رواية في ارض الغرام انت دولتي الفصل التاسع عشر 19 - بقلم ﮼الاميره،الموسويه 👑

بقلمي(هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

داليا .. رفعت راسي باوعتلها ... اتجمد كلبي بمكانه ، كمية الالم الي ملت روحي بهذيج اللحظه كانت متنوصف حسيت واحد اقتلع گلبي بثانيه .. الدم اتجمد بعروقي والهوا بعد ميدخل لصدري!!
صفنت على هذي اللي كانت واكفه كدامي بكل ثقه .. ركزت بملامحها كأنها مكبرانه ابد .. بالعكس السنين زادتها جمال وحضور ، من لبسها وشكلها تعرف انها من الطبقه الراقيه والغنى مبين مبين عليها واكثر!
كانت واكفه تباوع بوجهي بأبتسامه هادئه وتنتظر مني ارد عليها .. متعرف اني كل ذره بيه دتصرخ!
بعد كل هذي السنين وبعد كل هذا العذاب الي شفته وبعد كل المعاناة الي عشتها بسببها .... مكدرت انسى شكلها ابداً .. من اول ما لمحتها عرفتها !!
اذكر مره لما كنت صغيره بالميتم .. !
كنت دائماً بالليل احلم بأمي تبتعد واني اركض وراها .. الى ان تختفي بالسراب وما اشوفها بعد .. يوم بعد يوم الاحلام بدت تتلاشى ومشفت امي بعد !!
وهذا الشي خوفني .. خفت انسى شكلها بمرور الزمن ويجي يوم ما اتذكرها نهائياً!!
كنت اطلع نص الليل بالحديقه مالت الميتم وابجي .. وفد مره شافني العم امين وحجه وياي ولما كلتله ع السبب الي مبجيني .. كالي كلام انحفر بعقلي لحد هذي اللحظه رغم كل السنين الي عدت بقيت اتذكره...
( الطفل لا يمكن ينسى وجه امه ابدا ، ملامحها تنحفر بعقله من اول ما ينولد حتى لو مرت 100 سنه بدون ميشوفها راح يتذكرها)!
وفعلاً كلامه كان صحيح .. اشون انسى .. امي!
الانسانه الي شمرتني اني واختي كدام الميتم .. الانسانه الي اتخلت عن طفلتين وتركتنا نموت من البرد والخوف والوحده بلا ميرف الها اي جفن!!
كان كل تفكيري انو هي ميته لذلك مرجعتلنا بعد .. وعشت على هذي الفكره طول عمري حتى الكالها عذر ع الي سوته وما اكره صورة الام المرسومه ابالي!
بس وكفتها كدامي كانت كدامي بكل تعالي والسعاده الي على وجها اكبر دليل على انها عايشه مثل الملكات كل تركيزها كان على ملابسي وشكلي وشكلي كانت تتأملني من فوك ليجوه!
معقوله معرفتني .. معقوله گلبها ما علمها انو اني بنتها .. !
اكيد لا الي مثلها مااعتقد عدها گلب اصلاً .. او يمكن معرفتني بسبب المكياج !
بقت تتأملني احتمال دتشوفني اذا كد المقام او لا .. اليق بأبن اختها او لا؟!!
عقلي كام يدور بيه ، ألم بمعدتي فضيييع ، روحي احسها دتطلع ، بلحظه وحده حسيت نفسي دااختنك بعد مااكدر اتنفس .. هدووووء تام ، اشوفهم يحجون بس مااسمع شي عقلي وفكري بغير عالم .. اباب الميتم اختي بحضني وابجي!!
نسيت اني وين ، منو الي واكف يمي .. شنو الي لازم اكوله .. الزمن توقف بالنسبه الي!!
بقت صافنه بوجهي وتنتظر جواب مني .. واني كنت مصدومه وداانازع حتى اتنفس بس محد منتبه بسبب الجمود الي صارلي .. فجأه سمعت صوت اسيد الي رجعني للواقع!!

اسيد .. داليا اشبيج؟!!

داليا .. محجيت غير كلمة وحده .. مستحيل !!

