رواية في ارض الغرام انت دولتي الفصل السابع عشر 17 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

داليا .. شنووو .. شدتحجي انت؟!!

اسيد .. الي سمعتي.

داليا .. لا انت اكيد دتكذب .. شعرفك انت ومن وين تعرف مكان سلمى اصلاً؟!

اسيد .. ضبي اللسانج وبلا كلام زايد وامشي اصعدي بالسياره خل نرجع للبيت.

داليا .. ما اتحرك خطوه وحده منا اذا مااعرف كولشي عن الموضوع ومنو الي كالك!

اسيد .. اللهم طولج يا روح .. امشي اصعدي للسياره واني افهمج كلشي بس اتحركي فضيني ليطلع احد ويشوفج انتي وبنطرونج بنص الشارع .

داليا .. شقصدك؟!!

اسيد .. بغضب وصبره بده ينفذ .. راح ارتكب بيج جريمه بهالليل  ، اخر مره اكلج امشي اصعدي كدامي لا اسحلج سحل والله.

داليا .. شفته عصب و وجهه انكلب .. كلت خلي اروح ويا احسنلي هو اني اصلاً ما عندي مكان اروحله لويش اعاند؟!
سحبت جنطتي ورحت للسياره .. صعدت وهو اخذ جنطتي خلاها بالسياره ورجع صعد بصفي وسد الباب كل قوته نززني .. اول مره اصعد ويا بالسياره و لوحدي .. كلبي يرجف من الخوف والارتباك .. مااعرف حتى اتنفس حالتي كولها تخربطت!
بقينا ساكتين اثنيناته محجينا شي بس صوت النفس بالسياره .. الى ان حجه هو ..

اسيد .. بالدوام شفت علي وحجالي كل الموضوع.

داليا .. زين سلمى اشون يصير تتزوجه مو هي ...

اسيد .. راهبه قصدج؟!!

داليا .. انت شعرفك بكل هذي الاشياء؟!

اسيد .. صديقتج شكلها كارها موضوع الرهبنه ورادت بس تخلص منه فورطت صديقي بيها.

داليا .. اولاً انت متعرفها لسلمى حتى تحجي عليها هشكل .. وثانياً مااعتقد سلمى تعرف عنوان صديقك او حتى عندها اتصال بي حتى تورطه وياها ، صديقك هو الي موت نفسه عليها من البدايه وهي كانت رافضته نهائياً ومدااكدر اصدك او اقتنع انو سلمى وافقت تتزوجه!

اسيد .. هذا الي صار وبالخميس عرسهم ، وعلي عزمني .

داليا .. اني لازم اروح اريد اشوفها .. لازم افهم شنو الي صار شنو الي خلاها تترك الدير و تتزوج!

اسيد .. بالخميس اني رايح اذا تردين اخذج وياي.

داليا .. شكراً الك مااريد ازحمك.

اسيد .. بلا غباء مرايح على مودج ولا ع مود صديقتج ، لخاطر علي راح اروح مااريد افشله بيوم عرسه خصوصاً اهله مو ويا .

داليا .. شنو قصدك اهله مموافقين؟!!

اسيد .. من ترحين صديقتج اتفهمج .. ما الي خلك نقاشاتج.

داليا .. هو انت لشنو الك خلك اصلاً ابو الهول يبتسم اكثر منك.

اسيد .. شكلتي؟!!

داليا .. ولا شي .

