رواية في ارض الغرام انت دولتي الفصل الخامس 5 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لأي شخص ياخذ كتاباتي وينشرهم (ذمه)

بعد ما صار الانفجار الكل بالمستشفى العسكري فزع!
وطلعو حتى يعرفون شنو الي صار بس الي شافوا كان فعلاً كارثه ، الكنيسه الي تعتبر بيت من بيوت الله اتساوت ويا الارض ، والميتم نفس الحاله صار عباره عن هيكل مفحم !!
اجتي الاسعافات والشرطه ومكافحة المتفجرات وووو .... حتى ينقذون الاحياء ، ويطلعون القتلى ... بس للأسف الانفجار كان كولش قوي سياره مفخخه وحزام ناسف!!
والكل كان نايم وقت الانفجار فما طلع شخص حي .. ما عدا سلمى الي طلعت لدوامها .. بالاصح كان يوم عطله ، بس سلمى من كد قلقها وتفكيرها بـ داليا نست انو اليوم عطله مو دوام .. بدلت وطلعت من الصبح قبل الانفجار ( فعلاً كل واحد ويومه)*
الظاهر منيتها ما حانت لذلك الاسباب تهيئت الها حتى متموت!

المهم
سلمى تم اسعافها للمستشفى بعتبارها الشخص الناجي الوحيد ، طبعاً المستشفى هم تضرر بفعل الانفجار بس ماكو قتلى مجرد اصابات خفيفه نتيجه تكسر زجاج الشبابيك!

بنفس اللحظه الي صار بي الانفجار داليا استعادت وعيها..!
كعدت مفزوعه وتصيح .. بس ملكت احد يمها لان الكل كان مشغول بألي صار..!
بقت كاعده وتبجي .. الى ان اجاها الدكتور علي!!

علي .. الحمدلله ع السلامه!

داليا .. اني وين؟!!

علي .. بالمستشفى .. شنو متتذكرين شصار؟!

داليا .. خلت ايديها على راسها وحاولت تتذكر الي صار.. فجأه ألم فضيع صار براسها لما اتذكرت الي صار!!
بدا الاحداث تتسلسل كدامها ...... اخر شي كان لما ضغطت ع المسدس!
سكتت لحظات .. بعدها اجه شي على بالها .. رفعت راسها بسرعه وعلامات القلق بدت واضحه على وجها ، بصوت عالي مرعوب ومليان خوف ..

_اهلي عفيه اهلي ميدرون بيه من طلعت .. بدت تبعد الغطا عنها تريد تنزل من السرير .. لازم اروح اكيد هسه ديدورون عليه لازم اروح بسرعه ...

علي .. مشى ناحيتها بسرعه ، ورجعها ع السرير .. وين رايحه انتي خضعتي لعمليه قبل يومين ميصير تتحركين من مكانج الا بعد ما نتأكد من الجرح ، وبعدين انتي ع بالج بهالسهوله تطلعين؟!!
حضرتج اقتحمتي مكان عسكري ، واكو دكتور اتلبس قضيه و حياته اتدمرت بسببج وانتي الشخص الوحيد الي تكدرين تثبتين صحة كلامه ، فـ قبل متنحل هذي القضيه ونعرف الحقيقه مستحيل تخطين خطوه وحده خارج هذا المكان.

داليا .. اولاً اني مقتحمت شي .. اجيت حتى اشوف اخويه مصاب هنا .
وثانياً الدكتور الي تدمرت حياته بسببي مثل متفضلت كان راح يقتلني !
اعتقد هذا يسموو قتل عمد لانه اصلاً شافني وقتها وفهمتها اني لويش اجيت لهنا مع ذلك حاول .... وسكتت !

علي .. للتوضيح انتي الي اطلقتي النار على نفسج ، و حتى اذا كلتي هو الي اطلق عليج الرصاص فهذا يعتبر دفاع عن النفس لان انتي الي دخلتي عنوه لغرفته !
خصوصاً هذا مكان عسكري لا يسمح بي بدخول المدنيين ، فما بالج الي تدخل نص الليل؟!

داليا .. شنو قصدك ؟!

