رواية جمعتنا فرصة عمل الفصل الثالث 3 - بقلم تقي محمد

الساعه اربعه جات رائد جانا مشينا بي رجولنا المستشفى ما كانت بعيده من السكن زي ما قال وطبعا كانت في منتهى الرهابه دخلنا جوه وعرفني على المكاتب والدكاتره ووراني مكتبو برضو اخر حاجه وقفنا جمب مكتب المدير العام قال لي دا مكتب المدير الطبي والمالك للمستشفى في نفس الوقت ح تلاقيهو بكره لمن تنزلي ح يكون عندك مقابله معاهو اول حاجه وبعدها تنزلي الشغل قلت ليهو إن شاء الله بعد ما إنتهينا من اللف وعرفت المستشفى كلها طلعنا انا وابوي مشينا البيت زي الساعه ٦ وحاجه كدا العشاء ازن صلينا وعملت العشاء إتعشينا طلعت لي فستان بالوردي الفاتح وطلعت معاهو طرحه اوف وايت وكان عندي شبط ابيض كويت الفستان والطرحه وختيتم في الدولاب كنت متحمسه شديد لي يوم بكره ما قدرت انوم وكل شويه إتقلب لحدي الصباح ما اصبح قمت صليت الصبح ودعيت إنو ربنا يوفقني طلعت الصاله لقيت ابوي صحى قال لي عملت الشاي الليله قلت ليهو يا سلام ح يكون احلى شاي قال لي اشربي واطلعي سريع عشان ما تتأخري قلت ليهو إنت ما ماشي معاي قال لي لأ احسن تمشي براكِ وتتعودي على الشغل وبعدين لو مشيت معاكِ ح اشغلك ساي احسن اقعد هنا أفتحي لي قناة الحدث قبل تطلعي قلت ليهو سمح مشيت شربت الشاي وجهزت نفسي وفتحت لي ابوي قناة الحدث وجهزت ليهو الفطور وطلعت بعد ما ودعتو...

وصلت المستشفى لاقاني رائد قال لي اووو دكتورتنا منورانا قلت ليهو بي دا نورك قال لي الليله ح تقابلي المدير العام شعورك قلت ليهو والله خايفه خوف قال لي ما تخافي ح يسألك كم سؤال كدا إنتي بس خليك هاديه وما تتوتري قلت ليهو ما ممكن تدخل معاي قال لي بدخل معاك اقدمك ليهو لكن ما ممكن ادخل معاك الانتر فيو دي صعبه قلت ليهو طيب ما مشكله مشى معاي لحدي مكتب المدير العام فتح الباب دخلنا كان قاعد وقدامو ورق كتير لمن دخلنا رفع راسو وعاين لينا ودقق فيني شديد حسيت ملامحو مألوفه قال لينا إتفضلوا رائد جرا لي الكرسي قال لي اقعدي وهو قعد في الاتجاه المعاكس لي وبقينا ساكتين رائد كان بعاين معاهو في الاوراق وهو ساكت لحدي ما المدير مدى ليهو ورقه قال ليهو بالله عليك يا رائد شوف لي الشغل دا وداير تقرير طبي كامل عن الحاله دي والملف دا فيهو تقارير لي حاله Cardiac Shock (صدمه قلبيه) ناتجه من Myocardial Infarction المريض ح يدخل عملية قسطره قلبيه بكره إن شاء الله لازم تدرس الملف كويس

رائد قال ليهو كويس

بعد قال لي رائد كدا عاين لي رائد قال ليهو دي الممرضه الجديد ملاذ عبد الفتاح قال لي بتعرفي شنو عن Myocardial Infarction قلت ليهو بتعني الاحتشاء القلبي وبيعمل إنسداد للشريان التاجي ال Coronary Artery وممكن يودي الى تلف عضلة القلب وهو يعتبر برضو واحد من اسباب الصدمه القلبيه قال لي يعني شنو صدمه قلبيه قلت ليهو تعني عدم قدرة القلب على ضخ الدم بشكل كافي لتلبية إحتياجات الجسم قال التدخلات التمريضه في الحالات الزي دي شنو؟ قلت ليهو اول حاجه بعمل مراقبه مستمره للعلامات الحيويه وبراقب برضو ECG عشان اقيم نظم القلب وفي ادويه برضو موصوفه للحالات دي زي الاسبرين والنتروجلسرين ومضادات التخثر بنديها للمريض في الحالات دي وبنراقب تأثيرات الادويه واهم حاجه بنقدم الدعم النفسي للمريض وبنكون جاهزين لي اي تدخل طارئ زي CPR إذا لزم الأمر عاين لي مسافه قال لي إشتغلتي قبل كدا في العنايه المركزه؟ قلت ليهو اي قال لي لو في مريض في ICU حصل ليهو توقف مفاجئ للقلب ح تعملي شنو قلت ليهو ح اعمل ليهو إنعاش رئوي CPR و بطلب المساعده الطبيه قال لي اهمية مراقبة السوائل في ICU قلت ليهو عشان نتجنب الجفاف اوالتورم ونضمن انو الاعضاء بتشتغل بشكل صحيح

