رواية جوائح الدهر الفصل العشرون 20 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

مرّت اللحظة بهدوءٍ خادع لكنّها أيقظت ما كان نائمًا في الأعماق.
نبضٌ غريب تسلّل بصمت معلنًا أن القادم لن يكون عاديًا

ـــــــــــــ⊰ ـــــــــــــ

انطيت موافقتي الأخوي.
-: وراها رأسا قفلت تليفون وضليت اطكطك اصابعي من الخوف خاف اتورط ويا هدفي من البداية احذف كلشي موجود عنده وبعدها اطلك منه ضليت شارده بأفكاري لحد ما غفيت كعدت صبح رفعت عيوني على ساعة رأسا طفرت فتحت تليفون ومثل ما توقعت متصل عليه دزيت اله رساله وطلعت أصبح من عليهم
ضليت ساكته وما فتحت وي احد للعصر دك تليفون زياد ومثل كل مره يطلع بره خلص المكالمة ودخل باوع عليه وكال.

زياد:: فاطمه اسامه منين يعرف وافقتي ؟
- ها ؟
- منين يعرف وافقتي
:- اجه كعد كدامي رجع حضره على قنفه وعيونه عليه بلعت ريگي وگلت..

فاطمه:: وداعة ابوك مادري أتوقع هاي بنات عمه كالن اله لان البارحة نحجي احنا وكتلهن

- كلتي بنات عمه مو
- اي شنو ماتصدكني مو تربيتك اني اكو واحد يشك بتربيته .
- صح ربيتج بس سيلين عادة تربيتج كلها
خلي أسمع شغلة ثانيه بعد اطبكم ثنينكم واكتلكم والحسن

- تكتلني اني مو خوش اذا ما اكول الرائد ابن عمك يحجي على مرتك ويكول عادة تربيتج وخربتج فلا اتسمه فاطمه..

- سويها واني اعلمج

:-: قلصة عيوني علي طلعت سما من المطبخ بيدها الجفجير طفرت بصف زياد ختلت ورا ضهره باوع على مرته وگال

زياد:: لازمه جفجيرج وتفترين شعدنا حرب

سما:: صار ساعة تتعاركون وهسه بس طلعت ختلتي بصفه مو.

فاطمه:: احجي وي مرتك تريد تعنفني
- تعنفج چا تعالي اخذيها.

:- ضربته على كتفه وابتعدت عنه ضلوا يتعاركون بيناتهم ويضحكون اجت بالي شغلة همه هم بدت علاقتهم من خطفها زياد وهسه عدها اطفال وعلاقتهم تخبل بس كما تدين تدان أخوي خطف سما الي هيه بنت عمه ودارت دنيا وخطفني صديقه همه كملوا حياتهم مرتاحين بس إني وكعت ضحية أفعال اخوي..
ابتسمت حتى ما اخرب الجو الي بالبيت والتفتت اروح الغرفتي وگال

زياد:: بليل يجون علمود تتفقون على كم شغلة مو تنامين..

- هزيت راسي اله ورحت الغرفتي وفعلاً مجرد صارت تسعه بليل اجت امه او عمته سلمت عليهم وقدمت الضيافه وطلعت شهرزاد وسما هنه إلي اتفقن على كلشي وبس راحوا اجت الغرفتي شهرزاد أول ما فتحت الباب باوعت عليه بنظرات غريبة وهمست..

شهرزاد:: انخطفتي ورجعج الاهلج وخطبج شو احس اكو شي مفقود ورا هاي القصه..

فاطمه:: لا تحسين ماكو شي مفقود ولا تنسين هو صديق اخوي ودائما اشوفه بالجامعة كلش عادي..

- خوش ولد ؟

فاطمه:: اي حتى يصلي ويصوم ويخاف الله ماعده سوالف بنات ولا شغلات مو زينه .

- جنج حميتي
- يمكن بس صدكيني ميخالف
- يلا راح اصدكج هاي المره وهسه اسمعي بعد اسبوع ضبط المشيه مالتج والعقد..
- خوش مادام اجيتي وكلتي الي المفروض تختارين كلشي أنتِ لان احب ذوقج..

::- ابتسمت على كلامي وما رافضت حجت شوي وطلعت يم اختي ومرت اخوي رأسا فتحت تليفوني لكيت اشعار منه كاتب..

اسامه:: بالوحده اجيج اطلعي للحديقة الي ورا البيت
:- اتصلت علي مارد شعده جاي هذا وعلي يموتونه زياد إذا شافنا سوه..
قفلت الباب وضليت اطكطك اصابعي من الخوف عبرت ساعه وحده وهو ماكو اخذت نفس مرتاحه لأنه ما اجه كمت طفيت الاضاءه وتمددت حتى انام خمس دقايق او أقل اجتني مكالمه منه بس فتحت خط اجاني صوته..

