات شكد ماكدرت اوكف اكثر على رجليه
وادوس على كلشي طلع كدامي بس ماكدرت كلام الناس يكتل، شابة بعمر الورد من احسب
عمري يطلع صغير ثمنطعش شنو شفت غير بس الخراب و الحقارة الي تلحك الانسان بكل مراحل
عمرة، رجعت للبيت واني منهاره مالگيت غير بس حضن ابوية الي ياخذ راسي ويمسح عليه
يوكع التعب مني، ودعواتة اليه بالخير المانكطعت ابد
الى ان گلي: بوية ميادة العالم حسب ماسمع من بنياتي ياسمين وثرية
من طيبة گلبة كام يصيلحن بنياتي وحسبهن حسب مقامي وعند ابوية معززات مكرمات
كمل كلامه وكال: رفيق صح الولد مريض بس اكول تتزوجون بس سيد على الاقل
بوية نسد حلوگ العالم
باوعتلة بنظرات مليانة تعب وهم وضيم
گتلة: ازوج رفيق بس انت تدري الولد مو صاحي شلون هيج ماكدر ماكدر بوية
كريم: بوية باوعي حالج شصار بي، كلام الناس مارحمج ولا الدنيا رحمتج سمعي كلامي
وازوجي الولد ندز على السيد يعقدلكم وهاهيَ
ميادة: بوية الولد مريض مايكدر و َ بالنسبة لرفيق ينام ويردد بأسم خطيبته فلة شزوح منه بوية
كريم: وحلج تموتين من كلام الناس الي اكل نص حيلج شلون لعد احجيلي انطيني حل
واني رجال عگبه ميت شلون هم
تنوحين هم تبجين
ميادة:ورفيق شنو يكدر يسوي
كريم: على الاقل بوية يسد حلوك فادي وشادي عجيب بويه باوعي لروحج وشوفي
صاير بيج عوفيني اني
گمت منه واني افكر بكلامة طلعت من الغرفة صار بوجهي رفيق يگول
للذبان ; وخ وخر وخر وخر مني نش نش نش جك جك جك جك
رحت لثرية كتلهه الموضوع گالت:رأيي اشوفه الانسب الج لأن مو بس انتي الصرتي
بالرجلين كلنه نمسحت كرامتنه بالكاع
وياسمين أيدت كلام ثرية واني صفيت بين القابلة والرافضة وافكر زين هو مو صاحي
شلون يعني يعرس مادري مادري
مرت عليه الايام وگمت اكره روحي اطلع واجي من كثر نظرات الشباب وكلامهم الاگشر عليه،
ضعفت وضعفت بُنيتي وياية بعد لازم استسلم وأطبق كلام ابوية بس شلون احاجي رفيق
تقربت منه العصرية وكعدت احجيله على وضعي وشلون محد رحمني مسح دموعة ودموعي الجانن
مستمرات طول ماحجي گال: اعت اعتب اعتبريني صرت صرت اي اي صرت زوجج زوجج
بس بس لازم لازم لازم اي لازم تعرفين تعرفين فل فله باقيه باقيه بكلبي بكلبي
بللت شفايفي وكتلة: بس سيد علمود انستر والله يستر عليك دنيا وآ خره ويشافيك ويعافيك رفيق هذا حالي كدامك وشوفة عينك
هز ركبته يمنى ويسرى وگال: امام امام امام اي امام الله الله ورسولة ورسولة بس ليلة ليلة
ليلة الشرع وهاهي هاهي ماكدر
فل فله فله تنبض بگلبي
نزلت دمعتي وافتهمت كلامه و عذرته لأن هذا الشي الصح لازم يكون قريب عليه علمود شرعاً امام الله وانبياءه نكون نعم الازواج
بلغت ياسمين وثرية وفرحن هواي وهاي المره اني وياهن فرحانه لأن راح اتخلص من ثوب العار والخزي الي مبلسيناه العالم لأن فعلاً تعبت
رفيق دخل سبح وطلع اباوعله بتمعن مرتب ونظيف اكثر ربي يحفظة، ما فد يوم عرفت ان الدنيا الافترت بيه فر تخليني ازوج رفيق
مابدلت لأن بعدني حزنانه على اخيتي وعلى دنيتي المُره. ، ياسمين جرت عيوني بكحله وتسريحة
وهي فرحانة واني مبتسمة
كأنما ستونة بدينه نتنفس اكثر
ثرية الطلعت ووصت اطياف جارتنه تعزم نسوان المنطقة وعلى معارفها تجيبنه السيد و
موصيتها: كون گصته خير مو فگر •
وفعلا بمرور الساعات صار العقد مالتي من رفيق ورفيق مكيف يروح منا ويجي منا
وانعادت عليه اسئلة الشيخ واني دموعي تنزل ووانطيت موافقتي بوسط الهلاهل والهوسات
اجاني صوت رفيق وهو يگول: ق قبل قبلت قبلت التزو التزويج اي اي التزويج جك جك جك
كلنه نضحك ونبتسم، تعمدت ثرية تجيب اطياف علمود توزع الخبر وينمسح من عدنه هذا العار
الـي رافقنة طول أيامنة واحنـة
ممسوين أي ذنب
زفونه للغرفة اني ورفيق على هوسات ثرية وياسمين تهز رگبه وجتف وادك بالصينية
واطياف اباوعلهه تهلهل، وابويه دموعه تهل
دخلنه الغرفة وكعدت على الجربايه كعد بصفي