علي .. اختي ما قصدي شي ولا موضوعنا هذا ، بس الي احب اوضحه الج انو لو ما دكتور أسيد كان انتي ميته حالياً ، لان هو الي انقذ حياتج وعالجج .. فما اعتقد من الاصول تتهمي .

داليا .. اريد توصل خبر الاهلي انو اني هنا حتى يجون يثبتون صحة كلامي و يطلعوني منا.

علي .. ماشي هسه راح يجي ضابط تحقيق ياخذ اقوالج وانطي عنوان اهلج حتى يروحلهم .

داليا .. شنو هذي الهوسه الي بره شكو؟!!

علي .. صار انفجار قبل ساعه وهذا صوت الاسعافات .

داليا .. انفجار؟!!
وين هذا الانفجار شكله قريب منا؟!!

علي .. اني لازم اروح ، ابقي بمكانج ولتتحركين نصيحه لان مو بصالحج.

عافها دكتور علي وطلع .. رجعت هي نامت بمكانها .. اشويه واجاها ضابط التحقيق اخذ اقوالها
سألها عن اسمها و استجوبها بخصوص الي صار شرحتله كولشي ، بس استغربت من كاللها ضابط التحقيق ان الدكتور اسيد كال هو الي اطلق الرصاص عليها !!!
بقت ساكته محجت شي ، بعدين سألها عن عنوانها انطته عنوان سكنها .. بس لاحظت نظرات الضابط اتغيرت لما كالتله هي عايشه بالميتم الي يم المدرسه!!

الضابط .. ميتم كنيسة القديسه قصدج؟!!

داليا .. نعم ، لويش الاستغراب شنو تعرف احد هناك؟!!

الضابط .. انتي صارلج كم يوم هنا؟!!

داليا .. صارلي 3 ايام من اجيت اشوف اخويه .

الضابط .. اها يعني متعرفين الي صار؟!

داليا .. شنو هو الي صار؟!!

الضابط .. هاا .. ما صار شي .. ما عندج اخوان اخوات غير داني؟!!

داليا .. ما عندي بس اخت وحده وماتت من زمان ، و داني مو اخويه الحقيقي .. لا اخويه بالميتم هو وبعد اخت اسمها سلمى.

الضابط .. تمام ، وسلمى هذي اشكد عمرها؟!

داليا .. لويش السؤال حضرتك دتحقق وياي بالقضيه لو تريد تخطبني؟!!

الضابط .. اتفاجأ بكلامها وبصوت حاد كاللها .. انتي تجاوبين ع ألاسئله وبس مو شغلج ليش دا أسأل.
عموماً تكدرين ترتاحين اليوم الى ان نستدعي الطرف الثاني دكتور اسيد وناخذ اقوالكم كدام آمر المعسكر ، منطاها مجال تسأل عافها وطلع!

راح ضابط التحقيق وداليا بقت تبجي ع بالها راح تطلع بعد التحقيق بس ماكو فايده .. حتى عن داني متعرف اخبار لحد الان ، والي خلاها تنقهر اكثر هو محد سأل عليها من الميتم لحد الان .. رغم انو سلمى تدري بيها من طلعت معقوله محد مهتم لأمرها؟!!

بقت تفكر الى ان غلبها النعاس ونامت .... فتره من الوقت !

بنفس اليوم تم استدعاء أسيد حتى يجي للمعسكر .. وفعلاً للمغرب اسيد وصل ..!

علي .. يا هلا بأبو الاسود نورت .

أسيد .. لك هاي شصاير وين الكنيسه اختفت؟!!

علي .. يمعود لعد انت مشفت الاخبار غير اليوم استهدفوها هي والميتم وسووها رماد .

اسيد .. لا يا ربك ، وكم واحد مات؟!!

علي .. دكول كم واحد عاش .. محد طلع منهم بس بنيه وحده كانت طالعه مدري وين وقت الانفجار ولكيناها مشموره كدام باب المعسكر ، وهسه حالتها جداً تعبانه المسكينه مصدومه متحجي ولا حرف.

أسيد .. الى رحمة الله ، اتوقع كانو مستهدفين المستشفى بس ربك ستر.

علي .. اني هم مثلك نفس التخمين ، يلا كل واحد ويومه.

