رواية في ارض الغرام انت دولتي الفصل التاسع والعشرون 29 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

ساره .. هلله هلله ... اسيدوووو متزوج!!
لا ويبيع علينا ثگل واكره جنس حواء وميتحاجه .. ههه تاليها تتزوجلك خدامه؟!!
كنت حاسه اكو شي بينهم بس متوقعته يتزوجها !
وايناس طلعت عدها بلاوي وماضي اسود .. متزوجه وعدها بنات متدري عنهم شي؟!
والله مو هينه هالايناس الي يشوفها يكول ملاك .. حتى اني مدااستوعب الي سمعته
بس معقوله داليا تصير بتها؟!!
لا مااصدك ، ماكو ام تنكر جهالها لو مهما يكون مستحيل ، هذا اكيد فلم من افلام الفگريه داليوو  شافت العز وتريد تصعد بروسنا .. بس العتب مو عليها ع العار الي يلفي هيج شكول ..
هسه اهم شي انو اخيراً وكعت بأيدي يا اسيد وراح يصير الي ابالي وغصباً عليك .. وايناس اني اعرف اشون استفاد منها بس بالاول خلي اتأكد اكثر والزم دليل قوي وخلي انشوف شنو راح يكون موقفها كدام ابو احمد رجلها اذا عرف ماضيها الاسود!!
ويييييي اني من يمي خفت من ردة فعله لهذا المتعصب .. ههههه !

اسيد .. كلام ايناس وكرها لبناتها صدمني بحياتي مسامع ولا شايف ام تنكر ظناها..!
طلعت من بيتنا وشياطين الدنيا كلها تتطافر كدامي .. مااعرف شسوي !
منظر داليا ورعبتها كدامي مدايروح من بالي ، ومااكدر انتقملها من ايناس .. لو بيدي اكلها بسنوني .. اشرب دمها هم ميكفيني .. بس امي اشلووون؟!
وصلت للمزرعه الدنيا ليل دخلت البيت هدوء .. صعدت بوجهي لغرفتي لكيتها نايمه وام سعد غافيه ع الكرسي يمها..!
كعدت ام سعد سألتها هم كعدت؟!!

ام سعد .. لا مكعدت هاي نومتها من رحت وبس تهذي راح تموتني .. راح اتموتني!

اسيد .. ماشي تكدرين تروحين .

ام سعد .. اا.. اكـ..ـول .. دكتـ..ـور .. صحيـ..ـح .. دد.. داليا .. بنتها لأم .. احمد!

اسيد .. انتي شعرفج بهذا الموضوع؟!!

ام سعد .. هااا .. مو .. مـ..ـو .. اا .. انيي .. اني .. چنت هذا .. هنا .. ايي .. هنـ..ـا من اجتي .. ام احمـ..

اسيد .. قاطعها بغضب .. الي سمعتي تنسيي نهائياً وديري بالج اسمع احد يعرف بهذا الموضوع .. وامشي من كدامي بسرعه.

ام سعد .. اي .. اي .. ان شاء الله ، راحت ام سعد ركض لبيتها اول مره يعصب عليها الدكتور هشكل

اسيد .. وهاي بلوه جديده ام سعد عرفت وسمعت كلشي !
راسي يريد ينفجر من التفكير بمنو افكر لو منو .. امي اذا عرفت؟!
ام سعد الي راح تطش الخبر؟!
بأيناس الي مااعرف شراح تسوي بعد ما عرفت داليا بنتها؟!
لوووو داليا الي مااعرف اشلون اواجهها بعد الي صار ؟!
وعدتها محد يعرف بالموضوع ولا احد يتقربلها .. وتالي ايناس اجتي براحتها وانكشف كلشي!
عقلييي ميستوعب كل هذا الي ديصير .. مادري شسوي ماا ادري!
عفتها نايمه ونزلت مددت ع التخم بالصاله ونمت ، غمضت عيوني بس عقلي صاحي و يدوور من التفكير!
ما اعرف اشكد مر من الوقت واني ع هذي الحاله .. جان اسمع صوت الباب مالت البيت الداخلي دينفتح!!
فتحت عيوني بسرعه جان اشوفها...!

داليا .. ما ادري اشكد بقيت نايمه بعد الي صار ذبيت روحي مثل الميته ، من كعدت لكيت نفسي بغرفته!!
ومحد يمي بس اني!
كمت من فراشي بصعوبه احس نفسي خاويه وراسي يريد ينفجر من الالم!
مشيت بخطوات متثاقله وصلت للدرج مديت راسي دااريد اصيح ام سعد تجي تنزلني مااكدر انزل رجليه متعيني!
مديت راسي شفته نايم بالصاله ع التخم ومخلي ايده ع عيونه!
مااعرف شصارلي من شفته گلبي وجعني .. كل توازني اختل ردت اوكع بس لزمت المحجر مالت الدرج بكل قوتي و وكفت!
درت وجهي ورجعت للغرفه .. كعدت ع السرير و دموعي اتجمعت بعيوني .. وين وصلنا .... و اشون حبقى هنا بعد؟!
خلص الاتفاق الي بينا حينلغي .. هسه تأكد بنفسه انو ايناس امي بعد ماكو عذر يخليني ابقى هنا..!
لازم اروح .. اي لازم اترك البيت واروح بدون ميعرف بيه .. مااريد اشوفه ولا اسمعه وهو يرمي عليه يمين الطلاق!
اول ما مرت هذي الكلمه ع بالي دموعي نزلت لحالها .. اييي يا داليا الظاهر مكتوب عليج الحزن والتعاسه طول عمرج.
بجيت .. بجيت .. بجيت .. لحد ما صفى راسي .. الي حرك روحي اكثر من كولشي انو كنت ابجي لانو حفاركه!!
لانو بعد مراح اشوفه .. ولا اشوف عيونه الي دوختني بي!
اشكد غبيه اني ..و بلا گلب !!
ههه بلا گلب؟!!
لما كنت بالميتم كنا نتعارك احنا الاطفال بينا وبعد لحظه اروح العب وياهم .. ويطردوني وهم ارجع الهم كانت سلمى متعرفني بعدها .. وكانت دائماً تضربني ومتخليني العب فالعم امين يعاقبها ع هذا تصرفها ويمنع عنها الغده .. كنت اني اخذ الاكل مالتي وانطي الها بلا ما احد يعرف !
ههه بس كالعاده العم امين ميفوته شي كان مراقبني واني اخذلها الاكل .. فمره واني دااروحلها لزمني كعد وياي وحجه هواي كلام من ضمنه كالي .. (داليا انتي ما عندج گلب)!!
بوقتها خفت هواي .. كلتله عمو امين يعني راح اموت اني مثل بابا .. ماما كالتلي بابا مات لانو ما عنده گلب!
ضحك بوقتها .. كالي لا متموتين بس لما تكبرين حتعرفين شنو معنى كلامي هذا...!
بعز حزني ومن بين دموعي ضحكت .. ضحكت من كل گلبي لما اتذكرت هذي الجمله .. هسه عرفت شنو معناها.
رغم كل الي سوا بيه .. حتى لما اخذني غصباً عني .. والطريقه الوحشيه الي عاملني بيها .. بوقتها كرهته كره عظيم و وعدت نفسي ابقى اكرها لحد اخر يوم بعمري ع الي سوا .. بس هسه من مرت ابالي فكرة حبتعد عنه ...... احس واحد خمش گلبي .. ألم وشعور غريب اجتاح كل ذره بيه!
كمت من مكاني وطلعت لغرفتي .. فتحت الباب لكيتها مكلوبه رأساً على عقب .. اتذكرت الي سويته بعد ما راحت ايناس ، دخلت امشي بين الاغراض الي مكسره والكزاز .. فتحت الديلاب اخذت جنطه خليت بيها كم هدمه الي وبدلت ملابسي غسلت وجهي ونزلت !
بهدوء جريت جنطتي بس اني خطوه ليكدامي وعشر خطوات ليورا ما اكدر اروح بدون حتى ما اودعه .. نزلت للصاله شفته ع نفس النومه !
وكفت بعيد عنه صفنت عليه ودموعي تصب حتى انفاسي كتمتها ليسمعني .. رغم عيوني مشبعت شوف من عنده درت وجهي ورحت للباب اول ما فتحته جان يفززني صوته!!

