رواية #جوليت وأسرها.... الفصل 105 - بقلم الكاتبه سمو العراق

رواية...جولييت واسرها...غياهب الإنتقام
بقلمي...نور سمو العراق
بارت العرس 💔

🌹🌹🌹🌹🌹🌹🌹🌹🌹

آنت لو بس ينفتحلك بآب گلبي ..
تشوف بي آمك وآبوك وديرتك
وحروف آسمك ..
والعيون التنذر الشوف ع طولك !!
حته خوف الوآدم الرآدت تضمك ،
يآهو آحن مني ويحبك !!♥️
#الـــرســــام

......................................

السنين تغير هووواي حتئ بمرور السنين تتغير تضاريس الطبيعه وكفيله بأن تغير شخصية البني ادم..

جاسر ما نگول تغير شخصيته كووولش لا بعده يعصب وعنده طباگات بس هوايه احسن من قبل يعني ما يضايقني ما ياذيني لا هدء شويه

جنت كاعده لازمه الفون واني ابحث دروس باليوتيوب لان قررت هاي السنه امتحن سادس اعدادي ...

قدملي هو خارجي وجان ازدحام حيييل بالوزارة بس هو جابو اله الاستماره للبيت يعني معارف وكذا..

وهماتين رحت اني وماما رضيه لمدرستي جبت تاييد بالدرجات من المدرسه...

من دخلت لمنطقة اهلي ومدرستي لزمتني غصة الحنين للماضي شلون جنت طالبه وارجع من هذا الطريق والگه امي مسويتلي الاكل

جنت اتمنئ ادخل جامعه واعيش الحياة الجامعيه ولزم شهاده بيدي صح هو هسه كال كملي دراستج بس فاقده للشغف اني مو مثل قبل...

حسرات واهات لزمتني واني اباوع علئ الطريق الياخذني لاهلي راح بيت ابوي وسكنوا ناس غيرهم بعد لا اجيهم ولا يجوني ...

شكد اتمنئ مرات من اضوج اروح مثل البنات لامي لاهلي اقضي كم يوم اني واطفالي وارجع البيتي بس للاسف بيت اهلي مقفول وامي ما رجعت لحد الان وعذرها دكول حازم يريد يحصل اقامه ما اعرف شنو واني صابره علئ كلامها...

بس هي وعدتني ترجع وتبجي وتنوح عليه...

رجعت لبست النظارات الطبيه وركزت بالدرس ردت ادخل خصوصي بس هو ما قبل يكول ترحين وتجين واطفالج منو الهم

وماما رضيه همات مقبلت كالت واحد يصير بي شئ منهم والله محد يرحمج ويكولن عايفه جهالها ورايحه تدرس عاد اني جهالي اهم من روحي مو من دراستي لذلك قررت اقره بالبيت...

قريت شويه طبعا اني البس نظارات من اقره او لزم الموبايل او اخيط لان نظري ميساعدني ...

شعيط ومعيط قصدي مرتضئ ومشمش يلعبون بالحديقه وزكيه الداكوكه نايمه قصدي هدار ...

وماما رضيه راحت لبيت عمو مهيوب الله يرحمه لان سجئ قرب عرسها وراحو يأجرون...

وجاسر كل عاده بالشغل ...

شويه وما اشوف اله سجئ وماما رضيه دخلن و اشواق دخلن علينه...

شمرت الموبايل و وكفت من القنفه رحت عليهن سلمت بتفاجئ ونزلت نظارتي هن كعدن واشواق جانت جايبه بنتها وياها...

سجئ جانت لابسه بنطرون كابوي ولابسه تشيرت صوف طويل وشويه فضفاض ولونه اسود ولابسه شال وردي وحذاء وردي...

هي جانت ناعمه وصغيره ممبين عليها يعني عادي لابسه هيج واشواق لابسه عبايه ..

كعدن وسجئ مطنكره كالت رضيه بقهر...ولج والله موتيني من الصبح لحد الان واحنه نفتر بالسوك نريدلج بدله وانتي قافله ما دكليلي شتردين

ردت بعصبية...محلوووات وماكو وحده حلوه وانتن ذوقجن محلو مجاي تفيدني..

رضيه بغضب...خايبه انجي شمالنه ما عدنا ذوق انتي احسن منه صدك لو گالو اجاك من تالي عگبك...

باوعت لماما رضيه ببتسامه...ماما علئ كيفج وياها اكيد متوتره هي ومتعرف شلون تتصرف اتذكر اني بعرسي هماتين هيج جنت محتاره وماما ما خلت مكان مراحت ويايه عمود البدله...

