الفصل الثامن والعشرون

رواية في قلب القريه الجزء الثامن والعشرون 28 بقلم نوسة حمد في قلب القريهرواية في قلب القريه الحلقة الثامنة والعشرون

اتصلت علي اشتياق قلت ليها بكره عرس وليد عاوزه اسوقك معاي قالت لي م عندي مشكله طوالي وحكيت ليها انو ابراهيم جا طلب يدي فرحت لي شديد وقالت لي ابراهيم ولد ممتاز اوعك يا نوسه تتهوري وترفضي الزمن دا صعب تلقي راجل زي ابراهيم ونسيبه زي خالتو سعاد مرات بتديني احساس بتحبك اكتر من بناتا يعني ي نوسه الحصل ليك زمان صدقيني م ح يتكرر وبالاخص ابراهيم ولد مدينه ومتحضر وطباعو ما زي زوجك السابق ح يحترمك وح يحترم رغبتك ما ح يجبرك علي

اي وضع انتي ما حاباهو بالعكس دا النوع البعد اتزوجك ح يفتش لمكان راحتك عشان يريح دماغو وضميرو قلت ليها لكن في مشكله انو هو ولد خاله طليقي محمد قالت لي مالك ومال محمد دا ماضي تجدعي وراك لو ببقا ليهو اخوهو شخصيتو ما زي شخصيتو ابراهيم محترم صدقيني ح يحترمك ويحترم علاقتكم الزوجيه ماعندو علاقه بي ماضيك وانتي كمان م عندك علاقه بي ماضيهو ليك بالحاضر قلت ليها خايفه من مواجههه محمد اكيد في يوم ح يجيهم زياره قالت لي ويعني انتي

ي نوسه بتحبي محمد لسه ولا شنو قلت ليها حب شنو اقسم بالله لو لقيتو في النار ازيدو حطب ما بنسا العملو فيني ولا الوضع الاجبروني عليهو قالت لي يلا تجدعي دا كلو وراك ولو دقا كتفك ما تديهو نظره تاني كانك مابتعرفي لو سلم عليك قولي ليهو م عرفتك قلت ليها حاضر يا اشتياق الفيهو خير يعملو ربنا اها وانتي يختي ما رديتي علي اخوي قالت لي انتي عارفه انا موافقه بس اهلي خايفين يحصل لي زي م حصل لي زمان قلت ليها من حقهم لازم يعملو كده

قالت لي اخوي بعرف زول من حلتكم وسالو وقال ليهو ناس مافيهم كلمه اديهم طوالي اخوي كلمني هسي منها واتصلتي قال لي بكره بتصل عليهو قلت ليها الحمد لله وما اوصيك علي اخوي خسر ثقتو في الاختيار انتي بقيتي ليهو طوق نجاه قالت لي نوسه ما تنسي انا شاربه من نفس الكأس قالت لي ع فكره قبيل ابراهيم اتصل علي يسالني من حاجات قال لي الولد الاسمو علي هرب بعد خسر عماد شغل بالملايين وانا طلبت مبلغ عماد الا ابيع بيتو الساكن فيهو حقك ح يرجع

ليك قلت ليها الحمد لله اخيرا الحق ح يرجع لي اصحابو قالت لي اي والله احمد وشو فاتحت خير علي قلت ليها احمد يا نكاره يا بياعه نسيتي الدقه الادقيتا في السجن لو ما النقاب دا الضحك شرطني قالت لي هو انا بقدر انسا وقفتك جنبي عمري ما انساها قالت لي نوسه ممكن طلب قلت ليها من عيوني يا غاليه قالت لي العرس دا ابراهيم بمش قلت ليها طبعا نسيتي انو وليد ولد خالتو قالت لي بس يلا نقطه نظام اسمعيني كويس قلت ليها اها قالت لي ممكن تهتمي

بنفسك شويه قلت ليها صدقيني انا بقيت ما حاسه نفسي بت غايتو ابراهيم دقس قالت لي نوسه طلعي الاوهام دي من راسك قلت ليها اها حاضر قالت لي انتي اصلا منقبه قلت ليها لا ليه قالت لي فكيهو قلت ليها مستحيل يابت انتي جنيتي وبعدين ابراهيم عرفني كده يعني صعب اقلع النقاب قالت لي طيب م مشكله ممكن تلبسي فستان حلو بدل العبايات السود ديل قلت ليها م عندي يا استاذه قالت لي م عليك انا بجيك بدري بجيب ليك معاي فستان وبجيب مكياجاتي عشان

