رواية في ارض الغرام انت دولتي الفصل الرابع والثلاثون 34 - بقلم ﮼الاميره،الموسويه 👑

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

اسيد .. صفنت بوجهها بس احس گلبي ينزف دم من الغضب .. هاي شدتلغي؟!!
ردت احجي بس رجلها انفجر ..

زوج ايناس .. انتي اكيد الحادث أثر على عقلج ايناس ، خلي اصيح الدكتور يجي يشوف شدتهذين

ايناس .. هاي اكثر مره اني عاقله بيها .. والي دتسمعه هو الحقيقه .. اي الحقيقه الي صارلها سنين شايلتها حمل على ظهري .. بس بعد مااكدر لازم تعرف كلشي محمود (زوج ايناس اسمه محمود)

اسيد .. بغضب يا حقيقه هاي؟!
مو كاااافي ما مليتي من هالسم والخباثه .. لج انتي على فراش الموت خافي ربج مو كافي شمرتيها بالشارع وبهذلتيها كل هالسنين هسه وصلت بيج الحقاره تنكرين بنتج.

محمود .. لاااا انتوو اكيد تردون اتخبلوني ، شدتحجي انت الثاني ؟!

اسيد .. بنت منو لعد؟!

ايناس .. مااعرفها مو بنتي .. و دتكذب عليكم

اسيد .. ضحك بصوت عالي .. ههههه كلتيلي مو بنتج مو!!!!
نفس لما واجهتج بالحقيقه اول مره تتذكرين؟!
هم كلتيلي مو بنتي ونصابه .. وبعدها بثواني طلعت حقيقتج واعترفتي بعظمة اللسانج بكلشي.

ايناس .. بقت اتباوع لوجه اسيد بنظره مفهمها .. وكأنها تتوسله حتى يسكت.

اسيد .. شوفي كنت مفكرج صرتي ادميه بعد كل الي صارلج .. بس الظاهر فعلاً الطبع الي بالبدن ميغيره الا الكفن .... اني رايح.

محمود .. بصوت عالي وعصبيه.. خطوه وحده متخطي منا اذا ما اعرف شنو الموضوع !

اسيد .. بصوت حاد ترى محترمك لان اكول اكبر مني فلتتجاوز حدودك وياي احسنلك .. دفعته وطلعت.

محمود .. اول ما طلع اسيد لزم ايناس من رگبتها وخنكها .. وبصوت حاد .. متزوجه وعندج جهال واني ماادري؟!
كل هاي السنين اتضحكين عليه موووو؟!
وهذولي هم مو جهالي اكيد .. الله يعلم منوو ابوهم وحده مثلج ساقطه كلشي تسوي .. اليوم نهايتج على ايدي..

اسيد .. طلعت وشفته من الجامه الخارجيه خانكها وهي تصارع بين ايديه .. ردت ادير وجهي واروح بس گلبي ما طاوعني .. امي وكفت بعيني اذا درت بأختها ماتت واني ما حركت ساكن اكيد مراح تسامحني اياً مان عذري!!!
بسرعه رجعت للغرفه ركض جريته من عدها ودفعته ع الحايط .. الممرضين والامن من شافوني اركض اجوي ورايه يركضون ع بالهم ارهابي لو فد شي .. دخلو شافو ايناس تصارع حتى تتنفس  بينها وبين الموت شعره و بس هو كان يمها ...!!
لزمو واخذو يحققون ويا ويعرفون شصاير!
فحصتها الممرضه وانطتها مهدئات وطلعت .. بقينا بس اني وياها .. ردت اطلع اني چان تصحيني ..

ايناس .. بصوت مبحوح بسبب الخنگه .. متريد تعرف الحقيقه؟!

اسيد .. ما التفتت الها بقيت منطيها ظهري .. الحقيقه گلتها باللسانج واعرفها .. وحتى اذا كذبتي فالشبه الي بينج وبينها مستحيل يكذب .. واذا اضطريت اكو الف طريقه اكدر اثبت بيها كذبج وحقارتج بس ما راح اسوي شي لان ماكو وحده متعرف امها وداليا مع الاسف عرفتج أول ما شافتج لذلك مستحيل اشكك بيها واكسرها بسبب وحده مثلج.

