رواية في ارض الغرام انت دولتي الفصل الثامن 8 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

أسيد .. صارلي شهر تقريباً منازل للبيت والسبب امي!
اخر مره نزلت بيها بقت تبجي وتحجي عليه حتى اتزوج ، يمه انت كبرت ، يمه اريد اشوف جهالك ، يمه حرام عليك هيج تعدم شبابك ، يمه يمه يمه .... اكلت گلبي بهذا الحجي!
هي تعرف كلش زين ليش اني رافض فكرة الزواج والارتباط اصلاً بس مع ذلك تبقى تلح عليه..
كلتلها هاي السالفه انسيها وهذا الموضوع مااريد نحجي بي بعد .. حتى قبل لتخلص اجازتي اخذت ملابسي وطلعت من البيت رجعت لدوامي !
بالليل خابرتني اختي نور!!
كالتلي امي متخربطه اشلون تعوفها وحدها بالبيت راح تموتها ؟!!

أسيد .. اني مو مربيه ولا مره حتى اكابلها واكعد ، وبعدين سالفة المريضه ومتخربطه بطلنها لان صارت قديمه ، لا ع بالكم تضغطون عليه بهاي السوالف حتى اغير رأيي !
كولي لامج زواااااج ما اتزوج لو تنكلب الدنيا وخلص هذا اخر كلام عندي .

نور .. اسيد ترى حرام الي دتسوي بأمي وبنفسك ، يا اخي هي شتريد منك قابل غير تريد تفرح بيك.

أسيد .. حرام عليه مو عليكم ، محد اله دخل بحياتي .

نور .. و أمي تبقى وحدها بالبيت .. انت كل شهر تنزل كم يوم وتروح امي منو يبقى يمها؟!!

أسيد .. ههه هو انتو هذا الي هامكم تردوني اتزوج حتى امي متبقى وحدها لو اني اكابلها واكعد ، بس محد بيكم فكر فد يوم يفرغ نفسه ياخذه يطلعها يزورها ، ياخذها للدكتور يشوفها شتريد يكعد يحجي وياها ، كل واحد محتار بنفسه وأسيد الي لازم يسوي كلشي وفوكاها اطلع مو زين واريد اموت امي!!

نور .. أسيد محد كال انت مو زين ولا متبرين من امنا بس انت تعرفها لامي كولش زين متقبل تجي يم احد من عدنا ولا تقبل تعوف بيت ابويه يعني اشلون نتطلك ونرجع نكعد يمها ، لو انخليها وحدها بالبيت شكبره وشعرضه منعرف شيصير ميصير ومحد يمها .

أسيد .. اكو المنظفه والحرس وابو سالم الحدقجي يعني مو وحدها .

نور .. انت صك دتحجي لو دتتشاقه ؟!
شنو حدقجي شنو المنظفه ؟!
يا اخي دااكولك هاي امنا اشون نعوفها وحدها ، بعدين هذولي كولهم يرحون بالليل ويبقى بس الحرس بالباب يعني شيصير داخل البيت ميدري اصلا .

أسيد .. والمطلوب مني شنو؟!!!

نور .. تتزوج عاد مرتك تبقى وياها .

أسيد .. انسي هذا الموضوع ميصير نهائياً.

نور .. لعد شنو الحل فهمني !!

أسيد .. شوفولكم ممرضه لو وحده تبقى وياها بالبيت لما اروح للدوام وقبل ما اجي تطلع مااريد اشوف خلقتها بالبيت .

نور .. و وين نلكاها هاي؟!

اسيد .. مشكلتكم بعد .. مره بحياتكم سوو شي بدون أسيد ، شردت للدوام من المشاكل ولحكتوني بعد لحد يخابرني.

