رواية في ارض الغرام انت دولتي الفصل الثالث عشر 13 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

اسيد .. سلمت ع الحجيه وبوستها .. هي كانت كاعده يمها من شافتني وكفت .. حسيت بعيونها كلام من شافت ساره وياي!!
احس اكو شعور بگلبي غريب من شفتها .. مثل الرجقه القويه صارت بگلبي  اول ما عيني صارت عليها.. !!
هاي المشاعر الي دااحسها من اشوفها هواي تزعجني مااريد احس بشي تجاها .. حاولت اتجاهلها تماماً
خصوصاً اني صارلي شهر كامل شارد من البيت بسببها .. بس اريد اشيل صورتها من بالي وماافكر بيها .. بس ماكو فايده .. رجفتها بحظني .. اثر اظافرها بصدري .. عطر شعرها وريحتها وهي بحظني متفاركني ابد .. الشي الوحيد الي نسيته فعلا وطلعته من بالي صورتها بلا ملابس كدامي .. مفكرت بيها ابد مثل ما وعدتها سويت ، ولا لحظه فكرت بيها بهذا الوضع او بهذي الصوره محيتها تماماً من عقلي.
قبل كنت من افكر بيها بس اتذكر الماضي اكرها .. اما هسه ماكو اي شي يبعدها عن عقلي .. وصلت لدرجه واني صافن الكى نفسي دااكتب اسمها .. ع الورق .. ع الحايط .. ع الكاع .. بكل مكان اسرح بيها بلا وعي اكتب اسمها .. اووووف لو بس تطلع من عقلي راح انجن!
الشهر هذا عده عليه سنه .. وصار لازم انزل لا محال .. قررت اروح لبيتنا الي بالمزرعه هذا محد يروحله بس بالعطل ننجمع هناك كلنا ، هم فارغ وهم وحده مااشوف بلوة حياتي .. كلت  ابقى بي ومن تكمل اجازتي ارجع لدوامي  ..!
بدلت وطلعت واني بالطريق  .. جان يرن موبايلي ..!
باوعت شفت رقم غريب!!

جاوبت .. الووو؟!

المتصل .. صوت بنت هلاو اسيد اشونك؟!!

اسيد .. منو ؟!!

المتصل .. اني ساره زوجة اخوك معرفتني  .

اسيد .. ساره ..شرايده ؟!

ساره .. اسيد فدوه الحكلي كرار طلع من الصبح ودااحس اكو واحد فوك بالسطح واني محد يمي والجهال مرعوبين.

اسيد .. شفتي احد لو شنو ؟!

ساره .. هااا .. اي .. اييي .. شفت خيال بالسطح وديحاول يفتح الباب .. اخاف حرامي ويقتلنا اني والجهال ، فدوه الحكلي!

اسيد .. اخذي الجهال وادخلي بغرفتج واقفلي الباب عليكم اني قريب منكم دقايق واوصل

ساره .. فدوه لتتأخر الله يخليك.

اسيد .. ماشي روحي هسه وسوي مثل ماكلتلج.
سديت الجهاز وطلعت بكل سرعه لبيت كرار .. حتى ردت اندعم .. وصلت لكيت الباب الخارجي مفتوح !!
نزلت بسرعه ودخلت للبيت .. لكيت ساره والجهال وكرار كاعدين وكلشي ماكوو .. !!
بقيت صافن هاي شنو تضحك عليه واني ردت اموت قبل اشويه !!
اخويه من شافني اتفاجأ ..

كرار .. يا هلا اليوم الشمس منين طالعه ، اول تالي تجينا..!!

اسيد .. باوعت لساره بنظره حاده خزرتها .. وبصوت جامد .. شنو الفلم؟!!

ساره .. هاا .. اي .. كرار نسيت اكولك .. اني خابرت اسيد قبل اشويه حتى يجي لهنا لان سمعت صوت بالسطح وع بالي حرامي ..!

