رواية في ارض الغرام انت دولتي الفصل العشرون 20 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

داليا .. شنووو .. شنو تتزوجني ..؟!

اسيد .. اعتقد وافقتي ع الشرط قبل لتسمعي .. يعني ميحتاج اخذ موافقه ثانيه!

داليا .. اولاً مكنت اعرف هذا حيكون شرطك هذا ، وثانياً هذا الشي مستحيل يصير ابداً.

اسيد .. ماشي معناها خلي الكل يعرف انتي منو .. ومبروك عليج مقدماً.

داليا .. انت شدتحجيييييي .. انت وعدتني متكول الاحد!

اسيد .. ومنو كلج اني راح اكول لو اخلف وعدي اصلاً!!

داليا .. مفهمت .. لعد اشون حيعرفون!

اسيد .. ايناس اذا مو باجر الي بعده حتكون كدامج .. هي كل اجازاتها تخلصها يمنا .. واكيد امي بس تعرف بيها جايه راح ترجع لهنا .. واذا اجتي ايناس وشافتج .... اتخيلي شنو راح اتكول الامي ع الي صار بالمطعم .. اسيد عنده علاقه ويا البنت الي تشتغل ابيتكم!!
تتوقعين امي راح تتقبل هذا الموضوع وتسكت!!
اظن بعدج تتذكرين اخر مره شافتج بغرفتي شسوت .. فـ برأيج شنو تسوي اذا تسمع اني وياج كاعدين ابمطعم ولحالنا.....!
بدون اي كلام راح تطردج للشارع ، ومراح تصدك بينا بعد لا اني ولا انتي حتى اذا فرضنا فرضاً انو انتي فعلاً بنتها لايناس راح تعتقد هذي لعبه من عدنا .. ضيفي الى ذلك راح تزعل مني وتغضب عليه .. واني ما عندي استعداد نهائياً اخسر امي لاي سبب من الاسباب ولاجل اي شخص!

داليا .. هااا .. اي .. مفكرت بهذا الشي .. بس .. مفهمت شنو علاقة هذا الموضوع بأنك تتزوجني!!

اسيد .. لان مااكدر ابقيج هنا بعد .. ايناس ما لازم اتشوفج .. فماكو حل غير اخذج لغير مكان حتى مننكشف الى ان اتأكد من سالفتج ، وحتى نبقى اني وياج بمكان واحد لازم اعقد عليج ، لانو انتي بنت ومراح تسلمين من كلام الناس ، اضافه الى انو الشيطان شاطر و حرام نعيش اني وياج بمكان واحد بلا اي ارتباط .. مااقبلها على نفسي!

داليا .. شقصدك يعني حيصير بينا شي؟!!

اسيد .. انتي غبيه لو تستغبين؟!!
كل عقلج اني افكر بوحده مثلج !!
لج بابا الي دااسوي بس حتى اتأكد من موضوعج انتي وخالتي .. وبعدها كل واحد يروح لحاله ، يعني مجرد زواج ع الورق وبس ، مميت عليج .. ولا راح اتقربلج لتخافين.

داليا .. كلامه سيوف وتخترق گلبي .. حسسني اني زباله ما اليق بي .. ومستحيل يفكر بيه اصلاً .. كنت مفكره انو خايف عليه وديريد يساعدني .. رغم كل الوجع الي بگلبي حسيت بفرحه بداخلي .. بس السعاده متوالمني ابداً .. كلامه الي كاله كسر گلبي وداس عليه!
عيوني حركتني من القهر والدموع توسلتني حتى تنزل بس اتجاهلت كل الالم والقهر الي حسيته بلحظتها .. بينت انو ممهتمه اصلاً .. بصوت جامد كلتله ..

_وانت شكو مهتم لهدرجه بموضوعي ، سواء كانت امي او لا؟!!!!!

اسيد .. لانو مو اني الي ينضحك عليه وتلعبين بيه واسكتلج  .. اريد اعرف الحقيقه شنو .. واذا طلع كلامج كله كذب صدكيني وروحه الابويه ميخلصج مني غير الموت !

