رواية #جوليت وأسرها.... الفصل 106 - بقلم الكاتبه سمو العراق

بارت العرس
رواية....جولييت واسرها...غياهب الإنتقام
بقلمي...نور سمو العراق

🌹🌹🌹🌹🌹🌹🌹

هي مثل عيونچ الدنيا وسيعه

وتصغر بگد محبس ايدچ لو بَعدتي .

................................

دخلت بسرعه دا اجيب الفستان لان جاسر يريده هو يحجي علئ الشئ الي البسه بس من هاي يكول جيبي اليه...

اول ما دخلت وما اسمع بس العياط عاد اني نشف الدم بجسمي نسيت سجئ،متخربطه عبالي مشمش ومجتبئ حرگوا الببيت

دخلت اركض وما اشوف اله خالتي ام فلاح وماما رضيه مدنكات ويصرخن باوعت شفتها هاي رجلين سجئ..

ضربت علئ خدي...يا عزا اسم الله شبيها سجئ..

صاحت بيه خالتي بعصبية خلتني جفلت بمكاني...روحي صيحي جاااسر مسرحيه عدنا

ركضت بسرعه وگلبي يدك والبنات يصيحن شكووو شكووو...

طلعت شفت جاسر كاعد بالصدر ومركز بالشارع من شافني باوعلي كال...لا دكولين ما لكيته

جاوبته بعد ما بلعت ريكي...لاااا بس سجئ تخربطت و وكعت وخالتي كالت صيحي...

هو تخبل نزل بسرعه من السياره وركض للبيت واني اركض وراه بعد ما جبت غزوله ويايه شافها خطيه واكعه صاح بيهم قبل لا يشيلها...جيبي الها شئ نلبسها...

هي خطيه جانت لابسه فستان قصير...صدك هن جابن الها عبايه لبسنها وهو شالها وطلع بيها ...

وخالتي راحت وياها هي وماما رضيه...

واني ضليت كاعده يم البنات خطيه عماتها ونسوان عمها تخبلن عليها...

ريهام تسبح وتدعيلها و وقار خابرت جابر كلتله روح لجاسر خطيه تخربطت سجئ ...

اني كل شويه واتصل بجاسر بس هو ميجاوبني خفت حيل عليها الدنيا تخوف...

وانوب اجوي صلاح وجعفر كالو خير شكو شبيجن

ردت عليه شهد...سجئ تخربطت وعمو جاسر اخذها للمستشفئ

جر نفس...شنو من الفرحه تخربطت

رد عليه صلاح بغضب...شبيك انت ما عندك كلمة بيها خير خل نشوف البنيه شبيها...

شويه وصلاح اتصل بجاسر ومن خلال مكالمته كال...شنوو تسمم ليش شنو ماكله هي ...يله ان شاء الله هسه راح اجيك

قفل الخط وباوع علينه كال...هي سجئ شماكله طالع عندها تسمم

رمشت بعيوني...هي مماكله اي شئ بس هي خطيه من جنه بالصالون اكلت لفه جابها النه جعفر ..

جعفر رفع اديه باستنكار كال...لا تذبوها براسي عمي اني ما الي شغل هي البارحه باليل خلصتها تاكل اندومي وهاي من الاندومي...

باوعله صلاح وتنهد كله...تروح وياي للمستشفئ

كعد علئ القنفه باريحيه كال...لا والله ما اروح انوب هناك يتلگاني جاسر وهو شلون يحبني ليشوفه يكول ماخذ صاحبته...

هز ايده صلاح وخله وراح...

خالتي صبريه جانت مموجوده راحت ويه اختها ام جابر لبيتهم وكالت باجر اجي...

ضلينه كاعدين وميتين خووف الساعه صارت بالوحده ونص وهم ماكوو...

بعدين ريهام اتصلت علئ صلاح كلها...لا شويه احسن شدولها مغذي وغسلوا معدتها شويه ونطلع...

اني جهالي نامو خليتهم بغرفة ماما رضيه ارتاحيت شويه منهم لان وكحين ما شاء الله عليهم...

واني نعست اذا جاسر يلزمني من خشمي اطيح كاعده من الصبح والله...

تمددت بصف أطفالي واغفي بس صامده ما انام...

شويه وسمعت ضجه خليت و ورحت اركض واشوفهم كلهم اجوي وسجئ جان لازمها جاسر

كعدها علئ القنفه وهي وجهها اصفر والكحل سايل كلها..اكعدي عمو ارتاحي ارتاحي...

باوع علينه كال ...وين ابو فطومه الجلف

شهد بلعت ريكها ...نايم

رد عليها بحزم...روحي كعدي

هي خطيه راحت بسرعه واني تحمدت لسجئ بالسلامه وبستها...

