رواية في ارض الغرام انت دولتي الفصل الثالث والعشرون 23 - بقلم ﮼الاميره،الموسويه 👑

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

داليا .. شنـ..ـو..وو .. مفـ..مفهمـ..ـت ..شقصد..ك يعني ....!

اسيد .. قصدي صديقتج سلمى وعلي صديقي .. اثنينهم انغصبوا يتزوجون .. هو لانه يحبها انغصب يتزوج بالسر حتى اهله ميعرفون بزواجه .. وهي حتى تخلص من الدير انغصبت تتزوجه!

داليا .. للحظه حسيت الدم جمد بعروگي وگلبي نبضاته اختفت مااحس بيهم .. كنت بقمة تعاستي وحزني .. بس لما كال يحب .. اتوقعت اكو ذرة حب بداخله او حتى مو حب .. مجرد شعوره بأي شي تجاهي كان كفيل انو ينقذني من كل الي اني بي .. ممكن ينطيني امل بأن اعيش فرحه حقيقيه لمره وحده بحياتي .. بس رده الي زيد همي هم ثاني!
حسيت گلبي من صدوك فارغ .. خاوي .. مابي ذره شعور .. كولشي اخفتى بثانيه .. درت وجهي عنه ومجاوبته .. يمكن ما الي ويا فرصه ، ولا اكو أمل يحبني بيوم من الايام .. بس اني ماعندي شي اخسره خليني احاول ويا عسى ولعل يحس بحبي اله .. اشكد حاولت ادوس على گلبي واتجاهل مشاعري تجاهه .. بس بمجرد ما اشوفه لو المحه .. گلبي الارعن يطفر من صدري ويتمسك بي .. مثل المسحور الي يتصرف بدون وعي منه .. غصباً عليه!
بقيت ساكته بس ادموعي اختفت .. حسيت بي كام وكف..!

اسيد .. كومي منا الجو بارد لتتمرضين وتعال روح للمستشفى ويشوفنا احد هناك وننفضح مثل هذيج المره بالمطعم!
امشي ادخلي.

داليا .. منتبهت عليه ابد كمت من مكاني ودخلت بسرعه .. رحت بوجهي لغرفتي دااصعد الدرج جان صوته الكريه يوكفني!!

اسيد .. وين رايحه؟!

داليا .. ملتفتت عليه ، جاوبته ..
_رايحه انام.

اسيد .. تعالي اتعشي وروحي نامي .

داليا .. مااشتهي.

اسيد .. بصوت جامد .. تعالي اتزقنبي كلت .. وهذي اخر مره اكولج لما الغي وياج تلتفتيين عليه وتجاوبين .. ثقي اذا كررتيها بعد متلومين غير حالج!

داليا .. واضح من نبرة صوته الغضب ، لا كولش حيحبني !!
محجيت شي .. درت وجهي بس مباوعت بوجهه ، رحت للمطبخ لكيت الاكل بعده بالعلب ع الميز !
فتحتهم ورتبت الاكل ع الطاوله بالصاله هو ماادري وين راح .. خليتله اكله واني اخذت صحن خليت بي اشويه اكل ورحت للمطبخ .. عفته وردت اصعد ابدل ملابسي لانو الثوب يتوصخ حرامات واني ما عندي غيره .. دااطلع من الباب وجان يصير بوجهي .. انضربت بي!!!
هو اطول واضخم مني .. صارت الضربه بصدره ، مكدرت ارفع راسي واباوع بوجهه من الخوف حسيت گلبي حيوكف .. من وين طلعلي هسه شفته مموجود بالصاله اشون اشرد من هذا الموقف!
علقي احسه اتوقف عن التفكير وانشغل بشي واحد بس .. عطره!
ريحته دخلت براسي بحيث دخت وانسطرت .. عضلات صدره الصلبه خلو عيوني تغوزل ماادري اشصارلي كان لابس تيشيرت اسود مخصر عليه بحيث كل تفاصيل عضلاته واضحهه .. كالعاده رحت لغير عالم وصوته الي صحاني!!