أسيد .. بشرني كعدت مصيبتي لو بعدها ؟!!

علي .. كعدت اليوم ويا الانفجار وخبصتنا بس تبجي تريد تطلع منا ، بس اني حجيت وياها وفهمتها انو انت انقذت حياتها.

أسيد .. لتذكرني لو عايفها ميته وخلصان ما كان صار كل هذا بيه.

علي .. كول يا الله اصلاً انت مشكلتك بسيطه لو تعرف مصيبتها تحمد ربك.

أسيد .. بعدم اهتمام .. شكو؟!

علي .. اليوم ضابط التحقيق اللي حقق وياها كالي انو هي يتيمه وعايشه بهذا الميتم والي مات قبل يومين واجتي حتى تشوفه مو اخوها الحقيقي وانما وياها بالميتم.

أسيد .. حسيت گلبي انقبض من كالي علي هذا الكلام .. مع ذلك حاولت ابين عدم الاهتمام ، أي وعرفت بألي صار؟!

علي .. لا مكلنالها لحد الان ، بلا هاي المخلوقه وين تروح اذا طلعناها منا؟!

أسيد .. خلي تخلصني من هذي المصيبه الي خلتني بيها وبعدها عسى متروح لجهنم الحمرا الله وياها.

علي .. لك انت شنو من گلب عندك ، دااكلك البنيه محد الها بهالدنيا غير الميتم وراح صار رماد ، اتكلي تروح لجهنم؟!!
استغفر الله يا ربي اني اصلاً شكو دااحجي وياك انت بلا گلب ، اروح اشوف شغلي احسن ..!

راح علي لواجبه بس هو بالاساس مميت على الشغل وانما يريد يطمئن على البنيه الي اجت اليوم (سلمى) شكله انعجب بيها ..!

أسيد غير ملابسه ونام بغرفته لانه حالياً متوقف عن العمل ... بقى نايم ويفكر بكلام علي..!!
وين تروح هاي ، ومنو الها ، البنيه حلوه والدنيا ما ترحم ، والي ما عنده ظهر  بهذي الدنيا يضيع !!
افكار وافكار اجت اباله بس بقى يحاول يتجاهلها الى ان غمض عيونه ونام..!

بالليل كولش طلعو سلمى من غرفة العنايه المركزه لان حالتها استقرت .. نقلوها لغرفة داليا .....!

داليا كانت  نايمه وأول ما فتحت عيونها ......... شافت سلمى امدده ع السرير الي بصفها....!!!!!

كعدت مثل المصدومه ع بالها دتحلم !!
بكل ما تملك من قوه سحبت نفسها من السرير وكامت راحت لسلمى .. خلت ايدها على راسها ودموعها تصب .. بدت تصحي بيها ...

داليا .. سلمى ، سلمى حبيبتي ، سلمى

سلمى .. فتحت عيونها بتعب .. شافت داليا كدامها ... بقت تباوع بوجها .. محجت شي بس نزلت ادموعها .. وحاولت تكعد!

ساعدتها داليا حتى تكعد بس مكدرت لان كتفها بعده يأذيها .. شافتها سلمى اشون ددتألم ، فسحبت نفسها وكعدت ، صعدت داليا يمها ع السرير وكعدت كدامها
سلمى حضنتها وكامت تبجي ....

داليا .. سلمى حبيبتي شصاير ، شجابج لهنا ولويش حالتج تعبانه هشكل منو الي مأذيج؟!!

سلمى .. بصوتي مخنوك وهي تبجي .. راحو .. داليا .. راحوووو ...

داليا .. بأستغراب ابتعدت عنها وباوعت بوجها بنظره خوف واستغراب ... منو الي راح سلمى شصاير ؟!!

سلمى .. اليوم الصبح فجرو الكنيسه والميتم ..

داليا .. دموعها تصب مثل الشلال .. بس نظرات الصدمه على وجهاا ممصدكه الي دتسمعه .. لزمت سلمى من ايدها بقوه وبصوت حاد مخنوك بدموعها .. شذتحجين انتييييي سلمى شدتحجيييييين .. لا لا اكيد دتكذبين عليه مستحييييل اصدكج

سلمى .. حظنتها بقوه وبقت تشهك .. وج راحووو كولهم محد بقى داليا .. عافونا وراحووو .. عمو أمين راح ، ماما ليندا راحت ، جوان ، لؤي ، العم توفيق .... اخوانا الي بالميتم كولهم راحوو داليااااا ......