كرار .. وليش متصلتي بيه ؟!

ساره .. هاا .. اتصلت .. اتصلت عليك بس جهازك مغلق فكلت اتصل على اسيد ماكو غيره ، لان تعرف بيت اهلي بعيد واخواني ميلحكون يجون.

كرار .. واني اكول شعجب اسيد اليوم جاي ههههه احسبها عليه ابو الاسود عنيناك لهنا.

اسيد .. عادي ولا يهمك بس اني خفت ع الجهال لينرعبون.

كرار .. الحمدلله مصار شي ، بس هم زين شفناك .. كوم اسبح ورتاح على ما يصبون الغده ..

اسيد .. اي والله تعبان اريد اسبح وانام مااريد غده ولحد يكعدني ... بعدني دااحجي وجان تدخل اخت ساره منار ....!!
اهووووو هي كانت عايزه بس هاي اللزكه وتكمل!!
اول ما دخلت عفتهم اني وكمت لان مااطيق احجي وياها .. وهي كلما تشوفني تلزك وتبقى تلغي .. بسرعه كمت جان تحجي...

منار .. شدعوه عيني اسيد بس شفتني انهزمت ترى السلام لله.

اسيد .. هلاو اشونج.

منار .. الحمدلله بشوفتك صرت زينه.

اسيد .. دومج .. يلا اني اترخص تعبان واريد انام.

منار .. بعد وكت خلي انشوفك ع الاقل نسمع اخبارك.

اسيد .. غير مره يلا من رخصتكم .. عفتهم كاعدين وصعدت فوك .. بيت كرار كبير وبي غرف هواي اني من اجي مرات يمهم ابات بغرفه فوك مخصصها النا من نجي.
صعدت فوك بوجهي للحمام .. بس اني دمي يفور .. عرفت هذا الي صار فلم من ساره حتى اجي لهنا واشوف اختها اللزكه .. الحقيره خبلتني ع بالي صدك اكو حرامي بالبيت حتى دربي بعد ما اندله .. بس اني اعلمج انتي واختج الا اطيح حظج.
سبحت وطلعت ذبيت روحي ميت من التعب والقلق الي عشته بسبب موضوع الحرامي .. خفت على جهال اخويه لان اعرف هذا وكتنا كلشي بي وهيج موضوع ما بي شقه ..!
تالي طلع فلم من افلام النسوان .. اووووف ما يجيني منهن غير بس طيحان الحظ وشلعان الگلب.
كم دقيقه وغفيت بعد ما حسيت بشي .. غير جهال اخوي يكمزون يمي كالعاده!!
كعدت شفت الساعه بالـ 5 العصر ..!!
معقوله كل هذا اني نايم .. راسي يريد ينفجر من الصداع وبطني تقرقر من الجوع .. اخذت الجهال ونزلت جوه .. جان الكى اللزكه واختها كاعدات بالصاله !!
اول ما شافتني الابتسامه السامه ملت وجهن اثنينهن .. سويت نفسي مااشوفهن ولا هتميت بيهن .. سلمت وسألت عن كرار .. كالتلي بالحمام  .. ردت اطلع جان ساره وكفتني ..!

ساره .. اسيد تعال اكعد هنا على ما اروح اسويلك  عشه.

اسيد .. مشكوره مااشتهي .

ساره .. لا شنو متشتهي انت غده متغديت لازم تتعشى .. هسه دقايق ويجهز العشى ..!

اسيد .. كالت هذا الكلام وراحت حتى منطتني فرصه احجي اتكول بالعه مسجل مو لسان  .. راحت واني بقيت واكف منطي ظهري للزكه الي كاعده وراي .. مااكدر اكعد مااطيق احجي وياها .. ولا اكدر اروح عيب من كرار اكيد حتروح تشتكي لاختها واختها تكول لكرار ميقدر اختي وفشلها .. ومن هذا الحجي....!
اضطريت اكعد بس على اعصابي .. جريت الموبايل وبقيت اكلب بي ومتجاهلها تماماً ..!