تمددت هي علئ القنفه واحنه طلعنه للحوش اجه جعفر وهو يفرك بعيونه...هااا ابو مرتضئ خير ان شاء الله شهد دكول رايدني...

باوعله بهدوء وبعدها جر نفس...اكلك انت من جبت للبنات غدا من المطعم من يا زباله جبته

رد عليه بكذب...من ارقئ مطعم ليش عجبهن

جاوبه جاسر بحده...لا سممهن

واردف بغضب...ولك اني مو انطيتك فلوس وكتلك جيبلهن غدا بي خير تجيب الهن كص مال مطايه ليش ؟

جاوبه بصدمه...مو مال مطايه والقران قبل من جنت اشرب اكل منه شو ما تسممت

رد عليه بقهر...اي اكيد ميصير بيك شئ غير عار

جر نفس حزين...شبيك جاسر شبيك ليش هيج تعاملني ترئ والله جزعت هو هذا الفقير محد يريده

وبعدين اذا مرتك وبنت اخوك دلوعات اني شنو ذنبي ترئ ميصير هيج كل مشكله وخليتوها براسي...هاي بدل ما تحاسبهن...

غمض عيونه جاسر بقهر...والله تمنيت مرتك ما واكفه جان عرفت شلون اتصرف وياك ولك كل ما اكول ميخالف كبر صار اب احترمه كبره بعين نفسه وانت لا ابالي يدخل منا يطلع منا انت معقوله ابن مهيوب

رفع اكتافه...والله ما ادري اسأل امي

عاد جاسر تخبل لزمه من ياخته كله...اكل تبن لك لا تضل تجفص لا اطيح حضك

هو سكتت ما حجه

كله...منين جبت هاي اللفات وبيش ؟

بلع ريكه...من مطعم راقي واللفه بخمسه

جاسر تنهد ...بدون جذب ؟

نزل راسه...اءءء هااا اي اللفه بالف بس والله نضيف صايره عليه كتل

باوعله جاسر من فوك ليجوه كله...وخر من وجهي وخر لا بارك الله بيك هاي عود اني موصيه...

خله وراح بدون احساس وشال بنته جانت لحد الان كاعده ويلعب بيها ويضحك بيها...

كعدوا بالحوش علئ الكراسي ضلو يسولفون صارت بالثنتين ونص صاح عليه كال...يله جولي امشي

كلتله ماما رضيه ...صدك جذب يمه شنو مطرودين باتو اليوم هنا وباجر روحوا شنو متزازين

جر نفس ولزم خصره...لا نروح احسن خلونه نروح

ردت عليه خالتي ام فلاح...لا تسلب راحة الجهال باتو اليوم وباجر روحوا عود اصلا الوقت متاخر...

باوعلي ...يالله روحي نامي باجر عود نروح...

خليت ورحت بغرفة ماما رضيه وهو نام بالاستقبال...

سبحت وبدلت دا انام مكدرت ...

فتحت موبايلي لكيته كاتب..فرحانه مووو

كتبت باستغراب...ليش؟

كتب...لان ما شفت الفستان وباجر يروح ويه البدله موو

ضحكت وكتب...اي صح باجر يروح ما عندك حظ يالله خيرها بغيرها

رد عليه...عادي ودي ويه بدلة العرس من ياخذوها واذا سالو رضيه خلي دكول نسيته وتجيبه ويه بدلة العرس

كتبت...يعني ما تطير طير بضباب

رد كتب...افااا طيرج يطير طير بضباب لا ما طلبتها منج ...انتي نايمه يم. رضيه

رديت عليه باستغراب...اييي

اجتني رسالته...يله تمام راح اجي انام يمكم احس البيت وحشه واني نايم الوحدي منبوذ عبالك بيه كورونا...

كتبت...اولا اسم الله عليك كورونا لخالتك ام هاله ...بس مال تجي تنام يمنه هاي واكفه عيب ترا

رد عليه...ليش يابه عيب نايم بحضن امي رضيه قابل نايم بحضنج ام عقل منحرف

رفعت حاجب...لا والله اخاف مترضه ميت عليه رضيه انت

كتب...اي ميت عليه ترئ امي والجنه تحت اقدام الامهات ...

