رواية في احضان الذئاب الفصل الثاني 2 - بقلم الكاتبة قمر الجنابي

البارت الاول 🔴
بقلمي الكاتبه قمر 💁‍♀️💜
لاتنسون التصويت احبكم 🌟

گبل لا توصل الظلمه
لشبابيجك؟
ابوگ من ال شمس خيط وأضويلك
وگبل لاتدمع عيونك
اسكتها بضحك تعبان.
واگلك لاتهيج الروح
لچنها الروح
من تشتاگ تبچيلك

حبايب بالبدايه راح اخلي حور تعرفكم عن نفسها وبعدين ابدي اني احجيلكم الاحداث

هلو اني حور بصراحه ما اعرف شكد جان عمري لمن بدت وياي هاي الاحداث بس تكدرون تكولون تقريبا 13 سنه من دخلت المتوسطه يعني بداية مراهقه

طبعا شكلي عادي من ارتب نفسي اطلع نانسي ومن ابهذل نفسي اصير عجرم

بصراحه تامه شعري طويل حيل ولونه مايل للبرتقالي الطوخ لان جنت هواي احطله حنه وبشرتي لا بيضه ولا سمره وعيوني كبار سود وتقريبا عدي ضخامه يعني اليشوفني يحسني اكبر من عمري

واكو شي جان يميزني وهوه الشامه الماخذه موقعها بنص خدي نوعا ما جبيره صايره مثل الدائره جنت ما احبها ابد واتمنى اشيلها بس بعدين اكتشفت هل شي يميزني عن باقي البنات وصرت احبها

بالنسبه العائلتي ماراح احجيلكم مثل باقي القصص
اعرفكم عن امي وبويه وخويه واختي لان للاسف ما عندي اي احد من هذولي والحمد الله ع كل حال

اني عايشه ويه مره ما اعرف حتى اذا جانت هيه امي او لا وبعدين تعرفون التفاصيل وعيت وكبرت تحت رحمتها

خلي اعرفكم عنها بشكل سريع طبعا اسمها فليحه وهيه خرسه لا تسمع ولا تحجي وعايشين اني وياها ابيت أيجار وتشتغل خياطه في سبيل ناكل لكمة حلال

من جنت صغيره ما اعرف بالضبط شكد عمري بس للحد ما وصلت للاول ابتدائي الله شاهد الشارع ما شايفته بحيث اول مره طلعت بيها للشارع هوه من ردت اسجل بالاول ابتدائي وتفاجئت طلع العالم جبير مو مثل ما متخيلته جنت عبالي العالم عباره عن غرفتنه الصغيره الجنت عايشه بيها والحديقه الجانت عندي عباره عن منتزه الزوراء هههه

طبعا من اسجلت بالمدرسه جانوا البنات يضحكون عليه لان حجي ما اعرف احجي ابد بما انو امي خرسه ومتسمع فا جنت وياها كله بالاشارات نسولف وماكو بشر غيرها اشوفه حتى جانت من تطلع تسوك تقفل الباب عليه وضل جوه وحدي فا لذلك ما عرفت احجي غير كلمة ماما وكلمة بابا ما ادري ليش جنت اكول بابا واني حتى اب ما عندي بس احيانا اصير ويانه اشياء بالماضي تنطينه اشارات عن مستقبلنه

ماطول عليكم اول مرحله الي جنت
منبوذه ومحد تمشي وياي بس المعلمات جانن يحبني اوحده من المعلمات الله يذكرها بالخير لسه اذكرها جانت تاخذني بالفرصه وتكعد تحجي وياي وتعلمني ع الكلام وتكلي شو طلعي لسانج واني اطلعه بكل برائه تباوعله وتكلي شوفي لسانج طويل لعد شنو هذه بس دعايه يله اريدج اتوعديني اصيرين اشطر طالبه بالمدرسه

وجانت دائما اشجعني وفعلا صرت احجي رغم كلامي مكسر بس اهون من قبل وفعلا صرت اشطر طالبه وكل المعلمات يحبني والبنات الجانن يطردني صارن هنه يتعاركن عليه بس اني جنت اجنبهن ما اعرف ليش احس اكو فراغ ونقص بداخلي

مرت الايام وصار عمري 13 سنه وصرت اول متوسط وهنا تبدي احداث قصتي

بغداد الساعه 7:15 صباحا

حور.... فزيت ع شي يضرب بطني فتحت عيوني لكيت امي كامشه عوده ودفر بيه وسوي ا ابا اا (عود كعدي) كمت بفراغ صبر غسلت وجهي وكلتها بالاشارات......جوعااانه متنطيني مفتاح الثلاجه خلي اتريك ادري شكو قافلتها بيها كنز السلطان اشو هنه خيارات معفنات وطمامه صايره بذنجان

كامت ضربتني بنعال وخرت عنه اجه بالحايط لان اني متعوده ع الهجوم المفاجئ كمت اعرف شلون اتفاداه ادري الجيش العراقي يحتاجني بس مو هسه بعدني صغيره ههههه