منار .. شنو حتبقى ساكت اسيد؟!!

اسيد .. وهو يباوع بالموبايل جاوبها .. مااعتقد اكو شي حتى احجي وياج.

منار .. امممم اني عندي هواي اشياء اريد احجيها وياك ..!

اسيد .. هم ما انتبهلها .. احجي .. اسمعج ..!

منار .. بسرعه جرت الموبايل من ايده وشمرته بعيد ع التخم ... وبكل سخافه ودلع .. اني احبك اسيد.

اسيد .. جرت الموبايل من ايدي ع بالك طفل كدامها .. اني منا متحمل عليها هي واختها من الصبح ومنا اتصرفت هذا التصرف، وفوكاها تكلي احبك !!
اني هيج انسانه بلا اخلاق ورخيصه ما شايف بعمري .. اشكد اكره النسوان بس اكثر شي اكره بحياتي هذا النوع من البنات الي بلا اخلاق وميستحن ، الي اعرفه  البنيه عباره عن خجل ، مستحى ، حياء .. هاي كلهن زايحتهن  وبكل وقاحه تكول احبك .. متحملت بعد انفجرت بيها ... بصوت جامد  ..

_منو سمحلج تاخذين الموبايل من ايدي؟!

منار .. وهي تتماوع .. اهووو حتسويها قوووصه ، هسه شأخدت منك هو موبايل .. بعدين دااكولك احبك شنو متسمع!!

اسيد .. صاح بيها بعلو صوته .. انتي وحده منحطه والظاهر عمي ممربيج .. كام من يمها اخذ موبايله وديريد يطلع .. جان توكفه ساره!!

ساره .. انت اشون تغلط على اختي هيج؟!!

اسيد .. ما الي حجي لا وياج ولا ويا اختج بس خلي كرار يطلع واني اعلمج على منو تضحكين اخاف ع بالج سكتتلج ع الفلم الي سويتي الصبح.

ساره .. بصوت عالي يا فلم هذا عيب عليك تحجي وياي هيج اني مرت اخوك .. بقت تصيح وتلاسن .. جان يجي كرار...

كرار .. خير شصاير اشبيكم؟!!

ساره .. تعال عيني شوف اخوك ديغلط على اختي ويصيح عليه.

كرار .. بصوت جامد .. لتصيحين واسكتي خلي افتهم شصاير ، شنو السالفه اسيد ليش غلطت على منار؟!!

اسيد .. بعدم اهتمام  حبيبي سالفه تافهه خليها اتولي ، اني رايح لبيتنا .

كرار .. لا متروح اذا مااعرف شصاير من الصبح ليهسه تحجون بالالغاز واني مثل الاطرش بالزفه فهموني شكو!!

ساره .. والله هذا اخوك الي مااعرف اشبي البنيه كاعده يمه دتجامله عشتو وهو يغلط عليها عرالاقل جان خليت احترام لاخوك.

اسيد .. هه اني الي اخلي احترام لو اختج الـ .. عموماً اني مهامني لا هي ولا الي كالته واصلاً اعتبر نفسي مسمعت شي من السخافه الي كالتها ، وجرت الموبايل من ايدي اعرف اشون أأدبها عليها بس ما اوسخ نفسي بحثاله مثلها .. بس حتى تفهم الموضوع كرار .. اسأل مرتك ليش جابتني لهنا ، واسأل اختها شنو الي خلاني اغلط عليها و اذا هي بنت ابوها وبيها خير خلي اتكول شسوت وشكالت!

كرار .. شسويتي منار فهموني شصار؟!!

منار .. مسويت شي والنبي هو لحاله عصب وكب بوجهي .