اسيد .. وين؟!!

داليا .. الحزن والوجع بلحظه تحولو الى خوف .. جمدت بمكاني ايدي ع يدة الباب مااكدر حتى انزلها .. احس بروده بدت اتدب بجسمي !!
محجيت شي ولا نطقت بحرف واحد .. وهذا الشي الي يخبله ويخلي يفقد اعصابه كل مره .. بس شسوي انرعبت من سمعت صوته ع بالك بايكتلي بوكه .. مسويتلي جريمه!!

اسيد .. بصوت حاد مليان غضب .. دااحجي وياج باوعيلي !

داليا .. مااكدر .. ما اكدر .. صوت بعقلي يصرخ داليا انداري وباوعيله لا تطلع خبالاته وتعرفين اخر مره من عصبتي شصار .. كان هذا الصوت يتردد براسي بس جسمي كان جامد مااعرف شصارلي!

اسيد .. بكل غضب شال المنفضه وبصوت عالي ... بااااااااااااااوعيلي داااااالغييييييييي وياااااااااااج .. ب ا و ع ي ل ي!

داليا .. بلا وعي وبدون اي تفكير جسمي انصاع لصوته انداريت عليه بهدوء .. محجيت اي شي بس بقيت اباوع بوجهه .. عيونه كانت مليانه غضب مثل الي يتطاير منها شرر .. وملامح وجهه كانت تعبانه حيل .. من منظره عيوني دمعت لان اعرف كل هذا بسببي!

اسيد .. وين تردين بهالليل؟!

داليا .. بصوت مخنوك بالعبره .. اعتقد اتأكدت من كلامي وعرفت .. عرفتـ ..ـها امـ..ـي ..

اسيد .. اي عرفت وشنو يعني؟!

داليا .. يعني الاتفاق الي بينا لهنا وينتهي .. اتفقنا ابقى على ذمتك لحد ما تتأكد وخلص اتأكد .. صار لازم اروح.

اسيد .. كان تحجي وكلامها سهام توجع كل ذره بيه .. اني نفسيتي اتدمرت ، عقلي تعب من التفكير ، النوم ميمر على عيوني .. محتار اشلون اهديها ، انسيها الي صار ، افهمها انو اني ماادري من اجت اينااس اصلاً .. احميها وما اخلي احد يأذيها او حتى يفكر مجرد تفكير يزعجها .. وهي بكل برود اتريد تتركني وتروح!!!!
مكدرت الزم اعصابي اكثر انفجرت بيها .. طلعت كل حركة گلبي بيها ..
بصوت حاد مليان غضب بس بهدوء ..

_انتي تردين تخبليني ... ها؟!!
احجي جاوبيني .. تردين اتخبليني .. لج اني ابو ابويه محترك افكر اشلون اشرحلج اشلون انسيج الي صار .. وانتي تديرين وجهج وترحين حتى متكلفين نفسج ع الاقل ودعيني!
كولي هذا الحيوان الي دمرت حياته من اول لحظه دخلتي بيها لليوم .. صح اني حقير وسويت اشياء متوحشه وياج .. بس مو هيج تلبسيني !
بكل غضب شال الطاوله الي كدامه وركعها بالكاع ..
تردين ترحين مو؟!!
تردين ترحين وتنسين كل الي صار وتبدين حياتج من جديد بلا اسيد وبلا مشاكله مووو؟!!
ماشي روحي .. روحي ويلعن اليوم الي شفتج .. يلعن ابو الساعه الي طلعتي بيها بوجهي .. روحي روحي .. بس خلي ابالج لتفكرين مجرد تفكير تراويني خلقتج بعد لو تخليني اشوفج اصلاً .. لان والله .... والله يا داليا ما راح ارحم بيج!

داليا .. كان يحجي بحرگه وعصبيه جسمه كله كان يرجف وشرايينه حتنفجر .. عيونه تجدح نار و ........ دموع!!
عيونه مليانه دموع بس متنزل .. كل ذره بي كانت تهتز وكأنه يصارع وحش بداخله يريد يطلع ويحرك الكون!!
مكدرت انطق بحرف واحد كدام كل هذي المشاعر والانفعالات الي كدامي .. كان كتله من الغضب و واكف ..!
كالعاده ما عندي اي رد غير دموعي .. بقت تنزل على خدي واني بحالة صدمه من الي دااشوفه!

اسيد .. بغضب .. ولي من وجهي شمنتطره ؟!!!!

داليا .. اسـ..ـيـ..ـد ..

