رواية في ارض الغرام انت دولتي الفصل الثاني عشر 12 - بقلم ﮼الاميره،الموسويه 👑

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

داليا .. لما راددته قبل ليطلع اتوقعت حيعصب ويتعارك وياي ، لانه اعرفه هذا ميسكت ع الكلام الي يزعجه واني طولت اللساني ويا .. بس الغريبه محجه وياي اي شي عافني وطلع!
ياااا اليوم اكيد الدنيا حتنگلب .. بقيت صافنه ع الباب ورا ومصدومه من تصرفه .. بس بعدين لما انتبهت ع نفسي شفت اني وحدي بالبيت!!
بيت شكبره وشعرضه محد بي بس اني؟!!
مااعرف لويش خفت مع انو قبل اشويه ماكان احد وياي بالبيت غيره بس كنت احس بأمان اما هسه الخوف اتملكني بيت كبير وفارغ لا حس ولا نفس .. يا رب ارجوك كون وياي !
نسيت اكوللكم اني عندي فوبيا من الظلمه .. من يوم الي عافتنا امي اني واختي كدام الميتم بالليل صار عندي خوف من الظلمه ، احس بالموت من ابقى بمكان اظلم ، انفاسي تنگطع واختنك احس واحد وخانكني!!
حتى من انام ما اطفي الضوه اعوفه مفتوح!
وهذي الحاله تصير عندي بس من ابقى بمكان وحدي!
لذلك من بقيت لحالي خفت من هذا الشي ، بعدين اتذكرت الكهرباء متنطفي الا نادراً هنا واذا انطفت فـ الحرس الي بالباب يشغلون المولد بسرعه ، يعني ثواني بالظلمه متضر ، وهو اصلاً كالي اي شي يصير كوليلهم ، بعد اني شكو خايفه!
خليني اتنفس اشويه وحدي بالبيت ، صارلي كم يوم محبوسه لو بغرفتي لو يم الحجيه حتى الحديقه مشايفتها من ورا هذا الحقنه ميقبل اطلع ويشوفني!
بلحظه الخوف كوله اتحول الى فرحه وسعاده متنوصف ، رحت للمطبخ طلعت الاكل وسويت كل الي يعجبني واشتهي ، صارلي يومين مماكله شي براحتي طبعاً الحجيه ممانعه عليه شي بالعكس هي تجبرني اكل مرات حتى لو مااشتهي بس الحقنه كولما اريد اكُل ينغص عليه هو ونظراته .. اوووف يا نظراته لو بس يغمض عيونه من يحجي وياي جان عرفت اشون احجي ويا.
انتبهت ع نفسي داافكر بي!!
يبووو عليج داليا حتى وهو مموجود منغص عليج وشاغلج .. دخلي يولي شكو افكر بي هذا الحقير كولما تصيرله فرصه يذلني بيها ميقصر .. خليني استغل هذي اللحضات واعيشها بس الي .. اكلت كل الي عجبني ورجعت كولشي بمكانه بعدين فتحت التلفزيون الكبير بالصاله ع بالك سينما مو بالبيت وكعدت اتفرج عليه كان طالع فلم محمد هنيدي يموت ضحك اسمه (رمضان ابو العلمين حموده) ضحكت لحد ما بطني رادت تنفجر!
رحت بعدين للحمام مليت البانو مي دافي ودخلت بي .. يا ربي شعور مينوصف جو بارد ومي دافي يا سلام !
الوقت محسيت بي طار بسرعه صدوك لو كالو السعاده لحظات والحزن ليالي ، من افرح بشي بسرعه يخلص الفرح بس الهم والحزن ميخلصون يبقون سنين وياك !
اوووووف من الزمن اذا دار .. صارلي هواي محسيت بحريه مثل هذي ولا ضحكت هالكد .. من ايام الميتم ويا سلمى وداني ...!!
بعز ضحكتي وسعادتي البسيطه من اتذكرتهم .. ادموعي كامت تجري على خدي .. داني اشون مات بعز شبابه ، بدون اي ذنب .. داني كان يتيم مثلي ومثل سلمى ... آآآه يا سلمى !
يا ترى هسه انتي وين ، شدتسوين ، اشون عايشه بحياتج الجديده؟!!
بقيت ابجي اشهك وابجي لحد ما ورمت عيوني ، كنت مشتاقتلها حيل ، واعرف ما كان المفروض اتركها هناك تدمر حياتها .. بس مكدرت ادمر حياتي وياها .. صح كنت مقهوره من كلامها وياي رغم اني كنت داانصحها بس كنت مقرره بس استقر ويصير عندي شغل وراتب يعيشني لو اعرف اموتها عادي اموتها .. بس المهم اطلعها من هذاك المكان !
قبل لا اطلع من الدير كتبتلها رساله ودعتها بيها ، وكلتلها انو اني متخليت عنها بس تركتها تتخذ قرارها بنفسها مثل ما رادت ، وفي اي وقت غيرت رأيها اني موجوده وانتظرها .. وكتبت بي عنوان البيت مالت الحجيه وضميتها بفراشها ، كلت عسى ولعل اذا شافتها تسأل عني او تغير رأيها بهذا القرار الي دتتخذه!!
بس حيصير اكثر من شهر على طلعتي من الدير وماكو اي خبر منها .. مع ذلك مفقدت الامل واذا اضطريت اروحلها بنفسي هم اروح بس خليها تجرب اختيارها بالاول وتعرف عواقبه!!

