رواية في ارض الغرام انت دولتي الفصل الخامس والثلاثون 35 - بقلم ﮼الاميره،الموسويه 👑

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

داليا .. بصدمه و صوت يرجف بالكوه طلع من عندي ... اسيد!!!!!!!
وجهه مليان غضب .. من شافني ارتبك .. اني حسيت گلبي انفجر .. اي انفجر من شفت اسيد طالع من غرفتها .. محجيت شي درت وجهي وركض لغرفتي!

اسيد .. صعدنا اني وداليا هي نامت واني بقيت كاعد عندي بحث يردو بالدوام مني ودااكمله ع الابتوب .. اتأخر الوقت واني كاعد نعست كلش وعطشت!
فتحت الثلاجه ملكيت مي بس ثلج!
اشون شغله هاي هسه شينزلني اني .. لبست التشيرت مالتي ونزلت .. البيت هدوء والكل نايم .. رحت للمطبخ دااشرب مي وچان اسمع صوت ورايه التفتت لكيتها ايمان!!!!
باوعتلها بغضب وبصوت حاد ..

_شعندج هنا؟!!!!

ايمان .. اسيد .. اني .. اني .. اريد احجي وياك.

اسيد .. روحي لغرفتج احسنلج.

ايمان .. اتقربت منه ولزمته من ايده .. عفيه اسيد اني مرايده منك شي .. بس اريد اعتذر منك ع الي صار..!
بس والنبي مو اني الغلطانه هي الي اتجاوزت عليه.

اسيد .. ا م ش ي ولي لغرفتج دااكول.

ايمان .. ما اروح من ولا اتحرك خطوه وحده اذا متسامحني وتقبل اعتذاري.

اسيد .. صفنت عليها .. الدنيا الليل والكل نايمين وهاي صوتها يلعلع .. لتروح تسمعها بلوة حياتي وشيخلصنا بعد؟!!!
بصوت حاد و من ورا خشمي ..

_مسامحج و روحي لغرفتج.

ايمان .. يعني هسه انصالحنا موو ؟!

اسيد .. باوعت عليها خزرتها .. هي بسرعه راحت صعدت ، اني بقيت اشويه بالمطبخ اكلت فاكهه و بعدين اخذت المي وصعدت لغرفتي ، اول ما وصلت يم غرفتها سمعت صوت حجي بس همس و ضحك!!!
هاي ويامن تحجي؟!!
محد يمها بالغرفه بس هي .. ومو صوت تلفزون هذا .. ماكو غير .... اول ما خطرت الفكره على بالي دمي فار .. صح هي متعنيلي شي بس تتسمى مرتي وشايله اسمي كدام الناس!!
بدون اي تفكير فتحت الباب ودخلت .. لكيتها متمدده ع السرير وتخابر!!!!!!!
اول ما شافتني ضمت الموبايل بسرعه و وجها صار لونه اصفر الرعب انرسم على ملامحها .. وهنا اني كل شكوكي اتأكدت!!
محجيت ولا كلمه سديت الباب واجيت يمها .. جريت الموبايل فتحت المكالمات لكيت اخر مكالمه قبل كم دقيقه!!
ماكو اسم بس رقم .. سويت اعادة مكالمه واتصلت ع نفس الرقم .. بسرعه رد .. صوت ولد

_الوو حبي وين رحتي!!!!

رفعت راسي باوع بوجهاا هي صافنه عليه وترجف رادت تحجي اشرتلها بأيدي وخزرتها .. سديت الموبايل بس اني كل ذره بيه ترجف غضب .. صارت كدامي علياء مو ايمان الي كاعده !

بصوت حاد وهادئ ..

_منوو هذا؟؟؟؟

ايمان .. ترجف متكدر تنطق من الخوف!

اسيد .. اتقربت منها اكثر وبصوت اكثر حده وغضب .. لتخليني اعيد الكلام مرتين ..

ايمان .. بصوت يرجف وكلمات متقاطعه ... ممـ..ا .. ما .. اعر.. فف.. ـه .

اسيد .. اهااا .. ماشي .. هسه نتأكد.

فتحت الموبايل رحت ع برنامج تسجيل الصوت .. ورجعت اتصلت عليه .. رنتين وجاوبني ...

_الوو يمعوده وين ترحين .. الووو!

