رواية في احضان الذئاب الفصل الثالث 3 - بقلم الكاتبة قمر الجنابي

البارت الثاني🎉💜

بقلمي الكاتبه قمر💁‍♀️💜

لا تنسون النجمات 🌟💜

يا ظالماً جارَ فيمن لا نصيرَ له
إِلا المهين لا تغترَّ بالمهلِ
غداً تموتُ ويقضي اللّه بينكما
بحكمةِ الحق لابالزيغِ والحيل

كبل مشيت بسرعه لحكني وجرني من ايدي وضل يتلمس بجسمي اني تخبلت وضليت اصيح ....وخر عني حقير شجاي اسوي

ما احس غير اجه واحد جرهم ثنينهم وشبعهم جلاليق ودفرات همه سووها طفره وكمزه باوعلي وكال.....خو ما سوولج شي

حور رديت عليه بتوتر....لا ما سوولي شي وشكرا ع المساعده

محمد....تدللين

مشيت وضليت صافنه هذه الموقف شايفته بس وين اذكرت اييي والله بالافلام الهنديه عزه يعني اني صرت طاشه وكذا

اذكرت هذه الولد الساعدني اسمه محمد جوارينه بيتهم تقريبا يم بيتنه ناس كلش طاكين واني ما احبه ابد احسه بزر دلال هوه مرحله ثانيه هندسه المهم شعليه بي

وصلت ع البيت لكيت الباب مسدوده ضليت ادردم وعبرت الباب عادي تعودت ع هورمونات القروده
اول ما طبيت تلكتني امي تباوعلي صفح اشرتلها بيدي .....شكو

ردت عليه بمعنى.....شنو هاي الجنطه مين جبتيها

حور.....جابتها صديقتي هديه

باوعتلي صفح وشرتلي....اي وحده تنطيج حاجه اخذيها

حور....شنو مكديه انييي ليش اخذ مجيبيلي انتي هاي صدريتي صارلها سنين اروح واجي بيها صار الف شك بيها من الغسل شنووو وحد اني عن البنات لا عشت طفولتي لا عشت مراهقتي شوووكت اموووت وخلص ما اريدج وديني الابووويه انتي مو تكليلي عندج ابو وديني اله .....ما احس غير ركضت وراي وملختني تملخ وضلت اضرب بيه ودردم بعلوا صوتها دفعتني اركع راسي بالحايط احس راسي ارج

كامت تأشرلي بمعنى....تردين ترحين الابوج يحبسج بغرفه ومينطيج اكل يخليج تموتين من الجوع ويخليج تحرثين وتنضفين فضلات البقر بيدج حمدي ربج معيشتج يمي معززه مكرمه تاكلين وشربين شناقصج

حور....جذابه ابويه ميسوي هيج اني كلبي يكلي

الام....اذا صدك هيج يحبج شكووو ذبج عليه وما سئل عنج كل هل سنين

حور....احس روحي تهتسرت دفعتها وطلعت بشارع اركض رحت يم مره تبيع شغلات بسيطه بمحل صغير اصير جوارينه وصديقة امي كعدت يمها وضليت ابجي اجتي يمي كالت....شبيج ماما

حور....مابيه شي بس حصلت درجه مو زينه بالامتحان

الحجيه....ميخالف بنيتي تعوضيها
راحت للثلاجه طلعت عصير فتحتليا ونطتنيا
رفعت راسي وباوعتلها بعيون يلمعن من الدموع وكتلها ....شكرا

هستوني خليته بحلكي اريد اشرب وطبت امي مثل الاعصار جرتني من شعري وطلعتني وصيح بنص الشارع

المره صاحت بيها عوفيها بس شنو الفائده اذا هيه لا تسمع ولا تحجي خذتني الطريق كله اتكفخ بيها فشلتني كدام الدنيا كلها حتى سمعت جهال يكولون.....شوف هاي الخرسه خطيه راح تموت بتها

وصلنه للبيت دفعتني جوه ودخلتني للغرفه وقفلت عليه
الباب عاد اني ضليت ابجي ع ما غفيت

فزيت من العطش والحر باوعت للساعه بالسته المغرب كمت اريد افتح الباب لكيتها مقفوله ضليت ادك ودك بس شنو الفائده لو ادك منا للصبح متسمعني كمت ادفر بالباب برجلي كلت بلكي تنتبه بس لا حياة لمن تنادي عاد ضليت احوص بالغرفه واكل بروحي الثاني يوم الصبح يله فتحتلي الباب طلعت اركض رحت للمغسله فتحتها وشربت مي منها من كثر العطش

هيه ولا اهتمت بيه اشرتلي بمعنى..... بدلي حتى ترحين للمدرسه

اني هم تعوذت من الشيطان رحت بدلت و مشطتلي اشرتلها يمعنى....جوعانه من البارحه ما ماكله

