رواية في ارض الغرام انت دولتي الفصل الثاني والعشرون 22 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

الحجيه .. اسيد كاعد بمطعم ويا بنيه؟!!!!!!!!!!

ايناس .. اني هم مثلج بالبدايه مصدكت عيوني من شفتهم ، بس بعدين طلعت مجرد صديقه مو اكثر صح اسيد؟!!

اسيد .. بصوت جامد وهادئ ، اي كنت ويا بنيه وكاعدين بمطعم احد عنده اعتراض!!

الحجيه .. طبعاً استبعدت تماماً انو تكون داليا هي الي ويا اسيد بالمطعم ، لانها تعرفه اشكد يكرها ويضوج منها ، لذلك ركزت على ان تعرف منو هاي الي كانت ويا لانها كل ظنها ابنها رجع طبيعي بعد اليي صار بالماضي .. صح فرحت من سمعت عنده علاقه طبيعيه بس بقى تعرف منو هي سعيدة الحظ الي كدرت تخطف عقل ابنها وخلته يتغير .. اكيد وحده راقيه ومثقفه !
لانو هي من النوع الي تحب الشكليات والفخفخه ، خصوصاً ابنها دكتور وضابط كل البنات تتمنى .. فـ نست موضوع داليا تماماً !
_منو هاي البنيه ، من وين عرفتها ، منو اهلها ، شنو اصلها فصلها .. !

ايناس .. ههه على كيفج وج عيني اكلتي للولد حاصل فاصل ، ترى البنيه مبين من شكلها راقيه ومثقفه .. والجمال الي شايلته مينوصف من صدك تجنن ، طلع ذوق ابن اختي مو هين!

اسيد . اني رايح من رخصتكم.

الحجيه .. بصوت حاد وعالي .. متطلع منا اذا مااعرف منو هاي البنيه !

اسيد .. بنفاذ صبر ... اول شي طلعتيلي بسالفة داليا وهسه حولتي على هاي السالفه ، اني مو طفل ، اطلع بكيفي ويا الي يعجبني محد عنده يمي شي .. وبالمناسبه البنيه الي كنت وياها اسمها دانيا مو داليا الظاهر ام احمد سمعها صاير ضعيف.

ايناس .. هاا .. مااعرف بصراحه بسبب الي صار نسيت كولشي مكدرت اركز.

الحجيه .. وشنو الي صاير بعد!!

ايناس .. مااعرف البنيه فجأه تخربطت ملحكنا نتعرف عليها عافتنا وراحت.

الحجيه .. اسيد شنو الموضوع فهمني ، منو هاي البنيه لتخلي ضغطي يوتفع واموت بسببك عليك.

اسيد .. كلما اسد الموضوع تطلعلي ايناس بسالفه جديده  تزيد الطين بله موتتني!
اكثر شي اكرها الكذب ، واني دااكذب على امي كرهت روحي بس كنت مضطر وبنفس الوقت حاقد على البلوه الي بسببها اضطريت اكذب .. اني شورطني بهذا الموضوع وشعليه بيها .. اذا امها او لا .. ليش دااخلي نفسي بمواقف بايخه وسخيفه واكذب على شي ميخصني اصلاً!
متحملت اعصابي تلفت واني اخلق اعذار لامي واحد وره الثاني .. بس ما كان عندي حل ثاني ، اني الي بديت هاي التمثيليه ولازم استمر بيها .. حاولت اسيطر على اعصابي وما انفجر ، تركت الجنطه من ايدي وكعدت كدام امي حتى افهمها لان صبري خلص وراح ارتكب بأيناس جريمه ..بصوت جامد و حاد ..

_ البارحه كان زواج صديقي علي عزمني لعرسه ورحت هناك لكيت جماعتي من ايام الكليه وزميلاتي .. بقينا نسولف ونتذكر ايام قبل ، من خلص العرس طلعنا كلنا حتى نتعشى بالمطعم بعدين الكل راح بقينا بس اني وهذي البنيه دانيا الي شافتها اختج وياي ، ولما شافتنا خالتي وسلمت البنيه انحرجت لانو كاعدين الحالنه فأستأذنت وراحت .. هذا كل الي صااااار صدكيني!

الحجيه .. معقوله انت تكعد ويا بنيه وحدكم ؟!
زين ليش خالتك اتكول البنيه تخربطت ؟!!

