رواية جوائح الدهر الفصل الحادي والعشرون 21 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

لم يكن يدري أن تلك الخطوة ستقوده إلى مصير آخر
ولا كانت تعلم أن الحقيقة باتت على مرمى نبض
في ومضة واحدة انكشفت خفايا واندفعت القلوب إلى صراع لا هدنة فيه.
من هنا تبدأ العاصفة
وما بعدها ليس كما قبلها

ـــــــــــــ⊰ ـــــــــــــ

التفتت اريد أرجع للبيت بس وگف گلبي من شفت سما واكفه بصف الحايط رمشت مرتين من الصدمة قبل لا انطق أشرت بيدها وگالت

سما:: تعالي وراي وصوتج لا يسمع اخوج

:- مشيت وراها دخلنا غرفتي سدت الباب وهمست بصوت شبه مسموع خاف احد يسمعنا.

سما:: فسريلي الوضع إلي شفته بره فاطمه

فاطمه: ها
- لا ها ولا وجعا احجيلي كلشي من البدايه بشنو جاي تورطين نفسج طالعه تحجين ويا وحتى خطوبتكم ما تمت ؟

- اصبري افهمج
- أي صبرت احجي خليني اشوف
- بس ماراح دكولين الزياد ؟
- عيب عليج فاطمه شنو اكله اذا كتله تصير مشاكل وإني ماريد المشاكل احجيلي
- اني ويا قبل لا يخطبني نتواصل سوه وجنت حاظرته وحب يتأكد ماعندي اي مشكلة بموعد العقد اجه نحجي وراح بس

-: هزت راسها ما مقتنعة بكلامي
سما:: فاطمه احجي الصراحه
- شبيج جاي احجي الصدك شعندي قابل ويا
-يحبج ؟
:-: بهتت بوجها مصدومه من سؤالها ما خطر على بالي حتى وبعدين صدك هو يحبني لو يكرهني مالكيت جواب على سؤالي

فاطمه: اي
- متأكدة ؟
- اي متأكدة يحبني حتى توسل بيه علمود اوفق وراد يموت إله شويه بس طبعا وافقة وما مات

- دخيل ربج إذا حميتي ارجعي وإذا اشوفج طالعه بهيج وقت حظج اطيحه الج صلافتج عوفيها على صفحه لا تورطينا.

::- ابتسمت إلها اول ما طلعت تنفست حسيت نفسي رحت بيها اخخخ الله يطيح حظك اسامه رأسك مصفح نعلت شيطان ونمت ثاني يوم وثاني يوم ماكو أخبار عنه كأنه مشغول التهيت بوضعي ونسيت كلشي قعطت تواصل وي الكل حسيت نفسي بديت ارجع مثل قبل او مشاعري تغيرت ما جنت أعرف شنو بداخلي بس شعور غريب يحتلني بكل مره اذكر اسامه ولا كأني هذيج إلي جنت اكره بس مالازم انسى إلي سووا مرت الايام وكلشي جان تمام لحد يوم العقد كعدت الصبح اول شي سويته فتحت تليفوني ومثل ما توقعت احساسي تجاه دائماً يصيب شفت رساله منه ما رديت التفتت اباوع على فستاني الي موجود كدامي ورخرت الغطه وكمت وكفت اباوع اله
اجه بالي ذاك اليوم الي عقدنا بي رفعت شعري وغلست على افكاري مهما صار متأكدة بالآخر راح اشوفه شلون يتحاسب على كلشي.
:- صبحت عليهم زياد مندنك ما رفع راسه ضليت ارتب الضيافه وياهم واحظر لحد ما اجن بنات عمي وحده لزمت شعري وثانيه مكياجي وهذا شي اختياري ماحبيت أروح واخبص نفسي ورغم كلشي المكياج والشعر ولا غلطه وآخر شي لبست فستاني جان مستور ومريح رفعت عيوني على فتحت الباب دخلت اختي مجرد شافتني كدامها ابتسمت الي وكفت تركز عليه ثواني وهمست.

أديان:: جنتي تردين رجل واجاج
::- ضحكن البنات لأنهم يعرفوني شكد جنت اكول أريد رجل حسبي الله على الساني بوستني ماكدرت تحجي خنكتها العبره
ضلت ترتب فستاني وهيه ساكته اخر شي طلعت للاستقبال الخطار من طرفه وطرفنا

كلهم موجودين صوت هلاهل امه وعماته يرن بكل مكان كعدت على كوشه وكدامي استبرق تضحك فرحانه حتى ميلا جانت موجودة والفرحة واضحه بعيونها ورا نص ساعة وصارت أصوات السيارات باب بيتنا اغلب البنات وكفن يباوعون من شباك ردت اكوم اباوع بس استحيت اني الي كل مره أصور واثق لحظات بس هاي المره ماكدرت اصور شي مر وقت واني كاعدة اوزع صفنات الى أن اجت شهرزاد وسما حطن شال المهر على