اسيد .. اشرتلها بأيدي اشاره بمعنى احجي .. هي صافنه بوجهي وترجف وتأشرلي بأيدها .. لاا!
خزرتها بغضب .. هي من شافتني بسرعه حجت ..

ايمان .. أأ..لـ.. وو .. اللووو .

الولد .. اشبيج اتبلعمين شكوو .. شنو اجه احد؟!

ايمان .. هااا .. لاا .. مما .. ماكوو احـ.. دد بببس .. نعست.

الولد .. اهووو يمعوده بعدنا ببداية السهره شبسرعه؟
ديلا اني هم اروح انام وباجر انعوض عود.

اسيد .. اني اسمع واحس گلبي يريد يطلع من صدري بكد الغضب الي دااحسه .. سديت الخط بوجه العار صاحبها وخليت الموبايل بجيبي .. باوعتلها هي ترجف ومدنكه راسها .. ع بالها راح اضربها لو اقتلها خلاص .. وهو هذا فعلاً الي فكرت بي وقتها .. بس اتذكرت داليا وابني وامي المن اعوفهم .. حتى لو القانون وكف وياي فأهلها راح يصيرون شرفاء وميسكتون .. مخفت على نفسي ابد بس خفت على اهلي شنو مصيرهم!!
وهل يا ترى وحده ساقطه مثل هاي تستحق اضيع حياتي على مودها؟!!!
صافن افكر والغضب ديحرك بيه حرك .. باوعتلها وبصوت حاد ...

_باجر من الصبح تاخذين ملابسج وتخابرين اهلج يجون ياخذوج .. اتكليلهم اريد اتطلك وما اشوف خلقتج حتى بالمحكمه!

ايمان .. وهي ترجف وتبجي .. فدوه اسمعني انت فاهم الموضوع غلط انـ...

اسيد .. كلمه زايده منج اخلي التسجيل بيد ابوج الشريف .. لتضطريني اسلك هذا الطريق وسوي الي كلته.

عفتها وطلعت بس اني ارجف ارجف غضب .. خيانه .. ما ادري ليش مشهد علياء دينعاد!
طلعت منها وچان اشوف بلوة حياتي واكفه كدامي .. شافتني طالع من غرفة هاي العار!!!!
اووووووووووف يا ربي شراح اكللها؟!
وشنو الي يقنعها هاااي ؟!!
بس ما اكللها ع الي صار مستحيييل !
صح ايمان وحده قذره وتستحق الموت بس ما افضحها لان اذا عرفت الداليا مراح تسكت .. اكيد اتكول الامي وامي اذا اجو اهل ايمان وهددو راح تحجي متسكت .. و راح تنفضح .. اهلها اذا عرفو يذبحوها.. و دمها يصير بركبتي!
واذا فضحتها الله اكيد راح يعاقبني اذا مو بمرتي ببنتي في يوم من الايام ..!!
هاي اني اشصارلي .. معقوله اني افكر هشكل؟!!
لا استغفر الله .. الله مياخذ احد بذنب غيره .. بس مع ذلك مراح احجي الاحد اطلكها وخلص !
احجي ويا نفسي مثل المخبل .. افكار غريبه عجيبه دتفتر ابالي .. لدرجه حتى اني استغربت من حالي!

بس المشكله داليا اشلون بيها شراح يقنعها؟!!

رحت لغرفتنا لكيتها واكفه يم الشباك ومطيتني  ظهرها .. سديت الباب واتقربت منها .. مديت ايدي اريد احظنها .. وخرت من يمي بسرعه!!!

_داليا ...؟!!

داليا .. صار اكثر من 10 دقايق واكفه وگلبي ديحترك اريد ابجي بس ادموعي من الصدمه جفت!
المنظر ميفارك عيني .. مدااصدك اسيد ..... يروح لهاي؟!!!
بعد كل الي اتحملته منه وكل الي سوا بيه والعذاب الي عشته وشفته يلا خليته يتقبلني بحياته .. تجي هذي بهالسهوله وتاخذه !!!
وهو بهالبساطه يتجاوب وياها .. لا ويروح يمها؟!!
مااعرف وقتها حسيت نفسي اغبى كائن على وجه الارض .. مفكرت بأي شي غير انو اسيد راح يمها لسبب واحد !
والا شنو الي يخلي ينتظرني لما انام يلا يروح؟!
وشنو  الي يخلي يروح لغرفتها نص الليل؟!!
ماكووو غير .... اي .. اي .. اباوع على اديه ترجف .. جسمي كوله انتفض ويرجف .. هسه اني ممسويه شي لويش داارجف؟!!
بعدني بهالحال چان يدخل الافندي!!
وبكل برود يحجي ؟!!