داليا .. بعدتها عنها ومسحت دموعها بقوه .. سلمى شعرفج ماتو بس فهميني يمكن مميتين بعدهم .. مستحيل يعوفونا ... لا

سلمى .. اني سمعتهم سمعت الدكتور يكول محد طلع عايش كولهم ماتوو .

صاحت داليا صووت بكل قوتها لاااا  ... اجه دكتور علي يركض حتى يعرف شصار ... بوقتها كان واكف هو وأسيد ديحجون مره ثانيه و سمعو صوت الصياح !!
دكتور علي شاف داليا بحالة انهيار بس تصيح وتبجي .. جرحها ينزف وملابسها مليانه دم .. اجه بسرعه راد يلزمها  بس سلمى كانت حتوكع من السرير .. فأضطر يركض بسرعه ويلزمها لان رجلها مكسوره ومو زين عليها اذا وكعت  .. وهو كان الاقرب يم سلمى لذلك ساعدها وعاف داليا ...!

بقى لازم سلمى ويهدي بيها .. و داليا بقت تجي وتضرب ع جرحها .. اما أسيد بقى واكف ويباوع عليها متحرك ولا شعره ، كأنه ديستمتع بالمنظر!!

علي .. بصوت حاد ونبرة رجاء .. أسيد رجاءاً الزمها جرحها دينزف ، المخلوقه راح تموت.

أسيد .. طبها مرض خليها تموت .

علي .. أسيد دااترجاك مو لأجلها .. اتذكر انت دكتور ميصير الي دتسوييي هذا البنيه راح تموت.

أسيد .. كان واكف مثل التمثال بس كلام علي خلا يتحرك بتجاه داليا .. دنك عليها ولزم ايدها بقوه ، راد يثيتها حتى متتحرك.

داليا .. بقت تدفع بي بقوه .. وخر عني عوفني انت السبب ، كل الي صار بسببك ، مخليتني حتى اشوف اهلي .. الله ينتقم منك .. الله ينتقم منك .

أسيد .. كان لازمها بقوه بس بركان بداخله يريد ينفجر من كلامها ، عيونه صارت دم راد يخنكها ويخلص منها .. بس نظرات علي المتوسله اترجته يهدأ ...!

بقت داليا تضرب بي ع صدره وتحاول تتخلص من ايديه بس هو حضنها بقوه بحيث مكدرت تتحرك .. بقت تحاول تحاول الى ان راحت كل قوتها .. جرحها الي ينزف استنزف كل قوتها ... وهي تردد .. انت السبب انت السبب قفدت الوعي بين ايده !

سلمى بقت لازمه ايد علي وتبجي .. وتصيح داليا لااا .. داليا .....!

انطاهم علي اثنينهم ابره مخده حتى ينامن ... وفعلاً ما كعدن الا الفجر!!

كعدت داليا .. راسها يوجعها متكدر تتحرك .. كعدت شافت سلمى كدامها كاعده بسريرها تباوعلها وتبجي!!

داليا .. سلمى لتبجين بعد اكو امل .. داني اكيد بعده عايش وراح نرجع ننجمع من جديد

سلمى .. انتي شفتي لداني؟!!

داليا .. لا مشفته لان ...... حجتلها كل الي صار !

سلمى .. يا الهي هذا اشكد حقير ، كوله صوجج داليا كلتلج لترحين مسمعتي كلامي .

داليا .. هه لو باقيه بالميتم يمكن كان هسه اثنينا ميتين اني وانتي.

سلمى .. ديري بالج تسكتين عن حقج هذا الدكتور الحقير لازم يتعاقب ع اللي سوا بيج وياخذ جزاءه.

داليا .. سلمى هسه احنا بيا حال خلي نلكى داني اول شي وبعدها الرب كريم.

سلمى .. آمين.

بقن يسولفن عن كل الي صار لحد الصبح ..!