رضيه ...يمه انتي حلوه شتلبسين حلوه

سجئ بعصبية...لعد شنو اني محلوه ؟

جاوبتها وهي تجر نفس عميق...ولج حلوه بس انلصمي

دارت وجهه زعلانه وبعدها دارت وجهه عليه كالت...عفيه جولييت روحي ويايه للبدلات ماما رضيه ذوقها محلو وقديم وعمه اشواق ذوقها يلعب ستين نفس

اشواق تخبلت...صدك متستحين ولج شبي ذوقي شو گابله وبزه بعينه شبي ذوقي محلو ولج زعطوطه تعلمني علئ الذوق هي

اني فكن للنزاع كلتلها...يالله هذا هو هسه بس يجي عمو نگوله ونروح اني وياج...وماما رضيه ..

صدك انتظرناه يجي دخل هو سلم اني ابتسمت كتله...الله يساعدك

رد عليه ...هلا بيج

ضل كاعد شويه يمهم واني رحت حميت اله الغدا لكيته بالحمام ومرتضئ ومشمش دخلو مطينين من الحديقه غسلت الهم وكملت الغدا...

طلع من الحمام صاح عليهم كلهن...تعالن تغدن وياي هن ماقبلن كالن متغديات...

بعدها اشرلي بعيونه اجي اگابله واتغده وياه هو هاي طبيعته اذا ياكل لازم اكون موجوده حتئ لو متخومه من الاكل...

كعدنه اني و ولدي ناكل وياه وكتله اريد اروح ويه سجئ ناجر بدلات هو ابد ما عارض كال يالله اني اوصلكم وارجع انام لان تعبان...

عاد اني حضرت نفسي لبست مثل الصدريه لونها بيجي ومخططه باسود وستره كابوي وياه هو كامل يعني ولبست شال كريمي وحذاء فلات كابوي ...

بس مخليت مكياج لان هو ميقبل وهماتين السوك محلو واحد يدخله بمكياج واني بالمكياج اطلع بزون ملطخه...

اخذت ويايه بس مرتضئ ومشمش ابو كال خلي،يمي واشواق كالت اني ادير بالي علئ غزوله...

صدك هو اخذنه بسياره بس حسيته ضاج من لبسنه والحمد لله التزم الصمت...

نزلنه رحنه كبل علئ الايجارات وهو رجع للبيت...

دخلنه كم محل وسجئ ميعجبها شئ ...

بعدها دخلنه لمحل صعدنه للطابق الثاني جان اكو قنفه كعدنه عليها وهو ضل يطلع بالبدلات...

ومرتضئ كل شويه وكال...لا ان علوه...« لا مو حلوه »

اني عجبتني بدله للحنه بس هي جانت شويه ضخمه لونها زيتوني كولش حلوه تقريبا احلئ بدله بالمحل..

سجئ هماتين عجبتها اتفقنه علئ بدلة الحنه وبعدها بدلة العرس خطيه الولد هلك وهو يطلع الها بالبدلات

اني كلتلها ..سجئ لا تختارين بدلة بيضه احس الكل لبسها اخذي اوف وايت حلو هل لون...

هو الولد كال حطلعلكم بدله تجننن هسه وصلت لونها اوف وايت

صدك طلعلنه بدلة كوولش حلوه جان ردنها تول خفيف وكلها خرز والطويله من وره حيييل عبالك ملكيه عجبتنه حيل اجرناهن...

وعود هاي شنو مرتضئ خبل ابو البدلات كل شويه وكلها...ايييع ان علوات...

ضربه الولد علئ خده علئ كيف كله...ولك اشو انت وكح ليش تخليني اكتلك شبيهن بدلاتي مو حلوات..

رد عليه بغضب...هلاووو والله موتك اقكك بقابوگه...« اطكك بطابوكه »

ضحك عليه بصوت عالي وشاله باسه بخده هو دفعه كله...نعله ابوك نعله ابو ممش حايس

الولد باوع النه واحنه فشلانات كال بتساؤل...منو مشمش الخايس

ضحكت ماما رضيه كلتله...اي هذا اخو التوم هم بينهم عداوه من زمان واحد ميحب الثاني

ضحك الولد ورجع باسه كال...لعد خوش،من تجون تاخذون البدلات جيبولنه مشمش الخايس اريد اشوفه بحلات هذا...

جاوبته سجئ...هم تووم اكيد يتشابهون

هو باوعلي كال...هذا الطفل اخووج كلش يشبهج

ضحكت وباعتلهن بفشله رجعت باوعت اله...لا مو اخويه ابني

باوعلي مصدوم كال...لا صدك كبير مقارنه بيج عبالي منتزوجه

ردت عليه رضيه...اي مو هي تزوجت صغيره

كال بتنهيده...عاد ابوهم حلوو

جاوبته بسرعه...ايييي يجننن يشبهم حييل

باوعتلي رضيه بنص عين كالت...ولج منين يشبهم لا يمه جذب لا يشبهم ولا شئ هم يشبهونها احنه ابنه مملوح ومن صدك حلو بس لا اشكر ولا عيونه ملونه اعذرها يمه عندها قلة نظر...