اسيد .. راحت هي تسوي الاكل واني رحت اغير ملابسي لان اختنكت من الجاكيت والقميص ، كلت البس تراك اشويه اريح .. سبحت سريع وبدلت ملابسي نزلت .. لكيت الاكل ع السفره وهي ماكو!!
رحت للمطبخ دااشوفها وين اختفت وجان انضرب بيها الظاهر هي هم كانت طالعه بنفس اللحظه!
من انضربت بيه بقت واكفه بمكانها متحركت ولا خطوه!
مو اول مره يصير بيها هيج .. اني ملاحظها كلما تشوفني لو اقترب منها احسها ترتبك وتكوم ترجف .. شنو السبب مااعرف .. بس الي اعرفه انو الي تأثير عليها حيل قوي بحيث تصطك بمكانها مرات!
المهم ..
ارتباكها فادني هواي خلاني اتمعن بيها عن قرب .. هي قزمه بالنسبه لطولي بس نعومتها حلوه تحسسك برجولتك بقربها!
بدت ترجف واني ابتسمت لا ارادي .. تأثيري عليها وخوفها مني لسبب غريب يخلوني ابتسم!!
صح هو مو شي حلو ولا يضحك بس اني بلا قصد مني احس شي بداخلي ديبتسم!
بقيت اباوع عليها .. شعرها اشلون مسرحته ع بالك شعر اميرات .. الثوب ماخذ منها مأخذ .. بحيث طالعه مثل اللعابات الي اشوفهن بالتلفزون!
جسمها كارثي مفصل تفصيل .. سبحانه الي خلقها ..!
كنت سرحان بجمالها ودا أتأملها .. ما حسيت غير شي بعقلي افتر ... فجأه اسوء مخاوفي اتحقق ، وتذكرت عذابي الابدي .. ماضيي الاسود .. كلشي تحول الى كره ونفووور .. ابتعدت عنها بأشمئزاز .. بصوت جامد!

_اشبيج عميه انتي؟!

داليا .. مو قصدي بس انت طلعت كدامي فجأه مشفتك.

اسيد .. حضرتي الاكل!

داليا .. اي حضرته ع السفره هناك بالصاله.

اسيد .. امشي تعشي.

داليا .. هذا عشايه حتعشى هنا.

اسيد .. وهو داير وجهه عنها ديروح للصاله .. بلا لغوه زايده امشي .

داليا .. احسن شي مااعانده لانو اولاً ميفيد ويا العناد وثانياً مو لمصلحتي!
مشيت ورا للصاله كان كاعد راس الطاوله  ع الكرسي الكبير اني ابتعدت عنه كعدت بأخر الطاوله لانو مااكدر اكُل و واحد يباوعلي .. انوب هذا ديتفحصني بنظراته!
جريت الكرسي وكعد .. مديت ايدي وبديت اكل هو ما أكل شي بس كاعد بكل هدوء و يدخن ، اني بصراحا كنت ميته من الجوع من الصبح مماكله شي ومعدتي تصوصي ، مهتميت لوجوده اكلت لحد ما شبعت اصلاً مرفعت راسي وشفته ولا انتبهت ع نفسي واني دااكُل .. ما رفعت راسي الا لم كملت كل صحني وشبعت .. اول ما رفعت راسي لكيته صافن عليه بتركيز .. وماكو بعيونه غير الظلام وابتسامه خبيثه على طرف حلكه!!
نظراته هذي والابتسامه هم اعرفها .. واضح من ملامحه شنو الي ديدور اباله!
بسرعه اني بعدت نظري عنه وباوعت ع نفسي .. لما كنت مشغوله بالاكل نسيت نفسي .. كلتلكم مماكله شي والجوع كافر ، واني مدنكه ع الصحن الفتحه مالت صدر الفستان كولها نازله بحيث اغلب صدري مبين!!
من انتبهت على شكلي والفستان من صدوك اتمنيت الكاع تنشك وتبلعني من الفشله والخجل .. هسه عرفت سبب هذي النظرات شنو؟!
بسرعه عدلت نفسي ورجعت ملابسي ليوره ، كمت واني مدنكه مرفعت راسي .. بصوت يرجف همس كلتله ..

_شبعت حروح لغرفتي.