المهم ..
بقيت بالبانيو افكر وابجي .. نسيت نفسي حتى مااعرف كم ساعه صارلي .. قبل لا ادخل الحمام فكرت ليجي هذا واني بالحمام فـ سبحت بحمام غرفة الحجيه !
حتى ميشوفني كلت اذا سمعته موجود بالبيت ابقى هنا ومن يدخل لغرفته انزل لغرفتي بسرعه!
هو غرفته مقابل غرفة امه واني جوه بس اغلب الوقت اخلصه يم الحجيه اخاف تحتاج شي يعني عادي اسبح هنا خصوصاً اني غرفتي مبيها حمام والحمام الي بالقاط الجوه مااكدر ادخله والبيت فارغ كولشي يصير لو يجي الحقنه ويدخل بي انفضح غير!!

ما اطول عليكم ..
سبحت وكملت دااريد ابدل و اطلع وجان تنطفي الكهرباء!!
يا ربييييييي صار الي خايفه منه .... الحمام اظلم ليل اصبعي مااشوفه بي .. حسيت بدت تصير عندي نوبة خوف ، والاعظم من هذا كوله البيت محد بي بس اني!!
مااكدر اوصفلكم الشعور الي حسيته الافكار الي دتدور ابالي .. اعوذ بالرب !
حاولت اهدي نفسي حتى اجر نفس لانو دااختنك .. بكل ما أملك من قوه بدون وعي .. وبجسم يرجف لفيت المنشفه عليه وطلعت مااعرف اشون شكلي ولا اشون حطلع بهذا الظلام ، كل الي فكرت بي انو لازم اطلع من الحمام بسرعه وانزل لانو جوه با اكو اضويه ع الشحن اروح افتحهم عاد اشويه ضوه!
مااعرف اذا راح اوصل للطابق الارضي اصلاً .. كنت متوقعه حتشتغل المولد بسرعه ويجي الضوه ، بس ماكو!
بقيت اتلمس كدامي مثل الاعمى .. كولشي مااشوف ، المسافه من الحمام الى باب الغرفه مو بعيده ، بس الظلام سواها عليه ميل!
دموع ماكو وبجي ماكو .. ماكو غير صوت شهكاتي القويه اريد بس اتنفس دااختنك!
مااعرف اشون وصلت للباب .. فتحته بكل سرعتي وطلعت .. شفت ضوه جوه ضعيف وديصعد للدرج!!!!
بهذيج اللحظه ماكان براسي اي عقل انفاسي المخنوكه وروحي الي دتطلع قتلت كل فكره براسي .. بدون اي تفكير .. ركضت ع مصدر الضوه وكأنو حياتي متوقفه عليه!

ما حسيت نفسي غير حاضنه واحد!!!!!

اسيد .. كنت فاتح لايت الموبايل ودااصعد الدرج وجان تجي ركض صارت بحضني!
من الاصطدام وكع الموبايل من ايدي مشفت شنو هذا الشي !
استغربت بالبدايه شي مبلل وناعم ، صغير حيل بالنسبه لحجمي ، كرد فعل تلقائي ردت ادفعه عني بس صوتها وكفني!!