اسيد كلتلج البنيه انحرجت من خالتي وزوجها ، بعد هي طبيعتها هشكل اني شنو علاقتي!

الحجيه .. لو ما ابني و اعرفك متكذب ما جان صدكت هذا الفلم .. وهسه جاوبني وين داليا؟!!

اسيد .. لا اله الا الله .. اني رايح ..
عافهم وطلع ... منطى مجال الامه تحجي اصلاً حتى ليضطر يكذب اكثر!
اخذت جنطتي شمرتها بالسياره وطلعت .. شفت الجهاز ديرمش!!
فتحته لكيت كومه مكالمات فائته من رقمي الي عند داليا ....!!
گلبي انخطف اكيد صاير شي ليش هالكد متصله .. بسرعه اتصلت على جهازها يرن مترد!!
قلقت بالاكثر ليش مدااتجاوب معقوله صارلها شي .. ماادري شنو صارلي بوقتها بس حسيت بخوف مو طبيعي!
بكل سرعه طلعت لبيت المزرعه .. مااعرف اشلون وصلت بالي كان مشغول بالتفكير عليها .. ليش هالكد متصله ، وليش مترد!
دخلت للكراج مالت البيت شفت الحارس ابو سعد ديشتغل بالحديقه و ماكو شي!
مسألته عن شي بسرعه نزلت للبيت بوجهي دخلت مثل المفجوع .. اتلفت ... وجان الكاها نايمه بالصاله ع التخم !!
گلبي يرجف مثل السعفه حتى اديه كامت ترجف من الغضب .. خبلتني واجيت ركض مثل المخبل وتالي نايمه ولا صاير شي!
من شفتها صح ضجت وعصبت بس شي بداخلي ارتاح ، احس بركان بيه هدأ من شفتها ما بيها اي شي وممتأذيه .. لزمت باب المدخل مالت البيت وسديته بكل قوتي بحيث الجام راد يوكع .. هي رأساً فزت من سمعت الصوت!!

داليا .. فزيت مرعوبه ع بالي صار انفجار .. اني متعلمه ع هذي الاصوات من كنت بالميتم بس من اجيت لبيتهم من زمان مسمعتها بعد .. فـ أول ما سمعت الصوت كمزت من مكاني اريد اشوف شكو .... جان اشوفه واكف كدامي ومبين من ملامحه الغضب ومسيطر عليه .. اني كعدت مرعوبه من الصوت وشفت خلقته مكشره كدامي انرعبت اكثر بلعت ريگي بصعوبه وبصوت يرجف ..

_خير شصاير شنو هذا الصوت!

اسيد .. بصوت حاد .. شعندج متصلع عليه الف مره!

داليا .. هاا .. مـ .. و .. هـ..ذا .. شـسمـ..ـه

اسيد .. جاوبي عدل احسن ما اطلع شياطني كلها بيج والخلقج!

داليا .. مو قصدي .. والرب .. بس .. بس اني كعدت ملكيتك .. و شفت البيت فارغ .. اي .. فأني .. خفت .. لحالي بالبيت وطلعت للحديقه .. سمعت صوت چلب دينبح .. خفت مااعرف شنو اسوي .. اني اخاف .. اخاف ابقى وحدي .. اتصلت عليك .. هذا الي صار .. والرب!

اسيد .. من نبرة الخوف بصوتها واضح انو هي متكذب .. ليش مرديتي من اتصلت بيج!

داليا .. شنو .. اشوكت اتصلت .. هذا الموبايل وشوفه .. اصلاً مسمعته .. ولا اتصلت!

اسيد .. جريت الموبايل من ايدها .. باوعت الجهاز ع وضع السايلنت ..  مااعرف اني ناسي سايلنت لو هي لاعبه بي ومحولته بالغلط ع الصامت!
شمرت الموبايل ع التخم بقوه .. وبصوت حاد ..

_اني رايح اجيب السيد واجي حضري روحج اليوم اعقد عليج!

داليا .. شنووو ..!!

اسيد .. اعتقد لغينا بهذا الموضوع واتفقنا .. لتدوخيني!

داليا .. اي .. صح بس اشون اتزوجك ، اني مسيحيه .. وانت مسلم .. اشون يصير؟!

