رواية جمعتنا فرصة عمل الفصل السابع 7 - بقلم تقي محمد

قدر ما حاولت إتعود على القعاد براي قدر ما حاولت إتعود على الغربه لقيت نفسي كل يوم بشتاق لي بيتنا اكتر وناس بيتنا عملت لي كاكاو ساخن وطلعت في البلكونه فوق ختيت كبايتي وقعدت اعاين للشارع ناس ماشين وناس جايين كانت البلكونه فاتحه على المستشفى والوقت كان بالليل والمستشفى بالليل كانت حلوه حلا مبالغه في مراقبتي دي لفت إنتباهي زول طالع من المستشفى لمن دققت النظر لقيت دا دكتور إيهاب طلع ووقف مع شاب كدا وبقى يتكلم معاهو وما عارفه الحصل شنو بس دكتور إيهاب بقي يضرب في الزول دا لحدي ما اغمي عليهو وبقى واقف يعاين ليهو من شدة الصدمه لمن قربت ادفق الكاكاو قلت دا منو دا وليه دكتور إيهاب ضربو كدا بعد مسافه جو ممرضين من المستشفى رفعوا الشاب ودخلوهو جوه دكتور إيهاب وقف مسافه وبعدها ركب عربيتو ومشى شربت الكاكاو ودخلت عملت لي نفسي حاجه اكلها فتحت التلفزيون ما كان فيهو حاجه حسيت بالملل واساسا كان بكره الجمعه إجازه قلت خلاص اطلع إتمشى حبه لبست لي عبايه وطلعت قفلت الشقه مشيت في الشارع كان في هدوء كدا عجيب ونسيم بارد الجو كان يبعث الراحه النفسيه بمعنى الكلمه مشيت لحدي ما وصلت جمب بائع كدا عندو فشار وتسالي ومقرمشات كتيره إشتريت منو فشار وتسالي ومشيت قعدت كان في زي مقاعد كدا جمبو قعدت مسااافه هناك تلفوني إتصل فتحتو لقيت دا ابوي متصل علي فصلت وإتصلت ليهو مكالمة فيديو قال لي ملوذه قلت ليهو يا حاج الاخبار قال لي تمااام الحمد لله بس فاقدنك امي جات قالت لي ملوذه الاخبار شنو والشغل كيف قلت ليها تمااام الحمد لله والشغل كويس ابوي قال لي ملاذ انتي قاعده وين قلت ليهو في الشارع قال لي يا ملاذ نحن قلنا شنو قلت ليهو والله يا ابوي قدام الشقه فتحت ليهو الكميرا الخلفيه وقلت ليهو يدي الشقه قال لي برضو يا ملاذ الوقت متأخر والكلام دا غلط هسي لو حصلت ليك حاجه قلت ليهو يا ابوي م ح تحصل لي حاجه قال لي ارجعي هسي الشقه وبعد ما ترجعي إتصلي علي قلت ليهو تماام قفلت منو وشلت حاجاتي ومشيت الشقه وبعدها إتصلت عليهو قال لي تاني مره ما تعملي كدا نحن واثقين فيك لكن يا بتي الزمن بقى كعب الاخو بقى يضر اخوهو امي قالت لي ابوك معاهو حق يابتي اسمعي كلامو داير مصلحتك قلت ليها طيب يا امي ويا ابوي تاني وعد م ح اطلع بالليل وهسي وين مزن ومزمل ابوي قال لي مزن نايمه بكره عندها مدرسه ومزمل نازل إمتحان تجريبي بكره قلت ليهو ما حددو ليهم إمتحانات الشهاده متين قال لي لسه ما حددو امي نادتو جا سلم علي وظاهر إنو مضغوط شديد إتكلمت معاهو حبه وقلت ليهو امشي اقرأ إتكلمت مع امي وابوي قريب الساعتين وطبعا امي ما خلت شمار في الحله ما قالتو لي لمن قفلت منهم لقيت الوقت إتأخر شديد قمت طوالي نمتا...

