رواية في ارض الغرام انت دولتي الفصل الثلاثون 30 - بقلم ﮼الاميره،الموسويه 👑

ما احلل لاي شخص ياخذ كتاباتي وينشرهم (ذمه)

بقلمي (هدى الموسوي ) الاميره الموسويه 👑

داليا .. مدااصدك اذاني .. معقوله الي دااسمعه؟!!!
ح.ا.م.ل!!
اني حامل!!
الفرحه الي حسيتها والشعور خلوني اطير بالسما بدون جناحات .. حتى بجيت من السعاده واخيراً جربت دموع الفرح!
گلبي احسه ديركص من الفرحه .. اول شي خطر ع بالي لما عرفت اني حامل انو تكون الي ابطني بنيه .. اي بنيه .. حتى اسميها تاليا ع اسم اختي الي ماتت .. حعوضها كل الحرمان والالم الي عشنا !
وحخليها اسعد طفله بالعالم .. ومااخلي الهوا يغثها ولا اخلي نفسها بشي ابد ابد .. اي يارب ارجوك اريدها تكون بنت. . حتى مفكرت بردة فعل اسيد لما يسمع الخبر!
بوقتها حتى مفكرت شنو حيكون رأيه لما يعرف اني حامل .. حيفرح مثلي او يعصب ويگلب الدنيا كون زواجنا سر ومحد يعرف بي من اهله؟!
بس مهمني اذا اتقبل الموضوع او لا لانوو اني لو اموووت ماافرط بطفلي حتى لو يذبحني اختار انموت سويه ولا اموته!
طلعت من الدكتور واني الكاع مسايعتني حتى سلمى استغربت من هذي الفرحه الي فرحتها ..!
طبعاً سلمى تكره اسيد لدرجه فضيعه متطيقه أبد من ايام ما بقينا بالمعسكر من صار الانفجار وعرفته .. دائماً اتكولي هذا واحد اناني وحقير ميفكر غير بنفسه لتنخدعين بي رغم اني اشكد احاول احسن صورته يمها واكوللها انو اسيد تغير وصار زين وياي متقتنع!
اتكولي انتي تحبي ادري بيج لذلك دتدافعين عنه .. حتى من كلتلها علاقتنا حقيقه وصار بينا كولشي طبيعي كالتلي اكيد هو الي جبرج ع هذا الشي .. تعبت واني اشرحلها واوضح ، بس هي ولا تصدكني!
الى ان شافت ردة فعلي من كالي الدكتور انتي حامل .. وشافتني ابجي من الفرحه حسيتها تقريباً صدكت كلامي!
بالمناسبه الدكتور كالي بعد كم يوم وتكملين شهرج الاول .. اخذت التحاليل وكلتلهم وصلوني للبيت .. و وصيت سلمى تكول لـ علي ميكول الاسيد اي شي عن موضوع الحمل لانو زواجنا هي تعرف وضعه واخاف ميقبل اسيد احد يعرف بالموضوع .. يعني خاف علي يتصل بأسيد ويباركله وكذا فأني كلتلها مو هسه بالبدايه لازم يسمع مني.
وصلوني بالباب وراحو دخلت البيت هدوء!
اتوقعت يكون موجود بالبيت لانو اني اتأخرت هواي يم سلمى وبعدين الدكتور والتحليلات هم طولت .. يعني المفروض هو هسه رجع؟!!
ردت اتصل عليه بس كلت لا اكيد مشتاق  الامه خطيه صارله هواي مرايح للبيت ومشايفها ملتهي وياي بأمتحاناتي يا ماخذني يا مرجعني .. خلي يشوفها ويكعد وياها هم حقها عليه .. صعدت سبحت وبدلت وكعدت انتظر بس اني مااكدر اكعد ولا اثبت بمكاني من الفرحه و القلق .. والخوف ..... خوف من ردة فعله!
صارت الدينا العصر وهو ماكوو .. المغرب .. الليل .. متحملت بعد  اتصلت عليه اريد اشوفه يجي لو لا؟!
اتصل عليه ميرد!!
اكثر من مره اتصل ماكوو ... گلبي نغزني مو من عوايده ميرد عليه خصوصاً هو يعرف اني وحدي بالبيت !!
اكيد صاير شي .. معقوله يكون علي گاله ع موضوع الحمل !!!!!
لا لا ميسويها اني وصيت سلمى  متخلي يكوله .. زين لويش مداايرد عليه؟!
القلق والخوف اكلو گلبي والبيت محد بي بس اني زاد عليه الخوف قاطين!
قررت اتصل بأم سعد حتى تجي يمي لان الدنيا ليل واخاف وحدي بهالبيت شكبره!
دااريد اتصل چان ينفتح الباب .. باوعت ام سعد دخلت!!
بسم الله معقوله سمعتني واجت ام سعد .. كمت من مكاني ..