اسيد .. كل واحد يبقى على دينه وكلتلج الزواج شكلي بس ع الورق ، لان اني ديني ميسمحلي اكعد ويا مره وحدنا تحت سقف واحد بلا اي رابط شرعي .. هذا كل الموضوع .

داليا .. يعني زواجنا مو باطل ؟!!

اسيد .. انتي غبيه لو تتغابين .. امشي حضري روحج .. وطلع ..!

داليا .. عافني بنص حيرتي  وطلع ماادري شسوي حتى من أسأله اجاباته متقنعني واصلاً بالكوه احصل منه جواب .. كعدت ع التخم حايره بزماني الي يطلعني من مصيبه يشمرني بالثانيه .. مر الوقت بسرعه محسيت بي من التفكير الي نخر عقلي اشون اتزوجه .. واشون اعيش ويا .. اشون حتكون علاقتي بي .. حيعاملني مثل زوجه لو خدامه .. زين اشون اذا طلكني!!!!!
صح الموضوع مو سهل ، الخطوه كولش كبيره ، والزواج مو لعبه حتى اذا كال مجرد ع الورق .. بس شي بداخلي كان طاير من الفرحه !
حيتزوجني .. حيصير الي .. من اول مره شفته كلت هذا حيصير الي لو اعرف اموت .. بس مو بهذي الطريقه!
هو معتبر زواجي منه مجرد شي شكلي .. بس اني بالنسبه الي حلم وحيتحقق .. كنت فرحانه غصباً عليه .. حسيت نفسي طايره من الفرحه ، بس فرحه مكسوره ..!
ماادري شنو هذي المشاعر المخربطه الي دااحسها .. مره اخاف من يذكر الموضوع .. بعدين احس بفرحه من اتذكر حيصير زوجي .. والي يرعبني اكثر فكرة انو حيجي يوم ويطلگني ..!
شنو هالتناقض الي دااحسه يمكن اتخبلت اني وهذا نوع من الجنون الي دااعيشه!
بلحظه وحده وبعد تفكير كبييييير .. قررت قرار كولش مهم ، يمكن هذا القرار الوحيد الي حسيته غلط بحياتي ، بس مع ذلك لازم اسوي!
وهو ..
بعد ما نتزوج راح اسوي المستحيل حتى اخلي يحبني ويحس بحبي اله .. و لو اعرف اموت ما اخلي يطلكني.

اخذت هذا القرار وكمت اغير ملابسي .. لبست ملابسي العاديه تنوره سوده قديمه وقميص نيلي !
وكعدت انتظر .. !

اسيد .. عفتها وطلعت گبل رحت لبيت علي صديقي ، ماعندي احد غيره ممكن يوكف وياي ويفهمني .. وصلت لبيته خابرته كلتله اني واكف جوه انتظرك .. طبعاً هو ساكن بشقه!
اشويه ونزلي ..

علي .. هلا ابو الاسود اليو شعجب منورني!

اسيد .. هلا بيك ابو حسين .. اشلونك شخبارك اشلونه العرس وياك!

علي .. هههههه لحد الان يخبل .. ونصيحه تزوج ترى تخسر اذا بقيت عزابي !

اسيد .. هو اني جايك على مود هذا الموضوع!

علي .. شنوووووو .. معقوله راح تتزوج!

اسيد .. هسه راح تخليني واكف هنا؟!!

علي .. خرب لك نسيتني حتى اسمي .. اتفضل اتفضل .. اخذه وصعدو!
دخل اسيد وحجه الموضوع كوله العلي .. فهما انو الزواج مجرد شكليات بس مكاله عن موضوع امها لداليا .. كاله انو اريد اتزوجها حتى اخلص من زوجة اخويه كرار لازكه بيه تريدني اتزوج اختها!
علي تقريباً اقتنع بكلام اسيد بس الي استغربه ليش اختار داليا وهو يعرفه يكرها .. شنو ذنبها يكسرها ويستغلها لمصلحته!
حاول يقنع اسيد انو يشوف وحده غير داليا لانو ما الها ذنب ، ومن هذا الكلام .. بس اسيد كان ماخذ قرار ومنتهي حسب ما شافه علي طبعاً .. بالنهايه ما كان كدامه حل غير انو يساعد صديقه رغم كلشي!
اتفق اسيد ويا علي وطلع كاله راح اخذ السيد واروح كدامك للمزرعه وانت الحكني انتظرك!
راح اسيد وعلي لكى تحقيق ثاني!!!