داليا .. كان يحجي وياي وملامحه كولها اتغيرت .. عيونه اظلمت واعصابه اتشنجت .. الغضب هو كل الي شفته بوجهه .. بحيث من صدوك خفت انو تطلع مو امي!
خفت لدرجه شككني بالشي الوحيد الي مستحيل اشتبه بي!
سكتت محجيت شي لانو من صدوك نبرة كلامه والتهديد خلوني انخرس!
بهذي الاثناء رن جهازه ..!
باوع ع التليفون بعدين عافني وطلع بسرعه محجه شي .. طلع للحديقه شفته يحجي بالموبايل و ملامح وجهه جامده نفس التجهم ونفس الانزعاج على وجهها .. صار عندي فضول اعرف ويا منو ديحجي .. ولويش طلع بسرعه من شاف المكالمه!
بقيت اراقبه من الشباك يمشي بالحديقه ذهاب واياب ميثبت بمكانه الى ان قجأه شفته ابتسم !!
وكف وخلا ايده بجيبه .. دنك راسه للكاع وبقى يحرك رجله بالثيل الي بالحديقه  .. دخت بي رحت لغير عالم .. مااعرف اذا هو حلووو لهدرجه لو اني من غباء گلبي المهووس بي دااشوفه هشكل !
كان بعده لابس بدلته السوده الي راح بيها للعرس .. بس نازع الجاكيت .. والقميص رافع ارداناته .. عضلاته بارزه من القميص تريد تنفجر .. وجسمه المشدود يدوخ الجماد .. شعره الاسود كان نازل على كصته كم شعره .. والشيب ضايف لمسه رزانه ومنطي هيبه و وقار .. واني اتأمل شكله والوسامه الي عنده محسيت على نفسي انتبهت لكيت حلكي مفتوح لحاله من المنظر العجيب الي دااشوفه ..!
انشغالي بسلمى ولهفتي لشوفتها لهتني عن اي شي ثاني عقلي كان كوله يمها اشون حقابلها  .. ما انسى المكياج والرموش مخلوني اركز بي .. والي نساني اسمي هي صدمه الي صارتلي .. بين قوسين (ابد منتبهت على الكائن العجيب الي كنت طالعه ويا)
بقيت اتأمله واحس شي خفيف بنص گلبي ديطير .. مااعرف شنو ولا اكدر اوصفه .. بغض النظر عن جماله و وسامته .. حضوره وشخصيته الهم هيبه كوه تجبرني انشد اله .. كنت اباوعله وابتسم بلا سبب مثل الي يباوع للشخص الي  يملك روحه .. الشي الوحيد الي يستحق ابتسم بهيج ظرف كان هو!
مااعرف اشكد بقى يحجي .. بعدين سد الموبايل وطلع جكاره .. بقى يدخن اكثر من مره... لما كملت طفاها ودخل للبيت!!
اني بسرعه شلت الصينيه ورحت للمطبخ .. سويت نفسي دااعزل بيها ، بس گلبي احسه ديرجف مااعرف لويش!
كولما اشوفه ديجي وحشوفه گلبي يصير يرجف مثل السعفه .. و وجهي احسه يصخن نار يصير ..!
المهم ..
سمعته دخل من صوت الباب الخارجي .. اني عزلت الصينيه وغسلت الصحن .. لكيت المطبخ نظيف ولا ع بالك احد طابخ!
هاي لو اني جان وصلت الهوسه للسقف  .. رجعت كولشي بمكانه وغسلت اديه .. انداريت دااريد اطلع وجان اشوفه واكف كدامي مرتكي ع باب المطبخ ومكتف ايديه على صدره .. اني من شفته فزيت مكنت متوقعه  واكف هنا ، لانو اصلاً محسيت بي ، بصوته الجامد سألني..

