رواية #جوليت وأسرها.... الفصل 109 - بقلم الكاتبه سمو العراق

هلاو بنات هذا اخر مشهد ينطلق بالواتباد لان طلبتوني ما كدرت اردكم وهماتين لازم الكل يعرف ردة فعل جاسر عن معرفته بالقصه...

اما باقي المشاهد فهي راح تتوج بالكتاب...لان بعد ما عندي صلاحيه للنشر...

المشهد 👇👇👇👇👇👇👇

جولييت...

كاعده بالمرجوحه الي بالحديقه والجو يكص كص من البروده يموووت شفايفي ترجف من البرد

بس كل هذا البرد واني ما حاسه علئ الروحي خوف وقلق وارتباك ما اعرف شسوي

جنت لابسه تشيرت صوف رصاصي طويل وستريج اسود كاعده افكر بكلام وقار و وريهام عن القصه تتحول كتاب وكل مره افكر ان لازم يعرف بنشر القصه لازم يكون عنده علم

ورغم البنات يشجعوني،والكل يشجعني بس اني ما اعرف حييل اخاف ما اكدر احجي اكو شئ يمنعني ما جنت اتوقع ابد ان اني احجي الجاسر عن القصه ابببد لو اعرف اموت

محتاره يا ربي اني اسوي المصايب واضل الوم علئ نفسي طبعا اني فد وحده بربوك ومتهوره ومستعجله ماكو مثلي ما افكر بالعواقب ابد...

صاحت عليه ماما رضيه ...ولج يمه جولي،وينج فروخج گلبو الدنيا و هدار شگت دفتر رضاوي ويريد يعضها

لبست نعالي بسرعه وطكيتها ركضه عزااا تعاركو بيت گطيو

دخلت جوه لكيت هدار صايره وره ماما رضيه ورضاوي يتهدد عليها ولازم دفتره مشككته تشكك البربوك

رضاوي بعصبية والدفتر القتيل بيده...بيبييييي وحري « وخري» رجاءا اليوم اعضها اعضها

هي وره رضيه خاتله وتصيح...نعله ابوووك اني اعفك

صحت عليهم...يااا عزا هاي شبيكم

رد عليه بعصبية بعد ما شمر دفتره علئ الارض...شوفي هاي بتج ما عندها تربيييه شكت دفتري...وتغلط علئ ابويه

مشمش متمدد علئ قنفه وحاط رجل علئ رجل ويلعب بموبايلي كله...اوووه دوحتنا « دوختنا » جنك صبريه

رضاوي رجع باوعلي متعصب...سكتييييي

جريت نفس...اسكت مشمش خلي نشوف شبيهم

اخذت الدفتر لاعبه بي لعب مشخبطه عليه وشاكته رحت شلتها كتلها...ليش ماما مو خطيه اخوج ليش،هيج شاكه دفتره

ردت ببراءة...اسم ازووونه « ارسم بزونه »

تنهدت..غير دفتره هسه باجر المعلمه تعاقبه مو خطيه

ردت بحزن...تيه رطاوي علو « خطيه رضاوي حلو »

باوعتله بتوسل...رضاوي حبيبي والله اني بس يجي بابا نروح اني وياه واشتريلك دفاتر تخبل من المكتبه من هذا الي،بي سيم تمام

كعد متعصب الخدود والشافيف حمر كال...والكتابه منو يكتب ابووويه ابووويه...

دخل جاسر كله...شكتبلك ولك ملعووون

رد عليه بغضب وهو ياشر علئ هدار...هاي بتك الما عندها تربيه شكت دفتري

جاسر ببرود...انجب عاد كل شئ ولا تربية بنيتي

هي من شافت ابوها تشجعت كلتله...رطاوي حايس نعله ابووك

جاسر بلل شفايفه بفشله من تربية بنته وهي تسبه واني كاتمة الضحكه كوه

رضاوي رد متعصب...شفت شفت شلون ما عندها تربيه حتئ انت تسبك

جاسر بتذمر...ديله لا تخليني اذكرك بماضيك انت واخوك وبعدين هسه شصار واذا شكت دفترك عود نجيبلك دفتر وانقل دروسك بيهن...