اسيد .. ردت الزمها اكسر ركبتها من كالت هيج .. فوك الانحطاط تكذب !!
بس مع ذلك حافظت على هدوئي لان اذا افقد اعصابي تصير كارثه وما اريد اخوي يصير بهيج موقف بيني وبين مرته .. سكتت وبصوت هادئ كلتلها ..

_ههههه ماشي مسويتي شي ، اني رايح كرار وبعد لتلومني لان ما ادخل لبيتك .. عفتهم ودااريد اطلع جان كرار يلزم مرته ويخنكها ...

كرار .. بعصبيه .. لج انتي متجوزين من سوالفج كم مره كلتلج بطلي حقاره ، اهلي كلهم ميجون لبيتي من وراج .. امي تجيني ساعه وتشرد من ورا سمج وتصرفاتج الطايح حظها ، اخواتي محد تطب لبيتي ، وهسه اخويه اول مره يجيني شردتي .. اليوم اقتلج واخلص منج ... لزمها ضرب وضرب سكطها تسكط!!
منار بقت تصيح ، والجهال من شافو امهم وابوهم بهالوضع كامو يتباجون ويتصايحون .. متحملت الموقف ابد .. صح هي حيه واختها  انكس منها .. بس دااحس الي صار بسببي .. والجهال حالتهم صعبه!
رجعت لزمت كرار وبعدته عنها ..

اسيد .. خلص كرار اتركها جهالك ديباوعون عليك ميصير يشوفونكم هيج.

كرار .. اسيد لخاطر ربك عوفني خليني اموتها واخلص منها هالعار هاي ، خبلتني .. اهلك ، اخواتك .. امك .. اخوك ..!!
ماادري شأسويلها حتى ترضى ، كافي مليت بعد مااتحملج ، اليوم اقتلج وافتك منج.

اسيد .. استهدي بالله يا اخي مهما يكون هذي ام جهالك.

ساره .. بصوت عالي وصياح .. ارتاحيت هسه كل الي صار بسببك .

اسيد .. استغفرك ربي لج هو مو صوجج صوج الغبي الي ديدافعلج .. اني رايح وخلي رجلج يأدبج.
كرار من سمعها حجت هيج اتخبل بالزايد لزمها سكطها تسكط اني عفتهم وردت اطلع.... جان يلزموني الجهال من رجليه .. عمو عفيه لتعوفنا بابا حيموت ماما .. عمو فدوه لتروح .. لتروح ..ويبجون!!
منظرهم كسر گلبي صح امهم صلفه ولسانها متبري منها بس هذولي مساكين ما الهم ذنب!
كلبي منطاني اشوفهم هشكل ، اني نقطة ضعفي الاطفال مااتحمل ابد اشوف طفل ينأذي .. اتخبل من هذا الشي .. فمن شفتهم متحملت .. رحت ع كرار دفعته عنها حيل ولزمته ..

كرار .. عوفني اسيد عوفني بروح ابويه خليني اموتها.

اسيد .. كرار لخاطر ربك شنو القصه اتخبلت ، من الجهال شوف شصار بيهم ، بس اهدأ هلي نتفاهم.

كرار .. بعد متبقين لحظه وحده بالبيت واذا بقيتي هنا اقتلج خلاص وروح ابويه .

اسيد .. ماشي متبقى هن بس اهدأ اشويه خبلت جهالك.

