جوائح الدهر الفصل الرابع وأربعون 44 - بقلم دعاء رزاق

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

تجيءُ الجوائح كالريحِ عاتيةً
تهدُّ بيوتَ الأحلامِ في غفلةٍ
وتنزعُ من القلبِ سكينتَه
كأنها امتحانٌ لا مفرَّ منه

لكنها رغمَ قسوتِها
تُعلِّمُ الروحَ أن تنهضَ من الرماد
وتُشعلُ في العيونِ بصيصَ أمل
لتُخبرنا أن الظلامَ لا يدوم
وأن وراءَ كلِّ جائحةٍ
ميلادُ فجرٍ جديد

ـــــــــــــ⊰ ـــــــــــــ

عيوني تفتر عليهم واحد واحد ما شفته بينهم
انسحبت بهدوء حتى محد ينتبهلي مشيت اخذت اكل اله وطلعت ما لكيته بالحديقة خليتهن على كرسي ورحت مديت رأسي من الباب اصيح اله

غفران:: راجحح
::- فتح باب سيارة يباوعلي اجه بسرعة باتجاهي ويحجي بخوف

راجح:: صار شبي بيكم شي ؟
- لا ماكو شي بس جبتلك اكل

::- باوع على ساعة البيده وگال

راجح:: هذا الجحش ماراح ؟
غفران:: لا ما راح يحجي وي عمي محمد
::- مشيت كدامه شلت صينيه جاب طبله خشبية خليت الاكل عليها والتفتت أريد اروح همس

راجح:: تعالي غفران اكلتي ؟
- اي اكلت
::- نزل عيونه يباوع على جسمي خزرته

غفران:: عيونك افكسهن راجح
- استغفرالله ضعفانه وادري بيج ما تأكلين دجاج شلون اكلتي ؟

- اكو اكل من الغده اكلت منه اكل انتَ
::- بلع ريگه دنگ يباوع على الاكل ماكو احد موجود ويا لان كلهم كاعدين يسمعون جدي سلمان التفتت بكل جسمي مشيت باتجاه كعدت على كرسي ثاني حطيت ايدي على خدي

غفران:: هسه كعدت اكل انتَ
::- هز راسه مبتسم اكل واني صافنه ادري بي ما يحب يسولف من يأكل بس حسيت خطية كاعد وحده! رفعت أكمام دشداشتي الجروح البيدي متقشره توجعني إذا تحتك بملابسي درت وجهي اباوع على حديقة

ما تخطيت فكرة وفاة فرات ولحد الان انتظر يرجع شنو اليقنعني ما يرجع بعد..

::- حسيت عيوني حركتني حاولت ما ابجي
درت وجهي عليً لكيته يباوعلي رجع دنگ ياكل غريبة هذا الإنسان نفسه بيوم من الايام

چنت احجي فوك رأسه ساعات وهسه ماعندي طاقة احجي كلمه وحده وياا
خلص راح يغسل واجه فتح سياره طلع منها علبة صغيرة اتقرب مني گال

راجح:: هذا مرهم عشبي حطي الوجهج وايدج مكان الجرح بس

غفران:: لا مايحتاج عندي
راجح:: أخذي غفران بدون نقاش
::- أخذته منه لان شكله مو مال واحد يتعارك ويا واضح شكد تعبان انتجه على كرسي ساكت من ردت اكوم گال

راجح:: غـفـران
- هـا
- صح كـبرتـي وتغيرتي بس نظراتج وحركاتج ماتغيرت بعدج هذيج طفلة

- لا غلطان تغيرت لا نفس الطفلة الربيتها ولا نفس المراهقة الحبتك صدكني اني اليوم انسانه ثانية..
وتدري شغلة تصرفاتك بالكلية وياي او حركاتك وي هذيج الما تتسمى جاي تمحي كلشي بذاكرتي الك ..

- تكرهيني ؟
- من يوم الرحت
- ما فكرتي ممكن يكون عندي سبب ؟
- ماكو سبب يخلي الإنسان يسافر بين يوم وليلة وياريت حاجي انت رحت بدون وداع حتى.
- خلي الموضوع هذا على جهة جاوبيني على شغلة وحده نفرض شخص عزيز عليج وتشوفينه بحاله تعبانه ومريض ومو مرض عادي
- مرض شنو ؟
- مثلاً ورم تتحملين تشوفينه بهيج وضع ؟
- لا اكيد مادام عزيز عليه فـ صعب اشوفه هيج
- توقعت.
::- ابتسم ابتسامة غريبة ما فهمت شنو قصده طلعت من صفنتي على صوت تليفونه أخذ سياره ايڤار وطلع بدون ما يحجي أي كلمة بس ملامحه ما جانت تبشر بخير..