راح مرتضئ يمشي متعصب وهو يدردم...اييي بعد منو يحاجيها اذا جاسر ما يقبل واحد يحجي،وياها...

صاح عليه جاسر...افاااا بسيطه رضاوي اذا ما ادبتك ما اطلع جاسر ولد الكلب واحد يرفع والثاني يكبس

انوب يكول جاسر بدون احترامات والله لو يدري بيه رضا جهالي هيج تقديرهم اليه الا يحضرني حتئ من قائمة الأصدقاء...

بعدها صاح بصوت عالي...ولك رضاوي والله اذا تحاجي اختك ما تلوم غير نفسك وانت لك مشمش هم مشمول بالكلام

مشمش رد عليه...هسه اني حاجي شئ

ضحكت كتله...الله يساعدك

رفع حاجب ...بعد وكت موو ؟

ضحكت...ههههههههه غير جنه باجواء العركة يا عيني

اخذ هدار من ايدي وهي ملعونه تبوس بي ودكوله...اني اعبك ما اعب سكيته ببوگ حايسه

هزيت ايدي...ههه صدك ما عندها تربيه خبلتها بدلالك

رد عليه...شعندي غيرها لج احبها اموت عليها تدرين اشتاق الها هواي من اطلع

نزلها وراحت تلعب هي ومشمش،ورضاوي مطنكر حتئ ما تغده

كتله...جاسر خلينا نجيبله دفاتر من المكتبه اني،وياك اني هماتين ضايجه تعرف بيه من كملت تقديم علئ جامعه لحد الان مطالعه

جر نفس...تمام عود خليني انام شويه ونروح

جاوبته. .تمام براحتك...

راح سبح وصله ونام واني خابرت البنات عدنه كروب ضلن يشجعن بيه احجي عن القصه واني خايفه ومحتاره وقلقه كالت شهد...لج شبيج حبي دغنيله اغنية اصاله نصري حنين وحنيتة مو معقوله فدوه اروح الكلبه فدوه الطوله...

لج اصبغي صبغ بنتلايت عود هو حنين وكذا وهااا البسي احمر الرجال يموت علئ الاحمر ينجن يصير مثل الثور

رديت عليها...انجبي شهد عاد انتي،وجعفر سوالفكم كلها مدري شلونها...

كالت وقار...عوفيها حبي اني احجي

عطت...لا لا فدوه عاد وقار انتي تليصيها وانوب اخاف ما يتفهمج جاسر اني اسايسه واقنعه وخلي اشوف شلون...

ضحكت...ههههههههههه هم اسايسه

رديت عليها بنفي...لا لا ما اريد..ههههههههههه

نصحتني ريهام ان اني الي احجي احسن حتئ اكدر اتفاهم وياه وتكون الامور بينه ...

اني،ضليت متردده اوصل الغرفتنه وارجع وهو لحد الان نايم اخاف اكعده واحجي وياه وتصير بالنعل ...يا الله شلون حيره شهل لعبان نفس

والله صدك هي حياتي وبكيفي هو شدخله اشو انشر الكتاب واريد رجال اليحجي

بعد اني صرت شخصيه مهمه بالمجتمع مغروفه وطاكه ومخلصه دراسه وقسمي زين وحدخل جامعه اي والله

وهماتين عندي موهبة الخياطه وكذلك اذا طلكني اكتب لافته عند الخطاط المدرسه جولييت تستقبل كافة الطلاب من اول ابتدائي للخامس اعدادي ما عدا السادس اعدادي...

