رواية غريب احتل قلبي الفصل السادس 6 - بقلم شهد حمدي

ومي واقفه في المطبخ بيروح عامر عندها وبيقول ممازح ليها: ايه يا ميوي مالك سرحانه في ايه
مي بغضب: ايه اللي انت قولته ده لبابا وماما
عامر: قولت ايه واحد وبيحب مراته مش عيب انو بيحب فيها قدام اهلها ولا ايه
مي بسخريه: ده لما تكون مراته فعلا مش عاملين لعبه علي اهلها
عامر: خلاص ايه رأيك لو نخلي اللعبه تقلب بجد ونتجوز
مي بصدمه: نتجوز
عامر بحب: انا بحبك يا مي وبحبك اوي انا في حاجه عاوز اقولك عليها
مي: قول
عامر: انا دايما كنت بشوفك وانتي جايه عندنا الورشه انتي جيتي عندنا خمس مرات كان من سنه الكلام ده بس انا مكنتش بعمل حاجة في العربيه اللي كنتي بتجبيها و وانتي مكنتيش بتاخدي بالك مني بس انا كنت علي طول متابعك وكنت بحب افضل باصص عليكي اوي جميله جدا ده اللي كنت بقوله عليكي في سري حتي لما كنت بروح كنتي بتفضلي معايا في تفكيري وعلشان كده لما هما كانوا ورايا جيت عندك لاني مشيت قبل كده وراكي علشان اعرف بيتك فين كنت بفضل واقف كل يوم الصبح علشان اشوف وانتي راحه شغلك وجايه منه مش عاوزك تزعلي مني
مي بصدمه من كلامه: معقول كل ده في قلبك من نحيتي طب ليه فضلت ساكت ومتكلمتش
عامر: علشان في فرق بينا يعني زي ما قولتلك قبل كده انا فين وانتي فين انت محاميه وانا حتة مكانيكي معاه دبلوم في فرق بينا زي اللي بين الارض والسما
مي بحب: وانا يوميها قولتلك انك راجل يا عامر وميعبكش حاجه انا كمان بحبك اوي مش عارفه ازاي مع انو وقت قليل بس قلبي حبك ومش عاوز حد غيرك
وبتحضنه وهو بيحضنها وفي لحظتها امها بتدخل وبتقول: يانهار ابيض انتو بتعملو ايه
مي بتبعد بسرعه وبتتوتر: في ايه يا ماما ما هو جوزي علي فكره
سعاد: اظن ليكوا اوضه تعملوا فيها اللي يريحكم ولا ايه افرض ابوكي شافك كان هيبهدلك برضو
عامر بضحك: صح حماتي عندها حق يا حماتي انا عمال اقولها عيب يا مي لا يا مي متعمليش كده يا مي وهي ابدا عاوزه حضن عاوزه حضن
مي بصدمه: يانهارك ابيض انت بتقول ايه الله يخرب بيتك وبيت سنينك يا اخي
سعاد بضحك: اهو باعك في لحظه
مي بغضب: ماشي يا عامر لو نبقي لوحدنا اما وريتك
سعاد: ولا هتعملي حاجة ديتها يقولك خلاص انا اسف متزعليش هتتصالحي علي طول
مي: لا اله الا الله انا ماشيه من المطبخ ده ايه الناس دي
وبتمشي وبيفضل عامر وسعاد بيضحكوا وهي بتروح عند ابوها وهو بيقول: في ايه يا مي مالك ضربه بوز ليه
مي: مفيش يا بابا انت وحشني اوي والله
وبتحضنه وبتفضل حضناه لحد ما عامر وسعاد بيجوا وعامر بيقول: لا لا لو سمحت ارجعي كده انا بغير
محمود: اقعد علي جنب يا عامر دي بنتي وكمان وحشاني
ومي بطلع لسانها لعامر وبتقول وهي بتبوسه من خده وبتقول: حبيبي يابابا ربنا يخليك ليا وميحرمنيش منك ياقلبي وحياتي كلها
سعاد: والنبي يا بت والله يا حج دخلت عليها المطبخ لقتها ماسك في جوزها وعماله تحضنه وهو قولها عيب وهي ابدا
محمود: خلاص يا سعاد ما هو جوزها
عامر بضحك: حماتي حبيبتي ولله ربنا يخليكي ليا
مي بصدمه من امها: اجيب ميكروفون يا ماما عم حسن اللي علي اول شارعنا لسه معرفش اني كنت حاضنه جوزي
وبيفضلوا يضحكوا واليوم بيخلص وبيدخلو الاوضه ومي بتقول: هنام فين
عامر بخبث: علي السرير
مي: نعم يا بابا سرير مين انت علي الكنبه وانا علي السرير ومش عاوزه اسمع صوت خالص يلا اتفضل علي الكنبه
عامر ببراءه: يعني اهون عليكي انام علي الكنبه
مي: اها تهون تصبح على خير
عامر: ماشي يا مي وانتي من اهله