اسامه:: إني جوه اذا ما تنزلين اصعد والله.
فاطمه:: شالك الله ولك يموتونا والعباس روح اسامه لا تورطني.

- أبقي يمج هسه اصعدلج.
- خرب روحك جايه جايه لا تصعد.
-:- سديت المكالمة سحبت حجابي وكمت فتحت الباب وطلعت والحمدلله الكل بغرفته محد طالع مشيت بهدوء وطلعت لحد ما شفته كدامي خليت ايدي على گلبي وهمست..

فاطمه:: تريدددددد تموتني تجلطني وتالي وياك انت؟
اسامه:: لازم تتعلمين شلون ترحبين بزوجج
- لا تخليني اغرد هسه واجيب حتى زوجي
- شو صلفه انتِ؟
- اي واذا مو عاجبك اركع راسك بالحايط..
:-: بحركة سريعة مد ايده سحبني الصدره حاوطني بيده وهمس يم اذني

اسامه:: هسه خلينا نشوف صلافتج
- وخر ايدك هدني لا أصيح
- صيحي وخلي اخوج يشوفج بحضني.
- **** بحضنك
- أنتِ بحضني.
:-: فتحت عيوني مصدومه وهو يضحك
سحكت رجله برجلي حيل وما وخر يباوع بعيوني مبتسم ريحة عطره تغلغلت بداخلي بكل مره اشوف احس عطره يترك اثر مستحيل يروح..
- وين صفنتي
- ها وخر عني ريحتك خنكتني حتى عطرك يخنك
- همزين كلتيلي حتى اخنكج
:- رفع رأسه يباوع تجاه البيت التفتت رأساً اشوف منو كل ضني زياد شافنا بس مجرد التفتت قربني اله أكثر دفن رأسه بركبتي يستنشق عطري قشعر جسمي من قربه حسيت نفسي ضعت وتخربط وضعي كله
ردت ابتعد عنه بس ماسيطر على نفسي ملت راسي صفح وضميت وجهي بحضنه حسيت بدگات گلبي وگلبه لمني بحضنه أكثر
سكت ثواني مد ايده يبعد بقايا الشال عني مسد بيده على شعري وكال

تسرح عيوني بجمالك
عوّدتني من يسدَّ خلّة وصالك لو عفّتني
صبري بعدك مستحيل وأنت ناوي على الرحيل عوّدتني حلوة عندك كل صفة
رابي بأحضان الوفا ليلي يظلم لو طفى
وجهك المثل البدر طولك المثل الغصن
شمعة يشعلها الحسن...

- البحه والهدوء إلي بصوته تجبرك تسمعه هو يقرأ حسيت نفسي مرتاحه واني استمع اله ايده على شعري وأيده ثانيه لافه على خصري كمل القصيدة وسكت ضل حاضني كأنه يخاف ابتعد عنه مر وقت واحنا على نفس الوضع لحد ما دك تليفونه رفعت راسي طلع تليفونه مجرد شاف الإسم ضحك.

اسامه:: نسيت علي بسياره بره
فاطمه:: يا علي ؟
- ابن عمي جبته ينتظرني بره ونسيته وباب سياره قفلته حتى ما يطلع

- يااااا شلون تجيبه وياك.
- عوفينا منه خيولي المهم بديتي تتقبليني فواطم ؟
- اتقبلك ؟
- اي من حضنتج ما تصرفتي مثل كل مره ولا ابتعدتي
- لا بس ماردت اصيح خاف يجيب زياد اكرهك اني
- ضحك فرحان ليش مادري نزل رأسه باسني بخدي وگال .

أسامه:: احنا عكس العالم حتى بفترة الخطوبه حلالي انتِ
فاطمه:: لا تذكرني خليني ساكته
- راح اروح بيوم العقد اشوفج
- اي بعد لا تجي

::- غمض عيونه وهز رأسه منشنش رجع باسني مره ثانيه بخدي وراح ضليت ارقبه لحد ما اختفى شعور غريب بداخلي ما جنت اريده يروح شبيه اني خبله شغيرني هيج ؟
جريت حسره ورفعت حجابي على راسي والتفتت اريد أرجع للبيت بس وگف گلبي من شفت............

ـــــــــــــ⊰ ـــــــــــــ

-: بعد أيام متعبه كدرت اتعود على غياب جوائح لا جذب لا تصدكوني بكلشي اتذكرها لأنها جانت شايلة كل المسؤولية صرت اعتمد على نفسي بكلشي بس حتى ما احتاج احد بس مع مرور الأيام والأشهر لاحظت اختي تغيرت وبدل ما تكونين قريبة منا بعدت عنا حزت بخاطري تصرفاتها حاولت ما افكر بشي بس ماكدرت طلعت من غرفة الرسم ورحت الغرفة اخواني أول ما فتحت الباب لگيتهم مجتمعين يسولفون بصوت ناصي مجرد شافوني سكتوا .