اظبطك قلت ليها طيب مالو نجرب

اشتياق جات الصباح بدري شربنا الشاي سوا واحمد مشا سال ابراهيم قال ليهو اي ماشي واتفقنا ناجر عربيه ونتحرك سوا قال تمام وقال لينا قبل الظهر تلبسو نحنا من بدري لبسنا اشتياق جابت لي فستان رهيب ولبستني عدسات وعملت لي مكياج لدرجه اني ساعه بعاين لي روحي لبسنا وطلعنا لقينا خالتو سعاد وابراهيم منتظرننا واحمد اخوي جاب عربيه وابراهيم مشا قدامنا رسل لي رساله قال لي اتحصني خايف عليك انا لمن قريتا قلبي بقا يدق واشتياق ميته بالضحك

علي قالت لي ماقايلاك جرسه كده يابت اركزي قلت ليها اركز كيف يابت امي صعب وصلنا الصاله مع بعض نزلنا انا واشتياق عشان ندخل مع خالتو سعاد ابراهيم كان ماسكه من يدها قال لي ادخلو سوا انتو انا واحمد بنمش مكان الراجل بتكلم معاي كده لقيت محمد في وشي قال لي نوسه قلت ليهو عليكم السلام وكان مادي لي يدو ابيت اسلم عليهو خالتو سعاد سلمت عليهو وقالت ليهو ربنا يعوضك بتك وجعتني قال ليها الحمد لله ياخاله وشنو الصدف دي نوسه دي لقيتيها

وين قالت ليهو الدنيا جمعتني بيها وبقت لي بت محمد لمن عيونو بقن حمر انا خوفتا منو خوف وقلت ليها خالتو سعاد انا ح امش ابارك لي وليد وهند بتلقوني هناك معاهو عاوزه امشي محمد مسكني من يدي قال لي وليد وتباركي ليهو بتعرفي من متين زحيت يدو بكل قوتي قلت ليهو وليد دا استاذي ع فكره وبعدين انت مالك ومالي اعرفو ولا ما اعرفو وكنت جايطه ابراهيم جاري قال ليهو محمد فشنو نوسه مالك فشنو انتي كويسه عيون ابراهيم كلها لهفه علي محمد قال

ليهو دقيقه من متين دا يا ترا وهي في عصمتي ولا متين كنتو بتستغفلوني قلت ليهو الظاهر انت جنيت ابراهيم قال ليهو محمد نوسه دي بترفع عينك تعاين ليها ولا تسالها اقسم بالله امسحك من علي وجهه الارض موش لو ولد خالتي محمد بقا مندهش وابراهيم كان زعلان احمد اخوي كان بره الصاله بشرب في سجاره ما جا داخل لمن جا داخل لقا ابراهيم اتناقش مع محمد ومحمد شكلو قلبو مقطوع علي حياتو الاتبهدلت وما مصدق اني ح احب غيرو كان ضامن حبي ليهو وختاهو

تحت جزمتو احمد قال لي نسيبه مالكم وسلام الله ما اداهو لي محمد كانو بينهم تار قال ليهو فشنو وكان زعلان زعل شديد ابراهيم حاول يلم الموضوع قال لي نوسه سوقي امي واشتياق وادخلو جوه بقا يهدي في احمد ويتناقش مع محمد وشكلو محمد م شغال بيهم الاتنين وبعاين لي بس بجد خفتا منو اشتياق ما قادره تتكلم جنب خالتو سعاد وخالتو سعاد قالت لي محمد دا شكلو شكاك وخاين اول شي قال ليك وليد تاني قبل علي ولدي قلت ليها بالعكس يلا هو النوع النهاي