سديت الخط بوجها وقفلت الجهاز لان اعرف راح تكول لاخواني ويبقون يتصلون ويدوخوني ، متواصلت وياهم بعد ابداً ، خنكت روحي بالدوام في سبيل مااروح للبيت وللمشاكل !
مر شهر تقريباً محجيت ويا اي احد من البيت ولا عرفت اشصار ، و هم يعرفون اخباري من علي صديقي لان وياي بالدوام..
رغم علي يلح عليه انو افتح موبايلي واحجي ويا اهلي لان قلقانين عليه بس اني متصلت ابداً ولا فتحت جهازي الى ان اجه وقت النزول!!
خلص الدوام ولازم انزل مجاز ... اوووووف لو بيدي اهج من هذا العالم كله واخلص .
هم راح ارجع للبيت وراح ترجع المشاكل والطلايب الي متخلص ، يفتحون موضوع الزواج ويكرهوني بعيشتي!
قررت اروح للبيت امري لله لان تقريباً شهر حيصير اني منازل مجاز ، والآمر هم لح عليه اروح ارتاح لان كالي صارلك هواي مشايف اهلك!
المهم ..
غسلت ، بدلت و طلعت من المعسكر الفجر وصلت البيت الصبح دخلت لكيت البيت هدوء وفارغ!!
كنت جوعاااان ميت من الجوع ذبيت الجنطه ورحت للمطبخ كبل لان متعود اسوي اكلي بأيدي
دخلت للمطبخ وجان اشوف ....... !!!
وحده ناعمه واكفه و وجها ع المغسله مشفت بس ظهرها .. اكو شي لفت انتباهي ...شعرها .... هذا الشعر وين شايفه اني؟!!

بقيت واكف بالباب وصافن اريد اتذكر شعرها وين شايفه ... جان تلتفت............!
لا لا مستحيل مو هي .. مستحيل .. حسيت عيوني راح تطلع من مكانها ع كد الصدمه !
كانت مدنكه راسها تباوع بالصينيه ومبتسمه ، منتبهت عليه واكف كدامها .. جان تنضرب بيه!!
رفعت راسها شافتني جان توكع الصينيه من ايدها ....!

داليا .. بصدمه .. انت؟!!!

أسيد .. بصدمه و غضب .. انتي .. شجابج هنا؟!!

داليا .. انت شكو تسألني وشعندك هنا اصلاً؟!!

اسيد .. هذا بيتي يا غبيه ؟!

داليا .. بيـ .. بيتـ ... بيتك!!

أسيد .. بصوت عالي حيل وحاد .. اي بيتي وهسه جاوبيني شتسوين هنا ومنو الي دخلج للبيت اصلا؟!!

صوت ام اسيد الجامد من ورا ظهره ...
_اني الي دخلتها.

أسيد التفت على امه بسرعه صار بنص داليا وامه ..
_يوم اشلون تدخلين هيج اشكال لبيتنا؟!!

ام اسيد .. شنو انت تعرفها؟!!

أسيد .. أي ... اقصد لا ... انـ .. ي..!

ام اسيد .. داليا بنتي اتركينا لوحده اشويه .

دنكت داليا شالت الصينيه وراحت بسرعه للمطبخ!

أسيد راح بسرعه للصاله بس العصبيه والغضب كولش واضحه عليه ، امه راحت ورا ..

الام .. شنو قصتك ويا البنيه ومن وين تعرفها؟!!

أسيد .. مو مهم من وين اعرفها ، المهم هاي متبقى لحظه وحده بالبيت.

الام .. وليش متبقى ، شنو السبب؟!!

اسيد .. متبقى وخلص .

الام .. اسمعني زين اسيد .. اذا متكولي البنيه اشبيها وشمسويه متطلع مااخليها تخطي عتبة الباب.

اسيد .. هاي وحده .. وحده ... ساقطه الا اكلج هيج.

الام .. احترم نفسك انت عندك اخوات عيب تحجي ع اعراض بنات الناس .

اسيد .. ههه بنات الناس؟!
انتي شتعرفين عنها بنت الناس هاي بلا ؟!
ها تعرفينها شنو و منين اجت ، اصلها فصلها ؟!!

الام .. اولا المخلوقه دتشتغل عدنا مو اريد اناسبها لو اخطبها حتى اسأل عن اصلها وفصلها ، ثانياً البنيه حبابه وخادمتنا ، صار شعر مشفت منها قصور او شي مو زين فـ ليش اطردها واكطع رزقها ؟!!

اسيد .. اهااا يعني مصره متطلع من البيت موو؟!!

الام .. اي متطلع واحب اذكرك اني امك وهذا بيتي يعني اني الي اقرر منو يبقى ومنو يطلع مو انت.