باوعت لماما رضيه مصدومه...ياااا يعني قصدج جاسر محلو ...؟

كالت بتنهيده...لا حلووو بس مو مثلج انتي وجهالج شكران وملونين

رديت عليها بقرف...ايييع وشنو الاشكر الفاهي ابو مرتضئ كله رجوله...

الولد رد عليه بعتب هو خطيه جان اشكر وعيونه ملونه كال...لا عاد مو هيج قصف عشوائي وعينك عينك شبينه الشكران نجنن...

تمتمت بفشله...لا مو قصدي بس كل واحد وذوقه اني احب....سكتت مكملت كلامي احس طوختها دا اريد اكوله مثل زوجي لان الاسمر مثل الجمر ههههههه

رجع باوعلي كلي...بس هذا ابنج يشبهني الله عليج مو يشبهني والله عندي صورة من اني صغير اشبهه حيل

رديت عليه بسرعه...لا والله ابني احله ..

سكت الولد بعدها كال...اذا تردين اخذي فستان وبدون أجار تلبسي ورجعي ويه البدلات...

ترددت اخذ بس سجيوه ضلت تلح عليه اخذي ما اخذي وبلاش ومال البلاش حلو وشعره من جلد خنزير هههههه

سوتلي واهس عجبني فستان فضي قصير حييل فوك من الركبه وبدون اكمام بس يجنن اتردد اخذه اخاف جاسر يخبزني بصونده بس سجئ لحت عليه ...

اجرته وبيوم الحنه من ناخذ البدله اخذه ...ومرتضئ كل شويه وكال بتهديد ويسوي حركات بيده...اودفي اودفي اله دل بابا عليج احجين ويه ابو بدلات ان علوه ...« اوكفي اوكفي اله اكل لبابا عليج تحجين ويه ابو بدلات محلوه »

عاد اني اغريته ورشيته اشتريتله سياره وعصير وسكت عني ..

فتنه جان اكو واحد واكف يبيع احذيه كال...اووويلي شهل نزاكه شهل عيون التكتل شكد حلوه باع الخشم طايح بلحلگ

كلتلها...ماما رضيه هذا يقصد عليج

كالت..خاف دره بيه اشتريت شحاطه وجواريب

ضلينه نضحك ومرتضئ كال..سكيته هاد واحد دول دد علوة الحگ قايح بالحشم...

رجعنه للبيت لكيت هدار تلعب هي وبنت اشواق ومشمش لازم الايباد والديج بحضنه ويباوعون علئ ماشه والدب...

كعدنه ضلينه نسولف اني وياهن بعد شويه هن خلن وراحن كلتلهن ضلن للعشا مقبلن...

خليتهم يلعبون ودخلت للغرفه شفته نايم ومكتف اديه عضيت شفايفي...عزا اني شسويت شلون اجيب هيج فستان بس لا يضل يحجي عليه ويرزلني...

بس شنوو والله ما اله حق غير حنة مال بنات قابل حطلع كدام الزلم عود من يجون بيت نبيل ادخل جوه وابدل...

كعدت قريب منه ضليت اباوعله ابتسمت وكلبي يدك حيل رغم قربي منه بس مدري شبيه تتحرك كل مشاعري من اتقرب منه...

ضليت صافنه بوجهه وهو فتح عيونه بسرعه كمزت ودرت وجهي عنه عاد هو ضحك وسحبني نومني يمه ولف اديه علئ خصري...

كال...هااا اجرتوا

هزيت راسي بأي

رد عليه...اي اشتريتي ملابس للعرس والحنه لو لا

بلعت ريكي...هااا اي للحنه عندي فستان حلو والعرس البس بنطلون يعني شئ بسيط

رجع خصلة شعري وره اذني كال...صايره حلوه

ضحكت...انت الحلو

تهور عاد هو كعد بلهفه ولزم وجهي بثنين اديه وباسني حييل...

ضحكت ونزلت راسي كتله...خلي اشوف جهالك لا يحركونه ...

رد عليه...عوفيهم وضلي يمي

حطيت راسي علئ صدره كتله...العمر كله يمك...شعندي غيرك

من يگلها ظلي يمي
تگله: شعندي غيرك يا حِزن عيني وبچيها🥺♥️

دخلت القوات القذره علينه مشمش وهدار ومرتضئ وضلوا يلعبون وياه...

وغزل تحجي مكسيكي مدري مصلاويه مدري هندي..بققق بقااا هههه مدري شنوو تحجي...

مرتضئ كال...بابا واحد بسود بايع علئ ماما دول اووف حلد طايح بالحمش...« واحد بالسوك يباوع لماما يكول اوف الحلگ طايح بالخشم...عود الخشم طايح بالحلك...»