اسيد .. كلمه وحده لتحجين .. روحي الله وياج.

داليا .. مو بكيفك .. مووووو بكيفك مااحجييييي .. وكاااافييي .. كافي تملي عليه شنو الي اسوي وشنو الي مااسوي .. مو هو هذا اتفاقك وهذي شروطك ؟!
مو انت الي غصبتني ع هذا الزواج؟!
مو انت الي كلتلي بس اتأكد من هذا الموضوع اطلكج ؟!
هياتك اتأكدت وعرفت كولشي .. واني داانفذ شروطك ودااروح بعد لويش ضايج ومزعوج ؟!
لو انقهرت لانو ما حصلك الشرف تطردني؟!
كنت منتظر ابقى كاعده مثل الچلب وتجي تطردني بنفسك ؟!
كاااافي .. كااااااافي تعبت .. تعبت منك ومن ظلمك .. كافيييي .. تعرف؟!
مو انت الي تلعن الساعه الي شفتني بيها لاااااا اني الي لازم العن گلبي الغبي .. گلبي الي ذلني وخلاني اتحمل كل هذا غرورك وتكبرك .. گلبي الي حب واحد بلا ضمير .. بلا احساس !

اسيد .. انصدمت ممصدك الي دااسمعه هذي اكيد دتهذي ومتعرف شدتحجي لانها معصبه!

داليا .. من بين شهكاتها ودموعها .. ايييي ايييي لتصفن بوجهي احبك اي احبك .. من اول يوم شفتك گلبي الغبي ورطني بيك .. من اللحظه الي شفتك بيها بالمعسكر حبيتك .. وحاولت بكل الطرق بكل ما املك من قوه اشيلك من هذا الگلب مكدرت مكدرت .. سويت بيه الي حتى الحيوان ميتحمله ومكدرت اشيلك منه!
تصور احب الانسان الي من اول يوم عرفني كرس كل حياته حتى يذلني!
حتى يشوفني مكسوره !
مو كافي الي سوته بيه خالتك انت كملت الي هي مكدرت عليه .. اهنيك.

ولتتصور كلتلك هذي الكلمه حتى تأثر بيك .. لااا مااعتقد هذي الكلمه حتهزك اصلاً او حتى تغير شي .. لانو هذي الكلمه مموجوده بقاموسك ، واتطمن راح اروح .. اروح ومراح اخليك تشوف خلقتي بعد نهائياً ..
رحعت فتحت الباب ودااريد اطلع .. محسيت غير ايده بكل قوتها دفعت الباب!!

اسيد .. احس روحي دتحترك بدموعها .. وكلامها .. كلامها حبل والتف على رگبتي .. الي يسمع هذي الكلمه المفروض تكون اسعد لحظه بحياته .. بس اني دااختنك .. نار دتحركني .. اشلوون اصدك واشلون اتحبني ، ممترقع عدها هيج شعور تجاهي اصلاً؟!
شنو الي شافته مني .. وحتى اذا تحبني مثل مدااتكول معقوله بعد الي سويته بيها يبقى حبها ؟!!
اووووووووووووووف يا ربي دخيلك اخذ روحي وخلصني .. شسوي هسه ؟!
بعد الي كالته اشلون اتصرف وياها .. اشلون راح اكدر اخليها تبقى ؟!
مشيت بسرعه سديت الباب وبصوت حاد ..

_ماكو روحه.

داليا .. وخر عن طريقي.

اسيد .. ماكووو ر..و..ح..ة .. كلت.

داليا .. مو بكيفك.

اسيد .. لتعانديني احسنلج.

داليا .. شهكاتها ارتفعت ودموعها .. بصوت مخنوك وبجي .. اعاااااند .. واعااااند .. واعاااااند .. وخر عن طريقي عوفني بحالي انتووو شنو تردووون مني .. شنوو سويت بحياتي حتى الكل ديعاقبني هشكل؟!
كااااااااااااافي .. مااتحمل بعد كااااااااااافي .. اني بشر مثلكم دم ولحم .. لا ام مثل الناس .. لا ابو عندي .. حتى الاخت الي كان ممكن تساعدني على هم الزمان وقهري ماتت .. شنو باقي بعد شنوووو؟!

اسيد .. كافي داليا.

داليا .. ايييي كافي خليني اروح.

اسيد .. استغفر الله يا ربي كلتلج ماكو روحه انتي متفهمين لووو شنووو؟!

داليا .. اي ماافهم لويش ماكوو روحه بلا فهمني ؟!!

اسيد .. لان اني كلت ماكو روحه!

داليا .. بعصبيه وبجي .. وخر عنييي دااكولك وخر .. وخر .. وخر..!

اسيد .. بصوت عالي .. مترحين مترحييييين .. م ت ر ح ي ن.

داليا .. ليش مااروح لييييييش .. ليييييش المنوو باقيه فهمني المنوووو؟!

اسيد .. لاني اني .. اريدج.

داليا .. للحظه او قل حسيت بأمل انو يكون عنده ولو ذرة شعور تجاهي .. الكون كوله اتوقف من كال اريدج .. بس كالعاده لازم يدمر كولشي.

اسيد .. اقصد .. يعني اريدج تبقين هنا .

داليا .. هه ولويش ابقى هنا ..؟!

اسيد .. ايناس مراح تعوفج بحالج بعد ما عرفت بوجودج.

داليا .. ايي وانت شنوو خايف عليه؟'

اسيد .. بلا غبائج وكافي امشي اصعدي لغرفتج.

داليا .. ما اصعـ..

اسيد .. قبل لتكمل كلامها شلتها وصعدتها لغرفتي .. هي بقت تصيح نزلني .. نزلني وتضرب بظهري فتحت الباب شمرتها ع السرير قفلت الباب ونزلت!
بقت هي اتدك بالباب وتصيح !
خليت راسي ع المخده اريد انام مااكدر كلامها يدور براسي .. وشعور بداخلي غريب .. غريب بس حلوو .. احس نفسي مسطور .. غبي .. دايخ .. ماادري شبيه!
بهذا اليوم بقيت للصبح كاعد مااكدر انام ولا تغمض عيني .. هي بقت اتدك بالباب كم ساعه بعدين هدئت واختفى صوتها..!