اسيد .. مااعرف شصارلها من شافت خالتي ع بالك شافت شبح كدامها ، وجها انخطف وصفنت متتحرك .. حتى انحرجت كدام خالتي و زوجها هسه شيكولون هاي اشبيها؟!!
والي خوفني اكثر شكلها الي انكلب رأساً على عقب .. حجيت وياها حتى اتدارك الموقف .. بس هي منطتني مجال !!
حسيتها راح توكع مثل الي فقدت توازنها .. مديت ايدي لزمتها ..!

داليا .. بصوت مخنوك ، اعتذر منكم بس مااعرف شصارلي خلينا انروح دكتور .. عفتهم وطلعت!

اسيد .. شفت حالتها فعلاً مو طبيعيه ، استأذنت منهم وطلعت وراها بس اني دمي يغلي من تصرفها السخيف والموقف المحرج الي خلتني بي!
طبعاً خالتي معجبها الوضع نهائياً وكلبت خلقتها .. هاي هي راح انفضح يم امي وبعد مااخلص ، اصبريلي داليا اني اعلمج ع الي سويتي بيه!
طلعت وراها بسرعه لكيتها مرتكيه ع السياره من وره ودايره وجها .. بصوت حاد ومليان عصبيه ...

_لج انتي اتخبلتي شنو هذا الي سويتي كدام خالتي؟!!
اتوقعتها تخاف من مبرة صوتي العاليه والعصبيه بس ماكو مدارت وجهها .. مشيت ناحيتها وجريتها من كتفها بقوه درتها عليه ..... جان اشوفها تبجي وحالتها حاله !!!!!
هاي راح اتخبلني والله ، استوها تضحك يم صديقتها وفرحانه طلعت من الفندق .. هسه شصار .. اشبيها؟!!!
بصوت جامد ..

_ليش دتبجين؟!!

داليا .. مكدرت احجي احس عبره مخنوكه بصدري اريد اتنفس مااكدر .. بقيت ساكته بس دموعي تصب!!

اسيد .. بصوت غاضب .. دااحجيييي وياج جاوبيني لا اكفر بيج ، ليش تبجين؟!!!!

داليا .. خفت من عنده حيل معصب والغضب بعيونه ، بصوت مخنوك همس .. مبيه شي!!

اسيد .. شنو مبيج شي ، لعد شكو تبجين؟!!

داليا .. كمت ارجف ماادري شصارلي فقدت السيطره على جسمي!!
بصوت يرجف من بين شهكاتي .. الله يخلـ..ـيك .. رجعنـ..نــ..ـي للـ.. للـبيييت.

اسيد .. خطوه وحده متتحركين منا اذا مااعرف اشبيج وليش دتبجين!!

داليا .. غضبه وصياحه عليه زاد الطين بله .. احس شي بداخلي ديحترك .. اديه كامت ترجف بقوه .. جسمي كوله انتفض .. الوجع الي بگلبي مينحمل .. ماادري شنو الي صار .. اشبيه ... معقوله حموت .. بقيت اتلفت مثل المخبله .. بصوت عالي ويرجف .. رجعنيييي .. رجعنيييي .. مااريد ابقى هنا .. مااريد .. مااكدر .. يا ربي .. لاااا .. مووو هي .. لا .. لاا .. اخذني الله يخليك .. مااكدر .. مو هي .. لاا .. بقيت ابجي واصيح العالم اتباوع عليه ع بالهم مخبله!!

اسيد .. دااحجي وياها طبيعي اشو هاي اتخبلت فجأه .. كامت تصيح وتفتر مثل الي دتهرب من شي يركض وراها .. الناس التموو .. وصارت خبصه .. بس اني كل هذا مهمني .. الي حرك گلبي و دمرني منظرها .. حالتها صدك كانت مو طبيعيه .. تهسترت تصيح من قريح گلبها .. لزمتها من ايدها جريتها عليه .. رفعت اديه لزمت وجها ، حاولت اثبت وجهها بس هي كل ذره بجسمها ترجف وتبجي .. تبجي دموع مو طبيعيه دمرت كل كياني !!
لزمت وجها بين اديه ، خليتها تباوعلي واني مركز بعيونها بحده .. وبصوت هادئ ..