اسيد .. لما كنت دااحجي وياها اتصلت عليه خالتي!
من شفت اسمها اخذت الموبايل وطلعت بسرعه ، مردتها تعرف انو الي دتتصد ايناس لانو هي بس تسمع بأسمها ما ادري شيصير بيها .. انوب تسمع صوتها وتجيها الحاله ما الي خلك .. طلعت للحديقه وجاوبتها ..

ايناس .. هاي وينك اسيد اشكد اتصلت بيك ليش متجاوب ، ظل بالي يمعود خفت صارلك شي!

اسيد .. بصوت مزعوج .. ماكو شي بس الجهاز كان سايلنت منتبهت عليه!

ايناس .. طمني اشلون صارت البنيه الي وياك ، ان شاء الله احسن؟!

اسيد .. تمام الحمدلله.

ايناس .. الحمدلله .. خفت هواي عليك من شفتها اشلون اتعارضت فجأه كلت ليروح يصير بيها شي وتبتلي انت.

اسيد .. واني ع بالي خفتي عليها ودتسألين!

داليا .. ليش لهدرجه تهمك؟!!

اسيد .. متهمني ولا شي ، بس هي الي تخربطت مو اني فتوقعتج دتتطمنين عليها.

ايناس .. بصراحه خفت عليك لتتورط ويها .. صدوك مكلتلي انت من وين تعرفها؟!!

اسيد .. كلتلج مجرد تسليه مو اكثر ، تعرفيني زين اني شنو!

ايناس .. لانو اعرفك انت شنو واشكد تكره النسوان استغربت من شفتها وياك لذلك سألتك ، بس تريد الصدوك البنيه عليها جمال مصاير ، ع بالك لعابه مو بشر!

اسيد .. من كالت هشكل مااعرف شنو الي خلاني ابتسم .. فجأه اتذكرتها من كانت تأفأففف بالسياره ومنزعجه من المكياج ، لكيت نفسي لا ارادياً ابتسم !!
_مو احلى منج اكيد خالتي العزيزه!

ايناس .. هههه لا ولك احلى مني لتجامل .. اني راحت عليه بعد!

اسيد .. لا ماكو شي يروح ، حتى اذا كبر شكل الانسان وتغيرت ملامحه يبقى الجوهر نفسه ، والروح نفسها.

ايناس .. هاي شنووو صاير شاعر وتكول حكم ، لااااا شكلها الحلوه امثر من تسليه ، لانو دااشوف هواي تغييرات عليك ، دااحسك اسيد ثاني مو نفسه ابن اختي!

اسيد .. بصراحه نفس الشعور دينتابني .. دااحسج مو خالتي ايناس الي اعرفها!

ايناس .. مفهمت شتقصد؟!

اسيد .. قصدي حليانه اكثر!

ايناس .. هههههه اوووف منك انت من صغرك متنحزر ، خلي اروح اشوف رجلي شيريد انت الكلام وياك ميوكل خبز.

اسيد .. بالسلامه.

راحت خالتي واني الف سؤال وفكره تدور ابالي .. مدااكرد استوعب الي كالته هذي .. معقوله خالتي ايناس كانت متزوجه و عندها بنت ومحد يدري؟!!
دخت دخت من صدك واني افر هذي الافكار براسي .. بقيت بالحديقه واكف وادخن الى ان اجه سؤال على بالي حيل غريب وقطعي ..!
طفيت الجكاره ودخلت كبل للبيت .. باوعت بالصاله ملكيتها .. سمعت حركه بالمطبخ .. رحت لكيتها دتعزل بصينية غداها .. بقيت واكف اتأملها .. الي يشوفها هسه بهذا الهدوء ميكول هذي نفسها الي تخبلت عليه مرتين اليوم!
شعرها كان نازل على ضهرها بشكل يدوخ .. والتراك الي لابسته مخصر جسمها كل تفاصيله بارزه .. هذي لو تريد اتخبلني لو اني فعلاً اتخبلت .. ليش لما اشوفها اروح لغير عالم وانسطر !
بقيت واكف وصافن عليها اشلون تتحرك بهدوء ولا كأنها مر عليها اكبر صدمه بحياتها اذا حسي كلامها ايناس امها؟!!
فجأه التفتت عليه .. انحرجت مردتها تفكر دا اباوعها لانو هيج شي ينرفزني ، واني اصلاً ما بنيتي اباوع عليها بس هي بيها شي غريب يخليني ما اشيل عيني عنها من اشوفها..!
حاولت اتلافى الي صار بسرعه .. بصوت جامد سألتها ..