سكت كرار بالكوه .. بعدين كاللها تلمين هدومج وترحين لاهلج و ورقتج تجي وراج ... واذا على عمي اني افهمه كلشي.
هي كامت تبجي من سمعت صار بيها طلاق والخبر حيوصل لابوها...!
وجها انخطف وكام ينطي اللوان .. اختها سكتت محجت ولا كلمه اباوعلها بس تبجي ..حيل انتن الي جبتنها لتفسجن..!
اخذت كرار للصاله وكعدت حجيت ويا هدأته وكلتله ميصير الي دتسوي ، وهي راح اخذها لبيتنا الى ان ترتاح وتهدأ انت ، تجي ترجعها !
لان اذا راحت الابوها وسمع عمي واصله للطلاق تكبر السالفه وتعرض وخطيه الجهال يرحون بيها ..!
بعد نقاش وكلام طويل كدرت اقنعه .. اخذتها العصر كلشي هي واختها والجهال وطلعنا .. اختها ذبيتها على بيتهم وكلتلها ميطلع حرف من الي صار لان اذا سمع عمي احجي كل اسوالفج .
بقت تتبجبج وتتوسل نزلتها بسرعه وطلعت لبيتنا كبل .. اول يوم نزلت ارتاح من الدوام شفت الويل .. هذي الاجازه مبينه من بدايتها ..!

وصلت للبيت .. لكيت امي كاعده بالحديقه .. و وياها البلوه الثانيه!!
من شافتني لاحظت نظره غريبه على وجها .. بس من دخلت ساره كل شكلها تغير مااعرف ليش !!
دخلت وبعدين دخلو الجهال سلمت على امي وكلتلها بيني وبينها ،حجيه اريدج جوه بموضوع!
امي من شافت ساره وحالتها عرفت صاير شي بينها وبين كرار .. دخلت ودخلن ورايه .. رحت لغرفة الحجيه وهي لحكتني ..
بقت تسأل شصاير وليش اجت ساره والجهال وتستفسر!
كلتلها متعاركه هي ورجلها واني جبتها هنا الى ان يهدؤون اثنينهم اشويه ويجي ياخذها.
بعد نقاش وحوار طويييل عافتني امي!
طلعت من غرفتها كبل لغرفتي للحمام .. سبحت وطلعت ميت جوع .. لبست اتراك اسود وابيض ونزلت ..!
ملكيت احد بس الجهال يلعبون بالحديقه و وياهم داليا ...!!!!
بقيت واكف بالمطبخ اباوع عليها اشون تلعب بالجهال ع بالك طفله مثلهم ..!
اول مره اشوفها تضحك هيج والابتسامه ماليه وجهها .. وياااااااا الله ضحكتها اشكد حلوه !
ضليت اراقبها بدهشه مسحور ببرائتها .. الي يشوفها هسه ميكول هذي نفسها ام اللسان الي ترادد وتحجي!
محسيت غير على صوت ورايه انداريت جان اشوف ساره واكفه ومكتفه ايديها ..!

ساره .. بنبره خبيثه .. شكله عاجبك المنظر!

اسيد .. خزرتها بنظرة استحقار ومشيت .. هيج صلافه مشايف قبل اشويه خلصتها من ايد كرار كان حيموتها وهسه واكفه كدامي بكل وقاحه وتحقق وياي الصلفه!
عفتها وطلعت من المطبخ .. حتى عشى مااريد انسدت نفسي .. رحت لغرفتي رجعت نمت .. للصبح!

كعدت من الصبح كلت ما دام الكل نايم اروح اسويلي لكمه قبل ليكعدن النسوان الي بالبيت ما شاء الله بيتنا صار عباره عن نسوان .. لبست بيجامه التراك وفانيله داخليه خليت المنشفه ع رگبتي  ونزلت ..
محد كاعد والبيت هدوء ... الحمدلله ..!
رحت للمطبخ فتحت الثلاجه طلعت حليب شربته .. وخليت الجاي ع النار راسي مصدع من الجوع والمشاكل .. طلعت بيضات هم سلكتهن يعني سويت ريوك خفيف .. دااخلي الاكل بالصينيه وجان اسمع واخد دخل للمطبخ .. التفتت شفتها كدامي ...!