اسيد .. ماشي لعد اني طالع وعايفلج البيت انتي وهاي الحثاله اشبعن بي .. اخذ جنطته وراد يطلع ... جان يسمع صوت شي وكع ... دار وجهه شاف امه ع الكاع !!!!!!!!
ذب الجنطه وركض عليها بسرعه .. بقا يصحي بيها ...

اسيد .. يوووم اصحي فدوه العينج .. يوم بس جاوبيني والله مااروح بس اكعدي فدوه لتخبليني .. يووووم .

( اقوى رجال العالم يصبحون اطفال في حظرة امهاتهم)

داليا .. من رفعت راسي وشفته .... حسيت گلبي وكف!!
يا ربي اكيد دااحلم اني .. معقوله هذا هو الي كدامي؟!!
بقيت صافنه بوجهه واحس گلبي ديرفرف مثل الي محبوس بقفص ويريد يطير ... عيونه الغريبات وملامحه الحاده تسطر سطر .. والشيب الي برااسه يربييييييي .. (وج انتي بيا حال 😒)

ما فززني من شعوري وصفنتي غير صوته المرعب ...!

من كال للحجيه يووم .. عرفت انو هو ابنها .. استغربت ، لان بصراحا الحجيه اغلب كلامها عن زوجها المرحوم متحب تحجي هواي عن اولادها وحتى من حجتلي عنهم مذكرتلي اسمه ، ماادري اني مسمعتها .. مااعرف بس ابد مااتذكر كالتلي عنه شي غير كالت عندي واخد من ولدي كاسر گلبها وضعه ميقبل يتزوج ومتعرف شتسويله !!
يعني بختصار مااعرف عنه شي فمن عرفت هذا ابنها انصدمت وخفت بنفس اللحظه !
لان حسيت نفسي انتهيت .. اكيد مراح يبقيني لحظه وحده هنا ، واذا طردني وين اروح وين انطي وجهي؟!!
(كلتلكم اني اخاف من السعاده )
كالتلي الحجيه عوفينا لحالنه رحت دخلت بالمطبخ واسمع صوته يصيح على امه وخبص الدنيا خبص .. اباوع على اديه ترجف جسمي كوله يرتجف !
مااعرف خوف منه لو من مصيري الي مااعرفه شنو حيصير بي!!

بقيت كاعده ادموعي بعيني وادعي الرب يساعدني .. جان اسمعه يصيح يووم فدوه اصحي!!!

بدون وعي مني طلعت من المطبخ شفت الحجيه بالكاع وهو حاظنها !!
رفع راسه شافني جان يصيح بيه بصوت هز بدني وعيونه تجدح نار !!

اسيد .. امشي جيبي مي بسررررررررعه

داليا .. رجعت للمطبخ ركض جبت كلاص مي واجيت انطيتهيا وايدي ترجف !!
اخذه مني وغسل وجهها ، انطانيا مره ثانيه كال جيبي بعد امشيي.
هم اخذته ركض ورحت ترسته مي رجبته .. اجيت لكيته شايلها خلاها ع التخم ، اخذ مني المي رفع راسها وشربها .. الحجيه بس تون!

خلا ايده ع نبضها وباوع لساعته .. اشويه وكالي روحي سويلها عصير ليمون بسرعه!
اني هم عفته وركضت للمطبخ طلعت الليمون عصرته .. وطلعت اريد اوديلهيا ملكيتهم!!
سمعت صوت فوك!!
اخذته وصعدت لكيته بغرفة الحجيه ديخليها ع السرير!!
لازمه العصير بأيدي وكل ذره بيه ترجف خايفه ليصير بالمره شي خطيه متستاهل ، وشيخلصني من هذا الوحش اكيد حيطلع كل قهره بيه.
بقيت جامده بمكاني الى ان دار وجهه وشافني!!

اسيد .. بغضب .. تعالي جيبي.

داليا .. بسرعه رحت انطيته العصير ، بقى كاعد يم امه ويشربها .. بعدين التفتلي بغضب ..!

اسيد .. امشي ولي من كدامي لا ابتلي بيج.

داليا .. مواكفه يمك اني ، اريد اتطمن ع الحجيه وبس تصحى اروح.