وهجَ:: شنو تحجون ؟
ايڤار:: ولا شي مواضيع تخص الشغل.
- جذب لا تجذب كلولي شنو تحجون يلا.
ايان:: والله موضوع عادي لا تخلين بالج.
علي:: اي صحيح خلي بالج

::- ضربه على ركبته ايان بشقة وضحكوا بيناتهم طفر علي تمدد على جربايته وگال.

علي:: بعد ما بيها مجال اريد انام صوت ماريد حجي على فلان وعلان ماريد كافي من صبح لسه تحجون على زوج اختكم عيب عليكم.
- كمل كلامه وغطه راسه يتفادى ضربة ايان عرفت قصده جانوا يحجون بفرات قبل لا اجي.

وهجَ:: شبي فرات ليش تحجون عنه ؟
ايڤار:: مابي شي بس تصرفاته متغيره من يوم ما تزوج وايهاب گال راح تتندمون لان انطيتوها اله وكاعدين نربط ونشوف شنو السالفة..

ايان:: فرات خوش رجال بس مادري شبي إني اعرفه من سنوات.
وهجَ:: كومه ملاحظات على فرات وما مرتاحه اله ولو صارت مرته جوائح بس امانه الله إذا صار شي بالمستقبل لا سامح الله أريدكم تكسرونه تكسر..

علي:: بالخدمة احنا وبعدين ما كتلج ح....
:- قطع كلامه دخول أسامه للغرفه باوع النا وگال
أسامه:: شنو تحجون.
وهجَ:: شعليك واحد مايكدر ياخذ راحته بيته
- لا مايكدر وانتم يا غمان اختكم تحجي عليه وساكتين.

ايڤار:: وهرش شكوت حجت عليك
- ذاك اليوم دكلي تگبسل
- ايباخ صار الها اشهر من كتلك هسه ذكرتها

::- خزرنا ايان انلطمت على حلگي وسكتت
كعدت يم ايڤار وهمه يسولفون بيناتهم.

أسامه:: وسام يختفي ويرجع
علي:: مثل عمي فاضل
::- التفتت اله اسامه وگال.
- عمكم فاضل موجود بغير محافظه بمكاني وبس أروح إني يرجع هو..

::- صفنوا اخواني كأنهم فهموا شي هو يقصده وارجعوا التفتوا الي يشوفون ردة فعلي..

وهحَ:: ليش تباوعون هيج ؟
ايڤار:: حرام يباوعون شبيج حبيبتي تعالي خلينا نطلع بره..

::- سحبني من ايدي وطلعنا للحديقة أخذني للمرجوحه وهمس.

ايڤار:: اصعدي
-: بدون تردد صعدت واني اضحك قبل لا يدفعني صحت بصوت عالي.

وهجَ:: لااا تدفعني حيل
- فهمت بس صوتج.
::- صار يدفعني بهدوء والدنيا ليل حسيت براحه نفسيه إلى أن گال.

ايڤار:: اجيتي علمود تحجين ويانا علمود جوائح ؟

- شلون عرفت
- عرفتج المهم شنو ردتي تحجين.
- مادري بس مزعوجه لأنها متغيرة.
- لا ما متغيرة بس كلشي إله سبب اني اعرفها زين ما تتغير هي بس عدها سبب قوي يخليها تبتعد لدرجة خلت الكل يعرف هيه خارج بغداد
وهيه من الأساس موجودة غيروا مكانهم بس عدها شي برأسها

- احلف زين شمدريك ؟
- اعرف كلشي بس مغلس أريد اشوف شنو راح تسوي
- مكانهم وين ؟
- لا ماكلج لان هسه الگاه يم رحمه.
- لا ما احجي
- لا ماكلج
- عيب عليك اني توأمك وما تحجي إلي
- لا مو عيب
- ذكرتتتت
- دخيلك ياعلي شنو ذكرتي
- جَلنار
- شبيها نعلان
- لا تغلط عيب شبيك شادها وياها ؟
- تدري بروحها تسوي غلط وما تنطي بنفسها وراح تتندم بعدين اعرف قذارة هذا الشخص الي اطب وتطلع وياا واذا احجي العمامي راح يسون مشاكل و الحجي وياها بدون فائدة..
- إلي عليك سويته عوفها مادام ما سمعت كلامنا ولا اهتمت بعد ما ندخل تتحمل نتائج أخطائها بنفسها..

::- التفتت إلي يباوع بنظرات غريبة اكدر افهمه من عيونه بس هاي المره ماكدرت افهم نظرته
نزلت كعدت بصفه حطيت راسي على كتفه لف ايده عليه حاضني الصدره بقينا حوالي ساعه وكل واحد راح الغرفته وضلينا هيج طول الأيام دراسه نوم تفكير إلى أن اجه هذاك اليوم الي گلب حياتنا كلها..