موضوع سلمى وعلي فر عقلي فر!
معقوله .. زين اشون ، اشوكت ، لويش؟!
الف سؤال وسؤال ابالي شيجيب الخميس واروح اشوفها .. اووووف گلبي حيطلع من مكانه من كد اللهفه مشتاقتلها مووووت .. يس اتمنى اشوفها ، مدااصدك.
سكتت والافكار تدور بعقلي .. هو بقى يسوق  بطريق طويل يعني اني مبعدت هالمسافه عن البيت .. وين رايح هذا؟!
ردت اسأله بس خفت منه لا يعصب عليه ومحد يمي ، لو يسوي بينا حادث هذا المجنون .. مسافه كولش بعيده عن البيت وكف السياره بمكان بي اضويه وناس كومه وسيارات ..!
اني بصراحا مشايفه هيج مناطق حياتي خلصتها بين الميتم والمدرسه وبعدها انتقلت من الدير لبيتهم كبل مشفت ولا سمعت شي حتى ملابسي كنت اخذهم من اسواق شعبيه ونادراً ما اروح .. وهذا المكان اول مره بحياتي اشوفه .. شكله مكان كولش راقي والناس الي بي مبين من شكلهم مثقفين وطبقه راقيه!!
وكف السياره وراد ينزل .. اني بعد متحملت لازم أسأل ..

داليا .. لويش وكفت و وين رايح؟!

اسيد .. رايح اتزقنب واجي من الصبح كلشي مماكل من ورا خلقتج وطلايبج.

داليا .. واني؟!

اسيد .. اجيبلج ويايه اكل.

داليا .. يا اكل انت .. اقصد اني مااكدر ابقى هنا وحدي.

اسيد .. ما اتأخر دقيقه واجي ، ابقى بالسياره ولتتحركين .

داليا .. لا ما اكدر .. اخاف ابقى لحالي كولشي يصير عايفني بنص الشارع .. امشي نرجع للبيت واني اسويلك عشه عفيه الله يخليك.

اسيد .. مااريد منج شي بس كفيني شرج ، وانتظريني هنا دقايق واجيج .

داليا .. خلي اجي وياك لعد فدوه لتبقيني وحدي والرب اخاف .

اسيد .. وين تجين وياي بهذا بنطرونج وشعرج ، تردين الناس تاكلج.

داليا .. انت شبيك ويا بنطروني متشوف هذولي البنات شنو لابسين وكولهم سافرات ، بعدين انت شعليك بيه اني حره بلبسي.

اسيد .. استغفر الله يا اله العالمين .. اسمعيني زين وبلا طولة اللسان لا اكصه الج ، نزله من السياره ماكوو تبقين هنا واني هسه ارجع .. نزلت وسديت الباب ، بس مقفلت السياره نسيت .. صح المنطقه راقيه وكل الي بيها سافرات بس هي مردتها تنزل من السياره ، لان جسمها ما شاء الله كارثي ولابسه بنطرون ضيق وقميص مخصر ، شعرها رافعته ذيل حصان ونازل لنهاية ظهرها .. وعيونها الي تسطر الواحد سطر .. اني عود الثگيل ودوختني اشلون بهذولي الملطلطين اذا شافوها ..!
عفتها بالسياره و رحت بسرعه اطلبت الاوردر و داانتظر .. مااحس الا هوسه ورايه !!
درت وجهي لكيتها دتمشي ومجموعه ولد وراها يتغزلون بيها .. وصايره فلم هندي!!
من شفتها فقدت اعصابي المنظر عصبني حيل لدرجه واكفه والناس تباوع عليها ع بالك مشايفين بنيه بحياتهم .. يفترسون جسمها افتراس بنظراتهم .. الدنيا اطلمت بعيني من الغضب لو الزمها واخلي طلقه براسها هم ميكفيني .. ركضت بسرعه سحبتها ورايه وجريت واحد منهم ضربته بوكس كسرت اسنونه بحلكه !!
هذولاك من شافوني اتطافرو كل واحد انهزم بصفحه .. لزمت هذا الي كدامي كسرته تكسر بقى يبجي ويتوسل بس عوفني .. الشرطه شافو الهوسه اجوي يركضون ويصيحون رادو يعتقلوني .. طلعتلهم الباج مالتي شافو الرتبه مالتي نقيب بالجيش متقربولي .. شرحتلهم الي صار كلتلهم اني وخطيبتي طالعين ورحت دااجيب الاكل لكيتهم ديتحرشون بيها .. اعتذرو مني على سوء الفهم واخذو هذا الساقط وراحو .. التفت على البلوه الي ورايه لكيتها واكفه وترجف جريتها من ايدها بقوه ويمكن كسرت عظمة ايدها .. كبل للسياره حتى الاكل عفته!
شمرتها بالسياره وطلعت بسرعتي للبيت .. محجيت شي لان شارع ومااكدر سوي شي لا يصير حادث ، بس اني دمي يغلي اريد انهيها خلاص .. وصلت للبيت .. دخلت السياره بالكراج اول ما وكفت السياره هي نزلت بسرعه وركض دخلت للبيت .. طفيت السياره ونزلت وراها بسرعه دخلت للبيت شفتها طبكت باب غرفتها بقوه ..!
بصوت عالي وبكل عصبيه ..