راسي وأخذوا الكرسي بصف الباب كعدت حطوا الهيل وكلشي يخص العقد بهذا الوقت بذات احتاجيت احد يهديني رغم أختي ومرت أخوي والكل يمي محد تركني بس جنت خايفه فتحوا الباب زياد وكف بنص واسمه بجهة ثانيه رفعت عيوني اجت بعيون اسامه مجرد شافني ابتسم غمض عيونه وفتحهم حسيته حس بيه ابتسمت من ضرب زياد بيده وأشر اله يلزم ايدي وبدون تردد مد ايده زياد لزم ايدي ونزل الشال على عيوني حسيت براحه مو طبيعية ضل لازم ايدي اخذت نفس من نطق اسمي الشيخ

- أن قـبلـتي قـوالـي نـعـم ........
فاطمه: نـعـم انــت وكـيـلـي

"ما بين لحظة الخوف ولحظة الأمان، كُتب اسميهما معًا...

لم تكن بدايةً عادية، بل كانت قاسية، موحشة... خُطفت، لا بكلمات حب، بل بقوةٍ لا ترحم.
قيد وتهديد... صمت ثقيل، وقلب لا يعرف ما ينتظره.
لكنه، رغم كل شيء، لم يؤذها... كانت فيه وحشية المرتبك، لا شرّ المجرم.

ومع الوقت... صارت تلك العيون التي كانت تنظرها بحدّة، تخجل من نظراتها.
اليد التي أمسكتها بالقوة... صارت ترتجف حين تلمسها.
والقلب الذي كان مأوى للغضب، صار يضيق كلما بكت، وكلما تألمت.

واليوم، جلسا أمام الشيخ.
هي ترتجف كما في أول مرة... لكن ليس من الخوف، بل من رهبة الارتباط.
وهو يمد يده، لا ليسحبها عنوة، بل ليضع خاتمًا في إصبعها، ويقول:
"قبلت التزويج لنفسي على المهر المسمى."

وهكذا، انتهى زمن السواد، وبدأ عهد جديد...
ليس فيه خطف، بل اختيار.
ليس فيه قيد، بل ميثاق.
وليس فيه خوف... بل أمان من نوعٍ لم تتخيله يومًا.

::- صوت الهلاهل وصوت الصلوات خلت جسمي يقشعر بنفس الحظه ترك ايدي زياد
ساعدتني اكوم اديان حسيت رجليه ترجف كلبي يدك بسرعه كعدت على كوشه باوعت على ايدي حمره من لزمة اخوي التفت على استبرق الي شالت شال المهر عني وگالت

استبرق:: مبارك الكم جعل الله بينكم مودة ورحمة

::- ابتسمت لان ما أعرف ارد بهيج مواقف التفتت على ادور على جوائح بس مالها أثر.

فاطمه:: جوائح وينها ؟
استبرق:: خارج بغداد وي زوجها
::- هزيت راسي وسكتت جنت رايده وجودها لان من يوم الي حجت بي وياي خلت عندي امل بهواي اشياء ولحد الان أحس جانت تريد توصل الي فكره عن اسامه وما اضلمه...
على طاري اسمه صاحت امه اتستروا دقيقه ودخل بيده باقة ورد أشرت الي سما اكوم وكفت اله تقرب انطاني الباقه كل ضني بس هيج بس صدمني من باسني براسي ورفع كف ايدي يبوسه كدام الكل من صدمتي ابتسمت منحرجه كعدنا على كوشه قرب راسه مني وهمس.

اسامه:: مبارك النا.
فاطمه:: شو اخذك الواهس
- اكيد ياخذني الواهس بعد شحدج تحجين كلهم الكل صرتي مرتي الله والله حلوه كلمه مرتي
:-: اخذ الكلاص يشربني العصير وبنفس الوقت رجعت شربته ليش هاي سوالف مادري لبسني الحلقه ولبسته حلقته باوعت على ايدي شكل الحلقه بيها غريب ضلنا نسولف ما مهتمين الهوسات النسوان وهو جان فرحان غريب امر هذا رجال ربع ساعة وطلع يم زلم للمغرب البيت فرغ نزعت فستاني ودخلت سبحت وطلعت من التعب نمت ساعات طويلة وما كعدت اله ثاني يوم حسيت حركة يمي فتحت عيوني شفت زياد كاعد على جربايتي ويباوع على صوري واني صغيره معلكات على حايط عيونه مدمعه اول ما تحركت التفت الي رفعت نفسي بدون تفكير حضنته طبطب على ظهري وگال بنبرة مليانه حنيه..

زياد:: كعدت عزيزة اخوها
- نمت هواي
- اهم شي نمتي مرتاحه اجيت احجي وياج شويه

:: بنص كلامه سكت ماكدر يحجي من عبرته بلع ريكه وكمل كلامه.

