رواية في ارض الغرام انت دولتي الفصل السادس 6 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

أسيد .. هههههههههههههاي ... ههه ... هههههه ... شنو شنو شتردين؟!!

داليا .. مدااتشاقه وياك دااحجي صدوك.

أسيد .. وكف كدامها وملامحه تغيرت من الضحك للغضب ، وبصوت جامد .. انتي اكيد عقلج بي شي ، امشي اطلعي منا لا اخلي المت يشتري يتفرج عليج وديري بالج تعتبين باب الغرفه هاي مره ثانيه ادفنج هنا.

داليا .. انت فهمتني غلط ، اني مااريد اتزوجك زواج زواج يعني .. لا هيج مجرد شكليات ع الورق وكولشي مااريد منك لا مهر ولا غيره هيج بس بالاسم نتزوج ، وصدكني هذا الشي ابد مو رغبتي ولا رايدته بس غصباً عني دااسوي.

أسيد .. امشي اطلعييييييييي بررررررره .

داليا .. بصوت غاضب .. انت شنووو متفهم دااكولك ماعندي غير هذا الحل اذا مسويت الي دااكولك عليه ... اخر شخص بحياتي ممكن يعوفني ، مااكدر اتحمل خساره بعد .. كل الي احبهم يرحون ويعوفوني الله يخليك دااترجاك ، وكولشي مااريد منك بس اسم كو اكثر.

أسيد .. اذا هيج خلي هذا الي خايفه تخسري يتزوجج لو ميكدر يتحمل المسؤوليه يشمر بلاه ع غيره.

داليا .. انت واحد قذر وتفكيرك اقذر منك ، الشخص هذا اختي يا ذكي مو مثل ممفكر حضرتك ، والي دااطلبه منك هي الي جبرتني اسوي مفكره هشكل حظمن مستقبلي .. هههه متدري بيك واحد بلا ضمير ولا گلب اصلا ..
تعرف شنوو انسى كل الي كلته اصلا اني الغلطانه اجيت على واحد مثلك.

أسيد .. اي حبابه اعرفي المن ترحين هذا المعسكر مليان جنود واطباء وحتى مرضى روحيلهم وهم يسوونلج الي تردي اني ما افيدج لان يموتون على هيج اشكال منحطه .. ويلا بره

داليا .. ماشي راح اطلع بس تعرف وين حروح؟!!
اني اكولك وين ...!
حروح بوجهي للآمر مالتك واكوله كل الي صار كذب ، اني عندي علاقه بيك وكل يوم اجيك للمعسكر وافضحك فضيحة الله اكبر وخلي نشوف منو الحثاله اني لو انت ، عن نفسي مراح اخسر شي لان اني بكل الاحوال مثل متفضلت جنابك بنظر الجميع ساقطه فـ من شنوووو اخاف؟!
خلي تتشوه سمعتي بس المهم ادمر حياتك مثل مسويت بيه .. وفتحت الباب دتريد تطلع.

أسيد .. بسرعه ركض سد الباب وصار وراها .. مد ايده ودار وجها عليه .. صارت هي ع الباب وهو واكف كدامها .. خلا ايديه اثنينهم ع الباب بصفها حاصرها وهي صارت بالوسط ... عيونه بعيونها متفصلهم غير كم انش بصوت جامد مليان غضب من بين انفاسه كاللها ...

_انتي ع بالج تخوفيني بهذا تهديدج؟!!
لج انتي ، وظيفتي ، ومهنتي ، وسمعتي ادوسكم بحذائي هذا ومااهتم ... انتي متعرفين اني منوو وشنوو شايف بحياتي وشنو خسرت !
ماكوو شي بالكون كله يلوي ذراعي او يهمني اصلاً .. مع ذلك اذا فكرتي مجرد تفكير تتبلين عليه لو تكذبين ومتكولين الحقيقه افنيييج من الوجود وروح ابويه!!!