اسيد .. بكل صلافه تلاسني وترادد .. احس النار دتطلع من عيوني حنفجر ، اريد بس الزمها انهيها والله .. بس امي كان وضعها ميتحمل عرك ومشكله ، كتمت غضبي بس اني نار ومشتعله بيه.
شربت العصير لامي وبدت اشويه تصحى !!
بقيت يمها كاعد امرغلها بأيدها واقيس ضغطها كل اشويه الى ان استقرت حالتها ..!
هي الحيوانه بقت واكفه بمكانها متحركت اصلاً!
الهدوء يعم المكان الى ان حجت ..

داليا .. هاي انت طلعت ويا الكل هذا اسلوبك هشكل!
الله يساعدها الامك المسكينه هسه عرفت لويش من تذكرك تجر حسره.

اسيد .. بغضب وكلام هاديء من بين اسنانه .. ضبي اللسانج احسنلج.

داليا .. هه خوفتني ، شنو اتسوي اذا مسكتت بلا ؟!
تجيب عليه اصدقائك لو هالمره اخوانك؟!!

اسيد .. ابتسم بخبث .. ليش اني وحدي ما اكفيج؟!!

داليا .. انت واحد ...

داريد تحجي وجان تكعد الحجيه ....!

ام اسيد .. داليا .. صيحلي داليا خلي تجيني.

داليا .. هياتني حجيه اني هناا .. اشون صرتي محتاجه شي !!

ام اسيد .. تعالي اسنديني بنتي اريد اروح الحمام .

داليا .. ماشي حجيه الزمي ايدي يلا .. يا الله ... اي تمام .. يلا امشينا ع كيفج...

اسيد بقى مستغرب من تصرف امه اشلون هو يمها وتطلب مساعده من هاي؟!!
حس بغضب وحقد فضيع على نفسه وعلى امه اشلون تذله كدام وحده مثل هذي؟!!

اسيد .. طلعت من غرفة امي بسرعه ورحت لغرفتي نزعت ملابسي ودخلت للحمام ، احس نار دتطلع من جسمي دااحترك ماادري اشبيه !!
هاي ثاني مره يصير بيه هشكل مره من هددتني بالمعسكر وراحت وهاي المره الثانيه!!
اوووووف لو الزمها الا اقتلها خلاص بس امي !!
وكفت جوه امي بارد ثلج والدنيا بعد ابرد .. مع ذلك محسيت بالبرد ، اريد ابرد گلبي بيها يلا ارتاح !
جوه المي هدووووء والحمام سنطه بس صوت المي .. جان انتبه كلبي يدك بقوه!!!!!!!
بسرعه بسرعه مثل الي يرجف!!
هاي اني اشبيه اكيد راح اتخبل!!
من اسنين مصاير بيه هذا الشي ، من سنين گلبي ممتحرك بهالسرعه بسبب احد!!
شديصيرلك اسيد ... اكيد راح تموت ... هذي ابداً مو بوادر خير.

طلعت من الحمام .. بطني تقرقر من الجوع مع ذلك منزلت جوه بقست ادخن جكاير الى ان غفيت!
مكعدت الا على صوت اختي نور!!

نور .. اسيد .. اسيد .. اكعد يا عيني الدنيا الليل صارت.

اسيد .. عوفوني نايم اريد انخمد.

نور .. دكوم اسيد هسه انت صغير .. بعدين شمسوي الامي اليوم؟!!

اسيد .. بعد الغطى وكام . هاي راحت لو بعدها؟!!

نور .. منو تقصد؟!!

اسيد .. الخدامه الي جايبيها .

نور .. اولاً هاي مو خدامه ، وثانياً البنيه تبقى هنا كل يوم اتنام بالبيت ويا ماما احنا هيج متفقين وياها.

اسيد .. اعتقد كلتلج مااريد اشوف خلقتها بالبيت لما اتفقنا تجيبين خدامه.

نور .. مسااااااعده ، وهذا شرط ماما مو اني هي الي طلبت هذا الشي فأذا عندك اي اعتراض تفضل ناقشها اني لتدخلوني ، وفدوه لعينك اسيد ماما مريضه على كيفك وياها الله يخليك .

اسيد .. امشي اطلعي .

نور .. بس مامـ ..

اسيد .. دااكول امشي اطلعي .

نور .. ماشي طالعه طالعه.