داليا .. الحمدلله اجيتي هسه كنت دااتصل بيج اسيد راح الاهله و اتأخر وخفت لوحدي .

ام سعد .. اي اعرف هسه اتصل الدكتور بأبو سعد وكاله خلي ام سعد اتروح يم داليا.

داليا .. اتصل بأبو سعد؟!!
اشوكت اتصل اني صارلي سنه اتصل عليه ميرد.

ام سعد .. هاا .. ايي .. ماادري اشوكت  اني ابو سعد كالي الدكتور اتصل.

داليا .. اباوع ام سعد شكلها مو طبيعي احسها مثل الي ضامه شي!!
وهذا الي خوفني اكثر ام سعد مو من عادتها تضم عليه شي .. اكيد اكو أنه بالموضوع!!
بصوت حاد ..
_ام سعد شصاير كوليلي احس صاير شي.

ام سعد .. ارتبكت .. والله يا بنتي مااعرف شنو اكلج!

داليا .. حسيت اديه ورجليه بردو من الخوف .. بصوت يرجف .. احجي شصاير دخيلج ام سعد لتخوفيني .. اسيد بي شي؟!

ام سعد .. لا يمه لاااا والله ما بي شي الدكتور وين رحتي انتي .. بس الحجيه ام اسيد حيل تعبانه وناقليها للمستشفى حالتها خطره والدكتور كال لتحجون شي يمكن ميريدج تقلقين .

داليا .. حسيت الدم صعد الراسي من حجت صح الحجيه عزيزه عليه وانقهرت عليها بس اني كل ظني اسيد بي شي .. ماادري شصارلي من اجت هذي الفكره ابالي گلبي احسه وگف الدم جمد بعروگي اختنكت الهوا ضاع .. شكول عليج ام سعد .. هذا اول يوم انهبطت الله يستر من الجايات ، زين حتى اذا الحجيه مريضه لويش ميرد عليه؟!!
ولويش يتصل بأبو سعد ويكوله .. ميتصل عليه؟!
عقلي كام يودي ويجيب ماادري من وين تجيني هذي الافكار .. طردتها من بالي وحاولت اهدأ لان التوتر والقلق مو زين ع الحمل .. مااريد بنوتي تنزعج وهي ابطني .. ولا أأثر ع صحتها .. (بسم الله بدت الخبالات 😪)
بقيت انتظر بلكي يتصل ويطمني ع امه .. هواي خفت ليصير شي الحجيه مره طيبه ومتستاهل بس الخير .. دعيت الله يطول عمرها ويخليها اله لان اعرف اشكد متعلق بأمه ويحبها.
ثاني يوم كعدت وبقيت انتظر النهار كوله هم ماكوو منه اي خبر ولا اتصال .. خوفي بدا يزيد بس ام سعد هي الي كانت تهديني وتطمني انو ماكو شي بس اسيد مشغول ويا امه بالمستشفى!
على هالحال مرت 5 ايام واسيد ماكو منه اي خبر .. بديت اشك اكو شي .. اتصلت ع سلمى وكلتلها هيج وهيج السالفه اريدج تتأكدين من علي صح ام اسيد مريضه!!
فعلاً سلمى العصر خابرتني .. كالت اي صحيح الحجيه ام اسيد حيل متخربط وضعها .. واسيد وياها بالمستشفى..!
اوووف يا ربي شنو من حظ عندي حتى فرحتي طارت وتبخرت !
بعد اسبوع كامل اجاني مسج .. فتحته من اسيد!!!!!!

_( اني مشغول وما راح اكدر اجي للبيت هالفتره بقي ام سعد يمج واي شي تحتاجي كوليلها وهي تجيبه الج ).