كامت شمرت عليه ربع وكلتلي ....اشتري بي بسكت خذته وسكتت وطلعت سديت الباب

جاي اتمشه وصارت بوجهي سياره بيضه عاليه نزل الجامه طلع محمد باوعلي بأبتسامه وكلي.....تعاي حور اوصلج

حور....لا شكرا اندل الطريق

محمد....صعدي ولج لتعاندين اوصلج بطريقي وروح للجامعه

حور.....بصفتك منو توصلني

محمد....شتعتبريني اعتبريني يله صعدي لتعطليني

حور... حيل استحيت منه ومنا العالم ضلوا يباوعون شنو هذه مخبل يريد يجيبلي حجايه صح اني مطفيه كلش بس بنفس الوقت افتهم بعض الامور واعرف اصرف
ما رديت عليه مشيت بسرعه ما احس غير كسر كدامي صحت بصوت عالي..... شبيك انته مخبل لو معورني

محمد.....اكو واحد يعور روحه

اجاهلت كلامه ردت امشي وجان اسمع صوت دوريه مال شرطه عزه اجوني راح ياخذوني احس روحي جفلت بمكاني كبل ركضت فتحت باب السياره وصعدت بصفه هوه باوعلي وبتسم وكال....عفيه بنيتي

درت وجهي وطلعت لساني اعيب عليه طبعا الطريق كله ساكت لا اني حجيت ولا هو وصلت ع المدرسه نزلت وسديت الباب باوعلي بتفاجئ وكال..... ع الاقل كولي شكرا

حور....والله محد داز عليك

محمد....لسانج يرادله كص

حور....لا فلافل ....وعيبت عليه بلساني وشردت حسيته ضل صافن كلك شنو هاي الخبله

الحارس مال مدرسه ضل يباوعلي صفح لاهاهيه عوز بس انته بعد

طبيت جوه وجانت المدرسه شبه فارغه لان هذه وصلني بسياره لذلك وصلت من وكت طبيت جوه تلكني ذني البنات الكبار اجتي وحده كرصتني من خدي وكالت.....يا صف يحلوه

باوعتلها صفح وكتلها....اول

الابنيه....يا فدوه ابو خريزه (نوع من السمك الصغير)

حور....اي وهسه شتردين

الابنيه ....شفناج من فوك بشباج وصلج هذه ولد صاك شيصير منج

حور اجتني موجة الثول كتلها....اخويه

الابنيه .....حبيته كووولش مجيبيلي رقمه

حور...ميخالف اكله اذا قبل انطيج رقمه

ورحت عنهن لهناك صفنت عزه هاي اني شمخرطت ديله هسه اكيد ينسن

تقريبا ربع ساعه وانترست المدرسه طالبات وبده الدرس الاول وازهار ماكو شنو معقوله غايبه بس هيه شاطره ومتغيب تقريبا للدرس الثاني وجابتها امها تعذرت من المدرسه ودخلت ازهار باوعتلها بأبتسامه وكتلها ....ليش تأخرتي

ازهار....والله مخبوصين بالبيت لان نريد نشيل

حور....لو بيدي جان اجيت ساعتج

ازهار....يروحي لا اصلا كملنه تقريبا عكب باجر وننتقل للبيت الجديد

حور...بيها الخير

رادت تحجي ازهار صاحت بينه المدرسه سكتنه ثنينه شويه وخلص درس الاسلاميه نريد نطلع للفرصه واجتي المعاونه بيدها عوده خشب شطولها وياها مدرستين كالن ممنوع وحده تطلع يله تفتيش

يكلك رايحين بتجنيد الازامي بدت باول سطر فتشتهن وحده رزلتها لان لابسه شال نيلي والثاني لعبت بيها طوبه لان جايبه وياها مرايه يكلك مو مرايه جايبه مخدرات خذتها حاصل فاصل وصلت للسطر مالتنه فتشت اول وحده جاي تكلب بالكتب او واكع موبايل عاد هاي كبل اعدام طلعنها بدفرات وخطيه الابنيه قرينه عليها الفاتحه وصلت الي كالت...ما شاء الله وين جايه الحفله

حور....ليش ست

المدرسه....شنو هاي صدريتج واصله الركبتج شعندي ابتدائيه هنا باجر تجيني بصدريه طويله تسحل وراج لو ما اريدج بعد هنا بالمدرسه

سكتت وكلت بكلبي الك الله يالفقير ادري مين اجيب صدريه طويله واحنى يادوب ملحكين ع لكمتنه

خلصن تفتيش وطلعن وهيج مر باقي اليوم وكله كمت امشي ويه ازهار حبيتها وحبيت سوالفها وتعلقت بيها حسيتها صارت مثل اختي لان اني ما عندي خوات ولا جربت شعور الاخوه

عاد نهايه اليوم ردت اطلع جرتني هاي الابنيه نفسها الي حاجتني عن رقم محمد كلتلي....مو تنسين يحلوه

