رواية في ارض الغرام انت دولتي الفصل الثاني 2 - بقلم ﮼الاميره،الموسويه 👑

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

-الدنيا كانت ليل والجو بارد.. فتره طويله مرت واني كاعده هنا
كنت اني طفله عمري 7سنوات كاعده كدام باب كبير وعالي  متحركت من مكاني ولا دكيت الباب لانو الشخص الي خلاني هنا كال متتحركين من مكانج هسه ارجعلج!
بقيت بمكاني متحركت من الخوف والبرد  وبحضني طفله اصغر مني ب 5 سنوات!
هذي الطفله كانت ..... بنتي....!
اي بنتي من عمري 7 سنوات اني صرت ام بس بالشعور!
من عمر 7سنوات حسيت بمعنى الامومه .. مو يكولون فاقد الشئ يعطي؟!!
اني كنت فاقده هذا الشعور بهذيج اللحظه فحاولت انطي للطفله الي بحظني ، صرتلها ام!
نزعت قطعة الملابس الوحيده الي تغطي جسمي .. لفيت بيها الطفله ،  وحظنتها بكل قوتي!
ردتها تحس بالدفو الي اني فاقدته!
رغم اني طفله بس احساس الامومه الي نولد بداخلي خلاني اتجاوز عمري بحيث اضحي بالشي الوحيد الي يغطيني في سبيل ادفيها..!
تصرف امهات مو؟!!
كلتلكم اني صرت ام!
فكرت انو بكل الاحوال اني راح اموت فـ ع الاقل هي الي تعيش .... بس القدر كان اله رأي اخر.
جسمي كوله كان عباره عن كتله ثلج من البرد!
اطراف اصابعي مكنت احس بيهم ابد ، الجو باااارد ثلج بكل معنى الكلمه  ، بقيت حاظنه الطفله بكل ما املك من قوه لدرجه حسيتها دتختنك!!
اني كنت الفط انفاسي الاخيره من البرد .. فجأه انفتح الباب الكبير الي كدامي .... ضوه صار كدامي .. رفعت راسي من الطفله شفت الباب مفتوح وشخص طويل حيل لازم فانوس واكف كدامي !
مشفت ملامحه لانو الدنيا ظلمه وضوء الفانوس صار بعيني مكدرت اميز شي ..!
بلحظه وحده حسيت  روحي دتطلع خلص واستسلمت للموت ...

شعور دافي  ، احساس حلوو ، فتحت عيوني بهدوء لكيت نفسي نايمه بفراش دافي!
وكدامي دفايه مشتعله!
واني لابسه ثوب ابيض ناعم انعم من الحرير !
بس اكثر شعور حلو انتابني هو لما حسيت بأطرافي دفيانه ودتتحرك!
تعرفون الطفل اشلون تفرحه التفاصيل البسيطه وينسى الاشياء الكبيره الي مر بيها.
عشت هذا الاحساس الحلوو دقايق .. بعدها استرجعت وعي...!
اني وين ، وشنو هذا المكان ، ومن وين هذي الملابس واختي وين؟!

اسئله هواي اجت على بالي بس تعرفون شنو الشي الي ردته بهذيج اللحظه؟!!
(ردت امي) 💔
باوعت اني بغرفه تقريباً شبه ظلمه بيها بس ضوه فانوس يا دوب اتشوف منه ، كمت من مكاني فتحت الباب وطلعت كان الدنيا نهار والضوه عمى عيوني..!
بقيت افرك بعيوني ثواني ، حسيت شخص لزمني من كتفي!
انتبهت بسرعه شفت رجال كبير بالعمر واكف على راسي شكله يحسسك بالامان الشيب مالي راسه!

الرجل .. صباح الخير يا حلوه اشلون صرتي؟!!

اني .. اني وين ، انت منو ، اختي وينها ... اريد اختي وينها اختي؟!!!

الرجل .. بصوت هادئ وعطوف .. اهدي عمو اهدي ، ولتخافين اني اريد اساعدج  ما اسويلج شي ، انتي هسه بـ ( بيت الرب) ، ماكو شي يخوف يا عمو

اني .. بيت الرب؟!!
بقيت صافنه ثواني .. اني شسوي بالكنيسه وليش عافتني هنا؟!!
بسرعه وصوت جامد كلتله .. اختي وينها وين وديتوها؟!!

