الفصل التاسع

رواية في قلب القريه الجزء التاسع 9 بقلم نوسة حمد في قلب القريهرواية في قلب القريه الحلقة التاسعة

حسيت وليد انسان كويس لكن برضو ما اديتو الامان عشان انا اكتر واحده عارفه خساسه ناس حلتهم وبقيت اتجنب اني اتونس معاهو او اختلط بيهو وهو شكلو لاحظ للحاجه دي يوم نهايه المحاضرات انا طالعه من الجامعه وماشه عشان اركب المواصلات جا وقف بي عربيتو وقال لي اركبي حسيت بنات دفعتي علقن علي وطبعا مجتمع الجامعه مافيهو فرق من ناس الحله كتير بزيدو القصص والروايات ما عارفه انا الناس دي بتستمتع بالحاجه دي ولا شنو ركبت معاهو وانا مضايقه

من نظرت زملائي لي وياعالم اقولو علي شنو بالاخص هم م عارفين الصله البتربطني بيهو قال لي نوسه انا زعلتك في حاجه لا سمح الله قلت ليهو العفو يا استاذ قال لي استاذ يعني انا بالنسبه ليك استاذ قلت ليهو موش انت استاذ قال لي خليك من انا شنو انا بالنسبه ليك استاذ حسيت كلامو وراهو كلام قلت ليهو ايوا انت بالنسبه لي استاذ وعاوزه اقول ليك ممكن تاني م تقيف لي بي عربيتك وممكن تاني ما تناديني في مكتبك انا في نظر الناس سيئه جدا قال لي

يعني دا السبب الخلاك تبعدي الناس وكلامهم قلت ليهو لا انا امي ضحت عشاني وطلعت عشان مصلحتي وفارقت اولادها وما بتنوم الا حبوب مهدئه اجي انا اخزلها واطلع وانزل معاك مستحيل يا وليد وبعدين انا زوجه ولد خالتك قال لي سؤال ولد خالتي عاوزاهو قلت ليهو عارف ردي انا حاليا عاوزه اتعلم لا ولد خالتك لا غيرو شغاله بيهم وبعدين انت بتسال كتير كده ليه قال لي لا عادي بس لانك فجاه اتغيرتي قلت ليهو التغير دا كان من الاول يحصل بس بحكم

القرابه البينا عرفتك اكتر قال لي وهسي ماعاوزك تنقطعي مني قلت ليهو انقطع كيف يعني قال لي عادي مثلا نشرب قهوه سوا عصير سوا وكده قلت ليهو لا معليش انا ما البت البتقعد مع الاولاد وتشرب قهوه وتجعل الحاله واحده اذا كان لبيت طلبك قبل كده دا كان من باب الزوق بس الان بقولا ليك م عندي استعداد حتي اعاين ليك واحترم رغبتي ونزلت منو

انزعجت منو شديد حسيت كلامو مبهم وحسيتو فاهمني غلط يعني مهما كان ماف فرق بينو وبين ناس حلتهم رجعت البيت وكنت مهمومه امي سالتني م رديت عليها اختصرتها بس كان نفسي اقول ليها الحقيقه لاني حسيت انو وليد طمعان فيني اصلو الكلام البقول لي فيهو دا ما اعجاب ولا غيرو دا طمع في نظرو متزوجه وهربانه ممكن اعمل اي شي وقررت اقطع علاقتي بيهو نهاي حتي لو خليت الجامعه.

مرت الايام ووليد حسيتو ما عاوز يقتنع اني ما عاوزه اتكلم معاهو تاني وفجاه من انسان مهتم بقا انسان ضدي واول امتحان لي شيلني الماده رغم اني اشتغلت كويس مشيت ليهو في المكتب قلت ليهو حرام عليك انا تعبت وسهرتا الليالي تجي تشيلني الماده قال لي كان م بحتاج انك تتعبي وتساهري لو كنتي معاي كويسه كان جبتي امتياز انصدمت فيهو شديد قلت ليهو م عارفه اقول شنو بس صدمتني دا انت القلت مختلف ومتعلم ومثقف بس طلعت زيهم وواحد قال لي شكرا