محجيت ويا شي ابتعدت عنه واني ساكته بس بداخلي بركان يريد ينفجر!
رحت للميز فتحت الجراره وسويت نفسي داادور عن شي اني اصلاً مااعرفه شنو .. بس ردت الهي نفسي بأي شي حتى ماانفجر بوجهه والدنيا الليل وتصير مشكله!
خليها للصبح اخذ جنطتي واروح واذا شاف وجهي بعد اني مو داليا .. بقيت ابحوش جان يحجي ..

اسيد .. ويامن دااحجي اني ؟!

داليا .. ولا كأنو اسمعه .. سديت الجراره ورجعت لفراشي اريد انام بلكي يسكت عني .. مريت من يمه چان يلزمني من ايدي .. ويباوع بوجهي ...

اسيد .. داللغيييييي ياااج..

داليا .. سحبت ايدي منه بقوه ودفعته .. وبصوت حاد بس بهدوء ..

_واني ما عندي كلام وياك.

اسيد .. استغفر الله .. داليا لتخبليني بنص الليل .. هسه انتي شنو فهمتي .. اشبيج متكليلي؟

داليا .. لااا صدووك؟!!
متعرف اشبيه؟!

اسيد .. سألتج لتجاوبيني بسؤال!

داليا .. اسيد لتخبلني شنوووو كنت اتسوي بغرفتها؟!
شعندك ويا ايمان؟!!

اسيد .. ولا شي.

داليا .. !!

اسيد .. انتي فاهمه غلط ..

داليا .. اوك فهمني الصح شنو؟!!!!

اسيد .. عطشت ونزلت اشرب مي .. صعدت صاحتني ايمان رقم غريب ديتصل عليها ومتكدر اترد .. دخلت شفت منو وطلعت .. هذا كلشي.

داليا .. هه .. وانت متكدر اترد الا بغرفتها؟!
واذا الرقم غريب لويش منطته رفض .. شكو نص الليالي تصيحك لغرفتها؟!
شعندك يمها اسيد جاوبني؟؟

اسيد .. انتي شنو تحققين وياي؟!!

داليا .. بلي احقق وياك .. واذا متكولي شعندك رحت  يم ايمان هسه اعوفك واروح.

اسيد .. بعصبيه .. لج انتي مخبله؟!
دااكلج رحت اشوف منو ديتصل بيها جاوبت محد رد عفتها وطلعت .. وحضرتج شفتيني !

داليا .. ههه انت شنو شايفني طفله كدامك لو غبيه تضحك عليه بكذبتين واصدكك؟!!

اسيد .. انتبهي لكلامج داليا.

داليا .. لاا والله؟!!
وانت الي تعصب؟!!
ماشي اسيد براحتك .. بس حدي وياك للصبح اذا لكيتني هنا عاتبني.

اسيد .. بصوت حاد وغضب .. داليا لتتخبلين كلتلج ما عندي شي وياها ليش متصدكين؟!
عوفي هاي اخبالاتج وامشي نامي مو زين ع الطفل السهر.

داليا .. هو هذا الي هامك .. الطفل؟!!
واني شنوو حيوان ؟!
ماشي .. حنام مثل متريد بس خلي ابالك باجر تكعد متلكاني!

اسيد .. انتي شدتحجين .. اكيد اتخبلتي ؟

داليا .. الي سمعته .. .. بعدت عنه خليت راسي وسويت روحي نايمه لحد مينام واطلع .. هو بقى مثل الصنم واكف بمكانه !