الرجل .. اختج اممممم اختج نايمه جوه ما بيها شي لتخافين.

اني .. اريد اشوفها اخذني الها خلي اشوفها.

الرجل .. خلا ايده ع راسي وكالي .. اختج نايمه هسه ميصير اتشوفيها .. امشي وياي نشرب اني وياج حليب واحجيلي اشويه شجابج لهنا و وين اهلج وبعدها تشوفيها وعد.

للحظه وحده حسيت بالامان من خلا ايده ع راسي مشيت ويا بهدوء اخذني لغرفه كبيره الشمس تدخل من كل شبابيكها وبنصها طاوله طعام خشب .. كعدت ع الكرسي وجابلي كلاص حليب وخبزه .. اكلتها كولها والحليب شربته كوله بدون وعي مني .. الظاهر كنت جوعانه واني ماادري..!

-سألني الرجل شنو اسمج؟!!

-داليا .

-الرجل الله اسم جميل واني اسمي عمو امين.

بقيت ساكته وصافنه بوجهه مااعرف شنو احجي .. الى ان حجه هو !

العم امين .. تعرفين اهلج وين ، و منو جابج انتي واختج للكنيسه ، و وين بيتكم تندلي؟!!

داليا .. ماما جابتنا لهنا وكالت الزمي اختج ولتتحركين من مكانج هسه ارجعلج.

العم امين .. اممم زين متعرفين وين راحت؟!!

داليا .. بقيت صافنه بوجهه مااعرف شنو اجاوبه ، ولا شنو احجي ؟!

العم امين .. تمام داليا الحلوه كملي اكلج حتى اخذج تشوفين اختج .

كملت واخذني شفت تاليا كانت نايمه بسرير صغير  ويمها مريه متوسطة العمر لابسه لبس راهبات ومبتسمه بوجهي .. باوعت لاختي شكلها كان غريب ملامحه صفره و وجها ذبلان؟!!
مديت ايدي اريد الزمها لكيت جسمها حار نار؟!!
باوعت للعم امين بنطره استفهام ؟!!
ردت منه جواب شنو بيها اختي ليش هيج شكلها متغير بس مجاوبني .. دنك راسه وطلع !
بقت تاليا على هذا الوضع ايام مريضه .. وبقيت اني هنا انتظر اشوكت تجي امي وتاخذنا .. بس ماكو.
خليني احجيلكم اشويه عن امي .. !
من وعيت على امي وهي تحب اللبس تكشخ كل يوم امي كانت جميله لدرجه متنوصف .. وبابا ... بابا كان فقير بيتنا كان صغير وقديم !
كل يوم كانو يتعاركون بالليل كل يوم وتنتهي بأنو بابا يلزمها ويضربها .. اذكر لما ماما صارت حامل بأختي كامت تبجي وتلطم ،  كان عمري 5 سنوات واني اشوفها تصعد ع الكرسي وتنزل كنت مفكرتها دتلعب!!
بعدين لما ولدت اختي كالت لبابا انو هي سوت المستحيل حتى تقتل الطفل لانها متريد طفل ثاني منه!!
اول ما ولدت عافت اختي وراحت وبقى بابا هو الي يعتني بينا .. الى ان بدا يطلع من الصبح ويقفل الباب عليه اني واختي!!
اني اخذت دور الام الها ابدللها واغسلها وارضعها .. ومرات لما تبجي اكعد ابجي وياها..!!
بابا كان يجي بالليل مااعرف اشبي ينام بملابسه حتى الحذاء مينزعه .. وهكذا يطلع ثاني يوم الصبح!!
الى ان فد يوم كعدت الصبح لكيته معلك بالمطبخ وحبل ملفوف على ركبته!!
ما اطول عليكم ....
بابا مات او بالاحرى (انتحر)!
رجعت ماما لما عرف بالخبر اخذتنه وياها بقينا يمها كم يوم هي كانت عايشه ابيت اهلها .. حالتهم الماديه زينه من اروح البيتهم كنت ابقى صافنه ع البيت اشكد كبير من الخارج !!
بس جدو ابوها ما كان يحبنا ابد حتى ميخلينا ندخل للبيت .. !