اسيد .. اكلت بشراهه حسيتها صدك جوعانه تاكل مثل المفجوع .. متت ضحك عليها بس بداخلي مبينت شي ع ملامحي!
مااحجيلكم المنظر الي شفته هي حجتلكم اكيد شنو الي شفته .. بس حتى توصل الفكره اكثر .. المنظر كان عباره عن لوحه فنيه بأيد رسام مشهور .. سبحانه الله شنو يخلق من جمال يسطر!
رغم كل محاولاتي اتجنب النظر الها بس شكلها كان مغري كوه يجبرك تباوع..
احساس غريب اعتراني واني اراقبها .. كنت بداخلي اضحك واحترك بنفس الوقت!
هي من انتبهت حاولت تشرد كالعاده .. بس اني منطيتها مجال لان كان عندي حجي لازم اكوله الها..!
بقيت على هدوئي مغيرت ملامحي من شافتني حتى لا ع بالها نادم لانو باوعت ولا تفكرني انهز من ردة فعلها .. بصوت حاد ..

_اكعدي عندي حجي وياج.

داليا .. اليوم تعبت اذا ممكن انأجل الكلام لباجر.

اسيد .. شوفي احنا احتمال انطول على هذا الوضع .. واني مااحب اكرر كلامي كل اشويه واسلوب التهديد والتحذير اكرها .. فحتى لا اعصب واسوي شي تندمين عليه لتخليني اعيد كلامي مرتين .. من اكلج على شي سوي من اول مره وهذي هم للمره الاخيره اوضح .

داليا .. اسلوب كلامه ونبرة صوته شرحت الانزعاج الي بداخله .. يعني  ماكو داعي اخلي يشوفني انزعاجه من تصرفي اكثر .. داليا اذا تردين تكسبي صيري ادميه واتركي غبائج والعناد .. بصوت هادئ ..

_تمام مراح اعيدها بعد .. بس اذا ممكن خليني اروح ابدل ملابس واجي لانو اتضايقت كولش.

اسيد .. بسرعه ما عندي وقت .

داليا .. اول ما كال بسرعه طرت من مكاني بس اريد اشرد من يمه انهزم واختل بأي مكان من نظراته الي أكلتني!
رحت لغرفتي گلبي يرجف ونفسي انكطع .. مااعرف من الفشله لو من السرعه الي ركضت بيها للغرفه ..!
بسرعه دخلت للحمام غسلت وجهي من المكياج صح خفيف بس زاعجني .. شعري بقيته ع حاله لانو ما عندي وقت افتحه وهو كال لتتأخرين .. نزعت الفستان ولبست ثوب بنسل طويل لونه زيتوني ونزلت بسرعه..!
اباوع ع الصاله الاكل مموجود والطاوله نظيفه!!!!!
معقوله هو الي نظفها .. لاااا مستحيل هذا المتوحش ينظفلي ويشيل الاكل!
بعدني وجامده وافكر .. جان يطلع كدامي من المطبخ وبأيده كوبين .. معبرني اصلاً راح كعد ع التخم وخلا كوب من الي بأيده ع الطاوله والثاني يشرب بي..!
اني بدون كلام رحت كعدت كدامه لانو واضح شنو يريد ، بهدوء حجيت ويا ..

_لويش نظفت الاكل اني متأخرت كنت حنطفه.

اسيد .. بصوت جامد .. الكلام الي راح اكوله مينعاد ولا تناقشين بي لمصلحتج اولاً
وغصباً عنج ثانياً.

داليا .. بدت الحيونه .. اني شنو احجي وهو اشون يجاوبني!

اسيد .. مفهوم!!

داليا .. هو اني شنو فهمت حتى اكولك مفهوم او لا!!

اسيد .. انتي حالياً تعتبرين زوجتي اذا مو بينا فكدام الناس انتي مرتي ، حتى لو لفتره وجيزه وينتهي هذا الزواج ، فأني عندي شروط ولازم اتطبقيها ...

داليا .. الي هي؟!!

اسيد .. سدي حلكج ولتقاطعيني.
اولاً اني مراح ابقى هنا وياج ع طول لان عندي دوام .. واروح البيتنا حتى محد يشك بيه .. واذا طولت مليون بالميه راح يجون لهنا حتى يتطمنون عليه وكلشي يخرب!
فعليهِ .. من باجر راح تجي وحده تبقى وياج بالبيت لحد ماارجع.

ثانياً .. طلعه من البيت هذا ماكو للباب متطلعين .. واذا حتاجيتي اي شي تكولين للمساعده الي عندج وهي تكول للحارس ويجيبلج الي تردي.