اسيد .. افتحي الباب واطلعي لا اكسره واطلعج بطريقتي!

داليا .. بصوت يرجف وهي تبجي .. والرب مو قصدي اسوي مشكله بس اني اخاف من ابقى لحالي بمكان صغير .. والرب اخاف وكلتلك مصدكتني ، لما رحت انت خفت ومكدرت ابقى بالسياره حسيت نفسي دااختنك فـ طلعت .. الله يخليك روح منا مو قصدي الي صار والله مو قصدي!

اسيد .. كلتلج اطلعي ومراح اعيد كلامي بعد!

داليا .. من صوته مبين الشياطين اشتغلت براسه .. نبرته تخوف ويصيح بصوت عالي .. حسيت جسمي بعد ميشيلني من الخوف منظره وهو ديسوق يخلس كل اشويه كلت حيسوي حادث ويموتنا .. يتنفس بقوه وبس يدخن .. يا رب ارجوك ساعدني انت تعرف انو اني مو قصدي اسوي مشكله وتعرف لويش نزلت .. ارجوك خلصني منه .. بأيد ترجف وگلب شبه متوقف فتحت الباب .. بعدني هستوني فتحت الباب دفعه وسحبني للصاله ... شمرني ع الكاع بقوه احس العمود الفقري تكسر!

اسيد .. اني شكلتلج ؟!!

داليا .. من بين شهكاتها ودموعها .. صدكني مو قصدي يصير كل هذا بس خفت خفت لوحدي بالسياره خفت مكدرت ابقى لوحدي.

اسيد .. اني شكلتلج جاوبيني ؟!!

داليا .. محجيت شي بقيت اباوع بعيونه ودموعي تجري .. گلبي احسه حيوكف من الوجع الي بي مو وجع الوكعه .. ولا وجه ظهري .. وجع الشعور الي احسه كولما اباوع بعيونه .. وجع گلبي الي من نظراته يطير .. وجع الخذلان الي دااعيشه ويا..!

اسيد .. متجاوبين ليش سكتي ، شنزلج من السياره اني مو كلتلج متنزلين؟!!
شنو شفتيلج واحد عجبج وقررتي تستعرضين بجسمج كدامه؟!!
لو اشتاقيتي لنظرات الناس الي تتفحصج واستغليتي الفرصه لان من زمان ما طالعه فحبيتي تعيدين الماضي!
جاوبيني لتخافين ما اسويلج شي لان انتي وحده قذره وحثاله تعرفين رأيي بيج من زمان فمراح اللوث اديه بيج ، بس اريد اعرف شنزلج؟!!

داليا .. كلامه حرك روحي حرك .. بقيت صافنه بوجهه ودموعي تجري .. احس گلبي ديتكطع .. بس ما حجيت .. ردت اسمع كلامه زين حتى گلبي يتوب منه ، يكرهه  .. حتى يعرف اشون يحب وحش مثل هذا  .. اشون ينذل من الشخص الوحيد الي ساكنه!
سكتت بس اني الوجع ينهش بيه من كل صوب .. ايدي الي مردها وهو يسحبني من الشارع .. ظهري الي دفعني عليه بكل قوه احسه تهشم .. والاقوى من هذا كوله گلبي الي دينزف ومحد يدري بي!!