اي السادس ما اتقارش وياهم انوب يرسبون ويشمروها براسي خلي علئ الصفوف الغير منتهيه احسن

اكعد اقري طلاب واجمع فلوس بكد التمن بعد انوب جاسر يضل يتوسل ارجعله وما ارجع...

تنهدت...اهووو شهل تفكير الطايح حضه ما اريد خلي بله نشوفه بلكي يقبل ...

دخلت للغرفة شفته لحد الان نايم تمددت وراه وهمست عند رگبته مثل ما كالت الي شهد...حنين وحنيته مو معقولة فدوه اروح الكلبه فدوه الطوله

فتح تك عين كال..خير يابه اليوم تغنين

ضحكت بحماس...فديتك اذا مو الك اغني لمنو اغني

ضحك...شعندج احجي من دون مقدمات ومن دون اغاني

حضنته ..انت احسن شئ بالدنيا انت نصي الثاني

هز راسه برفض...احلف عليج بالعباس عندج شئ

جريت نفس...لا شبيك ما عندي ..بس،شوكت نروح للمكتبه

حضني وباس راسي كال...حضري نفسج يا شهگه

عقدت حواجبي...شهگه شنو

رد عليه...مالج شغل بيبي گومي بسرعه لا تتطور الامور

ضحك..رايحه رايحه ههههههههه

بدلت لبست قمصله لونها بيجي وتشيرت اسود بطول القمصله وبنطلون اسود وشال بيجي وحذاء كذلك

هو ابد ما يعلق علئ الملابس بس اذا ضيق ومشلتح ما يقبل بس ما يكول البسي عبايه ومدري شنو

لا اذا لبس مستور عادي عنده واني لبسي مستور ما اتجاوز بالبس

رحنه شترينه دفاتر وقرطاسيه جنت طول الطريق فتح شفايفي اريد احجي بس ما اكدر شئ يمنعني وكل شويه اكوله جاااسر من يرد عليه اغير الموضوع

الموضوع شتتني وخفت بطني لوتني وبروده سرت باطرافي...

من رجعنه كلت لازم احجي قريت الفاتحه لام البنين اتذكرت كلام شهد من كالت يمعوده احجيله رجلج عصبي

بله اني جعفر متيهه الاول والتالي لو مو يقره القصه لو اروح امثل ما يحجي

وصلاح يزعل روحه وما يزعل ريهام

وجابر ابو المتعه كولة صبريه وقار لو تصورة وتنشره ما يحجي

عضيت شفايفي...لعد شبي حضي ليش ميقبل

صار دنيا اليل قريت الجهال وتعشينه وهدار تعبت من العب ونامت ...وماما رضيه تنام من وكت...

هو طلع بالصاله كاعد مقابيل المدفئه علئ قنفه والحاسبه بحضنه لفيت الروب عليه وخليت حمره حمره كولة شهد تخلي تهيج مشاعره...

كعدت مقابيله باوعلي وابتسم كال...احبج من تجين يمي واني اشتغل

ضحكت...شكرا من ذوقك

رد عليه..تدللين صدك جذب تعالي ابوسج

ابتسمت وضليت صافنه يا الله شلون ادخل اله بموضوع ما يخليني افقد الروايه ولا افقده لازم يكون موضوع مقنع...

جمعت كل قووواي وحجيت بسرعه...جاااااسر اول مره اريد احجي وياك بموضوع فات وانتهئ بس لازم احجي...

استغرب وباوعلي...خير حبيبتي شكووو

بللت شفايفي بحيره وشجعت نفسي كتله...كل الي صار بينه وكل الي دار وكل موقف واذيه حصلتها من الكل مو منك كل الي مر عليه وطبع بذاكرتي ونقش مثل نقش الجواري...

فاتت السنين واني عايشه بنفس القوقعه جنت اتحلئ بالصبر واقاوم نفسي واصبرها بس بداخلي انكسار فضيع

عقد حواجبه..شكو جولييت شبيج منو حاجي وياج

همست بحزن والدمعه تلمع بعيني...اليوم ناويه اعاتبك

صفن بوجهي وجر نفس...ليش اليوم انتي بعمرج ما عاتبتيني ..