::- فتت جوه كعدت بصف اخواتي اسمع الكلامهم وساكته كامن للمطبخ واني وراهن مثل ثولة حجاية منا وحجاية منا قنعتهم رحمه بموضوع الإنتقال خليتهن يحجون صعدت فوك دخلت يم طيبة سديت الباب كعدت يمها هي صافنه واني صافنه ردت اطلعها من صفنتها گلت

غفران:: باعي طيبة شنو رأيج تساليني ايشي واجاوبج ؟
- مالي خلك
- ميخالف سويلج خلك
- تأففت عدلت كعدتها
طيبة:: احجيلي عن الموجودين هنا ما فاهمه منهم شي

غفران:: تمام شوفي منين نبلش بالبداية سرحان منو اخوان؟

- سرحان ويحيى وبعد ما أعرف البقية
- سلمان كم ولد عنده ؟
- إذا هو متزوج اربعه نسوان اكيد عنده جيش

غفران:: مالنا علاقة بنسوانه عنده من زهره سبع ولد اربعه من هذولة الولد متزوجين بنات سرحان وحده منهم ام اسامه وثانيه ام كوثر وثالثه امي ورابعة ام نمار

طيبة:: يعني امهاتكم اخوات

- اي بس وحده ما تحب ثانيه المهم بقت عد

سرحان بنيه وحده انطاها الجدي سلمان علمود يزوجها الواحد من عمامي بس واحد من أصدقاء جدي سيد خطبها وجدي علمود المصلحة قبل بين قوسين واحد يشمرها على ثاني بالاخير تزوجت السيد هذا وصار عدها ثنين ولد توام الي همه راجح وايهاب وبعد ما صار اي طفل عدها تزوج عليها وحده ثانيه وهي نفصلت عنه راجح بقى وياها وايهاب وي ابو بس بين فترة وفترة يجي يم امه وهي لا احد سأل عليها ولا رادت ترجع الاهلها ضلت يم اخواتها لحد ما توفت

اما اهل انمار زياد من زمان متوفين
وعمي محمد تزوج وحده غريبة ورا بفترة أبوي هم تزوج وحده غريبة وعافنا وراح يمها عاش بس لان جابت اله ولد وبفترة الاحتلال صار انفجار وماتت عدها ولد واحد وبنيه وحده وحالياً عايشين وي اكبر وحده من خواتي لان ما يصير عدها اطفال هي

طيبة:: كم اخت عندج ؟

- عدا رحمه واستبرق او جوائح عندي اربعه ثلاثة منهن متزوجات بحدود إيران والي من مرت ابويه اسمها سجى كتلج عايشه وي اختي جبيرة وبس

- ما سامعه عنهن ؟
- اي هنه رادن بس يخلصن من ضيم سلمان ما يجن كل فترة يتصلن على امي بس اجن بالفاتحة هنه الوكفن بيها.

- اها فهمت
- اي والخامس ابوج السادس ابو جَلنار جلب سلوكي
وآخر واحد عمي فاضل ثلاثيني لا ما متزوج بعده وخلصنا بعد ماكو

طيبة:: ايان وعلي وايڤار وحمزه او وهجَ اخوان
- اي

- وانتَ واستبرق ورحمه او جوائح والأربعة الباقيات اخوات
- اي بس جوائح مسجله باسم عمي محمد
- وانمار وزياد اخوان
- امم
- واسامه!
- عنده اخت وحده
- وكلهم ولد عمامي
- بضبط

طيبة:: وايهاب وراجح ولد عمتنا يصيرون ؟
غفران:: اي

- استوعبت هسه بس احس هواي احنا
- أي والله هاي رحمه او وهجَ راح ينتقلن هذا الأسبوع كل وحده تستقر بيت زوجها واقاربنها يطشرون راح يبقى البيت فارغ ماكو مشاكل الله

::- أخذني الحديث وياها ما خليت شي ما حجيته الها حتى عن دوام وغيرها اندمجت وصارت تسولف رغم عدها ألم قوي بس اخذها الواهس بسوالف ثاني يوم الكل راح البيته واني نازله اجيب ماي شفت ابوي وعمي محمد داخلين الغرفة زهره ورا دقايق سمعت صوت زهره تصيح العمتي انعام اجت وجها