اسيد .. راح ابدل وارجع خمس دقايق الكى العشه جاهز والا متلومين الا نفسج.

عافني و راح .. بقيت بمكاني دموعي تجري مااكدر اتحرك ظهري موتني .. بكل قوتي رفعت نفسي وكمت من الكاع احس ظهري ديتكسر من الوجع!
سحبت نفسي بكل قوتي وطلعت بره .. شنو حاسب نفسه هذا خدامه عنده .. لو يموت ما اسويله سم بمعدته وخلي يمد ايده عليه بعد واني اعلمه منو الحثاله الحقير هذا!
طلعت للحديقه كعدت ع الكرسي اشويه وبقيت افرك بظهري اريد الالم يخف اشويه مسدت ظهري لحد ما اشويه ارتاحيت .. ارتكيت ع الكرسي واحس عبرة العالم كولها محشوره بصدري .. اريد ابجي .. اريد اصيح .. اريد واحد اشكيله !!
بدت ادموعي تصب عشره عشره .. بجيت بحركه وشهكاتي صارت عاليه كولش!!
ماادري اشكد مر من الوقت واني ابجي .. بحيث حسيت عيوني حتوكع بحظني من البجي ، الدنيا ليل والجو بارد .. لو عندي اهل هسه ما جان انذليت كل هذا الذل!
ما جان ضربني وهاني الي يسوه والي ميسوه .. لو باقيه اختي ع الاقل اشكيلها ضيم الحال وتواسيني .. بس لاا هم جان اتبهذلت مثلي وانذلت احسنلها ماتت.. خليني اني اتحمل كولشي بس مااتحمل اشوف اختي تنذل كدامي!
ابجي بحركه ومقهوره .. ما احس الا واحد طويل واكف كدامي وظله غطاني!!

اسيد .. ردت اشرب من دمها بعد الي سوته بس نظراتها الغريبه الي كتفتني .. دموعها ماادري شسوتلي .. ردتها بس تحجي ، ترادد حتى انتقم منها ع الفضيحه الي سوتها .. بس ماكو محجت شي!!
كلتلها تسوي اكل على ما ابدل اني مااشتهي بس ردتها تعاندني حتى انهيها وابرد گلبي!
بدلت و رجعت لكيتها ماكوو لا بالمطبخ ولا بغرفتها .. شطت من الغضب هسه حل موتها اني اعلمها بس الزمها .. دورت البيت كله ملكيتها .. خطر ابالي رجعت شردت .. بس من شفت جنطتها موجوده ارتاحيت '
طلعت للحديقه سمعت شهكاتها وبجيها واصل للباب الخارجي .. تبجي بس مبين عليها حيل متأذيه!
بقيت واكف ورا الشجره واسمعها تحجي بأختها وتبجي !!
بوقتها انقهرت كلش ، اتذكرت اخواتي اشلون ينجمعن و وحده تحجي للخ ، ساعه يضحكن وساعه يبجن!
ماادري ليش گلبي وجعني عليها .. حسيت نفسي هواي قسيت عليها بس هي السبب!
لو تبطل عنادها وتسمع الكلام مصار كل هذا..!
بقت تبجي تبجي متحملت اني .. مشيت وكفت كدامها ، من شافتني سكتت !!
بصوت جامد كلتلها ..

_اني وين وديتج؟!!

داليا .. محجيت شي بس احس گلبي دينعصر من اسمع صوته .. كرهته لدرجه فضيعه .. حتى صوته يقهرني!
بقيت ساكته محجيت ويا.

اسيد .. داالغي وياج جاوبيني.

داليا .. مسحت دموعها بسرعه وبصوت مخنوك.

_مو خدامه عندك.

اسيد .. لعد شنو انتي؟!!

داليا .. وحده حثاله لتوسخ لسانك بالكلام وياي .

اسيد .. رحم الله امرء عرف قدر نفسه.

داليا .. اشكرك ، واذا ممكن تعوفني بحالي.