هو جاسر يفتهم كلامه كال...هذا شيحجي

رديت عليه باستنكار ...جذاب لا تصدكه

رد بعناد ...والله والله حتئ دول دد علوووه «حتئ يكول شكد حلوه »

جاسر باوعلي بغضب وعقد حواجبه...ادبسز حيوان مطي وين هذا وين صاير اروح اطيح حضه

بلعت ريكي...اندري حتئ مشفته والله وهذا مرتضئ جذاب يزيد وبعدين احنه شدخلنه هم سرسريه اني شذنبي

رد عليه باستنكار...اني حجيت عليج ؟

بلعت ريكي...لا بس انت ضجت

جر نفس...اي طبعا اضوج غير مريتي انتي ما اريد غيري يتغزل بيج

رديت عليه بصدمه مصطنعه...يااا عساس اني معترفه بغزل ذاك والله عبالك يسبني مو يغازلني

وبعدين هو يمكن يقصد ماما رضيه لو سجئ لان ماما رضيه كالت هاي عليه لان مشتريه شحاطه جديده

ابتسم ونزل راسه وهزه باسئ رجع باوعلي كال...اعرفهم عيونهم زايغه عليج هو اني وياج ما سالم من عباد الله ...

كتله ...جاسر خلي يولون شنو السالفه زبالتيش هم عساس...هسه هو اني اشوف واحد غيرك

عض شفته بلهفه كال...والله لو مو ولدج جان هسه انتي بخبر كان

ضحكت...فديتهم دوم مساندين امهم..

رد عليه ...اي ملاعيين الوالدين كاطعين رزقي اكعد ب12 باليل كاعدين اكعد بسته الصبح كاعدين شوكت اخذ راحتي ما ادري

ابتسمت..منو گلك تخلف توم تحمل نتيجة أخطائك

رد عليه ببرود...لا قررت ازوجهم وازوج غزوله واطلعهم كل واحد ببيت واخذ راحتي

ضحكت...حلو يصفا النه الجووو ههههههههههه

هز ايده بتنهيده...شوكت يصفئ ما اعرف والله

ضربته علئ كتفه...يصفئ يصفئ بس انت تفائل بالخير وكول يالله تفائلوا بالخير تجدوه...

ضلينه علئ هل حال وهو عاد عافني ضل يلعب بهدار وهي تحبه حييل اكثر واحد تحبه مو حبا بي بس لان من يجي من الدوام يطلعها ويفرفرها وهي تحب الدياحه لهذا السبب هي تحبه

بس فدوه الكلبها لوتيه تكعدنه الصبح ادد ادد عود اكعد تريدنه نتريگ...

مرت الايام وقبل بيوم من الحنه مالت سجئ هي رادت اني اروح وياها للصالون بس اني شنو والله وقت ما عندي ابد وهماتين اطفالي اخاف عليهم

بس بعد شسوي اكول خطيه يتيمه وتريدني وياها رغم اخويه قتل ابوها بس هي تريدني...

ماما رضيه كالت اخذي وياج بس مشمش لان وكح وما يكعد ويضل يتعارك ويه مرتضئ...

عاد اني كلتلها ميخالف...جاسر باليل كال خلينه نروح نبات عند اهلي باجر الحنه اني مقبلت ما اريد ينعاد عليه نفس المعاناة وخالتي ام فلاح شويه اتردد منها واحس نفسي ثكيله ...

بس هو اصر اله نروح استسلمت للامر الواقع ورحت دخلت لكيت البنات كولهن مجتمعات وقار واشواق وشهد وريهام...

و واشواق وشهد يسون شيره لسجئ وهي تبجي وتغلط عليهن وهن ساكتات ومتحملات...

ضلينه عندهم ردت اروح للصالون اني وسجئ جان البيت هدوء والبنات لسه نايمات بس اني وسجئ كاعدات خالتي و ماما رضيه...

كلت خلي اسبح قبل لا اروح للصالون دخلت للحمام واشوف ذيج الشوفه

صرصره عندها شوارب وتلمع حمرره علئ سوده وكبيره شمرت عليها النعال دا اطردها وهي طارت واني عطت وخليت وطلعت اركض واني انكت بملابسي

و وجهي مخطوف وارجف واحجي بصوت...بنت النعال بنت الزمال بربوك شلون طارت عليه

ما اسمع اله واحد كال باستغراب...منو هاي بنت النعال

درت وجهي عليه بفشله...هاااا اءءءء هاي الصرصره بالحمام طياريه

هز ايده كال بتنهيده...عبالي مدري منو وياج وتغلطين عليها...

فشلت من يمي وخليت ورحت اشوف جاسر وين...هو طالب اجازه اليوم وباجر...

دخلت للاستقبال شفته متمدد علئ القنفه والريمونت بيده ويدير بالقنوات وهدوء حييل وجعفر كاعد بصفه يطكطك بموبايله...

جريت نفس كتله بترقب...جاسر

رفع عيونه اليه وباوعلي كال...هااا

بلعت ريكي بتوتر وفشله...اريد اسبح وصرصره بالحمام وكل شويه طايره بمكان تعال اكتلها....