كامت فتحت الثلاجه طلعتلي بيضه طكتها الي وحطتها
كدامي اكلتها خاليه لان ما عدنه خبز من كملت رحت غسلت وطلعت صدريتي لان اليوم اول يوم مدرسة واخيرا صرت بالاول متوسط وراح ادخل للمتوسطه وعود صرت جبيره وكذا

طبعا صدريتي هيه نفسها اللبسها من الثالث ابتدائي لسه بيها بنص من يم الصدر صورة ارنب من كثر الغسل صار طلي مو ارنب لبستها واني فرحانه يكلك لابسه فستان سندريلا

وهنا تبدي المعركه الطاحنه وهيه تمشيط شعري صاحتلي امي اجيت كعدت جانت حاطه دولكه وبيها ماي والمشط بداخلها طلعت المشط من الدولكه وبدت تمشط واني كل شوي اطفر وشويه وريد ابجي لان شعري طويل وهيه تمشطه حيل احس تنبت المشط بفروة شعري عاد بعد المعارك المستمره كملت تمشيط وضفرتليا ودفعتني
واشرتلي بمعنى....كوووومي يله تأخرتي

كمت شلت علاكه حطيت بيها القلم الصاير بكد اصبعي الصغير من القط ومساحه ودفتر وشلتها لان ما عندي جنطه وطلعت واشرت الامي باااي ردت عليه بمعنى روحي يله

طلعت اتمشى للمدرسه وصلت للشارع العام وجان اسمع صوت دوريه مال شرطه وسياره شرطه شفتا من بعيد تمشي بتجاهي واني هنا صرت بيب بيب طكيتها بركضه للبيت يكلك طلعولي يأجوج ومأجوج حتلو صدك طالعيلي هم ما اخاف هيج ما ادري ليش جنت اخاف من دورية الشرطة جنت كل ما اشوفهم اضل ابجي من كل عقلي يردون يسجنوني

من وصلت للبيت ضليت ادك بالباب ودك ودك بعدين ضربت كصتي شكد ثوله يالله جا غير امي متسمع شلون تفتحلي الباب ضليت اكل بروحي يربي راح يوصلولي ويسجنوني ما حسيت غير اشلبيت الباب وطفرت وختلت بالحمام الخارجي لان اذا اشوفني امي راجعه هسه تحطني تكتلني عاد شوي وكلت اكيد الشرطه راحوا كمت طلعت وفتحت الباب ورجعت اركض لحد ما وصلت للمدرسه

لكيت الاصطفاف بادي رحت وكفت اخر شي وره بنات كل وحده تعادلني خمس مرات من كل عقلي ذوله الاول متوسط وكل شوي وحده تلتفي تباوعلي صفح وترجع ادور وجهها وبعد الحجي الطويل العريض الروتيني المتعودين عليه كل سنه خلص الاصطفاف والمعاونه اجتي علينه كالت السادس اعدادي هذيج شعبكم ضليت صافنه عزه هاي اني واكفه ويه السادس اعدادي رجعت لوره وطكيتها بركضه

رحت للبدايه وكفت يم بنات صغار سئلت وحده يا صف انتوا كالت.... اول متوسط

هنا ارتاحيت بعد ما خلصوا تقسمينه رحنه ع شعبنه اجيت حطيت علاكتي اريد اكعد اول رحله اجتي بنيه ضخمه دفعتني كتلها.....ليييش

الابنيه.....مكاني هذه حاجزته من العام

كتلها.....ماشفت اسمج عليه
كامت ملختني من راسي اجتي المدرسه صاحت بصوت خلتها تهدني كالت.....شكووو بسم الله هستونه بدينه شنو هذه العرك

كلتلها الابنيه .....ست تغلط عليه

حور....والله ست ما غلطت بس ردت اكعد هنا دفعتني

المدرسه....يله اششش مو بعد عليه الزعاطيط اوكفن يم الصبوره واني اقسمجن ع حسب الطول
وصدك قسمتنه وكعدتني ثاني رحله

شويه وكالت الابنيه الكاعده بصفي....اكلج انتي شو حاطه غراضج بعلاكه صفره شنو رايحه تسوكين خضره

حور ضحكت بس بنفس الوقت نهضمت كتلها....لعد الماعنده شيسوي هيه سكتت شويه وبده الدرس وهيج درس وره درس لحد ما خلصنه

بس لاحضت باول يوم انو المتوسطه والاعداديه هواي يختلفن عن الابتدائيه يعني بنات كبار حيل وهم اكو صابغات شعرهن ولابسات حلقه بيدهن من سئلت وحده كالت هذني مزوجات طبعا اني ما اعرف شنو يعني زواج بس كل الي اعرفه بنيه تعيش ويه رجال وهيه مدري هوه يلبسون بدله بيضه بيوم العرس ويركصون