مخطوف لونه استغربت اجاني فضول استمع بس كعدت ونجبيت امي اخذت رحمه او وهج للسوك يشترون احتياجتهن جوائح فوك وعهد يم ايان واستبرق اخذت الماي حطيته فوك

باوعت من شباك لحد الآن راجح موجود من البارحة وحتى علي أكثر من أسبوع وهو ما موجود ضل بالي يمهم

طلعت للحديقة جبت الماسحة والفتت اشغل الماطور لمحت كيس زباله مشمور مشيت اتقربت أريد اشيله اشمره بالحاوية بس مجرد تقربت منه لمحت اصابع ايد شخص طالعه منه وكلها دم سحبت الكيس صارت كدامي ايد بشرية مقطوعة من المفصل ومشمورة بحديقة بيتنا

صرخت بأعلى صوتي رجعت كم خطوة خايفة
واني اصرخ على إثر صوتي طلع ابوي وعمي يركضون رفعت ايدي أشر الهم واحجي

غفران:: ايدددد هااااااي مال بشر والله

::- سحبني أبوي يضم رأسي بصدره عمي محمد تغير لونه فاتح عيونه مصدوم طلعوا البنات من البيت ومن ضمنهم جوائح صاحوا عليهن يرجعن كلهن دخلن اله جوائح عندت ما ترجع يحجي ايان وياها وهي ماكو دفعته واجت

جوائح:: شبيج غفران ليش صرختي شكو ؟
::- عيونها تفتر علينا اتقربت كم خطوة تشوف شكو بس شافت المنظر عقدت حواجبها
كلهم انخطف لونهم والخوف واضح عليهم بس هي لا التفتت الهم

جوائح:: أخذوا غفران منا اخواني وين ؟

::- صفنت على اخر كلمه كالتها

غفران:: علي وارجح ثنينهم ما موجودين!!!!

::- ركض ايان يريد يتقرب لزمته جوائح تحجي

جوائح:: لااا تلزمها لا تمد ايدك وخروا كلكم منا
اني اتصرف

ايان:: ولج اخو ...

::- ما خلته يكمل كلامه حطت أيدها على حلكه تسكته خلتنا كلنا نبتعد عمي محمد كعد على كرسي حط ايده على رأسه مانطق بحرف راحت

جوائح فوك نزلت لابسه كفوف سوده صورت المكان من كل جهات طلعت تليفونها تتصل على منو مادري بس خلصت تصوير

اتقربت من ابوها تحجي ويا
واني مصدومة بوردها وشلوت ثابتة ولا خافت!

::- نص ساعة او اكثر سيارات الشرطة وكفت باب بيتنا اباوع من شباك قسم يحجي وي عمي محمد وقسم وي جوائح طولوا بالساعات
اجتي امي والبنات دخلوهن من الباب الخلفي دخلن يباعون بخوف بس شافتني رحمه كالت

رحمه:: شصايرر !!
::- التزمت الصمت ماكدر انطق حجت الهم زهره بس سمعت وهجَ توسعت عيونها

وهج :: يمه اخوووي

رحمه:: اسم الله لا تفاولن مو شرط واحد منهم
::- نزلت دموعي فعلاً خايفة عليّ ماعندي طاقة أخسر شخص ثاني ماكدر اتحمل غيابه تحملت أكثر من طاقتي بجيت بصوت مسموع لمتني رحمه بحضنها تسكتني وجَلنار تهدي وهجَ

::- صوت سيارات الشرطة اختفى دخل ايان وعمي فارس كعدوا ثنينهم وراهم ولد عمامي كلهم اجتمعوا بس محد منهم وجه يبشر بخير الخوف واضح عليهم

زهره:: دخيلك ياعلي ولكم يمه وأحد منكم ما شاف ايده ما عرفها ؟

زياد:: شنو ينفهم منها زهره كلها دم

::- دخلت جوائح خزرته ما راضية بكلامه تباوع علينا وگالت

جوائح:: صح لازم تحاليل بس متأكدة مو العلي ولا الراجح...

::- يحجون وياها وي مقتنعة مو الهم نحجي بكل سيطرة اخر شي گالت

جوائح:: الي يخليها بنص حديقة بيتنا يعني شخص من الموجودين هنا لان شكل الايد مو مال واحد شمرها والأهم مخلينها على ثيله يعني مو شخص غبي السوواها

::- تحجي وعيونها تفتر عليهم واحد واحد
رجعوا يلمون بيها ما راضين بكلامها رفعت أكتافها وهمست

جوائح:: هذا الموجود حتى أهلي مشمولين بالكلام ليش تتحسسون حبايبي عموماً بيها رسالة تهديد انتبهوا...