زياد:: مهما تأخذين فكره او تسمعين كلام عن اسامه لا تستعجلين وتحكمين محد يعرفه بكدي عاشرته من سنوات طويلة ولو مو زين ما انطيج اله لو تردين عيونه ينطيهم الج وآخر شي اكوله الج الزمي ايده واخذي الطريق صح لا تخلينه مشتت وإذا لا سامح الله وما تفاهمتوا هذا بيتج وبأي وقت تلگيني يمج

::- بهاي المواقف بذات تلزمني الدموع ماكدر احجي بس نبرة صوته وكلامه بجوني حضنته وسكتت ضل شوي يمي وطلع العبره خانكته
سمحت دموعي كمت غسلت وطلعت كعدت يمهم ما عفتهم طول اليوم حتى الضهر كعدت انكد عليهم وهو متونس ورا العشه بليل واكفه اغسل مواعين واندك باب بيتنا بنفس الوقت طلع زياد اول ما فتح الباب وسده بسرعه وصاح.

زياد:: اني مو كتلك لا تجي أمشي ولي
::- دخل مسمعي صوت ضحكته يضحك من كل كلبه وزياد يسب بي اختفى صوته ركض زياد لزم الماسحه وراح وكف يم الحايط صعد اسامه على حايط ركعه على ايده وهو مستمر يضحك طفر من الحايط وأخوي يحير شنو يسوي بي سحبت الحجاب من الكرسي حطيته على رأسي وطلعت بس شافني شمر الماسحه وگال .

زياد:: طبي جوه فاطمه
اسامه:: مرتييي
- انجب انت انجب
:- يحط ايده على حلكه يسكته ويصيح فوتي ضليت فاتحه عيوني شبيهم زعاطيط هذوله..

فاطمه:: صدك جذب شبيكمممم

- صوتججج
:-: صاحوا ثنينهم بنفس الوقت
أسامه:: لا تصيح عليها ولك
زياد:: ولك بعينك لا تصيح انت مو كتلك لا تجي شعندك جاي
- شعليك جاي اشوف مرتي ولي منا
- امشي ولي من بيتي الوصخ جاي يشوفها ابو راس مصفح
- لا الضاهر الشغلة وراثه
- شقصدك اشتقصد ولك
:- ضحك اسامه ومن كل عقله مد ايده الزياد حتى يساعده يكوم والصدمني من لزم ايده يكومه ومستمرين يتناكرون فرحت بداخلي حسيتهم قريبين البعض وهاي اول مره أعرف بينهم صداقه قويه..

زياد:: مو كتلج فوتي
اسامه:: شعليك اجت تستقبل زوجها
::- مجرد نطق آخر كلمه ضربه بوكس بطنه واجه حضني من كتفي وعيونه على اسامه إلي لازم بطنه وخازره.

فاطمه:: صدك جذب شبيكمممم تتعاركون
اسامه:: اخوج يضربني تقبليها
:- باوعت على زياد ينتظر رد مني ويباوع صفح.

فاطمه:: اقبل خلي يكتلك
- اذا ما اطلكج بسيطه
- اطلكها شنو بكيفك هيه ابو راس مصفح
-: شبيك اشاقه وين اطلكها غير مرتي ام جهالي إذا ما اترس بيتي اطفال من اختك ازين شاربي

::- هد زياد يريد يكتله لزمته كوه خليتهم يكعدون جوه واني فلتت سما ما طلعت ضلت جوه هيه واديان اطريت اقدم الضيافه مجرد حظرتها أخذها زياد وهمس

زياد:: حتى لو بشقه لا تنطين بي كدامي
- هزيت راسي ابتسم وطلع من المطبخ صفنت ورا شو أخوي فد مره يخاف على أسامه شسالفة نوب يخاف حتى على مشاعره
ضليت أرقب بيهم من باب المطبخ لحد ما اندك باب بيتنا راح يشوف منو زياد دقايق مد راسه وكال بتحذير.

زياد:: راح اشوف عمي رسول واجي اذا تتحرك من مكانك اكتلك
أسامه:: انگلع وخلصني..

::- طلع وسد الباب ورا بس سده التفتت باتجاه الباب لمحني واكفه أبتسم ابتسامة عريضة
اشرلي تعالي تحركت كم خطوه وضليت واكقه كام من مكانه واجه إلي فتح حضنه مثل الملهوف وبدون اي مقدمات حضني حضن قوي وهمس

أسامه:: حضنج يطفي نار سنيني.
::- ماكدرت انطق بحرف حسيت بمغص بطني قوي ابتعد عني دنكت احرك رجلي بشكل دائري