ايناس .. اي كذبت صح كذبت .. كذبت حتى احميها .

اسيد .. ههههه بلا دور الام المضحيه لتعيشي لان ميرهملج ابد ، واذا خلص كلامج اني رايح.

ايناس .. من حقك متصدكني لا انت ولا هي .. كلكم الكم حق متصدكوني .. بس هي هذي الحقيقه !
وراح اكولها سواء صدكتها او لا بس مثل ما كلتلك قبل اشويه اريد اروح واني ضميري مرتاح ..
قبل فتره من الزمن وبأيام شبابي اتعرفت على شخص وياي بالكليه .. حبيته وحبني عشنا احلى قصة حب ممكن يتمناها شخص .. كنت مستعده اضحي بروحي الي هي اغلى ما أملك في سبيل ابقى ويا ويصير الي كدام العالم كلها .. بس القدر كان له رأي اخر!
الولد هذا كان مسيحي .. واني مسلمه !
وارتباطنا كان المستحيل بعينه .. ابويه كان ظالم لدرجه محد يتخيلها هذا الشي محد يعرفه غير احنا عائلته ، لان الناس كلها تعرف انو انسان طيب ومتسامح .. اما الحقيقه كانت اسوء.
المهم ..
الحب عماني لدرجه اتمردت حتى على ابويه .. عاندته وطلعت من تحت سيطرته .. اتفقت ويا نزار انو ننهزم ، هو هذا الحل الاخير النا .. مفكرت لا بعادات وتقاليد .. لا بحلال وحرام .. لا بسمعة واهلي .. كل هذا شمرته ورا ظهري واتزوجت نزار .. اتزوجنا ع الطريقه الاسلاميه والمسيحيه وكل واحد بقى على دينه بحيث كنت اروح ويا للكنيسه كل اسبوع .. اشلون مااعرف المهم هذا الي صار
انهزمت ويا وكان اسعد يوم بحياتي .. كنت مفكره الموضوع سهل وانو راح ابدي حياة جديده ويا وراح اعيش عمري الجاي بسعاده وراحه ........!
بس الحقيقه كانت بشعه .. عشت ايام سوده .. خوف وجوع وحزن .. نتغده منتعشى .. بيت ماكوو كاعدين بغرفه سقفها سعف لا تحمينا من حر ولا مطر .. مع ذلك اتحملت اتحملت اتحملت لان كنت احبه وهذا كان اختياري .. الى ان صار الشي الي ممتوقعته ولا مفكره بي اصلاً ..... صرت حامل!!!!!!!!!!
طبعاً المعروف انو المفروض افرح لان راح اصير ام .. وابدي اجهز للطفل وافكر شنو اشتريله وشنو البسه ..!
بس اني كولشي وياي كان عكس .. كعدت ابجي وافكر اشلون راح اعيشه؟!
اشلون اجيب طفل بهذي المأساة الي عايشيها؟!
اذا حنا ملاكين لگمه ناكلها اشلون اعيش طفل ؟!
شنو اوكله ، شنو اشربه ، شنوو البسه ، والاهم من هذا كله وين اعيشه واني بالشارع؟!!!!!!!!!!

مرت الاشهر واقرب موعد ولادتي .. ما كان عندي حل غير انوو اروح الابويه!!!!!!
ابويه صح قاسي بس ما اعتقد توصل بي يقتل روح!
وحتى اذا موتني فأرحم هواي من العذاب الي دااعيشه .. طلعت من البيت بدون علم نزار .. رحت لبيتنا دكيت لباب طلعتلي انت بوقتها كنت بعدك صغير  .... وركضت صحت امك ، طبعاً هي كانت متزوجه قبلي بهواااي !!
ما اطيل عليك .. دخلت لبيت ابويه بدون علمه .. امي من عرفت بيه حامل انصاعت للامر الواقع تعرف بعد گلب الام

اسيد .. اعرف اكيد بس انتي مااعتقد تعرفين شنو يعني ام او حتى عندج امومه!