::- صعدت فوك وعيونهم وراها حسيت نفسي ضعت بكلامها خوفي من جهة وكلامها من جهة ورا شوي طلعوا كل ثنين سوه وتيلفوناتهم ما سكت لاحظت انعام ماطلعت من غرفة زهره رحمه تفتر علينا وحده وحده بليل رجعوا كلهم وما يعرفون همه وين والتحليلات تتأخر طفت الإضاءة امي وطلعت ضليت صافنه ودموعي تنزل وهجَ يم جوائح كمت اباوع من شباك محد موجود بره

نزلت أسأل ابوي إذا عرفوا شي بس قبل لا اروح الغرفته سمعت صوت حركة بالمطبخ رحت باتجاهه المطبخ شغلة ضوه تليفوني أشوف منو بس خليته بجهة ميز الاكل صار كدامي شخص صرخة بصوت عالي بس مو صرخة عادية صرخة مال وحده ميته خوف ورعب بسرعة اشتغلت الإضاءة مال مطبخ
صدت عيوني على علي وراجح الي ميتين ضحك ثنينهم شافوا نظراتي ونظرات عماتي واهلي الي اجو يركضون گال

علي :: الله بالخير
راجح:: إسفين على إزعاج

فارس:: أزعج كتلي
::- التفت يباوع على الكاونتر سحب الجفجير
- تليفوناتكم وينننن
راجح:: طفن من شحن
- طفن مو ؟
علي:: بس خلينا نتفاهم

::- رأساً ضربة على ايده يضرب بعلي ويرجع الراجح سحبتني رحمه من الله المطبخ تهمس

رحمه:: خلي يكتلهم يستاهلون تعالي نامي كافي طيحان حظ

وهجَ:: حيل عمي حيل اضربهم أقوى

علي:: خ**** بخوتنا اني اعلمج
:- اخذتنا رحمه فوك لمحت جوائح منتجية على باب غرفتها

جوائح:: مو كتلكم ؟

رحمه:: شاكة بشخص انتِ؟
::- هزت راسها بمعنى لا وفاتت للغرفة ثاني يوم ولد عمامي كتلوا راجح وعلي طلعوا الهم جلد جديد كلشي رجع طبيعي او وهجَ ورحمه كملن كلشي وطول الاسبوع ما شفت وسام او أنمار غير مره بس وآخر يوم بالاسبوع الصبح أخذوا الملابس للبيت وبليل طلعن من البيت طلعة عادية بدون ايشي وهذا اختيارهن زهره غصب خلتهن يذبن الاسود تحركة السيارات

وكفت باب البيت اباوع هسه مابقى غيري إني وجوائح!
جريت نفس بحسرة شلت عهد احجي ويا

غفران:: وين تريد تطلع ولك ضلمه

عهد:: اسوفن حليني ( خليني اشوفن)
- شنو تشوف ابن الحلوه راحوا بعد
::- فتت جوه باوعت على امي عيونها مدمعة وعمتي نيرمين كذلك اما علي وايڤار ما نزلوا من غرفتهم
::- صعدت فوك وعهد بحضني خليته يدفر الباب برجله دخلنا عليهم كل واحد مغطي راسه ونايم

عهد:: احنا اذينا ( احنا اجينا)

علي:: هلا بيك خالي روح الامك بعدين أشوفك
::- نزلته ركض على مكان ايڤار طفر على بطنه صاح يڤار متوجع

ايڤار:: خرب روحك علي
- ليش روحي خو روحك الخايس
- شبيك خالي مو نايم

غفران:: نايم شنو ابن اختكم تاج راسكم تلعبون ويا وانتم ساكتين ماعدنا زلم تغطي راسها بالبطانية وتبجي

::- مد راسه اسمه من باب الغرفة يحجي
اسامه:: يشهد الله عبالك واحد مركوع بوري وهذا ثاني مغطي راسه ضايج شني حبيبتك عافتك زلمه ز****

علي:: شوف شوف منو يحجي خريج السجون منو المكابل صورتها تذكر من اجيتنا اكلك شبيك دكلي مخنوك لان دكلك ابو شخابيط ؟ تذكر من كتلي.....

