الفصل السادس والعشرون

رواية في قلب القريه الجزء السادس والعشرون 26 بقلم نوسة حمد في قلب القريهرواية في قلب القريه الحلقة السادسة والعشرون

عزام قال لي انا سمعت علي هو الفتنك في عماد ووراهو حسابات انتي اشتغلتيها وفيها فروقات وقال ليهو خليها بوقعا ليك ولمن شافوني سكت علي وانا والله انتي بت بلدي ما برضا فيك جيت عشان اقول ليك دا الوعد الوعدتيني ليهو اول يوم بجد انا من سمعت كلامهم انا مصدوم فيك ماقادر اصدق معقوله بالسرعه دي تقدري تعملي كل دا انا غلبني ادافع عن نفسي لانو كلام حقيقي الشافع لو مسكو الحسابات بعرف الفروقات بس الحقيقه مافي زول عارفها غيري انا وعلي

واشتياق قلت ليهو عزام انا والله بشكرك انك جيت ونصحتني لو اتكلمتا بتصدقني قال لي نوسه انا دايرك تتكلمي وتزحي الشك الجواي دا احكي قلت ليهو اقسم بالله العظيم يا عزام انا جنيه ما شيلتو لصالحي ولا دخلت علي قرش حرام قال لي نوسه كيف يعني علي كذاب عاوز اوقعك عشان تخلي الشغل عزام بقا يفتش لي في الاعزار قلت ليهو لا كل القالو حقيقه قال لي كيف دي نوسه ما تدوشي راسي قلت ليهو لو حكيت ليك ح تساعدني قال لي لو في يدي شي اقسم بالله

اقيف معاك ما اخليك قلت ليهو انا ح احكي ليك من الاول للاخر قال لي تمام قلت ليهو ع فكره انا م جيت اشتغل معاكم عشان الحوجه قال لي كيف موش قلتي طالبه وكده قلت ليهو اي طالبه وفعلا كنت محتاجه لقروش بس مالي درجه امد يدي قال لي اها قلت ليهو انا صديقه اشتياق زوجه عماد وشكلو عزام بعرفها قال لي اشتياق وهي وين وان شالله بقت كويسه قلت ليهو اشتياق كويسه بس ادعت المرض عشان غلبها حيله واهلا كترو عليها الكلام بعد عماد النصاب نصب

عليها قال لي يا زوله دا كلام شنو قلت ليهو ع فكره علي عارف انو عماد نصب علي اشتياق وقال لي بي عضمه لسانو انو عماد قروشو قروش حرام ولو شال منهم ربنا ما بسالو وعشان تصدقني انا عملت حساب لليوم دا وسجلت كلامي مع علي وفتحت ليهو التسجيل وعزام بقا مخلوع قلت ليهو عشان تصدقني وانا التسجيل دا ح يكون سلاحي وانا جيت اخد حق اشتياق عزام قعد اضحك وشغال لي عفارم عليك والله لو دا راجل م يقيف وقفتك دي قلت ليهو لو قلت ليك اشتياق اتعرفت

عليها لي شهرين بتصدق قال لي انتي طيبه شديد وما اكذب عليك اشتياق زوجه عماد طيبه وقلبها ابيض ومحترمه ومؤدبه وتستاهل البقيف معاها بس ي نوسه صدقيني ما معروف الظروف احتمال تتخزلي نصيحتي ليك ما تكوني في وش المدفع البتقدري علي اعملي بس ما لي درجه المخاطره قلت ليهو اتهورتا صراحه بس مبسوطه اني رجعت لي اشتياق جزء من حقها وعلي عاوز يغنج غنجه كبيره وواعدني انها تكون لصالحي قال لي غبيه عشان يمسكك بيها قلت ليهو بعد يحول القروش في

حسابي ان شاءالله يسجني والناس ح تعرف الحقيقه وفتحت ليهو الدردشه بتاعتي مع اشتياق ولمن حولت ليها القروش وقلت ليهو عشان تصدق اكتر اتصلت علي اشتياق قالت لي وين انتي احمد اخوك مقلق عليك وانا من قبيل اقنع فيهو انك مرات بتتاخري قلت ليها جايه

