رواية غريب احتل قلبي الفصل السابع 7 - بقلم شهد حمدي

وتاني يوم بتصحى مي من النوم بدري وبتروح عند عامر علي الكنبه وبتقول بصوت واطي: عامر اصحي
عامر بنوم: شويه يا مي
مي بأبتسامه: قوم نام علي السرير لحد ما احضر الفطار يلا قوم بقي
وعامر بيقوم يروح علي السرير وبيروح في النوم وهي بتروح علي المطبخ وبعدين دقايق بتيجي سعاد عندها وبتقول: صباح الخير يا مي
مي: صباح النور يا ماما ايه اللي صحاكي دلوقتي لسه بدري يا حبيبتي
سعاد: لا مانتي عارفه انا بحب اصحي بدي الا صحيح يا مي هو جوزك مش بيروح شغله ليه هو واخد اجازه
مي بتوتر: اها يا ماما فعلا واخد اجازه علشان الجواز احنا بقالنا شويه متجوزين مش كتير يعني
سعاد: انا كنت بسأل بس يا حبيبتي علشان استغربت من قعدته في البيت اصل قعدة الراجل في البيت وحشه اوي يا بنتي
مي: عارفه يا ماما بس عامر مشاء الله عليه شاطر جدا في شغله متقلقيش
وبيحضروا الفطار وبتروح سعاد تصحي محمود ومي بتصحي عامر وبتقول: عامر الفطار جاهز يلا اصحي
عامر بتعب: مش قادر اقوم يا مي والله حاسس ان عضمي مكسر جامد
مي بزعل: من نومة الكنبه صح حقك عليا والله انا اسفه بس مانا مكنتش هعرف انام وانت جنبي
عامر: انا مؤدب علي فكره مكنتش هعمل حاجة كنت هنام بس
مي: مانا عارفه انك مؤدب بس مانا مكسوفه والله
عامر: قولتلك خلاص نتجوز يا مي
مي: طيب قوم بس معايا وبعدين لما هما يمشوا نبقي نشوف هنعمل ايه يلا بقي قوم
وبيقوم عامر معاها بيروحوا عند السفره وهو بيقول: صباح الخير يا حمايا صباح الخير يا حماتي
محمود: صباح النور يا عامر ايه مالك شكلك داخل علي برد
سعاد: يا حبيبي يا ابني تعال اقعد كده يا مي مقومه عامر وهو تعبان كنتي دخلتي الفطار في الاوضه يابنتي
مي: لازم يتحرك علشان البرد ميتملكش منه انا هنزل اجيب علاج من الصيدليه علي طول اهو بس لما نفطر وبيقعدوا بيفطروا ومحمود بيقول: اوعي تنزل بقي من البيت يا عامر علشان البرد ميزدش عليك يا ابني خليك قاعد لحد ما تخف خالص
سعاد: دانا بقي هعملك شويه شوربه وفرخه انما ايه هتاكل صوابعك وراهم تروم بيها عضمك
عامر بحب: ربنا يخليكي ليا يا حبيبتي وميحرمنيش منك ابدا ولا من حنيتك دي والله انا بعتبرك في مقام امي بالظبط وانت والله يا حمايا زي ابويا برضو
محمود: والله يا ابني من اول ما شوفتك وانا حبيتك وربنا اللي عالم وعارف انك راجل وهتخلي بالك من مي ومن نفسك
عامر: والله يا عمي انا لو لفيت الدنيا دي كلها مش هلقي زي مي ابدا لا في ادبها واخلاقها
مي: طيب ممكن تاكل بقي علشان اعرف انزل اجيب العلاج واجي
عامر: بلاش تنزلي انا شويه وهبقي كويس
مي: لا هنزل ملكش دعوة
وبعد ما بيخلصوا فطار مي بتعمل الشاي وبتلبس بسرعه وبتقول: حد عاوز حاجة من تحت يا جماعه
محمود: اها يا مي خدي يا حبيبتي الروشته بتاعتي هتيها معاكي وخدي فلوس اهي
مي: فلوس ايه بس يا بابا متقولش كده بعد اذنك
وبتروح عند امها في المطبخ وبتقول: ماما انا نازله هتعوزي حاجة
سعاد: اها خدي ورقة الطلبات اهي هتيها معاكي
مي: ياه ايام ورقه الطلبات فاكره ياماما
سعاد: اكيد طبعا حضرتك كنتي بتنسي نص الطلبات وعلشان كده كنت بكتبلك ويلا روحي بقي هتيهم علشان الحق اعمل الغدا
مي: ماشي انا نازله
وقبل ما تنزل عامر بيقول وهو بيقرب منها: خدي بالك من نفسك يا مي علشان خاطري
مي بحب: حاضر يا حبيبي متقلقش
وبتنزل مي وبتروح تشتري الطلبات وقبل ما بتدخل العماره بتلقي حد كتم بؤها واخدها