فاطمه:: شسمه لا يجي زياد
- خلي يجي فنه يحجي
- لا عيب منه والله استحي
::- ابتعد كم خطوه عني وهمس.
- هاي المره الخاطرج المره جايه حتى خاطرج ما يمشي الوضع
- مو بكيفك هيه
- هز راسه ما عاجيه الوضع رجع كعد مكانه
ماعرف شنو إلي خلاني اروح اكعد مقابيلة تماما صارت عيني على الحلقه بيده ابتسمت من گال
اسامه:: مرتاحة هسه ؟
- نوعاً ما يعني
- أن شاء الله تختفي النوعاً ما
- ليش هيج اليوم
- جنت راجع من بيتي وكلت أمر اشوفج
- رحت إلها ؟
- اي شفتها وخليت عمي يمها واجيت
- عمك ؟
- اي شوفي أكثر أشخاص اثق بيهم واذا بيوم نفرض صار شي او ضرف تكدرين تعرفين كلشي عني منهم أولهم عمي فاضل وثاني ابن عمي علي والباقي ولد عمي كلهم بس الأقرب الي علي
- يعني يعرفون كلشي عنك ؟
- أي كلشي واثق بيهم
:- هو يحجي واني مركزه على نظرته حسيته يحجي بكل حب عنهم وكأنهم اعز شي عنده
ما قاطعته وضل يحجيلي عنهم واني استمع اله رغم هو حديث عادي بس اندمجت بكل حواسي ويا لحد ما اجته مكالمه من شخص خلته يتغير لونه ما سألته ولا دخلت بس خليته براحته طلع بطارمه يحجي مكالمته ومجرد كملها دخل عاف مكانه واجه بصفي لزم ايدي وهمس.

أسامه:: اريد اروح بس اريد منج شغلة
فاطمه:: وهيه؟
- اذا طولت بشغلي واتاخرت عليج لا تنسيني
- حتى لو اريد أنساك ماراح اكدر لأن كدام رب العالمين وكدام الكل عاقدين مو لعبه حتى إذا تتأخر انساك

- متأكدة ؟
- أتأكد ما أتراجع بكلامي اني
- ابتسم الي حسيت بشعور غريب بوقتها بس تجاهلت شعوري باسني بخدي وكام من مكانه بنفس الحظه التفت على الكوشه رفعها يرتبها
والتفت يطلع من بيتنا طلعت ورا رجع التفت بحركة سريعة سحبني يبوسني بكل لهفه لازم وجهي بيده مثبتني ابتعد عني نزل رأسه يم اذني وهمس.

أسامه:: خليت الج شي بالبيت شوفي واني اعرف نيتج من البدايه وهسه اكلج وداعة منى ومعزتها عندي كلشي تردينه موجود يمج خليته وماكو شي ثاني بعد يمي رايح إني وگلبي يمج..

::- ضليت ثابتة بمكاني ماحجيت ايشي بس بدون ما أحس على نفسي نزلت دمعتي من طلع وراح نظراته ونبرة صوته بجوني مسحت دموعي ودخلت التفتت بكل مكان أشوف شنو شي إلي موجود هنا رأسا وكعت عيني على

الكوشه إلي رتبها اول ما شالها لمحت تليفونه
مخلي جو الكوشه شلته خليته بالمكان السري وطلعت الغرفتي دخلت بسرعه وقفلت الباب كعدت ورجعت ضهري على باب فتحته فتح لانه بدون رمز دخلت على صور بي هواي صور من ضمنها صور اله وصور إلي واني نايمه بملابسي والصورة إلي بعدها نفس نومتي ونفس كلشي بس بدون شي يستر جسمي رأساً بعد عيوني عن تليفون هاي صور مفبركة مو حقيقة!!!
::- ضليت صافنه ما مستوعبه ايشي رجعت فتحته وكل صوره إلي عنده مفبركة ماكو شي حقيقي بالصور كل الي جاي مخوفني طلع وهم!!

::- ضليت صافنه ودموعي تنزل لحد ما وكعت عيني على صوره بنيه ثانيه رمشت مرتين اباوع على صوره شسوي عنده هاي ومنو هيه ؟ صدك جذب شعليه بي كل الصور الباقيه النفس البنيه بس بوضعيات تختلف ايا امه نايمه او تأكل او تكتب آخر شي طلعت من الصور ودخلت كل البرامج إلي أن دخلت محادثتي ويا لكيت رساله مكتوبه بس ما راسلها إلي ماكدرت اقراها دموعي تنزل وحدها
قفلت تليفون وكلت بس يرجع انطي اله
ومن يومها ما رجع اسامه ولا شفته أشهر مرت وهو ما ذكرني حتى برساله او مكالمة حتى زياد ما فتح موضوعه او حجه عنه بس جان بداخلي شك جبير لدرجه أول ما رجعت من دوام رحت بوجهي العيادة شهرزاد ما اخذت وقت حتى ادخل وبس شافتني كامت من مكانها خايفه قبل لا تنطق حرف كلت إلها.

فاطمه:: أريد أسوي فحص يمج
شهرزاد:: دقيقة خلي افهم شبيج وليش ما كلتي راح تجين وفحص شنو ؟
::- بلعت ريگي وهمست
فاطمه:: فحص عذر***
:- فتحت عيونها مصدومه هزت راسها رافضه طلبي
شهرزاد:' لا لا فاطمه لا تسوين هيح بنفسج
- اذا ما تسوي الي اروح الغير دكتوره شهرزاد
- باوعت إلي مسحت على وجها ضليت اقنع بيها إلى أن قبلت وسوت الفحص الي جنت خايفه إلى أبعد الحدود كلمه وحده منها جانت راح تغير اشياء هواي وتفتح مواضيع وأسئلة براسي غمضت عيوني من كالت

شهرزاد:: بعدج بنيه خوفج ماكو اله داعي فاطمه
::- ضغطت على ايدي حيل تندمت ألف مره لان ما سويته من البدايه زين الدم وضعي شنو سببه ليش خلاني بهيج موقف وليش خلانا نعيش هيج اشهر واني اخاف من الكل وآخر شي طلع كلشي وهم ..