بس اتصلت عليك عشان احكي ليك بالمصيبه دي قالت لي مصيبه شنو عماد كشفك قلت ليها اي واتفقو هو وعلي انهم يوقعوني وعلي وعدني انو ح يغنج غنجه كبيره ويديني ليها في صالحي قالت لي نوسه اسمعيني عليك الله ما تخاطري انتي م بتعرفي عماد ممكن يقتلك قلت ليها ما يقدر يلمسني انتي ناسيه اني سجلت لي علي كلامو معاي وشهادتو انو عماد نصب عليك قالت لي احتمال علي يشيل تلفونك طالما زول بسرق بعمل اي شيء وعليك الله خلي البتعملي فيهو دا قلت ليها

يازوله طريق بديتو ما برجع فيهو اقسم بالله لو علي جثتي وهسي اقفلي انا جايه ع البيت وقفلت الخط عزام قال لي عاوزه نصيحتي اسمعي كلاما وانسحبي من الشغل الان واكتفو بالمبلغ القدرتو تطلعو قلت ليهو ولو برضو عماد بلغ فيني كده كده انا اتبلبلت والبتبلبل بعوم احسن اتم الشغل النهاي دا واكون خلصت لي اشتياق جزء كبير من حقها وتاني بي محامي بطلع منها قال لي اخوك الشفقان عليك هسي دا فكرك برضا انك تنسجني قلت ليهو ولا دقيقه ما ح اتسجنا

وزي ما هم مخططين لي انا كمان بخطط ليهم يا انا يا هم قال لي ربنا يستر غايتو ما مطمن بس انتي عنيده وحقانيه زياده عن اللزوم قلت ليهو لو قلت ليك انا بنفس الفهم دا كنت عاوزه اوقع واحده واتهموني بالجنون ودخلوني مصحه وربك رب الخير كشف حقيقتا وانا الله شاف لي وطلعت منها قال لي ربنا كريم بس حاولي اتغيري زمنك ضيعي في نفسك وقرايتك وحياتك وبيتك لو متزوجه لو م متزوجه فكري انك تتزوجي قلت ليهو ربنا كريم وان شاءالله ما يحصل الا

الخير قال لي ع العموم انا جنبك وعندي اوراق توقع علي في دقايق وما تهمي اول ما يتهمك ح تلقيني انا اول زول واقف معاك قلت ليهو ما بتقصر يا عزام جزاك الله الف خير قال لي العفو انتي اختي ما بينا وودعني وفات

مشيت البيت لقيت اشتياق قاعده بره واحمد جاط فيني وقال لي انتي اصلا قاعده تتاخري كده قلت ليهو لا والله الجامعه بطلع منها الظهر بمشي الشغل قال لي شغل شنو عاينت لي اشتياق واشتياق عاينت لي واشرت لي اني ما اقول قلت ليهو انا لمن نزلت الجامعه طلبو مني الرسوم وانا م عندي قروش الوقت داك قال لي نهاي ما تشتغلي طول ما نحنا عايشين انتي ما ح تشتغلي قلت ليهو انتو كنتو ماف قال لي انا هسي قاعد وما ح أخليك تشتغلي وربنا سهلا لي ع فكره

ولقيت لي شغل جنب صاحبي ومفكر اقعد معاك هنا دا لو مافيهو ازعاج لي اشتياق اشتياق قالت ليهو لا لا العفو انا الضيفه عندكم لو في طلوع اطلع انا قال ليها كيف الكلام دا علي الطلاق شبر م تطلعي انا بشوف لي سكن قلت ليهو م مشكله انت اقعد في الغرفه المفصوله ونحنا بنقعد هنا رايك شنو يا اشتياق قالت لي م عندي مانع وابتسمت وفاتت واحمد اعاين ليها ساي قال لي هي اهلا وين قلت ليهو بحكي ليك بس عشان هي ما تتحسس قال لي لا لا خلاص حاجه

بتخليها تتحسس ما تقوليها والشغل خلي قلت ليهو تمام عندي مرتب استلمو منهم وتاني م بمش قال لي تمام في وقفتنا ديك جا ابراهيم كان شايل ورقه في يدو قال لي احمد دي قسيمه الطلاق تسلما لي مهاد انت ولا اسلمها ليها انا قال ليهو انا تاني ما عايز اشوف خلقتها دي والحمد لله انها جات علي كده وبقا يردد الحمد لله الحمد لله حسيت كانو كانت في صخره مختوته في قلبو قلت ليهو مبروك ولخير ما تزعل نهاي قال لي بالعكس انا مبسوط