ما بشك بس شكلو الحصل ليهو خلاهو شكاك شديد وربنا يعوضو ويسعدو قالت لي ان شاء الله وهديك امو جايه علينا الله يستر اختي لسانه متبري منها اشتياق قالت لي ارح نتخارج منها سممو بدنا وما تمينا كلامنا جاتنا في لحظه سلمت علي اختها شديد وانا سلمت علي ببرود وبقت تطاعن فيني بالكلام بس ما اشتغلت بيها ولا قلت ليها بتقولي فشنو سوقتا اشتياق ومشيت وليد من شافني قام علي حيلو وسلم علي شديد وباركت لي مرتو وفرحت ليهم من قلبي وقال لي الا

تتصوري معانا نادا المصور واتصورتا معاهم وفرحت معاهم لاحظت لي امو واخواتو مافي قلبي انقطع شكلهم خاصموهو عشان ما وقف مع اخوهو واخوهو يستاهل الشنق وليد انسان عاقل جدا بس م حسيت فرحتو نقصت فرحان بي زوجتو شديد وهي زاتا بت محترمه شديد وهاديه تستاهل حب الدنيا كلها وجميله جمال م عادي لدرجه الناس قالو رضت بيهو كيف وهم ما عارفين قيمه وليد متعلم وبختلف عنهم تماما تفكيرو ما خبيث حتي لمن اعجب بي ما قال مطلقه النلعب بيها عبر لي عن

مشاعرو بكل صدق وكان مستعد يعمل اي شيء عشان يتزوجني بس ربنا رزقو بالاحسن ويستاهل كل خير ربنا يسعدو

احمد اخوي جا قال لي ما تتحركي الا نجي نسوقك نحنا وشكلو مضايق من محمد اشتياق قالت لي ديل غريبين خلاص مالم حرقهم لمن انتي اخترتي حياتك كانو عاوزين يمسحو بي كرامتك الارض وازلوك ويهينوك قلت ليها واضيفي عندك قال لي تعليم ماف قالت لي يازوله فكرتي انك طلعتي قلت ليها القال ليك منو انا خوفتا جاتني لحظه قال لي ارضي بالزله وبالاهانه بس امي قوت قلبي رغم انها نهاي م بتعرف تطلع ولا قلبها قوي كانها كانت بتسوقني للقدر وكل ما اقول

ليها نمش وين تقول لي اتوكلت علي الله وربنا كريم وشوفي الطريق المشينا فيهو كانت فيهو قسمتي وقسمتك الحمد لله خالتو سعاد قالت لينا بعد كده نمشي عملنا الواجب انا الجوطه ما بتنفع معاي اشرت لي احمد اخوي جا وقلت ليهو خالتو سعاد تعبت خلونا نطلع قال لي تمام يلا ارح مشينا وركبنا العربيه خالتو سعاد بقت تعتزر لي احمد اخوي قال ليها العفو يا خاله انتي م عندك ذنب الذنب ذنبنا نحنا الادينا لي اختنا واحد م يستاهل قالت ليهو لخير ما

تزعل نسيبه قسمتها قاعده بس هي تدينا الاشاره قال ليها انا بديكم ليها ومبروك انا منتظر موافقه من اهل اشتياق وبقرر العرس خالتو سعاد قالت لي ايوي يوي اتمنيتك بتي في سجودي والحمد لله ربنا ما خزلني وكانت طايره من الفرح وانا خجلانه خجل وابراهيم داير يطير احمد استاذن منهم ومشينا ركبنا العربيه قال لي سبحان الله شوف الفرق بين حاجه سعاد وابراهيم ومحمد وامو قلت ليهو التعليم ليهو اثر قال لي التعليم هسي حاجه سعاد دي متعلمه ولو

جيتي للتعليم محمد متعلم قلت ليهو فعلا والله ابقا المشكله من البيئه والمجتمع القروي العاشو فيهو قال لي علي اساس نحنا ولدونا في المدينه لا يا نوسه في قري اهلها كانهم متعلمين وناس في حالهم اقرب مثال ليك حلتنا الشفتي في حله ناس محمد شفتيهو فيها قلت ليهو لا والله ودا كلامي الكنت بقول ليكم فيهو بس انتو كنتو ما عاوزين تسمعو لي قال لي عشان ما سمعت ليك ضوقت من نفس الكأس وعلي اصعب منو وكانت تجربتي امر من تجربتك مرات كنت بقول