ايناس .. كامت تبجي .. بصوت مخنوك .. كامت امي تنطيني فلوس وتساعدني اشويه اشويه بدت حياتنا تتحسن ونزار لكاله شغله صح راتبها قليل بس انمشي بيها امرنا  ، اجرنا بيت على كد الحال .. و ولدت اول طفل الي ... داليا ..

اسيد .. من كالت ولدت داليا انداريت عليها .. بحيره وبصوت مليان شك وريبه ...
مو ع اساس مو بنتج داليا؟!!!!!!

ايناس .. حتعرف كولشي بس خليني اكمل ...
بعد ما ولدت داليا اخذتها ورحت لبيت اهلي .. بوقتها كانت مريضه وماعندي فلوس اخذها للدكتور .. ظلت تبجي تبجي گلبت البيت گلب ووصل صوتها لابويه!!!
سمعها اجه للصوت جان يشوفني اني وبنتي بحظني ... عرف كولشي بس الصدمه انه ما حجه شي .. الظاهر الزمن يغير .. لان ابويه كان شخص ثاني مو نفسه الي كنت عايشه برعب من ردة فعله .. بس الحقيقه كل هذا الهدوء والتسامح كانت خطه منه ...!
سلم عليه وكالي انو هو مسامحني ويعرف انه الي صار مو بكيفي وانو نزار ضحك عليه ووووووو من هذا الكلام ... اني من فرحتي بردة فعله الي ممتوقعتها ومن رعبتي الي كنت بيها .. مصدكت الي ديصير وسكتت .. محجيت شي وكأني دا أأيد كلامه واثبت التهم الي ديكولهن عن نزار .. اصالحت ويا ابويه وكل هذا بدون علم زوجي اصلاً  ..حياتي بدت تاخذ منحى جديد .. كنت كولما اروح لبيت اهلي واشوف العز والخير الي عايشيين بي اتندم الف مره ع الي سويته .. اعصابي تلفت من المقارنات بي حياتي وحياة اهلي واختي الي هي امك .. صرت ما اتحاجه ولا اطيق كلمه من نزار على اقل كلمه نتعارك !!
بديت اكره نزار .. حسيته هو سبب الفگر والعذاب الي اني بي . والي زاد الطين بله من عرف نزار اتصالحت ويا اهلي .. سوا حياتي جحيم وصلت لدرجه كام يضربني .. كرهته كره مو طبيعي ، اما الي نهى كولشي بينا من حملت مره ثانيه .. كرهت نفسي وقتها ردت اسقط الطفل بأي صوره بس الله شاء انو تنولد هذي الطفله غصباً عني !
بعد ما ولدت تاليا ازادادت عليه الحاجه والهموم والفقر .. متحملت اكثر بقيت كم سنه ورحت الاهلي كلتلهم بعد ماارجع لنزار لو تموتوني .. كام ابويه اخذ البنات دزهن لابوهن واني بقيت يمهم .. بعد فتره سمعت انو نزار انتحر!!!!!!!!!
وهنا اني انتهت حياتي نهائياً .. رغم كل الي مر عليه وكل العذاب الي عشته  نزار يبقى حب حياتي .. وبلا اي شك اني الي وصلته للموت!!
ندمت ع غروري وكبريائي .. طمعي وانانيتي الي نستني تضحية نزار بأهله وحياته علمودي !
كولشي بحياتي صار عباره عن بجي ليل ونهار .. صارت عندي حاله نفسيه واتكئبت "
ابويه بعد ما عرف نزار مات طلع وجهه الحقيقي .. بدا الظلم والقسوه تظهر بتعامله وياي .. حرمني حتى من بناتي ، لما ابجي يلزمني هو واخواني يموتوني لدرجه اوصل لانفاسي الاخيره .. بس الي كان يخليني اتمسك بالحياة ... بناتي!

اسيد .. باوعت عليها بغضب .. واستغراب !
بناتج هه؟!!