-: اقترحوا نروح للبستان او مزرعة نبقى هناك يوم كامل دخل الشك بگلبي بسبب هذا الاقتراح بس شفت البنات فرحانات وابويه واخواني وعمامي ويانا گلت ما راح يصير شي وطول الطريق أحس خنكة بصدري امي وابويه يسولفون بيناتهم واني عيوني على طريق التفتت عليهم وگلت.

وهجَ:: گلبي يوجعني
- شبيج بابا متضايقه من شي ؟
- لا بس مادري.
علي:: هسه بس نروح هناك تغيرن جو
نيرمين:: والله حتى گلبي يوجعني.
::- ضل يضحك بيها علي ويشاقه وياها ومجرد وصلنا دخلنا للبيت إلي كعد والي طلع رأسا شمرت أغراضي وكعدت بصف رحمه جانت تكتب رساله الجوائح سدت تليفونها وگالت.

رحمه:: وسام گال فد شويه ويجون.
::- ابتسمت إلها وضليت مگابله زهره وكاعدة
طلعوا اغراض الشووي وبلشوا يشون بره كمت يمهم ورحمه تفتر بتليفونها وسام كذالك ضلت عيني تراقبهم ثنينهم متوترين ..
اخذت نفس وتمشيت غفران وراجح يحجون وهيه منفعلة واستبرق وايان يساعدون ابويه وامي للمغرب كلش وي الاذان اجه اتصال تليفون ابويه صاح على استبرق وگال.

محمد:: شوفي منو يتصل.
::- ركضت استبرق طلعته من جنطة امي وگالت .

استبرق:: حمزة يتصل عمي.

:- مجرد نطقة اسمه طفرت من مكاني بسرعة وبنفس الوقت علي وايڤار بحيث ضلت فاتحه عيونها مصدومه بينا .

محمد:: اوكفوا شبيكم ايان كوم رد انت
::- وفعلاً أخذه ايان واحنا لحگنا نسمع شنو يحجي اول ما فتح خط كال ايان.

- ها حمزة.
- بنفس الحظه عاط بصوت عالي.

حمزه:: وينكمممممم انتمم ما دكلولييي من شوكت اتصل عليكم اني ؟؟

ايان:: وسم شبيك تصيح قافلين تليفونات.

- *** بساعة سوده إلي خلتكم تقفلونهم تعوف كلشي بيدك تروح المستشفى***** بسرعة ايان بسرعة .

- شبيك صاير شي وياك لو امك بيها شي ؟

حمزه:: لا عوف الحجي ايان جوائح دعموها .

::- بس نطق آخر كلمة شهكت بصوت عالي على صوتنا الكل التفت ايان على ابويه وگال .

ايان:: مو كتلك سالفتهم مو خالية داعميها ...

::- بس كال هيج ابوي شمر إلي بيده فهم قصد ايان بسرعة طلعوا ابويه واخواني كلهم يركضون باوعت على امي إلي بعدها ما فهمت شي ردت احجي بس صاحت زهره لزمتني رحمه من ايدي وگالت .

- شصاير احجي شبيها ؟
وهجَ:: كالو جوائح مسويه حادث

::- صوت عياط امي واكفه كدام سلمان وزهره وتحجي بحركة عمامي وسام كلهم راحوا محد بقى ركضت رحمه اخذت سويج وگالت الستبرق.

رحمه:: عينج على غفران وأنتِ يمه عينج على عمتي نيرمين وتعالي وهجَ .

::- سحبتني من ايدي واني امشي وياها دموعي عشره عشره ما كدرت استوعب شي
رحمه تسوق بسرعة وتدعي فصلت عنهم الخوف ياكل بگلبي حسيت الطريق شطوله دنيا طلعت من عيني اتصلت رحمه على علي ما رد عليها بمجرد وصلت للمسشفى لمحنا عمي فارس واكف يحجي وي اسامه بس شافونا صاحوا ثنينهم.

- شعدجن چايات
رحمه:: اختنا جوه وچايات
::- دفعت اسامه وسحبتني لحگنا عمي فارس مشى كدامنا يأشر النا

::- صاروا كدامنا ايان وابوي واكفين عيونهم دم بجهة ثانيه فرات ملابسه كله دم ويباوع على حايط واخو بصفه علي وايڤار مالهم وجود

::-, عافت ايدي رحمه وراحت يم ابوي تحجي ويا ضليت واكفه بعيد اخاف اتقرب اخاف تروح مني رفع عينه ايان باتجاهي عيونه تحجي الخوف إلي بي هو كال شي ابوي الرحمه بحيث ضربت أيدها بقوة وكالت.