وگال: مفر مفروض مفروض فل فله بمكانج بس الوكت الوكت اي اي الوكت اغبر اغبر اخذهه مني مني
حطيت اديه على ايده، كتله: زواجك الية كلش كافي وسترك علية ما أنساه طول حياتي
حط ايده فوك أيدي وگال: الصا الصار صار
وگـام طفى الضوه وتقربلي
همسات يهمسه بأذنـي غير مفهومة
رجفة أيده وأنفاسه الدافيه تعبـر عن عاطفيته
مجنـون مثـل متگـول النـاس
بس رفيـق مجنون حُب لا غيـر •
كعدت الصبح اني بأحضان رفيق الدافية رغم فرات الدنيا بي بـس حضنة كلش حلو
اول مره رفيق مبدل ونايم على جرباية
شكد حلو الانسان يحس بنفسه انسان حقيقي •
نزلنه سوية والجكليت يتراگع علينه من ثرية وياسمين وهو خطية يبجي وفرحان ويكمز منا منا
ويصيح: جك جك جك جكليت اي اي جكليت
ضليت ويه رفيق ونسيت حنظل ونسيت كُلشي يذكرنـي بأيامي القديمة
رفيق من ناحيتي مكمل كل يومي لأن الوحيدة عرفته رفيق مو مخبل وانما مصدوم
وصدمته مسويته يكرر الكلمات ويهز براسه، واما هو انسان كلش مسالم بس
الدنيا ظلمته ونومته بالزبل والبيوت المخربة جانت كفيلـة بكل هذا ألالم المَر بي
مر عليه شهر على زواحي من رفيق وراجعت دكتورة لأن صحتي ماعرف ليش ادهورت
ولازم ماتدهور لأن ورايه شغل
ورايه عيش وراية حياة •
اخذتني ثرية بتكسي وصلنه لمكان العيادة
الدكتورة گالت: نامي على الجربايه
وفعلا نمت مثل ماردات كالت:كشفي بطنج ولا تستحين ماما اعتبريني امـج
رفعت دشداشتي واني مستحيه وخايفه فحصتني وباوعت عليه ابتسمت
وگالت: شتسمي للطفل
ثرية شهكت وكالت: شنو دكتوره بس لا حامل
گالت: يتربى بعزكم
رغم علاقتي برفيق مو علاقة حُب قوية وانما خيط رفيع من علاقة حُب جديدة
بس كلش فرحت من سمعت كلام الدكتوره لان رفيق انسان طيب ويستاهل طفل يحمل اسمه
ومن بلغته يگلي: ط طفل طفل اي اي طفل طفل بس بس اني من يجيني ماركبه قطار اي ماركبة
عرفت قصدة على أبو من حطه بالقطار وخله القطار يمشي بي بممرات العمر
اهتميت بروحي بفترة الحمل مالتي هواي رغم وجود الالم بيه بس اصبر بروحي اكثر واكثر
مرت بيه الشهور ووصلت على حساب ثرية شهر السابع وبطني تكبر اكثر واكثر
وابوية يشجعني وياسمين
تكلي:شوكت يجي واركصه مثلي •
وكل واحد يريد يسوي ويا شي واحنه منعرفه ولد لو بنيه، صار الليل وصار ألالم والوجع
واصيح بكل قوه عندي وارد ليوره
لبستني ثرية ملابس واخذتني بتكسي للمستشفى وياسمين بقيناهه يم رفيق والبيت
واني طول الطريق أصيـح بأعلى صوتي
ضربـات قوية
حركة أقوى
صراع بشر بين الخلايا الدموية •
كلهـن تجمعن ببطنـي
خبصت السياره خبص بالصياح
وصلنه للمستشفى نزلتني ثرية بسرعة
وَ أنطت الباص مال الدكتورة
الـي جنت طول فترة الحمل اراجعها
اجتي الممرضه كالت: ماكو الدكتوره ماكو
انتي ناوية اليوم
واني اجاوبها من بين صياحي: يمعوده بطني بطني انشكت مروتج فدوه الطفل
طلعي من بطني مروتج
اخذتني وَ دخلتني غرفة بيها بنات ثنين تلگني الممرضات بسرعة كعدني على الجرباية
فحصتني الطبيبه شهگت
وگالت: الدكتورة وين ايلاف ايلاف
الدكتورة وين يمعودات
هي تصيح واني اصيح من الوجع
صاحت: اي دكتور نحتاج عمليه عملية الطفل راح يموت بسرعة حولي عمليات رايحه اصيح الدكتور
اخرمش وجهي واهلس بشعري
اشيل راسي وادكه بالجربايه من وره الالم
ثرية تمشي وياية وتكلي بصوت عالي ' لا تخافين طلعليلي سالمة وبس
من بين الدموع والصياح شهگت شهگه عاليه حيل حسيت روحي طلعت تعبت كلش
دخلني الغرفة ضربتني مخدر
و حطيت ايدي على وجهي شوية وانفتحت الباب عرفته الدكتور
حسيت بنحول بجسمي
خطوات تفصلني عنة
سمعتة گال:
رونق الجف والسجينه بسرعه
تقرب مني
اجتي عيني على وجهه
شهگت بسرعة
گال: ميادة
ميادة: أنتَ
نلتقي في الجزء الثاني
للمتابعة في الانستكرام:tahsin_luqman
فستان أحمر
تحسين لقمان
التوقيع جسدَ في بابل
27 يونيو 2020
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!