جوائح الدهر الفصل الثالث وأربعون 43 - بقلم دعاء رزاق

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

ـــــــــــــ⊰ ـــــــــــــ

مشيت اشوف وضع غفران واستبرق وقبل لا أدخل للبيت صارت بوجهي مرة شايلة بيدها شي مغطيته بالعباية طلعت من البيت بسرعة دخلت الغرفة باوعت على جيهان نايمه وبصفها الممية مال عهد بس عهد ماموجود وماكو اله اثر بالبيت كله

::- طلعت اركض ادور عليً بالحديقة افتر من مكان المكان مثل الخبلة شلون غفلت عنه مادري خبصت البيت كله وكلهم يدورون عليً
ساعات وهو ماكو خفت يسوالة شي رجعت جوائح بس ماكدرت احجي وياها شنو اكول الها اكللها ما درت بالي على ابنج!!

- مر الوقت واني انتظر خبر منهم النص الليل طلع علي يركض بره گمت وكفت امشي بصاله خوف قلق كلهم بوقت واحد دقايق ودخل علي شايلة بيده صرخوا كلهم إلا اني كعدت بالكاع حيلي رايح جابتلي ماي جَلنار شربتني وگالت

جَلنار:: رجع لا تخافين راح اخلي عيوني عليً ما يصيرله شي ..

::- جابه علي خلا بحضني ما خليت مكان بجسمه ما شفته خاف بي شي بس ما لگيت اي شي غير قطرات دم على تشيرته وبيده بيرغ مشدود باوعت على عليً مستغربة أخذته رحمه كمت أخذته على جهة احجي

وهجَ:: منين جبته وين لگيته؟

علي:: مو اني شيلان كالت اطلع على شارع ومن رحت لگيت اكو سيارة وبصفها شاب شايل عهد يشربه عصير من شافني نزله حجيت ويا ما قبل يكول ايشي وراح

-: استغربت أكثر من كلام علي التفتت اريد اروح وذكرت الدم رجعت كلت

- الدم منين ؟
- هو چان مضمده ايده وملابسه كلها دم

::- عفته وطلعت فوك ادور عليها لگيتها تحجي مكالمة وكفت قريب منها باوعتلي اشرت بيدها اسكتي

شيلان:: مع احترامي بس مو صاحي انتَ
::- دفعتني وفتحت المايك أسمع وياها

- چا منو كالج صاحي اني ؟
شيلان:: مالي خلك مصيبة جديدة سيد دخيل جدك رسول الله لا تورط نفسك وياهم

-: سكت ما رد عليها رجعت گالت

شيلان:: منو فتحلك الباب ما كتلي ؟
- وحده من البيت لان تعرف مكانه وين حتى باب الغرفة هي فتحته الي اخذته وطلعت

- شكلها شنو ؟
- ما باوعت عليها بس من فتحت الباب المرة الجانت مخلية الطفل بحضنها صاحت عليها باسم إسراء

::- فتحت عيوني بصدمة بس سمعت إسمها خليت ايدي على حلكي من الصدمة يعني همه ورا سالفة

::- ضلت تحجي ويا من سدت المكالمة عطت

وهجَ:: بنات يحيى السبب!!!

شيلان:: صوتج ما نريد مشاكل مرت يحيى وبتها ثانيه هنه الماخذات عهد ومن البداية شكيت لهذا انطيت العنوان وطلع ماكو احد هناك مراقبين السيارات التطلع ضالين وراهم وعرفوا مكانهم وين بوحده من الشقق وهاي اسراء هي الفاتحة الباب ومدليتهم بمكان عهد