::- طفر اسامه يسد بحلكه

اسامه:: اسكت لا اشك راسك اسكت
علي:: تذك****

::- رجع يسد حلكه وعهد عباله يلعبون يطفر بنصهم كام ايڤار لزم علي واسامه يتعارك وياهم عفتهم وأحد يدفر ثاني وطلعت.

::- شفت جوائح كاعدة تكتب ما حبيت إضغط عليها ثاني يوم دوامت توقعت الگاهه وهجَ هناك بس ما لكيت غير فاطمة كملت يومي طبيعي رجعت للبيت هم الأوضاع تمام التمام اكلت ونمت ثاني يوم صادف عطلة اول ما كعدت صارت استبرق كدامي

غفران:: دخيلك ياعلي من صبح انتِ وبطنج شكو

استبرق:: وسم تروحين وياي للعيادة ؟

- يا عيادة ؟
- مال عمتي نيرمين نسوي سونار
- شوكت تروحين ؟
- اليوم العصر
- اروحن ميخالف بس ليش ما أخذتي أمي ؟
- يمعودة امي تهتم بزهره والبيت لازم يبقى أحد بي
- هاي هيه إذن العصر نروح

::- ابتسمت ورحت تمشي بطنها بطول وعرض كلش جبيره بحيث صايره قنينه مال غاز حتى رجلها مورمه الكل جان يكللها حامل بتوأم

للعصر أخذنا ايان للعيدة دخلتنا السكرتيرة بس شافتنا قلصت عيونها استبرق تهمس

استبرق:: هاي منين عرفتنا ؟
ايان:: تعرفني لان دائماً اجيب امي اذا سيارتها عطلان

- اها هنا الحجي وخر منا خليها تشوفك تشبع منك ابو نسوان صوجي أخذتك حسبي الله ونعم الوكيل على ظالم

::- التفتلي يباوعلي بمعنى شسوي
اشرتله اسكت ما رد ضل ساكت وهي لحد ما دخلت للغرفة تحجي بس شافتها عمتي ضحكت

نيرمين:: أهلاً وسهلاً بأم حفيدي.

استبرق:: عمه صدك جذب ما حبيت هاي سكرتيره جنها انعام

نيرمين:: تعالي خنسويلج سونار بعدين نتفاهم بهذا الموضوع

::- سلكت الها خلتها تصعد بس بلشت تسوي سونار ايل
ايان لازم ايد استبرق وعيونه تفتر عليها وعلى شاشة ابتسمت وهي دكول

نيرمين:: بسم الله ماشاء الله الأول بنوته ثاني بنوته
ايان:: توأم !
- توأم ثلاثي ثنين بنات وثالث مو واضح
::- توسعت ابتسمت ايان واستبرق تباوع على شاشة التفت تباوع على ايان تشوف ردت فعله بس شافت فرحته دمعت عيونها قبل لا ينطقون أي حرف

صار صوت نبض واضح عيوني عليهم لازم أيدها بقوة همسلها

ايان:: مو ردتي يجيج ولد واني ردت توأم بنات رب العالمين رزقنا بالثلاثة سوه

نيرمين:: منو يكول الثالث ولد
ايان:: متأكد ولد
نهى كلامه طبع بوسه على جبينها

ابتعدت عنهم بس كملنا طلعنا من العيادة راح للصيدلية يجيب العلاج وكف كدام صيدلية فرات نزل دخل الها لمحت اكو ولد بداخل الصيدلية جاب العلاج صعد بسيارة التفتلي گال

ايان:: شايفه هاي صيدلية بالمستقبل راح تشتغلين بيها

غفران:: منو كال ؟
- فرات كال الي من سنتين وأكثر

استبرق:: شكال ؟

- كال الصيدلية هاي بس تكمل غفران تشتغل بيها واطيبة اذا طلعت صيدلية كذلك تشتغل بيها..

::- ألتفت اباوع عليها لا إرادياً دمعت عيوني
فكر بكلشي يخصنا بس ما فكر بنفسه.

اخذت نفس عيوني على طريق حاسه بضياع ماله نهاية استبرق أخذت التحبه ورحمه رغم كل الظروف كدرت تأخذ محبوبها وسام كذالك

أغلبنا نعرف جان يحبها من زمان بس الواكف بطريقهم سلمان ومن اخذها خسر أخو يا ترى متى تنتهي "جـوائـحـنا"

متى تنتهي الجوائح؟
حين تتعبُ الرياحُ من الصراع،
وحين يملُّ الليلُ من طولِ البقاء،
فتشرقُ شمسٌ جديدة،
تحملُ في ضيائها عزاءً للقلوب.