باوعلي وضحك وهز راسه بعدم قبول بعدها باوع الجعفر كله...جعفر

جعفر كمز من مكانه...هااا خويه ابو مرتضئ اتفضل

جاسر بتنهيده...روح اكتل الصرصره الجولييت

باوعلي جعفر وصفن عليه حسيته راح يجبني براشدي رجع باوع الجعفر وهو يتمسكن كال...خويه فدوه منو گلك اني بف باف قاتل الحشرات

وبعدين شدعوه عليها مرتك هيج دلوعه هي صرصره الزكها بنعال وتروح

رديت عليه برجاء...لا فدوه جعفر فدوه هاي صرصره طياريه برتبة طيار تخوف

كال...والله بطرانه خرب حضي بس جعفر مصار طيار

باوعله جاسر وخزره...اكلك كوووم شكد عجوزي

هو وكف ويدردم ويحجي...هسه هي مرتي والله يالله ترئ ميصير هيج تزوجت وما فتكيت منكم

جاسر كله ببرود وهو يدخن...شكلت جعفر

رد عليه...هاا اكول الحمام ينراد اله تفليش لان كله صراصر...

مشينه اني مدخلت ضليت واكفه بباب الحمام وجعفر كال...كتلتها

هو طلع واني دخلت وما اشوف اله طارت عليه واني طلعت اركض واكمز وابجي وانكث بملابسي طلع جاسر من الاستقبال يركض وماما رضيه وخاله ام فلاح وكلها تصيح شبيج شبيج

واني اصرخ يمه كمزت عليه كمزت عليه عضتني يمه

لزمني جاسر قوي ثبتني وبعدها صاح بوجهي هدئت من روعي كال...اححي شبيج

بلعت ريكي واني ارجف...الصرصره كمزت عليه وطارت علئ رگبتي جعفر جذب عليه يكول كتلتها وهو جذب مكاتلها...

عاد هو باوع الجعفر وخزره ...هسه تدورها وتكتلها وتشيلها وتشمرها

رد عليه...هي طارت وين الكاها

جاسر...تطير وراها..

ضل جعفر نعاله ويفتر يريد يكتل الصرصره وهي كل شويه وطارت بمكان...

انوب اخذ بنته فطومه وطلع يجيب ريوك...

فدوه فطومه ومريم وهدار نفس الكصه ومتصاحبات ويلعبن...

دخلت للحمام علكت ملابسي وما اشوف اله جاسر دخل ويايه باوعتله بخوف وخجل...يا جاسر اطلع لحد يجي

باوع لجدران الحايط كال...غير استفقد الاحوال اخاف اكو صراصر..

هزيت راسي...لا اليوم الظاهر ما اسبح ساعه الصرصر ساعه انت وشويه ويطلعلي ابو بريص حتئ من صدك انجلط

سحبني من خصري كال..سبحيني

ابتسمت وابتعدت عنه...روح لأمك تسبحك اني شدخلني ...

باوعلي بنص عين...لج بربوك امي شدخلها امي مو سلمتني الج وانتي ممداريتني كاطعه بيه

درته للباب واني اضحك ...اطلع اطلع عود اسبحك ببيتنه مو بيت امك اخاف تغار عليك

ضحك وباس خدي وطلع عاد اني سبحت بسرعه وطلعت كملنه شغلاتنه واخذت مشمش وجاسر وصلنه للصالون ..

وماما رضيه همات اجت ويانه جابت النه البدلات و الفستان وخلت وراحت ...

ضلينه اني وياها بالصالون هي متحمسه تاخذ صور وترجع ليوره شسوروا شعرها وتخابر بنبيل وتضحك وياه وتسولف ...

جانوا مشغلين اغنيه بالصالون اسمها ارد اسجل روحي بسمك

جنت مندمجه ويه كلمات الاغنيه وسارحه ويه جاسر اول مره اسمع هاي الاغنيه بس متت عليها...

راح اسجل روحي بإسمك

حتى اضل كل عمري يمك

انت بس خليك يمي

خلي انسى وياك همي

خلصت الاغنيه واني كنكنت علئ الرصيد وكل شويه واسمعها انوب نزلتها...

كتبت رساله لجاسر كتبتله...انت طيري وصعبة غيري اللي يفهمك

من احظنك تنسى حزنك تنسى همك...

شلونك طيري...