- ايا صخول شلون راحوا من بالي
- انسي المهم هسه هو موجود بخير
- منو هذا ؟
::- گلبت عيونها ما عاجبها سؤالي
شيلان:: واحد من معارفي
- هذا السيد الگال جوائح مو خارج العراق صح ؟
- اي هو
- اممم هو ضابط؟
- لا مدير شركة..
::- ما حجت شي ثاني اخذتها ونزلت خليتها تساعدنا خليت ابوي يحجي وي عمي حسين ياخذ النا إجازة هواي سختنا عن الدوام بس ماكدر اعوف الوضع هيج يوم ورا يوم يصير حالهم أسوأ أتأكدت كل يوم يمر بدون فرات يتعبهم أكثر بيتهم الثاني المگبره صار بأي وقت تلگيهم هناك وابوي مشغول بشنو ما اعرف يجي بوگت متأخر ويطلع من وگت

خلصت كلشي طلعت اريد اطفي الماطور مال ماي ومثل كل مرة سمعت أصوات ولد عمامي ورا البيت مشيت بهدوء عسى ولعل اسمع شي يبرد گلبي

علي:: مو صعبة عليه
حمزة:: هي مو قصة صعبة بس لازم نلعبها صح
انمار:: علي الأول مره اعتمد عليك بشي
علي:: اعتبرها يمك

راجح:: هسه ماراح تخلون أحد يعرف هو القتل فرات ؟

انمار:: اي لان اذا عرفوا ايان او وسام تصير كارثة والكارثة الاكبر جوائح ما يسكتون هذولة ويروح واحد منهم بيها نبشته نبش عرفت متورط بأعمال تودي ورا شمس ويخسر رتبته ومستقبله كلها يصير بسجن بس بس أحتاج كم شغلة وبوقتها يصير كلشي مثل ما اريد

اسامه:: شنو هنه الكم شغلة ؟
حمزه:: هذني يم علي لان هاي هي شغلته
::- صار هدوء يمهم مدلي راسه حمزه خازرني بهتت بوجه

حمزه:: وتالي وياجن
-: يحجي وعيونه وراي درت وجهي لمحت شيلان واكفه بصف الحايط

شيلان:: شو وخر
::- راحت كعدت يمهم مشيت كعدت بصفها وحمزه عيونه على ولد عمامي يخزر بيهم دنكوا بالكاع بس علي الصلف ما يكعد راحه
يباوع على شيلان ويغمز الزياد اخو انمار
وهذاك ما شال راسه من الكاع

اسامه:: هسه كملوا
أنمار:: ماكو شي بعد علي كوم اتحرك لا تتأخر
::- طفر علي طكطك رگبته راح باتجاهه سيارته طلع جنطه سوده صغيرة اخذ منها ملابس تختلف عن ملابسه فات للحمامات الخارجية بدل وطلع لابس ملابس ثانيه نزع ساعته شمرها على حمزة حط الشماغ على أكتافه وگال

علي:: اذا اتاخرت لا يضل بالكم
::- اتقرب يهمس شي الحمزه وطلع ضلت عيوني اتراقبة لحد ما اختفى من كدامنا التفتت استمع الكلامهم عرفت منهم ايهاب يغير مكانه وحتى لو نوصل إله يغير مكانه بسرعة

أسامه:: يعني اكو شخص يوصله معلومات

حمزه:: بس محد يعرف بالموضوع غيرنا
::- سكتوا ثواني راجح يباوع عليهم گال

راجح:: يشهد الحسين ما طلع مني حرف واحد
زياد:: ما تأكل خ*** محد شاك بيك
حمزه:: عيب عليك كاعدين نحجي كدامك ودكول هيج لو شاكين بيك ما نكعد نحجي كدامك

انمار:: فكر قبل لا تحجي
::- ضلوا يرزلون بي وهو ساكت حسيته مستحي ومقهور بنفس الوقت من يوم إلي عرف اخو هو تسبب بموت فرات راجح تغير حتى للبيت ما يدخل يضل كاعد بره ومن ينام يروح ينام بسيارته جريت نفس بحسره كمت أمشي كدام شيلان وهي تهمس بصوت شبه مسموع

شيلان:: احب تجمع ولد عمامج لان تحسهم گلب على گلب رغم كلشي واحد متمسك بثاني

وهجَ:: لو نرجع للحقيقة ابوي وعمي فاضل همه السبب من صغرهم خلوهم يبتعدون عن سرحان وسلمان وزرعو المحبه بداخلهم