ثالثاً .. ممنوع يندك الباب وتطلعين ، اول متسمعين الباب يندك تصعدين لغرفتج ومتطلعين الا اني اكلج .

اخيراً .. لازم تتحجبين.

داليا .. كل الشروط الي كالها كانت عاديه بالنسبه الي لانو اني اصلاً ممتعوده ع الطلعه والونسه يعني محيتغير شي .. بس اخر شرط كاله خلاني اطفر من مكاني بدون وعي ...

_شنووووووووو؟!!

اسيد .. الي سمعتي.

داليا .. مستحيل اني مااعرف شنو حجاب بحياتي كولها ملابسته اشون تطلب مني هيج طلب.

اسيد .. تتعودين .

داليا .. مااكدر الله يخليك افهمني مااكدر اختنك والرب مو بأيدي مااكدر البس.

اسيد .. الحجاب هذا لمصلحتج .. الي صار قبل اشويه ع السفره مااريده يتكرر .. واني بالنهايه رجل وعندي رغبات يعني اذا منعت نفسي مره مرتين مراح امنعها للابد .. فأحسن حل الج تتحجبين.

داليا .. اذا انت متكدر تتحكم بنفسك ورغبتك اني شنو ذنبي تخنكني هشكل.

اسيد .. بلا طولة اللسان ، تتحجبين وخلص.

داليا .. انت شرعاً زوجي يعني مو حرام تشوفني هشكل ، واذا ع رغبتك ورجولتك انطيك وعد بعد ميتكرر الي صار قبل اشويه والرب محخليك تشوفني ابد بس لتخليني البس الحجاب مااكدر اتحمله والمسيح.

اسيد .. ماشي لتتحجبين بالبيت بس اذا اضطرينا نطلع فد يوم او علي اجه لازم تلبسي.

داليا .. لويش .. انت مو كلت لكونك رجل متكدر تشوفنـ...

اسيد .. كلمه وحده زياده اخليج تلبسين عبايه ، ضبي اللسانج و اسكتي.

داليا .. عبايه ... لا دخيلك لااا .. حسكوت خلص ، وموافقه ع كل شروطك.

اسيد .. اني باجر رايح للدوام ، ومن الصبح راح تجي المنظفه سوي مثل ما كلتلج و لا ع بالج مراح اعرف الي تسوي ورايه .. كل الي يصير هنا يوصلني بالحرف.

داليا .. كمت من مكاني و بصوت جامد .. كلتلك موافقه ع كل شروطك ماكو داعي لهذا الكلام بعد .. واذا خلصت حضرتك ممكن اروح لغرفتي اريد انام.

اسيد .. صوتج ميعلى كدامي .. لتعصبيني مو زين عليج.

داليا .. مو قصدي بس أنـ..

اسيد .. منطاها مجال تكمل .. وبدون ميرد عليها حرك اصبعه بمعنى روحي.

داليا .. احقر من هذا الكائن مشفت كولما اريد اصير زينه ويا يتحيون وياي!
رحت لغرفتي خليت راسي ونمت ، كعدت الصبح البيت هدوء محد بي نزلت سمعت صوت بالمطبخ!!
كلت اكيد هذا هو ديسوي ريوك لانو متعوده عليه كل يوم يكعد من الصبح .. رحت للمطبخ لكيت مره متوسطه بالعمر شكلها مرتب ولابسه ملابس هم مرتبه ممبين عليها شغاله بصراحه!

داليا .. صباح الخير .

ام سعد .. صباح الخيرات .. حضرتج اكيد ست داليا !!

داليا .. اي اني داليا ، وحضرتج؟

ام اسعد .. اني الشغاله الجديده اسمي ام سعد قبل كم يوم اتفق وياي الدكتور حتى اجي اساعد حضرتج ست داليا.

داليا .. اهلا وسهلا بيج ويا ريت داليا بس بدون اللقاب.

ام سعد .. وبيج اكثر بنيتي والله اني اول مشفتج ارتاحيتلج انتي مبين عليج بنت حلال .

داليا .. اشكرج خاله .. ان شاء الله بمرور الوقت حتعرفيني اكثر ، بصراحا اني كنت كولش ضايجه من البيت كاعده لوحدي هم زين اجيتي.