داليا .. من شفتها دخلت بس هي ويا مااعرف شصارلي حسيت معدتي كامت تكلب مدري اشبيها .. حتى منتبهت على شكلها بس لمحتها دخلت درت وجهي مااتحمل اشوف خلقتها كدامي .. وفوكاها جايه وياه؟!!
من دخلو ردت اكوم بس شفت الجهال دخلو يبجون وحظنو الحجيه  ..!
استغربت اشبيهم هذولي ، لويش يبجون؟!
باوعت على ساره بسرعه انتبهت على وجها علامات زركه بوجها شكلها مضروبه !!
صح اني اكرها وهي مسمومه بس كسرت خاطري خطيه وجها ازرك والجهال يبجون انقهرت كولش عليهم !
بس بنفس الوقت احس نفسي ارتاحيت وشي بداخلي فرح مو شماته بيها او بوضعها .. لااا .. بس حسيت انو اسيد جايبها لهنا لهذا السبب .. الشعور هذا اربكني مااعرف اشون اوصفه ، وشنو معنى؟!!
المهم ..
سلم على امه وحجه وياها شي مسمعته شنو .. بعدين دخلو هو والحجيه .. وساره هم لحكتهم .. بقينا اني والجهال .. !
حاولت احجي وياهم اشويه .. حسيتهم ضايجين ومقهورين كولشي .. اكيد الي صاير شي كبير لحتى مأثر بيهم لهدرجه!
اشويه اشويه .. كلمه منا .. مزحه منا .. بدو يحجون .. يبتسمون .. بعدين ضحكنا  .. حاولت قدر الامكان انسيهم الي همه بي .. بعدين كمت اجيبلهم شي يشربو عصير او مي خطيه تعبو من الركض واللعب !
دخلت .. واني داامشي شفت ساره فوك واكفه يم الباب مال غرفة الحجيه وتتصنط عليهم!!
اشكد جريئه هاي متخاف احد يشوفها ..!
بعدين فكرت اني شعليه هم عائله وحده اني ميخصني بألي يصير .. سكتت بس تصرفها كرهني بيها اكثر ما اني اكرها .. اخذت العصير ورجعت للجهال بقيت اسولف واللعب وياهم لحد ما صارت الدنيا طلمه .. من صدوك اني تونست بهذاك اليوم .. حسيت نفسي طفله وياهم .. اني ابد معشت طفولتي مثل البقيه .. فمن شفتهم اشون يلعبون وفرحانين اندمجت وياهم رجعوني لطفولتي ..!
الى ان اجتي الحيه الصفره وخربت كولشي .. بقت تصيح ع الجهال واخذتهم جوه!!
هاي اشبيها ثول .. هسه اني شمسويتلها بس اريد اعرف .. يلا طبها حمس معليه بيها.
كالعاده سويت عشه للحجيه وشفتها شنو تريد متريد ورحت نمت ..!
كعدت من الصبح غسلت وبدلت .. لبست تراك صيفي بس عريض مو ضيق لونه وردي وبس دببه لونهم رصاصي واسود .. يعني فد شي نازك ومرتب ، ولفيت شعري كوله كعكايه .. طلعت بوجهي للمطبخ جان اشوفه واكف كدامي .. عضلاته وهو !!
يا ربيييييي .. اشون منظر من الصبح لويش هالتعذيب !
ردت ارجع لغرفتي بسرعه قبل ليشوفني بس المنظر شدني .. بقيت صافنه عليه اشون يتحرك .. ويحضر بالريوك .. منظر متشبع منه العين الشمس عليه صار يضوي وشعره يجنن والي عليهم كولهم الشيب الي براسه يا ربييييي ما اتحمل !
خفت يلتفت ويشوفني ردت اروح جان النعال مالتي طلع صوت بالكاع هو بسرعه التفت وشافني ..!
معرفت شنو احجي من عيونه اجت بعيوني .. ضاع الكلام .. صار اكثر من شهر مشايفه عيونه وهسه هو كدامي !!
سكتت وردت اروح .. جان يحجي!!

اسيد .. شعندج كاعده من الصبح؟!