ماكو ثواني ورد عليه...هلا يبووي

وياها سمايل هذا البريئ الجنه خجلان يريد يبجي

ضحكت هذا السمايل ابد ما يمثل جاسر

رجع كتب...شنو اليوم طيرج ؟ سالمين

كتبت بضحكه...اي طيري عندك مانع

اجتني رسالته...لا بويه كلي باسمج طيرج والزاجل مالتج

كتبت...ههههه احلئ زاجل مشتاقتلك

رد كتب...والله فد بربوك تكج ماكو يمي منشفته عليه ومن تطلعين تتغزلين بيه شيسموها هاي الموت البطيئ...بسيطه ترجعين لو لا

ردت اغير الموضوع كتبت...طارش رحت للبصرا

هو كتب...لاگتني وحده شگرا

كتبت بضحكه...هااا جاسر منين نفوت ههههه

كتب...هاي الجربايه هذا الحمام

ابتسمت كتبت...انت فد واحد متستحي محد مربيك

رد عليه...تعالي ربيني

كتبت...اوك من ارجع عوود

رد عليه...انتظرج حبيبتي

كتله...صدك جاسر اني وسجئ ممتريكين ونتاخر منو يجيب النه غدا سجئ دكول حكول لنبيل اخو يجيب النه

جاوبني ...لا هسه ادز جعفر يجيب الكم غدا

كتله...اوك ننتظر

كتبتله باي حبيبي وياه سمايل ابو بوسه وهو كذلك

سجئ سوت مكياج وبعد التسريحه

شويه واجه جعفر وصفت اله الصالون وطلعتله بعد ما اتصل عليه جايب لفات مال شاورما وبيبسي

اخذت اللفات كلتلها...تعالي سجئ اكلي

هي خطيه جوعانه اكلت اني بس،عضيت اللفه لعبت نفسي طحت بيها وشمرتها

كالت...هااا جولي شبيج ليش متاكلين ؟

كلتلها بقرف...زفره حييييل وحامضه عبالك اللحم خايس

هي كملت اكل كالت...اي والله بس اني جوعانه

مشمش ما اكل...

بدلت اله بالصالون واني شسورت شعري ومكيجتني ام الصالون ولبست فساتني وكلها دكولي اليوم خطبتج كلتلهم...لا عرس بنت حمايه...

هي كملت مكياج ولبست بدلتها ساعدتها بيها...

وصبغت اضافرها وخليت الها عطر واضاءه لجسمها...خطيه اهتميت بيها يتيمه ومحد الها...

اشو هاي شويه ولزمت بطنها بوجع كالت...اكولج جولي بطني اذتني ومعدتي

كلتلها بخوف..يا عزا شكو شبيج تعالي اكعدي ارتاحي...

كعدت وكل شويه ولزمت بطنها وجرت نفس خفت عليها حييل...

شويه وخابر صلاح كال كملتو اجي اخذكم ...

صدك والله اجه اخذنه صلاح وكل شويه وضحك علئ سجئ وكلها...شنو عمو شو ذابتها علئ الصامت لا تحجين لا دكولين

وهي بس تضحك وساكته...

نزلنه اني جنت لابسه صايه ولابسه شال ومغطيه وجهي لان المكياج جان بارز ...

دخلنه جوه والهلاهل والركص تلگنه البنات ولكيت خاله صبريه جايه ضلت تدبج....تعالي تباركي يا من تحبين وخضر عودنه اليابس من سنين...

نزعناها البرنص كعدت علئ القنفه وخرنه البرنص كالت خالتي صبريه ..منين جابوك يمشمش كربله نبولي عريس وسجيوه نستله...

اني نزعت الصايه جنت حيل خجلانه من فستاني يالله احس نفسي طالعه اشبه عصفورة بغداد

هن البنات ورحمة بابا تعجبن عليه تخبلن شطالعه وشطالعه واني انزل بالفستان ومستحيه

ضلن البنات يركصن وشهد حامل وهمات بيها بنوته ولعبت لعب بالركص تكسر تكسر ...

و وقار همات حامل بس كاعده ...اني اجيت شويه ركصت وبعدها طلعت...

اول ما طلعت دا اروح لغرفة ماما رضيه دخلت للغرفه ويصير جاسر بوجهي احس گلبي هو مو باليسرئ تحول لليمنئ ...

هو رمش بعيونه واجت ماما رضيه شايله غزل ومبدله الها طالعه تجنن...

كال باستغراب...هاي منووو ؟

رضيه كلتله...البربوگ مالتك

فتح عيونه مصدوم كال...افااا اني مرتي مطلعه سيقانها امشي ولج بدلي بسيطه بسيطه نرجع للبيت لو لا ...

ماما رضيه كلتله...علئ كيفك وياها يمعود وحد من البنات

رد عليها بغضب...لا بله هاي لابسه ثوب مال نوم انوب يرحون يصوروها مثل وقار عاد النسوان ما يقصرن

خليت ورحت متعصبه يالله عبالي مموجود شجابه صعدت لغرفة ريهام وانوب نزلت اخذتلي فره واجيت شوفتهم فوستاني عشتو امداني

انوب صحت الريهام ردت ملابس انطتني فستان صوف احمر وقصير بس جوه الركبه بس كولش حلو لبسته جان ضيق حيل بارز ملامح جسمي...