_داليا .. داليا .. اهدئي .. راح انروح بس اهدئي .. هسه اخذج مناا والله بس اثبتي لتخبليني!!
ماكوووو ولا كأنو دتسمعني حسيتها بغير عالم .. الحاله الي بيها خلت عيوني تدمع .. ماادري شصارلها .. سحبتها لصدري بقوه وحظنتها اريد اهدئها .. نسيت العالم الواكفه .. نسيت احنا بالشارع .. بس ردت اثبت الرجفه الي بجسمها .. لزمتني من قميصي بقوه وكامت تبجي اكثر وتشاهك حيل!!
حسيت گلبي دينعصر بقوه ورعشه بكل جسمي صارت .. من صدك بهذيج اللحظه انتهيت دمرتني .. بحياتي ما حسيت هيج احساس .. حتى من اكتشفت خيانة خطيبتي وصديقي ما حسيت هذا الاحساس .. كلبي ديحترك عليها .. قربت حلكي يم اذنها وبصوت هادئ همستلها ..

_اششششش اني يمج اهدي .. داليا .. لتخوفيني .. اهدي .. اهديييي .. اني يمج محد يوصلج بس اهدي حتى نروح منا ..!

داليا .. لاول مره بحياتي افقد السيطره على جسمي .. كل عظو بيه كان يرجف ويصرخ من النار الي مشتعله بگلبي .. ما حسيت بشي غير لما حظني .. حسيت بصدره الصلب .. بأنفاسه الحاره على اذني .. گلبه كان يدك بسرعه مثلي .. بس رغم هذا جسمي مهدأ .. بصوت متقطع ومخنوك ..

_و.. ديــ.. ني لـ..لبيت !

اسيد .. من حجت جسمي كله انتفض .. ماشي بس اهدئي لان مااكدر اسوق وانتي بهالحاله .. انموت اثنينا..!

داليا .. بعدت عنه .. ولزمت السياره .. بخطوات متثاقله فتحت الباب مالت السياره وصعدت .. بس استخدمت كل ذره قوه باقيه بجسمي بحيث حسيت نفسي دااعبر سراط مو اصعد سياره ..!

اسيد .. عافتني وراحت للسياره .. لحكتها صعدت وياها لكيتها مخليه اديها على وجها وتبجي بحرگه!!
محجيت شي شغلت السياره وطلعت گبل للبيت كلت هناك اتفاهم وياها .. بقيت مركز ع الطريق بس اني فكري كله يمها ، هي طول الطريق محجت شي بس تبجي وتردد .. مووو هي .. مو هي !!
منو تقصد ؟!
وشنو الي خوفها لهدرجه ؟!
ماادري اشلون وصلت للبيت .. فتح الحرس الباب ودخلنا .. اول ما وصلنا فتحت الباب بسرعه ونزلت!!
ركض وراها دخلت للبيت لكيتها دتريد تدخل للغرف .. اول ما وصلت للباب لزمتها !!
بصوت حاد ..

_وين رايحه انتي تخبلتي لو شنو؟!

داليا .. نزعت الحذاء بالسياره ونزلت ركض لغرفتي ، اريد احضن فراشي وابجي .. وجع بكل جسمي ، معدتي موتتني بطني تلويني ، گلبي ما اوصفلكم وجعه مينحمل!!
كنت حدخل للغرفه واقفل الباب لان مااكدر احجي .. واذا ردت احجي شنوووو اكول؟!!
منو حيصدكني؟!!
عفته وركضت لغرفتي قبل لا اوصل للباب جرني وبقى يصيح بصوت جامد.. يعني اخاف اني عايزه؟!!
مجاوبته لما سألتي لانوو اصلاً مسمعته شنوو حجه ، عقلي مشغول بالصدمه الي صارت ..!
بقيت ساكته وارجف بأيده!

اسيد .. احجي وياها متجاوبني ، خبلتني .. اريد افهم شنووو الي صار ، اشبيها متحجي!!
كنت لازمها بقوه تركتها .. درت وجها عليه ورفعت راسها صارت نظراتنا واحد بعيون الخ!
بصوت هادئ ..

_بس فهميني اشبيج وروحي مرايد منج شي!

