رواية في ارض الغرام انت دولتي الفصل الأول 1 - بقلم ﮼الاميره،الموسويه 👑

ما احلل لأي شخص ياخذ كتاباتي وينشرهم (ذمه)

بقلمي (هدى الموسوي) #الاميره_الموسويه👑

(مراح اخليلكم صور للابطال انتو تخيلووهم احلى بس حكتب مواصفات لشكلهم)

الساعه ب ٦ الصبح ..

اكعد يمه أسيد راح الوكت عليك ، مو حتى المنبه طلعت روحه صارله ساعه يدك يم راسك وانت ولا ع بالك

أسيد .. بصوت ناعس جامد .. ماشي كمت كمت

طلعت الام وكام الافندي غسل وبدل ملابسه نزل كال صباح الخير وطلع بوجهه حتى منتظر يردون عليه السلام !!

خلي اعرفكم بشخصيتنا الغامضه ... أسيــ ....

لحضه ... شنو تعرفين شنو شخصيتنا؟!
اني موجود واعرف عن نفسي لتتدخلين بشي ميخصج.

لا مو قصدي بس ..

لا بس ولا تغردين انطيني القلم و وخري عن وجهي ترى ما الي خلك احد .

تمام تمام تفضل القلم وعرفهم عنك ، اعتذر منك دكتور اسيد.

احم احم ..

اسمي اسيد (مصغر الاسد)* عمري 32 سنه دكتور جراحه عامه وحالياً دكتور عسكري ، التحقت بالجيش لان ما احب جنس حواء ابد ولا اريد التقي بيهن وبحكم مهنتي الطب تفرض عليه اعاين مراجعين اناث !!
لذلك اختصرت الطريق وقدمت ع العسكريه واتعينت دكتور عسكري وحالياً رتبتي رائد ، صارلي سنتين بهذا دوامي
شفت انواع الاصابات ، جثث اكثر من شعر راسي ، اصابات تقشعر لها الابدان مثل ميكولون ، عالجت وشفت حالات اكبر جراح يشوفها تطلع روحه و ميتحمل المنظر
الي محترك ، والي مفحم ، والي مكطوع راسه ، والي مبتور نص من جسمه ، و الي طالعه مصارينه ووووووو اشكال انواع !
وهذا الشي موت لي گلبي خلاني اصير انسان بلا گلب ، تحولت الي شخص قاسي بكل معنى الكلمه ، گلبي صار حجر ميتأثر بأي شي ، تعاملي ويا الناس اختلف ، حتى الرحمه انشالت من داخلي من گد العنف والقسوه والوحشيه الي شفتها بـهذي الوظيفه!

ايضاً شخصيتي تغيرت ، صار تعاملي جامد واسلوبي جاف ، لدرجه اذا ابتسمت ع شي اهلي يستغربون!!
طبعاً العسكريه والي شفته بيها ساهمت بجزء كبيييير من هذا التحول بشخصيتي !
بس السبب الاساسي الي أثر عليه وخلاني اصير هذا الشخص القاسي ..... شي ثاني راح تعرفوا بعدين.

بشكل عام ما التقي بناس خارج اطار شغلي ابداً ، وما عندي اصدقاء مقربين هواي بس شخصين وياي بالدوام نقيب علي ، ودكتور سلام ، وشخص ثالث صديق طفولتي احمد والي كنت معتبره اخ الي ... بس علاقتي انتهت بي من 3 سنوات تقريباً والاسباب جداً قويه (هم حتعرفوها بعدين)

طبعاً اني عملي يعتبر عسكري بس ما اقاتل ولا اخوض مواجهات الا نادراً يعني لما اضطر لهذا الشي ..!
اغلب الوقت دكتور اعالج الجرحى والحالات الطارئه الي تصير اثناء المواجهات ، و متواجد على طول بالمعسكر ، انزل اجازات لبيتنا كل شهر مرات اكثر ومرات اقل !