اسيد .. يا ربي شنو مسوي بحياتي حتى ينشلع گلبي هيج و الراحه مااشوفها ؟!
جريت الكرسي وكعدت احرس الخبله هاي .. اعرفها كلشي تسوي واذا كالت اتروح فعلا اتروح لان مو اول مره الها .. عدها تجارب واني شاهد!
كعدت ع الكرسي مگابلها وادخن للصبح منمت ولا غمضتلي عين!
افكر بداليا اشلون اقنعها ماكو شي بيني وبين الحقيره ايمان .. واشلون اتخلص من ايمان واطلكها بلا مشاكل؟!
اتذكرت موبايل العاار بجيبي .. فتحته مابي رمز!!
دخلت ع الرسائل وشفت العجب!!!
رومانسيات وكلام اسخف من السخيف .. طلعت العار حتى مسويه ويا علاقه!!
من هذا اصرت انو اتزوجها رغم اني كلتلها متزوج ومراح يصير بينا شي!! اكيد رادت اتزوجها فتره وترجع الاهلها ع اساس كلشي بينا كان طبيعي .. حتى من اطلكها محد يشك بموضوعها...!!!!
كل هذي الفتره مستغفلتني الساقطه واني ما ادري؟!!
الغضب اتملكني .. وردت اروح اقتلها خلاص .. بس اتعوذت من ابليس .. اذا ماتت يسووها براسي ام الشرف!
سكتت كلت اتروح الاهلها وادز ورقتها وراها اني اصلاً ممعتبرها مرتي ولا تهمني اصلاً .. الي قهرني اشلون تضحك عليه!!
بس اني اعلمج خلي اخلص من سالفة داليا هسه واتفرغلج الا اخليج تتمنين الموت.
بقيت اگلب بالموبايل وادخن الى ان طلع الصبح .. احس راسي صار خشبه من كد التفكير!
سمعت صوت ام عادل جوه بالبيت نزلتلها .. كلتلها عينج على داليا واذا خطت خطوه بره البيت متلومين غير حالج!
صعدت لكيتها بعدها نايمه .. مددت ع الفراش ونمت ... ما كعدت غير الدنيا الظهر محد بالغرفه بس اني!!!
بسرعه كمت من الفراش ونزلت .. بعدني ع الدرج سمعت صوتها تحجي بغرفة امي !
اااافففف جريت نفس .. ورجعت لغرفتي .. اريد ادخل چان احس واحد ورايه اندرايت لكيتها ايمان!!!!!
ردت اخنكها واموتها خلاص .. بس  لزمت نفسي لا تطلع بلوة حياتي وتشوفنا .. خزرتها وبصوت حاد بس همس ..

_اني شكلتلج؟!!

ايمان .. الله يخليك اسيد .. لتوديني الاهلي والله ابويه واخوتي يذبحوني اذا رجعت.

اسيد .. اسمعيني لج .. كدامج خمس دقايق اذا شفت خلقتج بالبيت اني الي اذبحج مو اهلج .. والي يحجي اراويه طياح حظج يا سگط!

ايمان .. اتقربت منه ولزمته من ايده .. فدوه اسيد ابوس ايدك .. ابوس رجلك .. والله يذبحوني والله .. صارلي شهر واتطلكني .. فدوه الله يخليك بداعت ابنك .. لتموتني بداعت داليا ..!

اسيد .. لزمت ايدها اريد ابعدها عني ... وچان ينفتح الباب ..... وتطلع داليا من غرفة امي!!!!!!!!!!!!!
شافتنا ..... !!
اول ما شفتها دفعت ايمان ورحت الها اريد افهمها .. هي ركضت بسرعه نزلت من الدرج ... هي نزله وهي وكعه!!!!!!!!!!!!
اني شفتها وكعت ... واني واحد اخذ گلبي من مكانه!!!!
بقيت صافن عليها مااكدر اتحرك .. جسمي يمكن انشل .. سمعت صوت ام عادل وهي تصيح!!
طلعت امي تركض .. نزلتلها اني تمثال و واكف ما احرك ساكن .. شفتهم يصحوون بيها .. وام عادل تغسل وجهها بالمي .. امي من شافتني جامد مااتحرك صاحت بيه .. فزيت!!
نزلت اسحل بخطواتي .. لكيتها نايمه ع التخم بس بوعيها مبيها شي!!
حجت امي ..

ام عادل .. دكتور شوفها شنو اليوجعها خاف صار للطفل شي خلي ناخذها للمستشفى؟!