صحيت الصباح كان نفسي في ملاح روب فتحت التلاجه لقيت زبادي وكان عندي دكوه اصلا جايباها معاي لكن في كان كم مكون كدا مافي قلت امشي السوق إشتريهم واساسا كنت دايره لي كم حاجه كدا من السوق لكن المشكله كانت انو انا اساسا ما عارفه مكان السوق بقيت افكر اسأل منو فجأه جاتني فكره إنو اشغل قوقل فتحت التلفون فتحت بحثت عن سوق قريب جاب لي واحد لبست وبقيت ماشه على اساسو لحدي ما وصلتا دخلت السوق إشتريت حاجاتي جيت ماره بي مكان حق اكسسوارات كدا دخلت لقيت لي إسوره رهيبه عجبتني شلتها ومشيت أحاسب كان في راجل ومره واقفين قدامي إنتظرتهم لحدي ما حاسبو لمن حاسبو وجاين يطلعوا إتفاجأت إنو دا دكتور إيهاب قال لي ملاذ ! قلت ليهو كيف يا دكتور إيهاب قال لي كويس الحمد لله البت قالت ليهو دي منو يا إيهاب ما تعرفنا قال ليها دي ملاذ ممرضه معانا قالت لي إتشرفنا انا شيرين سلمت علي لاحظت لي إنها كانت محننه قلت يمكن مرتو طلعوا وانا مشيت احاسب لمن جيت طالعه لقيتهم واقفين جمب مكان حق ورد إشترى ليها ورود وهي كانت فرحانه شديد كانوا حلوين شديد مع بعض طلعت من السوق ماشه كدا طلعت التلفون فتحت قوقل ولي سوء الحظ تلفوني كان كهربتو بسيطه لمن وصلت نص المسافه التلفون قفل كهربه بقيت أحاول إسترجع الطريق بس ما إتزكرت اي حاجه قلت خلاص لو لقيت زول اسألوا من طريق المستشفى لانو دا اقرب معلم بعرفو بقيت منتظره فجأه وقفت قدامي عربيه توسان سوداء خفت شديد وانا كنت براي مع إنو الوقت نهار بس المكان كان فاضي نزل القزاز لقيتو دا دكتور إيهاب قعد يضحك قال لي خفتي ولا شنو قلت ليهو والله يا دكتور خلعتني قال لي ارح اركبي قلت ليهو لالا بشوف ترحال قال لي انا اساسا ماشي المستشفى ارح اركبي ركبتا مشينا مسافه وقف جمب بيت سمح شديد البت الكانت معاهو نزلت وقالت لي صاح يا ملاذ تعالي لينا يوم انا حبيتك شديد قلت ليها إن شاء الله قالت لي إيهاب امشي سريع وتعال امي ح تكون منتظرانا قال ليها كويس إتحركنا قال لي ابوك في ولا رجع السودان قلت ليهو رجع والله ليهو كم يوم قال لي ياخ كنتا داير اسجل ليكم زياره قبل ما يمشي لكن ما مشكله إن شاء الله نتلاقى في ساعة خير قلت ليهو إن شاء الله لا حظت إنو طول الطريق بعاين لي ما فهمت نظراتو لي نهائي لمن جيت انزل قلت ليهو شكرا عاين لي مسافه وإبتسم قال لي خلي بالك من نفسك بقيت اعاين ليهو قلت ليهو كويس....