داليا .. كلامه ونظرته هزو كل ذرة قوه باقيه بيه انهاريت لاخر درجه .. عيونه كانت بيها نظرة اول مره اشوفها .. شفقه ، خوف!!
صفنت بوجهه ودموعي بقت تجري .. اديه كانت محاوطه وجهي .. هدووووء هذا كل الي حسيت بي!

اسيد .. داليا .. دتسمعيني ؟!!

داليا .. محجيت شي بس هزيت راسي بهدوء مرتين !
ترك وجهي واخذني من ايدي .. كعدني ع التخم .. راح جاب حبايه مااعرف مالت شنو و وياها مي واجه .. خلاها بأيدي كال اشربيها..!
اخذتها من عنده بأيد ترجف .. شربتها .. وبقيت ساكته محجيت شي .. هو هم بقى كاعد كدامي ويدخن بس بشراهه .. !
بعد كم دقيقه حسيت جسمي ارتخى .. الرجفه بدت اتخف .. گلبي نبضاته انتظمت .. بديت اتنفس بهدوء ... ارتكيت ع القنفه مثل الخدرانه ... بعدها كل الي حسيت بي سواد !!
مااعرف اشكد مر من الوقت .. كعدت لكيت نفسي نايمه بالصاله .. وهو كاعد كدامي .. كان صافن عليه ويباوعلي بنظرات غريبه .. عيونه مليانه ظلام .. ماكو اي مشاعر .. اي تعابير .. بس ظلام بعيونه!!
جسمي كان كوله مرتخي مااحس بشي ما عدا وجع براسي فضييييع!
حاولت اكعد .. رفعت نفسي بكل قوتي وكعدت .. هو صافن بوجهي ميحجي بس يدخنه ونظراته الي بيها الف سؤال!!
ردت احجي اكوله صار اشكد من نمت ... بس سؤاله سبقني!!

اسيد .. حالته كانت مو طبيعيه .. اضطريت انطيها منوم استخدمه دائماً بهيج حالات لبعض الجنود .. آمن وميضر بس يهدأ المريض وينيمه!!
بعد دقايق نامت .. بقيت كاعد يمها .. والي سمعته صدمني!!
كانت تشهك بأنفاس مخنوكه و تردد بصوت مثل الهذيان ..
لاا .. مو أمي .. هذي مو أمي .. مستحيل .. امي ماتت .. امي ماتت .. ما رجعت لانها ماتت .. انتي .. ميته ميته .. مو امي!!!!

مفهمت شنو تقصد .. بس هي صارت بيها هذي الحاله لما شافت خالتي .. شنو امها .. شنو ماتت ؟!!
زين خالتي شنو علاقتها بالموضوع ..!
طبعاً اني من اول ما شفتها شبهت عليها لخالتي ايناس !
خالتي هذي اصغر وحده بين اخواتها .. اتذكر كانت مسافره فتره وبعدين كالو رجعت .. اني بوقتها كنت بالمتوسطه يمكن فمااتذكر زين شنو الي رجعها .. اخذتلها فتره يمنا بعدين اتزوجت ورجعت سافرت للشمال !
ومن شفتها بالمطعم استغربت ماادري بيها جايه!
الشبه بينها وبين داليا غريب .. حتى امي كانت تكول هذي البنيه تشبه اخيتي .. وبما انو خالتي ايناس نادراً متشوفها امي .. فداليا كانت تذكرها بيها .. لذلك حبتها ومقبلت اطردها !
عقلي افتر .. شنو هذا الشبه .. وليش هيج داليا انصدمت بيها .. حسيت راسي حينفجر من التفكير .. كمت قست ضغطها كان مرتفع حيل .. عفتها ورحت سويتلها شوربه وعصير ليمون .. كملتها ورجعت هي بعدها نايمه .. كعدت يمها ادخن والف سؤال وسؤال براسي .. شارد وداافكر بكلامها .. جان تتحرك .. ظهرها صار مواجه الي .. الفستان مالتها من ورا تقريباً شبه عاري لانو ميغطي غير قطعه شيفون تطلع اكثر من الي تستره .. بشرتها بيضه تجذب .. وشعرها اسود منثور على ظهرها واكتافها .. جسمها ع بالك منحوت ورجليها بيض ثلج .. فستانها كان مرفوع وطالعه سيقانها .. منظر سطرني سطر ذكرني لما وكعت المنشفه منها .... اخاف اني عايز اتخبلت اكثر .. حاولت اطرد الصوره من عقلي مكدرت ،  حتى عيني مااكدر اشيلها عنها .. اول مره احس نفسي نذل لهدرجه بحيث باوعت على بنه بلا متعرف!!
ماادري شصارلي .. حراره بكل جسمي صارت .. كمت بسرعه جبت غطه وغطيتها .. مااكدر اتحمل هيج منظر ..!
بقيت كاعد اراقبها بس اعصابي حيل تعبانه من صورتها الي ابالي .. فجأه كعدت !!
گلبي حسيته فز من صحت .. كان واضح عليها انو دتتوجع .. اكيد من راسها بسبب الحاله الي صارتلها لما تهدأ الالام تبدي تطلع!
من شافتني رفعت نفسها وكعدت .. تباوعلي .. طبعاً وجهها صاير خريطه من المكياج الي سال بسبب البجي .. كنت اريد اضحك من منظرها .. بس لزمت نفسي!
بصوت جامد سألتها ..