داليا .. الصبح كعدت لكيته نايم يمي .. ردت اخذ ملابسي واروح كلت ابقى يم سلمى كم يوم .. بعدين فكرت سلمى هي مشاكل اهل رحلها مكفيتها انوب اني؟!
واسيد مستحيل يخليني اروح يدفني اني وابنه ولا يعوفني.. قررت اول ميكعد اكوله لو اني لو ايمان بالبيت .. يطلكها وهو اذا ما عنده شي وياها اكيد راح يسوي الي اريده!
غسلت وجهي ورحت للحجيه اشوفها شمحتاجه .. بقيت يمها اشويه سولفنا وضحكتهي بسوالفها الحلوه .. طلعت من عدها اريد اروح اكعده واحجي ويا .. چان اشوفه واكف هو وياها يم باب غرفتي .. هو لازمها من ايدها وهي تقريبا صايره بحضنه!!!
اني شفتهم .. لو حسيت روحي دتنسحب مني!!
شفته اجه عليه .. بدون وعي شردت منه .. نزلت الدرج بسرعه قبل لا اوصل بدرجتين يمكن رجليه انلوت و وكعت!!
الحمدلله الوكعه صارت برجلي مو ع بطني .. متأذيت بس گلبي احسه دينزف .. وجع بگلبي فضيع .. حتى ابني الي اعز من روحي مفكرت بي .. كل الي ابالي الي شفته!!
هو مشفته من وكعت الا بعد كم دقيقه يلا نزل .. الظاهر كان مشغول بحبيبة الگلب ..
حتى لما نزل محجه شي ولا كأنو وكعت كدامه ولا كأنو صاير شي!
كالت ام عادل اخذوها للمستشفى ..
كلتلها ابصوت مخنوك ..

_مبيه شي ام عادل والوكعه مو قويه كم بايه بس ان شاء الله ما صار شي للطفل.

الحجيه .. اشوكعج يمه مو هستوج جنتي يمي ما بيج شي شجاج؟!!

داليا .. داانزل ودخت مااعرف شصارلي !

الحجيه .. يمه اسيد اخذ مريتك للمستشفى خلي نتطمن عليها.

اسيد .. ام عادل جيبيلها شي تلبسه.

داليا .. مااروح لتجيبين شي ام عادل.

اسيد .. باوع لام عادل بمعني سوي الي دااكلج عليه .. راحت ام عادل جابت حجاب و مثل الجبه لبستها فوك التراك .. كلتلها كومي يلا ..

داليا .. مكمت .. ولا جاوبته اصلاً.

اسيد .. داليا كومي دااكول.

الحجيه .. شافت داليا متحجي ويا عرفت صاير شي بينهم .. حجت ويا داليا ..

_كومي بنيتي خلي يفحصوج لا صاير بطفلج شي .. كومي بعد امج كومي لخاطري.

داليا .. حجيه مبيه شي صدكيني قابل اتخافون على ابني اكثر مني .. بس صدكيني مبيه شي اشويه رجلي توجعني وهسه تطيب.

اسيد .. كومي داليا .. انشوف الطفل ونرجع .

داليا .. هه كل همه الطفل وبس!
شفت الحجيه دتترحاني بعيونها مردت اكسر خاطرها .. سندت نفسي ع التخم وكمت اول ما دست على رجلي ألم فضيع صار بيها .. رجعت كعدت بسرعه!!

الحجيه .. اسم الله بنيتي اشبيج؟!

داليا .. رجلي توجعني .. ااااه .. مااكدر امشي خلوني كاعده.

الحجيه .. يا يمه اشلون انخليج وانتي هاي حالتج كومـ..

اسيد .. امي تحجي وهاي معانده متقبل اتروح .. اتقربت عليها ردت اسندها واخذها للسياره لان رجليها توجعها متكدر اتدوس عليها .. دنكت اري الزمها چان تدفعني !!!

داليا .. وخر عني ولتلزمني انت.

اسيد .. بغضب .. داليا ....

داليا .. اذا اتريد اروح للمستشفى وخر عني ولتتقربلي .

اسيد .. راد يحجي بس الحجيه اتدخلت ..

الحجيه .. ام عادل كومي داليا انتي وروحي وياهم للمستشفى!

ام عادل .. صار حجيه .. كومت داليا وسندتها لحد السياره دخلتها وصعدت يمها كعدن ليوره!

اسيد .. سكتت عن الي سوته لانها معصبه وحقها .. محجيت شي اخذتها للمستشفى نزلت هي وام عادل دخلنا .. فحصتها الدكتوره كالت الطفل حالته كلش زينه وماكو اي ضرر للوكعه عليه .. بس رجلها احتماال تكون مخلوعه او انفصخت من الوكعه يعني خلع بسيط!
لفوها الها بباندج وانطوها مرهم تخلي عليها ورجعنا .. وصلنا للباب نزلت ام عادل كلتلها سدي الباب وروحي !
راحت ام عادل وهي بقت .. يمي رادت تنزل بس متكدر رجلها توجعها والباب قفلته من يمي!