سلمى .. شنو هذا الي سمعته علي ، اشون تقبل صديقك هيج يسوي بداليا؟!!

علي .. حبيبتي صدكيني اسيد مستحيل يسوي شي غصباً عنه او مو برضاته .. بس هو يكابر وميكول الحقيقه كدام احد!

سلمى .. شنو قصدك يعني ؟!!

علي .. اتقر من سلمى وحضنها .. قصدي هذا عاشق ولهان مثلي بس ميحجي شي ولا يعترف .. اني متأكد يحبها لداليا وراح يجي يوم واثبتلج كلامي.

سلمى .. مااعتقد الي مثل صاحبك هذا عنده مشاعر وگلب اصلاً.

علي .. هههه لا ترى هواي ظالمته لاسيد ، اسيد انسان طيب وخلوق بس هو اكو هواي اسباب خلته يصير قاسي هيج الله وحده العالم شنو شاف بحياته حتى تغير لهدرجه.

سلمى .. امممم .. خلي اروح احضر نفسي لعد.

علي .. وين؟!!!

سلمى .. وين يعني .. اروح وياك اكيد ، داليا هذي صديقة عمري واختي مستحيل اعوفها بهيج يوم وحدها حتى لو كان زواجهم كذب ومجرد شكليات موبس لازم احد يوكف وياها.

علي .. بس اسيد..

سلمى .. معليه بأسيد واني مرايحه وياك علي .. اني رايحه لصديقتي رجاءاً افهمني.

علي .. اووووف منج .. ماشي امري لله روحي البسي بسرعه ما ضلنا وكت.
راحت سلمى بدلت وحظرت روحها .. بعد كم ساعه وصلو لبيت المزرعه!
وصلو لكو اسيد بعده بالطريق .. دخلت سلمى لكت البيت فارف وهدوء .. صاحت داليا؟!!!

داليا .. كنت كاعده وهموم الدنيا والافكار كولها على راسي .. فجأه سمعت صوت سلمى!!
معقوله هذا صوتها لو اني طكت فيوزاتي وكمت اتخيل من كد التفكير!!
اشويه .. وجان اشوف سلمى واكفه كدامي!!
بقيت صافنه بوجهها ممصدكه عيوني .. سلمى اجتي .. بعد لحظات من الصدمه ركضت عليها حضنتها .. كنت محتاجه احد ارتمي بحضنه وابجي ، احجي ، اطلع كل الي بداخلي وارتاح والله دزلي سلمى الحمدلله!
بعد سلام ودموع بالساعه .. سولفنا وحجيتلها كولشي .. طبعاً هي فهمتني الكلام الي كايله اسيد الهم انو بس يريد يخلص من بنت عمه!
واني هم مكلت لداليا ع الحقيقه لان مردتها تضم ع رجلها وتصير بينهم اسرار لانوو اذا عرفت مراح اقبل زوجها يعرف وبهذي الحاله حتكون بموقف محرج .. لذلك سكتت مكلتلها شي!

اشويه وسمعنا صوته المرعب ديدخل بالسيد !!
كالت سلمى يلا كومي بدلي!

داليا .. هياتني جاهزه.

سلمى .. ولج شنو جاهزه شنو انتي هالجرود هذي هم حاسبتها ملابس؟!

داليا .. مبيهم شي سلمى امشي خلي ننزل.

سلمى .. من كل عقلج داليا .. امشي البسي غيرهم بسرعه يلا.

داليا .. هااا .. مو اني ممشتريه ملابس جديده بعدني.

سلمى .. وج مو الا جديد بس اي شي غير هذولي .

داليا .. والله ماعندي.

سلمى .. البسي هذا الي لبستي بعرسي!

داليا .. لا دخيلج لتذكريني بي هذا مااريد اشوفه اصلاً

سلمى .. لويش اشبي؟!

داليا .. سلمى الله يخليج انسي هذا.

سلمى .. ماشي د دوري منا منا بلكي اكو صارلج اشكد تشتغلين عندهم مشتريتيلج شي .

داليا .. عندي الفستان الي اشتريته من كنت بالدير اني وياج !

سلمى .. ايييييي ولج هذا يجنن عليج روحي جيبي .

داليا .. لا سلمى هذا مال مناسبات عيب اللبسه.