اجه دكتور علي اطمئن عليهن اثنينهن وانطاهن علاجهن .. مر اسبوع على هالحال

الى ان اتحسنت حالة داليا تقريباً وبدت تمشي على حيلها بس سلمى مكدرت تتحرك لان رجلها مكسوره ، الامر الي بالسجن انقهر على حالهن وتعاطف وياهن لان يتيمات وما عدهن احد فـ قرر ينطيهن غرفه بالمستشفى الى ان يتحسنن ويشوفن وين يرحن!

طبعاً داليا وسلمى عرفن من دكتور علي انو داني مات بنفس اليوم الي اجه بي للمستشفى .. سلمى انهارت تماماً وحالتها من سئ الى أسوء متحجي ولا تاكل بس تبجي !!
اما داليا حاولت تبقى قويه مو لاجلها وانما لاجل سلمى .. وفعلا كدرت اتساعدها تتخطى هذي المرحله بس مو كلياً يعني اشويه خلتها تاكل وتحجي وياها .. قررت انو تكرس حياتها لخاطر سلمى لأن ذكرتها  بأختها تاليا...!

بعد مرور شهر تقريباً سلمى فتحت رجلها من الجبس وبدت تمشي .. وصار لازم يتركن المعسكر لان هذي مسؤوليه وممنوع يبقن!

بس قبلها كان لازم تنتهي من سالفة قضية أسيد يلا يخلوها تروح ، اسيد رجع لبيتهم لان نظراً للاحداث الي صارت اضطرو يأجلون قضيته  !!

قبل موعد اخذ افادتها هي وأسيد بيوم .. سلمى كعدت ويا داليا وفهمتها انو ماكو كدامها غير حل واحد

سلمى .. باجر يطردونا منا وماعدنا غير هذا الحل لازم اتسوي داليا حتى منضيع بالشوارع!

داليا .. سلمى شدتحجين اشون اسوي هيج انتي تخبلتي؟!

سلمى .. لا متخبلت .. متخبلت .. بس اذا الدنيا اصلاً ما رحمتنا ليش احنا نرحم ؟!!
شوفي داليا اذا مسويتي الي كتلج عليه صدكيني راح تجين متلكيني هنا والمسيح راح تخسريني نهائياً.

داليا .. سلمى بس ..

سلمى لا بس ولا شي .. الي دتسوي عين الصواب واخر حل عدنا.

سكتت داليا .. وطلعت راحت لغرفة الآمر بس قبلها شافت غرفة أسيد !!!!!!!!!!!

غيرت اتجاها وراحت لغرفته ... دكت الباب ...

أسيد .. اتفضل...!

داليا .. دخلت وسدت الباب وراها ...

أسيد .. شافها انصدم .... انتي شدتسوين هناااا وشكو اجيتي لغرفتي!

داليا .. اكيد مشتاقيتلك واجيت اشوفك .

أسيد .. بغضب لج انتي الظاهر لسانج بعده طويل متأدبتي.

داليا .. اكيد حضرتك مناوي تكصه هالمره؟!!
شوف مجايه احجي وياك ولا اتعارك عندي كلام تسمعه وبعدها قرر براحتك.

أسيد .. ما عندي كلام ويا حثاله مثلج وامشي اطلعي احسنلج.

داليا .. هسه حروح للآمر مالتك بخصوص القضيه وانت تعرف كولش زين انو حياتك المهنيه متوقفه على افادتي .. فأذا تحب تكمل بهذي الوظيف ومتتدمر حياتك لازم تسوي الي اريده منك.

أسيد .. هه دتهدديني حضرتج؟!!

داليا .. اشون متفهم افهمها .. بس صدكني مدااتشاقه وياك والي كلته راح اسوي.

أسيد .. كعد وخلا رجل على رجل و بنبرة ساخره .. هه اييييي وشنو شرط حظرتج؟!

داليا .. تتزوجني.

.........

للحكايه بقيه 🤗
رأيكم بالاحداث حبايبي وتوقعاتكم للبارت القادم ❤️
سرعة النشر تعتمد على التصويت اذا التصويت ميشجع ما أنزل البارت 😑