داليا .. افتح الباب.

اسيد .. داليا بلا خبالات واسمعيني.

داليا .. ما اريد اسمع منك شي ونزلني.

اسيد .. بغضب .. اتسمعين وغصباً عنج!

داليا .. غصباً عنك انت ما اسمع

اسيد .. ضبي اللسانج.

داليا .. نزلني كلتلك.

اسيد .. لج بابا انتي فاهمه الموضوع غلط خليني افهمج لخاطر ربج.

داليا .. تعرف شي؟!!
اني الغلطانه .. غلطانه لان انتظر من واحد مثلك يحس بيه !

اسيد .. اهاا وشبيه اني؟!!

داليا .. واحد مريض.

اسيد .. اهاا .. ماشي عالجيني.

داليا .. علاجك مو عندي روح لحبيبتك اتعالجك.

اسيد .. انتي حبيبتي.

داليا .. من العصبيه والغضب مسمعته شنو يحجي اصلاً ولا اريد اسمع.

افتح الباب دااكولك.

اسيد .. امممم الظاهر هذي الكلمه متعنيلج شي ..!

داليا .. انت كولك ع بعضك متعنيلي شيي .. ومن اليوم انت ولا شي بالنسبه الي سوي الي يعجبك ميخصني .. حعيش لخاطر اربي طفلي وبس.

اسيد .. عصب حيل وفقد اعصابه ... لج بابا انتي شدتحجييييييين كلتلج و الله ما عندي شي وياها وروح ابويه ما عندي شي وياها وكل الي دتشوفي انتي دتخلقي اني ماكو اي شي بيني وبينها.

داليا .. اي صحيح اني دااخلق الاحضان الي شفتها بينكم!
واني الي دااخلق طلعتك من غرفتها نص الليل !
اني مخبله شتسوي بيه طلكني !

اسيد .. بصوت عالي وعصبيه .. استغفر اللله لججج انتييي شنوووو من بشر دااحلفلج بروح ابويه .. لهدرجه اني كذاب بنظرج ومتثقين بيه؟!
لج ليش اتخربين كل الي بينا بسبب شي اصلاً ما له وجود!
طلكتها كدامج وبأذنج سمعتيني .. وحتى من البيت طردتها اذا شفتيها بعد كدامج الج حق .. والله العظيم ما عندي شي وياها والله والله والله!

داليا .. افتح الباب .

اسيد .. ههههه كل الي كلته ولا شي عندج مو؟!!

داليا .. مرديت عليه گلبي محروك منه .. خلي يحس الي دايسوي بيه !

اسيد .. ماشي .. فتحت الباب ونزلت من السياره دخلت وصحت لام علدل كلتلها روحي نزليها.
شافتني امي معصب رادت تحجي وياي تعرف شصاير بس اني منطيتها مجال صعدت بوجهي لغرفة ايمان اريد اشوفها بعدها هنا لو لا؟!
صعدت لكيت الغرفه فارغه .. وملابسها ماكو!
ايييي يعني ولت الحمدلله!
رحت لغرفتي سبحت وطلعت لكيتها مدده ع الجربايه .. ودايره وجهها عني!
اجيت كعدت يمها .. وبهدوء حجيت وياها

_اشلون صرتي؟!

داليا .. مجاوبته.

اسيد .. داليا .. تدرين بيه اكره هالاسلوب من احجي وياج جاوبيني.

داليا .. وخر عني.

اسيد .. استغفر الله انتي وتالي وياج؟!!

داليا .. كعدت وانداريت عليه .. اسمع اسيد .. ترى باقيه وياك هنا لخاطر ابني و لاني اعرفك مراح اتعوفني بحالي فماكو داعي اتعب نفسي واشرد منك .. بس خلي ابالك اني حرمت عليك وانت حرمت عليه اتعامل وياي على هالاساس و بس.

اسيد .. شنو شنو .. شنو حرمت عليك انتي اكيد اتخبلتي.

داليا .. اييييي اتخبلت .. ورجاءاً لتخليني اشوفك اذا ممكن لان كولما اشوف وجهك اقرف.