كنت عاوز اغصبك علي محمد واجبرك عليهو ربنا وقعني في الاصعب من الكنتي فيهو قلت ليهو احمد انسا والحمد لله انت ربنا عوضك وانا متاكده ما ح تلقا احسن من اشتياق ما عشان صاحبتي بس هي البتستاهل تكون مرتك زوله في حالها بس اوعك تظلمها قال لي نوسه مستحيل وح تشوفي براك وطبعا اشتياق تشيل وتغمز لي نظام اسكتي قلت ليها مالك انا واخوي بنتناقش قبل عليها وقال ليها متين ح تخجلي مني كده وهي لمن بقت ترجف احمد حسا بيها وقال ليها انا ربنا

راضي علي وقبل وهي قلبها داير اطير من مكانو قالت لي نوسه انا لو ما سكتو بجن ليكم هنا بس قلت ليها خلاص سكتنا يوم كان جميل ما كان في اسعد مني انا واشتياق شفنا اللهفه والحب البتتمناهو اي بت انا كنت من جواي طايره من الفرحه ولمتين اصل عشان اتزكر كل المواقف دي اصرينا علي اشتياق تبيت معانا اتصلت استاذنت من امها قالت لي لا لا ما تبيت الناس اقولو شنو مشت باتت في بيت الولد الدايرها قلت ليها عليك الله وبقيت احنس فيها. بعد تعب

حتي وافقت وانا واشتياق فرحنا فرح ووصلنا البيت احمد قال لينا اجيب ليكم شنو قلنا ليهو ولا حاجه كنا شبعانين معنويات قال لينا انا كمان ماعاوز شي بس طالب قهوه من يد اشتياق قلت ليهو تأمر امر دخلنا غيرنا ملابسنا وصلينا اشتياق قالت لي نوسه خايفه قهوتي ما تعجبو قلت ليها هوي ياختي بعد تعرسي الداير يعملا ليهو منو تاني هو حظو كان بتعمليها سمحه حظو وكان كعبه دا نصيبو قالت لي عشان كلامك دا ح اجتهد فيها وانا بقيت اعاين ليها بس وهي

تشيل وترجف وتعمل فيها قلت ليها اها الليله موتي قعدت تضحك قالت لي اصبري بس دي خوتك قلت ليها يا زوله غش ما معانا قال دايرها من يد اشتياق لو دايرها مني كان طلبها قالت لي يختي انا بعرف بس الشغل وكده لكن اصبري لي بس ي نوسه والله لمن احيرك قلت ليها منتظره احتار يلا اتحفينا سمعت احمد اخوي اتكلم بالتلفون وشكلو ديل اهل اشتياق باركو ليهو الخطوبه وقالو ليهو جيب اهلك وتعال قال ليهم ابشرو بالخير الجمعه المساء نحنا معاكم قعدت

ازغرت ليهو وهو شغال اقول لي ابشري بالخير اشتياق جات شايله القهوه قلت ليها مبروك اخيرا تم المراد قالت لي مبروك شنو وكانت بترجف قلت ليها الخطوبه اكشحي القهوه في احمد لمن مات بالضحك وهي خجلت خجل دخلت الغرفه وقفلتا عليها احمد قال ليها افهم شنو ما عاوزاني ولا شنو وبصوت واطي تقول ليهو لا عاوزاك قلت ليهو انكشح الشر ح امش اظبط ليك واحده قال لي ياخساره كنت داير اضوق قهوتا قلت ليهو خلاص يا اخوي انت اتورطتا قال لي احلي ورطه

رضيان قلت ليهو تستاهل وفي ليلو داك اتصل لي امي وامي تشيل وتزغرت ليهو كانت فرحانه شديد وقالت ليهو اها واختك اوعك تسمع كلاما احسن من ابراهيم ولد سعاد ما بتلقا قال ليها اديتهم كلمه يمه ح نعرس سوا ان شالله قالت ليهو دا يوم المني قال ليها الحمد لله يمه لقيت شغل كويس وربنا سهلا علي ادعي لي اتوفق فيهو قالت ليهو ان شاء الله انا دعواتي ليكم ما بتقيف كنت محصناكم بي دعواتي قال ليها ربنا يخليك لينا يمه واديك العافيه وتشيلي