راحت نور وبقى اسيد يدخن جكاير .. وحده ورا وحده الى ان سمع الكل راح والبيت صار هدوء ، معدته أذته حيل بعد ميكدر يتحمل مماكل شي من البارحا بالليل !
لبس بيجامه وفانيلته الداخليه ونزل راح للمطبخ ملكى احد بي .. طفه الظوه لان خاف وحده من اخواته باقيه هنا تشوفه وتفتح نقاشات ومواضيع ، وهو ما اله خلك ، وضوه الثلاجه كولش كافي ياخذ الي يريده ويسدها لا احد يشوفه !!

فتح الثلاجه وطلع باكيت حليب ديشرب!!

داليا .. كنت كاعده يم الحجيه ونور .. خطيه خابرت ع موبايل امها والحجيه كالتلي جاوبيها .. كلتلها امج مريضه المسكينه دقايق واجت هي واخواتها .. كولش حبابات ما عدا زوجة اخوهم كرار هاي حيييل مكروها وشايفه نفسها ..!
تتأمر عليه ع بالك اشتغل عند الخلفها ، مع ذلك اني مااقبح وياها ومحترمتها لخاطر الحجيه وبناتها .

المهم الحجيه قبل ليجون بناتها اعتذرت مني ع الي سوا ابنها المعدل ..!
كالتلي امسحيها بوجهي بنتي هذا ابني متعقد من النسوان بسبب وحده الله ليغفر ذنبها!!!
بصراحا اني استغربت من كلامها معقوله يكون مر بعلاقه فاشله وصار هشكل؟!!
كلت للحجيه لا امسها بوجهج ولا شي انتي مثل امي وهو مثل اخويه!!
باستني وشكرتني ، بس الي فرحني اكثر انها كالتلي لتخافين محد يكدر يطلعج من هذا البيت ابد.

فرحت كولش .. اشويه اطمئنيت انو مراح انشمر بالشارع!

بعد ما راحو البنات والهوسه خلصت بقيت نايمه بغرفة الحجيه اخاف تحتاج شي لا تعبانه ومتكدر تكوم المسكينه!
فـ بالليل كولش عطشت ردت اشرب مي فتحت الثلاجه ملكيت بيها مي!!
اخذت القاروره ونزلت امليها مي من جوه!!

البيت اظلم ، اباوع للمطبخ اظلم .. ياربي اشون بلوه بس لا انطفت الكهرباء رحت ع كيفي للمطبخ مديت ايدي فتحت الضوه وجان اشوفه واكف كدامي ......!

لابس فانيله مطلعه اكثر ممغطيه !!
عظلاته وهو وذاك الطول الرهيب واكف ديشرب حليب .... شافني وهو كل ملامح وجهه تغيرت.

اسيد .. فجأة اتفتح الضوه وطلعت كدام ...!
جعصت باكيت الحليب بكل قوتي من شفتها .. بصوت حاد مليان غضب بس ع كيف لا احد يسمعني .. شدتسوين هنا؟!!

داليا .. بقيت ابلعم من شفته .. ها .. انـ .. انـ ..ي .. اريد مي.

اسيد .. شمرت الباكيت وتقربت منها بخطوات ثابته .. هي بقت ترجع ليوره لحد ما انصدم ظهرها بالحايط ... وكفت كدامها بينا كم انش .. احس انفاسها دتحرك وجهي من كد القرب الي بينا ... بصوت حاد من بين اسناني كلتلها ...

_ما راح اطيل الكلام واتعب نفسي باجر من الصبح تلمين ملابسج وترحين بدون اي لغوه ، واذا كعدت ولكيتج هنا ... احجي كل ماضيج الاسود واكللهم اني من وين اعرفج!
اكيد تتذكرين الليالي الي كظيناها اني وياج بالمعسكر!!

داليا .. بأنفاس مقطوعه ، وهي صافنه بوجهه .. يـ ..ا .. يا .. ليالي ؟!!

اسيد .. اليالي الي خلصتيها بحظني ، شنو نسيتي؟!!

داليا .. دتريد تحجي ... وجان صوت الحجيه فززهم ....

ام اسيد .. دالياااااااااااااا....؟!!

للحكايه بقيه
رأيكم باالاحداث وتوقعاتكم للبارت القادم
والله اني مكنت ناويه اكملها ابدا بس الخاطر متابعيني مااريد اكسر بيهم ❤️