ايناس .. اي بناتي .. الشي الوحيد الي بقالي من نزار .. بس ابويه حتى هذا الشي اخذه مني !
بعد ما مات نزار اتوسلت بأمي تجيبهن يمي لان ما الهن احد غيري .. طبعاً ابويه من اول ما صالحني و قبل ليصير كل هذا كالي انه ممكن يتقبل اي شي الا نزار وبناته لا يريد يشوفهم ولا ادخلهم لبيته!
اني مصدكت يرضى عني سويت كل الي يريده ، حتى لما اروح الاهلي واخذ داليا .. كنت ابقيها بالباب ومااطول اشويه واروح لا يطلع ويشوفها ابويه!
فلما مات نزار مابقالهن احد لازم يجن يمي .. بس ابويه اشلون؟!
واني ممنوعه اوصل لباب الشارع اصلاً اخواني يذبحوني .. راحت امي جابتهن بالبوكه وبدون علم احد من اخواني وابويه!
جابتهن وبقن يمي كم اسبوع محد يدري بيهن بس احنا بيت واحد وماكو شي ينظم خصوصاً الجهال!
طلعت داليا تلعب وشافها ابويه .. بيومها كلت راح يموتني اني وياهن حتى امي راد يموتها .. بس اخويه موفق الكبير اقترح على ابويه اقتراح!
وهو يودوهن الميتم لو جامع وعوفوهن هناك!!!!!
وفعلاً هذا الي صار .. رغم توسلاتي ورجائيييي ودموعي .. بس كلها ما شفعتلي يم ظلم ابويه وقسوته .. گالي لو اتذبيهن لو اقتلج انتي وياهن خلاص !!!
لان زواجي من نزار حسب رأيه باطل .. وبهذا يكونن بناتي يكوونن بنات زنى!!!
مااحجيلك شعوري والالم الي عشته لان اعرف ميهمك ومستحيل تصدكه .. الحاصل
بالليل خلا اخويه ياخذني اني وياهن لميتم بعيد كولش عن منطقتنا اصلاً .. نزلت وخليتهن بالباب .. ما تركتهن لاااا .. تركت گلبي كوله بمكانهن ورجعت بس روح!
مكنت خايفه على داليا بكد خوفي ووجعي على تاليا .. كانت طفله عمرها كم سنه كولشي متفتهم ولا تعرف .. الوجع الي عشته هذيج الليله قتل روحي وگلبي حسيت نفسي دا اطعن گلب نزار مره ثانيه دااموته من جديد .. بس منو يصدك انو الي ديصير دموتني اني قبل اي احد!

اسيد .. اذا اهلج كلهم يعرفون اشلون امي قبل كم يوم كالتلج ع اساس انتي مفهمتهم انو بناتج ماتن بحادث ويا زوجج؟!!!

ايناس .. امك الوحيده الي متعرف بالموضوع ، لان ابويه خاف من ابوك يعرف بالموضوع ويطلكها بسبب فضيحة اختها..!

اسيد .. يعني امي متعرف بكل هذا؟؟

ايناس .. لا ..
عفت البنات و رجعت لبيت ابويه ، استمرت رحلة العذاب الى ان بعد الي صار بسنه تقريباً ماتت امي من حرگتها عليه!!
ابويه هم اتمرض ومات ... بقيت اني عبده جوه ايد اخواني ونسوانهم .. الى ان اجه اخويه بيوم كالي

_ اليوم العصر حظري روحج راح يجوج خطابه!!

باوعت بوجهه ومحجيت لان اقل كلمه مني ممكن اخسر روحي .. ما راح اتطرق اكثر للموضوع حتى اوصلك للنهايه ... اتزوجت محمود غصباً عني!
ومن اول يوم اكتشفت انو محمود واحد ظالم اكثر من ابويه واخواني .. الي يشوفه يكول انسان مثقف وهادئ .. بس هو مريض نفسي بي مرض الشك!
يشك بكولشي وبلا اي سبب!
توصل بي مرات يعذبني جسدياً ع اشياء اصلاً ما الها وجود .. ويهددني ياخذ جهالي مني ، صرت عنده عبده اسوء من اخواني .. كان يكول مسافر بشغل وهو يخوني واعرف بي بس مااحجي .. اسوي نفسي ماادري .. و..