داليا .. استجمعت كل طاقتي الي عندي حتى ما اخربط كدامه بالكلام .. بصوت هادئ .. اريد اسوي ريوك للحجيه.

اسيد .. امي متكعد هسه!

داليا .. لا اني غيرت نومتها .. خليتها تكعدًمن الصبح حتى تنام من وقت باللليل وميصير عدها ارق وتضطر تشرب منوم!

اسيد .. بصراحه فاجأتني ، كل هذا التغيير صاير بغيابي واني ماادري .. سكتت محجيت شي .. جان تدير وجهه وتريد تطلع!!
كلتلها وين ؟!!

داليا .. لما تكمل اجي مااريد ازعجك.

اسيد .. تعالي سوي شغلج راح اطلع اني.

داليا .. محجيت شي ويا بديت احضر الريوك .. واني ساكته محجيت شي بس احس صوت دكات گلبي ماليه المطبخ!
طلعت بطل الحليب اريد افتحه مينفتح قوي .. حاولت ويا ردت افتحه ماكووو ميفيد .. اشون ورطه هاي؟!!
بدون اي مقدمات او اي كلام ..  جان يجره من ايدي !!

اسيد .. شفتها دتحاول تفتح الحليب متكدر .. بقيت اباوع عليها ومبتسم بلا مااحس .. ماادري ليش هي الوحيده الي ابتسم من داخلي ع تصرفاتها .. بقت تفتح بي منفتح!
عجبني اصرارها ع المحاوله وعدم استسلامها رغم انو البطل كلش قوي بس بقت تحاول .. ومطلبت مساعدتي .. قررت افتحه قبل لا ينكسر بأيدها وتسويلنا مشكله وتعال يا اسيد ضمد!
جريته من ايده فتحته وخليته كدامها .. محجت شي حتى مكالت شكرا!

داليا .. اشكد همجي هالمخلوق ميعرف يستأذن يحجي .. كبل جره من ايدي وفتحه .. اني هم محجيت شي ولا شكرته لان اسلوبه كان مستفز!
اخذت الحليب وخليته ع النار .. بعدين رحت دورت ع الشكر ماكوو لكيت العلبه فارغه !!
والعلبه الكبيره فوك الكاونتر وما الوح!!
حاولت اجيبها .. هم مكدرت يراد اثنين بطولي يلا يلوحوها ، مااعرف ام عادل اشون تدبر امورها بالمطبخ وهي هم مو طويله بس اطول مني اشويه ..!
بقيت امد بأيدي كلت بلكي يشوفني وينزلها لان مااريد اطلب منه واذل نفسي .. هو بلا شي شايف نفسه واطلب منه شي منخلص غير!
باوعت عليه خطفه شفته يباوعلي ويبتسم!!
الظاهر عاجبه المنظر الخبيث .. حتى مكلف نفسه ونزلها الي !!
ماشي الله ليعوزني لشكوله .. رحت جبت الكرسي وصعدت جريت العلبه ..كانت مليانه وثقيله حيل .. هي جره وهي وكعه من الكرسي .. ما حسيت غير اني بحظنه!!!!!!
لا لا لا موووو معقول الي ديصير اشون موقف هذا .. اشجابك عليه لويش لزمتني .. گلبي احسه حينفجر من كد سرعته .. ينبض بقوه .. بسرعه سديت عيوني  وبقيت  مغمضه ما اريد افتحهم واشوف نفسي وين!!

بس الي صار بعدين خلاني افتحهم بصدمه ... صوت ساره الخبيث

ساره .. هالله هالله شنوهاي؟!!!

للحكايه بقيه ❤️
رأيكم بالاحداث وتوقعاتكم للبارت القادم 🤗
بس عندي ملاحظه * شنو رأيكم اسرع الاحداث اشويه لو هشكل تمام عاجبكم ، يعني اخليها تجي بالتسلسل وبهدوء؟!
حاخذ رأي الاغلبيه 🤗😘