في قلب كل شتاء ربيع نابض، ووراء كل ليل فجر باسم.❤️

الفصل الثامن8

قمت الصباح بدري كان يوم السبت رتبت البيت وقمت سريع جهزت لي لبسه عشان الشغل جهزت نفسي وعملت لي كاكاو شربتو اليوم كان مميز عندنا إحتفال في المستشفى كان اليوم العالمي للتمريض إتزكرت زمان لمن كنت في البلد ناس زهره بعملوا لي هديه وبرسلوها لي في المستشفى مع إنهم ما كانو بعترفوا لي إنهم هم العملوها لكن كنت متأكده إنهم هم هسي في الغربه دي لا اصحاب ولا اهل الحمد لله بس لبست كالعاده كل سنه لبسه حلوه واكسسوارات وعملت لي روج خفيف وطلعت على المستشفى لقيت الممرضات ديل قاشرات قشره حلوه خلاص دخلت المكتب راجعت الجرعات كان الزمن لسه بدري قلت امشي اشوف سحر طبعا إتنقلتا لي قسم الاطفال مشيت لقيتا عندها جرع قلت ليها جيبي انفذ معاك والله فرحة فرح طوالي قسمت لي جزو نفزنا لمن إنتهينا قالت لي الليله يا ملوزه بقيتي لي حلوه قلت ليها قصدك شنو يعني انا ما كنت حلوه ولا شنو قالت لي لالا اكيد حلوه بس الليله حلوه بي زياده قلت ليها لانو اليوم مميز قالت لي قاعده تحتفلي باليوم العالمي للتمريض قلت ليها اي إنتي ما بتحتفلي بيهو ولا شنو قالت لي والله يا ملاذ انا علاقتي بالتمريض ما قويه كدا لانو ما دخلتوا عن رقبه بس برضو ما بكرهو قلت ليها حاولي تحبيهو والله التمريض حلو وربنا إختارك فيهو عشان عارف إنك قدرو وبعدين التمريض عمل دنيا وأخره قالت لي فعلا والله قلت ليها طيب نتلاقى بعدين قالت لي تماام مشيت المكتب إنتبهت لي صندوق قاعد في الطربيزه مشيت جمبو لقيتو صندوق هدايا قلت معقوله بس مستحيل ناس زهره يوصلوها لي لحدي هنا فتحت الصندوق لقيت فيهو حلويات وشبسيهات كتيره فتحت الورقه وهنا صدمتي زادت نفسي الكلام كلو سنه ورقه ومرسوم فيها قلب بالدهبي وتحتها كل سنه وإنتي احلى نيرس إبتسمت دي كيف دي معقوله إتصلت ليهم زهره ردت قالت لي المختفيه قلت ليها والله مشاغل بس قالت لي كل سنه وانتي طيبه الليله اليوم العالمي للتمريض قلت ليها وإنتي طيبه وشكرا على الهديه فرحتني شديد يا زهره بالجد انتوا احلى صحبات قالت لي العفو ياخ بس الشكر دا ما لي قلت ليها كيف قالت لي إنتي اصبري بس وأخبار الشغل شنو قلت ليها تمااام الحمد لله بس كيف عملتوها الهديه وكيف جات هنا قالت لي يا ملاذ إنتي لسه تفكيرك بدائي زي ما هنا في ناس توصيل هناك في ناس توصيل المهم إتونست معاها مسافه وادتني ريم إتونست معاها وشكرتها على الهديه وقفلت طلعت بره طبعا كنا عاملين يوم علاجي مجان ودكتور إيهاب متبرع بالادويه والاجهزه بقينا قاعدين جونا ناس كتار في ناس عايزين فحوصات وفي ناس عايزين مقابلة دكاتره انا قاعده كدا جوني كم بت سحبت ليهم عينات في ولد جا قعد قال لي قابلت الدكتوره وكتبت لي ادويه ولازم اركب كانيولا قلت ليهو طيب شلت فراشه وركبت ليهو الترنكيت وبقيت افتش في الوريد قال لي إنتي حلوه قلت ليهو عفوا جاتني سحر قالت لي يا ملاذ قومي قلت ليها مالك قالت لي خليني اركبها ليهو امشي شوفي البت ديك دايره يسحبو منها دم وعارفاني السحب دا ما قاعده انجح فيهو قلت ليها تمام مشيت سحبت لي البت دايره ارجع محلي جاني الولد القبيل قال لي ليه ما ركبتي الكانيولا قلت ليهو الممرضه ما ركبتا ليك قال لي بس انا كنت عايزك إنتي الي تركبيها لي قلت ليهو لو سمحت زح لي انا وراي شغل قبل يزيد كلمه تاني دكتور إيهاب جا قال ليهو يا سعيد تعال عايزك مسكو من يدو وطلعو بره المستشفى جا راجع بعد مسافه جاني في مكاني قال لي ملاذ تعالي وراي عايزك وكان غضبان مشيت لحقتو قال لي عايز منك شغل رتبي لي الورق دا شوفي الحالات المهمه ختيها لي في صائد والعاديه في صائد قلت ليهو بس يا دكتور دا ما شغلي قال لي إشتغلي وإنتي ساكته شلت الاوراق وبقيت اقرأ فيهم رتبتهم ليهو لمن إنتهيت قلت ليهو خلصتا قال لي في ملف هناك جيبيهو لي جبتا ليهو الملف قلت ليهو عايز حاجه تاني قال لي اقعدي قعدتا وهو فتح الملف بقى يقرأ فيهو قلت ليهو يا دكتور انا إتأخرتا وفي ناس كتار عايزين فحص لازم امشي قال لي يا ملاذ المدير منو ؟ قلت ليهو إنت قال لي ايواا ولمن المدير يقول حاجه مفترض تتسمع ولا لأ قلت ليهو ما فهمت قال لي اقعدي وإنتي ساكنه عاينت ليهو مسافه ملامحو كانت جديه طوالي سكتا إتزكرت لمن دقا الولد ولمن هرج في البت الاسمها سهى طوالي مسكتا خشمي علي لمن شافني سكتا قال لي ايواا اسمعي الكلام قاعده نص ساعه كامله بعاين ليهو وهو بقرأ في الملف زهجت زهج فتحت تلفوني قعدتا العب عاينت ليهو لقيتو مركز شديد عليت صوت اللعبه وعملت نفسي منتبهه مع اللعبه كانت لعبة طبخ وديك البكون عندك زبائن ولازم تمشيهم ولا ح يغضبوا بقيت منتبهه مع اللعبه وشغاله اعمل في الاكل فجأة التلفون إتسحب من يدي رفعتا راسي لقيتو دا دكتور إيهاب قال لي اللعبه دي حلوه قلت ليهو وبي سببك ح اخسر هسي إبتسم وقعد قصادي قال لي فيك ملامح من زول قريب لي قلت ليهو منو قال فيك ملامح من زول غالي علي شديد❤️ قلت ليهو كيف دا قال لي عيونك بتشبهو حتى في طريقة كلامك تكشيرتك بتشبهو....

وإنها لفتاة واسعة العُيون ،هادئه كالليلَ ، صافيهٌ كالسماء ، عَميقة كالبئر ، خفيفة كالورقِ ، واضحة كالشمس ، تنير كالقمر ، توأسي بالنظراتِ الثاقبة ، ممتلئة بالإنشراح والمَشاعر الجَياشة ، إنها بمثابة "لوحة فنية" تَمكثُ في دياري الصغير❤♥❤♥❤♥