داليا .. مااعرف شنو الي حاوطني بالكامل حسيت شي اكبر من وصلب صار كدامي واني خاتله بي اخاف اني عايزه رعب هذا الشي كملها .. الخوف اتغلب عليه لدرجه الموت هاي هي حموت خلص النفس ضاع عليه .. سلمت امري لله وبقيت اصيح .. يا رب .. يا رب .. يا رب!!

اسيد .. من سمعت صوتها عرفتها هذي هي بلوة حياتي ، نفس الموقف ونفس الظلمه ، نفس الرجفه ، ونفس الصوت!
وكأنو الزمن ديعيد نفسه بس بغير صوره .. انتبهت عليها ترجف ترجف بشده وتشهك بصوت قوي !!
هاي اشبيها معقوله خافت مني لو صاير وياها شي مخوفها لذلك مرعوبه هشكل؟!
بصوت هادىء حاولت ما اهديها كلتلها ..

_ هذا اني اسيد .. اسيد .. لتخافين.

داليا .. من سمعت صوته وكال اني اسيد .. لزمته بكل قوتي وكأنه طوق النجاة بالنسبه الي .. اصابعي احسهم ديخترقون صدره ، قميصه يمكن انشك من كد القوه الي لازمتها بي .. حسيت نفسي دااحاول ادفع نفسي لصدره بدون وعي مني ولا اعرف شدااسوي كل الي اعرفه انو هو الي حيخلصني من الخوف هذا .. بقيت لازمته كل قوتي الى ان حسيت جسمي انتهى خلص ، مثل الي كان ديموت وطلعت روحه .. هدوء صار الدنيا والخبصه ، الخوف والرعب ، انفاسي الي دتنكطع وشهكاتي كولها تحولت الى هدوء..!

اسيد .. من كلتلها اني اسيد حضنتني بس بقوه عجيبه .. مااعرف اشبيها ليش دتسوي هشكل .. معقوله هذا فلم من افلامها ..؟!
زين جسمها ليش يرجف هيج .. ليش صوتها مخنوك وشهكاتها عاليه هيج؟!
لا مستحيل هذا مو تمثيل .. كلشي صار بسرعه .. اول رد فعل مني حضنتها ....!!
بصوت هادئ وحاد ..
_اششششش .. اهدي اهدي .. اني هنا ... اشششششش .. بقت لازمتني حيل وترجف الى ان هدئت ، جسمها هدأ تماماً ولا اي حركه بس صوت انفاسها الضعيف!!
اريد اشوف اشبيها افتهم شصارلها ليش سكتت فجأه ماكو ظلام .. عفتها وجريت الموبايل .. بعدين رجعت شلتها ونزلت بيها الدرج بحذر ع لايت الموبايل خليتها ع التخم وطلعت اشوف المولد ليش مشتغلت .. ركض رحت للحرس وبصوت حاد وعالي صحت بيهم ..

_ شدتسوون صار ساعه ليش مشتغلت ؟!!

الحرس .. دنسوي بيها دكتور ان شاء الله تشتغل .

اسيد .. دقيقه وحده اذا مشتغلت المولد اعتبرو نفسكم مفصولين ..

الحرس استغربوا من تصرفه وعصبيته ، قبل دقيقه دخل سلم عليهم وكلشي ما بي شصار فجأه وعصب لهدرجه؟!
هم يعرفو صح دمه جامد وميجامل هواي بس دائماً هادئ وميعصب نهائياً .. اول مره هيج يشوفو معصب!!
بسرعه سوو المولد وشغلو لان خافو ينطردون من شغلهم ..
هو بدون ميسمع اي كلام منهم عافهم ودخل اول ما سد الباب اشتغلت المولد!

اسيد .. مااعرف شصارلي وليش عصبت هيج!
دخلت للبيت اجتي الكهرباء رحت عليها بسرعه شفتها نايمه بمكانها ع التخم .. ملابسه شي بس المنشفه ملفوفه عليها .!!!!!
شعرها اسود مغطي جسمها الابيض .. رايحه بغير عالم تحسها مو بشر .. بقيت صافن عليها شكلها يسحر ومغري لأبعد حد .. مديت ايدي ولزمت ايدها شفت نبضها ضعيف!!
رحت بسرعه جبت جهاز قياس الضغط  وقست ضغطها .. كان هابط حيل !
جبت مخده وخليتها جوه رجليها بعدين رحت للمطبخ بسرعه طلعت خياره خليت بيها ملح وجبتها الها !
رجعت بسرعه حريت الكرسي و كعدت مقابيلها بديت اضرب ع وجها حتى تصحى ضربات خفيفه .. ردتها بس تكعد تاكل الخياره لان ضغطها شبه مصفر!
بدت تفتح عينها .. وتردد تاليا .. اخذوها ماما .. تاليا .. اخذوها !!
منو هذي تاليا و منو الي اخذها؟!!