داليا .. شمرني بالغرفه وراح .. ردته بس يفتح الباب ويخليني اروح .. اييي لازم اروح بعد الي كلته اله اشلووون ابقى!!
ياااااغبائج يا داليا اشلون تكوليله احبك؟!
ولج انتي الى متو راح تبقين تمشين ورا گلبج الغبي .. هسه اشلون بيج؟!
بيا وجه بعد اباوع بوجهه .. ؟!
اووووووف يا رب اخذ روحي وخلصني .
من التفكير والبجي خليت راسي ونمت .. فتحت عيني الصبح لكيته واكف على راسي .

كعدت مذعوره من شفته.. ضليت ابلعم ..

_انت .. انت شدتسوي هنا؟!

اسيد .. لحد ما طلعت الشمس اني كاعد .. طلعت ركضت كالعاده ورجعت اريد ابدل ملابسي بالغرفه وهي نايمه بيها؟!
صعدت بهدوء فتحت الباب ودخلت لكيتها نايمه .. والمنظر مااحجيلكم يسطر .. شعرها مغطي وجهها ورجليها كل وحده بصفحه .. ضحكت من كل گلبي بس بداخلي !
بقيت صافن عليها عيونها كانت وارمه من البجي .. گلبي انقبض من شفتهم .. بهذي اللحظه كعدت هي ... من شافتني انرعبت .. كالتلي شتسوي هنا؟!
درت وجهي عنها بسرعه ورحت للديلاب ..

_اريد ملابسي الظاهر نسيتي هاي غرفتي!

داليا .. وهي تمسح عيونها حتى تصحصح .. هاا .. ايي .. نسيت!

اسيد .. الدنيا الظهر كافي نوم .. اخذت ملابسي ودخلت للحمام الي بغرفتي !

داليا .. م شفته دخل للحمام كمت اريد اطلع من الغرفه ، كلت بس يدخل اخذ جنطتي واطلع .. بعدني مطالعه جان صوته يفززني ..

اسيد .. ديري بالج تفكرين تشردين .. لو تطيرين لسابع سنه الكاج وصدكيني مراح يصير خير.

داليا .. هفففف يا ربي هذا شنو يقرا افكاري .. شعرفه فكرت انهزم؟!
شمرت الجنطه وطلعت من الغرفه .. بعيداً عن كلامه والتهديد .. اذا فكرت اشرد هسه وين اروح؟!
اروح لسلمى؟!!
هي سلمى زواجها محد يدري بي وممكن تصير كارثه بأي لحظه اذا اهل علي عرفو .. انوب اني اروح اكعد على گلبهم؟!
اصبري داليا اصبري .. لحد متلكين مكان ترحين بي وتخلصين من هذا المتوحش.
نزلت جوه رحت للمطبخ غسلت وسويت ريوك خليته ع السفره .. اتذكرت بعدني بملابس البارحه من ردت اروح ومغيرتهم!!
صعدت لغرفته حتى اجيب جنطتي الي بيها الملابس وانزل ابدل بالحمام الجوه .. فتحت الباب ودخلت ... جان اشوفه واكف كدامي ملابس شي بس المنشفه لافها عليه!!!!!!!!!!
ياااااااا رررررررررررب دخيلك .. انصدمت من الكائن الي واكف كدامي جسمه وعضلاته .. حتى كرش ماكوو معقوله هذا عراقي!!
بعد صدمه ماتدري اشكد استمرت رفعت عيني لكيته صافن عليه وابتسامه خبيثه مرسومه على وجهه !!!!
اني بسرعه درت وجهي عنه .. محجيت شي اخذت الجنطه وطلعت ركض!
نزلت للحمام غسلت وبدلت !
نزل هو مبدل لابس تيشيرت وبيجامه لونهم اسود ورصاصي!
درت وجهي عنه ع اساس ممهتمه .. واني اصلاً مركزه بي اكثر من روحي !!
اتريك وكالعاده غصبني اكعد ويا واكل .. اكلت بس اني اصلاً راسي مرفعته من الماعون حتى مااباوع بعينه!
كملت وكمت هو هم كام اخذت المواعين دااغسلهم چان يصيحني!

اسيد .. لتطلعين من المطبخ.

داليا .. لويش شكو؟!

اسيد .. لتناقشين لتطلعين وخلص.

داليا .. عافني وراح .. بعدين سمعت صوت زلم ويا بالبيت اني مطلعت اصلاً مااعرف شنو ديسوون بس صوت هوسه ودينقلون مدري شنو؟!
بقو من الصبح لحد نهاية الظهر هم يشتغلون واني محبوسه بالمطبخ!
خليت راسي ع الطاوله وغفيت من الكعده والصفنه وحدي نعست!
مااحس غير صوته المرعب ديصحيني .. فزيت لكيته واكف بباب المطبخ ..

اسيد .. كومي تعالي ورايه.

داليا .. وين .. شكو؟!!

اسيد ..الصبح خابرت ع ابو سعد كلتله تجيب عمال يجون ينظفون غرفتي .. طبعاً هو ميسألني ولا يناقشني بأي شي لان يعرفني مااقبل احد يتدخل بخصوصياتي .. فدائماً شنو اكله ينفذ وبس .
على ما سبحت وتريكت صدك اجوي العمال .. صعدهم ابو سعد ونظفو الهوسه الي سوتها الخانم .. طبعاً ممكسره الاثاث هي بس التحفيات والاغراض الخفيفه الي بالغرفه والمرايه مالتها .. دزيت ابو سعد يشتري اغراض بمكان الي انكسرو .. وللعصر كلشي كمل!
من كملو وراحو .. رحت دااصيحها من المطبخ لان انحبست من الصبح .. دخلت لكيتها نايمه !
صحتها فزت .. كالعاده لازم تحجي وتسأل
استغفر الله .. ميفيد بيها الحجي هالمخلوقه .. عفتها وصعدت

داليا .. صعدت ورا لكيته واكف يم غرفتي!!
خير يا طير شكوو شصاير الغرفه مهجومه شعنده بيها .. وصلت يمه فتح الباب .. !!!!!!!!!!
واذا بالغرفه راجعه احلى من قبل .. معقوله ، زين اشوكت كدر يسوي كل هذا؟!!
من الصدمه مكدرت احجي .. بس فرحت لان حرجع الغرفتي ومااضطر اشوف المشهد الي شفته الصبح بعد!
محجيت شي وهو هم عافني وراح لغرفته .. اني دخلت والفرحه شايلتني ع بالك من صدوك هذي الغرفه ملك الي وفرحت بيها ..!
بعدني بصدمتي .. جان يرجعلي ..