_انتي مسيحيه؟!!!

داليا .. بلي مسيحيه!

اسيد .. يعني قصدي صرتي مسيحيه من عشتي بالميتم لو انت اصلاً من قبل متعوفكم امج مسيحيه؟!

داليا .. مااعرف كنت صغيره .. بس واني طفله لما بابا كانن عايش اتذكر كنا انروح لبنايه عاليه كل سبت  ياخذنه اني وماما وهو انصلي ونشعل شمعات ونرجع  .. مكنت اعرفها شنو بس بعدين لما كبرت وعشت بيها عرفتها كنيسه .. نفس الي كنت انروحلها ويا ماما وبابا .

اسيد معناها انتي اصلج مسيحيه !!

داليا .. بلي.

اسيد .. لعد اشلون ايناس امج ، هي مسلمه مثلنا .. اشلون تصير امج وانتي على غير ديانه؟!

داليا .. مااعرف .. بس اعتقد ماما مو مسيحيه لانو لما كنا انروح لبيت جدو واني صغيره ، جدو ابو ماما ميقبل ادخل للبيت .. كنت اسمعه يصيح على ماما ويكوللها متدخلين ناس كفره لبيتي!!
شنو كان يقصد مااعرف ، بس الي اعرفه انو كان يكرهنا اني وبابا حتى ماما كان يطردها من البيت مرات من انروح .. اتذكر كنا عايشين ابيت بسيط وحالتنا ضعيفه لانو ماما دائماً تتعارك ويا بابا على مود الفلوس ، وبالنهايه يضربها فتروح لبيت جدو حتى تاخذ منهم وهم يطردوها .

اسيد .. انتي اشلون تتذكرين كل هذي الاشياء وانتي طفله؟!!

داليا .. عمري كان 7 سنوات يعني افهم كولشي بس كنت اشوف بلا مااعرف شنو السبب مجرد اشياء وذكريات بقت ابالي ولما كبرت بديت اكون افكار منهم .. عسى ولعل الكى عذر لامي ع الي سوته!

اسيد .. من كلامج انو ابوج هو المسيحي ، وامج على غير ديانه ، احتمال هو هذا سبب طرد جدج لامج من البيت!

داليا .. كلتلك كل الي اعرفه .. واكثر من هذا مااعرف.

اسيد .. تمام .. هسه روحي حضري غراضج خلي انروح قبل لا يجي احد.

داليا .. وين؟!

اسيد .. لباريس .

داليا .. شنو !!

اسيد .. امشي حضري جنطتج بسرعه خمس دقايق الكاج بالسياره.

داليا .. بس اني موافقت على شرطك!

اسيد .. درت وجهي ومشيت .. براحتج .. اني طالع وانتي حاولي تفكرين بمكان تروحيله لما تجي امي وايناس .

داليا .. لحظه .. لحظه .. وين رايح اوكف واسمعني اذا ممكن .

اسيد .. ما عندي وقت اضيعه بتفاهاتج افتهمتي لو لا .. صارلي سنه كاعد اللغي واشرحلج سبب هذا الشرط وغايته وجنابج مفكره ميت عليج لو مغرم بيج!
اني عرضت عليج المساعده لوجه الله بس انتي رفضتيها خلص اتصرفس لحالج.

داليا .. رجع لاسلوبه الحقير وكلامه الساخر .. استهزء بيه وحرگلي گلبي .. مكدرت اكتم دموعي هالمره ، بصوت مخنوك والدمعه بطرف عيني..