قال لي جميل. فتحت الدرج طلع لي كانيولا (فراشه) قال لي اعمليها لي رائد رائد عاين ليهو مسافه قال ليهو انا بقيت فأر التجارب؟ قال ليهو يا زول إنت في ايدي أمينه صدقني مدى لي يدو ركبت الترنكيت اول حاجه عاينت الوريد قلت ليهو عايزه لي معقم وقطنه لمن قلت ليهو كدا إبتسم زي كأنو كان متوقع إني انسى الخطوه دي مدى لي قطن ومعقم وقلوفزات لبست لي قلوفز وبديت اعقم المكان بعد عقمت كويس فتحت الفراشه ودخلت في الوريد....

"إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا"

الفصل الرابع

دخلت في الوريد وسحبت الترنكيت سريع واصلتا جا دم في المخزن بديت اسحب الابره عشان إتأكد لقيت فعلا الفراشه بقت في مكانا المناسب مسكت قلب الفراشه وبي حركه سريعه عطلت الوريد وطلعت الابره وركبت قلب الفراشه و ثبتها باللاصق

إبتسم لي وقال انا عايزك تشتغلي معانا في غرفة العمليات لكن حاليا ح تكوني تحت الاختبار لحدي ما نتأكد انك بقيتي قدرها تمام قلت ليهو تمام قال لي رائد ح يوريك مكتبك ح تشتغلي في قسم الباطنيه حاليا وبعد اسبوع ح تمشي الجراحه برضو ح تاخدي فيها إسبوع وح تدخلي الطوارئ ح تاخدي فيها إسبوعين الاسبوع الاخير في الشهر ح تشتغلي في قسم البيدياترك بعد نهاية الشهر دا ح نقيم شغلك النهائي وبالتالي ح نعرف مستواك الحقيقي خلي بالك انو خلال الاسابيع دي ح تتلقي إختبارات حقيقيه قلت ليهو إن شاء الله اكون قدرها قال لي تقدري تمشي طلعت ورائد طلع معاي قال لي ما شاء الله اكتر حاجه عجبتني فيك ثباتك دا ببين إنك زول في الشغل السريع صنديده ودا اهم حاجه في شغل الممرض قلت ليهو فعلا لكن ما بنكر إني كنت خايفه وبعدين إنت خوفتني لمن قلت لي ما ح احضر معاك الانتر فيو قال لي انا نائب المدير يعني برضو لازم يكون عندي خلفيه عن الممرضه الجديده ولا شنو😉 قلت ليهو اي اكيد من حقك تعرف😆 قال لي اي اضحكي ياخ قبيل وش الجديه دا كنتي محسساني انو المدير دا عايز ياكلك ما يسألك 😂 قلت ليهو لكن الصراحه هو بخوف وتحس بيهو جادي شديد قال لي كل الموظفين بقولوا كدا لكن هو زول طيب شديد والله وقلبو ابيض المهم فتحنا كذا موضوع مع بعض لحدي ما وراني مكتبي قال لي يلا اول عمل ليك في مكتبك طلعي لي الفراشه دي قعدت اضحك قلت ليهو تصدق من التوتر نسيتا اقعد اطلعها ليك قعد طلعتها ليهو واديتو قطنه يوقف بيها الدم قال لي حظاً موفقاً