ام سعد .. ان شاء الله بنيتي .. تسمحيلي اسألج سؤال؟!

داليا .. تفضلي .

ام سعد .. صارلكم اشكد متزوجين انتي والدكتور.

داليا .. ها .. مصار هوايه اسبوع .

ام سعد .. يااا بعدج عروس لعد اشلون عافج وحدج وراح.

داليا .. هو عنده شغل واني محبيت اضغط عليه كلتله روح لدوامك واني مطايره اهم شي شغلك .

ام سعد .. سوده عليه بعدج عرييس  ولوحدج .. يلا ان شاء الله يرجع وتشبعون واحد من الثاني العمر كله كدامكم.

داليا .. تسلمين خاله ..

اسيد .. اتفقت ويا الحارس ابو سعد يخلي مرته تجي يمها من اروح للدوام حتى لتبقى وحدها ، ثاني يوم لبست ورحت لبيتنا لان كرار خبلني كل اشويه يتصل بيه ..
اشبيك ويا امي وشمسوي الامي .. روح شوف امي .. وامي مريضه من وراك ..
كفرني بساعتي .. من الصبح طلعت لبيتنا لان خفت يجي للمزرعه ويشوف داليا .. وصلت الظهر تقريباً لكيت امي دتصلي .. كعدت انتظرها لحد ما كملت!
سلام وكلام وبجي كالعاده .. اشون عفتني و وين جنت .. وليش تشغلني علييييييك .... لحد ما راضيتها روحي طلعت.
طبعاً محجت بموضوع داليا ولا سألتني عنها .. كل أسئلتها كانت ع البنيه الي وياي بالمطعم بقت تدقق وتتطقس!
رجعت قنعتها مجرد زميله من ايام الدراسه مو اكثر .. اتقبلت الفكره اخيرا
بس حسيتها ممقتنعه .. مو مهم المهم تفك ياخه عني ، اشويه ونزلت خالتي شافتني هم اكلتني بالسلام والسؤال ..
بقيت ع الغده اتغدينا .. وبعدها انجمعنا بالصاله كلنا .. امي وخالتي كاعدات وزوجها واخويه كرار وجهاله بس مرته العقربه مجايه .. اشويه وكامو كرار ورجل خالتي طلعوا بشغله .. امي راحت نامت بقينا اني وخالتي!!
هنا اني قررت استغل الفرصه وأسئلها ..

اسيد .. اكول ام احمد اريد أسألج سؤال.

ايناس .. ههه الله يستر منك انت وأسئلتك .. كول شعندك.

اسيد .. انتي هم متزوجه قبل ابو احمد؟!

ايناس .. من وين عرفت بهذا الموضوع وليش دتسأل؟!

اسيد .. لاحظت ايناس حيل انزعجت من سمعت سؤالي .. ووجها اتغيرت ملامحه .. عرفت من امي قبل فتره وبصراحه انصدمت .. ما ع بالي متزوجه مرتين ، لذلك حبيت اتأكد منج.

ايناس .. ها .. ايي .. امك دائماً تفلت بالحجي .. عود اني موصيتها تسد الموضوع هذا ومتجيب طاري.

اسيد .. يعني كلامها صحيح.

ايناس .. عوفه هذا الموضوع ابني مااحب احجي بي .. اختنك من اتذكره.

اسيد .. لا ماكو داعي تضوجين .. ترى مجرد سؤال عابر مو اكثر وبعدين شنو قابل انتي اول وحده تتزوج وزواجها يفشل وتنفصل؟!
شغله عاديه هذي .

ايناس .. اي صح عاديه بس اني مااحب اتذكر زواجي السابق نهائياً .. تجي ابالي احداث مااريد اتذكرها .

اسيد .. خلص سدي الموضىع اعتبريني مسألت .. ومااريد تسمع امي انو اني سألتج لان هي وصتني مااحجي مااريدها تزعل.

ايناس .. ههه لتخاف مااحجي شي.. وانت هم لتحجي الاحد عن هذا الموضوع.

اسيد .. تمام .. يلا اني اترخص لازم اروح لدوامي ما بقالي وكت بعد.

ايناس .. شنو هسه حتروح للدوام؟!!

اسيد .. لاا راح ابات يم صديقي ومناك نطلع سوه لان هو خطيه ما عنده سياره وكالي تعال بات يمي ونطلع اثنينه.