اسيد .. امشي صبيلي غده متت من الجوع.

داليا .. شنو غده؟!

اسيد .. شنو شنو غده متعرفين شنو يعني غده؟!!

داليا .. لااا قصدي .. ممسوين غده اليوم ام سعد ما اجت.

اسيد .. وانتي صارلج سنتين بالمطبخ شنو چنتي تسوين؟!

داليا .. هاا .. موو .. انت مكلتلي .. ما ع بالـ..

اسيد .. استلم .. حتى غده ممسويه .. جريت الموبايل اتصلت ع ابو سعد كلتله يجيبلنا غده من بره!
نزلت كعدت بالصاله فتحت التلفزون ودااباوع .. شفتها نزلت ودتروح للمطبخ !
بصوت حاد وبرود..

_وين؟!

داليا .. حسوي غده.

اسيد .. هه لا نادره والله .. لو نبقى عليج انموت من الجوع .. اطلعي لتعبين روحج راح يجي الاكل.

داليا .. هففف يا ربي .. كلتلك ام سعد مااجت وانت مكلتلي سوي غده شعرفني اني اشتم ايدي ؟!

اسيد .. ضبي اللسانج احسنلج!

داليا .. بصوت خافت .. هو هذا الي فالح بي تهدد.

اسيد .. شكلتي؟!

داليا .. مكلت شي .

لحظات واجه الاكل صاحني واكلت غصباً عني .. مرت الايام ويا ع هذا المنوال اني اعاند وهو يغضب .. الى ان بديت اتعود عليه تقريباً .. مرت الاشهر واني ويا الفاره والقط .. بس اشويه اشويه بدينا نفهم بعض و نحاول نتجنب المشاكل .. او بالاحرى اني الي اتجنب اعصبه .. لما يروح للدوام تبقى وياي ام سعد .. بس مااعرف لويش ما كان يطول من يروح يعني الي اعرفه من كنت يم اهله يبقى مرات شهر ميجي للبيت .. اما هنا ماكوو كم يوم واشوفه كدامي .. ومن يروح لبيتهم هم ميطول يوم يومين ويجي!
مااعرف اذا خايف عليه او يشتاقلي !!
المهم .. فد يوم كاعده وجان يدخل هو .. بوقتها كان بالدوام صارله 10 ايام تقريباً ..
دخل سلم عادي .. وبعدها سبح وبدل .. صبيت غده واتغدينا .. هو كعد عراالابتوب مالته مااعرف شنو يسوي واني كعدت اتفرج ع التلفزون .. چان يكولي روحي جيبيلي اوراق من غرفتي تلكيهم بالجاكيت!!
اني استغربت مو من عادته يطلب هيج طلبات!!
بلا كلام حتى لتصير مشكله كمت رحت جبتهم واجيت انطيتهيا .. اخذهم وانطاني منهم ورقه ..

اسيد .. هاج اقريها.

داليا .. شنو هذي؟!

اسيد .. مره بحياتج سوي شي بلا متلغين.

داليا .. ردت احجي .. بس بلعت الكلام احسن متصير عركه .. فتحت الورقه .. وهناااااا كانت الصدمه .... شنووووو هذييييي .. معقووووووله؟!!

اسيد .. اي معقوله هذي ورقة قبولج من المدرسه بي راح تدرسين بالبيت وترحين بس تمتحنين.

داليا .. مدااصدك ... اشوووون .. واشوكت .. مدااصدك.

اسيد .. لا صدكي .. وباجر الكتب مالاتج يكونن عندج .

داليا .. مااعرف شنووو احجي من شفت ورقة قبول التقديم للامتحانات .. واسم المدرسه واسمي .. يمكن هذا اسعد واحلى شي صار بحياتي .. حلم عمري كان اكمل دراستي .. وديتحقق .. بلا وعي مني اتقربت منه وحضنته بقووه ..
_شكراً.. شكراً .. شكراً

اسيد .. بصوت جامد .. كل عام وانتي بخير.

داليا .. جمدت بمكاني من كالي اخر جمله ..شنووو .. شيقصد ..هنا حسيت ع نفسي اني سدااسوي .. امدااااايه اي والله .. هاي اني وييييين ؟!
بهدوء بعدت بس الفشله مغطيتني .. بصوت مرتبك .. ومرفعت عيني بعينه

_شنوو كل عام وانتي بخير؟!

اسيد .. اليوم عيد ميلادج موو 1 بشهر 11 صح؟!

داليا .. هااا .. ايي .. بس .. انت .. انت اشون عرفت!

اسيد .. مو مهم .. المهم اعتبري هذي هدية ميلادج .

داليا .. شكراً الك .. عفته وكمت من يمه ركض .. صعدت لغرفتي واني ميته من الخجل .. وبنفس اللحظه فرحانه .. فرحانه .. والي فرحني اكثر انو امو شخص يعرف ميلادي ومهتم بيه !
طبعاً كلتلكم اني ميلادي مكتوب بهويتي الي سووها بالميتم .. مااعرف اذا صح اني انولدت بهذا اليوم او لا بس هو هذا الي مكتوب .. وحتى اذا مو صحيح فالمهم انو اتذكرني ... اكو شخص هناني بهذا التاريخ حتى اذا مو حقيقي .. ع الاقل احس بوجودي مثل باقي الناس!
ثاني يوم فعلاًوصلو الكتب .. واني من فرحتي حتى الكاع مسايعتني .. من هذا اليوم التهيت بالدراسه .. ركزت كل عقلي وبالي بالدراسه .. كنت اخلص يومي كوله بس اقرا .. حتى هو مااشوفه ولا التقي بي غير نادراً من انزل اكل ويا .. وهو هم ما كام يجي للبيت هواي اغلب الوقت يخلصه يم اهله .. بداخلي كنت اشتاقله هواااي بس كنت مركزه ع هدفي اكثر .. كنت اريد امتحن وانجح حتى اصير فد شي اله قيمه .. احسن من الحياة العدم الي عشتها وعايشتها .. اذا صارت عندي شهاده بعد محد يكدر يوكف بوجهي ولا يمن عليه!
مرت الايام على هذا المنوال ..

فد يوم اجه اسيد وجهه تعبان وحتى ما اله خلك يحجي!!

من شفته انصدمت شكله متغير حيل وعلامات التعب واضحه عليه .. دخل الغرفته وسد الباب .. اني القلق امل گلبي اكل مو من عوايده يجي بهدوء هيج .. ولويش شكله تعبان؟!
بقيت كاعده ع نار .. الى ان طلع من غرفته بالليل .. سلمت عليه ما رد عليه!