_مو قصدي هشكل ومكلت تحبني ...!
بس اني بعدني بنيه .. واذا تزوجتك وانفصلنا محد حيصدك انو كان زواج ع الورق ، حينكتب مطلقه بظهر جنسيتي وتبقى وصمه عار بكصتي .. واني شفت بحياتي هواي وتعبت اكثر متتصور .. اريد ارتاح واعيش مثل البشر .. والي دتطلبه مني معناها دمار لحياتي ، اشون اسوي بسهوله!

اسيد .. منو كال حينكتب مطلقه ومن وين جبتي كل هذا الكلام !!

داليا .. هذا شي معروف لما تتزوج وتنفصل تعتبر مطلق بغض النظر عن نوع العلاقه الي ربطتنا سواء جديه او بس ع الورق.

اسيد .. مراح اتزوجج زواج محكمه ، راح نعقد عند سيد يعني زواج شرعي منصدقه بالمحكمه ، ولما ينتهي الموضوع ننفصل عادي وكأنو شي مصار.

داليا .. من صدوك دتحجي .. يعني اكو هيج شيء؟

اسيد .. امشي حضري غراضج فضيني.

داليا .. ماشي رايحه ..
رحت لغرفتي بدلت لبست تنوره سوده ، بدي ماروني  ولفيت على رگبتي لفاف ابيض فرو ، جمعت غراضي بسرعه اخذت كولشي يخصني طبعاً ما عندي هواي غراض مجرد ملابس وكم حاجه .. خليتهم بالجنطه ، رتبت الغرفه وطلعت .. لكيته كاعد بالسياره .. صعدت شغلها وطلعنا .....!
الدنيا كانت ليل والجو بارد ثلج ، بقى يمشي مااعرف اشكد بس المسافه كولش بعيده كانت لدرجه نمت مرتين وكعدت واحنا بعدنا بالطريق!
محسيت غير لما انفتح باب السياره .. باوعت بعيون نعسانه كراج كبير واضويه قويه ع بالك نهار صاير ، الحو بارد حيل وامطر بقوه .. هو فتح باب السياره ودخل للبيت اني نزلت بسرعه ومشيت ورا اتنكعت من المطر !
دخلت للبيت شكله مو حيل كبير مثل بيتهم الي كنت بي بس هذا احلى من هذاك !
اثاثه كوله خشب يلمع ، والاضويه بيضه على صفار تحسسك بالدفو ، تخيلتت نفسي كاعده بهذي الاكواخ الريفيه الي انشوفها بالتلفزون بدول العالم الراقي امريكا وما امريكا ..!
طبعاً هو ممعبرني ولا كأنو اكو اخد غيره هنا ..  راح شغل الدفايه عافني وصعد فوك!
اني بقيت واكفه بمكاني ملابسي اتبللت وارجف .. اشويه ونزل اتوقعته واح يبدل ملابسه بس لا رجع بنفسهم وهم كانن مبللات !!

اسيد .. غرفتج فوك ثاني باب ع ايدج اليمين .

داليا .. اوك .. حروح اجيب جنطتي من السياره واجي!

اسيد .. صعدتها الج فوك .

داليا .. هذا اشوكت صعدها ؟!
معقوله نزل قبل ليكعدني واخذها ... سكتت محجيت شي

اسيد .. روحي اصعدي غيري ملابسج الجو بارد لتبقين بيهم.