ومشى بقيت اعاين للمكتب الصراحه مكتب الاحلام كان فيهو طاوله وياهو معاها كرسيين وراها وإتنين قداما وفيهو إجلاس حلو شديد وفيهو خزنه مفتاحها كان معلق فيها فتحتها لقيت فيها قلوفزات وكمامات يعني الPPE كلها فيها اثناء ما قاعده إتأمل في المكتب كدا جات بت داخله وبتتكلم في التلفون لمن شافتني طلعت وجات داخله بعد مسافه قالت لي انتي الممرضه الجديده قلت ليها ايواا قالت لي يا هلا انا زميلتك سحر من السودان قلت ليها يا اهلين انا ملاذ وبرضو من السودان قالت لي بجد واخيرا زميله سودانيه إبتسمت ليها قالت لي يلا تعالي اعرفك على المرضى ح تشتغلي معاي في الباطنيه صح قلت ليها اي قالت لي تعالي مشيت معاها بقت تعرفني على المرضى وحالاتهم الصحيه وورتني الادويه والجرعات حقتهم ما خلت لي حاجه وعرفتني على دكاتره الباطنيه والجراحه مرينا على القسمين نساء ورجال قالت لي تصدقي انا ماسكه القسمين براي قلت ليها معقوله قالت لي والله ماسكلهم براي،،الصراحه القسمين كان عدد المرضى كبير ،،مشينا المكتب طلعت لي دفتر من الدولاب قالت لي لازم نتقسم عشان ننجز إنتي مستعده تبدي تشتغلي من هسي قلت ليها اي قسمت المرضى علينا وادتني ملفات المرضى العلي مسكتني عنبر الحريم وهي مسكت عنبر الرجال عاينتي لي زمن الجرع لقيت لسه عليهم قالت لي عندك اي حاجه في الدولاب في إسكارب في الدولاب البسيهو المهم هي مشت تدي الدوز وانا غيرت ملابسي كان في زي غرفه صغيره كدا للتبديل بدلتهم وغسلت يديني وعقمتهم وبقيت اقرأ في الحالات لحدي ما زمن الجرع جا مشيت كانت اول مريضه مره كبيره في السن كوماتوز في حالة غيبوبه يعني سلمت على المرافقه المريضه كان إسمها هدى على حسب قرايتنا إنو المريض الكوماتوز بتعامل بالنسبه لينا معاملة المرضى العاديين وقفت جمبها وقلت ليها ماما هدى انا ملاذ ممرضه جديده عايزه اديك الدواء وبديت اعبي في الدواء طوالي لبست قلوفز وثيت الفراشه مشيت ليها الدواء لمن خلصت براحه طلعت الحقنه وقفلت الفراشه رميت الحقنه في السله وقلت ليها خلاص خلصت يا ماما هدى عاينت المريضه بي نظرات متفحصه كدا وكتبت الاجراء في الدفتر ومشيت للمريضه التانيه كانت بت صغيره مشيت سلمت عليها قالت لي وين سحر قلت ليها سحر طلعت الليله ح اديك الدواء انا قالت لي لالا امها كوركت فيها قلت ليها ما مشكله خليها قلت ليها يا نور انا عايزه ابقى صحبتك نلعب سواا قولي لي إنتي بتحبي الشوكلاته ولا الشبسي قالت لي الشوكلاته قلت ليها يلا بكره ح اجيب ليك معاي شكلاته كتيره عشان نبقى اصحاب خلاص قالت لي لالا انا ما عايزه ابقى صحبتك قلت ليها ليه ما عايزه تبقي صحبتي قالت لي لانو صحبتي سحر قلت ليها انا زاتي صحبتي سحر لكن سحر هسي مشت خلتنا ونحن لازم نبقى احسن عشان نطلع ونشوف سحر صح قالت لي اي قلت ليها يلا نحن ح نبقى احسن كيف ونحن بنرفض الدواء طوالي مدت لي يدها قلت ليها ايوا كدا عبيت الحقنه واديتها دواها ...

*لا شيء يخترق القلوب ،،،*

*كلطف العبارة ... وبذل الإبتسامة ،،،*

*ولين الكلام ... وسلامة القصد ،،،*

*ونقاء القلب وغض الطرف عن الزلات ...!!*

*فسلامٌ على تلك الأرواح التي نُسجت من خيوط السلام خُلقت طيبة ،،هينة ،،لينة تبعث الأرتياح وتفيض بالوئام بقربها تأنس القلوب وبرفقتها تزهر الدروب ..*

*تلك الأرواح تُذكرنا على الدوام أن الحياة لا زالت تفيضُ بالخير ،،والنقاء والجمال....🤍🦋*