رحمه:: أربع ساعات وما خابر احد يكله ؟
::- التفتت على فرات.
- اذا من أربع ساعات وين جنت ليش ما اتصلت علينا ؟

::- ما انطى ردة فعل وبقى يباوع على حايط اشر الها وسام تسكت وهيه أعصاب صايره.

رحمه:: خلي يحجي شلونها اريد اشوفها..
وسام:: طلعوها من العمليات للعنايه المركزة شنو تشوفين منها وصوتج رحمه.

- عمليات ؟
- اي وهسه بالعناية بس رحمه للكائنات صوتج
::- مسحت دموعي ورحت الها وكفت بصفها جسمها كله يرجف من العصبية تباوع على فرات بكل حقد لو بيدها تموته كعدت على كرسي أيدها على رأسها واني مركزه عيني على ابوي وأخوي دقيقه وطفرت رحمه كأنها ذكرت شي..

رحمه:: الطفل مابي شي ؟ احجي
ايان:: رحمه كافي حالتها تعبانه والطفل ميت..

:- لزمتتها من أكتافها كعدتها مكانها وهمست.
وهجَ:: كلنا خايفين بس لا تسوين هيج.

رحمه:: باعي اله هذا شكل واحد مرته بالعنايه وابن ميت وين اكو طفل يموت وهيه بنهاية السابع مفروض يصير عدها ولاده مبكره .

- سابع ؟
- اي سابع اسكتي بعدين افهمج ابقي هنا دقايق واجيج..

::- حجت كلمه وي ابوي وطلعت هي ويا ضلت عيني على فرات من اجينا لحد الآن ما تحرك بس راح ابوي ورحمه كام من مكانه وراح
دقايق ورجعت رحمه وياها ممرضه

- راح أدخل اشوفها واطلع ادخلي ورأي انتِ.
وهجَ:: لا ماريد إني خلي ايان.
:- هزت راسها ودخلت ضليت لازمه گلبي بيدي خفت أدخل واشوفها بحاله سيئه..
ايان وكف بالباب ينتظر رحمه تطلع وفرات اختفى ربع ساعة ورجع بهل الاثناء حتى ايان دخل ورحمه ما حجت شي ولا نطقت بحرف ..
بس طلع ايان كام فرات يريد يدخل دفعه ايان من صدره وگال .

- هيه هاي الامانه ؟
- بنفس الطريقة دفعه فرات راد يحجي بس لزمه وسام وأخذه يطلعه لان العالم إلي بالمستشفى كلها تباوع علينا..

- شبي ايان ليش هيج
رحمه:: وضعها ما يتسولف عدها نزيف داخلي حاد لا سامح الله احتمال تدخل غيبوبة.

- ليش تحجين هيج هسه يومين ترجع احسن من قبل.

::- ضغطة على ايدي بكل قوة احاول الزم نفسي باوعت على ايان حالته ما تتفسر ايان لازمته البچيه بس مايكدر يبجي لو اخواني ويا هنا چان سندوا بس وينهم همه
رحت كعدت بصفه لزمت ايده ضليت بصفه كاعدة والوقت يمر عگبت ساعة عشره بليل وطلعوا بره رحمه طلبت منه يبقى بالحديقة واني وهيه ضلينا كاعدات صفنت وگالت .

رحمه:: ماكو ولا واحد اجه ليش ؟
وهجَ:: مادري بس خاف ابوي ما يقبل ؟
- أبقي هنا دقايق واج......

::- قطع كلامنا ايڤار وهو يمشي أشر النا نكوم من مكانا بدون تردد كمنا بسرعة دخلوا ورا ثنين شرطة وكفهم يحجي وياهم وياشر على غرفة جوائح بعد ما خلص مكانه اتقدموا وكفوا بصف الباب تماماً .

ايڤار:: تعالن انتن
رحمه:: ليش الشرطة ؟
::- مسح على لحيته وگال .

ايڤار:: الحادث الصار محاولة قتل مو حادث عابر وما استبعد يرجعون يحاولون مره ثانيه انتن ترجعن للبيت لان الشرطة واني وأشخاص ثانيه كلهم موجودين وعيب توكفن يم زلم .

رحمه:: نرجع بس منو يبقى يمها إذا كعدت ؟
ايڤار:: ضابط شيلان يمها إذا كعدت لا تخافون.

::- وفعلاً بس كمل كلامه طلعنا ويا لبره لمحناهم موجودين كلهم فتح باب سياره ايڤار وهمس .

ايڤار:: اعتبريها آخر ليلة البيت سرحان وجلابه.

رحمه:: همه السبب ؟
- اي اثنين س منهم واكو اتفاقية وجدج يدري بيها وراح تتحرك البيوت حرك..
رحمه:- عساها تحترك بدنيا والاخره.