ما اشوف اله فتح الباب وتمدد بصفي وتغطه لزمته بخجل...عزا عزااا يااا جاسر مو لهلدرجه اطلع عيب والله عيب الصبح يكعدون يكولون ذول شبيهم

حط ايده علئ كتفي وحضني وغمض عيونه كال...كافي منعس وبعدين ترئ رجال ومرته قابل نايم ويه جيرانه

ما اشوف اله رضيه كعدت كالت...يمه جولييت

اني يبست بمكاني وغطيت وجهه جاسر عبالك بايگه بوگه كلتلها بخجل...هااا ماما رايده شئ

كالت...اي يمه فدوه جيبيلي مي نسيت اشرب حبوب الضغط

وكفت دا اجيب مي كالت ...اكلج هذا منو نايم بصفج ؟

بلعت ريكي...اءءء هااا ماما اي هذا جاسر يكول بارده الاستقبال

كالت بضحكه...بارده لو اشتاقلج

هو رد عليها...لا يمه اشتاقيت الج

ضحكت كلتله...اي مو شفتك نمت بحضني

حك ركبته بفشله...مو لكيتج نايمه محبيت ازعجج

جرت نفس...صدكتك

هو رجع نام واني جبت مي  واجيت شربت ماما رضيه ونمت شويه بعيد عنه والله عيب من ماما

كعدت الصبح لكيته مموجود ومجتبئ ومرتضئ،كاعدين وهدار صاعده علئ ضهري وتضرب بيه...

جريت نفس و وخرتها بستها بخدها وبعدين خليت ورحت غسلت الحمد لله اول مره انام نومه مال اودام وجسمي مطالع...

طلعت برا لكيت البنات يتريكون وسجئ رايحه هي وماما رضيه للصالون جاسر مقبل اروح وياها كال اخاف تتخربط عاد ماما رضيه افهم مني وتعرف تتصرف

وهمات كال عندهم جلسة تصوير بابو نؤاس واخو نبيل يروح وياهم فماكو داعي ترحين وعيب من الولد واني اصلا فرحت لان ما احب اروح للصالون اتخبل من الصالون احس اتقييد...

لاگتني خالتي ام فلاح حجت بجمود كالت...عود نضفي البيت البنات كلهن حوامل ميكدرن

هزيت راسي بقبول وخليت ورحت لكيت خالة صبرية جايه هي وام جابر وبعد نسوان ما اعرفهن واول مره اشوفهن

كعدت شويه ين خالة صبريه كالت...هااا بت ابيش شبيج اليوم وجهج اصفر محاجيج جويسر ابو الرياء

ضحكت...لا خاله محد محاجيني والله بس لان تعبانه لبارحه.....

صدك تريكنه اني والجهال وغزوله ريگتها...

مرتضئ كاعد كال...ماما اني الوح وياج لعرس

باوعتله مصدومه...يا عرس مو هنا العرس

كال...لا من لوحين ويه عروسه وعمو نبيل

رفعت حاجب...لا تروح ليش متروح

برطم شفايفه...بيبي ام فلاح دول لبابا لا حلي ممش وروطي يلوحون ايانه بالزفه وبابا دلها لا ما يوحون ...

«بيبي ام فلاح دكول لبابا لا تخلي مرتضئ ومشمش يرحون ويانه بالزفه وبابا يكلها لا ميرحون

تنهدت بضيق...اي ماما عادي ضلو يم بابا

كتف اديه زعلان...هلاووو والله ولا عليه الووح يعني الوح ونعله نبيييل يالله...

ععفتهم ورحت نضفت البيت والبنات ويايه هماتين ينضفن ...

خابرت علئ ماما رضيه اسأل عن سجئ كالت...والله عندها اوجاع تروح وتجي خطيه الصبح كلت راح تموت وجهه صار اصفر انوب اشربها علاج وميفيد وياها...

تنهدت خطيه ما تهنت بعرسها كله من وره جعفر سممها همزين ما اكلت جان اني هسه بالفتحه الرابعه....

خلصنه الغده وكفينه المواعين واجو ناس خطار كالو اجت زهراء مرة الرائد رضا حييل فرحت وابتسمت تلقائيا اني شايفتها من زمان من وره ما سويت عملية عيوني اجت هي وزوجها وتعرفت عليها حيل حبابه

طلعت سلمت عليها جانت لابسه ستره سوده وبنطلون اسود وتشيريت ابيض وشال وردي فاتح لافته لفئه هادئه ومخليه مكياج قليل ولابسه حذاء شويه كعب بلون الشال حييل نازكه....

كالت...جيت اني ورضا هو راد ياخذني لاهل نبيل بس اني ما اعرفهم فكتله خلي نروح لبيت ابو مرتضئ ومناك نروح ويه بيت نبيل للزفه ههههه ضربت عصفورين بحجر

ضحكت...زين تسوين والله هههههه شلونج مشتاقتلح رضا شلونه وياج حتئ اذا مو زين اخلي جاسر يسجنه انفرادي

طكتها ضحكه...ينرادله انفرادي والله لج موتني موتني شكد يتطلب وانوب اني حامل صاير مزاجي برتقالي وهرموناتي صاعده كل شويه وتعاركنه بس يرجع يصالحني الحمد لله هههههههههههههه

ابتسمت بتنهيده...هم كلهم هيج يسوون المشاكل انوب يتحسفون

اجت وقار ضلت تسولف وياها انوب شغلن الديجي ضلن يركصن

وخالتي صبريه دفعتهن ما همها حوامل وضلت تركص وتدبچ رشيت الدرب ريحان عدالي يمر منا ...