داليا .. بصوت يرجف من شكله وردة فعله .. معرفت شنوو تحجي الكلام ضاع من عدها ، لان كان قريب منها كولش وانفاسه تحرك وجهها من كد ما غاضب ومعصب!
بقت صافنه بوجهه والدموع اتجمعت بعينها .. الى ان حجه هو ....!

أسيد .. بدا يتقرب منها بحيث شفته صارت قريبه من شفايفها  كولش .. وهو يباوع على حلكها .. بصوت مثل الهمس كال ..

_رغم انتي مو نوعي المفضل ، ولا احب اشكالج بس نظراً للظروف الي مريتي بيها  وخسرتي حبيبج الي كلتي عنه اخويه وبعدين طلع مو اخوج !
   فأني راح انطيج من وقتي فاذا تردين نتونس اني وياج اوك ما عندي مانع اريحج ..!

داليا .. من اتقرب مني حيل حسيت كل ذره بجسمي خدرت مااعرف شصارلي ، اريد احجي ماكوو الكلام ميطلع من عندي .. حتى انفاسي حسيتها بدت تختفي بصعوبه اجر النفس ، الشعور هذا غريب واول مره احسه ..!
رغم كل كرهي اله بعد الي صار وحقدي عليه بسً من اتقرب مني حسيت كل ذره بيه تريده .. عيونه ، ملامحه ، انفاسه ... جسمه ، ضخامته ، ايديه الي محاوطتني ... مااعرف شصارلي انثولت!
كلتلكم حبيته من أول نظره مو بأيدي احس هذا الكائن انخلق الي وبس .. رحت لغير عالم بس من كال هذا الكلام القذر ..حسيت نفسي اشكد رخيصه !!
للمره الثانيه يعيشني هذا الشعور الحقير .. فجأه وبدون مقدمات دفعته عني بكل قوه .. ابتعد هو وباوعلي بابتسامه خبيثه ع وجهه انرسمت ..!

داليا .. الدمعه بعينها وبصوت مخنوك .. هههه تعرف اني اشكد غبيه كان ممكن اطلب من اي واحد هنا يساعدني ويوافقون بسهوله من نظراتهم الي اعرف حيوافقون بس عفت كل الي هنا واجيت عليك لان سمعت انت تكره النسوان !
كلت هذا الشخص مستحيل يتقربلي لو يفكر هيج تفكير قذر تجاهي هذا الوحيد الي مراح ينهش جسمي بنظراته  ... بس تدري شنووو لو رايحه ع چلب وطالبه منه هذا الطلب هم ميسوي سوايتك فتحت الباب وطلعت .

طلعت من غرفته واني گلبي مكسور من صدك .. لا من امي عافتني ، من اختي ماتت ، من الناس الي تربيت وياهم اانقتلو ، من المكان الي يعتبر بيتي راح ،من مستقبلي اتدمر ، كل هذا الي صار محسيت بهذي الكسره الي دااحسها هسه گلبي يوجعني بشكل غريب
بعد متحملت اكتم ادموعي اكثر بدت تنزل على خدودي بقوه حسيتها دتحفر وجهي ... رحت لغرفتنا اني وسلمى فتحت الباب لكيتها كاعده وبيدها كتاب جريته من ايدها بقوه وشمرته بالكاع

داليا .. ارتاحيتي هسه ذلني بسببج ع بالع اني وحده ساقطه تريد تمتع روحها ويا .. كل هذا بسببج كلتلك مراح يفهمني صح مو كل الناس اني وانتي ويعرفون نيتنا شنو .. كلتلج .. كلتلج بس مسمعتي مني.

كلت كل هذا مره وحده وبعصبيه ، دموعي تصب .. مااعرف شنو الي صار بس كنت اريد انفجر واطلع كل الي بكلبي.

سلمى .. داليا اهدي بس اهدي فهميني شصار.

داليا .. شصار يعني شتتوقعين ياخذني بالاحظان ويرضى بوحده مثلي حتى لو ع الورق وبس ، اني وين وهووو وين .

سلمى .. اتقربت عليها رادت تحظنها بس داليا بعدت عنها ...!