- عمو محمد محتوي الگل ويحب الكل شكد الله يحبه لعد
:- دخلنا وگبل الغرفة البنات لگيناهم نايمات وغفران حاضنه طيبه ونايمه غطيتهن عدل تمددت بصف شيلان هي صافنه واني صافنه
حايره شلون وسام يكمل حياته طبيعي شلون يعيش بدون اخو شلون عهد يكبر بدون اب ؟
تعبت واني افكر فتحت تليفوني بعد أيام طويلة بدون ما ارد على أحد دخلت دزيت رساله الوسام كتبت

وهجَ:: شوكت ترجع ؟
::- طلعت من المحادثه دخلت على ستوري مالته ناشر صورته هو او فرات ما كملت الستوري طلعت بسرعة عيوني دمعت شلت راسي من المخدة طلعت كعدت على درج
بداخلي شي خانكني اني دعيت عليهم ثنينهم بس من حركة گلب مو قصدي
الندم اگلني اكل شهر مر على وفاته واني أكل بروحي اكل تندمت ألف مرة على الحجيته
بس شـيفيـد الـنـدم هـسـه

::- رفعت راسي امسح دموعي وعيوني على الباب دخل وسام يمشي وهو منزل راسه كمت نزلت أركض بس وكفت كدامه باوعلي بنظره سريعة والتفت يباوع على درج

وسام:: طيبه وين ؟
وهجَ:: أكلت وأخذت علاجها ونامت والبنات كلهم يمها

::- هز راسه وراح باتجاه الغرفة البيها زهره سد الباب وقفله بوجهي!!!
وكفت بمكاني مصدومة من صدمتي حتى دموعي جفت درت وجهي ومشيت كعدت بنفس المكان حطيت ايدي على بطني حسيت بوجع قوي أسفل بطني انتجيت على محجر عيوني على الباب
الكل نايم واني كاعدة ما غفت عيوني للفجر كاعدة قبل الأذان مشيت للمطبخ اشرب ماي الإضاءة طافية ما شغلته اخذت ماي وكعدت على كرسي بضلمه الطارمة كلها اضاءه والبيت اضلم انعكس ضل شخص على شباك المطبخ بالبداية عبالي واحد من اخواني او ولد عمامي بس بعدين استوعبت هاي الجهة المخزن وماكو احد منهم بهاي الجهة لان مفصولة عن طارمة أساسا حسيت بخوف بس كمت امشي بهدوء فتحت شوي من الشباك ماكدرت أشوف شي بس اكو صوت همس فضولي خلاني أخذ سجينه واطلع بهدوء خاف يسمع احد من بعيد لمحت انعام أخت ابوي لازمه تليفون واذنها على حايط فتحت عيوني بصدمة بجهة ثانيه كاعدين يحجون كلهم هناك حطيت ايدي على حلكي
دخلت بسرعة سديت الباب بهدوء ركضت فوك شلت تليفوني من جوه المخدة كتبت رسالة الحمزة

وهجَ:: انعام تتسمع على كلامكم وتليفونها بيدها يا تسجل او فاتحه مكالمة تخلي شخص ثاني يسمع كلامكم يعني هي التوصل كلشي الايهاب...

::- دزيتها واتصلت عليٌ حتى ينتبه للرسالة
وفعلاً مجرد اتصلت رفضني وفتح رسالة شافها وطلع أخذت تليفون وطلعت ورا دقايق دخلت تمشي وتتلفت شافتني كدامها انخطف لونها

انعام:: شعندج كاعدة لحد الآن وسام ما رجع ؟

وهجَ:: جنت نايمه وكعدت اصلي وين جنتي انتِ عمه ؟
- شني تحاسبيني بعد عمتج جنت يم امي توني كعدت أصلي

::- هزيتلها راسي اي ومشيت خاف تشك بيه الجذابة من زمان وسام قفل الغرفة شلون دخلت واني هنا جنت كاعدة معناها جانت من زمان بره تسمع حجيهم!!!