اسيد .. صفنت بوجهها بس داخلي يغلي حيره وشك .. تصدكين انتي تنفعين تصيرين ممثله وبأمتياز؟!
للحظه كنت راح اصدكج ، بس الي متعرفي انتي .. انو كله هذا الي حجيتي ما له معنى ولا صحه؟!
لانو انتي لو فعلاً مظلومه مثل متكولين .. كام من مات ابوج وتزوجتي رحتي دورتي على بناتج!
شفتيهن وين .. لج انتي حتى من لكيتي بنتج اتبريتي منها .. حتى من واجهتج كلتيلي هذي فگر وعوفها ، ورحتي عليها للمزرعه وهددتيها تتذكرين لو نسيتي .. جايه هسه تضحكين عليه بكم كلمه ودمعتين وتردين اصدكج؟!

ايناس .. حقك واعرف مستحيل تصدكني .. بس هي هذي الحقيقه ورب العباد .. وجوابي ع سؤالك ليش مدورت عليهن ...!!
راح تعرفه لما تسترجع ردة فعل محمود قبل اشوي .. كان راح يموتني !
محمود نسخه اقسى واظلم من ابويه .. ولو يدري بموضوع بناتي قصة زواجي السابقه كان راح يسوي كولشي حتى ينتقم مني .. ومو خوف على روحي لااا .. بس كان راح يحرك گلبي على بناتي مثل ما اني حسب ظنه خدعته !

اسيد .. تردين تفهميني محمود ميدري بيج متزوجه؟!!

ايناس .. اكيد يعرف .. بس القصه الي كالها اله اخويه مو نفسها الحقيقه .. محمود لو يعرف بيه شردت ويا زوجي الاول واخذته عن حب مستحيل يقبل يرتبط بيه!
لان هو بلا شي مريض بالشك .. بس اخويه كذب عليه وكاله انو اني اتزوجت واحد من اقاربي ومات .. فأذا عرف الحقيقه راح يسوي كولشي حتى يعاقبني .. حتى يعذب روحي .. وهذا الشي بناتي!

اسيد .. ماشي .. ليش رحتي لداليا وهنتيها وتبريتي منها .. كان ممكن تكعدين وياها وتفهميها ع كلشي؟!

ايناس .. مكدرت .. لان اذا عرفت داليا الحقيقه ممكن ممكن تسامحني .. واذا سامحتني مراح تقبل تبتعد عني ولا اني راح اكدر ارجعها الي خوفاً عليها من محمود الظالم .. لذلك رضيت اكون بنظرها حقيره ولا ارضى بأذيتها ..!

اسيد .. كلامها ميدخل للعقل .. بس دموعها وحركت گلبها اتكول العكس!
مااعرف شنو اكول .. عفتها وطلعت بلا اي كلام!!
طعلت للبيت بس اني الف فكره وسؤال ايدورن ابالي .. كلام ايناس طير العقل الباقي براسي من ورا المشاكل الي بالبيت .. وهاي داليا مااعرف شنووو نهايتها وياها كل يوم دتطلعلي سالفه جديده وراها .. وكل يوم داادخل بقصه اتعس من الي قبلها بسببها .. حتى كرهت حبي وتعلقي بيها .. كرهتها وكرهت حياتي الي دااعيشها .. يعني اني عايز هسه شراح اسوي واشلون اتأكد من كلام ايناس صدك لو لا؟!

وصلت للبيت لكيت امي وداليا كاعدات بالصاله .. .. سلمت ع الحجيه وبوستها لان صارلي 10 ايام مشايفها .. امي تحجي وياي واني عقلي بغير عالم مو يمهم اصلاً ..

الحجيه .. يمه اسيد اشبيك ما تسمعني؟!

اسيد .. ها .. اا .. هاا .. يمه ما سمعتج شنو كلتي؟!

الحجيه .. صارلي ساعه احجي وياك وانت ولا يمي؟!

اسيد .. حجيه تعبان اشويه اعذريني.

الحجيه .. اسم الله يمه شنو الي متعبك احجيلي شصاير من اجيت وانت حالك ما عجبني.

اسيد .. ماكوو شي يمه بس دوام و واجبات تعبت اشويه

الحجيه .. الله يقويك يمه وينطيك الصحه ويحفظك من كل عدو وشر.