سلمى .. شووو دروحي جيبي لا ابتلي بيج ، لعد هذي شنوو مو مناسبه ؟!

داليا .. اووف منج شجابج الي

سلمى .. هههه ولج هسه كنتي تبجين من الفرحه ، دمشي روحي جيبي .

داليا .. لما كنت بالدير اخذت فستان كولش حلو ومرتب اني وسلمى واحد وكنت ناسيته نهائياً بس لما جمعت ملابسي من بيت اهل اسيد واجيت لهنا لكيته ويا الملابس .. خليته بالجنطه كلت اخاف فد يوم اروح لسلمى البسه!
رحت طلعته ولبسته
لونه مشمشي مااعرف شربتي لون فاتح بس حلو  وقماشه شيفون ناعم كولش نازك حلووو مال مناسبات هادئه!
الصوره خليتها فوك للبارت ، بس صدره مو مفتوح مرتب

سلمى  .. اللللللله والمسيح يجنن علييييييج ع بالك اميره طالعه ، امشي يلا اسوي شعرج واخليلج ميكب .

داليا .. لتخليلي ميكب دخيلج انثول واني معايزه.

سلمى .. هههه وج اشويه خفيف مو هوايه ، دتعالي ومعليج  ، سوتلي سلمى ضفيرتين ناعمات من مقدمة شعري ورجعتهم للخلف صارو مثل طوق الاميرات وخلتلي بيهم وردات ناعمات ويا الفستان كانو ومن ورى جمعتهم ويا شعري وسوتهم ضفيره هنديه  طويله وراخيه صارت تجنن!
وخلتلي ميكب خفيف كولش وهادئ!
شفت نفسي بالمرايه طالعه فد شي نازك ومرتب .. ولبست حذاء كعب صغير لونه ذهبي!
عيوني دمعت لما شفت نفسي مااعرف افرح لو ابجي حتى سلمى اباوع عليها الدموع بطرف عيونها .. من شافتني اشون مرتبكه ومتلخبطه حضنتني !

سلمى .. ديري بالج تبجين ترى وجهج يصير خريطه.

داليا .. ضحكت والدموع بعينها متجمعه .. هههه خرب ببليسج سلمى بعز قهري تضحكيني من يومج.
دنحجي وجان سمعنا صوته المخيف من ورا الباب..

اسيد .. بصوت حاد .. اذا خلصتي انزلي يلا السيد دينتظر.

داليا .. گلبي كام يرجف مااعرف شنو صارلي .. ع بالك حروح لحربمو اتزوج .. بقيت جامده بمكاني وارجف .. جرتني سلمى ونزلنا .. لكيته ماكو بالباب .. دننزل ليجوه .. وجان يجيني يركض مثل الاسد!!

اسيد .. بصوت عصبي بس ناصي من بين اسنانه ..  ويييين رايحه بهذا اللبس!

داليا .. مكدرت احجي شكله ونظراته خوفتني!

سلمى .. وين يعني غير انت صحتلها ؟!!

اسيد .. امشي البسيلج عبايه شي فوك هذا وانزلي بسرعه.

داليا .. من كال عبايه صدمني .. مو استنكف منها او شي بس اني بحياتي ملابستها ولا اعرف البسها اصلاً .. مااعرف لويش خفت حسيت نفسي اختنكت و ورطت روحي .. سكتت بس نبرة التهديد بصوته خلتني اصعد بدون وعي مني .. رحت جبت الفروه الي اشتريتها ويا الفستان بعرس داليا صح من اشوفها اتذكر الي صار واختنك بس كنت مجبوره لا يحجي شي كدام سلمى وتصير مشكله وبنفس اللحظه مردت اكسر كلمته وافشله لانو قررت اخلي يحبني..  جريتها ولبستها.
نزلت لكيت سلمى كاعده بالصاله الصغيره  وحدها  وهو واكف كدامي ع الدرج من شافني لابسه هشكل حسيت ملامحه ارتخت وعيونه راحت منها نظرات الغضب .. بصوته الحاد ..

اسيد .. روحي اكعدي يم صديقتج ومن يحجي وياج السيد جاوبي من ورا الباب!

داليا .. شنو من ورا الباب مفهمت يعني لويش!

اسيد .. سوي الي اكولج عليه وبس بدون كلام بعدين اتفهمين.