::- همه يحجون واني عيوني على فرات انتبه الي وسام رأسا درت وجهي عنه صعد شخص غريب يسوق السياره لا اني حجيت ولا رحمه لحد ما وصلنا البيت الكل موجود بصاله ويريدون يعرفون الوضع عفت رحمه تحجي ورحت الغرفة امي أول ما فتحت لباب شفتها نايمه والكانونه بيدها شلت المغذي وطلعت
صعدت اسحل بروحي سحل شايلة هموم الدنيا كلها سمعت صوت شخص يحجي من صوته عرفته اسامه بس لفت انتباهي كلامه..

اسامه:: ساعتين اروح وارجع الكم اي بالموعد إلي اتفقنا علي شنو الي يصير خلي يصير سنين واني اريد اعرفه وطلع بنصنا طول هاي السنين..

::- نهى كلامه وسد المكالمة طلع من الغرفه بيده سلاح ولاف الشماغ على وجهه اول ما وكعت عينه عليه نزل الشماغ وگال .

اسامه:: رجعتي ردت اجيج للمسشفى
وهجَ:: ليش لابس هيج وشعندك چاي.

- اريد اروح ومادري شكد اطول واحتمال ما ارجع بعد فاطمه امانه عندج بداعة عزيز گلبج لا تعوفيها وحدها

- عيوني الها روح اسامه بأمان الله.
::- لمعة عيونه كأنه جان يريد يحجي أكثر بس ماكدر حط كف ايده على راسي مبتسم وراح كل خطوها يخطيها ادعي اله يرجع الها سالم...

::- سلمان ما طلع من بيته لا عمامي ولا اخواني ولا احد موجود غيرنا يومين وثالث يوم الفجر صار هوسه بره ورمي قوي بس كل الأصوات العمامي دخلوا كلهم يضحكون شافهم جدي كعد على قنفه روحه رايحه كالت زهره

- شسويتوا ولكم تردون تموتوني ؟

حسين:: حجية افرحي خلصنا منهم واحد واحد.

علي:: اي زهيره حركنا البساتين وخليناهم يطلعون للبساتين حركنا بيوتهم وحلالهم كله فوك هذا كله ولد سرحان الاثنين كلهم شالتهم الدورية وابن امه إلي يوكف ويضر شخص واحد من اخوتنا او عائلتنا..

::- لطمت على صدرها وسلمان بس سمع كلامهم تخربط وضعه وكل ولده باعووا علي وكالوا بنبره وحده.

- سنين وانت تبهذل بينا علمود اخوتك نفسهم الي غدروك وكتلوا حفيدتك نفسهم الي تتفق وياهم علينا هسه خليهم يفيدونك من اليوم كل واحد بينا يعوف البيت الك ويطلع وخليك انت يابه خطط حتى توكعنا من جديد..

::- كلامهم خلانا فرحانين لان أخذوا حگ جوائح وزياده وبنفس الوقت توقعنا كلامهم مجرد حجي عابر بس مع مرور الأيام عمامي وأبوي اتفقوا يشترون بيوت بنفس المنطقة حتى يكونوا قريبين كلهم ملتهين بموضوع البيوت سلمان تغير وضعف هواي وكلهم بعدهم يحجون ويا بس اعتابهم اله هد حيله ويستاهل محد وصلنا هاي المرحلة غيره ابوي اختفى ايام وخلال هاي الايام جنت اريد اروح للمسشفى بس محد يقبل ولا حتى امي خلوها تروح إلى أن بيوم من الأيام دخل علينا ابوي.
باوع على عمي حسين وگال .

محمد:: ابنك موقوف على ذمة التحقيق بتهمة القتل..

::- رفع راسه عمي وگال .
حسين:: سوواها اسامه
محمد:: ياغضب من 3 الى 15 سنه ينحكم ماريد ابنك شنو فرقك عن هذوالك..

:: رأسا كامت رحمه من مكانها سحبتنا كلها وكالت.

رحمه:: كلجن اصعدن فوك ولا تنزلن..
:- صعدوا واني وراهم ضل براسي كلمه جان يدري بروحه ما يرجع يعرف اذا راح بعد ما يرجع ذكرت فاطمه أول شي سويته فتحت تليفوني اتصلت عليها مره مرتين ما ترد دزيت إلها رساله وطفيت تليفون البيت جان عباره عن عياط ومشاكل محد نزل ولا احد أكل ضلينا فوك وهيج مرت الايام ويوم عن يوم نخسر شي بعد مرور أسبوع كامل قررنا استبرق تقنع ايان يأخذنا وراحت وكفنا ننتظرها تطلع طولت هناك ومن طلعت جانت ملامحها ما تتفسر قبل لا تنطق بحرف واحد كالت غفران.

- وجهج اصفر مصيبه جديدة مو ؟
استبرق:: مو مصيبه بس مادري شحجي.
وهجَ:: احجي
- ايان يكول قبل يومين طلعوا جوائح خارج العراق بدون علم احد حتى فرات ولا شخص يعرف وين أخذوها بس عمي محمد ..