_اشون صرتي؟!

داليا .. احسن ، صارلي اشكد نايمه!

اسيد .. مو هواي .. كومي غسلي حتى نتعشى!

داليا .. مااريد ، حروح اغير ملابسي وانام!

اسيد .. لازم تاكلين شي ، روحي بدلي على ما  احظر الاكل !

داليا .. هذا شديحجي .. معقوله يحظرلي الي اكل!!
يا ربي ارجوك كافي صدمات لهذا اليوم بعد مااتحمل .. امي طلعت كدامي .. وهسه اسيد بجلال قدره يسويلي اكل!!
محجيت شي لانو الالم براسي موتني .. كمت لغرفتي .. نزعت الفستان كان خانكني .. وگبل للحمام .. سبحت ، بدلت لبست تراك اسود وبي ورد ابيض مرتب وحلو .. مشطت شعري ورفعته ليفوك (ذيل) وطلعت !!
لكيته بالمطبخ .. بلا ميلتفت الي .. كال

اسيد .. روحي اكعدي هسه اجي!

داليا .. رحت كعدت .. وبقيت انتظره .. اشويه واجه .. شايل صينيه صغيره خلاها كدامي ..

اسيد .. اكلي!

داليا .. مااشتهي .

اسيد .. بصوت حاد لتعاندين .. واكلي!

داليا .. شكله مو مال اناقشه .. معصب وعيونه مظلمه .. مديت ايدي اكلت الشوربه .. كان طعمها يجنن اول مره اكل هيج شوربه وهيج طعم!
اكلتها كولها حتى مهتميت لوجوده كدامي .. دااكل جان يحجي !!

اسيد .. امج ميته؟!

داليا .. حسيت گلبي انخمش .. ذبيت الخاشوكه من ايدي .. وباوعت بوجهه .. مااعرف شأجاوبه؟!!
بقيت ساكته .. فر راسه بمعنى جاوبي ، بصوت همس .. لا .. اقصيد بلي .. !

اسيد .. شنو؟!!

داليا .. لويش السؤال؟!!

اسيد ..  جاوبي!

داليا .. مااعتقد شي يخصك ..عفت الاكل وكمت !

اسيد .. بصوت حاد و عالي .. لويش لما شفتي خالتي اتخربطتي؟!!

داليا .. جمدت بمكاني من كال خالتي .. ملتفتت عليه .. كنت تعبانه من الحفله ما الها علاقه خالتك ، كملت مشي رحت للغرفه .. جان يجرني!

اسيد .. احجي وياها وهي ولا كأنو عافتني ومشت !
من صدك عصبتني .. جريته بقوه ودفعتها ع التخم .. بصوت حاد .. لما احجي وياج توكفين تسمعين كلامي ، ومتروحين الا اني اسمحلج انتي تشتغلين هنا لو نسيتي!!