::- طلعت منها رجعت على بيت روح مابيه ولا عندي طاقه استقبل اي شي بس جان ينتظرني شي ما توقعته بس دخلت للبيت صارت كدامي سما واديان وضعهم ما يتفسر شمرت أغراضي وكلت

فاطمه:: شبيجن ؟
سما:: اسامه شوكت آخر مره حجه وياج ؟
- ليش ؟
- زياد طلع من زمان ومستعجل وكال اسامه بالسجن!!
- سجن ؟
- أي
:- ضليت ثابتة بمكاني ماحجيت ايشي بهاي الحظه بذات روحي طلعت اله أشهر ما اجاني ولا سأل عني وهسه سجن شنو إلي جاي يصير ليش كل هذا صار ؟
كل طاقتي خلصت واني انتظر اخوي يجي انتظر احد بس يكلي ليش بسجن بس ولا احد اجه زياد يومين وهو يتصل يحجي كم شغله وبدون ما يفهمنا شصار بس سمعته گال

زياد:: عدا عداوة وي شخص ومن شافه كتله

::- شهكت سما واديان عيونهم عليه كلهم منتظرين ردت فعل مني بس ما ولا انطيت أي ردت فعل كمت من مكاني اسحل بنفسي دخلت الغرفة وكعدت كلهن التمن عليه موضوع الصور وموضوع الجذب الي جذبه عليه وهسه انسجن كال راح اروح وكال أتأخر بس مافهمت ماكو غير هذاك الشخص الي يدور علي من سنوات هو نفسه متأكدة زين اخته ما فكر بيها واني!!!!!
عجزت أفهم ليش خلاني هيج سحبت المخده طلعت التليفون مالته دخلت على رساله الي كاتبها قريت كل حرف مكتوب ودموعي تنزل ماكدرت ألزم نفسي بجيت وصرخت بكل صوتي على صوتي دخلن حضنتني اديان تحاول تسكتني بس ماكو شي سكنتي بأعلى صوتي بجيت اشوفهن انخبصن يحاولون يسكتوني إلى أن حسيت نغزه بيدي وبعدها حسيت كل جسمي واعصابي رخت نوموني وضلت يمي اديان مجرد دقايق ونمت..
ومن هذاك اليوم ما صرت اطلع من غرفتي ومرت الايام وكل يوم يمر عليه اكول انسى وأكمل حياتي بس الگاه نفسي ابجي مافهمت شعوري شنو ولا كدرت احجي البداخلي رفعت عيني على شباك لا إرادياً اجه بالي المكان الي يوكف بي إلي أخذت تليفوني وتليفونه اساسا موجود وياي طلعت من غرفتي لمحت سما وزياد كاعدين بداية الدرج عبرت من يمهم وطلعت للحديقة كعدت بزاوية أرقب المكان إلي شفته بي اخر مره زفرت نفس بقلة حيلة

طلعت رساله اقراها مره للمره مدري شكد بس قريتها هواي وإني اقرأ بيها اجتني رساله بإسم الأمن فتحت المحادثه ومن خلال كلامهم عرفته الأمن إلي مخلي على بيته رجعت الاول الآخر رساله كاتب

- استاذ البيت مراقب
فهمت قصده انو بيت أسامه مراقب واخته هناك رجف كلبي خفت يصير شي الها
ما اجه بالي غير عم اسامه دورت على اسمه وطلع إلي بسجلات المكالمات كتبت اله رساله وكمت من مكاني بسرعة رحت الزياد وسما وكفت كدامه وكلت

فاطمه:: صداقتك بي قويه صح ؟
- اي ليش ؟
- تعرف منى ؟
::- رفعت رأسها سما تباوع النا التفت الها زياد وهيه كالت

سما:: والله ما حاجيه إلها شي
زياد:: منين تعرفيها ؟
فاطمه:: أعرفها زين هو حجالي عنها
- متأكدة؟
- والله وأعرف كلشي حتى بيته ومنو يبقى هناك واجيت اريد شي منك زياد
:- كام من درج وكف كدامي وأشر احجي
الأول مره اخلي عيني بعينه واحجي بدون خوف او تردد

فاطمه:: اريد ابقى يمها لحد ما يطلع ولا ترفض امانه الله
:- صفن بوجهي مسح على وجهه
زياد:: فاطمه كلهم دخلوا ودفعوا فلوس وحول القضية دفاع عن النفس والحكم اربع سنوات تبقين أربع سنوات بيته ؟