اسيد .. امين حجيه .. يلا اني اكوم اسبح وانام اشويه جسمي متكسر.

الحجيه .. اي يمه روح ارتاح الله وياك.

داليا .. من دخل اسيد وهو مو على بعضه !
اني خفت ليكون صايرع خالته .. ردت اسأله بس اتذكرت الحجيه متدري!!!
سكتت وانتظرت لحد ما يصعد للغرفه واشوف شنو الصاير .. اول ما صعد ركضت ورا .. هو ما كأنه شافني دخل بوجهه للحمام!!
بقيت اني انتظره لحد ما طلع ..

_اسيد اشصاير حبيبي اشو مو على بعضك؟!

اسيد .. داليا راسي يوجعني وما الي خلك احجي اريد انام.

داليا .. لااااا الظاهر صاير شي كبير والا اسيد ميضوج بسهوله هشكل !
سكتت عنه وكلت هلي يرتاح لحد ما يكعد العصر وافهم السالفه .. عفته ونزلت يم الحجيه لكيت ايمان كاعده يمها وتبسبس .. من شافتني سكتت !
اني هم لبستها ولا كأني شفتها .. اشكد صلفه صارلها 10 مكابله الغرفه تنزل على كد اللكمه وتصعد .. واليوم من سمعت بي اجه نزلت!
اني صح ساكته وما احجي بس داخلي يغلي من الغيره لان اعرف شنو غايتها ويا اسيد حتى لو هو ممعبرها وميريدها بس هي حيه كولشي تسوي!
كعدت يم الحجيه وهي مكابلتني .. للمغرب وهو نايم .. اني مكعدته لان شكله معصب ومااريد يتعارك وياي وايمان تسمع!
لليل كولش نزل!
كلتله اسويلك عشه .. كالي لا ما اشتهي!

_شنو متشتهي اسيد انت مماكل شي من الصبح!

اسيد .. بنتر .. كلتلج ماااا اشتهي متسمعين!

داليا .. اسفه مو قصدي بس..

اسيد .. كافي اسكتي.

داليا .. هذا اشبييي ديحجي وياي هشكل شمسويتله؟!
عفته وكعدت بس محجيت شي لان ايمانووو كاعده .. من شافته هيج نطت من مكانها ..

ايمان .. اشلونك اسيد شخبارك .. اشو طولت بالدوام اشتاقيتلك .. أاا .. قصدي اشتاقينالك .

اسيد .. درت وجهي باوعت على هاي الورطه الثانيه .. اووووف ربي شمسوي عندك .. سكتت مجاوبتها.

داليا .. ياااا ربييييي اني مشايفه هيج صلافه معقوله حتى كرامه ماعدها .. طلكها ، كاللها ما اريد اشوف خلقتج ، وطردها .. وهي بكل قباحه واستهتار اتكوله مشتاقتلك وكدامي!!!
باوعتلها بغضب وسكتت هي ولا كأنها تشوفني وتباوعلي بأستهزاء !

الحجيه .. اشلون صرت يمه؟!

اسيد .. زين يمه زين لتخافين ما بيه شي اشويه تعب.

الحجيه .. ولك يمه هلة هلة بروحك لا تذب نفسك ع التعب.

اسيد .. ان شاء الله .

داليا .. عود ردت اقهر الحيه المكابلتني .. اتقربت منه خليت ايدي ع رجله .. حبيبي مجعت اسويلك اكل؟!!

اسيد .. اهوووووووو لج انتي شنوووو غبيه لو غبيه؟!
متفهمين الكلام الا الف مره ينعاد؟!!!

داليا .. دفع ايدي عنه وصيح بوجهي .. كولشي مسويت هذا اشبي وياي .. باوعت على ايمان اتباوعلي والابتسامه شاكه حلكها نصين!!
محاجيته ولا فتحت حلكي .. كمت بوجهي گبل صعدت للغرفه !

الحجيه .. شجاك يمه على البنيه ترى مكالتلك شي!

اسيد .. يمه لخاطر ربج لتتدخلين مرتي وعوفيني اتصرف وياها.

الحجيه . براحتك يمه براحتك.