اني رحت بدلت لبست فستان قصير لونه ماروني وفتحت شعري واجيت اركص طلعن البنات صمون عشرة بالف...

واركص اني وخاله صبريه وهي فرحانه بيه وتصلي وتسمي

ليش ما طفه الديجي كالت ...ياااا جااا شلون هسه نضل لازمين سره علئ الصمون ولجن شغلنه انكسر ظهري...

رجعن شغلنه مره ثانيه واحنه نركص كله علئ اغنية سعدون الساعدي كال...ونبيع الك ما نختلف صمووون...عشرة بالف

صبرية لزمتني وفرت ايدي كالت...اييي ما يختلف اكيد جا هو الي يشوف هل جمال وهل بياض وصدر هم عنده اختلاف

بس جويسر ابو الرياء المخبل مدري شلون جان يختلف عليج

من كون اختلف عليه سعدون وما يبيعله صمون

ضحكت وحضنتها حيل وبستها بخدها..فدوه اروحلج خاله انتي عسل

كالت...صدك جولييت اي وحده تخطبني لا دكولين جانت متزوجه عليج العباس اريد اتزوج مليت مو تغارين مني ودكولين متزوجه ومطلكه

طكيتها بضحكه...لا لا اكيد ما اكول

عافتني وراحت كالت..بله خلي اروح ادورلي مره الكنوش من المعازيم بلكي الكالي وحده حلوه ودراسه انه كنوش ما ازوجه اله وحده مخلصه دراسه

خلت وراحت واني اضحك طفه الديجي واشوف مره تباوع عليه كاعده يم خالتي

سمعتها كالت لخالتي...هاي مو مرة جاسر لاخوها كتل ابنج ورجلج وبنت جاسر

حسيت مثل الصاعقه نزلت علئ راسي من كلامها

خالتي ردت عليها بجمود ...اي هي ليش

جرت نفس المره كلتلها...والله انتم بيت مهيوب عندكم رحمه واحد غيركم شمرها علئ اهلها واخذ جهالها

واردفت بحقد...الله عليج اريد اسألج سؤال من تشوفيها ما تشوفين اخو كتال ابو بيتج وشمعة بيتج فلاح ..بيها..

خالتي تنهدت بغصه...اشوف وانقهر بس ما اريد اضلمها وجاسر هو صاحب القرار اني ما الي كلمة بعد كلمته شنو اني اكدرله لو من اگله طلگها راح يطلگها لخاطري ؟

وبعدين هي البنيه رغم اشوف بيها اخوها بس مالها ذنب وصارت جنتنه وعدنه اطفال منها ما نريد نشتتهم ونصلح الغلط بالغلط...

جرت نفس المره كالت...والله اني منج احرك روحي ولا اشوفها كدامي

بس كولي هي حلوه وابنج ما يكدر يقاومها ولا يكدر يفرط بيها

خالتي ام فلاح سكتت واني خليت ورحت دخلت جوه وبعد ما طلعت العالم شبيها تثير نار الفتنه حتئ واحنه بالعرس منكدر نفرح اذا مجابو ذاك اليوم المشؤؤم...

انقهرت من كلامها حيل حاولت ما اتاثر ما كدرت خالتي ام فلاح تصير ويايع زينه بس اذا واحد حجه براسها تگلب عليه...

كالو اجت العروس اجت العروس اني بسرعه بدلت للجهال والغزوله وهمات بدلت لبست بنطلون ثلجي وقميص ابيض وفوكاه مثل الستره ورديه ولبست شال ابيض وحذاء بيضه ...

شويه وصاح عليه جاسر باوعلي من فوك ليجوه كال...هيج تطلعين

ابتسم...لا اكيد مو هيج البس فوكاهن صايه

جر نفس كال...عبالي

غمزلي ...بس طالعه تخبلين والله اذا اجيتي وكلتي خطبوني ما يصيرلج خير

باوعتله باستهزاء...حرام توكف بقسمتي

لزم ايدي حييل كال...ولج بربوك قسمتج وياي ما تصيرين الغيري

باوعتله بعصبية...فشر فشر نرجع للبيت لو ما نرجع

باوعلي بذوبان...شسويييلي؟

ضحكت...اربييك

عض شفته...اموووت علئ تربيتج

اردف بحب...صدك الفستان صار بالكنتور

حطيت ايدي علئ صدري...يااا عزا شلون منو نطاه الك

دار ضهره ومشه...مالج شغل اسرار دوله

هزيت ايدي يبووو لو يعرف هذا الفستان انطو اليه صدقه جاريه ببلاش ههههههه

هو جاسر ما ينغري بس بالفساتين المطلوبه من فستان ريهام لهذا الفستان الجبته ببلاش...