:-: ضليت واكفه بمكاني مصدومه بكلامها حسيت نفسي داخله بمتاها صعب اطلع منها
طلع ايان من الغرفة التعب والحزن طاغي على ملامحه وكأنه بدون روح اتقرب منا وگال .

ايان:: ماريد احد يعرف ولا تحجون الأحد كأنكم ما تعرفون شي وانتبهو يوصل الحجي الفرات

وهجَ:: زينه هيه مو عليك العباس كول زينه ؟
- زينه لا تخافين بس داخله غيبوبة
بأذن الله تصير زينه وترجع النا بخير وسلامة.

:-: ما تحملت أكثر غصب عني بجيت بصوت عالي حسيت الشهكة تطلع من صدري لمني بحضنه ايان يمسد بيده على ضهري.

- يابعد روح اخوج لاتبجين.
:- ما اهتميت الأحد بس صوت البجي مسموع ومو بس إني كلهن يبجن ورحمه حاضنتهن ابنها وهيه كلهن بيوم واحد كل ما اذكر شي ابجي أكثر إلى ان حسيت بحركه بعيوني رفعت راسي عن صدر ايان مسح دموعي بيده وگال..

ايان:: يلا كافي ودموعج بالات قميصي.
: ابتسمت شبه ابتسامة وكمت باوع على رحمه وكال.

- خليج يمهن خليني اروح وي الولد نشوف شصار على موضوع أسامه..

رحمه:: ماعنده غيركم لا تخلونا وحده روحوا.

ايان:: محد يخلي وحده حتى ابوي ادخل وخله ايفار يلزم التحقيق وان شاء الله خير..

::- كمل كلامه والتفت باسني براسي وباس راس استبرق همس الها شي وراح التفتنا وحده تباوع بوجه ثانيه تربعنا بالكاع وهمست

رحمه:: جوائح حامل قبل العرس.
:- شهكة استبرق وغفران أما اني ما انصدمت لاني اعرف كلشي إلا حملها ما كالت عنه..

استبرق:: شلون ؟
رحمه:: شني شلون من كل عقلج تحجين ؟
وهجَ:: فرات بيوم إلي اخذها للبيت تشوفه مشربها شي مخدر منوم ماعرف بس كالت من كعدت حسيت بوجع قوي بطني وضع ملابسي وشكلي كله مو تمام وجانت شاكه بس مادام كلتي حامل قبل العرس معناتها شكها بمكانه

رحمه:: دقيقه دقيقه ما كالت الي هيج هيه ؟
وهجَ :: بس إني كالت الي وحتى ردت انتقم من فرات على طريق اخو بس ما اجتني فرصة..

غفران:: اكلجن شغلة

::- بنص صدمتنا التفتنا على صوت غفران الي تفرك بيدها وعيونها بالكاع.
- شسمه مره طلعت للحديقة وفرات جان يحجي وي وسام وسمعت وسام يكله اذا جوائح تدري بيك متزوج تذبحك.

- اوكفي متزوج ؟
- أي وحده ثانيه غير جوائح وقبلها هم.

استبرق:: هستوج تحجين صدك جذب ؟
رحمه:: ليش ما حجيتي من سمعتي
- خفت يصير مشاكل وسكتت..

::- ضربت على رجلها رحمه وكالت.
- لو حاجيه لو كايلة جان ما صار الي صار هسه حتى ما تتزوجه لو عرفت

استبرق:: قبل العرس بكم شهر فرات يطب ويطلع وي سلمان وبيوم وليلة قرر يسون العرس بسرعة اكو ربط بسالفه اكو شي والله

رحمه:: تذكرون كلام زهره عن فرات وايهاب ؟
- اي
- هسه يطلع فرات تزوجها عناد بأيهاب وكلشي من البداية جان مخطط اله هو لان ولا شي طبيعي ابد.

استبرق:: مرته الاولى منو ؟

- اني اكللكم منو..

::- التفتنا على صوتها منتجيه على محجر وعيونها تفتر علينا وحده وحده.

استبرق:: شجابج انتِ
كوثر:: احجي عدل تره والله ما احجي
رحمه:: كوثر عندج شي تحجي نسمعج ماعندج روحي وخلصيني..

كوثر:: فرات يحب جوائح من طفولة وجان يحجي الايهاب دائماً عنها واكو شغلة جان يريد يسويها وفرات خربها كام ايهاب يتقرب من جوائح ويحجي وياها وطلعوا كم مره سوه وشافهم فرات صارت الشغلة مو حب لا عناد كأنها شي وياهو يوصل اله أول شي يأخذه وهذا كله سولفته الجدي بس فرات حجه ويا وكاله اريد اتزوجها وجدي شرط علي يتزوج وحده والي هيه ايات بنت اخو سلمان وبعدها يكدر يتزوج جوائح وفرات وافق وبعد ماعرف شصار بس آخر مره اجت شوفتنا صور العقد واكو شي ثاني شرطه جدي ولازم فرات ينطي اله بس والقران ماعرفه..