- أي ابقى ماعندي مشكلة
- وعمه ويا بنفس البيت
- اطلب منه ما يبقى بداخل البيت بس اريد ابقى وياها لحد ما يرجع

::- حاول يطلع أعذار بكل الطرق
بس ضليت مصره على قراري حجيت ويا فاضل وما رفض بس كال الزياد

فاضل:: تجيها حالات تفقد بيها وكلشي يصير
::- باوع زياد إلي هزيت راسي اله وهو كمل كلامه ويا أخذ المكان والعنوان منه وهو شرط يأخذني بنفسه وما أعترض زياد لأن يعرف اسامه شكد يثق بي رغم كلهم ما موافقين على قراري ما اهتميت بكد ما جنت خايفه يصير شي الها اخذت اشياء بسيطة بين ما اجه سلمت على اهلي وكلت

فاطمه:: ارجع الكم لا تخافون
:- ودعتهم وزياد حسيته زعل بس ما أعرف شنو كال اله فاضل حتى ضحك وتغير مزاجه
صعد بسياره مجرد حركها التفتت اباوع على بيتنا متأكدة راح اتصير اشياء اكبر من توقعاتي يس مادام اختاريت هذا طريق احتمل كلشي...

::- بعدنا بنص الطريق وتليفون فاضل ما سكت ولا دقيقه بس فتح خط صار بسوق بسرعة مو طبيعية لدرجة خفت يصير حادث مجرد وكف سياره گال .

فاضل:: أبقي هنا عمي لا تنزلين
::- كمل كلامه وسحب سلاحه ونزل يركض ماكدرت اثبت بمكاني ونزلت ورا لمحت سيارتين للشرطة واكفه باب البيت عرفته البيت بيت اسامه من شكله شفت هواي شرطه بداخل البيت لازمين ثنين وطلعوا ثالث من البيت ركض فاضل داخل البيت ضليت واكفه بمكاني مصدومه بالوضع صوت عياط طالع من داخل ألتفت عليه واحد منهم ما انتبهت غير على نجمتين إلي على كتفه وطوله اتقدم باتجاهي اشر إلي على سياره فاضل وگال

- ارجعي للسياره خويه
::- وكعت عيني على الباج مالته مكتوب اسمه
حمزه محمد سلمان..
يعني هذا اخو جوائح !!!! ....

ـــــــــــــ⊰ ـــــــــــــ

فاضل:: بفترة بسيطة خلصنا منهم واحد واحد وهسه اجيت أكول الأبوي اخوك سرحان اجته جلطه سكتته بمكانه

::- بس كال هيج طفرت استبرق من مكانها وعاطت بصوت كمزنا كلنا

- احلفففف
فاضل:: والكافل بس ليش محد كاله لسه شو وخرن خلي افوت

::- دفعنا وراح يفجر القنبلة باوعت على وهج واستبرق يكمزن من الفرحه حتى فرحت بس خفت من ردت فعل جدي

غفران:: كافن ولجن هسه نروح بيها اسكتن
::- بعدي احجي وطلع صوتهم أشرت النا استبرق وكالت

استبرق:: تعالن نكعد هنا بس نفوت تطردنا رحمه نكعد هنا اشرف النا
وصدك كعدنا ساكتات نسمع العياط ماكو أقل من ربع ساعة وطلع سلمان ورا زهره راحوا ثنينهم وراها طلع عمي فاضل ويا علي يهز أكتافه بس شاف رحمه طلعت من البيت وكف ورا عمي فاضل

رحمه:: شبيك وكفت كمل
- اركص ؟
- اي كمل ما اخرب فرحتك
- اندفع الباب ودخل فرات ويا وسام بس شافتهم كالت
رحمه:' لا تركص خربت الفرحه

:- راحت وكفت كدامه رفعت اصبعها تأشر على باب وتحجي.

رحمه:: ارجع منين ما اجيت لا يصير شي ما يعجبك

فرات:: لا تورطين نفسج وياي هواي سكتت الج لا تتمادين أحسن الج
وسام:: فراتت!!
- دقيقه وسام خلينا نشوف اخوك أبو الرهانات القذر شيسوي

::- بس ذكرت كلمه رهانات تغيرت ملامحه للصدمه هزت أيدها رحمه ورجعت تكمل كلامها

رحمه:: ها انصدمت مو سوالفك كلها عرفتها وبكلمه مني هسه تلحك سرحان وتندفن بصفه لم كرامتك وراح منا وتحلم تشوف جوائح

فرات:: مو كيفكم مرتييي اخذها غضباً عليكم

علي:: غصباً على منو والحسن ادفنك هنا
::- لزمه عمي فاضل وضل ساكت يخلي رحمه تكمل كلامها بس شاف ردت فعل عمي فاضل وشلون واكف بظهر رحمه انصدم جان متوقع كلهم يوكفون ويا

فرات:: وينها احجي مكانها وين.
رحمه:: ههههه تريد تعرف مكانها وين اني اكلك وين جوائح خارج العراق هناك مكانها يلا روح شوفها وين خارج العراق ورجعها بوقتها تعال اوكف كدامنا وكول اخذها غضباً عليكم اما هسه روح منا لا اعفس وجهك بيدي
وانت وسام الكلام ما موجه الك بس هم تتحاسب لان سكتت عن سوالف اخوك وما حجيت..