هذا كان الي مكتوب بالمسج ... لا سلام ولا حتى كلف نفسه وسألني اشلونج!
عذرته لانوو امه مريضه واكيد نفسيته تعبانه بس ع الاقل يتصل ويخليني اسمع صوته گلبي حيطك على شوفته او حتى صوته !
بلعت خيبتي وسكتت لانو ابد مو وقت زعل وعتب من تصير امه زين حيكون الي كلام ثاني ويا...!
بعد هذا المسج بقى شهر مختفي لا شفته ولا حتى اتصل بيه!
مااعرف عنه شي غير من ام سعد وحسب حجيها انو مگابل امه لانها مريضه!
زين حالتها متحسنت؟!

ام سعد .. لا بس طلعوها من المستشفى.

زين حتى اذا حالتها متحسنت وحتى اذا مريضه ميكدر يخصصلي دقيقه وحده يحاجيني يسأل عن اخباري؟!
شأكلت،  ششربت،  ميته ، عدله ؟!
كتمت كل هذا بگلبي وسكتت وفوك هذا كوله الوحام طيح حظي .. اذب من راسي ومااشتهي اي شي روحي احسها تريد تطلع 24 ساعه!
ام سعد من شافتني شكت بالموضوع .. اني خفت لا ع بالها مريضه و تروح اتكول الاسيد ومو وقتها ابد هسه!
كلتلها انو اني حامل و وصيتها متجيب سيره ابد لاي احد وخصوصاً لاسيد مااريده يعرف هسه لان وضعه ميسمح وامه مريضه!
قنعتها بالكوه واخذت منها وعد متكول .. وفعلاً مكالت شي بس خطيه وكفت وياي بفترة نساتي وساعدتني الله ينطيها .
فد يوم كنت كاعده بالصاله ومخليه كدامي ليمون وملح دااكل لان كولش اشتهيته نساوتي كولها حموضه وموالح!
كاعده ودااكل جان يندك الباب .. اجتي ام سعد فتحته ..... وچان تدخل ساره!!!!!!!!!!!!!!!!!!!!

اسيد .. مثل مكلتلكم بيوم الي رحت البيت اهلي حتى اشوف ساره لكيت امي مو هنا .. طلعت لصديقي ورجعت بقيت انتظرها لحد ما اجت !!!
اجت اول ما دخلت من الباب معصبه!
ومن شافتني عصبت اكثر ..!!
هي دخلت ودخلت وراها الحيه مرت كرار اخويه .. اول ما شفتها عرفت اكو مصيبه!
رحت ع امي دااسلم عليها چان تدفعني وتبتعد عني!!
اني بصراحا انصدمت من تصرف امي هذا .. مو من عوايدها ابد اتعاملني بهالطريقه خصوصاً اني لان علاقتي بأمي تختلف عن كل اخواني اني گضيت عمري وياها .. زين شنو الي صار؟!
بصوت حاد بس اني بداخلي بركان ع الي سوته بيه ..

_حجيه شصاير؟!

الحجيه .. بغضب ليش متعرف شصاير؟!!

اسيد .. يمه بلا مقدمات الله يخليج احجيلي شكو.

الحجيه .. هاي جيتي من بيت ايمان خطيبتك .. امها وابوها مسحو بيه الارض واجيت .. اشلون تروح اتكول للبنيه اني متزوج؟!
انت تريد اتموتني ناقصه عمر .. ولك اسيد انت اتخبلت شنو بنات الناس لعبه؟!
مو شفتها للبنيه واقتنعت بيها؟!
مو كلتلك اذا معاجبتك اشوفلك غيرها كلتلي لا  هذي مقتنع وقبلت تعقد عليها ؟!
اشلون تروح تحجي للبنيه حجي اكبر من راسك وتخلي المسكينه اتدك وتلطم    شنو الي تريده فهمني؟!!

اسيد .. اندار على ساره و بصوت حاد .. امشي انتي ولي من خلقتي .

ساره .. كامت اتفور من الغضب اشلون يحجي وياها هيج ويصيح عليها؟!!
ماشي اني اعلمك اسيد اذا ما ندمتك ع ساعتك اني مو ساره .. عافتهم وراحت بدون اي كلام.