خرب روحها ولا مبين عليها هيج خبيثة
::- توضيت وصليت بس طلعت شمس نزلت طلعت للطارمة لمحتهم كلهم كاعدين بنص الحديقة غيروا مكانهم بس شافوني اشروا الي تعالي ركضتلهم

حمزه:: لا تركضين أخذي نفس

::- اخذت نفس وگلت

وهجَ:: جنت اشرب ماي شفت ضل شخص عبالي انتم بس ذكرت هاي جهة مفصولة عن الطارمه ثانية ومحد يكدر يدخل غير من المطبخ واني جنت كاعدة ما شفت واحد منكم طلعت بدون ما أطلع صوت شفتها واكفه يم الحايط وتليفون بيدها ومن دخلت سألتها وجذبت والله هي توصل كلشي الايهاب

انمار:: كاميرات الجهة ثانيه مشتغلة ؟
حمزه:: لا طفيتهن لان بس نسوان تفوت هناك

::- رفع أيده يغمه

أسامه::امداك هسه أنتَ خايف تشوف النسوان لو خايف عليهن الكاميرات المن اطفيهن الخاطر المطاية والحمير

حمزه:: انجب لا تلغث هسه شلون ؟

::-قلص عيونه أنمار هز راسه متحلف الهم شرحلهم شيريد يسوي واني بالي يم علي خفت يسوله شي بس ما لازم أنسى علي عميل سري للأمن والاستخبارات محد يكدر يلعب عليّ لانه داهية وذكي كل الموجودين مستخفين بي وهو أكبر شيطان محد يعرفه غير اليعرف شخصية الثانيه والحقيقة...

::- خليت ورحت سويت ريوك بس كعدت امي قسمت الشغل علينا وكل وحده كملت شغلها طلع وسام من غرفة زهره ما حجه وي احد غسل وطلع كعد باب البيت ورا شويه نعست وصيت البنات على عهد ورحت صعدت للغرفة طفيت الإضاءة كلها ونمت للمغرب كعدتني عمتي زهراء سحلت نفسي سحل وكمت باوعتلي وگالت

زهراء:: ليش هيج ياحبيبتي شمسوية بروحج انتِ؟
-: انداريت اباوع على شكلي ملامحي كلها تعبانه وجهي اصفر جوه عيوني سواد خدودي بيها اثر خرمشات ضعفانه حيل بحيث وزني صار تسعه وأربعين وهذا كله بشهر واحد!
ألتفتت ساكتة تأففت ما عاجبها رحت صليت ورجعت صبيت الاكل وياهم رحت الغرفة زهره انطيتها الأكل كالت

زهره:: بس يخلص الأربعين زلمتج يرد البيته تروحين وياا اذا اشوفنج عايفته اكسرج والخلقج

::- باوعتلها صفح
وهجَ:: شعندي رايحه المايريدك لا تذب روحك عليّ وها عاذرته وحقه العاشه مو شويه بس كل الموجودين مكسورين وراحوا يحجون النسوانهم ماكو مثل ايان أكثر شخص كتوم ومن خسر اعز شخص اله راح يم مرته بين قوسين اليريدك يجيك حتى لو هو بأصعب حالاته ومع هذا معذور...

- طلعت من الغرفه بصعوبة اتنفس اخذت عهد كعدت اوگله وهو يحجي ما افهم عليّ بس اهز رأسي واتجاوب ويا كمل الاكل وطفر أخذ بطل عصير ومد ايده ياخذ الثاني كتله

وهجَ:: لا يوكع وينكسر حبيبي
باوعلي يضحك راح يركض الغرفة امه مشيت ورا فتحتله الباب دخل يركض الها انطاها بطل وكال