وبعد الاشياء الاحضتها انو وين ما اروح او وين ما اكعد اسمع سيرة عن الحب والولد وكال علي وحجه جبار واني مثل الاطرش بزفه

عاد خلص اليوم رجعت للبيت لكيت الباب مفتوحه ع النص دخلت وسديتها ردت افتح باب البيت الداخلي لكيتها مقفوله اهووو هم طلعت امي وقفلت الباب ولازم اضل كاعده بره انتضرها مثل الجلب بهل حر واني جايه تعبانه

رحت يم النخله جواها فيي كعدت وضليت اللعب بطين بصابيعي اكتب اسمي ومسحه وره تقريبا ساعه ونص بعد ما صار وجهي احمر من الشمس اجتي امي شايله مسواك من شفت الاكل فرحت نسيت حتى الحر طبينه جوه

حور.....يمه جوعانه اريد غده.....اشرتلي بمعنى .....ماكو هسه غده غاز ماكو نامي وبين متكعدين اجيبلج لفة فلافل

صارت الدمعه بطرف عيني من صبح لسه ع البيضه يله الحمد الله

رحت غسلت ونزعت صدريتي وحاولت انام بس مكدرت بطني تلويني من الجوع كمت كلت خلي افتح الثلاجه بلكي الكاها ما مقفوله فتحتها وصدك ما خاب ضني طلعت مفتوحه جريتلي خياره وغسلتها وحطيتها بخبزه وبديت اكل وشكر ربي طعمها يجنن يكلك جاي اكل قوزي لشوي وجتي امي خزرتني وجرت اللكمه مني وضلت اصيح وتأشر بمعنى...... ليش تبوكين منو معلمج هاي السوالف

حور كمت اصيح بعلو صوتي كتلها.....جوعانه واريد اكل شنو ابوك شخذت قابل

كامت ملختني من راسي كوه جريت ايدها من راسي وشردت للسطح تقريبا ربع ساعه ومديت راسي لكيتها نايمه رحت نمت بصفها للعصر يله كعدت لكيتها كاعده تشتغل

الشي الوحيد الزين بيها متخليني اشتغل وهم مو السواد عيوني تكلي انتي وصخه وما اثق بشغلج مدري ليش هيج تعاملني يكلك كاتله ابوها

عاد كعدت حطيت العلاكه طلعت كتبي وكعدت احل وهيج مر باقي اليوم بشكل روتيني الثاني يوم ورحت للمدرسه كعدت من الصبح مشطت وحدي لان امي نايمه سويت الضفيره عوجه

رحت اتريك لكيت نص صمونه يابسه ع سنكي كلتها وشربت وياها ماي وطلعت الصبح جوو هدوئ وناس نص نايمه ونص طالعه تسترزق ع باب الله

رحت اتمشى وصلت ع المدرسه بده الاصطفاف اصطفينه من خلص كامن يمشن البنات مثل القطار وحده وره الثانيه ونهاية السطر جانت واكفه مدرسه تفتش الاضافر والمخالفات تسحلهن للاداره وصل السره الي باوعت الاضافري ما حجت شي لهناك ما احس غير جرت شعري وكالت.......... شنو هاي بعدج بطول رجلي وصابغه شعرج

كتلها.....لا ست والله حنه

ردت عليه.....شالج الله امشي يله تحركي الوارها بسرعه

ضليت صافنه شبيها هاي انكرصت بس تريدلها حجه رحت ع شعبه وكعدت بمكاني شويه واجتي هاي الابنيه التكعد بصفي انطتني علاكه وكالت.....هاي الج
فتحتها لكيت بيها جنطه اجننن مرسوم عليها موزايه مدري فراوله هذه الكارتون اليطلع بالتلفزون صفنت وكلت بكلبي شنو هاي جاي تصدق عليه كتلها....لا شكرا ما اريدها

كالت....لا عفيه لترديها اعتبريها هديه مني الج

صفنت وبتسمت وكتلها.....شكرا بس انتي شسمج

ردت عليه.....ازهار

حور....اسمج يجنن مثلج

خذت الجنطه وحطيت بيها غراضي واجتي المدرسه ومر باقي اليوم بشكل روتيني وبقيت امشي ويه ازهار وحيل حبيتها مبينه مؤدبه وشاطره وهذه النوع التوصيني امي امشي ويا لهناك خلص الدرس وكلمن رجع البيته رجعت بطريق اتمشه ضهريه وحاره وناس ماكو بشارع طبيت بالفرع الي يودي ع بيته وفرع فارغ وبشر ماكو واني حاطه ايدي ع وجهي من الشمس ما احس غير انضربت بشي رفعت راسي طلعوا ثنين ولد
حور....اسفه ما انتبهت ....ومشيت

الولد....وين رايح يحلو

اني كبل مشيت بسرعه لحكني وجرني من ايدي وضل يتلمس بجسمي اني تخبلت وضليت اصيح ....وخر عني حقير شجاي اسوي

يتبع .....