اسيد .. بصوت جامد .. يمه اني مو طفل صح كلتلج موافق بس اذا تتذكرين انتي الي جبرتيني اخطب واني حتى ما اقهرج وازعلج وافقت .. بس يا يمه مدااكدر اتقبلها للمخلوقه .. الزواج مو لعبه حتى اخذ وحده اكسر رگبي و رگبتها طول العمر الخاطر الله افهميني.

الحجيه .. و انت هسه يلا دريت الزواج مو لعبه؟!
اذا هيج حظرتك ممقتنع وما رايدها ليش خليتنا نعقدلكم ؟!
ليش خليت اهل البنيه يكولون البنيه مخطوبه والعالم كلها درت بيها انخطبت؟!
وهسه تريد تفصخ .. ليش متخاف الله انت ؟!
تقبل واخد يخطب اختك و ورا كم يوم يفصخها .. شتكول البنيه لناس ليش وشنو السبب؟!
والله حضرت جنابك اتذكرت الزواج مو لعبه ومتحبها ؟!

اسيد .. يكولون الي يكولو كل واحد يحجي ويلغي هو ونعالي .. البنيه مااريدها والخطوبه فصختها وهذا اخر كلام عندي .. ومحد اله علاقه بيه وليتدخل بحياتي .
كلت هذا الكلام وعفتها وطلعت حتى مسمعت ردها .. لان طلعت روحي هي بسببها خلتني اخطب البنيه وهي الي كسرت رگبتها وهسه جايه تحاسبني .. طلعت بوجهي لبيت المزرعه بس احس نار مشتعله بيه من كلام امي .. وبنفس الوقت خايف عليها لتنقهر ويصير بيها شي!!
وصلت نص الطريق بعد ساعه تقريباً  وجان يدك الموبايل ..  كرار يتصل؟!
الووو .. چان يكولي امي اتخربطت وبالمستشفى الحك بسرعه!!!!!!
هنا اني الدنيا اسودت بوجهي .. حتى طريقي بعد ما اعرفه منين .. ديورت السياره وگبل للمستشفى الي كالي عليها كرار ... وصلت لكيت امي مدخليها للانعاش!!

بعد ما راح اسيد .. الحجيه كعدت وبقت اتلوم بنفسها لان كلام ابنها صحيح!
هي الي جبرته ع هذي الخطوبه وهو من خوفه عليها وافق يسوي شي اصلاً ميريده .. هي الي غلطانه مو اسيد !
ابني المگرود ما تهنى بحياته من ورا هاي المتسمى علياء وهسه اني اريد ادمر مستقبله!
لا خلي يفصخ الخطوبه واني احجي ويا اهل البنيه وانطيهم الحاضر كله واسد حلكهم بلكي يقتنعون وهي ابوها مبين واحد مادي وابو فليس اكيد يوافق ويسكت.
بعدها دتفكر بهالاثناء چان تجيها ساروو الحيه ..

ساره .. حجيه اشصاير اشبي اسيد معصب.

الحجيه .. اووووف يمه اسيد سوده عليه ع حضك هذا .. كله مني اني كسرت رگبته بهالخطوبه هاي.

ساره .. لتكولين هيج حجيه انتي غير تردين مصلحته وتردي يستقر حتى گلبج يرتاح .. بس شنكول اذا هو كل يوم برأي.

الحجيه .. اي والله بنتي اريده يستقر واشوف جهاله قبل لا اموت .. بس هو گلبه ملچوم من النسوان بسبب الي صار مايرضى يتزوج.

ساره .. والله حجيه انتي على نياتج يا ملچوم .. گولي عاشك.

الحجيه .. شنوو .. شتحجين انتي اسيد يعشك يرادلها حظ وبخت.

ساره .. احجي الي اعرفه غير .. ابنج مو بس عاشگ لا ومتزوج هم .

الحجيه .. وجها اصفر من سمعت كلام ساره .. بس ممقتنعه بالي دتسمعه او بالاحرى ممصدكه اسيد يتزوج اصلاً .. متزوج؟!
شمدريج ؟!

ساره .. هو كال بعضمة لسانه بس المصيبه مو هنا .. المصيبه لو تعرفين متزوج منو؟!!!