المهم .. بقينا يمهم كم شهر بعدين صارت مشكله بين ماما وابوها .. اخذتنا اني واختي بالسياره بالليل ... نزلتنا يم الكنيسه وكالتلي كلمات لحد هسه يرنن بأذني.....
( ديري بالج على اختج انتي صرتي امها هسه )!!!!!!!!!
بعدها كالتلي اكعدي هنا لتتحركين وعافتني وراحت .......!
هههههههه اكو هيج ام؟!!

المهم ... بقيت بالكنيسه كم يوم بعدها نقلوني للميتم .. شفت اطفال من كل الاعمار عشت وياهم ونسيت اهلي مع الوقت ... بس بقت اختي تاليا شاغلتني .. هواي ايام مرت مخلوني اشوفها .. كل الي اسمعه لما اريد اشوفها ( مريضه ومو زين عليها اتزوريها)؟!!

بقيت على هذا الحال شهر ... مشموره بالميتم واختي مااشوفها الا من بعيد لانو كالولي بعد هذيج الليله ، تاليا اتمرضت صار ما عدها مناعه فـ
بقيت بعيده لسلامتها بس گلبي يتكطع عليها ..
الى ان فد يوم كعدت الصبح سمعت هوسه وخبصه بالميتم .. طلعت من الغرفه الي نايمه بيها اني والبنات .. !
الهوسه كانت يم الغرفه الي بيها تاليا اختي!!
حسيت شعور غريب وقتها احساس وجع گلبي .. مااعرف لويش حسيت تاليا راحت للابد..!
بدون وعي ركضت لغرفتها من بين الناس .. دفعت نفسي بكل قوه حتى افوت من بينهم واوصل لاختي ، بداخلي كنت ادعي يا رب ميكون صارلها شي.... مريت من بين رجلين الناس الي واكفه والاطفال .. دخلت للغرفه لكيت عمو امين شايل شي ملفوف بقماش ابيض بيده!!!
باوعت بعيونه بنظره رجاااااء انو ميكون اللي ابالي صح !!
بس عمو امين من شاف الدموع بعيوني ابتسم بوجهي وكال ....

العم امين .. داليا حبيبتي لتبجين اختج راحت يم الرب !!!!!!!!!!!!!!!!!

لاااا لاااا اريد تاليا اريد اختييييي ، بقيت لازمه رجل عمو امين بكل قوه وابجي ... بس البجي ميرجع شي!
فقدت جزء مني ، العائله الوحيده الي بقتلي فقدتها ... المن عايشه بعد؟!
مرت ايام اني لا اكل ولا شرب بس بجي !
حاولو وياي كل الي بالميتم بس ما فاد .. الى ان فد يوم اتخربطت بسبب الجوع لانو مااكل ابد ، اخذوني للمستشفى مااعرف شنو طلع عندي بس الي فهمته انو بسبب سوء التغذيه والارهاق صار هشكل!

بعد ما رجعنا من الدكتور عمو امين اخذني لحديقه كولش حلوه وكبيره ، بقى يحجي وياي عن اختي تاليا واشون الرب يحبها واختارها حتى تروح يما؟!
بقى يحجي وياي هواااااي ، وفهمني انو الي دااسوي ديعذب تاليا وهي بقبرها ، وانو اذت اريد اسعدها واريحها لازم احقق كل الي ابالي واخليها تفتخر بيه !
كلامه هدئمي نوعاً ما وغير من نفسيتي لانو اقتنعت بكلامه ، بس بقى موت تاليا غصه بگلبي كل يوم اذا مااتذكرها وابجي ما انام.

بعد سنه تقريباً سجلت بالمدرسه ، عمو امين سجلني بمدرسه تابعه للكنيسه وقريبه منها هم بديت اتأقلم ويا الوضع !
كنت شاطره نار واحب الدراسه والمدرسه ، بصراحا شفت راحه بالميتم مشايفتها قبل حتى ويا اهلي معايشتها .. !