_اسيد خير شصاير اشو مو على بعضك؟!

اسيد .. هي انشغلت بدراستها وكمت مااشوفها الا صدف .. يعني شوفتها صارت حسره عليه .. وحتى من اشوفها كتابها بأيدها وبالها مو يمي ابد!
طبعاً هذا الشي تعبني هواي لان متعلم عليها وعلى هوستها وعنادها .. بس مو هذا السبب الي دمرني .. السبب هو امي !!
من اروحلها للبيت تلح عليه واكلت راسي اكل الا تتزوج!
مااعرف شنو سبب اصرارها الغريب هذا فجأه .. طبعاً مستحيل تكون عرفت شي لانو ايناس بعد الي صار ثاني يوم اخذت رجلها و سافرت لبيتها .. ولو كايله شي الامي مستحيل امي تبقى ساكته كان كلبت الدنيا عليه!!
زين شنو سبب اصرارها هذا والحاحها الا اتزوج؟!!!!!
كنت اعالج هذا الشي بالتأجيل واشرد للدوام حتى اخلص من نگها .. الى ان نزلت اخر مره لكيت امي متخربطه وواصله للموت .. هنا كلشي انهار بعيني امي عندي اغلى من روحي دااشوفها دتموت كدامي .. اخذتها وطلعت بيها للمستشفى !!
كالولي حالتها تعبانه ولازم ترتاح ومحد يزعجها ابد ولا تنقهر .. من هذا الكلام!!
اخذتها ورجعنا .. بالطريق فتحت وياي نفس الموضوع وكالتلي اذا ما سويت الي اريده لا انت ابني ولا اعرفك!!
زين بهالحاله اني شسويييي؟!
ما اكدر ارفض امي راح تنقهر وتعصب .. وهذا الشي ممكن يموتها لان گلبها گلش تعبان !
ولا اكدر اقبل ع الي تريده هذا المستحيل بعينه .. اشلون اتزوج .. و داليا؟!!!
سكتت بس اني دااموت من داخلي .. اضحي بيها لو بأمي؟!
هي ممكن تتحمل اذا عرفت .. اكيد ما راح تموت .. بس امي الدكتور كال اقل انفعال ممكن يوگف عضلة القلب!
اخواتي من سمعن شنو كال الدكتور اتخبلن .. كلهن اجتمعن عليه ملامه وحجي .. تريد تموت امي .. وامي اذا ماتت بخطيتك .. ووووو من هالكلام!
كدام كل هالضغوظات والاهم من هذا كله ... امي .. !
وافقت اسوي الي يردو .. خطبولي بنيه مااعرفها ولا شايفها .. بالبدايه اقترحوو اتزوج منار .. رفضتها رفض قطعي وكلتلهم لو تموتون كلكم مااخذ هاي الحيه .
وفعلاً غيرو رأيهم بس حتى اوافق .. صارت الخطوبه بشكل رسمي رحنا الاهل البنيه وخطبناها .. مسويت لا حفله ولا هوسه مجرد تلبيس حلقات وخلص .. طول هذي الفتره اني مرحت لبيت المزرعه ولا شفت داليا .. كنت اتهرب منها مااكدر اواجها حتى اذا هي متعرف فأني مااكدر اخلي عيني بعينها واكذب!
قررت اروح للدوام انهزم منها ومن اهلي ومن خطيبتي الي مااعرفها اصلاً .. رحت لبيت المزرعه حتى اخذ ملابسي وغراضي ومناك اطلع للدوام بلكي اموت هناك واخلص.
اول ما دخلت شفتها كاعده بالصاله وكتابها بأيدها دتقرا .. محجيت شي صعدت الغرفتي ذبيت روحي ميت من التعب النفسي والارهاق الي دااعيشهم .. !
ماكعدت غير الدنيا ليل .. طلعت من غرفتي لكيتها واكفه يم غرفتها سلمت عليه مرديت عليها .. احس نفسي مسوي جريمه مااكدر احجي وياها ..!
نزلت جوه اجتي ورايه .. بقت تسأل اشبيك وشصاير كلتلها ماكوو شي .. ومنطيتها مجال تسأل بعد .. اتعشينا وصعدت اخذت ملابسي وطلعت للدوام بالليل متحملت ابقى يمها .. كلما تباوعلي احسها راح تعرف الكذب الي بعيوني!
طلعت من البيت للدوام وشهر كامل مرجعت .. الوضع بالدوام كان زفت كل يوم هجوم وكل يوم موتى وجرحى .. خلصت اجازتي وتوسلو بيه انزل للبيت لان تعبت كلش بس اني ولا اسمعهم .. شهر و20 يوم اني دك واجبات النوم مشايفه بعيني غير ساعات اغفى وكلما اغمض عيني تصير هي كدامي واكعد .. تعبتني فكرياً ونفسياً وجسدياً !
اخر شي الامر كالي اذا متنزل هسه اصدر بيك امر فصل !
كانو مقهورين ع حالتي ع بالهم لما انزل راح ارتاح ميدرون لو ابقى بهذا التعب والسهر ارحم الف مره من نظره من عدها..!
غصباً عني نزلت .. رحت بوجهي للمزرعه اريد اشوفها احس گلبي عطشان على شوفتها ..!
وصلت اول ما فتحت الباب شفتها كاعده بالصاله عيونها ورمانه .. و وجها ذبلان مو داليا الي اعرفها .. گلبي انعصر وروحي انقبضت .. كل ظني عرفت بموضوع الخطوبه!!
بس الي صار بعدين طمني .. اول ما شافتني ركضت من مكانها وحظنتني!!!!!!