عهد:: احذي تيب ( أخذي طيب)
::- رفعت عيونها عليّ أخذته منه حطته على جهة مدت أيدها تشيلة خلته يكعد يمها ملامحها ونظراتها بارده تحسها بدون شعور او احساس سديت الباب وطلعت نزلت اخذت مكان استبرق بالمواعين لأن الحمل متعبها
بين ما كملت كلشي صعدت انام لمحت جَلنار ايدها على بطنها وتبجي ادري بيها حامل بس الصدمني أكثر حملها تنتيجة اغ*** عمرها ثمن طعش سنه وهي عاشت اشياء صعب شخص سبب يتحملها فتت للغرفة الثانية سديت الباب شمرت نفسي على جرباية اتصلت على ايڤار حجيت اله عنها وسديت مكالمة هو الوحيد اليكدر يطلعها من وضعها هذا

اكدر افهم بشنو تحس افهم شعورها بطفولتي عشت العاشته وبسبب الصارلي سنوات وإني أخذ جلسات نفسية وتركت دراستي عزلت نفسي عن الكل بس ايڤار الوحيد العرف شلون يخليني ارجع الحياتي طبيعية.. الفرق بيني وبينها هي صارت ام واني مستحيل اصير ام بسبب....

:- غمضت عيوني دموعي تنزل على مخده شلون نمت مادري الصبح كعدت حسيت بثگل على ظهري رفعت نفسي صار كدامي وسام نايم بصفي وايده على ظهري وخرت ايده بيها كانونة خفت يكعد سحبت نفسي بهدوء ابتعدت عنه وهو نايم على وجهة خفت صايرله شي حطيت ايدي على خشمه اشوفه يتنفس بس اتنفس زفرت نفس براحة عفته نايم وطلعت صار بوجهي ايان لزمت گلبي بيدي
اتقرب مني گال

ايان:: بعده نايم ؟
- ياهو
- ابوي يعني ياهو غير وسام
- ها اي اي نايم
- عوفي لا تكعدينه خلي نايم
- شبي ؟
- صار عده انهيار عصبي واخذته للمستشفى وقبل لا يصعد نطيته منوم حتى ينام صحته تعبت..
::- مد ايده يمسح على راسي وگال آخر شي توقعت اسمعه من ايان

- خليج قريبه منه
::- نطقها وراح ضلت مصدومة بي نزلت استفقد الوضع ولكيتهن مكملات الشغل كعدت أشرب جاي لمحت رحمه تفتر بالبيت وملامحها ما تتفسر عفت الكوب كمت اباوع عليهم كلهم كاموا واحد يصعد وأحد ينزل حسيت ضغطي هبط ماكدرت اتحمل ايشي بس سمعتهم يكولون جوائح ما موجودة مغصتني بطني صار وجع قوي بجسمي مشيت وراهم بصعوبة اتحرك بس رجعوا الكاميرات وشافوها وي شيلان رخت أعصابي كلها عفتهم ومشيت للغرفة فتت وسديت الباب ضغطت على بطني عسى ولعل يروح الوجع بس ما راح

أخذت مسكن نمت على ادگلب من جهة الجهة من الألم ساعة ورا ساعة واني ابچي من الوجع اسمع فوضه بره وصوت عياط بس ماكدر اكوم سمعت صوت ركض فوك كمت ايدي على بطني وثانيه على خاصرتي اباوع الهم مجتمعين باب الحمام جابت الهم جيهان

ملابس وكل هذا اني ما مفتهمه شي منهم دخل عمي فارس جوه طلع شايل بيده وحده من كمية الدم الي عليها ما عرفتها نزلت عيوني على أيدها هاي شفت سبحة فرات الي لفتها طيبة على أيدها شهكة بصوت عالي ركض ايان يسكتني خاف يكعد وسام اخذها عمي فارس وعمتي زهراء ما خلوا حتى رحمه تروح حطوا مغذي الوسام وابره منوم حتى يبقى نايم وهذا كله احنا خايفين كعدت بزاوية لازمه بطني كل ما تجي مكالمة تطفر رحمه ورا كم ساعة خابرتهم امي تحجي وياهم وكل كلمه تشهك حتى عافية ما خلت عدنا
سدت المكالمة گالت

نيرمين:: سكرها هابط واكعة على رأسها والجمجمة مفطوره.