اجيت كعدت يم خاله صبريه كالت ...هااا يمه جكليته شبيج ضايجه منو وياج بس لا ابو الرياء

ضحكت...اي خاله يكول لبسج مو محتشم انزعي

ردت عليه ...اول مره احبن ابو الرياء و اوكف بصفه ولج يمه صدك غير تشعين اخاف يطكونج عين زين سوه والله

جريت نفس...اني هماتين جنت متقيده معجبني

ضربتني علئ كتفي...اي يمه الستر حلو

جانت غزل بحضني ومشمش ومرتضئ كاعدين بصف سجاوي معجبين بيها...

وكل شويه واحد منهم جايني ...ماما اني اريد ازوج ججاوي علوه ما اليد فقومه حلدها سبير...اريد ازوج سجاوي حلوه

ضلينه شويه نركص واخوات سجئ مبدلات ويركصن انوب اجه العريس واهله

احنه وكفنه علئ صفحه وبدت مراسيم الحنه بس خطيه اباوع السجئ شكد ما فرحانه احس عندها وجع رغم احنه اول ما وصلنه انطوها حبايه ولبن

.......
سجى ..

طلعت من الصالون واحس بدوخة ووجع ببطني وومعدتي انزعجت كلش كوة اجر النفس ، هستوني مخليه رجليه على عتبة الصالون ودااطلع عثرت بالبدلة اجيت اوكع على وجهي وكوة لزمتني جوليت من ايدي وعدلت وكفتي واني انسندت عليها ..

غمضت عيوني وفتحت وجريت نفس كوة يطلع النفس بسبب وجع معدتي ..

همست بإذني جوليت ها حبيبتي انتي زينة لو لا ؟

رفعت حواجبي ليفوك ويه رفعت حواجبي غمضت عيوني وجاوبتها زينة زينة ليظل بالج ...

شدت هيه على اديه واخذتني للسيارة ...هم دااصعد طخ راسي بالسيارة ...

وكفت بمكاني من الصدمة ورفعت ايدي اتلمس تسريحتي خاف خربت .... اجيت ابجي يربي الله يستر من الجايات بس لا استشهد قبل لا اعرس ...

صعدت بالورة واجت كعدت يمي الوجع يروح ويرجع وجوليت كل شوي تطلع بوجهي وتتطمن عليه ..

همست بأذني يله هسه تشوفين نبيل وتصيرين زينة

ابتسمت بوجهه وجريت نفس ...

وصلنا للبيت ظليت احسب لخطواتي خاف اوكع انوب خاف ادعبل على وجهي ويخرب المكياج افكر بالمكياج اكثر مما افكر بنفسي لان طالعة حلوة ..

اني لابسة بدلة زيتوني منفشة من جوة وبيها حجر ناعم فضي وكرستال .. وكصة التفاحة على الصدر ..

دخلت للبيت استقبلوني بالهلاهل والجوكليت والكل ملتمين .. واني ابتسم للكل و اللويات مأذيتني بس صابرة ..

واجن خواتي يمي فرحانات ، مبدلات لابسات بدلات ومسرحين شعرهن ومخليات حمرة على شفايفهن دنكت بوستهن ولزمتهن من اديهن ..

كعدوني بالكوشة وهنه كعدن يمي وشغلوا الدي جي والكل يركصون ومنطلقين .. اني فرحتي بهذا اليوم غطت على كل الالم ..

اباوع للبيت واباوع ع الموجودين وبداخلي رغبة بوجود ام حنونة ومحبة تتواجد بقربي بهاليوم هذا بس ماشفتها ...

باوعت لبيبي عيونها مدمعة عرفتها تذكرت بابا ، نعصر گلبي حيل وحاجيتها بعيوني والله يا بيبي اني هم اتمنى ما ميت وموجود ويشوفني اطك ويا صور وتبقى ذكرى ..

دنكت راسي طبكت شفايفي على بعضها واختنكت بعبرتي قويت نفسي ماريد ابجي اني فرحانة اليوم بس اخخ لو ما هاللويات الي ببطني ما ادري ليش اله اليوم اتمرض ..

خواتي كاعدات يمي ويباوعن عليه ويضحكن لو شويه يكومن يركصن واني كومة وصيت عليهن بيبي وشهد رغم اعرف هم مراح يقصرون وياهم بس هم مقهورة راح اتركهن ..

بعدها شوية كالو اجه العريس .. ودخل نبيل واني عيوني تراقبه من بعيد احس خطف گلبي من بين ضلوعي بدخلته يبتسم ويباوع عليه من الاخير ووياه امه واخته

اجه لعندي باس راسي وايدي ويباوعلي ومبتسم واني على ابتسامتي..
سلمت على اهله وكعد بصفي ..

اول ماكعد وبنص الهووووسة .. شبك اصابعي ويه اصابعه ايدي صغيرة وناعمة وهو ايده ضخمة ضاعت اصابعي ببين اصابعه لم كف ايدي بعصرة چفه حيل غمضت عيوني وفتحتها واحس تدفيييت ...

وهمس بأذني حبيبتي اليوم كاعدة مكان الگمر طالعة تخبلين ..