داليا .. اخر مره شفته كان حيل تعبان وميحجي وياي ابد .. مااعرف شنو سبب حتى من سألته مجاوبني واخذ ملابسه وراح!!
راح وشهرين يمكن اني مشايفته ولا سامعه عنه اي خبر .. حتى اهله خليت ام سعد كلتلها تخلي رجلها يتصل بيهم وتيحجج بأي عذر بس يعرف عنه شي.. ماكوو اي خبر ومحد يعرف عنه شي !!
گلبي احسه حيوكف من الخوف روحي كانت طول الوقت تريد تطلع من جسمي كل ذره بيه تعبانه ماااكدر اوكف على حيلي من التفكير والقهر .. كنت مكابله التلفزون واسمع الاخبار الاوضاع بالمكان الي هو بي زفت .. وهذا الي خبلني اكثر لا ليلي ليل ولا نهاري نهار بس بجي .. دعيت ربي من كل گلبي بس يرجعه الي .. يرجعه واشوفه ولو لحظه وحده اخلي يسامحني .. فكرة انو يموت بدون مااشوفه ولا احجي ويا رعبتني .. شي بداخلي كان خايف انو مات .. مااعرف لويش حسيت هشكل يمكن لان الموت كل الي احبه ياخذه!!
مرت عليه الايام بغيابه سنين .. الى ان انفتح الباب وشفته واكف كدامي .. رجله الميته مااعرف اشلون دبت بيهم الحياة وركضو عليه!!
حضنته بكل قوتي .. وبجيييت بس بداخلي كنت طايره من السعاده حسيت نفسي ملكت الدنيا وما بيها ..!
بقيت حاظنته مااعرف اشكد طولت الحظنه .. هو ماكو اي ردة فعل منه حسيته مصدوم من تصرفي !
بعدت عنه باوعت بعيونه كانت تعبانه وملامحه متغيره حييييل .. عصره صارت بگلبي و وجع غريب من شفته بهذا المنظر .. بدون وعي رفعت اديه حاوطت بيهم وجهه!!
وبصوت مخنوك بالعبره ..

_اشتاقيتلك.

اسيد .. مو كلمه الي كالتها لا ..دمرت روحي .. ورجعت بيه الحياة بنفس الوقت !
حظنتها بكل قوه ردت ادخلها لصدري .. اي الصدري حتى تشوف گلبي شصاير بي بسببها ..!
حظنه بعد حظنه بعدتها عني وبستها .. اتوقعتها تعترض .. او متقبل اتقربلها بسبب الي صار بينا اخر مره .. بس ماكو مرفضت ولا حجت بالعكس استسلمت مثل قبل!!
استمرت البوسه وتبعتها وحده ثانيه وثالثه .. وبدت تزيد اكثر واكثر .. متحملت اكثر بديت انهار كدامها .. شلتها وصعدت لغرفتي .. وصار الي صار ...!
بس هالمره برضاتها بدون اذيه بدون غصب .. كل الي صار برغبتها عشت لحظات نسيت حتى اسمي وهمي وقهري .. كلشي خليته ورايه وعشت وياها وبس!
عفتها نايمه وكمت سبحت وبدلت نزلت سويت اكل احس نفسي انفتحت مو بس للاكل لا للحياة كلها .. وقررت انهي موضوع الخطبه احجي ويا البنيه واكللها اني متزوج واتفق وياها متكول الاحد وهي الي تنهي الموضوع من يمها .. واني اكللهم الي ردتو سويته و بعد مااتزوج لو تموتوني لان هاي رفضتني!
اخلق اي عذر وانهي الموضوع!
رحت للمطبخ لكيت ام سعد طابخه ورايحه .. بس حضرت الاكل وصعدت كعدتها .. بوسه ع جبينها صحت!
من شافتني استحت وصارت حمره هههه !
كلتلها كومي غسلي وانزلي حتى نتغده ترى ميت من الجوع صارلي شهر وكم يوم مماكل اكله ومتهني!
عفتها ونزلت ..
داليا .. مااحجيلكم الي صار فشله!
المهم سبحت وبدلت نزلت لكيته محضر الاكل .. احس نفسي ميته من الجوع!
كعدت اكلنا وكملنا .. كلتله باجر حتبدي امتحاناتي!!

اسيد .. اهاا شبسرعه؟!!

داليا .. شنو شبسرعه صارلي كومه من بديت اقرا وهذي امتحانات النصف حتبدي .

اسيد .. ماشي ماشي باجر اني اوصلج تمتحنين وارجعج.

داليا .. ها .. اي بس..!

اسيد .. بس شنو ؟!

داليا .. اريد ملابس اخاف ميقيلون اروح بملابس هذي الا زي وهيج.

اسيد .. بسيطه هذي كملي ونروح اني وياج نشتريلج ملابس مال مدرسه.

داليا .. صدووووووك؟!!

اسيد .. اي بس كملي اكل يلا.

داليا .. اكلت الماعون كوله من الفرحه .. خلصنا بدلت وطلعنا اخذني المحلات مشايفتهم بس بالمسلسلات .. اشترالي ملابس من كل قطعه 2 واحذيه وجنط يدويه اخذلي 3 واشترالي حجابات !!
بالبدايه مقبلت وكلتله مااتحجب .. اتصورت يريد يتحكم بيه .. بس فهمني انو هو ميريد احد يشوفني هذا الشي يزعجه من يباوعون عليه!!
سألته لويش شنو السبب منطاني جواب غير انو لازم اتحجب هي هذي رغبته واعتبريها طلب مو أمر"
بعد كل الي سوى اليه استخسر بي هذا الطلب الوحيد؟؟
وافقت وبداخلي فرحه لانو حسيته يغار عليه حتى لو ميكول بس السبب واضح!
بعدين اخذني اشترالي
اقلام وقرطاسيه مال امتحانات كومه !
بقينا نفتر ماكو محل ما دخلني بي كال حتى ليبقى شي بنفسج!
وبعدين رحنا تغدينا بالمطعم .. وفرني بالسياره شفت اماكن تجنن من زمااااان مشايفه الشارع ع بالك كنت بسجن .. غيرت جو وتونست ورجعنا بالطريق طلعلي علبه مستطيله مغلفه مااعرف شنو؟!

داليا .. شنو هذي؟!

اسيد .. افتحي!

داليا .. فتحته لكيت مرسوم عليها موبايل!!!
باوعتله بصدمه!!

اسيد .. هذا الج باجر من ترحين للامتحان اخذي وياج حتى من تكملين تتصلين بيه اجي اخذج.

داليا .. هاا .. بس اني مااعرفله اشون استخدمه؟!

اسيد .. هههه اني اعلمج بس نوصل!

وصلنا للبيت سبحت وبدلت لبست تراك واجيت لكيته كاعد بالصاله وبيده الموبايل الجديد مااعرف شديسوي بي .. كعدت يمه وعلمني عليه اشون استخدمه اني ع بالي صعب طلع كولش سهل استخدامه مره مرتين فهمت!
خليته ياخذ رقم سلمى من علي وحفظته عندي .. مااحجيلكم كل ساعه كمنا نتخابر اني وياها هههه .."
بقينا كاعدي بعدين اني كمت حضرت ملابسي وغراضي .. وردت انام بغرفتي چان يدك الموبايل .. فتحته لكيت مسج منه !!