صحت عليه...صدك الجهال ميرحون

كال...اييي خليهم يمي بس غزل اخذيها...

عاد اني رحت كلتلهم وهم كالو ...هلاووو والله نلوح يعني نلووح وهو شعليه اصلا

طبعا هم ان شاء الله السنه الجايه بالمدرسه بس لحد الان يرتلون مدري شبيهم دكول ماما رضيه عادي جعفر بالثاني ابتدائي ونفسهم

عاد اني كلت يبوووو راحوا ولدي اذا طلعت تارثتهم علئ جعفر

صدك اجت الزفه ضلوا شويه هلاهل وركص انوب طلعنه دا نصعد بالكوستر وما اشوف اله مشمش وروضي اول الناس صاعدين بالكوستر ويركصون طالعين من الجام...

عزااا لعد ابوهم مو كلهم لا ترحون شلون لواته انهزموا اول الناس...

شفت جاسر واكف يحجي ويه نبيل ويوصي بي علئ سجئ

ببعدها انتبه عليه اجه يمي كال...شكو ليش واكفه ما تصعدين

اشرتله علئ مشمش ومرتضئ...شوف اخوان العريس مو مثلهم ومايقبلون ينزلون روح حاجيهم

هو راح كلهم بامر ...انزلوا

مشمش بتوسل...بابا عبيبي بابا والله اني عبك حلينه نلوح هي حير العلوسه بنت عمي الله يرحمه

ومرتضئ نفس كلاوات مجتبئ...اي والله بابا عباب عباب اني عبك واااااااي اكثر من سكيته

باوعلي وجر نفس كال...اخذيهم هو اني اكدر الكم انتي و ولدج

باوعتله برجاء...جاسر وكحين خليهم يرجعون

عاط بيه مجتبئ ...سعليج سكيته هو عرسج

جاسر بغضب...ولك انلصم صووتك لا تعلي علئ امك

باوعله بتمسكن...بابا عبيبي اعببك حل نلووح

اشرلي كال...اخذيهم

صعدت وكعدت بصفهم وهم يركصون مكيفين علئ طول الطريق والزفه...

....................

سجئ...

الصبح اخذوني للصالون واني بعدني على نفس الالم واللعبان نفس ، جابو لفات للصالون بس مااشتهيت اكل

وبلشت تشتغلي ام الصالون وكل شوي تسألني على التسريحة والمكياج تاخذ رأيّ واني اكوللها بكيفج ..

دارت الكرسي وظلت تباوعلي شبيج امي انت مجبورة على الزواج اهلج غاصبيج ..

ابتسمت لالا ابد بس شويه ماخذة برد والله هم حظي هذا

غمزتلي هاا خاف خايفة من هالليلة لتخافين ابد

لا ابد مخايفة والله بس كتلج صحتي مدري شبيه ..

كالت تحبيه ؟

دنكت راسي وهزيته اي لو ما احبه ما اتزوجه ..

كالت الله يهنيكم خلي يطلبولج عصير ليمون اشربي لاتبقين هيج ...

خليت ايدي على حلكي والله لعبانة نفسي ...

سوتلي التسريحة والمكياج ولبست البدلة ردان شيفون وضاهر شويه من الاكتاف ولونها اوف وايت ..

واكفة  واباوع لروحي بالمراية فرحانة حيل وطالعة كولش حلوة والله لو ما الم بطني واللويات جان صارت فرحتي اضعاف مضاعفة ..

بعدها خابروا كالوا جايين .. حضروني لبست البرنص  وطلعنا من الصالون استقبلني باسني على راسي واخذني ومبتسم .. خليت ايدي بيده وصعدت بالسيارة ..

كعد يمي وماما رضية من الجهة الثانية كعدت صرت بنصهم ورحنه لابو نؤاس سوينه جلست تصوير ..

اللقطات جانت كولش حلوة والمكان يجنن مليان ورد وخضار ومرجوحة كبيرة خاصة بكادر التصوير
والمصورات  اخذوا النا الصور ..

وبعدها انطلقنا لبيتنا كعدت بالكوشة وهو راح على اهله يجيبهم ..

كعدت كل شويه اجر نفس تعبانة حيل .. ونعسانة بس قاومت وابتسم ماكدر اخفي الفرحة الي بداخلي

بعدها اجو وصوت الهورنات والدك .. ودخلوا اهله يهوسون هووسات واجه هو اكعد يمي وامه تطش الجوكليت وتهلهل ..

كملوا الهوسات وبعدها لبسوني البرنص واخذني  من ايدي وطلعنا من البيت ..