باوعتلها بستغراب وكتلها....ميخالف

وطلعت بشارع ردت امشي انتبهت ع محمد واكف ومنتجي ع سيارته اول ما شافني اشرلي ضليت فاتحه عيوني شنو هذه شو خذاه الواهس غلست عنه ومشيت هوه كبل ركب السياره واجه بتجاهي باوعلي وكال....شنو عميه ما شفتيني واكف اشرلج

حور....اي عميه وطرشه وخرسه شتريد مني

محمد....يابويه شنو هل صلافه يله صعدي خلي اوصلج

حور....ما اريد اني احب امشي

محمد....صعدي يمعوده لتعبيني

حور.....اذكرت كلام الابنيه الي رادت رقمه كلت يله خلي اصعد وكله وبعد ابد ما اصعد وياه عاد فتحت الباب وصعدت هوه بقه ساكت واني بقيت متردده احجي لو لا هدور بقيت بصراع كل شوي اريد احجي وبطل شفت روحي صرت قريبه ع البيت جمعت انفاسي

وكتله.....اكلك محمد

محمد....ها كولي

حور....انته مو عندك جامعه شجابك الي

محمد....ضربت المحاضره لعيونج

حور....وليش بله

محمد....اخاف لا ذوله يضايقوج

حور.....لا لتخاف عليه ارجوك لتزعل مني بس بعد ما اقبل تلحكني

محمد....ومنو كلج اني لاحكج

حور....لعد شكو كل شوي تطلع بوجهي وهم اذا خايف عليه اني اخلي امي توديني وترجعني

محمد....اي ميخالف اذا هيج اطمن

حور....واكو شي ثاني

محمد....كولي

حور....اكو بنيه تريد رقمك

ضحك وكال....ليش شسوي بي

حور....ما ادري يمكن محتاجه مساعده

محمد.....كليلها الله ينطيج

ردت احجي بس باوعت وصلنه ع البيت سكتت ونزلت سديت الباب ورحت ع بابنه لكيتها مسدوده
هدور هذه لطش غير يروح الافندي منتضرني ادخل يله يروح والباب مسدوده ياربي شلون اعبر الباب كدامه شيكول عني

ضليت اسوي روحي ادك بالباب بس ماكو منو يفتحا الي الجني قابل

نزل من السياره وباوعلي صفح طفه الجكاره برجله ودفر الباب انفتحت كلي ....يله طبي

كتله بكلبي ...كلك حركات حموش ههههه والله يالله طبيت جوه لكيت امي كاعده تخيط مدري شنو بدون كلام ذبيت روحي بملابس المدرسه وغفيت تقريبا شوي وكعدتني اشرتلي بمعنى ....كومي بسرعه

حور.....خير يا طير

انطتني صدريه اجنن هيه مخيطتها فرحت بيها ولبستها وضليت افتر بالغرفه رحت شكرتها وبستها واخيرا راح ابدل صدريتي بعد كل هل سنين

شويه وتغديت مركة بتيته افييش شطيباتها اسويها امي خلصت الماعون ورحت نمت كعدت العصر ضليت اقره لليل لان ما عندي شي اسوي لا عندي موبايل وحتى تلفزون مالتنه عاطل صاله شهر وما عدنه نصلحه او نشتري غيره فا الدراسه بالنسبه الي اتلهه بيها

من كملت نعست خليت ونمت كعدت ثاني يوم ونفس الروتين بدلت وطلعت بس هل مره غيرت طريقي حتى ميشوفني محمد ويكلي اوصلج لان صدك استحي منه وصلت ع المدرسة صارت بوجهي هاي الابنيه
كلتلي ....ها وين رقمه

رديت عليها بأرتباك....ها بجنطه هسه اجيبه الج

الابنيه....يله بسرعه متانيتج

رحت اركض للصف طلعت ورقه وكتبت بيها ارقام عشوائيه ونطيتها الها فتحت الورقه وهيه طايره من الفرح ثواني وباوعتلي صفح وكالت.....شنو وين اكو واحد رقمه متكون من عشرين رقم

بقيت صافنه شوف الثول خذاني الواهس وكمت اسطر ارقام بعدين اني شمدريني رقم الموبايل لازم متكون من ١٢ رقم كتلها....ها خاف عايد الرقم مرتين

الابنيه....شنو اضحكين عليه انتي

حور....اهووو وخري عني شمدريني اني وركضت لان دك الجرس بس ادخل وره المدرسة ترزلني وتاخذني حاصل فاصل دخلت للشعبه وضلينه هيج درس وره درس بس الفرق الوحيد بقيت بشعبه ما طلعت ابد لان خفت لا هاي اشوفني وضل اسويلي رقمه ومدري شنو

عاد خلص الدوام شلت جنتي اني وجاي اطلع صار بوجهي محمد عيونه حمر ومبين حيل معصب اول ما شافني اجه بتجاهي وجرني من ايدي بعصبيه وكال....

يتبع.....