سحبت نفس حزين...كتمت بداخلي هووواي وسكتت هواي بحيث صرت مثل الجليد من دون احساس جنت مثل المريض النفسي الي بحاجة دكتور يحجي اله يفرغ كل الي،بداخله وهل دكتور بعمره مراح يكوله انت غلطان بالعكس،يبرر تصرفاته...

الماضي يا جاسر جان يدور بعقلي وما اكدر اتخلص منه الا اذا فضفضت بي وناس اهتمت الامري..

لحد الان موقف اطفالي من اخذتهم مني،يكسرني ومو بس هيج موقف ان اني تحملت ذنب اخواني ياذيني كل مره من هم جانوا ببطني دكول اخذهم واطردج يهز كياني يهتز عرشي اله...مات ابويه وما حضرت جنازته...هل شئ جان ياكل بروحي...

جنت بحاجه الناس تسمعني ومنو الي،يسمعني يا جاسر منو امك المكسوره لو وقار المحتاره بمشاكلها لو امي العافتني باليلة ضلمة...

تدري ما حجيت الك شئ ولا عاتبك بس جنت بحاجة لشخص افرغ عنده طاقتي السلبيه

بلع ريكه بحسرة...صح ما عاتبتيني رغم شكد جنت اتمنئ اسمع منج بس محجيتي دائما تفضلين السكوت ورغم كل شئ هزمتيني...

عضيت شفايفي،بحسره ما هزمتك يا جاسر ابد ما هزمتك جنت دوم مهزومه واتصنع الانتصار

كملت بحزن...بعدها شهد نصحتني كالت اكو كاتبه تكدرين تحجيلها الي بداخلج وشوفي يمكن ترتاحين ويدعولج الناس تلتقين بامج

حجيت وياها جانت الي مثل الطبيب النفسي تسمع مني للاخير وما تعاقبني تبرر كل شئ صار ويايه حسيتها عالجتني من احزاني

حجيت الها من اول موقف صار ويايه ويه هاله لحد ما اخويه قتل اهلك لحد اخر لحظه دا اعيشها وياك

بررت النفسي لان مو ذنبي وكل تصرف تصرفته مجان مدروس مني بس عاطفتي سيرتني وبررت الك كذلك لان الك فضل عليه

غمض عيونه باسئ وجر نفس ...

كملت بهدوء...صارت الكاتبه تاخذ يوميات عن حياتي وكل يوم تاخذه من حياتي اشمره بعيد عن ماضيي لحد ما تخلصت من كل الماضي

صارت البنات تحبني وتدافع اليه وتبرر تصرفاتي الي انت بنفسك ما بررتهن

تقربت منه وهمست بغصه ...جاسر انت جنت ضالمني

سحبني الحضنه وجر نفس كال...ادري ضلمتج وتجبرت عليج بس اسلوبج اخلاقج نفسيتج الحلوه صبرج والقوه الي انتي،بيها خلني احبج بعقلي قبل گلبي ومحد ينافسج يالروح انتي...

همست بحب والدمعه بعيني...اكمل ؟

جر نفس..كملي حبيبتي كملي عاتبي واحجي وفضفضي

حطيت راسي علئ صدره...البنات صارو يحبوني وينصحوني ويكولن ديري بالج عليه ترا هم خطيه هو ويحبج افتهمنك اكثر ما اني فهمتك

رفع راسي باطراف اصابعه يشوف مدئ صدقي بهل كلام

ضحكت..هههه اي والله مو الكل اكو ناس كالت هيج وناس كالت عوفي وتطلگي

رد عليه بلوم...القسم الثاني حاقد عليهم اليوم الدين

ضحكت...ههههه ليش

حضني حييل...جا ليش يردون يفرقوني منج واني العشت مثل احساسج وماضييج وتقاسمنه بالمعاناة سوه

همست...بس الهم فضل عليه تعالجت بكلامهم عشت النفسي وصرت اتصرف صح كل شخص شارك ويه الكاتبه اله فضل عليه حتئ لو جانت مسبه ..