جانوا عمامي واكفين بالباب .. سلمت عليهم وودعتهم
بوسوني على راسي ..

وعمو جاسر لزم نبيل من كتفه وظل يوصي عليه ..
واني اسمعه يحاجي دمعت عيوني وحسيت من صدُگ
عندي سند وظهر ..

جان صوته الجهوري يوصل لأسماعي ..
_ نبيل ما اوصيك على سجاوي بعد ، دير بالك عليها وماريدها بيوم تجي تشكي منك لو تجي متكدر خاطرها بيوم .. والله يسعدكم ..

جاوبه نبيل وهو مبتسم وبثقة أفاا ابو مرتضي من غير ماتوصي ..

سلم عليه وباركله وصعدنا بالسيارة ..

رحنا للبيت وفوتوني لبيتهم ويه الهوسات ومظاهر الفرح وذبحوا جوه رجلينا ودخلنا للبيت كعدنا بس اني رغم مبتسمة بس اريد اتمدد لان احس رجليه توجعني وبطني همين ..

بعدها فوتوني للغرفة وصارت الزفة ودخلوا طكوا صور ويانه ونبيل خطية حاس بيه ممرتاحة ..

بعدها طلعوا كلهم ..

هو اجه يمي ..مرر اصابعه فوك خدي بلهفة .. وعيونه تنطق مشاعر ..
سألني بصوت قلق : حبيبتي سجاوي لا تخوفيني عليج ولج والله ما أذيج لا تخافين وخليج واثقة مني ..

بلعت ريك بصوت مسموع وميلت نفسي عليه
وجاوبته بصوت متقطع ...
_ لا والله مخايفة منك وكلي ثقة بيك بس ماعرف ليش هيج توجعني بطني من البارحة لليوم تجيني لويات وتروح بعدها

رد وهو يسحبني عليه ويبوس براسي ..
مو كتلج البارحة اخذج للطبيب اجيبلج علاج عاندتي ..
بعدها تغيرت نبرته لشويه عصبية وهو يلزم وجهي باثنين اديه وليج سجى ماريدج تعاندين بعد من اكلج على شي يخص مصلحتج ابد ماترفضين

ضحكت حبيبي مو ادري تريد ترجع لبيتكم والحتة مالتك خو ما اشغلك بهاليوم شيكولون عليه من اول يوم شالعة گلبه!! وبعدين عمو اخذني ..

جاوب بحنية : لا المفروض اني اخذج بعد انتي صرتي مسؤوليتي ولا تفكرين هيج سجاوي كُلي الج اني مفهوم !

هزيت راسي وضحكت بمرح وسعادة وعيوني بعيوونه .. فرحانين اثنينا ببعض احنه
كام فتح البدلة من ورى واحس بأصابعه على ظهري ميلت راسي لأن دغدغني وقلصت جسمي ضحك هو وكال لان اول مرة بعدين تتعودين على لمساتي

ضحكت بخجل ودنكت راسي هو باسني على كصتي وساعدني بفتح التسريحة ..

وكفت سندت جسمي بالميز مال التواليت وصاكه اسناني هو حس بيه متألمة جابلي الملابس باوعت عليه خلانه هو حس بيه كال اخذي راحتج بدلي على كيفج واذا احتاجيتي شي صيحي عليه

هزيت راسي بموافقة واخذت من اديه الملابس واباوع اله بامتنان .. طلع هو واني بدلت ملابسي .. والدنيا تفتر بيه خطية انقهرت عليه وضجت لان حيل ضوجني الالم والدوخة

بعد دقايق دك الباب ودخل جنت مخليه ايدي على بطني ومدنكة راسي من فات هو باوعتله وشعري نازل على وجهي .. اجه باتجاهي ..

مرر اديه جوه ركبتي وضمني لصدره تشبثت بي بقووة وراسي على صدره رفعني هو وجسمي مرتخي بين اديه .. مثل جثة هامدة تعبانة حيل وخلصت طاقتي لليوم كله هسه وبهاللحظة

نزلني فوك الفراش ومدد بجانبي ، غمضت عيوني بضعف مستسلمة لحركات اصابعه وهو يمررها بين خصلات شعري برقة

بس احس بشفافه تلثم خدودي وكصتي و تتباطئ
على شفايفي ..

وخر خصلة من شعري صايرة على اذني وهمسلي
حبيبي سجاوي تتعشين قبل متنامين ؟

عدلت نومتي مددت صفح ورفعت ايدي خليتها على خصره واني اهز راسي برفض وبنبرة مخدرة
جاوبت لاء ما اشتهي ..

اخذ ايدي باسها وباس باطن كفي
وكام من يمي وحسيت بالغطى يوكع عليه وبهدوء ..