حين نكتشف أن الدموعَ لا تردُّ غائباً،
ولا تعيدُ مفقوداً،
لكنها تغسلُ أعيننا
لنرى الحياة أوضح ممّا كانت.
حين نصيرُ أجرأَ من الخوف،
وأقوى من الانكسار،
وحين نؤمن أن الفقدَ ليس نهاية،
بل بابٌ لابتداءٍ آخر.

الجوائحُ لا تدوم،
فما من جرحٍ إلا ويبرأ،
وما من ليلٍ إلا ويعقبه فجر،
وما من ألمٍ إلا ويُثمر يوماً
قلباً أكثر صلابة،
وروحاً أكثر صفاء.

ـــــــــــــ⊰ ـــــــــــــ

كتبت آخر سطر بآخر صفحة بالكتاب
كمت فتحت باب الكنتور خليت الكتاب وي باقي الكتب قفلت الكنتور التفتت لمحته نايم شلته خليته بمكانه غطيته طلعت من الغرفة رحت كعدت باب البيت اباوع على شارع ما انتظر شي بس عيوني ضلت معلگه بشارع!

::- طول الفترة الفاتت واني ما فاهمه ايشي من حياتي حطيت ايدي على خدي صافنه على الأطفال التلعب بالباب حسيت على شخص وكف قريب مني رفعت راسي لمحت مرة شايفتها بس ما اعرفها گالت

- مرخصتج حبيبة اكعد يمج ؟
جوائح:: اتفضلي خاله
::- كعدت بصفي تماماً استغربت وجودها أشرت على واحد من الأطفال

- هذا ابن ابني قبل سنه استشهد ابو وامه بأربعين تطبخ شلون ما لاحتها النار واحتركت ما طولت يومين بالمستشفى وماتت ضل وحيد لا ابو ولا امه ولا اخ قبل أيام بأربعين المرحوم شفتج شلون ما خليتهم يأخذون وليدج خلي بحضنج لا تعوفينه

جوائح:: الله يرحمهم ويصبرج خاله
لا شلون روحي هذا مستحيل أخليهم ياخذونه

::- عيونها تتنقل على ملامحي گالت

- حبيبة شنو اسم اميمتج ؟
جوائح:: امي قصدج ؟
- اي
- نيرمين

- لا اسم امج الشالتج بطنها
::- التفتت إلها بكل جسمي مستغربه شلون عرفت ؟

جوائح:: منين تعرفين؟
- دحجي حبيبة
- زهراء

::- سكتت ثواني تباوعلي صرخ واحد من الأطفال التفتت اباوع الهم ضحكت

- ياحبيبة تزوجين مرة ثانية انتِ

::- درت وجهي عليها ما فاهمه كلامها

جوائح:: اتزوج مره ثانيه شنو شبيج خاله ؟

- بعد خالتج وداعة هذا حفيدي تتزوجين مره ثانيه واذكريها عليه كولي ام سالم هيج گالت

- اتزوج ؟
- اي تتزوجين من شخص غريب بس قريب

جوائح:: غريب قريب شلون رهمتيها ؟

ام سالم:: "غريب" كدام العين " مو على بال"

- يعني شنو ؟
- تفهميها بالوقت المناسب كومي على حيلج
جايتج ايام مثل النسمة الباردة بعز الصيف

::- كامت من مكانها رايحه باتجاهه حفيدها ما فهمت كلامها ولا دخل بعقلي شي كمت اريد ادخل جوه لمحت سيارة صفت قريب على بيتنا نزلت منها شيلان وياها امها نگثت ايدي من تراب سلمت عليهن ركزت على سيارة مو غريبة عليه بس تحركت أخذتني رجليه للسياره نزل الجامة ومثل ما توقعت

بهاء:: سلام عليكم
جوائح:: وعليكم السلام
- البقيه بحياتج
- حياتك البقية انزل اتفضل ؟
- لا اعتذر لازم ارجع وصلتهم واريد اروح عندي شغل

::- نزلت عيوني على ايده مضمدمة ورجله كذلك

جوائح:: شبيك ؟
بهاء:: حادث بسيط لا تهتمين المهم انتقلت الغير مركز بمحافظة ثانية ويمكن اخر مرة اشوفج اليوم

- ليش انتقلت ؟
- كان لازم انتقل من البداية بس ضعت بطريق ماله نهاية

::- سكت زفر نفس وهمس اخر كلمة

بهاء:: استودعتجَ الله
جوائح:: بأمان الله..