مشكلتك ما بتحسي انتي تخطفي قلبي وتتجاهليني قلت ليهو حرام عليك انت الوحيد العارف القصه الماره بيها وانا في عصمه ولد خالتك ماصح البتعمل فيهو دا قال لي انتي شنو شابكاني ولد خالتك ولد خالتك موش انتي قلتي اتطلقتي منو قلت ليهو لا م اتطلقت انا هربتا منو قال لي المشكله شنو تمشي وتستلمي قسيمتك قلت ليهو انت عارف انو ما ح يديني ليها وبعدين انت عاوز مني شنو قال لي عاوز اتزوجك صدمني شديد ما نطقت حرف وطلعت من المكتب لاقتني زميلتي

قالت لي شيلك الماده صاح م رديت عليها قالت لي انتي جديده ما فاهمه مفهوم الاساتذه ديل ترفضي ليهو طلب بشيلك الماده قلت ليها اسمعيني انتي م فاهمه شي قالت لي لا فاهمه والدفعه كلها فاهمه قصتكم قلت ليها لا الدفعه ما فاهمه ليكم بالشايفنو انتو وعليكم الله كفايه زياده القصص والتأليف انا الحركات دي طفشتني من الحله واخترت العلم م ممكن القا الصفات الكعبه في المكان الاخترتو. قالت لي صفات شنو وانتي الناس شايفنك نازله طالعه معاهم

غلبني ارد عليها وفي نفس الوقت غالبني اقول ليها دا ولد خاله راجلي الهاربه منو مسخو علي الجامعه والمحاضرات ولا حضرتهم رجعت البيت وخشمي م فتحتو مع امي اليوم كلو راقده ومقبله علي الحيطه وجا الليل وامي اشتغلت تبكي علي اولادها ولي اول مره اعلي صوتي عليها قلت ليه ياخ انا تعبت منك ومن اولادك امي بعد كانت تبكي سكتت وقالت لي كتر خيرك دي أنتي الضحيت عشانك.

حسيت اني قسيت عليها شديد قلت ليها يمه اعفي لي م قصدي انا والله كل همي اني م اخزلك انتي خليتي بيتك وحياتك واهلك عشاني امي شكلها زعلت شديد وكان ليها حق قعدت ليها في الارض وبقيت اترجا فيها قالت لي م زعلانه منك انا زعلانه من نفسي ازعجتك بي نبيحي في اولادي بس يابتي ديل اولادي حشاي محروق عليهم ودموعها نزلت سيل قلت ليها يمه انا اسفه وخلاص انا م عايزه جامعه انا عاوزه ارجع لي راجلي قالت لي راجلك ياتو يابت انتي دايره تجنيني

قلت ليها يمه م قصدي بس محتاجه ارجع قالت لي لو اقطعك لحم م بترجعي ليهو انتي جنيتي ولا شنو. غالبني احكي لي امي بي الهم المطفشني من الجامعه بقيت في حيره انا اعمل شنو وليد مضاديني. قررت اني اواجهو واقول ليهو انا مستحيل ارتبط بيك عشان م يتأمل اكتر مشيت اتكلمت معاهو بس حسيت من غير فايده قال لي انا مصر اني ارتبط بيك وانا ارتبط مع اي راجل الا وليد لانو ولد خاله محمد وانا اصلا رافضه مجتمع حلتهم م ح اكون عملت شي لو ارتبطت بيهو

وبعدين شكلو هو م جادي عاوز يلعب بي. مستحيل يكون بكامل قواه العقلية بقيت في صراع وخايفه انطق حرف وبطني طمت

يوم مشيت لي استاذ وليد في المكتب لقيت قاعده معاهو بت البت دي م غريبه علي سالتو منها. قال لي دي من حلتنا اسمها مهاد يا دوب دخلت الجامعه وفعلا من شكلها ظاهر عليها برلومه اتكلمت معاهو واترجيتو انو يشيلني من راسو رفض وقال لي قوه رجاله ح اتزوجك وح اجيب ليك القسيمه من محمد كرهتو شديد وبقيت اكورك فيهو وهو مبتسم واعاين لي استفزاني مشيت خليتو وبقيت افكر في طريقه تخلي وليد يخليني قلت النملي راس البت المن. حلتو واخليها ترتبط بيهو وبقيت افتش

1 2الصفحة التالية مدونة كامومنذ 5 ساعات 0 5 دقائق