داليا .. هزيت راسي وصعدت بسرعه للغرفه .....الطابق الفوك كان بي اربع غرف ، كل اثنين مقابلات اللخ .. ثاني باب ع اليمين دخلت .. لكيت جنطتي بيها ، الغرفه صغيره مو حيل كبيره بس هي دافيه ونظيفه السرير عالي وناعم ، وبيها باب هم صغير فتحته لكيت حمام بداخل الغرفه!
اشكد حلوو تصميم البيت يحسسك بالهدوء وشعور بالدفو .. نزعت ملابسي وكبل للحمام سبحت وطلعت .. لبست ثوب نوم كولش حلو فانيله لونه اسود وبي رسم دبدوب ابيض و وردي!
كعدت مشطت شعري .. كملت خليت راسي ع المخده ونمت .. مكعدت غير ثاني يوم الصبح!
نزلت لكيت البيت فارغ .. كنت ميته من الجوع رحت بوجهي للمطبخ !
طبعاً المطبخ كان من النوع التركي الي يصير مفتوح ع الصاله وبينهم مثل القاطع على شكل ميز طعام يفصل المطبخ عن الصاله!
كوووووولش حلو تصميم البيت والاحلى بي انو كان صغير يعني مو حيل كبير!
دخلت للمطبخ ع طاولة الطعام بالمطبخ لكيت ورقه ويمها موبايل نفسه الي اطانيا لما رحت للعرس ، يحبت الورقه مكتوب بيها ..!
اني طلعت اكمل كم شغله وارجع ، لتطلعين بره البيت ولتفتحين الباب اصلاً واي شي تردي اتصلي ع رقمي.
مضجت بالعكس فرحت انو بقيت لوحدي حتى اخذ حريتي .. سويت ريوك ، الثلاجه كانت مليانه من كولشي!

كملت وبقيت افتر بالبيت حسيت بملل ، كلت خلي اطلع للحديقه اشوف شنو هذا المكان ، اني وين!!
طلعت مشفت غير الخضار .. داير مداير البيت بس اشجار وزرع ماكو اي شي ثاني !!
كنت دااباوع واتفقد الي حاوليه ما احس الاصوت چلب نززني و وگف گلبي ...!
بسرعه ركضت ركضت دخلت للبيت وسديت الباب .. حسيت گلبي طار من كد الرعبه والخوفه الي اكلتها .. هالمره من صدوك خفت من البيت ، وحدي عايفني بهذي الچوله ومحد يمي ، مااعرف شي ولا اندل المكان الي اني بي اصلاً!!
الخوف والرعب اتملكوني .. رحت قفلت البيبان واخذت الموبايل اتصلت بي!!
جهازه يرن لحد مينفصل وماكو رد !!
بقيت اتصل وارجع ليورا يمكن الف مره اتصلت وماكووو لحد ما أيست منه ، حطيت راسي ونمت بس اني كل ذره بجسمي ترجف!

اسيد .. من عافتني بالليل بعد ما شفتها .. اني هم بدلت ونمت .. الصبح كعدت من غبشه بدلت ملابسي وطلعت للبيت ، عفتلها الموبايل و ورقه كتبتلها بيها انو اني طلعت ما اتأخر!
طبعاً بيت المزرعه بي حارس هو وعائلته وصيته عليها وكلتله اختي بالبيت بقت دير بالك عليها ، وممنوع منعاً باتاً احد يتقرب يم البيت بدون اذني الى ان ارجع!
وصيته وطلعت للبيت گبل .. اول ما وصلت كان واضح من وجوه الحرس انو امو مصيبه بالبيت!!
وفعلاً اول ما دخلت لكيت امي كالبه البيت هوسه على ام عادل وتصيح ، اول ما شافتني گلبت وجهها عليه ..

الام .. بصوت جامد .. واخيراً اجيت وين كنت اشكد اتصلت بيك ، ليش مترد عليه!

اسيد .. صباح الخير اول شي !
وثانياً كنت يم علي صديقي البارحه عرسه وبقيت يمه من البارحه مكدرت ارجع للبيت !

الام .. اسيد بلا لف ودوران وجاوبني داليا وين ، اعرف انت الي طردتها ماكو غيرك يسويها !

اسيد .. يا داليا هاي؟!

الام .. ولك شنو يا داليا .. البنيه التشتغل عدنا  ، لا ترفع ضغطي وين وديت البنيه فهمني!

اسيد .. هاا .. تقصدين هاي الي كنت ملزكه بيها ومقبلتي اطردها مو؟!!
ماادري بصراحه وين ليش شنو مموجوده؟!!