رحمه:: واذا طلعت جذبه منج؟
كوثر:: إلي عندي حجيته وماعندي هدف حتى أخبث عليكم لان ايهاب وخطبني الباقي مو مهم بس وداعة ميلا ما جذبت بحرف واحد عرس جوائح والي صار من البدايه جان مخطط انتقام او أشبه بالمراهنه تراهنوا عليها وفرات فاز.

:- طفرت استبرق تريد تحجي لزمتها غفران اما اني طفيت التسجيل وحفظته كلامها مسجل كله راح يفيدنا متأكدة ..

رحمه:: ايا ك*******
::- فشرت عليهم وعضت اصابعها ندم
دزيت رساله الوسام ونسخت التسجيل دزيته على تليفون رحمه وتليفون جوائح ماكو نت عدها بس حفضته كلشي يصير...
ساعات او وسام ما رد ولا فتح اساسا طول الفترة الفاتت ما رحنا للدوام لهذا اريد ادوام حتى اشوفه اذا ما اسحل كرامته هو وأخو اطلع صخله.. وهيج مر شهر ثاني واحنا ماعدنا خبر عن جوائح الكل عرف بيها ما موجودة بالمستشفى وأبوي گال .

محمد:: اني اعرف مصلحتها وشنو الزين او المزين وطلعتها من العراق افضل شي سويته الها..

::- محد علق بس ولا واحد راضي على قرار ابوي تقريباً راح يكملون البيوت ونطلع من هذا البيت رحمه أنمار ايڤار الكل باختصار يحاولون يطلعون اسامه بس هو أعترف بنفسه انو قتله والصدمة إلي قتله اسامه هو ابن يحيى اخو ايات فاطمه ماكو خبر عنها ولا تتواصل وي احد نهائيا وبسبب الغياب المستمر عن دوام قررنا ناجل هاي السنه كلنا بدون استثناء لان حتى لو دوامنا ماراح نركز جريت نفس وطلعت للحديقة يم استبرق وغفران

وهج:: شنو تحجون!
استبرق:: باجر محاكمة اسامه وخايفين علي.
- مادام كلهم ويا لا تخافين أن شاء الله خير..

غفران:: بعد شغلة سمعت من عمي محمد يكول الزهره ماكو أمل يطلع بس اذا كدرنا نحول القضية دفاع عن النفس احتمال مو اكيد يطلع منها او يتحاكم بزايد خمس سنوات..

وهجَ:: عزااا لا أن شاء الله يطلع خطيه فاطمه ما تنهت بخطوبتها

استبرق:: على طاري فاطمه مالها لا حس ولا خبر معقولة لسه ما تعرف..

- لا تدري وحالياً مو بيت أهلها بيت اسامه.
:- التفتنا على صوته ماكدرنا نخفي ابتسامتنا .

غفران:: عمو فاضل.

::- رحت حضنته هو يضحك سلمنا علي باوع على حديقه وگال .

فاضل:: البيت احسه اضلم بدون جوائح ورحمه.

استبرق:: عوفهن هسه وكلي عمي شنو بيت اسامه ؟
فاضل :: قبل اسبوع تواصلت وياي وطلبت مني عنوان بيت اسامه ما انطيته بس كالت شغلة محد يعرف بيها غير اسامه وهو موصيها عليها طلبت الاذن من أخوها واخذتها ومن ذاك اليوم هيه هناك موجودة وأخوها يروح يشوفها واكو امن باب البيت....

- زين عمي تعرف جوائح شوكت ترجع ما كال الك ابوي ؟
فاضل:: ما كال بس اخذيها من هذا شارب اذا مو سنه او أكثر ما ترجع لان بعدهي فاقدة واكيد من تكعد تحتاج علاج فيزيائي راح اطول كلش هواي بس النتيجة نفسها شكد ما غابت آخر شي ترجع

وهجَ:: وبين ما ترجع لازم نخلص من هاي الحثاله كلها

فاضل:: بفترة بسيطة خلصنا منهم واحد واحد وهسه اجيت أكول الأبوي اخوك سرحان اجته جلطه سكتته بمكانه...

دارت الدنيا كما تدور دائمًا لا تُبقي سرًّا في الظلال ولا تترك حقًّا ضائعًا إلى الأبد.
ما خُفي طويلًا بدأ يطفو على السطح وما حُورب بالصمت عاد لينطق بالحقيقة...
فالقادم ليس إلا وعدًا بأن الحقّ مهما تأخّر لا بدّ أن يظهر

ـــــــــــــ⊰ ـــــــــــــ