بديت اصحي بيها الى ان كعدت خليت الخياره بحلكها من حست بطعم الملح رادت تبعدها بس اني جبرتها تاكلها .. اشويه شويه الى ان اكلتها كلها .. كالت اريد مي!!
كلتلها ماكو مي ارتاحي اشويه خلي ينزل ضغطج .. رجعت خلت راسها ع التخم ونامت الظاهر بعدها دايخه ..!
بس من صحت اشويه ارتاحيت واكلت الخياره .. عفتها ورجعت للمطبخ طلعت برتقال وعصرتلها .. سويتلها عصير
رجعت لكيتها نايمه بقيت كاعد كدامها .. مر وقت هواي وهي نايمه الدنيا نص الليل واني مكابلها وكاعد .. شكلها وهي نايمه وتتكلب حييييل مزعج بحيث خلق عندي افكار اقل ما يقال عندها قذره!
مع ذلك حاولت اتجاهل كل هذا التفكير ، وابقى صاحي .. اريد اعرف اشبيها وشنو الي صار بحيث وصلت لهذي الحاله!
وخفت لا ترجع تتخربط مره ثانيه واني نايم .. هسه اني شنو الي ورطني بهاي البلوه كله من ورا امي والحاحها .. لحت وبقتها هنا .. ولحت وراحت ويا كرار .. ولحت وبقتني وياها وحدي ... اوف منج يمه!

بعد ساعه ونص تقريباً رجعت فتحت عيونها .. اني كنت كاعد كدامها واراقبها ..

داليا .. من فتحت عيوني شفته كاعد كدامي .. نازع الستره الي كان لابسها من طلع ، بس بالقميص والدكم ملات قميصه مفتوحات ماادري مكطوعات مشفتهم .. بس شفت القميص مفتوح وعضلات صدره طالعه!!
كان رافع اردان القميص وشعره مخربط .. حالته حاله وصافن بوجهي عيوني مظلمه ونظرات غريبه اول مره اشوفها ع وجها .. نظرات رغبه!!
اول مشفته كعدت بسرعه .. باوعت ع روحي ملابسه شي وبس المنشفه عليه!!!
يا ربيييي هسه عرفت لويش ديباوعلي هشكل!
ردت اكوم وانهزم لغرفتي .. بس اول ما كمت حست الكاع دتفتر بيه رجعت وكعت بمكاني!!

اسيد .. من شافتني ارتعبت ع بالها حسويلها شي .. كامت بسرعه و وكعت الغبيه متدري ضغطها مصفر ومراح تكدر تتحرك هسه .. بدون اي كلام كمت من مكاني شلت كلاص العصير خليتها كدامها وبصوت جامد وحاد كلتلها ..
_اشربي.

داليا .. بصوت تعبان وهي مدنكه ، ما اريد منك شي.

اسيد .. اشربي احسن ما اخليج تشربي بطريقتي!

داليا .. رفعت راسي بسرعه وباوعتله .. شفت ابتسامه خبيثه ع وجهه ونظراته الظلمه دتفترسني!!
بدون اي كلام جريت العصير وشربته...!

اسيد .. ارجعي ارفعي رجليج لحد ميعتدل ضغطج.

داليا .. اريد اروح لغرفتي اذا تسمح روح منا حتى اكوم.

اسيد .. اولاً ميصير هسه تتحركين لان مراح تكدرين اصلاً ، وثانيا ليش اروح مثلاً ماكو شي مشفته حتى تستحين ، لو نسيتي قبل ساعه وين كنتي؟!!

داليا .. حسيت نار وشبت بيه من كلامه ، من صدوك هذا ميستحي ولا عنده ذرة اخلاق ..  شديقصد بكلامه وين كنت قبل ساعه؟!
ردت احجي ويا بس اتذكرت كلام ام عادل (لتلاسنين)سكتت عنه بس دمي يغلي من الغضب .. بقيت بمكاني وتجاهلته تماماً .. كلت خلي اصير زينه واركض لغرفتي حتى اخلص منه.
بقى هو كاعد كدامي ويلعب بموبايله .. واني جريت رجليه كورتهم ع صدري وخليت راسي بينهم .. الهدوء سيد الموقف .. الى ان حجه هو.