زهره:: ياااا يمه سوده عليه منين اجاها السكر
بعده صغيرونه

نيرمين:: ماكو غير وفاة أخوها انهبطت وصار بيها.
::- التفتت على رحمه وحده تباوع بوجه ثانيه ورا شوية اجه ابوي اخذ امي وراحوا وراهم كعدنا يم زهره ساكتات ساعة تقريباً ودخلت

جوائح شايلة عهد وعيونها حمر والدموع تلمع بعيونها ما حجت شي بس سلمت وراحت

الغرفتهم خلت عهد يمنا كامت غفران تشوفها للصبح كعد وسام كام يدور على أخته ما لگاها أخذته استبرق على جهة تحجي ويا هي وايان يحاولون يفهمونه بهدوء لا يصيرله شي
بعد ما حجاله راحوا للمسشفى ضلت كم يوم هناك وبيوم أربعين فرات طلعوها من
المستشفى قبل لا يوصلون رحت

الغرفة جوائح الي طول الايام الفاتت هي لا اكل لا نوم نكعد صبح نشوفها نايمه بره بآخر مكان وكفت بي هي وفرات حتى ابنها ما تسأل عنه ابد واذا يشوفها تبجي يتفل عليها يخليها تصيح وتسولف يسكت بس ترجع تبجي يكوم مو بس وياها حتى وي وسام يتصرف بهاي الطريقة الكل مستغرب من حركاته كأنه يريد يطلعهم من حالتهم بس هو طفل شلون يفهم مادري

فتحت الباب ومثل كل مره لگيتها متمدده وتباوع على سقف عيونها رايحه من البچي وعهد كاعد بصفها يباوع على تليفون بس شافني طفر من مكانه طلع بره

وهجَ:: تعال وين رايح عهد
::- التفتلي فاتح عيونه عود خازرني
عهد:: بتيفي ( بكيفي)

::- دار وجه وراح يركض لزمتني الضحكة باوعت عليها

وهجَ:: ابنج مشيطن كومي شعرج منكوش وجهج لا هو ازرك ولا اصفر ولا احمر شمسوية بروحج كومي

جوائح:: منو هنا
- نسوان هواي بالمية وحده
::- اكتفت بسكوت حاولت أقنعها بس ماكو ولا قبلت تنزل عفتها ونزلت اكول لامي لمحت عهد بيد ايات شايلته تسكت بي وهو يبجي قبل لا انزل ركعته راجدي لان تفل عليها نزلت ركض اريد أخذه منها درات وجها عني تصيح

آيات:: وخري عن ابني
وهجَ:: منين اجاج ابنج ابن اختي جيبي
::- أريد اسحبه منها ماكو ادور على رحمه بعيوني ما شفتها كامت وحده من اقاربنا تصرخ بوجهي

- ابن اختج شنو ابنها كلنا نعرف هذا شي لو من موتوا الرجال تردون تاخذونه

وهج:: احترمي نفسج واحجي عدل ابن اختي هذا غصباً عليكم فهمتوا وانتِ جيبي لا اطيح حظج

::- بعدني احجي وما أحس غير انسحب شعري جرتني من شعري بكل قوة

- غصباً على منو ياقليلة التربية

::- دفعتها عني اجه خصل من شعري بيدها دفرتها برجلي رأساً رفعت راسها تباوع وراي عبالي رحمه بس شفت جوائح نازله بهذاك وضعها والشر يطاير من عيونها ابتعدت هذيج عني بسرعة وايات لازمه عهد بقوة اتقربت جوائح منها

سحبت الطفل منها وگالت

جوائح :: وحق من انزل القران اذا توصلين اله او تأخذ ابني البيتتتتتت اهجمه على راسج ورأس الخلفج

::- كملت كلامها ودارت وجهها تصعد فوك ركضت سحبتها من شعرها التفت وهي بيدها الطفل ركعتها راجدي وكملت طريقها تاركتهم بصدمتهم

::- باوعت عليهن مادري شلون طلعت مني بس تفلت عليهن وفلتت اعبر بين نسوان لحد ما كعدت بصف زهره .