اسيد .. امشي ادخلي جوه الدنيا بارده.

داليا .. معليك بيه انت خليك بحالك.

اسيد .. شوفي انتي يمكن تنسين بسرعه .. خلي ارجع اوضحلج شغله مهمه .. كلامي مااحب اعيده مرتين .. لتخليني اعصب ، كومي فضيني.

داليا .. كمت من مكاني وبخطوات بطيئه دخلت للبيت .. رحت لغرفتي ذبيت روحي ميته نمت .. !
كعدت الصبح ظهري اشويه احسن ، البيت فارغ .. رحت للمطبخ لكيت ام عادل دتطبخ سلمت عليها وسويت ريوك كعدت اتريك .. جان يجي هو لابس تراك رياضي وكوله مي شكله كان يركض!
اني شفته درت وجهي مااريد اباوع بخلقته اصلاً گلبي الغبي من يشوفه ينعمي!

اسيد .. بصوت جامد ، ام عادل اذا خلصتي شغلج روحي ما عدنا شي اليوم!

ام عادل .. اي والله دكتور اتسوي فضل بيتي فارغ والجهال يجون من لمدرسه يردون غده ومحد بالبيت!

اسيد .. خلص اتكدرين اتروحين.

هاي ما صدكت كاللها روحي لبست عبايتها وراحت .. رجعت بقيت بس اني ويا .. زين لويش طردها لويش ميخليها تبقى يمي شنو من بشر هذا؟!
راحت ام عادل واني كمت اريد اطلع جان صاحني.

اسيد .. وين؟!'

داليا .. رايحه لغرفتي.

اسيد .. حضري روحج بعد الغده انروح .

داليا .. صفنت بوجهه بأستغراب .. وين؟!!

اسيد ..  للعرس!

داليا .. شنو انت مو كلت الخميس؟!!

اسيد .. واليوم شنو؟!!

داليا .. يا ربي .. ما ع بالي اليوم خميس ..

اسيد .. هسه عرفتي اليوم خميس حضري روحج .

داليا .. اشون مو اني ..

اسيد .. شكو ؟!!

داليا .. لا ماكو شي .. بس..

اسيد .. لتضلين تبسبسين ما الي خلكج ترى احجي شكو!

داليا .. ما عندي ملابس مال هيج مناسبه.

اسيد .. البسي اي شي من الي عندج ، بس يكون عريض ومستور.

داليا .. ماعندي بس تراكات والبنطرو...

قبل لتكمل قاطعها ..

اسيد .. ديري بالج اشوفج لابسه هذا البنطرون بعد ، اكطعه عليج والخلقج.

داليا .. نعم .... ولويش؟!!!!!!

اسيد .. اتذكري الي صار البارحه وتعرفين ليش .. لو تحبين اذكرج؟!

داليا .. اعتقد كلتلك موو قصدي الي صار البارحا و....

اسيد .. سدي الموضوع وهاي اني حذرتج .

داليا .. لعد اشون اروح بلا بالتراك؟!!

اسيد .. خمس دقايق راح ابدل الكاج جاهزه انروح تشترينلج شي تلبسي .

داليا .. شنوو .. لاا ما اريد منك شي شكراً .

اسيد .. اولاً هذا مو مني راخ اخصمهم من راتبج .. وثانياً اذا متردين ترحين لعرس صديقتج انتي حره.

داليا .. لاا .. لا اروح الله يخليك اني مصدكت حشوفها .. وماشي اخصمهم من راتبي .. حروح ابدل واجي طلقه.
ركضت بسرعه حتى ابدل .. جان يصيح ورايه ...

اسيد .. لتلبسين بنطرون.