بالميتم صار عندي 2 اصدقاء مقربين بنت اسمها سلمى و ولد اسمه داني حبيتهم هواي وعلاقتنا صارت اكثر من اخوه نكعد سوه ، ناكل سوه ، نروح للمدرسه سوه ، نقرا سوه يعني حياتنا صارت وحده طول النهار ويا بعض بس بالليل داني يعوفنا و يروح ينام لانو بالميتم فاصلين الولد عن البنات.. سلمى و داني هم الي صبروني ع الي صار ، هم الي خلوني انسى اختي وساعدوني اكمل حياتي .. لو ما هم وياي كان اني متت من زمان .. بس وجودهم بحياتي كان رحمه من الله دزها الي.

بصف سادس ابتدائي شكلي بدا يتغير ومفاتني بدت تبرز اكثر ، والعيون من حواليه نظراتها بدت تخوفني !
مرت السنين و صرت بالاعداديه حالياً وعمري 19 سنه المفروض اكون بالكليه حالياً بس  لانو تسجلت متأخر سنه بالمدرسه اتأخرت بالتخرج!
رحت سادس علمي لان هواي كنت اتمنى اصير دكتوره اطفال حتى اعالج الاطفال الي مثل اختي تاليا..!
ان شاء الله يساعدني واحقق هذي الامنيه ، طبعاً شكلي اتغير جذرياً .. صرت احلى من قبل بهواي ..
شعري كان اسود  طويل حيل حد نهاية ظهري كولش ، عيني لونهم اصفر فاتح على خضار يعني لون غريب وحلوو رموشي طوال وكثيفه وعيوني مسحوبات ع بالك عيون بزونه حتى بالميتم كانو يسموني بزونه بسبب عيوني!
بشرتي كانت بيضه ثلج ، جسمي رشيق مو مليان بس بترتيب يعني مخصر مو نشاز ، طولي 158سم
كنت حلوه وخدودي مدبدبات ولونهم وردي بالطبيعه ، يعني كل الي يشوفني يبقى صافن بوجهي ، اشكد اكره هذي الحاله احس نفسي من غير كوكب.. بس الي كرهني بشكلي اكثر انو كنت كولما اباوع بالمرايه اشوف وجه ماما ...!
لانوو حييييييل اشبها ، نسخه منها ، مرات اشوفه دتباوعلي من المرايه وتبتسم ابتسامه غريبه بوجهي !
وهذا الشي خلاني اكره شكلي والشبه الي بينا ، والسبب الثاني انو شكلي سوالي هواي مشاكل بالميتم وبالمدرسه .. لانو كل الي يشوفني يتحرش بيه ، كرهت روحي لدرجه فكرت انتحر واخلص من نظرات الناس الحقيره الي اشوفها بعيونهم!!
طبعاً المدرسه الي كنت اداوم بيها ابتدائي انهجرت تماماً وتحولت لمقر عسكري بسبب الحرب الي مرحمت احد!
فد يوم رجعنا اني وسلمى من المدرسه .. وشفنا هوسه يم باب الميتم!!
وحده باوعت بوجه الثانيه بخوف وكلنا بوقت واحد .... (داني) .. لانو بيوها خو كان ممداوم ... ركضنا للميتم بكل سرعتنا ... لما سألنا شنو الي صاير ولويش هذي الهوسه ؟!
وحده من البنات كالت انو اكو ولد من الي بالميتم منفجره عليه عبوه ومتصوب .. وناقلي للمستشفى حالته خطره؟!!!!
كلبي نغزني على داني .. دخلنا بسرعه اني وسلمى ندور عليه وماكوووو ، ركضت لعمو أيمن سألته عنه !!
كالي اي داني الي متصوب وحالياً هو بالمستشفى العسكري الي يمنا لان اصابته كانت خطره فأضطروا ينقلو لاقرب مستشفى!!
ردنا انروح بنفس اللحظه المي وسلمى ، بس العم أيمن حذرنا ..!
كال اي وحده تروح تتعاقب ، لانو المستشفى مو عام ولا حكومي ، المستشفى عسكري والاجراءات تمنع دخول المدنين!!!

عفنا العم امين ورحنا الغرفتنا بس النار مشتعله بيه على داني ، مااكدر اكعد لازم اشوف طريقه حتى اوصله!!
بقيت اروح واجي بالغرفه وعقلي تعب من التفكير.. الى ان اجتني فكره؟!!

داليا .. سلمى اشون يعني نبقى كاعدين وساكتين منعرف شي عن داني؟!!