باوعت عليه مبتسمة وبقيت مركزة بعيونه وهو يهمسلي احبج شنسوي معرسين باجر دخلي اخذج هسه مو احسن خير البر عاجله ويحجي ويضحك ..

اني اضحك وياه اجتني لوية ببطني كززت على اسناني حيل واختفت ضحكتي ..

هو حس بيه تقرب مني اكثر وايده وره ظهري ويقربني لصدره ويباوع بوجهي واني ملامحي متوجعة شوية ..

شبيج حبيبتي بيج شي ؟ يمعودة مالازم مالازم نعرس اليوم اشاقه هذا هو على باجر ..

خليت راسي على كتفه وايدي اللخ خليتها على ايده الي لازم بيها ايدي .. وهمست بصوت ناصي لا بس شويه بطني توجعني ..

ظل يستفسر شبيها بطنج حبيبي ؟ بيج شي !
بلعت ريك وجاوبته يمكن مستبردة ..

بعدها اجت امه انطته علبة الذهب وكفنا وهو ظل يلبسني الذهب ...

قطعنا الكيكة كوة اكلت اصلا بس لامست لساني وخرتها لان نفسي لعبانة كولش .. هو منتبه عليه ومحتار بيه ..

بعدها شغلوا اغنية هادئة لأليسا وهو اخذني من خصري وظلينا نركص سلو هو مقربني اله كلش ويهمس بإذني انفاسه دافية على بشرتي تحسسني بالارتياح وانسى وجعي شووية ..

بعدها كعدنا بالكوشة .. كال تردين ورى الحفلة اوديج للمستشفى ..

كتله واني اهز راسي وبايدي اعدل السترة مال القاط لالا حبيبي هسه شوي اصير زينة ..

كال لعد اجيبلج علاج من الصيدلية ...

لا والله ميحتاج ......

خله ايده على اكتافي وسحبني اله ويضحك
لعد اريدج قوية لباجر اهتمي بنفسي خووش ..

ضحكت بوجهه وبعدهه دفنت راسي بصدره بخجل ..

حنه ايدي ووراهه بوسني من راسي واديه وخدودي يردون يشلعونه امه واخته ويله ويله والكل يضحكون وهو هم يضحك ..
وراح ...

بعدها خلصت الحفلة بقوا قليل من اقاربنا .. ساعدتني شهد انزع البدلة ولبست فستان بسيط بنفسجي طوخ ..

كعدت بالهول وبعده الدي جي يشتغل بس اني دايخة حيل ولويات تروح وتجي ... رحت اغسل الحنة بالحمام ولعبت نفسي فد نوب وتقيئت واحس مصاريني حتطلع ...

ظليت اشهك ودموعي تجري ووحدي بالحمام ..
ولازمة بالمغسلة ومثبتة روحي بيها وبطني توجعني ..

شوية ارتاحيت باوعت لوجهي بالمراية حرامات ع المكياج اغسله هسه بعدني اريد اطكطك صوور كومة
الالم ماخلاني اشوف دربي واتونس كطيييعة شجاني اليوم ... غسلت حلكي وطلعت ...

حسيت بدووخه فضيعه
.........

جولييت وره مخلصت الحفله جاسر هو من حجه ويايه طلع بره راح مدري وين

رجع وره مخلصت الحفله كال بهدوء...يالله جولي مشينه خلينه نروح للبيتنا

اني حضرت نفسي وطلعنه ومشمش ومرتضئ مطنكرين ويحجون علئ ابوهم

هو باوعلهم بالسياره كلهم...شبيكم ؟

ردوا عليه...تنو نريد بعد وتت نليد نردص...« شنو بعد وكت نريد نركص »

رفع حاجب...متستحون راقصات انتم وتركصون

رد عليه مشمش...هلاوو. لعد عمو نبيل مو يردص...« يركص »

طنكروا اله ينزلون عاد هو كلهم...يالله انزلو وخلو عمو جعفر يجيبكم فد شويه...

هم ما صدكوا نزلوا يركضون واني تخبلت ضليت احجي عليه مقبلت يضلون هنا بس هو ما اهتم...

بعدين باوعلي كال...جبتي فستانج الي اجرتي

رديت عليه بتنهيده....لا

كال بأمر...امشي انزلي جيبي وتعالي

رفعت حاجب...لا ما اريده

رد عليه بغضب...تنزلين لو شلووون

جريت نفس...مو معجبك

غمض عيونه بقهر...لا تجلطيني انزلي

فتحت الباب ونزلت وخليت غزوله يمه

اني دخلت وما اسمع بس الصريخ والعياط....فزيت مرعوبه من مكاني

نهاية الحنه نتظروني باجر بالعرس 💔

كونوا انتم كونوا بخير...احبكم 😘

نور سمو العراق ❤

ملحكت اكمل العرس ما عندي وقت وجان عندي امتحان ان شاء الله باجر اكمله...

انتظروني يبعد چبدي 😌😌😌