الحجيه .. گامت ترجف وگلبها صار بي خفقان .. بنفس مكطوع .. مـ..مـنـ..ـوو....؟!

ساره .. الخدامه الي چانت تشتغل عدنا .... داليا.

الحجيه .. شـ..شـنوو ..ووو .. انتي شدتحجين ولج ساره اتخبلتي ..

ساره .. متخبلت والي دتسمعي الحقيقه واذا متصدكين امشي وياي البيت المزرعه وشوفي بعينج الي احنا غافلين عنه .. بعدها ممكمله كلامها وكعت الحجيه بالكاع....!!
ركضت هي بسرعه اتصلت ع كرار .. اجه بسرعه نقلوها للمستشفى .. بعد ساعه وصل اسيد .. لكى امه بين الحياة والموت تصارع!!
ميعرف بألي صار والي كالته ساروو لامه .. كل ظنه انو امه اتخربطت بسببه!!
بقى ياگل بروحه من الندم .. امه عنده اغلى من الهوى اشلون يسوي بيها هيج!!
اسبوع كامل بالمستشفى مكابل امه نسى كولشي حتى الاكل حرمه غير المي ميشرب .. وبالغصب كرار وعمه يجبرونه ياكل لكمه حتى يظل واكف على حيله!
بعد الاسبوع طلعت امه حالتها اشويه اتحسنت .. رادت تحجي ويا وتتأكد من الي سمعته .. بس هو فاجئها ..

اسيد .. يمه اني اسف اعرف الي صار بسببي بس وروح ابويه من اليوم اني من ايدج هاي لأيدج هاي كل الي تردي اسوي حتى اذا تردين اتزوج هسه ما عندي اي مانع اليوم اتزوج و روح ابويه بس انتي لتنقهرين فدوه اروح لتراب رجليج اني .

الحجيه .. هنا اتبدلت كل خططها .. فكرت اذا كالتله اني عرفت كلشي راح يواجهه بالحقيقه وتنفرض عليها الخدامه  وبعد متكدر اتسوي شي و مو بعيد يجيبها يكعدها وياها بما انو هي عرفت ومصارلها شي  .. فـ بالبدايه خلي ازوجه وبعدها اني اعرف اشلون اتخلص من المصيبه الي جابها ع راسنه.

_ماشي ارضى عليك وانسى الي صار بس الاسبوع الجاي راح يكون عرسك.

اسيد .. حسيت جبال الدنيا كلها وكعت على راسي .. من كالت امي هذا الكلام داليا صارت كدامي .. احس گلبي انعصر!!
بس شسوي ؟!!!!
لو اضحي بأمي لو اضحي بيها .. هي اكدر اقنعها انو الزواج شكلي وافهمها كلشي اكيد راح تقتنع بس امي مااكدر اخاطر مره ثانيه واكيد اخسرها وتموت هالمره.
ماكو حل غير انو اوافق على شرط امي .....!
سكتت ومثل ما كالت اسبوع واحد بعد ما طلعت امي من المستشفى اتزوجت ....... زواج رسمي وعرس وهوسه مثل ما رادت امي .. كل الي اشوفه كدامي داليا .. اتخيلها تعرف وتجي تشوفني كاعد يم هاي بعرسنا .. كنت انازع الموت كل لحظه اتمر عليه بس ما بيدي حيله .. امي اشلون بيها؟!!
بيوم الي دخلت اني وايمان لغرفه وحده حسيت نفسي حقير نذل .. الانسانه الي خلتني احب من جديد والي تحملت ظلمي وقسوتي وعصبيتي وكرهي وحبتني مسويتلها عرس ولا حتى لبست بدلة مثل اي بنيه بيوم عرسها .. وايمان هاي الي مردت اكسرها وترجيتها تسامحني وكلتلها اني اتحمل المسؤوليه كدام اهلج والناس تالي راحت سوتلي مشكله .. تكعد يمي ببدلة العرس؟!
اوووووف داليا لو ميت ولا اسوي بيج هالشي !
صارت ايمان مرتي بس متقربتلها ابد .. ولا صار بينا شي وكلتلها اذا فتحتي حلكج انهيج خلص هالمره ..و فعلاً محجت شي.
طبعاً طول هذي الفتره اني متصلت بداليا ابد ولا حجيت وياها غير رسلتها مسج واحد وقبل لا اتزوج اصلاً .. بعدها متصلت نهائياً لان بيا وجه احاجيها  .. اشلون احجي وياها عادي ولا كأنو صاير شي واكذب عليها؟!
مااكدر ابد مااكدر ..  اتهربت منها بس اني كل ذره بيه تفكر بيها كل ذره بيه مشتاقتلها .. وصلت الدرجه من افكر بيها افقد السيطره ع نفسي اكوم اتعارك ع اتفه الاشياء واگلب البيت گلاب !
امي مااحجي وياها على گد السلام والنقمه الي اسمها مرتي مااباوع حتى بوجها .. و على اقل شي الزمها اطلع بيها قهري .. گلتلها انفذي بجلدج مني مسمعت الكلام خليها تتحمل نتائج غبائها .
مر تقريباً شهر ع زواجي بس عليه كأنه سنه ... جان يرن موبايلي باوعت ابو سعد!!
خير ان شاء الله هذا ميتصل الا اذا صاير شي لان اني موصي ميتصل اخاف احد يشك بشي .. وكايله اني بس الي اتصل بيك وانت اذا شي ظروري حيل خابرني !
فتحت خط .. خير ؟!