اسيد .. غضب الدنيا كله اتلبس بي لحظتها .. بس كتم غضبه لان يعرف نتائج هذا الغضب شنو!!
سكت عنها وطلع ... من يومها مشافها بعد ولا صعد لغرفته .. حتى اغراضه وملابسه نقلهن لغرفة المكتب مالته الي بالحديقه .. وحتى بالصاله ميكعد لان كلامها ويا اخر مره قهره صحيح هو غلطان بس ممتوقع انو فد يوم احد يحجي ويا بهالطريقه وراح يضطر يسكت .. والي دمره اكثر .. الشخص هذا داليا .. مر اسبوع وهم ع هالحال ..
فد يوم اسيد كاعد وچان يرن موبايله ..

_الوو حضرتك  كتور اسيد؟!!

اسيد .. نعم منو وياي؟!

المتصل .. اخي احنا من المستشفى اكو مريضه عدنا تقربلك صارلها اربع ايام متوفيه ونتصل على زوجها ميرد .. اليوم دكتور ابراهيم انطانه رقمك وكال انو حضرتك قريبها.

اسيد .. شنووو شدتحجي حضرتك شنو صارلها اربع ايام متوفيه وهسه يلا نعرف؟!!

المتصل .. اخي اتفضل للمستشفى وهناك يفهموك كلشي .

سد الخط عافني بصدمتي ... امه شنوو اكللها .. جهالها اشلووون ميجون يشوفون امهم؟!!
هي هاي نهايتج ايناس تموتين وحيده ومحد يدري بيج!
لبست وطلعت للمستشفى گبل .. دخلت لصديقي د. ابراهيم حجيت ويا وفهمني كلشي!

كالي بعد ما رحت انت زوجها هم عافها وراح وهي بقت تبجي ليل ونهار اتريد اتشوف جهالها بس كل مره يتصلون بزوجها ميرد اخر شي رقمه يطلع مغلق !
طبعاً اني معرفت بعذا الشي غير بعد وفاة خالتك لان كنت مجاز والا كان اتصلت بيك حتى تجي واليوم من اجيت بلغوني لان محد حضر من اقاربها فقررو يدفنونها .. بس اني انطيتهم رقمك وكلتلهم بيلغوك لان محبيت تسمع هالخبر مني.

اسيد .. ما ادري بكل هذا ولا ادري بزوجها عايفها .. اني هم صارتلي شغله والتهيت عنها بس متوقعت انو تموت حالتها كانت متعديه الخطر!

ابراهيم .. خالتك بصراحه ماتت من حرگتها على جهالها لان حسب ما سمعت المسكين حيل متعذبه بس تريد اتشوفهم!

اسيد .. هسه اشوكت اكدر استلم الجثه!!

ابراهيم .. بس اتكمل الاجراءات تستلمها بعد انت تعرف!

اسيد .. ماشي ابراهيم راح انطيك المعلومات وانت كمل الاجراءات اني لازم انطي خبر الاهلي واخوتها حتى اشوف اشلون يتصرفون !

ابراهيم .. صار ولا يهمك انت روح رتب وضعك واني اخلصلك كلشي منا.

اسيد .. طلعت منه واني مصدوم وممصدك الي سمعته .. وبنفس الوقت محتار امي اشلون ابلغها ؟!!
رحت بوجهي لبيت خوالي بلغتهم بألي صار .. صدمه للكل محد متوقع ايناس اتموت ومحد يعرف شنو سبب ترك محمود الها وهي بهذا الوضع؟!!
راحو هم للمستشفى واني رحت للبيت ...!

وصلت لكيت البيت مگلوب كلاب والصياح واصل للستار ..؟!!!!
يا ربي دخيلك شصاير .. نزلت ركض وگلبي احسه وكف من الرعبه .. شافوني الحرس .. البقيه بحياتك دكتور .. البقيه بحياتك دكتور؟!!
اريد أسألهم شكووو شصاير ما اكدر اللساني ثكل .. دخلت شفت كرار واكف .. من شافني اجاني حضني وضل يبجي ... اسيد ماتت اسيييييد  .. ولك خويه راحت امنا.....!!!!!!!

للحكايه بقيه 💔
اسسسسسسفه جداً ع التأخير واعتذر وان شاء الله البارت القادم حنزله الخميس تعويضاً الكم 💜
رأيكم بالاحداث وتوقعاتكم للبارت القادم .... لتنسووووووووون التصويت 🤗😘