اسيد .. ماادري ليش احس نفسي غاضب من داليا ومعصب مجرد شوفتها لو كلمه منها تعصبني!
مااتحمل اشوفها كدامي احس نفسي اختنك رغم هي ممسويه شي .. بس الاشياء الي دااتورط بيها بسببها كل يوم خلتني افقد صبري وياها.
عفت امي وطلعت بالحديقه ادخن .. ما احس الا داليا يمي!!

داليا .. صعدت الغرفتي بجيت اشويه .. بعدين فكرت لازم اكو سبب لتصرفات اسيد وياي وعصبيته هذي!
اكيد صاير شي واني لازم افهمه احسن مااعصب منه وتصير مشكله خلي احجي ويا واعرف السبب .. غسلت وجهي ونزلت ملكيت بالصاله بس ايمانوو .. ردت اروح اسأل الحجيه عن اسيد .. چان تحجي ..

ايمان .. شكله اسيد مل منج هه.

داليا .. لويش شفتي اجه عليج مثلاً؟!

ايمان .. ههههه يجيني لتخافين يجيني كولها مسأله وقت وبس.

داليا .. ههه ولو اني متأكده هذا المستحيل بعينه بس عهد عليه .. اذا اجاج لو اعترف بوجودج اصلاً وقتها اني اعوفه واتنازل عنه الج .

ايمان .. ماشي اتفقنا .

داليا .. عفتها وطلعت بس كلامها يرن بأذني وگلبي حرك روحي حرك .. طلعت للحديقه اشتم هوا لان كلام الحيه وسمها خنكني .. طلعت چان اشوف اسيد كاعد ع الكرسي ويدخن!!!!!
رحت يمه .. هو من شافني ما حجه بقى يدخن ولا كأنه شافني ..

اسيد .. شطلعج؟!

داليا .. اسيد شصاير؟!!

اسيد .. مصاير شي امشي ادخلي جوه الدنيا بارده .

داليا .. كعدت كدامه ع الكرسي .. اسيد انت ضايج مني؟!
مسويتلك شي اني غلط وما اعرف عفيه كولي لتعاملني هشكل واتخليني اكل بروحي.

اسيد .. تحجي والدمعه بعينها .. حيرتني ماادري الومها ع الي ديصير لو الوم نفسي ع الي دااسوي بيها ؟!!!!
اتقربت منها مسحت ادموعها ... كافي لتبجين وماكوو شي تعبان من الدوام وما الي خلك احد .

داليا .. ماشي حبيبي حقك واسفه دااضغط عليك بس والرب مو قصدي ازعجك.

اسيد .. اني الي غلطت وهي الي تعتذر!!
اكوو عذاب بالدنيا اكبر من هذا؟!
خلص امشي خلي ندخل جوه مو زين عليج الدنيا بارده .. اخذتها ودخلنا جوه لكينا ايمان كاعده بالصاله من شافتنا وجهها انگلب وعيونها صارت نار.

داليا .. حظني ودخلنا اني ويا واحلى شيييي ايمان شافتنااااا .. اني باوعتلها بنظره نفس نظرتها الي قبل اشويه ودرت وجهي .. مسألة وقت مووو اصبريلي اني اعلمج!
صعدنا للغرفه اني لفيت راسي ونمت لانو تعبانه الحمل اموتني .. واسيد بقى يتفرج ع الابتوب .. مااعرف اشكد بقيت نايمه ... فزيت لكيت اسيد ماكو!!!!!!!!!

فتحت الباب دااريد اطلع وچان اشوفلج اسيد طالع من غرفة ايمان!!!!!!!!!!!!!!!!!!!

للحكايه بقيه ❤️
مرحبا حبايبي .. البارت هذا صح ما بي احداث هوايه بس انكشف بي اعظم سر وعقده بالنسبه الي .. طبعاً كولش طويل وكولش تعبني لانو تقريباً كتبت قصه كامله ببارت واحد قصة ايناس كولها ، اتمنى تكون الصورة وضحت وما طلع فلم هندي مثل ما كال البعض !
رأيكم بالاحداث وتوقعاتكم للبارت القادم 🤗
لتنسووووووووووووون التصوييييييييييت 😘💜