كعدت من الفجر فتحت عيوني بالبداية استغربت المكان اني وين شجابني هنا وين غرفتي وين جربايتي ..

بعدها تذكرت اني البارحة تزوجت ظليت اضحك على نفسي ..

التافيت شفته نبيل نايم بصفي ظليت اباوع عليه مبتسمة وهو مغمض عيونه واني شبعانة نوم ومدا اكدر انام حتى رموشه حسبتهم وتقاسيم وجهه ظليت ارسمهن بالهوا باصبعي الى ان رجعت غفيت .. رغم احس بالجوع ..

ورى كم ساعة كعدت حسيت بي يحوس بالغرفة .. فتحت عيوني وتمططت واباوعله التاف عليه مغسل وجهه ومبدل ملابسه

باوعلي مبتسم صباح الخير عروستي ..

جاوبته صباح النور نبيل ليش ماكعدتني من النوم ..

اجه كعد يمي اخذني لحضنه وباسني على راسي
كال لا شون يصير  ادري بيج تعبانة ومريضة

باوعت لعيونه وحاجيته بأسف اسفة حبيبي والله جنت تعبانة ..

لزمني من حنجي كال ادري بيج والله لتضوجين ولا تعتذرين ..

يحجي ويحرك وجهي بأيده .. واني مبتسمة بعيونه
حضني حيل وبعدها كمت غسلت وبدلت لبست

فستان ابيض بي ذهبي واجوي بيبي ام فلاح وبيبي رضية وشهد جابو الريوك وتريكنا

سألتني شهد على دخلتي جاوبتها بخجل والله نمت البارحة ولاادري بالدنيا

ضحكت كالت والله خطية نبيل

جاوبتها قابل طايرة اني هياتني يمه شوكت ميصير مو اله بليلتها ...

ضحكت كالت يمه منج ام لسان وبعدها صاحت عليها بيبي وراحت وياهم ..

كضينه طول اليوم خطار واصدقائه كل شوي ماخذينه مني لو اولاد عمه واقاربه كل شوي جايين ..

بالليل هم ماتقربلي بس جان يحضن ويبوس واني ارجف دره بيه خايفة شوي وممتعودة خلاني على راحتي ..

ثالث ليلة بعد العشه حسيته ميتحمل بعد .. تقرب مني حسيت بانفاسه الحارة على بشرتي ورى اذني ولمساته الجريئة .. باوعت عليه بقلق حاولت اخفائه وحبست انفاسي وهو بنظراته يطمني وبهمساته الي يملي اذني بيها يحسسني بأنوثتي وبحبه ....

بعدها ماكدرت امنع دموعي من صرت امراة وزوجة اله مو بس الالم الي نزل دموعي وانما تغيير الحال ...

وهو يبوس براسي وكفوف اديه ويمسح دموعي ويوعدني انو راح يسعدني ويبذل كل جهده في سبيل سعادتي ..

هاا وصدك عمو جاسر وعمو صلاح اجوني هم وبيبياتي شكد فرحت بيهم وبجيتهم...
....................

جولي...

من رجعنه من الزفه وخالتي ام فلاح مددت رجليها وضلت تنوح وتبجي يا سجاوي يا سجاوي سوده عليه ويمه فلاح تعال شوف بنتك عرست وانت ماكوو...

خطيه انقهرت عليها صح هسه لو ابوها موجود رغم عمامها ما قصروا صلاح وجاسر كل شويه ويوصون عليها...

دخل جاسر كال...يالله جولييت امشينه البيتنه يالله يمه رضيه تمشين

ردت عليه رضيه....اجي باليل وراكم اريد اضل شويه يم ام فلاح

ومشمش وروضي لزكوا اله نضل يم بيبي رضيه بس غزوله اخذتها وخلينه ورحنه رغم توسلوا بي يضل علئ العشا بس مقبل كال باجر عندي دوام واريد تغسل ملابسي وتكويهن..

رحنه للبيت اني دخلت للغرفه وقفلتها وهو اتصل علئ نبيل كله...دير بالك علئ سجئ ترئ مريضه والبارحه ليل كله بالمستشفئ

خليتهم يتصلون ودخلت قفلتها وبدلت دا ارضع بغزل وهو دك الباب ضحكت كتله ...منوووو

كال بقهر...اني افتحي الباب

ضحكت ...كلمة السر

رد عليه بهدوء...بربوك

ضحكت ورحت فتحت الباب مديت راسي من الباب كتله ...طارش رحت لجويسر

لزم وجهي بعنف بيده كال...شنو جويسر ولج العب وياج

انصدمت وبلعت ريكي...اتشاقه وياك

ضل يباوعلي ثواني وبعدها التهم شفايفي بعنف ابتعد عني وهو يبتسم كال...اذييتج

هزيت راسي بنفي كال ..يله لا تضوجين لاكتني وحده شكرا هااا شكرا منين نفوت

حطيت ايدي علئ شفايفي ...لا تكمل

سحبني كعدني بحضنه كال...اي احجيلي شلونها اجواء العرس

ابتسمت...يااا كوولش حلو وسجئ ونبيل متراهمين يركصون سوه ومندمجين احسن منه بعرسنا واحد مهزوم من الثاني يالله شكد تمنيت تركص وياي سلوو