::- ابتسمتلي حركة سيارته وراح رجعت للبيت أول ما دخلت صاحت زهره

- وين رحتي مو فتيتي گلبي
جوائح:: كاعدة هنا بالحديقة شبيج

::- خزرتني والتفتت تخزر بأم حمزه وام حمزه تهز بشفتها ما عاجبها

زهراء:: خليها تغير جو عمه شجتج

ام حمزه:: حليمه ما تبطل عادتها بكلشي حاطه روحها

زهره:: لج ام ركبه اكومن اكص ركبتج صلفة تحجين كدامي عليه جاية تذبين سمج يمي

ام حمزه:: لعد شعندي فارغة كلت اجي اذب سمي يمج

- كومي كومي لا بارك الله بيج عابت لهل جهره

- افهمج افهمج الحركة كاتلتج سوده عباتي

- ياعععع ولك محمد انعل ابوك لا ابو جابك منين ورطتنا وجبت هاي الحيه

- يووو عاد شلونه ابنج اذكرج من جان يرش اعمال باب بيتنا وسودن اهلي اذكرج

- منين ابني ماعده هاي سوالف بس زوجج المرحوم الف رحمة على روحه هو سووا سحر الاهلج حتى يقبلون وياخذج وابني المكرود خاف على صاحبه وراح يرش بمكانه وبفضله اخذج صاحبه

زهراء:: مرخصتج قصدكم ابو شيلان مسوي سحر حتى اهلج يوافقون ؟

ام حمزه:: اي خطبني واهلي رفضوا أكثر من مرة

زهره:: وراح ابو شيلان سووا عمل وجابه خلا بيد محمد وكاله رشه ركب بايسكله بوقتها وراح محمد ورا أيام رجع خطبها واقبلوا عرسوا وخلفوا استشهد أبو شيلان او اوصه محمد يعقد عليها وما يخليها ترجع لأهلها ورا سنه عقد عليها محمد وهاي من هذاك اليوم لسه تذب سمها علينا

::- باوعت الها صفح ما عاجبها كلامها اشرتلي شيلان نكوم كمت صعدنا وهنه يتعاركن

شيلان:: خرب شلون حياية اجتمعن

جوائح:: امداج أي والله
::- ضحكت فاتت للغرفة شفت عهد نايم دفعتها رحنا للغرفة ثانيه مالكينا غير جَلنار واخواتها كاعدات سوه

شيلان:: هلااااو
جَلنار:: هلا حبيبتي

::- سلمن عليها التفتت تباوع على زوايا الغرفة

شيلان :: البيت بدون وهجَ فارغ خرب حظها

جيهان:: البيت فارغ مابي روح أتفق وياج

جُواهر:: الوضع بدون رحمه زفت ماكو نظام

جَلنار:: أي والله اكعدهن صبح ما يكعدن جانت رحمه تكعدهم بسرعة يطفرن

شيلان:: عمي رحمه مو بحالنا هسه تلگونها بحضن الحبيب

جوائح:: اكلي ن***
- رحمه الله والديج ما اكلج
- انطمي لا اهفج تره روحي بخشمي
- اكلجن اكو واحد يشبه ايان صدك اخوجن ؟

:- خزرتها أختها وهي ما اهتمت

شيلان:: اي اخونا شبي حلو عجبج اخطبج إله ؟

جيهان:: لا عمي اريدن رتبته اتكشخ بيها كدام الحياية بس هو هم ينكشخ بي أويلي

جَلنار:: جيهان اكلي وحل عيب استحي

جوائح:: كملن سوالف خلي اشوف ابني

::- طلعت من الغرفة أعرف شيلان جوها هيج سوالف خليتهم براحتهن نزلت جوه لكيت ايان وغفران واستبرق جوه بس شافني نزلت ركض باتجاهي حضني

جوائح:: عزاا نزلني ولك

ايان:: اسكتي اسكتي تدرين شنو جنس الجنين ؟

- اممم بنوته مادام فرحان لان تحب البنات أنتَ

استبرق:: يحب البنات ؟
ايان:: البنات يعني الاطفال الصغار والله

::- ضحكوا على نبرة صوته وهوه يحاول يفهمها دخل علي وكف صفح مد ايده وانحنى

علي:: دستتتتورررر شرف محمد سلمان

::- دخل ابوي ركعه على ركبته بس شاف ام حمزه قلص عيونه يباوع على امه ويرجع يباوع عليها حمحم وگال