اسيد .. كلتلج ارفعي رجليج مو تكوريهم ، ولتخافين مدااباوعلج انتي مو نوعي المفضل.

داليا .. انت متستحي تعرف لو لا ، لانك لو تستحي متحجي ويا بنيه هشكل كلام مثلك سخيف.

اسيد .. هه اني ما استحي؟!
زين منو الي شمر نفسه بحظني قبل اشويه؟!
منو الي حظني وصاح لتعوفني قبل اشويه؟!
وومنو الي اثار اصابعه بصدري لحد الان .. حتى شوفي دكم قميصي شلعتيهم من كد الحظن مالتج؟!
ومنو الي يتمشى بالبيت بلا ملابس؟!!
حتى مستغربتي من حظنتج الظاهر متعوده  الاحظان متستغربين احد.

داليا .. حسيت روحي صخنت من كلامه .. اتذكرت الي صار قبل لا يجي .. وكل الي صار بدا يمر ابالي مثل الشريط .. رفعت اديه غطيت وجهي بقوه من كد الخجل!
صح اني هيج سويت بس مو مثل ممفكر هو .. اني مو قصدي .... لحظه لحظه .. وخرت اديه و رفعت راسي لهنا وكافي ذل  .. بصوت حاد وجامد كولش كلتله ..

_ اتحملتك هواي بس خلص زودتها  ..
اولاً مدااتمشى بلا ملابس حتى اغري حضرتك ، كل الي صار انو اني كنت بالحمام وانطفت الكهرباء
وثانياً طلعت هشكل لانو عندي فوبيا من الاماكن الظلمه ، و من سوء حظي انت الي صرت كدامي لذلك اتمسكت بيك من خوفي يعني شي خارج ارادتي وبدون تفكير مني !
لا ميته عليك ولا تهمني اصلاً ، انت اساساً هم تحس مثل الناس وعمدك مشاعر حتى افكر اغريك ؟!
كل الي فالح بي تهين الي كدامك وتحسسه انو هو ولا شي وانت بس الي عليك القيمه!
هنتني هواي وذليتني هواي بس مال تطعن بشرفي لااا اني اشرف منك ومن عشيرتك كولها
ما حسيت غير الميز الكزاز الي كدامي انشال وانشمر بالكاع صار وصل ...!

اسيد .. اللسانها اطول منها ، هستوها طالعه من الموت وكامت تلعلع ولا ع بالك بيها شي!
بقت تلغي هواي ، سكتت لان حالتها مو زينه ومتسمح أأذيها .. بس بقت تجفص بالكلام .. حسيت نفسي حنفجر بيها اذا بقت تحجي واقتلها خلاص .. طلعت حركتي بأقرب شي كدامي .. الميز!
شلته وركعته بالكاع هي من شافتني سكتت وكطعت النفس .. بصوت جامد مليان غضب ..
_ سدي حلكج مااريد اسمع اي كلام لتخليني اطلع من طوري وتندمين وقتها.

داليا .. من شفت شكله وعيونه اشون اسودت من الغضب .. جسمي كوله ارتعش .. محجيت شي لان عرفت وصلت لمرحله خطره بسبب اللساني ولازم اسكت احسنلي.
رجعت كعدت بمكاني بس احس عظامي دتطكطك!!
هو عافني وراح للمطبخ .. باوعت خلسه شفته ديدخن جكاير وحده وره اللخ وبسرعه!!
يا ربي بأسم المسيح خلصني من هذي الليله المشؤمه!
بقيت بمكاني نص ساعه تقريباً وهو كاعد بالمطبخ .. يدخن .. اشويه واجاني شايل بأيده قاروره بيها عصير !!
رجع كعد كدامي بس شكله حيل معصب ومبين بالكوه لازم اعصابه .. جر الكلاص الي كدامي وملا عصير .. خلا بقوه ع الخشبه مالت التخم وبصوت جامد وهادىء.

اسيد .. اشربي.