الام .. انت تريد تموتني والله ولك يمه لا تشلع گلبي ، گلي وين البنيه راحت ، اني مو عفتها يمك ورحت لبيت اخوك؟!
هاي ام عادل اتكول البارحه هنا جانت موجوده .. وانت اخر واحد بقيت وياها ، فهمني وين راحت شسويتلها ؟!

اسيد .. يووم لخاطر ربج كافي ، كلتلج ماادري عنها شنو اني الحارس مالتها ؟!
لو جليس خدامات صرت تالي عمري ، ترى مصختوها اجي يوم ارتاح من الدوام تتلكوني بمشاكلكم ، احسن حل الم ملابس وارجع اولي لدوامي بلكي اموت واخلص منكم.
عفت امي ورحت اخذ غراضي حتى ارجع لبلوة حياتي الي عفتها هناك وحدها .. جان تدخل خالتي ايناس هي وزوجها ...!
امي من شافتها تسودنت .. احضان وبوس وسلام وبجي ، گلبت الجو  .. اني كيفت كلت راح تنسى الموضوع .. عفتهم وصعدت لميت ملابسي والي احتاجه من غراضي ونزلت !!
دااريد اطلع جان تصيحني خالتي..!

ايناس .. هاي وين رايح اسيد ، بعدنا ما شفناك.

اسيد .. غير مره ام  احمد هسه عندي شغله.

ام اسيد .. خلي يروح هذا يريد يموتني!

ايناس .. شنو هالحجي هذا ام اسيد شصاير ، ممقبوله منج تحجين على الدكتور هشكل !

ام اسيد .. ولج خيه شحجيلج صارلي ساعه ابجي كدامه واتوسله يكلي وين راحت البنيه ميقبل يحجي ، ولك يمه اسيد ليش هيج تشلع گلبي ، برضاي عليك كول وين راحت البنيه بس فهمني.

ايناس .. يا بنيه؟!!

اسيد .. ام احمد سالفه تافهه لتشغلين بالج ، وامي اني اعرفها من تعصب تكوم تخبط عامي شامي ، اني رايح من رخصتكم.

ام اسيد .. ولك يمه وين تروح بعدني مشبعت منك شوف هستوني اجيت ما لحكت اكعد وياك ، تعوفني وتروح!

اسيد .. هاج شوفي قبل اشويه تدعي عليه وهسه تريد تكعد وياي.

ابو احمد زوج ايناس .. هسه فهمونا شنو الموضوع خلي نعرف شصاير!

الحجيه .. يا خويه اكو بنيه تشتغل عدنا هنا حبابه ويتيمه ، خادمتني وقايمه بحاجتي ، واني حبيتها لانها سبحان الله تشبه اخيتي ايناس تذكرني بيها ، هو من شافها شد وياها ، كل يوم مسويله سالفه الى ان شردت البنيه من عدنا .. المسكينه مالها احد المن تروح ، اووووف اويلي عليج يمه داليا.

ايناس .. داليا ....... هي نفسها داليا الي كانت وياك البارحه بالمطعم ؟!!!!!

الحجيه .. شنووووو .. بالمطعم؟!!!!!!!

للحكايه بقيه ❤️
رأيكم بالاحداث وتوقعاتكم للبارت القادم🤗
البارت كولش طويييل والاحداث منا ورايح حتحلى بين اسيد وداليا حركز عليهم اكثر😉 لتنسووووون التصويت
و اتمنى متلحون عليه بتنزيل البارت لانو لما يصير الحاح اكتبه اشون ما كان وانزله والقصه تخرب والله بسبب الضغط الي يصير عليه فرجاءاً اشويه اصبرووو ، واحب انوه انو البارت القادم ممكن يتأخر لانو والدتي حتجي من السفر باجر وتعرفون خطار وكذا 😪..
فأحتمال اتأخر اشويه عليكم بس ان شاء الله مو هواي يعني كم يوم 🚶🏻‍♀️ اتمنى تعذروني حبايب ولتضوجون  😘 احبكم  وشكراً لكل تعليقاتكم الحلوه تسلمولي ،