داليا .. اسمعيني زين سلمى اذا تردين تعوفيني وترحين تشوفين حياتج الله وياج انتي مو وحد عن الي راحو اصلاً اني تعودت ع الخساره تعودت الكل تعوفني وتروح يعني مو شي جديد ، بس مال اذليني لاااااا لهنا وكافي.

سلمى .. اني اسفه داليا والمسيح كل الي سويته لمصلحتج ردتج تتزوجي وتعيشين سعيده ، لما كلتيلي انو هو ما تقرب منج كلت هذا اكيد مو قذر والا كان يكدر يستغلج بهذاك اليوم وياخذ الي يريده منج ، فكل ظني انو هذا شخص نظيف و..

داليا .. نظيف هههه فجأه حسيتي بي طاهر وملاك؟!!
مو هو هذا الي كلتيلي لازم تاخذين حقج منه ومتسكتين عنه؟!
مو هو هذا الي كلتيلي عنه حقير ولازم يتعاقب ع الي سوا ؟!
سلمى الناس مو مثل ما انتي مفكرتهم احنا مو بالميتم ، احنا موو كولنا اخوان مثل ما كانو يفهمونا ، احنا حالياً بوسط غابه القوي ياكل الضعيف ، واذا ضعفنا راح ياكلونا صدكيني .. متعرفين نظرات الاحتقار والاشمئزاز الي شفتهم بعينه واني اطلب منه يتزوجني !
لج خلاني احس نفسي رخيصه وبلا شرف ، كرهت نفسي صدكيني تمنيت اموت بنفس اللحظه.

سلمى .. حظنتها بقوه وبقن يبجن .... اني اسفه حبيبتي والرب مو قصدي أذيتج ، اني اسفه داليا اسفه اذا ضغطت عليج وخليتج بهيج موقف ، اتمنى تسامحيني ..

داليا .. بعدت عنها مسحت ادموع سلمى ، ماكو شي اسامحج عليه سلمى انتي بالنسبه الي العائله الوحيده الي عندي مستحيل بيوم ازعل منج او احقد عليج ، انتي اختي .. بس اني ضجت من الي صار متحملت وطلعت حركتي بيج.

سلمى .. حقج حبيبتي الي صار مو قليل ، زين هسه شنو قررتي تسوين؟!!

داليا .. حسوي الي لازم يصير ، حخلي يعرف منو الحثاله اني لو هو.

بقن يحجن اشويه الى ان اندكت الباب .. وصاحو لداليا لازم تروح لغرفة الآمر يريد يحجي وياها.

طلعت داليا وعيونها حمره دم من البجي .. بس حاولت تبين انو هي قويه ، دخلت للغرفة شافته كاعد ولا مهتم ، و لا كأنو مسوي شي اصلاً .. والآمر كان موجود ودكتور علي هم .. هي اتجاهلته تماما سلمت وكعدت.

الآمر .. اتفضلي بابا اكعدي ارتاحي.

داليا .. شكراً الك .

دكتور علي .. اشون صرتي داليا ان شاء الله احسن .

داليا .. نشكر الرب تمام .

علي .. الحمدلله ، و اختج اشلونها .. اقصد سلمى !

داليا .. بخير شكر ع السؤال .

الآمر .. بنتي تعرفين بقائكم انتي واختج بالمعسكر امر غير قانوني ، واذا عرف شخص القياده او وصل الخبر للوزاره ممكن تصير مشكله وكل الي هنا يتحاسبون ، واني يعز عليه اطلعكم انتي واختج منا بس انتي تعرفين القوانين ، ومع ذلك اني مستعد اوفرلكم سكن انتي واختج وبيتي مفتوح الكم.

داليا .. شكراً الك متقصر ، والي سويته كافي وزياده آوينتا اني واختي هذا فضل مننسى الك واكيد الرب يعوضك ع مساعدتك النا ، وان شاء الله اليوم بس يخلص التحقيق راح نخلي الغرفه ونسلمك المفتاح مع كل الشكر والامتنان الك.

الآمر .. يعني متقبلين ضيافتي الكم ابيتي؟!!