هيج مثل سجئ ونبيل رومانسي شئ حلو

كال بهمه...يله لعد البسي فستانج وخل نركص سلو رومانسي علئ كولتج

ضحكت بفرحه...صدددددك

كال...اي والله بس البسي فستان البارحه

ترددت ...هاااا يمعود محلو انوب انطونياه ببلاش لو بي حظ مجان انطانياه ببلاش

لزم ايدي بغضب كال...شنووو شنووو وبصفته منو ويوزع عليج ببلاش وليش اصلا شنو محتاجه لو متسوله

بلعت ريكي يبوو شسويت حاولت اركعها...لا لااا شوف هو يعني باوع اءءءء ماكو

شوف يعني كل عروس ينطوها هديه فستان حتئ شنو العروس تلبسه وره الحنه واني اخذته

يعني مثلا اذا عندها اخت او اقارب عادي يلبسو يعني ما انطانياه لله فلله بس لان سجئ اجرت منهم

جر نفس...دكومي البسي خلي نشوفه

رحت لبسته بسرعه ورتبت شكلي وطلعت هو تخبل لزمني من ايدي وقربني عليه كتله ...خلي اشغل اغنيه

شغلت اغنية اريد اسجل روحي باسمك كووولش عاشقتها لهل اغنية...

حطيت اديه علئ رقبته وهو خله اديه علئ خصري ويباوع لعيوني واني ادندن بكلمات الاغنيه وكل شويه ومنزله راسي

نظراته حاااده تزلزلني تخلي گلبي كل شويه يصير بمكان وما اكدر اركز بعيونه اكثر يخليني ارجف وجسمي يتكهرب وابرد

جنت عبالك طفله طفله بوجوده لان هو اطول مني بهوايه واني نسيت البس كعبي جنت اركص حافيه هههه

حسيت ايده تسللت لسحاب الفستان وفتحه علئ النص

وبعدها حسيت طرت بلهوه شالني،بين اديه وباوعلي ببتسامه كال...شو ثكلانه ولج

ضحكت ...من خييرك ابو الشگرا

غمزلي...اليوم اغركج بخيري

دفنت راسي بصدره كال ...ارفعي راسج لا تستحين ترئ اني طييرج

ضحكت...احله طير

باس خدي كال...واحله حمامه بيضه وعيونها ملونه

غمرني بحب ورمانسيه دائما اشوفه احسن من كل واحد مر بحياتي احسن من  اهلي كلهم ربي يحفظه اليه والاطفالي والاهله

ثاني يوم من رجع من دوامه راح السجئ هو وماما رضيه وخاله ام فلاح وصلاح لان خطيه البنيه مريضه

رغم ماما وخاله هماتين راحن الها الصبح بس هو راح الها باليل...احب حنيته علئ عائلته واهلها لان الي يخاف علئ اهله يخاف الله بيه...

جاسر رغم اول ما ماتوا اهله انتفض ضدي وتوحش بس اضل عاذرته لان محد يكدر يتحمل الي صار و واحد غيره يسوي اكثر حتئ لو ما الي ذنب ...

الحمد لله علئ كل حال ادعولي انجح واطلع معدل والتقي بامي..وربي يحفظلي عائلتي...

النهاية...

كونوا انتم كونوا بخير...احبكم ❤

نور سمو العراق..😘

لهنا اقفل الرواية وبعد لو تعرس صبرية وكنوش ما انشر كافي ما مليتو من جولي 😂😂😂

رغم اكثر قصه تحاربت بيها واكثر قصة لاقيت بيها تعب بس حبيتها وحبيت جميع ابطالها..

خلونه ان شاء الله بعد الامتحانات تبحر سفينتنا مع بطلتنا الجديدة قربئ وبطلنا المغوار واحداث شيقه ان شاء الله

وان شاء الله تنسون جولي وتلزكون بقربئ 😂😂😂

التصاميم الطلحه لكن للاسف النت عندي ضعيف وما يحملون Talha-25-3

وايضا تصميم الفيديو طلب من جولي علئ هاي الاغنيه لان تحبها وايضا من ابداع طلحه...

المقطع يمثل جولي وجاسر ❤

وداعا احبتي 😘😘😘

تابعوا هذا الحساب فضلا وليس أمراaleqaby_1991