::- خلصت الملاية والنسوان راحت بقت ام كوثر وي بناتها وحتى نسوان بيت سرحان موجودات كل أنواع الحياية موجودة

جابوا طيبة وخلوها بغرفة زهره حالتها تعبانه او وجع رأسها مدمرها والسكر منا واحده أضرب من ثانية نومها وسام وصعد فوك يبدل حتى ينزل لان الزلم كلها تتعشه هنا بدل وطلع وهكذا مرت الايام محد تخطى موت فرات كلهم عايشين بالحزن ورا ما راحوا للنجف ورجعو صاحلي وسام رحت اله بس شافني كال

وسام:: راح اخذ طيبة وارجع للبيت
وهجَ:: ليش ما تبقى هنا ؟
- ماكدر لازم أروح البيتي

::- ماكدرت احجي شي سكتت وهو كذالك ساكت التفتن على فتحت الباب دخل سلمان ويا عمي حسين كمت من مكاني ركضت كلت الهم ثواني ودخلوا سلموا وكعددوا جابت الهم عمتي جاي عيونهم عليه استغربت من نظراتهم التفت سلمان على ابوي يكله

سلمان:: جاي عندي حجايتين وياك
محمد:: اتفضل حجي

::- حمحم وگال
سلمان:: المرحوم منطي عهد الآيات وبجنسية اسم الام ايات ما يجوز بنتك تضربها كدام النسوان الطفل الها ويرجع الها

محمد:: حجي يفيدكم عهد ابن بنتي وحفيدي ما يطلع من هذا البيت

سلمان:: حجيك ما يمشي عندي يا عهد يرجع الآيات يا وسام يطلك وهجَ ويعقد على جوائح

::- فتحت عيوني على وسعهن باوعت على وسام غمض عيونه صفك ايديه گام من مكانه

وسام:: من رخصتكم
::- ألتفت على اسامه سواله حركة بيده بدون أي مقدمات ضحك أسامه وجر زيج بصوت عالي

اسامه:: طييييييييييييطططط هذا الك حجي سلمان

::- انرسمت ابتسامه على ثغرهم حتى رحمه ابتسمت وجدي شال الكلاص ركعه وكع على حايط وحمزة سحب اسامه اله

سلمان:: **** **** يا قنادر

وسام:: وروحه الأخوي السانكم اكصه واشمره للجلاب اذا ينعاد هذا الحجي ام عهد اختي وعهد ابن اخوي اليمد ايده عليّ اعلكها بركبته لا الكم ولد يمنا ولا تتحكمون بيه الجان مسكتني اخوي هسه وروحه اكتلكم بيدي وانت يا سلمان اطلع روحك واحفر كبرك بيدي
اذا اشوفنك واصل الواحد من عائلتي يشهد الله اموتكم سمعتتت

:-: يحجي بحركة وصوته عالي كام سلمان يريد يركعه لزم ايده وسام بنفس اللحظه عمي حسين راد يركع وسام لزمه اسامه وخرهم ابوي عنهم

سلمان:: لونك زلمه تعال كدامي اعلمك شلون تتجاوز وترفع صوتك

وسام:: هههههههه شوف انتَ الضاهر مستهان بيه شايف شنو عندي والحسن بحركة وحده تروحون اعدام والحسن بس خل اشوفنكم تفترون علينا واني اعلمكم

::- دفعه ابوي يطلعه وحمزه وايان
يسكتون بي انفجر وسام ما خلا كلمه تعتب عليّ وأبوي ما سكته خلا يحجي كلشي

رمشت مرتين ما مستوعبة كلام سلمان رفعت ايدي ترجف كمت المطبخ لحكتني رحمه واستبرق وغغران سحبت كرسي وكعدت اخذت نفس گلبي يدگ بقوة