داليا .. منسيت شي بس حضرتك مو من حقك تتدخل بخصوصياتي  وتسألني هيج  أسئله!

اسيد .. اخر مره أسألج شنو علاقتج بخالتي .. جاوبي لو تحبين اجيب خالتي لهنا واسئلها..!

داليا .. من كالي اجيبها حسيت اطرافي بدت ترجف .. لا كولشي ولا تجي .. مااكدر اشوفها .. مااكدر .. الله يخليك .. لاا .. !

اسيد .. بدت ترتعش راح تخبلني هاي .. اتكول مو من خالتك اتخربطت ومن اجيب سيرتها تنجن!!
نفذ صبري ومن صدك عصبت .. بحياتي ممتحمل شخص هالكد وصابر عليه ، مشيت يمها  لزمتها من ايديها ثبتتها كدامي ، باوعتلي .. بصوت حاد وجامد ..
_اسمعيني زين وعوفي خبالاتج هاي .. راح أسألج وتجاوبيني بدون اي نقاش وبلا كذب والا والخلقج  اتصرف وياج تصرف ابد ميعجبج!!

داليا .. كنت خايفه ومرعوبه من فكرة انو يجيبها للبيت واشوفها .. بس شكله الغاضب وعصبيته خوفتني اكثر كان يباوع بوجهي وعيونه نار !
ماعندي حل ثاني احسن مااعصبه ويسوي الاسوء .. غمضت عيوني اخذت نفس وجاوبته بصوت مخنوك ..

_ شنو الي تريد تعرفه؟!!

اسيد .. امج وين ؟!!

داليا .. مااعرف !

اسيد .. شنو متعرفين ، يعني ميته ؟!

داليا .. لا .

اسيد .. لتعصبيني جاوبي عدل!

داليا  .. جاوبتك .. كلتلك مااعرف من كنت صغيره اخذتني اني واختي شمرتنا يم باب الميتم وراحت مشفتها بعد ولت اعرف عدله لو ميته!

اسيد .. ليش من شفتي خالتي اتخبلتي؟!!

داليا .. سكتت محجيت .. بس احس گلبي ديرجف وعيوني دمعت!

اسيد .. ها؟!!

داليا .. لانو خالتك هي امي!

اسيد .. هههههه ، انتي مخبله شي!!
شنو امج شنو هالغباء .. الظاهر الكعب اثر على عقلج!

داليا ..  لهذا مردت احجي وانت الي جبرتني .

اسيد .. لج بابا خالتي متزوجه.. وعدها جهال يجون بكدج تقريباً ، وزوجها شفتي بعينج وياها .. لو هم ابوج هذا!!

داليا .. بابا مات من اني صغيره وبعد وفاته ماما اخذتني اني واختي لبيت اهلها .. بقينا هناك فتره قبل لتعوفنا يم الميتم .

اسيد .. اشكد كان عمرج وقتها !!

داليا .. مااتذكر يمكن 7 او 8 سنوات!

اسيد .. فرضاً كلامج صحيح .. ايناس مستحيل تكون امج!

داليا .. هه .. يا ريت كلامك صدوك .. وياريتها مو أمي .. ع الاقل كام بقت بنظري ميته !

اسيد .. صدكي انتي غلطانه .. ايناس مو امج يمكن شبه بينها وبين امج .. حتى بينج وبينها اكو شبه!

داليا .. متحملت كلامه .. كل الي كلته وبعده ممصدك !!
معقوله مفكر اكو بشر يغلط بأمه!!
اسلوبه البارد وعدم تصديقه لكلامي حرك گلبي حرك .. مكدرت الزم اعصابي اكثر .. انفجرت بوجهه ...