محمد:: سلام عليكم شلونكم يابه منو نكتل منو طلع سلامات ؟

زهره:: كوم وخر غاد انتِ وهاي الحية اجت تذب سمها يمي

ام حمزه:: الله يساعدكم شلون محتملين ما ادري اجيت اغير جو شويه انكتمت شنو القصه

محمد:: ثنينكم ما تكعدون راحه طلعوني من مشاكلكم تعبان

::- نهى حديثه وكام طبكن عليّ ثنينهن يحجون
ورا شويه ايان حجالهم عن التوأم الكل فرح واني هم بس الفرحني أكثر جمعتهم سوه بدون نفاق الاول مره الكل كاعد بدون مشاكل

بهذا الهدوء وراحه مرت الايام والأشهر خمس أشهر واني ما أطلع الآي مكان اكتفي بكعدت الحديقة ابتعدت عن شغلي وعلى طاري شغلة الايد الي الجانت موجودة بالحديقة طلعت الشخص من اليشتغلون وي ولد سرحان انفتح تحقيق كامل وكلهم انسجنوا انتبهت على عهد كاعد بالباب يلعب طوبه وي علي التفتت على أسامه

جوائح:: دير بالك على عهد إذا يغيب عن عيونك ارجع للسجن

::- كملت كلامي وطلعت بعد أشهر والسبب ولادة استبرق اليوم صعدت بسياره بس شغلتها رن تليفوني فتحت خط اجاني صوتها من نبرة صوتها واضح جانت ترجف گالت

وهجَ:: جوائحححح م......

ـــــــــــــ⊰ ـــــــــــــ

وصلني وراح بسرعة مستعجل مافهمت منه غير ابن عمه مات ضليت صافنه ورا منو المات بيهم إسم الله نزلت جنطتي دكيت الباب بس انفتح غمضت عيوني خايفة من ردت فعله

فاطمة:: خلونا نتفاهم عليكم الله

اديان:: عزااااااااااااااا اجتتتتت فاطمة

::- بس سمعت صوتها رأساّ شمرت نفسها بحضنها فرحانه بشوفتها

اديان:: يماا ولجج گلبي طاك عليج

فاطمة:: واني هممم وعلي
::- ابتعدت عن حضنها التفتت على ايد انمدت على كتفي لمحت سما حضنتني فرحانه استقبلوني بالاحضن والأطفال يكمزون
دخلت للبيت ما لگيت اخوي موجود كعدت احجي وياهم ناسية نفسي لحد ما تعبت دخلت بدلت ونمت من تعب ثاني يوم كعدت العصر اول ما فتحت الباب صار زياد مقابيلي كل ضني راح يحاسبني بس جمدت بمكاني من أخذني الحضنه يبوسني براسي ويمسد على رأسي

::- ردت فعله جانت كلها حنيه عكس توقعي ما حجه هواي طلع وكال هاي الفترة راح يغيب عن البيت فقلنا الباب وكعدنا وطول الاسبوع هذا جنت ادوام وارجع ماكو أي أحد بالدوام عرفت من سما الي متوفي إسمه فرات عرفته زوج جوائح اتمنيت أروح بس منعوني أروح بسبب اسامه طلب محد يجيبني لان الوضع مو تمام هناك سديت المكالمة منه لكيت اكو رساله

من رقم دولي بس شفت رساله شهكت اتصلت عليها ما جاوبتني ورا شويه راسلتني وضعها جان تمام بس ما مرتاحه حاولت أهديها ومع مرور الأيام شفت تغير واضح بكلامها وصارت تمدح المناطق الي تروحلها بين قوسين ندمجت واتقبلت الوضع
وهذا شي فرحني اسلوبي بالبيت صار مثل منى حتى حركاتي ورا الاربعين راح اخوي ورجع ويا اسامه طلعت للصاله لفت انتباهي كلام أسامه

اسامه:: اي علي لگه مكانه بس متأخر

- شلون متأخر مغير مكانه ؟

اسامه:: لاگي واكعه الشليمانه على رأسه من قوة ضربه حتى عينه طافره من مكانها وراسه صاير اعوج ميت وضال بمكانه محد يدري بي

- يعني ايهاب مات ؟
أسامه:: أي من يومين ميت بمكانه ومحد يدري بي......

ـــــــــــــ⊰ ـــــــــــــ