كال اي حلو اني من تحجين وتفرغين طاقتج افرح بالعكس

لان اعرف تاذيتي هوايه بحيث مرات احسج مو مثل العالم عايشه بدوامه..

كال...بس هو شنو منشور

جاوبته بحماس..هاااا لا لا هسه اشوفك

رحت جبت موبايلي وضليت شويه بالغرفه فتحت القصه يربي شسكرن يا مشهد دخلت علئ البارت الاول سكرنت من نوال كالت انتي مو بنيه وستر عليج جاسر

اجيت شوفته السكرين كتله ..يعني هيج

اخذ الموبايل،من ايدي واني واكفه لف ايده علئ خصري كال...افااا هاي شنو هيج يعني

عضيت شفايفي بترقب...اي هيج تقريبا

كال والله عمي زين ذاكرتج قويه اني ما اتذكر بس من بستيني،وطحتي بحضي

ضحكت واخذت الموبايل ...لا تجذب ما بستك هاي انت تسوي دعايات عليه

هز ايده..ههه اي دعايات بس والله بوساتج حلوه دبوسيني

ضحكت..بعدين ابوسك هسه كول ما عندك شكال علئ الي،سويته وترا هااا حتئ شهد و وقار و ريهام حتئ. ريهام المتدينه...

كال...اذا هيج ماكو شكال

بلعت ريكي وتحمحمت...احم احم

رد عليه...هااا بعد شكو انوووب

بللت شفايفي وتشجعت..شوف وحده تعرف الكاتبه هي شنو بمعرض بغداد الدولي تشتغل وحبت تاخذ قصتنا ككتاب

رد عليه بصدمة...انوووب

بلعت ريكي ...اهدئ اهدئ شوف هو محد يعرف اسمك ولا اسمي ولا مكانه ولا حتئ انت تشتغل شئ وهمي بس كفكره يعني حتئ بعد محد يتهور ويقتل بالغلط

شفت اكو عبره الموضوع يعني شلون تبهذلو اهلي وخسروا بيتهم و وطنهم وعاصم انسجن هذا كله بي عبره حتئ واحد بعد ما يتهور...لان الدم ما يجيب غير الدم

واني هماتين الي عانيته وحصلته من هل مجتمع الذكوري الي حملوني ذنب مو ذنبي تدري يعني اكو ناس دكول ترا حقه هيج يسوي،بيج واخوج كتل اهله زين اني شنو ذنبي اني حتئ المشكله ما اعرف بيها ليش اتحمل ذنب عاصم

والله وحده هيج حجت كلام بعرس سجئ بنت اخوك دكول لامك شلون تشوفيها كدامج واخوها كاتل عائلتج اني منج اطلكها لو عندها درزن جهال...زين اني شنو ذنبي اني الصار بيه بسبب هل مجتمع وبسبب العادات والتقاليد وهل شئ الي ممقبول

ليش نتحمل اخطاء غيرنه شنو ذنبنه اني لو ارتكبت هيج جريمة عاصم راح يضحي الخاطري

رد عليه...لا والله هو نسبو الج تهمه باطله صدكها وصار ضدج ...

مسحت دموعي...زين ليش احنه البنات لازم نضحي

سحبني وحضني...خيولي لا تجيبين طاريهه

رفعت عيوني اله ببراءه ...هسه تصير كتاب ؟

رد بحيره...والله ما ادري بيج هسه شويه ودكولين راح يسوو مسلسل تعال نمثل

ابتسمت.....الله يوم عيد ونمثل اني وياك

كال بغضب مصطنع...گومي گومي لا اخليج ترجفين ست ساعات انوب تريد تمثل

ضحكت..ههههه شكو بيها عندي طموح ومن حقي متعدده المواهب..