ايناس .. اخاف رايح للحلوه تشوفها.

اسيد .. من رخصتج ام احمد.

ايناس ..هههههههه دااتشاقه وياك يمعود لتزعل .. الله وياك.

طلعت من بيتنا واني بداخلي بركان يلهب .. معقوله كلام داليا صح؟!!
ايناس طلعت صدك متزوجه يعني ممكن تكون داليا صحيح بنتها...!!!
مكدرت اسألها اكثر ولا اعرف اذا عندها اطفال من زواجها الاول .. لان سؤال ثاني مني ممكن تشك بالموضوع وتنكشف كل مخططاتي .. والمصيبه اذا عرفت امي بالموضوع هسه تكولي شعرفك بهذي السالفه!!
مسألت اكثر بس نصف الجواب عرفته تقريباً .. طالما خالتي متزوجه من قبل معناها كلام داليا صحيح!!
زين هسه شسوي ... اكللها ع الي عرفته لو اترك الموضوع الى ان اتأكد!!
عقلي كله اتلخبط .. ماادري اشلون اتصرف!
احسن حل اطلع كبل للدوام ومن ارجع الله كريم الف حل يحلها ... رحت لدوامي بقيت 15 يوم دك واجبات وتعب متت .. رغم كل التعب هي مفاركت بالي ولا لحظه ، دااحس نفسي اتعلق بيها كل يوم اكثر!
والي حرك روحي اكثر موضوع امها .. اذا ايناس صدك امها يعني هي بنت خالتي!!
اشلون الي وجه اباوع بعيونها بعد كل الي سوته خالتي!
واذا عرفت الحقيقه وتأكدت هاي امها شنو راح يكون شعورها تجاهي؟!
زين اني ليش هالكد مهتم بردة فعلها .. واذا عرفت ، واذا كرهتني شنو يعني؟!
يطبها مرض شعليه بيها ..!
حاولت اتجاهل تفكيري بيها وابعدها عن بالي .. بس ماكو فايده!
خلصت ايام دوامي ورجعت لبيتنا بقيت يمهم يومين .. وكلتلهم عندي واجب لمدة شهر تقريباً ماكو نزول .. وبس يصير عندي فرصه اجي شوفكم وارجع!
بقت امي تون وتنوح ع بالك كلتلها رايح للموت مو للدوام .. ثالث يوم من الصبح طلعت لبيت المزرعه!
شي بداخلي متلهف على شوفتها ماادريه اشبيه تخبلت .. صورتها اخر مره بثوب العقد لطشت بعقلي .. كلما اتذكرها اضحك مثل الاثول.
بالطريق نزلت ع محلات اشتريتلها ملابس وتراكات بناتيه .. وحجابات لان ماعدها كلما اريد اطلعها تطلع بنفس التنوره والقميص .. لو تلبسلي بنطرونها الفضيحه.
المهم ..
اخذتهم ورحت للبيت وصلت الصبح لكيت ام سعد دتروح لبيتها .. لان اني خابرت رجلها كلتله اني جاي ماكو داعي تبقى ام سعد .. شافتني سلمت عليه واكلت راسي ، كعدت تحجيلي وتمدحلي بـ داليا .. !!
الظاهر تأثيرها هذا على كل الناس مو بس عليه!
دخلت السياره للكراج ونزلت بس اني الغراض بقيتهم بالسياره .. فتت البيت هدوووء صعدت لغرفتي بدلت واخذت حمام سريع كلت اكيد راح تكعد الخانم واشوفها مااكدر اني اصيحها .. بدلت ملابسي لبست بجيامه مالت تراك اسود وفانيله داخليه هم سوده .. نزلت ملكيتها كاعده!
رحت للمطبخ سويتلي جاي وريوك لان طالع من غبشه والسياقه بالازدحامات هدت حيلي!
كنت واكف ع الطباخ داير وجهي وبالي شارد افكر اكللها ع الي سمعته من ايناس لو لا ... مااحس الا صوتها الناعم بأذني!!