استبرق:: شبيج لونج نخطف تره لا جوائح تقبل ولا وسام

وهجَ:: مو قصه يقبل بس خفت
رحمه:: سمعن هي مو مال عرس وصخام منا السنتين وأكثر لان الميت عزيز علينا خصوصاً الولد لهذا بالي شي بس مادري

غفران:: احجي
- اي احجي
رحمه:: العرس يتعوض بعدين عسا ما بعد سنين هم نكدر نسوي بس حالياً محد يكدر يسوي ايشي وأفضل شي هسه ما نسوي عرس ناخذ الأشياء الي نحتاجها ونستقر بيت ازوجنا!

غفران:: قصدج تنتقلين البيت انمار بدون عرس وفوضه او وهج هم صح ؟

- اي
وهجَ:: وإذا ما قبلوا اهلنا ؟
- لا اني سمعت ابوي يحجي وي امي وبنفس الوقت أفضل أحس

وهج:: اني هم ماريد عرس ولا ايشي وسام محتاج احد ويا وطيبة مريضة لازم أحد يهتم بيها ردت اكله أروح وياكم بس استحيت!

استبرق:: اشوف هذا شي عادي لان أزواجكم مو غرب ولد عمامكم وبأي وقت تسون عرس مو مشكلة المهم عاقدين والعالم تعرف..

::- صفنت على كلامهم منطقي من ناحيتنا ممكن البعض يشوفه غلط بس هو بنسبه النا جان صح ....

::- راحت رحمه تحجي وي زهره وخلتها هي تتكفل بهذا الموضوع بس راح سلمان صحت الهم دخلوا للغرفة وسدو الباب بالاثناء فات أسامه يحجي مكالمة ويگول

- اتصل عليّ ما يرد اول مرة يتأخر

::- اجه بالي علي من يوم الراح ما رجع كلنا متعودين يتأخر بس هاي المره أتأخر هواي وما رجع.....

::- طلعوا انمار او وسام من الغرفة يباوعون علينا واحنا مسوين أنفسنا كلشي ما نعرف صاحلي وسام وانمار صاح الرحمه رحت أخذني على جهة يحجي

وسام:: اني ادري كل بنية تحلم تلبس فستان وتسوي عرسها مثل ما تريد

وهج :: لا منو كال ماريد اني
- شنو ما تردين
- ماريد عرس لا تحجي ايشي
- منين تعرفين ؟
- من زهره مو من احد
- وانتِ قابله ما تسوين عرس هسه ؟
- إذا هسه اي بس بعد كم سنه أسوي احلى عرس اما هسه اكو اشياء أهم مثلاً صحتك وصحت اختك

::- سكت ما يحجي بداخله هواي حجي

وهجَ:: وسام اني......

- اش لا تحجين ايشي هسه
::- باوعلي بنظره سريعة وراح يحجي وي اهلي كدام الكل وانمار ويا مادري ليش خفت بداخلي خوفه من حياتي جديدة او خوفة من وسام شنو باله....

::- بعد حديث طويل وي اهلي اقتنعوا لان مو حلوه نسوي أي عرس وأكد ابوي الهم نهاية الأسبوع نطلع من هذا البيت وننتقل البيت ثاني ما جنت متوقعه من هاي اللحظه كلشي راح يتغير ويغير حيااة الكل ومن ضمنهم جوائح المنتظرنا كارثة...

ـــــــــــــ⊰ ـــــــــــــ

مشهد من البارت القادم....

طلعت للحديقة جبت الماسحة والفتت اشغل الماطور لمحت كيس زباله مشمور مشيت اتقربت أريد اشيله اشمره بالحاوية بس مجرد تقربت منه لمحت اصابع ايد شخص طالعه منه وكلها دم سحبت الكيس صارت كدامي ايد بشرية مقطوعة من المفصل ومشمورة بحديقة بيتنا ....