ابو سعد .. دكتور حبيت اكلك او ست ساره زوجة استاذ كرار قبل اشويه اجتي للبيت

اسيد .. شنووووو شعدها وليش خليتها تدخل ؟!

ابو سعد .. والله يا دكتور حاولت ما ادخلها بس هي اصرت و.. قبل ليكمل كلامه سد الخط اسيد.

اسيد .. الكاع ضاگت بيه هاي الحيه شوداها للمزرعه وشعدها رايحه اصلاً؟!!
بسرعه اخذت السويج وطلعت حتى مبدلت ملابسي بالتراك رحت... وصلت للبيت قبل لا ادخل چان اسمع صوت داليا تصيح وتبجي........!!!!!!!

داليا .. من شفت العگربه ساره كدامي طفرت من مكاني .. بس الخوف دب بيه ،  بما انوو اجتي لهنا معناها اكيد عرفت بموضوعنا !!
محجيت ولا كلمه بس جمدت بمكاني .. وام سعد عافتنا وطلعت اكيد حتكول لرجلها ويخابر اسيد .. اي عاد يجي يخلصني من الحيه هاي ..

ساره .. مرحبا داليا خانم اشلونج عاش من شافج.

داليا .. صافنه بوجها

ساره .. ههه اشبيج صفنتي و وجهج صوفر .. شنو مراح تضيفيني ببيتج؟!!

داليا .. شعندج هنا ؟!

ساره .. اجيت اباركلج بماسبة زواجج ولو متأخر اشويه .. بس تدرين زواج السر ما بي تهاني لان يصير ويخلص ومحد يدري.

داليا . امشي اطلعي بره.

ساره .. ليش اطلع؟!
هذي جزاتي جايه ومتعنيه حتى اهنيج .. بس انتي الي مثلج ميعرف الاصول اكيد .. عضيتي الايد الي انمدتلج ، لمتج من الشوارع وسوتج ادميه!
الحجيه الي اعتبرج مثل بتها تالي لفيتي على ابنها واخذتي .. يلا هي هذي تربية المياتم شنترجى منها .

داليا .. اني صح عشت بميتم بس متربيه احسن منج.

ساره .. ههه اي واضح عايشه ابيت ويا رجال وحدج .. كولش واضحه التربيه.

داليا .. احترميي نفسج هييييي واعرفي شدتحجين .. هذا الرجال الي دتحجين عنه زوجي على سنة الله ورسوله .

ساره .. شنوو شنوو .. زوجج؟!!
هههههه انتي شكلج عايشه الدور ؟!
حبيبتي اسيد متزوج ومرته تسواج ، و انتي الظاهر مخليج لعبه يتسلى بيها وقت ميمل منج يشمرج بالشارع الي اجيتي منه .

داليا .. امشي اطلعي بره لا اتصل بي اخلي يطلعج بطريقته.

ساره .. ههههه لا حبيبتي لتتصلين ولتعبين نفسج ميجيج لان مشغول بزوجته تعرفين بعده عريس ومكابل مرته.