داليا .. باوعتله ردت اكوله مااريد .. بس النظره الي بعيونه سكتتني!
جريت الكلاص وشربت العصير كوله مره وحده !!
خلص اخذه مني ورجع ملا مره ثانيه .. وباوعلي بنظره معناها اشربي !!
بلا كلام اخذته وشريته بس هالمره اشويه اشويه .. بقيتا ساكتين اني اشرب وهو يراقبني .. الى ان حجه!

اسيد .. منو تاليا؟!

داليا .. شنو؟!!

اسيد .. دا أسألج جاوبي .

داليا .. شكله كان يخوف ونظراته ظلمه .. يعني مو مال ارادد واسوي مشكله .. بهدوء جاويته .. اختي.

اسيد .. منو الي اخذها؟!!

داليا .. محد اخذها .

اسيد .. لعد وينها ؟!

داليا .. ماتت.

اسيد .. شفت الدموع اتجمعت بعينها من جاوبتني وصوتها انخنك .. مردت اخليها تبجي لان لسبب ما دموعها تزعجني مااعرف ليش .. حاولت اغير الموضوع .. فسألتها ..

_سلمى وين؟!

داليا .. من سأل ع سلمى .. رفعت راسي وباوعتله بأستغراب .. لويش دتسأل؟!!

اسيد .. لتجاوبين بسؤال .

داليا .. مااعرف واذا خلصت اسألتك اريد اروح لغرفتي.

اسيد .. جريت منها الكلاص هي نزت الغبيه بس اللسان لو ما اتقربلها تكوم ترجف ..مليت الكلاص وانطيتهيا ..  اشون متعرفين وين هي مو صديقتج ومثل اختج؟!

داليا .. مااريد بعد بطني انملت عصير.

اسيد .. اشربي .

داليا .. هذا يمكن مخبل لويش هالكد مهتم بيه ، قبل اشويه هانيي ورزلني  وهسه مهتم بصحتي؟!
اووووف يا ربي شنو هالخبل الي اتورطت بي .. اخذت الكلاص منه بس مشربته بقيته بأيدي ..

_ صح صديقتي بس مااعرف عنها شي اخر مره عفتها بالدير واجيت لهنا.

اسيد .. وليش عفتيها؟!

داليا .. لانو...!

اسيد .. لانو شنو؟!

داليا .. صارت راهبه.

اسيد .. امممم جيد .. وانتي ليش ما صرتي مثلها؟'

داليا .. رجاءاً اريد اروح لغرفتي اذا تسمح.

اسيد ..  بعدتج تحسين بدوخه؟!

داليا .. لاا .. مبيه شي بس خليني اروح.

اسيد .. ماشي .. كومي روحي لغرفتج!!

داليا .. مصدكت كال روحي .. بعده ممكمل الجمله .. كمت ومشيت ..خطوه خطوتين .. رجعت الكاع اتدور بيه .. وكعت هي وكعه وهو لزمني!!

اسيد .. اني اعرف بعدها متكدر تمشي بس عفتها تكوم حتى تشوف عنادها وين يوصلها .. اول ما مشت خطواتها اختلت ورادت توكع.. بسرعه رحت لزمتها ..!

داليا .. لزمني و وكفني .. دااثبت نفسي حتى اوكف .. وجان توكع المنشفه بالكاع ... فجأه صرت واكفه كدامه بلا اي ملابس!!
هو اول ما شافني هشكل .. دار وجهه !!
بس بعديش كولشي شاف مني يعني حتى لو ممتقصد يشوفني فأني كنت كدامه ربني ما خلقتني!!
اتمنيت الكاع تنشك وتبلعني بهذيج اللحظه .. دفعته عني بسرعه وجريت المنشفه من الكاع .. كل التعب والدوخه راحو بلحظتها حسيت الدم دينفجر براسي من الفشله .. اخذت المنشفه وركض لغرفتي دخلت وسديت الباب ورايه!
شمرت نفسي ع السرير ودموعي تجري .. لا لا مستحيل .. الموقف دينعاد ويتكرر براسي لدرجه حسيت راسي حينفجر!
بقيت بالغرفه بس ابجي ع حظي الي مشفت منه شي زين كل يوم يوكعني بمصيبه اتعس من الي قبلها !!
بقيت الليل كوله افكر بألي صار وابجي .. هو مشفته بعد ابد ولا وصل يمي!
بعد تفكير طويل نهش عقلي نهش قررت اعوف البيت واروح منا لان بعد ما الي عين اباوع بوجهه بعد الي صار..!
لميت ملابسي خليتهم بجنطه وبدلت لبست بنطرون جينز نيلي وقميص ابيض شيفون.. لميت شعري وانتظرته ينام حتى اطلع .. صارت الساعه بال 4 الصبح فتحت باب غرفتي وطلعت .. اول ما وصلت للباب الخارجي اريد اطلع جان انفتح الظوه وصوته الحاد فززني!!