داليا .. صارله 17 يوم بالدوام ماكو لا يسأل ولا يتصل مااعرف عنه اي شي  حتى ام سعد من أسئلها هم يتصل بزوجها .. اتكول مااعرف!
گلبي صار مثل الجمره عليه .. ملهوفه بس اريد اشوفه اشتاقيت حتى لعصبيته وخبالاته عليه!
ليل نهار ماافكر غير بي .. مو گلب عندي انتقام من يريد شي يذلني ..!
خلال هذي الفتره سويت كل الي كاله الي مطلعت حتى للحديقه .. وسلمى اجتي مرتين هي وزوجها حتى تشوفني وتسأل عني ، لان كانت خايفه عليه من اسيد ، اتكول ماارتاحله ابد ماادري شنو عاجبج بي!
هههههه كلتلها مبي شي يعجب بس گلبي غبي يحبه غصباً عني وعن عقلي الي مو طايقه اصلاً.
غريبه اشون ممكن اتكون سجين شخص مو طايقه ومجرد اسمه يرعبك وبنفس الوقت گلبك متعلق بي ويريده.. !!
المهم ..
البارحا سلمى طولت يمي هوايي بقت لنص الليل يلا اجه رجلها اخذها .. من شافتني اتحجبت من علي ماتت من الضحك عليه !

سلمى .. ولج انتي من كل عقلج خايفه منه ولابسه حجاب.

داليا .. سلمى الله يخليج روحي ويا رجلج ولتصنفين ترى ما الي خلكج بالكوه لازمه دمعتي.

سلمى .. ههههه والله اذا ما خبلج هذا اسيد افندي عاتبيني .. على يوم اجي الكي مخليج بقفص حالج حال القرد.

داليا .. سلمىىىىىىىى ولي من وجهي يا قرده مو صوجج صوجي اني الي احجيليج.

راحت سلمى واني ساعدت ام سعد نظفنه الهوسه و ذبيت روحي ميته .. تعبت من الضحك والسوالف و ويانا ام سعد خربتنا من الضحك سوالفها تونس !
كعدت الصبح الوقت متأخر صايره الظهر .. زين ام سعد لويش مكعدتني؟!!

نزلت بسرعه كنت لابسه شورت قصير ستن وفوكا سترابلس مالته لونهم خمري اشترتهم الي ام سعد خطيه مو تبات يمي شافتني ما عندي ملابس نوم .. سألتني كلتلها ملحكنا نتسوك عرسنا صار بسرعه وشفتي راح للدوام!
ثاني يوم جابتلي ملابس نوم وملابس للبيت كومه خطيه وكالت اني اخذ فلوسهم من الدكتور.
فـ كنت لابسه هذا الطقم من نزلت بسرعه نسيت البس الروب مالتهم لان رايح الوگت عليه بالنوم واني متطمنه محد بالبيت بس اني وام سعد !!
واني داانزل سمعت صوت بالمطبخ ع بالي ام سعد .. رحت بخطوات بطيئه دااتثاوب ومخليه اديه على حلكي وعيوني مغمضتهم .. كلت صباح الخير ...!!
فتحت عيوني وجان اشوفه واكف كدامي!!!!!!!!!!!!
ذرة دم مبقت بيه جمدت بمكاني .. لا ارجع ليورا ولا امشي ليكدام رجليه يبست!
مااسمع غير بس صوت دكات گلبي .. بقيت صافنه بوجهه وهو يباوعلي وعلامات الاستغراب مرسومه على وجهه!!

اسيد .. نزلتلي لابسه شورت واني صارلي نص شهر دين مباقي براسي بس افكر بيها بنت اللذين!
هنا كل دفاعاتي انهدمت .. بلا اي تفكير مشيت بتجاها ... وكفت كدامها هي رجعت ليورا وظهرها صار ع الحايط بعد متكدر تتحرك!
اتقربت منها حيل بحيث ميفصلنها غير كم انش .. بلا اي مقدمات طبعت بوسه على شفايفها...!

هلاوو يا حلويييين رمضان كريم وعساكم من عواده ان شاء الله
اعرف اتأخرت عليكم بس اعذروني والله ما عندي مجال
رأيكم بالاحداث وتوقعاتكم للبارت القادم! ولتنسوووًووون التصويت
بخصوص النشر حابه اخذ رأيكم انو نتوقف واكملها بعد رمضان شتكولون لانو هذا شهر عباده اني اريد اختم القران اذا الله راد فيمكن اتركها ؟!!
بعد رمضان انشرها الكم حاخذ برأي الاغلبيه ❤️