عندي 3 اخوات (نور ، منى ، سحر) متزوجات و اخ واحد كرار هم متزوج وطالع ابيت لحاله يعني بس اني والوالده بالبيت ، اني اكبرهم .. والدي متوفي من زمان قبل لا اتخرج من الاعداديه اتوفى كان يتمنى يشوفني دكتور والحمدلله حققت امنيته وصرت دكتور جراح .
حالتنا الماديه فوق العالي الحمدلله لانو الوالد كان رجل اعمال معروف على مستوى الدوله وعضو بغرفة التجاره الدوليه (منظمه معروفه على مستوى العالم)
فلما توفى تركلنا شركات واملاك متنحصي ولا تنعد ، بس اني ما الي خلك بهذي الاشياء تجاره وما تجاره وادارة الاعمال مبتعد ابتعاد كلي عن شغل والدي وتجارته ، اخويه كرار هو الي لازم الشغل طبعاً هو اصغر مني بسنتين عمره 30 متزوج وعنده 2 ولد وبنيه .
فهو بحكم شهادته اتخرج من كليه الاداره لزم شغل الوالد اول ما اتخرج يعني صارت عنده خبره وايضاً عمي ابراهيم اخو ابويه الكبير هم يشتغل ويا ، عمي هذا بمثابة اب النا من اول ما توفى والدي هو الي وكفلنا ولزم املاك ابويه لان احنا كنا صغار ولما صار علينا الاعتماد سلمهم النا من غير لا ياخذ فلس!
فأني اعتبره اب الي واحترمه جداً كذلك اخواني نفس الحاله .. و اخويه كرار اتزوج بنته يعني علاقتنا صارت قويه اكثر .. الفكره انو احنا حالتنا الماديه جيده جداً ومناقصنا اي شي من صغري وعيت ع الغنى والترف ، بس اول ما بلغت اعتمدت على نفسي وصرت شخص مستقل
يعني عايش من مالي الخاص ما معتمد على فلوس غيري ، اني طبيب والحمدلله راتبي خير من الله عندي استعداد افتح بيتين مو بيت واحد بس بقيت ويا امي ابيت ابويه لان مااكدر اعرفها وحدها وهي متقبل تعوف بيتها اتكول هذا بي ريحة ابوك..!
لذلك اضطريت ابقى وياها بنفس البيت ، عدنا خدم بالبيت وحراس خارج البيت لان اني وظيفتي خطره اشويه بيها تهديد ، وابويه هم شخصيه معروفه فنخاف من الحراميه وغيرهم ( تعرفون الوضع) وهم مااكدر ابقى امي وحدها بالبيت وحد وياها .. لذلك الحراسه مطلوبه .

المهم ..
اليوم اول يوم التحاق و روحي طالعه ، صح احب وظيفتي وارتاح من اساعد الجنود بس بنفس الوقت الدوام متعب جداً يعني يهلك الواحد 24 ساعه اني واكف على رجليه كل اشويه جايبين وجبه شهداء وجرحى!
الي تشوفو وتسمعو بالتلفزون وغيره كله كذب بكذب ، الخسائر البشريه والاصابات كارثيه و وحشيه من تشوف التمثيل بالجثث والاسرى تحس الانسانيه انعدمت!
يعني متلحك تسعف مصاب يجيك الثاني والثالث ووو ... الخ.
بس مع ذلك الدوام ارحم بهواي من البيت لان اخذ راحتي هنا ما اشوف الصنف الي اكرهه من البشر ( النسوان).
هذا اني وهذي حياتي اتمنى وصلتلكم الفكره عني بصوره واضحه ، هذي اول مره بحياتي احجي هالكد عن نفسي حتى دخت.

البدايه!

قبل شهرين أسيد قدم على نقل من المكان الي يداوم بي لان حيل تعب 24 ساعه مواجهات واصابات بعد معاناة و واسطات ، و روحه ورجعه انقل اسيد!!