سلمى .. شنو بأيدنا يعني يا عيني مو سمعتي العم ايمن شنو كال واشلون حذرنا؟!!

داليا .. ايييي وانتي ترديني اكعد وانتظراشوكت يجيبون خبر موته؟!!
لج سلمى هذا دااااااني شنو نسيتي ، هذا اخونا اشون نعوفه بهيج وضع لازم نروح نتطمن عليه؟!!

سلمى .. يعني شتردين اسوي ماكو حل غير انو ننتظر!

داليا .. لازم اكو حل ، ولازم انروح نشوفه واليوم.

سلمى .. انتيي اكيد تخبلتي لج داليا تردينا نتعاقب؟!

داليا .. انتي حتبقين طول عمرج جبانه ، ابقى هنا اني رايحه.

سلمى .. لج وين رايحه الدنيا الليل تردين اتموتين انتي ، هسه بس يشوفوج الحرس يرموج ع بالهم ارهابي ، داليا الله يخليج اسمعي الكلام واكعدي.

داليا .. يبووووو انتي ميفيد الكلام بيج ، اني رايحه.

عافت سلمى بالغرفه تترجاها حتى متروح وطلعت ع كيفها حتى محد يحس ...!
لبست بنطرون جينز ازرق وتيشيرت اسود ورفعت شعرها ليفوك .. وطلعت ..!
تمشي وتتلفت وراها ، اخاف احد يطلعلها بهاليل ... بقت تمشي تمشي الى ان وصلت للمستشفى (المدرسه القديمه)
وصلت يم السياج شافت الحرس ديخابر ملتهي وناسي روحه اصلاً!!
بهدوء اخذت كم حجاره شمرتها بعيد عن الباب سمعها الحارس وراح يشوف شكوو .. اني استغليت الموقف ودخلت !!
رغم انو الاضاءه بالمعسكر كانت كولش قويه ( بلوجكترات) بس اني بقيت لازكه بالشجر حتى محد يشوفني!
المهم ..
دخلت واني مااعرف وين اروح ما اندل اي شي ، ولا اعرف وين موجود داني بأي غرفه بأي طابق الاول ، الثاني؟!!
بقيت امشي واباوع الي مكتوب ع البيبان .. دا امشي بين الحشيش والاشجار .. مااشوف الا چلب صار اسنانه ويريد يفترسني كدامي!!!!!!

حسيت گلبي وكف ساعتها ، لا اكدر اركض يكشفوني !!
ولا اكدر ابقى بمكاني الچلب حيهجم عليه بأي لحظه ويفترسني!!

بدون وعي مني .. من الخوفه والرعبه ركضت بكل قوتي ... بدون تفكير كلت خليهم يلزموني يموتوني بس كون اخلص من خذا الجلب المتوحش الي كدامي ...!
بقيت اوكض بالظلمه لان ماكو اناره بهذي المنطقه ، كل سرعتي كضت وهو ينبح بظهري ، اول ما التفت وجان اشوف 2 چلاب بعد ويا يركضون ورايه ......!
بدون اي وعي مني باوعت اكو باب كدامي وصلت يمه فتحته ودخلت!!!!

الغرفه كانت ظلمه وهدوء .. بقيت اللهث مثل الغركان الي روحه دتطلع .. بقيت اتنفس بقوه وساده الباب بكل قوتي لا يدخلون الچلاب ..!!

ما احس الا صوت ورايه يكول ... ارفع ايدك ولتتحرك!!!!!!!

هنا اني ذره دم ما بقت بيه .... خلص كلت انتهيت ع بالهم اني ارهابي ..... بقيت ساكته من الخوف الكلمات متطلع مني حتى اجاوب !!

بلحظه وحده سمعت صوت مسدس دينسحب ورا راسي!!!!!!

بدون وعي مني صحت لااااا لتضرب لاا....!

مرحبا حبايبي شخباركم ❤️
اسفه اتأخرت عليكم بس البارت طويل فأخذ وقت
اعرف اشويه بي احداث تملل بس هذي البدايه لازم اسرد حياة الشخصيات اتمنى تنطوني رأيكم بالبارت ، وتوقعاتكم للاحداث القادمه🤗
احبكم 😘😍