تاني يوم اتصلت علي ابراهيم قلت ليهو عاوزاك قال لي تمام تجينا ولا اجيكم قلت ليهو موضوع حساس ما ينفع لا في بيتنا لا في بيتكم قال لي والحل قلت ليهو بكره لمن اجي ماشه الجامعه نتلاقه في نهايه الشارع قال لي تمام اشتياق قالت لي في راسك فشنو قلت ليها كل خير قالت لي انا خايفه قلت ليها تخافي ليه موش انتي عماد دا اكل حقك قالت لي اي قلت ليها يلا بس جيت انا عشان ارجعو ليك قالت لي لكن صعب عليك واحتمال يقبضك ويعمل فيك مصيبه قلت ليها م تخافي سبحان الله حدي الان كل الطرق في صفي عزام الولد الوراني قال لي بقيف معاك لو حصل شي وعندي اوراق تسجن علي العاوز يتشطر عليك دا ودايره بكره الاقي ابراهيم احكي ليهو الكلام رايك شنو نكون سوا قالت لي تمام

الصباح احمد اخوي خلينا نايم وطلعنا اتلقينا ابراهيم في نص الشارع وبقيت احكي ليهو اول شي قال لي نوسه انتي متهوره المره كان بقت فاس ما بتكسر العكاز قلت ليهو لو معاها راجل تكسر عكازين وانا جيتك افهمك واسمعك تسجيل مهم قال لي تسجيل شنو قلت ليهو الولد العاوز يوقعني وفتحتو ليهو قعد اضحك قال لي من حفره حفره لاخيه وقع فيها دا غبي وقع نفسو في الكلام قلت ليهو ما كان متوقع اني اسجل كلامو قال لي بس التسجيل دا ترسلي لي هسي وان

شاءالله ما يحصل الا خير ولازم يا اشتياق لو لا قدر الله حصلت لنوسه حاجه انتي تمشي وتحكي للشرطه اي شي قالت ليهو معقوله لو انسجن معاها ما بخليها قال ليها من ناحيه تنسجن دي الا اكون انا ميت قلت ليهو ان شاء الله بعد الشر عليك قال لي لا قدر الله لو الشرطه قبضتك اول شي ما تتكلمي الا في وجودي قلت ليهو تمام ونزل اشتياق في مكان شغلا ووصلني الجامعه قال لي نوسه جد انا خايف عليك وكان بعاين لي انا غلبني اعاين ليهو قال لي ممكن تخلي

بالك من نفسك ونفسك دي ما حقتك براك انا غلبني اقول شنو بقيت ساكته ونزلت وراسي داير اطق حاسه اني بحلم وكنت مبسوطه م عارفه ليه حسيت انو بقا يحبني

خلصت محاضراتي ومشيت الشغل لقيت علي جاهز لي قال لي المره دي التحويله عليك انا جهزت الفاتوره امضي قلت ليهو طيب بمضي بس اول شي حول القروش قال لي جدا حول لي مبلغ كبير وانا قلت ليهو اتاكد منو قال لي طيب دخلت حولتهن كلهن لي اشتياق وقلت ليهو ع فكره ما ح امضي والعاوز تعملو اعملو طوالي عماد جا ومسك الورق مفتكر انو علي مضاني عليهو وقال لي انتي نصابه ومن دخلتي شركتي خسرت مليارات قلت ليهو شوف البسرقك منو قال لي الشغل دا اشتغلتي انتي ودا اشتغلتي انتي علي مجهز كل الشغل الاشتغلتو انا وطوالي طلع تلفونو واتصل علي الشرطه

الناس كلهم اتفرجو فيني وانا غلبني البعملو فكره شرطه بس تقطع القلب خمسه دقايق ساقوني ورموني في السجن والسجينات النوع القادرات ديك خوفتا منهن وفي نصهن مهاد لمن شافتني لمن انخلعت وبقت تقول ليهم دي خلوها علي انا لمن جايه علي لمن اعصابي باظت طبعا ح تطلع غلها كلو فيني بقيت اتمتم انا اي شي عملت ليهو حساب الا اني اكون في السجن مع مهاد والله يستر منها …