::- دنك بالكاع ساكت وفرات بعده مستمر مخلي عينه بعيون رحمه بكل صلافة معقولة هذا نفسه الي جنت اعتبره بير أسراري واحجيله كلشي معقولة نفسه ؟

استبرق:: اي نفسه واني مصدومه بي
:- جرت حسره باوعت على وهج بس طلع فرات واسامه لحكت وسام بسرعه ورحمه ما دخلت طلعت وراها وكفت بالباب اسمع كلامها

وهجَ::  وحق علي او أولاده يا وسام اذا اشوفك قريب من بيتنا راح تشوف شي ما يعجبك يا تذل صاف وي أخوك وما حجيت شي وبعدك وخلقك من اليوم راح انسى  شخص اسمه وسام بحياتي وروح مثل ما حركتوا كلبي على اختي أن شاء الله نفس الإحساس ونفس الشعور ويحترك كلبك على اخوك وانت يا فرات حسبي الله ونعم الوكيل عليك منا الآخر يوم بعمرك عساك ما تتهنى بحياتك وما تشوف الراحه بيوم وهاي دعوة من گلب محروك حسبي الله ونعم الوكيل عليكم...

::- تحجي بحركة وتدعي قشعر جسمي من دعواتها ما نطقوا بحرف بس وسام يباوع الها بنظرات كأنه انضهم كسر گلبي  من گال

وسام:: انكسر گلبي منچ  من دعيتي عليّه.

::- كمل كلامه وراح مشى وهو مكسور گلبه بس ماكدر الوم وهجَ لأنها مقهوره على أختها
وانصدمت من شهكت تبجي

::- سحبتها دخلتها جوه التفتت حضنتني تشهك وتبجي اجت استبرق ورحمه حاوطنها من كل الجهات باوعت علينا وگالت

وهجَ:: كل دعوة تطلع منّي تكسرني قبله
::- سحبتها رحمه كومتها حضنتها من كتفها واخذتها للداخل علي وعمي واكفين على صفحه يحجون وعيونهم علينا  أشروا ندخل دخلت إني واستبرق ورا دقايق اجو زلم هواي وكلهم لابسين زي العسكري وياهم انمار وشخص ثاني غريب بس شافته استبرق قلصت عيونها وكالت.

استبرق:: دقيقه هذا مو يشبه ايان ؟
غفران:: لا بس اتوقع نفس الطول
- لا ركزي والله اكو شبه
::- مالحكت اركز دخل راجح وايڤار كلهم مجتمعين يحجون وعمي فاضل يأشر الهم بيده على إمكان بالحديقة ثنين منهم وكفوا بالحديقة واربعه طلعوا بره

شسون ولجن ؟
::- التفتنا مفزوعات
غفران:: خوفتيني عمه
استبرق:: تعالي عمه تعالي شوفي هذا مو يشبه ايان
نيرمين:: وينه

::- مدت راسها تباوع ويانا بس شافته ابتسمت ابتسامه غريبة وهمست

نيرمين:: لا منين متوهمات بناتي يلا لا يشوفكم واحد وينرعصون علينا
- منو ينرعص ؟
::- فتحت عيونها مصدومه بوجود عمي محمد وهو منتجي على باب

نيرمين:: شوكت تبطل سوالفك
محمد:: شبيهن سوالفي ياحظرت دكتوره
- والله يا حظرت العقيد من ورا سوالفك الي يوم يوكف گلبي
- إسم الله على گلبج بعد گلبي اذا هيج ابطلهن لعيونج
-  لعد ليش أحسك ما راضي ؟
- چا شسوي لعيونج بكلشي راضي

::- همه يحجون واحنا صافنات عليهم دخل علي باوع الهم فتح ثلاجة شرب ماي وطلع مدت رأسها استبرق وهمست

استبرق::  ابنهم طلع بدون لا يحجي معناتها متعود عليهم خلينا نطلع.
::- وفعلاً بسرعة طلعنا وعمي محمد يباوع ورانا كعدنا بالاستقبال ورحمه وهجَ بالغرفه فوك للمغرب اجو عمامي أخذوا نسوانهم وراحوا يتواجدون بالفاتحه كدام العالم فقط أما احنا ضلينا بالبيت نشفت ايدي من الماي وأخذت الجاي انطيته العلي راح يصب الهم باوعت الهم انمار وايڤار وراجح وايان وعلي كلهم كاعدين يسولفون بموضوع اسامه رحمه فوك هي وهج ما نزلن واستبرق ترتب المطبخ جان فراغ جبير بالبيت حسيت بخوف بسبب الهدوء الموجود اسامه جوائح ثنينهم ما موجودين وكل واحد مصيبته أسوأ ليش هيج صار بيهم وشنو النهايه هم يجي يوم واشوف الكل فرحان ويضحكون بدون هموم أن شاء الله يجي ماكو شي مستحيل بس تعبنا وضعنا