رد عليه بذوبان.. بوسيني خلي اشوف موهبتج بالبوس

ابتسمت وتقربت منه بسته بشفايفه بوسه سطحيه وخليت ورحت اركض ابشر البنات...

وهو يصيح عليه ..بربوك تعالي كملي البوسه ضلت علئ النص

عفته واني اضحك خابرت البنات وكلتلهن كالن ممعقوله ولج جاسر ومن دون مشاكل

جاوبتهن...اي اي والله سمعني لاخر شئ،بس ترا اختصرت كل الاحداث هههههههه المهم اخذت موافقته حتئ لو بطريقه مبسطه حتئ،من يكول اكوله اني كتلك وبعد ما اله حجه عليه

ضلينه نضحك ونسولف وخبرت الكاتبه كذلك اجتني رساله منه فتحتها بلهفه وضحكت من كل گلبي علئ كلامه

كاتب.. كانت غبيه لا تجيد التقبيل ..كانت كقطعه أثرية ..كحلوى طرية ..اذابت انفاسي بهمسات انفاسها انها كالخمر تسلب العقل...هكذا هي فاتنة الكاسر بإختصار

بست الموبايل وضميته الصدري والفرحه غامرتني...

نهاية المشهد...❤

كونوا انتم كونوا بخير...احبكم ❤

نور سمو العراق🌷

تنوية...الروايه تستحق ان تكون كتاب وهذا رأي اصحاب الدار واكثر الناس الي يشوف الروايه من منظور واحد ان هي بيها تعنيف فهذا هو منظوره للروايه واختلاف الاراء لا يفسد من الود قضيه..الروايه عالجت وغاصت بالمجتمع العراقي بصورة بحته...محور القصه تتمركز عند القتل والجريمة البشعه الي راح ضحيتها ثلاث اشخاص اب واخ وابنه ..وبعدها ترتبت انفعالات الابطال واللوم علئ انسانه بريئه الي هي جولييت من اول ما انقتلو اهل جاسر وام فلاح ونوال وكل الي،بالبيت حمل المسؤؤليه الجولييت ..والمجتمع لبسها تهمه هي بغنئ عنها...

الشارع العراقي حمل ذنب الجريمة الي صارت ببيت جاسر حملوها الجولي،بحيث ان الكل اتفق ان لازم تتطلك وتشتت عائلتها لان وجودها بعائلة مثكولة من اخوها جريمة بحق الانسانيه وكأن هذا عار وبصمه لازم تحملها جولييت وذريتها لاخر نفس بانفاسها...

الرواية بينت مظلوميتة جولييت من اهلها ومن اهل زوجها ومن زوجها نفسه وحتئ من اقارب هم ما الهم اي اهميه بس فرضوا راييهم وكذلك بعض التعليقات

الصار شنو جولييت تحدت كل كلامهم تحدت كل المشاكل وعاشت بغابه في سبيل ما يعيشون اطفالها مثل عيشتها ولا تكون بصمة عار عليهم بسبب فعلة خالهم...

سدت هوايه حلوك بتصرفاتها وعفويتها وصبرها وطاقة تحملها...لذلك هي المرأة الزينه والام الصالحه والزوجه الشريفة...

ما طلعت عن الطريق ولا جزعت ولا نكرت فضل،ربها عليه وكانت صابره ومحتسبه ...

لذلك لا تاخذون الروايه من منظور واحد وناقشو الروايه ككل واتيقنوا ان الله مع الصابرين كد ما صبرت الله جازاها...

فجولييت واسرها لازم تتخلد بكتاب وتستحق اكثر من هل شئ...

اقتضئ التنوية...احبكم 😘

تعليق عجبني لان القارئه تقره بعمق 😍