داليا .. اوووف يا ربي شراح يخلصها ويا هذا .. رحت دورت بملابسي لكيت تنوره سوده قديمه بس مرتبه ينطلع بيها ، وقميص نيلي مرتب .. لبستهم ورفعت شعري ذيل .. الجنطه .. وطلعت!
بعده هو منازل .. بقيت كاعده وانتظر .. افكر اشون راح اشوف سلمى وشنو شعوري لما اشوفها ...
اشويه وسمعت خطواته ع الدرج دينزل!!
بدون ميوكف وهو يمشي كالي يلا كومي .. كمت ورا اباوع عليه .. شنو الكشخه شنو العطر الي ترس البيت شنو الشياكه الي شايلها .. يا ربي هسه هذا اشون اطلع ويا حتى فشله هو وين واني وين؟!!
مشيت ورا لكيته بالسياره كاعد .. صعدت يمه وطلعنا من البيت ... منطقه كولش بيعده عن بيتهم هم راقيه والناس الي بيها عيني مبينين من شكلهم كولهم طاكين مثل ميكولون .. واني تنورتي مفتوكه ومخيطتها فضيحه ، اشون انزل بنص هذولي يا ربي؟!!
وصلنا كدام بنايه كولش كبيره مكتوب عليها مول!!
كالي انزلي .. فتحت الباب ونزلت وهو هم نزل .. مشى كدامي واني ورا.. دخلنا لهذا المول المحلات شنو الي بي تصفن!!
بقينا نفتر كل الي يشوفه ميعجبه .. مااعرف لويش مع امو الفساتين تجنن .. اخر شي استقر على فستان من ذوقه هو ، اني جايبني بس اللبس هو الي يقرر!
اشترالي فستان سهره يجنن طويل ومخصر ومن جوه مثل السمكه .. اكمامه شفافه وبيهم شذرات ذهبيه تجنن من الامام مقبط ومن ورى بي فتحه بالظهر لونه حبري وبي لون اسود يجنن  شي روعه كولش عجبني .. ذوقه من صدوك يجنن عجبني!
و ويا الفستان  فروه سوده كولش حلوه حتى ميبين شي من الفتحة الفستان.

واشترالي حذاء كعب كولش نازك ذهبي و جنطه صغيره ونازكه هم ذهبيه..!
طلعنا من المول بوجهنا للسياره ع بالي حنرجع للبيت .. جان ياخذني لمكان ثاني !!
كلينك مكتوب علي .. وكف السياره وبقينا بيها .. اخذ تليفونه وكام تصل بيهم!!
حجه مااعرف ويا منو بس اسمعه يكول .. اي وصلنا جوه تعالي اخذيها..!
يا ربي منو هذي  و وين تاخذني .. الخوف اتملكني ..!
بعد كم دقيقه طلعتلنا وحده لبسها كوله ضيق وشعرها منكوش اصفر ومن شكلها مبينه مااعرف اشونها .. سلمت عليه اكلته اكل بالسلام .. وكالتله نص ساعه وتعال تلكها عروس!
صدوك عافني وراح .. دخلتني للكلينك مالتها گلبت خلقتي گلب .. ع بالها من صدوك اني عروس .. سونا ، مساج ، سوتلي اظافري ، شعري سرحته وسوته نازك  يجنن ، كلتلها لتخلي هواي ميكب لانو مااحبه .. وجهي صافي وممعودته ع المكياج ..!
ما اكوللكم ولا تكولولي ...
بقيت تقريباً ساعتين   .. متخليني اشوف وجهي حتى!
بس الصدمه الحقيقيه صارت من شافني هو  .. احسه انصىدم وجهه كام ينطي اللوان وعيونه الكلام الي بيهم غريب.

اسيد .. بصوت ملعثم ويبلعم .. داليا؟!!!!!!!!

للحكايه بقيه ❤️
طبعاً كان المفروض بهذا البارت اكتب الحدث الحلو الي حيصير بس بعد مااكدر عيوني تعبت ونعست لان كنت مشغوله بالنهار ومكدرت اكتب .. ع البارت القادم ان شاء الله 🤗
اي غلطه اي سحكه غلسو ترى ميته نعاس اكتب تك عين 😪
رأيكم بالاحداث وتوقعاتكم للبارت القادم !