داليا .. نزلت بدون كلام ورحت يم سلمى كعدت .. اشويه وسمعت صوت السيد من ورا الباب يحجي وياي ..
سألني عن اسمي واسم ابويه .. كلتله .. طبعاً اني عندي هويه من الميتم طلعوها الي مذكور بيها بس اسمي واسم ابويه  سجلوني بأسم العم امين وعمري  يعني اني اعتبرها هويه تعتبر رمزيه مو حقيقيه ونسبوني للميتم!
الحاصل ..
سألني السيد اشياء اول مره اسمعها .. بقيت صافنه بس سلمى علمتني شنو اجاوب .. جاوبته وبعدين كالي مبروك بنتي!
حضنتني سلمى وباركتلي .. بوقتها من صدوك حسيت بخنكه وردت ابجي بلا سبب .. بس كنت محتاجه ابجي !
بقينا كاعدين اني وسلمى انسولف .. وحجتلي اشون اتقدملها علي واشون عافت الدير وطلعت منه نفس حالتي هم بالليل ماخذه ملابسها ورايحه ويا علي .. سألتها اشون اتزوجته وهي من غير ديانه؟!
كالتلي عادي علي راح وسأل كالوله مو مشكله بس ميصير تجبرها تغير دينها الا برضاتها .. واني بصراحه بعد الي سوا علي على مودي حتى ضحى بألها حتى يتزوجني حبيته لدرجه قررت اغير ديانتي واصير مسلمه حتى ميحس اكو فرق او اختلاف بينا .. وفعلاً علي فرح هوايه من سويت هذا الشي!

داليا .. وانتي اشون تعوفين دينج بسهوله يا غبيه !

سلمى .. صدكيني داليا ماكو اي فرق سواء مسلم او مسيحي بالحالتين ربنا واحد ومااعتقد الي سويته يغضب الله سبحانه وتعالى ابداً .. بالعكس حسيت نفسي كأنو بعدني نفس ديني ويمكن متصدكين اذا كلتلج هسه اني مرتاحه اكثر.

داليا .. والله مااعرف شنو اكلج بعد الي شفنا بحياتنه كرهنا حتى الدين والتدين .

سلمى .. لج لتحجين هشكل استغفري ربج ، كل هذا اختبار النا .

داليا .. هلا هلا الظاهر صايره رجل دين معرفتج ولج.

سلمى .. ههههه اي شعبالج لعد .

داليا .. زين سلمى ، اذا هو مسيحي وانتي مسلمه يصير تتزوجي؟!!

سلمى .. مااعرف بصراحه بس ليش دتسألين؟!

داليا .. هاا .. لاا .. هيج .. مجرد سؤال اجه ابالي .

بهذي الاثناء صاح علي على سلمى .. يلا اتأخرنا .. سلمت عليه وراحت اني طبعاً مطلعت سلمت على علي لانو كنت مستحيه من لبسي وخايفه من هذا لا يفشلني كدامهم .. بقيت بمكاني !
شفته من الشباك راح وياهم يوصلهم!
الدينا كانت العصر والجو يخبل شمس طالعه وهوا بارد .. هو اتأخر وياهم الظاهر راح شو ووين ، طلعت للحديقه كان بيها اشون المصطبه او (الكرويته) خشب .. صفنت ونسيت نفسي!
فجأه كل الذكريات مرت كدامي .. شنو السعاده  الي شفتها بحياتي !
طفولتي عذاب وقهر من امي وابويه ومشاكلهم .... الى هذا اليوم!
عافتني طفله اني واختي وراحت الاهلها ..!
ابويه انتحر  كدام عيني وعاف اختي برگبتي..!
صياح جدو علينا وطردنا بالشارع ..!
رجعت شمرتنا للميتم بلا وجع گلب..!
الدير وعذابه الي شفته !
خدمتي وذلتي ابيت اهله !
الى هذا اليوم الي انحكم عليه اتزوج بلا اي فرحه من شخص اصلاً ميحبني ولا يهمه وجودي !
بلحظه لكيت نفسي ضايعه .. وكل الفرحه الي كانت بداخلي قبل كم ساعه اتبخرت!
على منو اضحك اني .. اسيد مستحيل يحبني ولا حيجي يوم يفكر بيه نهائياً .. بزواجي منه كسرت نفسي مو اكثر!
كل الي احس بي وجع .. وجع بگلبي يمرد روحي مرد!
رفعت رجليه قربتهم من صدري ، خليت راسي عليهم والدموع تنازع بعيوني حتى تنزل ... المفروض اليوم افرح بعد ما حققت حلمي وتزوجت الشخص الوحيد الي دخل گلبي وملكه!
زين لويش دااحس الوجع ينهش بگلبي ، لويش دموعي تخرگني من النار الي بداخلي!
بقيت ع هذي الحاله مااعرف اشكد بس انتبهت الدنيا ليلت وبدت تظلم!!
ما رجعني من صفنتي غير صوته!