::- جريت نفس ورفعت عيوني على راجح عيونه عليه بس باوعت اله نزل عيونه عني غلست وفتت للمطبخ اساعد استبرق بس لگيتها مخلصه كلشي عفتها وصعدت فوك فتحت الباب ودخلت شفت وهجَ نايمه على ايد رحمه ورحمه نايمه  باوعت على مكان جوائح بدون تفكير حطيت راسي وتمددت بمكانها واجه بالي سؤال واحد
وينها هسه ؟ ومنو يمها وضعها شلونه صحت او بعدهي فاقدة كل هاي الأسئلة ماكو جاوب عليها دعيت تكون بخير وين ما چانت ونمت ما حسيت بشي بعد لحد الصبح كعدت على صوت رحمه تكعد بينا نصلي  بس ركزنا بصوت الي بره كالت رحمه.

- هذا صوت جلب بره ؟
استبرق:: اي جابوا أمن وياهم جلاب وكالوا لا طلعون بره وصوتكم نصوا بين ما ننقل راح يبقون هنا

غفران:: عزااا شلون
رحمه:: عوفي العزا اعتبرهم حالهم حال اقاربنا
وكومنا صلوا يلا خلي أروح اكعد الولد واجيكم
::- كمنا نتوضه وهيه راحت تكعد الباقيه بس كعدتهم رجعت تصلي ويانا بين ما خلصنا گالت

- ترجعن تنامن ؟
استبرق:: إني لا اريد اكللكم شي ايان كالي بي البارحة
- وهو؟
- شسمه ايان كال ورا هذا الشهر ابوي كال نسوي العرس وهو رافض لان جوائح واسامه مو هنا بس عمو محمد كايل اله جوائح لحد هذا اليوم ما صحت واسامه يطول سنوات لهذا يريد نسوي عرس

رحمه:: كلام عمي محمد منطقي هو عرس سووا وكملوا حياتكم وباذن الله الكلشي  ينحل
::- صفنت استبرق ما راضيه ضلت ساكته مر اسبوع والموضوع ما انفتح وماكو شي جديد  لحد ما اجت امي تحجي وي استبرق وعمه نيرمين كعدوا يحجون وياها واحنا طلعنا وهج أربعه وعشرين ساعة ساكته وكلنا خفنا عليها  حجيت الايڤار عنها گال

ايڤار:: إني أعرف منو يطلعها من وضعها هذا بس دقايق

::- طلع تليفون اتصل على شخص كام من مكانه ابتعد عني يحجي المكالمة وبعدها طلع ما رجع ورا ساعه تقريباً رجع فتح الباب ودخل فاتت ورا بنيه بس شفتها عرفتها صديقة جوائح شيلان اول ما فاتت وكف ايڤار بداية الدرج يصيح.

ايڤار:: وهجج الصخله  وينج
::- نزلت تباوع علي وبيدها الحزام بس شافت شيلان ضحكت وركضت تحضنا

شيلان:: ههههه تعرفين نفسج صخله
-  خليني محترمتج بعدج خطار هسه
::- ضحكت التفتت على درج شافت البنات سلمت علينا وحده وحده وبدون اي مقدمات فاتت للمطبخ اخذت ماي وحدها وطلعت راحت استبرق تجيب شي إلها وايڤار طلع وسد الباب ورا جمعتنا كلنا بمكان واحد وكعدنا نسولف ما جذبني حديثهم اله لمن حجوا عن جوائح ركزت وياهم

وهجَ:: يعني ما تعرفين ؟
- لا صح جنت وياها بس من طلعوها بعد ما عرفت شي وكل واحد يكول شي الحجي بيني وبينكم عمو محمد كال خارج العراق بس قبل يومين بالمركز ذكروها وجنا نحجي عنها واحد من المحققين كال منو كال الكم هيه خارج العراق ما طلعت من العراق اصلا

رحمه:: شلون ما طلعت ؟
- والله مادري هو كال ما طلعت وبعدها من سألنا ما جاوبنا بس من شكله جان مبين صادق بكلامه واني اعرف هذا شخص ولا مره شارك بحديث ويانا بس من جبنا طاريها كال هيج.

استبرق::  عمي محمد كال طلعنا هذا اكيد يريد يمسلت ماكو غيرها صدكوني
::- أخذت رشفه من العصر وگالت

شيلان:: لا تحجين هيج تره سيد هذا

حين تغيّر كل شيء في لحظة
الهواء أصبح أثقل والأنفاس توقفت وكأن المكان كله ينتظر حركته التالية
وجوده لم يكن مجرد حضور بل إعلان أن ما هو آتٍ لا يقبل التأجيل

يـتـابـع

ـــــــــــــ⊰ ـــــــــــــ