_ اي هذي مو امي .. واني دااكذب شفتها وعجبني شكلها كلتلك امي .. تعرف الحثاله كولشي يسوون .. حتى ينسون اهلهم ويتبرون منهم .. ممجبور تصدكني ولا احد طلب منك تقتنع او حتى تعرف انت الي سألت لحالك .. بعدين اني شتوقع منك .. انت اصلاً منوو .. اذا هذي خالتك انت شنو تكون؟!!
هذي الي دتكول عليها خالتك ومستحيل اتكون امي .. هي الي شمرتني اني واختي الي عمرها كم سنه بنص الشارع عافتنه للچلاب تنهش لحمنا .. هذي الي كاعد تتفاخرلي بماضيها وتشرحلي حياتها هي نفسها الي قتلت اختي !
نفسها الي خلتني اتمنى الموت كل يوم من اتذكر اشون عافت اختي بين اديه!
نفسها الي عشت كل عمري شايله ذنب موت اختي بسببها .. نفسها الي اتربيت بالمياتم بسببها .. نفسها الي استكثرت عليه كلمة ام وحظن دافي .. نفسها الي خلاني اصير خدامه واني بعز شبابي!
كنت مفكره روحي اني الغبيه بس شكلك انت بس مظهر كولشي متعرف اقرب الناس الك متعرف عنه شي .. هي هذي خالتك الي دتتباها بيها .. هي هذي الي خجلت منها تشوفني وياك!!
جاي بكل سهوله اتكولي شبه بينا ..!!
هههه .. دير بالك .. دييييير بالك اتكول هذي مو امي لو تحاول حتى انو تقنعني مجرد شبه .. لاني لو انسى اشون اتنفس مستحيل انسى شكل امي!

اسيد .. كانت تحجي بحركه والدموع متجمعه بعيونها متقبل تنزل .. كل ذره بيها كانت ترجف وهي تحجي .. عيونها كانت ورمانه من البجي الي بجته .. والدموع تريد تنفجر منهم .. اي واحد يكدر يشوف الوجع بملامحها وهي دتحجي!
بس مع ذلك شي بداخلي مدايصدك الي دتكوله .. اشلووووون ايناس امها؟!!
بقيت ساكت لاول مره الكلام يضيع وما الكى رد!
وكفت كدامها .. بصوت هادئ ..

_ماشي اهدي هسه .. واني راح اتأكد و اعرف الحقيقه.

داليا .. هه اتمنى لما تعرفها متنصدم.

اسيد .. روحي هسه نامي وباجر اني اروح الامي اجيبها واعرف منها كلشي.

داليا .. لااااا .. مااريد احد يعرف بالموضوع اترجاك رجاء.

اسيد .. بستغراب ليش؟!!

داليا .. الله يخليك ، مااريدها تعرف عني شي ، ولا اريد شوفها اصلاً .. واذا امك عرفت اكيد مراح تبقيني هنا واني ما عندي احد اروحله الله يخليك و اوعدك محبقى بعد هنا بس انطيني وقت على ما اشوف شغل ثاني واروح!

اسيد .. وليش ترحين؟!

داليا .. هنا الدموع نزلت لحالها مكدرت اكتمها اكثر .. بصوت مخنوك .. اذا امي عافتني تتوقع امك حتبقيني اذا عرفت!

اسيد .. الى ان اتأكد من الحقيقه محد يكدر يمس شعره منج واني موجود ، واذا طلعتي دكذبين عليه صدكيني محد يخلصج مني.

داليا .. انطيني وعد متكول الاي احد ابداً الى ان اكولك !

اسيد .. دموعها حرگت روحي حرك .. بدون وعي مني لكيت نفسي دااسوي الي تطلبه ، نطيتها وعد ما اكول اي شي ..

_ماشي ما اكول بس بشرط!

داليا .. موافقه !!

اسيد .. انتي عرفتي شنو؟!!

داليا .. ميخالف اياً كان شرطك موافقه بس لتحجي شي عن هذا الموضوع!

اسيد .. كلتلج ماشي لتلحين ..!

داليا .. شنو شرطك؟!!

اسيد .. تتزوجيني!

داليا .. شنووو؟!

للحكايه بقيه ❤️
البارت ٣٠٠٠ كلمه طويل و السرد بالتفصيل فالاحداث بطيئه اتحملوني حتى القصه متخرب فدوه لتضوجون😑
واحب اشكركم مره ثانيه .. شكراً شكراً شكراً من كل گلبي لكل الي دعووو لامي ❤️ الحمدلله سوت العمليه والتحاليل طلعت نظيفه 🤗
البارت القاادم احتمال انزله بالليل بس لتنسون التصويت 😘