داليا .. ممنونتك اني واختي من كل گلبنا بس اعتذر منك منكدر نقبل دعوتك لانو صعبه انت بالاول والتالي شخص غريب وكلام الناس ميرحم ، فأني وسسلمى قررنا نروح نسكن بـأي دير او كنيسه الى ان الله يفرجها .

الآمر .. الي يريحكم وان شاء الله اني راح اساعدكم بهذا الموضوع.

داليا .. اشكرك متقصر.

أسيد .. سيدي اذا ممكن ننهي موضوع التحقيق لان عندي شغل ولازم اروح اكمله.

الآمر .. اي تمام خلونا نفتح التحقيق .. نادى ع ضابط التحقيق وفتح محضر بالحادث من جديد .. وجه السؤال الاول لداليا ..

الضابط .. اذا ممكن اختي تحجين الي صار بالتفصيل !!

داليا .. باوعت لأسيد شافت شكله متوتر ويهز برجله طول الوقت .. و واضح على ملامحه القلق بس مع ذلك ديحاول يبين انو ممهتم!
اتجاهلته وكأنه مموجود وحجت الي صار بالتفصيل .. ومكالت انو هي الي ضربت نفسها طلقه ، كالت مثل ما كال هو الدنيا ظلمه ومشافها زين فأطلق عليها ...!
نظرة الدهشه والصدمه على وجه أسيد متنوصف!!
اتوقعها راح تنتقم منه بعد الي صار بس هي فاجأته بتصرفها وكلامها..!
بداخله حس بنوع من الندم ع الي سوا بس ايضاً ما بين هذا الشي نهائياً
اخذو افادتها كامله والآمر كاللها انو المتهم بمثل حالتها لازم يتعاقب وبالعاده ينحبس بس نظراً للظروف الي صارت والوضع الي دتمر بيه ، ولأنه متأكد من نواياها فراح يتغاضى عن الموضوع ويكتفي بالتحذير فقط!

خلص الموضوع وسدو القضيه ... !

داليا بسرعه استأذنت منهم وطلعت راحت لغرفتهن لكت سلمى محضره نفسها ، طبعا ما عدهن لا ملابس ولا اي أغراض لان راحو بالانفجار ..

سلمى .. ها بشري؟!

داليا .. خلص كولشي ، القضيه انغلقت والآمر تساهل وياي واكتفى بالتحذير.

سلمى .. حضنتها بقوه .. الحمد والشكر للرب الي خلصج من العقوبه .

داليا .. مسحت ادموعها ، يلا سلمى امشينا قبل ليصير الليل و وين انروح .

سلمى .. ماشي اني جاهزه يلا.

طلعت سلمى وداليا دتتأكد ماكو شي بالغرفه حتى تسدها .. اول ما طلعت من الباب شافته واكف كدامها .....!!

داليا .. بصدمه باوعت ع سلمى ، وسلمى أشرتلها بأستسلام يعني مااعرف شعنده!!

سلمى .. اخذت المفتاح من ايد داليا وكالتلها اني راح انطي مفتاح الغرفه وانتظرج بره.

راحت سلمى وبقت داليا واكفه بمكانها مثل التمثال متعرف شنو تسوي .. رغم كل الوجع الي بگلبها منه ، و رغم كل الأذيه الي عاشتها بسببه .. بقت لعدة لحظات صافنه بوجهه ، وكأنها دتشوفه لاخر مره!

نار بگلبها دتحركها حستها .. عيونها انملت بالدموع من اتذكرت كلامه الي بعده يرن بأذنها .. بعدت نظرها عنه ورادت تروح .. مشت كم خطوها بس وكفها صوته!!

أسيد .. موافق.

للحكايه بقيه ❤️
رأيكم بالاحداث وتوقعاتكم للبارت القادم 🤗
شكراً جزيلاً لكل الي ديصوتون وشكراً لتعليقاتكم الحلوه 😘 واسفه البارت تأخر لان التصويت قليل ميشجع ابد ع الكتابه 💔