اسيد .. من وكعت المنشفه .. اكذب اذا كلت مشفتها .. واكذب اذا كلت المنظر الموقف كان طبيعي .. هي كلها ع بعضها مو طبيعيه!!
كامله والكمال لله !
صورتها وهي بهذا الشكل انطبعت ابالي!!
من شفت جسمها حسيت رعشه صارت بكل جسمي .. بحيث نسيت اني وين!
مع اني درت وجهي بسرعه بس الصوره الي شفته ما فاركت خيالي ابد !!
بقيت افكر بيها طول الليل .. بس الي خوفني وقلقني .. هي!!
شنو راح تسوي بعد هذا الموقف ؟!
خصوصاً الشي الي صار مو سهل ولا بسيط عليها ..؟!
انزعجت حيل بسبب خوفي وقلقي عليها .. شنو هي هذي حتى اهتم بأمرها؟!
وليش هالكد خايف عليها ؟!
فكره تروح وفكره تجي خلتني كاعد للصبح وطيرت النوم من عيني .. الى ان سمعت صوت باب غرفتها انفتح!!
البيت كان شبه اظلم بس غرفتها ضواها مفتوح والمطبخ هم ضوا مفتوح يعني اشوف الي يمشي بالصاله ..!
بقيت هادئ واراقبها شنو حتسوي .. الى ان فتحت باب البيت دتريد تطلع!!
متوقعت يعني الي صار يأثر بيها لهدرجه .. بسرعه فتحت ضوه  التيبلام الي يمي .. وبصوت جامد كلتلها .. وين؟!

داليا .. ما اكدر احجي ويا الكلام ميطلع من عندي.. بقيت ساكته.

اسيد .. اعتقد دااحجي وياج.

داليا .. ارجوك خليني اروح بكرامتي ومرايده شي ثاني.

اسيد .. ليش ترحين شصار؟!!

داليا .. سكتت بس ادموعي خانتني  ونزلت.

اسيد .. كمت من مكاني وصلت يمها .. هي وجها ع الباب وظهرها عليه .. وكفت وراها ومديت ايدي لزمت ايدها اليي مخليتها ع الباب .. قربت حلكي يم اذنها وبصوت هادئ ..

_مشفت شي  ولا اتذكر شي  .. وصدكيني الموقف الي صار حذفته من عقلي نهائياً ولا وراح اعتبره صار اصلاً.

داليا .. من لزم ايدي گلبي كام يرجف بقوه .. هو اني عايزه ولزمتني .. احس كلبي حيطلع من مكانه .. جسمي كوله بدا يرجف وبقوه .. همس بأذني هذا الكلام واني دموعي تصب .. ما اكدر ما اكدر .. ما الي عين اشوفه واحجي بعد .. حتى بو قسملي يمين انو نسى الي صار اني مااكدر انسى هو شافني..!
بقيت ساكته محجيت شي ..

اسيد .. فجأه لكيت نفسي اتوسل بيها حتى متروح!!
اريد اسوي المستحيل حتى متطلع من البيت !!
شي بداخلي خبلني يكول لتخليها تروح .. لتخليها تروح .. وكأنو حياتي متوقفه عليها ..!
كرهت ضعفي وقتها بس مو بأيدي ماادري شصارلي .. احس نفسي بدون وعي .. رجعت حجيت وياها ...

_ اعرف مراح تقتنعين بكلامي بس مدااكذب عليج وعد مراح اخليج تحسين صار شي ابد .. وروحه ماكو.

داليا .. سحبت ايدي منه ورجعت فتحت الباب.

اسيد .. مديت ايدي سديت الباب بقوه ودرتها عليه .. بصوت جامد وحاد .. كلتلج ماكو روحه

داليا .. دفعته عني بقوه وبصوت غاضب .. مو بكيفك ما اروح ، منو انت حتى تمنعني ، اصلاً كل الي صار بسببك ، كولما اوكع بمصيبه لو اتفشل انت السبب.
فكافي خليني اروح لخاطر الرب كافي انت شتريد مني ، شنو سويتلك حتى تكرهني كل هذا الكره؟!