اولادي واولاد نسيبه في يدك قالت ليهو يوم المني

جهزت القهوه وجبتها ليهو ابراهيم اصفق بره احمد قال لي ادخلي جوه وقال ليهو اتفضل وكلمو انو اهل اشتياق ادوهو كلمه وماشين يحققو الخطوبه ويحدد العرس قال ليهو اها انت ما جاهز نعملو سوا ابراهيم قال ليهو جاهز وطوالي احسن قرار انا اخواتي بصلو الخميس الجمعه بمش معاك الاحد بنجيكم نحنا قال ليهو خليها السبت عشان امي وصهيب واولادو واعمامي بكونو قاعدين قال ليهو تمام وبقو يتونسو لقيت اشتياق من الفرحه طايره قلت ليها تتخجل ليههو هو

وانا تتبكي لي قالت لي نوسه والله مرات بكون ما مصدقه اتميتو وهو ما جايب لي خبر وفي نفسو وزعلان علي حبيبتو قلت ليها عليك الله ماتجيبي سيرتها لا لي لا لي احمد صدقيني احمد ما ح يكون حباها شديد بس احمد النوع العندو كلمه بكون صابر عشان ما يخزلها لمن خزلتو هي والحمد لله الموضوع اتلما سريع وقدر يتخلص منها وربنا عوضو بيك ربنا يسعدكم قلت ليها اشتياق اسمعيني انا والله دايره اكون مع نفسي في نظرات عاوزه أوثقها في زاكرتي قعدت تضحك

قالت لي وتتفاضحي علي انا لي روحك انتي واقعه قلت ليها ولا بلحقك انا لي مراد امسك زول زول واقول ليهم ربنا عوضني عوض اتعجبو ليهو اهل السموات والارض الحمد لله قالت لي ربنا كريم

مرت الايام وامي وصهيب ومرتو جو وقالو اعمامي واولادهم بجو يوم الخطوبه دايرين اعزو احمد شكلو عرسو الاول ما كان عاجب ناس كتار امي طايره من الفرحه وقالت لي اعمل ليهو عرس وعزومه يتحكو بيها الناس ما اخلي ليهو شي قال ليها ارتاحي يمه انا وابراهيم ح نعملو في صاله قالت ليهو اهلك كتار قال ليها ماعليك بجيبهم ان شالله ميه حافله وبص الصغير قبل الكبير يجي قالت ليهو بس دا العاوزاهو امي كانت فرحانه شديد

اخوات ابراهيم جو وناس امي مشو ليهم انا مشيت سلمت عليهم وجيت راجعه قلت ما ظريفه وجهزت لبستي واتصلت كلمت اشتياق قالت لي راسي شاطب دايراك تجيني قلت ليها مالك قالت لي م عارفه البس شنو قلت ليها ان شالله عبايه قالت لي ياحليلك ماتقولي لي يوم خطوبتك ح تلبسي عبايه قلت ليها اكيد قالت لي انتي ما دايره تتغيري قلت ليها بتغير اها وريني ح تعملي شنو قالت لي تعالي لي بس قلت ليها طيب كلمت امي ولاقيتا في الشارع مشيت معاها عزلت ليها فستان وحلفت علي تشتري لي زيو حنستها قالت لي اقسم بالله ما تقبلي الا تاني ما بيني وبينك حاجه قلت ليها طيب

تاني يوم اهلي جو هايس ما شاء الله ومشو مع احمد وكانو فرحانين ليهو شديد واهل اشتياق ناس كويسين شديد ما حسسونا اننا اغراب كانهم بعرفونا ليهم سنين وشالونا من الارض شيل وكان يوم حلو شديد واشتياق طلعت حلوه شديد واحمد اشيل واعاين ليها ورجعنا متاخرين ونزلنا من العربيه كانت في بت قاعده جنب بابنا وشكلها تعبانه ومرهقه لانها اخدت ليها نومه استغربنا فيها دي منو صهيب بقا يتكلم معاها قال ليها انتي منو والمنومك هنا شنو فتحت عيونا ورفعت راسها وكلنا انخلعنا …