المكان الي انتقل بي  منطقه اغلبية سكانها مسيح!
ويم المعسكر على مسافه بعيده  اشويه كان اكو مدرسه مهجوره بصفها كنيسه و ميتم اطفال تابع للكنيسه!
المعسكر كان صغير يعني يا دوب يكفي للوحدات العسكريه فأضطروا يقيمون وحدة الطبابه داخل المدرسه المهجوره الي يم الكنيسه اولاً حتى حتى تكون بعيده عن مرمى العدو يعني اخاف يصير قصف فالجرحى والاطباء ميصيبهم شي لانو محد يفكر بالمدرسه كونها مهجوره وبعيده عن المعسكرنوعاً ما!
وثانياً حتى يقللون من الزخم الي بالمعسكر.

الساعه ب12 بالليل هسه يلا خلص أسيد مناوبته ، استلمها دكتور خفر بمكانه

أسيد .. كنت تعبان ميت تعب صارلي اسبوع بالدوام واكف على حيلي عود انقلت هنا ع بالي ارتاح طاح حظي بالزايد المكان الي بي مهجور وابسط الخدمات معدومه بي وبعيد عن المعسكر يعني شيصير ميصير احنا مندري هنا وكل اشويه جايبين جرحى ، فوك هذا كله بصف المكان الي اني بي ميتم وكنيسه مليان نسوان وجهال لعبت نفسي لو ادري ممنتقل من مكاني اشرفلي.
المهم خلصت مناوبتي ورحت للكرفان مالتي كلت للجندي يحضرلي العشا على  ما اسبح حتى اتعشى .. اخذت ملابسي ورحت للحمامات سبحت وطلعت اذكر الدنيا كانت بارده ثلج بنص الشتاء ، والمي بارد ثلج اني عادي سبحت بالمي البارد وطلعت لان مليان دم و وصخ وحالتي حاله شسوي لازم اسبح!
رجعت للكرفان طبعاً اني ودكتور ثاني وياي الي اخذ مكاني بالواجب بغرفه وحده بس واحد يروح و واحد يرجع يعني نتناوب
اتعشيت وخليت راسي ع المخده مثل الميت من التعب .. يمكن مرت 5 دقايق او هيج شي من نمت و سمعت صوت چلاب تنبح اجلكم الله!!
عادي احنا متعودين على هذا الشي بس هالمره الصوت كلش قوي وقريب ع غرفتي بالعاده الچلاب ميدخلن داخل المعسكر لان يعتبر مثل المستشفى ميخلون الحيوانت تدخل بي!!
اني كلت اكيد هذا واحد من الجنود ديتحارش بيهن فدخلن وكامن يصيحن .. كمت اخذت مسدسي من البدله مالتي وخليته جوه المخده احتياطاً لان كلشي يصير!
طفيت الضوه و رجعت نمت ... بعدني هستوني غفيت وجان اسمع صوت باب الكرفان انفتح وانطبك بقوه!!!!!!!!
الغرفه ظلمه كلشي مااشوف بس سمعت صوت انفاس سريعه ... و واحد ديلهث بصوت قوي!!

فزيت من مكاني بسرعه وسحبت المسدس اكو فوك راسي لايت عسكري صغير بس قوي مخلي خاف تنطفي المولد انشوف بي ، سحبته بسرعه فتحته و وجهته هو والمسدس ع الباب ... وبصوت جامد كلت .... ارفع ايدك ولا حركه!!!!
اباوع كلشي مااشوف بس شخص واكف وعباره عن كتله شعر اسود ممبين منه شي!!
اني كلت هذا داعشي لا محاله ويا ريته كان داعشي ... من شفت ماكو رد سحبت اقسام وردت ارميي ..... جان يحجي هذا الشخص!!

الشخص ... لا لا الله يخليك لتضرب لااااااا !!!!

الي صدمني اكثر من الموقف الي اني بي ومن الرعبه الي عايشها ..... صوت الشخص هذا صوت بنت!!!!!!!!!!!!!!!!!!!!

..................

مرحبا حبايب قصه جديده ان شاء الله تعجبكم كالعاده اول بارت يصير ممل لانو تعريف الشخصيات بس اوعدكم هالمره القصه مختلفه جذرياً عن الي كتبتهم من قبل وجريئه اكثر ، ااتمنى تعجبكم ❤️🤗
اكتبولي رأيكم بالبدايه وتوقعاتكم للبارت القادم.