اسيد .. مترحين لان امي اذا اجت وملكتج حتفكر اني طردتج ومااخلص منها ، ومو بعيده تتخربط وتموت بسببج وانتي شفتي من ردت اطردج شصار بيها .. فـ عوفي الدراما وكافي كلت روحه ماكووو وخلص.

داليا .. مستحيل ابقى بعد اللي صار ، اكيد هسه فرحان حضرتك لانو ثبتت عليه اني بلا شرف هشكل؟!!

اسيد .. سديييي حلكج وكافي كلت ،  مثبت عليج شي  والي صار غلط  ممقصود ممتعده انتي وكلتلج اني مشفت شي ، فكافي سدي الموضوع وروحي لغرفتج ..

داليا .. ما ارو..

اسيد .. اخذ الجنطه منها شمرها بالكاع وسحبها من ايدها اخذها لغرفتها .. دخلها وبصوت حاد ونبره محذره ..

_ صدكيني اذا طلعتي منا راح اخليج اتندمين ع الساعه الي شفتيني بيها.
سد الباب وراح.

بقت داليا بغرفتها مطلعت منها ابد .. ثاني يوم من الصبح راح اسيد جاب امه و راح لدوامه!

الحجيه .. اوووف منك اسيد هسه اخو يرجع ميلكاني و يزعل  يكول امي مترتاح ابيتي بعد شيخلصني!

داليا .. لا حجيه اكيد زوجته حتكوله انو استاذ اسيد هو الي جابج مو انتي اجيتي.

الحجيه .. اووف والله يا يمه تردين الصدك اني ماارتاح يم مرته ساره احسها متريد احد يجيها من عدنا ، بس شسوي لابني كرار خطيه مااريد اكسر خاطره.

داليا .. اكول حجيه استاذ اسيد وين اشو مشفته من وصلج؟!

الحجيه .. اسيد راح لدوامه كال خابروني ويردو ضروري.

داليا .. عرفت انو محد متصل بي بس هو سوه هشكل حتى ما ااشوفه وانحرج!
ارتاحيت هواي لان راح ومراح اشوفه واتذكر الي صار بس بداخلي ضجت من كالت راح مااعرف لويش !

مرت الايام بعده عاديه وروتين ممل .. بس اكو شي حيل كان مضوجني .. وهو ساره!
جيتها لهنا كثرت هواي .. ودائماً كنت اشوفها بغرفة اسيد!!
حاولت بكل الطرق اتجنبها ومااحجي وياها .. الى ان فد يوم مريت من يم غرفته بالصدفه وسمعتها تحجي بالموبايل مااعرف ويا منو .. وتكول .. فانيلته الداخليه لو تشيرت؟!
هنا اني كل توازني اختل مااعرف شصارلي .. بلا تفكير فتحت الباب ودخلت عليها ...!

داليا .. شدتسوين؟!

ساره .. لونها انخطف وارتبكت .. هاا .. مدااسوي .. شي .. دااخابر!

داليا .. وماكو مكان تخابرين بي الا هنا؟!

ساره .. يووو .. وانتي شنو تحاسبيني ، وين ميعجبني اخابر وشنو يعجبني اسوي انتي ما الج علاقه .. يلا ولي عند وجهي.
دفعتها وراحت!

بقت داليا تفكر بألي سمعته وهاي ساروو شنو تسوي بملابس اسيد؟!
عدت الايام ومر شهر كامل اسيد ماكوو ..!
ساره من بعد الي صار ما اجت ولا عتبت البيت ابد
فد يوم كاعدين  اني والحجيه بالحديقه وجان يدخل اسيد!!
من شفته مااعرف شصارلي حسيت نفسي مشتاقتله هواي اريد اركض واحضنه .. بس الي صار بعدها صدمني .. دخل ودخلت ورا ساره؟!!!!!

للحكاي بقيه ❤️
رأيكم بالاحداث وتوقعاتكم للبارت القادم🤗
البارت كولش طويل تعويض الكم وردت انشره من ساعه ١٢ بس الكهرباء انطفت وبقيت انتظرها لحد ما اجت اعتذر ع التأخير.
صوتو حتى انزل البارت بسرعه