اسيد .. بعد ما جبت السيد رجعت للبيت بسرعه لان ع بالي علي حيجي وحده مردتها تبقى لحالها .. من وصلت لكيت علي كدامي وجايب مرته!
بالبدايه انزعجت لان اني وصيته ميكول الاحد !
بس هو فهمني انو زوجته سمعتنا واحنا نحجي فأصرت الا تجي بعتبار داليا بمقام اختها!
سكتت .. ورحت اصيحها ... جان تنزل من الدرج ... اول ما شفتها اصطكيت!
جمال ملائكي وهادئ .. لابسه فستان حلوووو جداً مااعرف منين جايبته!
بس اعتقد من سلمى اكيد لان مشايفه عدها من قبل ولا لابسته !
الجمال الي شايلته يخطف الانفاس بحيث جمدتني بمكاني .. هالمخلوقه عباره عن كتله من النعومه .. كلشي بيها ناعم وحلووو!
لاحظت الثوب كان بلا ردن وصدره مفتوح اكثر من اللازم .. وهذا الشي عصبني بلا سبب!
شي بداخلي صاح عليها تروح تغيره !
وفعلاً رغم اعتراض صديقتها هي بلا نقاش راحت غطت نفسها ..!
حيل ارتاحيت لتصرفها وعجبتني اكثر بلا عناد .. لانو هي بالعاده متسوي شي بلا نقاش بس كدام صديقتها محجت شي!
المهم
كملنا العقد .. باركلي علي واخذ مرته وراح!
اني هم اخذت السيد وصلته لان المزرعه كلش بعيده عن بيته .. بالرجعه مريت ع المطعم جبت عشه ورجعت للبيت!!
لكيته هدووووء واظلم!
تنحنحت .. طلعت صوت .. ردتها تجي ماكوو . .. صحتها بأسمها هم ماكو .. وين راحت هاي !

عفت الاكل ع الميز ورحت للحديقه .. الدنيا ليل والهوا بارد من الباب يدخل!
لكيتها كاعده ع الكرسي ، صافنه بغير عالم  و واضح الحزن على ملامحها!!
بصوت جامد وهادئ..

_ليش كاعده هنا ؟!

داليا .. محجيت شي بس باوعت عليه ورجعت درت وجهي عنه!

اسيد .. داليا؟!!!

داليا .. من كال اسمي بعد مكدرت اكتم دموعي لحالهم نزلو .. بس بقيت على نفس هدوئي!

اسيد .. هي بجت واني گلبي احترك !!
دموعها لسبب غريب تحرگني احسها تعذبني .. والي زعجني اكثر متجاوبني!

_ليش البجي؟!

داليا .. بصوت مخنوك من بين دموعها .. و شنو الي ميبجي؟!!

اسيد .. كلتلج هذا زواج ع الورق يعني مراح تخسرين شي !

داليا .. وشنو الي بقى حتى اخسره!

اسيد .. كافي لتبجين.

داليا .. اتصور اني من عمري 8 سنوات لحد هذي اللحظه معرفت معنى للسعاده .. والمفروض اليوم افرح بس شوف حالي!

اسيد .. وليش متفرحين؟!!

داليا .. برأيك لما يتزوجك شخص غصباً عنه هذا شي يفرح؟!!

اسيد .. منو مال غصباً عنه؟!

داليا .. درت وجهي عليه بعدم فهم .. مفهمت!

اسيد .. يمكن يحب!!!!!

للحكايه بقيه 🙄
اسفه اتأخرت بس والله النت شلع گلبي مينشر الواتباد اذا النت ضعيف من البارحا كملته ومينشر 😪
رأيكم بالاحداث وتوقعاتكم للبارت القادم ❤️ لتنسوووون التصويت