داليا .. ههه السم هذا وكذبج خليهم بداخلج وامشي اطلعي بره .

ساره ..  كذبي!!
اهااااا  اكيد كالج امي مريضه وهو يمها وميكدر يعوفها .. و ع بالج اني دااكذب عليج .. اي حقج بس ولا يهمج هسه اشوفج الدليل بعينج وكوليلي شنو رأيج بلا ... مدت ايدها فتحت الموبايل طلعت الصور وخلته كدام داليا ...
_هاج شوفيي هذا شنوو .. هذا منو الي كاشخ وكاعد ، ومنو هذي الي كاعده يمه ببدلة العرس!

داليا .. شفت صورته  .. هذا عرس .. وهذي عروسه كاعده يم اسيد ببدلة عرس .. وهو كاعد ديلبسها الحلقه .. كلامها صحيح .. مدااتكذب .. هي متكذب اني الي دااكذب .. اييي اني دااكذب .. دااكذب على روحي .. دانكر الي داتشوفه عيوني !
گلبي ااااخ دااحس وجع فضيع بگلبي .. وبطني اااااه بطني دتلويني شصار .. الكاع لويش دتهتز بيه .. رجليه لويش دترجف .. لاااا لا هذا كابوس اي كابوس مزعج وهسه اصحى منه!!!
مدااسمع شدتحجي ولا دااشوف شي ولا احس بأي شي داير مدايري كل الي دااحسه هدوووووء .. مثل الي انضرب على راسه بقوه وفقد الوعي بس اني صاحيه بوعيي ..!
مثل الي دخل بفقاعة كبيييره ميسمع غير بس انفاسه الي دتلهث ودكات گلبه السريعه .. احس بوجع .. وجعي بروحي .. روحي دتأذيني والهوا ضاع .. حاولت اركز ارجع للواقع .. ماكوو فايده .. الى ان حسيت شي بشي حاااار دينزل بين رجليه!!!!!!!
هنا اني صحيت من صدمتي  برعب .. ساره ماكوو .. وااني واكفه لوحدي بنص الصاله .. دنكت جان اشوف دم بالكاع ... دم ع رجليه .. دم ع ملابسي من جوه  ... خليت ايدي ع بطني بحذر بدون وعي صحت بكل قوتي وبأعلى صووووت ... شي بدااخلي كان خايف ليكون الي داافكر بي صحيح ... بنتيييي لاا يا رب دخيل اسمك لاااااا .. يا رب بأسم المسيييح لااااا .. روحي ولا بنتي يارب يا رب ياا رب...

بقيت فتره طويله اصيح ردت ام سعد تحي تشوفني تساعدني .. بس ماكووو غير صدى صوتي الي يحاوبني .. بهذي اللحظات شفت الباب انفتح وشفته واكف كدامي ... نسيت كولشي .. نسيت العرس وساره والصور .. كل هذا راح من بالي مفكرت غير بالروح الي بداخلي  ..  بصوت مخنوك ومن بين ادموعي .. صحتله بصياح وبجي ..

_اسيييد بنتي دخيلك حتموووت اسيدددد فدوه اروحلك بنتي لتخليهاااا اتموووووت اسيد بنتيييي اسيد بنتييييييي !!!!!

للحكايه بقيه ❤️
رأيكم بالاحداث وتوقعاتكم للبارت القادم 🤗
ولتنسوووووووووووووون التصوووووويت 😘

وبالنسبه للنشر متفقتو ع يوم محدد كل ناس تريد شكل .. لذلك قررت انزل كل يوم احد وخميس ، واذا صارلي ظرف او مكدرت انزل بارت راح انطيكم خبر  بستوري الانستا مالتي والمعرف مالتي كاتبته يمكن بالبارت الثامن هذا في حال ما نشرت حتى لتكولون تريد متابعين يعني مو اجباري تضيفوني بس لانو مااريد اخرب القصه كل يوم بارت ملاحظه 😘
والقصه حتبدي بيها احداث جديده رجاءاً لتستعجلوني والي ماعنده صبر ليقراها لانوو من اختصر بيها تفقد لذتها وتصير تافهه حشاكم فخلوني على راحتي فدوه 😪