اسيد ..
(وينج)

داليا ..
( حنام نعسانه وباجر دوام)

اسيد ..
(وين تنامين؟)

داليا ..
(بغرفتي)

اسيد ..
(انتي غبيه لو تستغبين؟؟)

داليا ..
(شنووو اشبيك )

اسيد ..
(شكو نايمه لوحدج تعالي يمي بسرعه)

داليا ..
(نام ما اجي )

اسيد ..
(ماشي)

داليا .. سديت الموبايل ونمت مااحس غير واحد ديحضني .. فزيت لكيته نايم يمي !!
شدتسووووي هنا؟!

اسيد .. انجبي ونامي شنو هالسؤال السخيف.

داليا .. شنو سؤال سخيف شعندك يمي؟!

اسيد .. لج بابا انتي غبيه .. انتي مرتيي .. مرتيييييييي .. تفهمين شنو مرتي شكو كل واحد نايم بغرفه؟!

داليا .. اي واذا مرتك؟!

اسيد .. داليا لتخبليني بهالليل انخمدي.

داليا .. لا ما انخمـ...

اسيد .. قبل لتكمل كلامها بستها وسكتتها .. بقت تدفع وتبعدني بالبدايه بس بعدين هي الي لزكت بيه!!
بوسه منا وحضنا منا .. صار الي صار ...!
الصبح كعدت قبلها .. كانت نايمه بحظني وناسيه روحها .. بهدوء همست بأذنها ... احبج!
طبعاً مسمعتني لان كانت بغير عالم .. نزلت قبلها سويت الريوك وصعدت كعدتها ...
داليا .. داليا .. كومي كافي نوم.

داليا .. نايمه متدري بشي!

اسيد .. لج كومي راح الوكت عليج بعد ميدخلوج للامتحان!

داليا .. اول ما سمعت الامتحان فزت من مكانها .. ركض غسلت ونزلت .. هو يباوعلها ويضحك ..
نزل وراها اتريكو وصعدت هي بدلت وهو هم بدل .. وطلعو .. اخذها للامتحان وبقى ينتظرها .. من تطلع من الامتحان اتخابره اتكوله كملت يكللها اطلعي!
مرت ايام الامتحانات هشكل بين يوم ويوم .. داليا كانت فرحانه والدنيا مسايعتها بسبب الي دتعيشه ويا .. الى ان اجه اخر يوم امتحانات ... داليا بدت تتخربط ..!
بس مكالت الاسيد لان خافت بس يدري بيها مريضه ميخليها تروح تمتحن ويضيع كل تعبها..!
اخذها اسيد وصلها للامتحان وكاللها من تكملين خابريني كالعاده .. امتحنت وطلعت اتصلت بي اجه اخذها ..

داليا .. اسيد ممكن طلب ؟!

اسيد .. كولي !

داليا .. من زمان مشايفه سلمى واريد اروح اشوفها عفيه وديني الها..!

اسيد .. اني اريد اروح للبيت ضروري اهلي خابروني اذا اخذتج منو يرجعج؟!

داليا .. اني اخلي سلمى تكول لعلي وتوصلني هي ويا.

اسيد .. ماشي يعني هسه انروح للبيت لو منا ترحين گبل؟!

داليا .. لا منا واخذني الها شكو رايحين وراجعين!!

اسيد .. ماشي .
اخذتها وصلتها لسلمى وطلعت بوجهي للبيت قررت انهي موضوع الخطبه .. رحت بوجهي لبيت البنيه دكيت الباب طلعلي ابوها رحب بيه وكذا .. كلتلهم اريد ايمان احجي وياها علمود موضوع المهر التجهيز وكذا .. ابوها ما صدك لا كال ميصير ولا اعترض راح جاب بنته ذبها يمي وراح!!
كعدت يمي .. اتقربت منها وحجيتلها كل الي مخططله!!
انصدمت البنيه وكامت تبجي .. كلتلها اني اكدر اضحك عليج واتزوجج وانتي متدرين اي شي بس اني مااريد اكسرج ترى اني انجبرت عليج لان امي لحت عليه!!
بالبدايه انزعجت بس من كلتلها هذا الكلام اشويه اتفهمت!!
طلعت من عدهم لبيتنا .. طبيت لكيت امي مو هنا ...!
بقيت انتظرها للعصر وهي ماكوو .. بدلت وطلعت رحت يم صديق الي هنا من زمان مشايفه ... لليل يلا رجعت للبيت .. لكيت امي جايه ..!

داليا .. رحت لسلمى سلام وكلام واحضان .. اشويه وحسيت نفسي دخت!!
سلمى من شافتني كالت ولج وجهج اصفر ومو طبيعي امشي خلي نروح للدكتور !

كلتلها كولشي مبيه هذا تعب من الدراسه .. بقيت يمها اشويه ورجعني علي لبيتي بالسياره اتخربطت كولش!
سلمى كالت غصباً عليج انروح للدكتور خلي انشوف اشبيج!!
صدوك رحنا لعياده ع الطريق مالت دكتور نزلت حجيتله الاعراض وكلتله عندي امتحانات وارهاق .. كالي سويلي تحالليل!!
اشون بلوه هذي يا سلمى كلتلج كولشي مبيه هسه حيضربوني ابر من وراج ..!
سوينا التحالليل وانتظرنا على ما طلعو اخذتهم للدكتور .. اول ما شافهم ابتسم بوجهي ... جان يكولي انتي حامل!!!!!!!!!

للحكايه بقيه ❤️
اطول بارت كتبته بحياتي 😪
اتمنى يعجبكم رأيكم بالاحداث وتوقعاتكم للبارت القادم ولتنسوووووون التصويييييييت ❤️
وبالمناسبه قررت اخصص يومين بالاسبوع انزللكم بي بارت انتو اختارو اي يوم يناسبكم واني حاخذ برأي الاغلبيه حتى نخلص من سالفه نزلي ما نزلي 😪
وقبل لتعترضون البارتين هذولي حيكونن طويلات وبيهم هواي احداث حتى اختصر بس مو يوم بعد يوم لان ما الحك اكتبهم اختارو يومين بعيدات عن بعض 😂 🤭😘