رواية #جوليت وأسرها.... الفصل 110 - بقلم الكاتبه سمو العراق

اهلا احبتي سنة سعيدة على الجميع ان شاء الله يارب

مسبقًا نوهت بحروب الفيس وكذلك نوهت برواية وكر الاشتر عن نشر الاضافات الموجوده بالكتاب

لان اكثر الناس الي بالخارج ما حصلت الكتاب لذلك اتفقت اني وصاحب الدار عن النشر بعد السنة الجديدة😍

طبعا أوجه بالشكر لدار الشمس على طبع الرواية وتعاملهم الحلو وكذلك اوجة بالشكر الخاص لاستاذ مصطفى صاحب الدار على سعة صدره وتحمله الي😅

لذلك هاي اضافة جديده وننتظر اضافة ثانية😍

ونبدي عن لسان جابر ❤️

جابر
.............
تمر السنين وتجي ايام جديده وندخل بفصول جديده فصول مثل حياته يا اما تكون بارده يا اما تكون جافه او زاهيه مثل أغصان الربيع...

مرة السنين والايام وليالي وصارت الذكرى السابعه لموت عمي ابو فلاح وفلاح وغزل بنت جاسر الله يرحمهم اجمعين...

اول ما كعدت من النوم حسيت بإنقباض بأسفل معدتي مر عليه موقف قتل عمي والمشهد تكرر بذاكرتي استغفرت ربي يا سبحان الله عبالك ذاك اليوم صار هل يوم المشؤؤم

مع العلم مر وقت طويل وبهذا الوقت ناس تزوجت وناس خلفت بس ضلت الذكرى هي هي توجع شكد ما يمر عليها غبار السنين...

صار عندي ولد سميته سجاد يشبه خاله جعفر وهم احسه مستهتر رغم طفل هههه

الحمد لله الي بحمده تتم الصالحات ورزقني بهذا المولود الي فهمني الحياة شنو وخلاني اكثر استقرار اني و وقار

دخلت عليه وقار وهي تضحك...صباح الخير عيني اخويه جاسر اتصل عليك وانت نايم فجاوبته

عقدت حواجبي باستغراب...خير ان شاء الله اكو شي
ردت عليه بتنهيده مخلوطه بحزن..اي اليوم دورة السنه مالت ابويه وفلاح وغزوله وهو مسوي ثواب وعازم ببيته ومناك نطلع للنجف لان ماخذ كوستر...

جاوبتها...اهااا الله يرحمهم ويسكنهم الجنه لعد حضري نفسج حتى نروح
أخذت الطفل وراحت تحضر نفسها واني رجعت للموبايل اتصفح بي شفت إشعار موجود من حساب جاسر دخلت عليه...

جان عباره عن بوست كاتب بي...في مثل هذا اليوم المشؤؤم تمر علينا الذكرى السنويه السابعه لرحيل أحبائي...

لقد ودعنا أحبابنا والحزن يملأ قلوبنا لقد كنت صابراً على معاناتكم اذا اتيتُ لمضجعكم ونظرتُ مكانكم اتخيل اجسادكم تمر أمامي ، اشتقت للجلوس معكم . ابي مهما تحدثت عنك لن اوفيك حقك ، نسأل الله جلة قدرته ان يجعلكم في جنات النعيم ...رحم الله قطعة من قلبي فارقتني...

تنهدت على البوست وجريت نفس عميق بمثل هاي الايام جولييت انهزمت من جاسر واني ساعدتها جانت ايام عصيبه و جان واقع مر فعلا ايام مشؤؤمة ..

والحمد لله الي ينطي نعمة الصبر ويخلينا نصبر على بلوانا وتتهدى النفوس...

رجعت اتصفح بالحساب شفته ناشر صورة بنته من جولي بس مخلي سمايل على وجهها وتقريبا صار اكثر من سبع اشهر منشوره الصورة كاتب عليها..

الحمدالله الذي رزقني روحاً من روحي ونبضاً ثاني لقلبي وأكرمني بأجمل العطايا وأفضل الهدايا وحقق لي امنيتي نعمة ثواباً حسناً.
الحمد لله الذي يعطي بلا حساب الحمد لله الذي يهب لمن يشاء الذكور ويهب لمن يشاء الاناث.
﴿ الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِنْدَ رَبِّكَ ثَوَابًا وَخَيْرٌ أَمَلًا ﴾

﴿ رَبِّ اجْعَلْنِي مُقِيمَ الصَّلَاةِ وَمِنْ ذُرِّيَّتِي رَبَّنَا وَتَقَبَّلْ دُعَاءِ ﴾
اللهم لك الحمد حمداً يليق بجلال وجهك وعظيم سلطانك 
اللهم اكتب لها طولة العمر وحسن العمل وسعة الرزق وسعادة  الدارين واجعلها من الصالحين.

اللهم أعني على اداء الواجب تجاهها وارزق عبادك الصالحين حسن الذرية
ابتسمت على الكلمات الي لامست روحي همست بصدق...ان شاء الله يارب يتحقق دعاء جاسر البنته ويرحم بنته الاولى غزل برحمته الواسعة
قفلت الموبايل ورحت سبح

والله بعد ما كملنه كل شي وحضرنه نفسنا خلينا ورحنه البيت جاسر.. ما شاء الله لكينه البيت مزدحم بالناس

دخلت للاستقبال اني وابوي والاهل دخلو جوه لكيت ولد عمي كلهم موجودين وشيوخ من العشيره وهم اصدقاء جاسر جايين من ضمنهم الرائد رضا ونبيل زوج سجى .

سلمت وكعدت يمهم جان جاسر جايب طباخ وذابح خروفين ومخلي يم ابو المسكوف السمج يعني الطبخ صاير خارج البيت...

طلع جاسر يم الطباخ واني طلعت وياه...جان الطباخ يحضر بالتمن والحشوة مالت التمن وجعفر وصلاح يساعدو

جاسر...هاااا بويه محتاجين شي

رد عليه الطباخ..تسلم ابو مرتضى ما شاء الله انت محضر كل شي ممحتاجين اي شي...

جاوبه جاسر ..يابه هذا واجبنه

بعدها صاح على جعفر انطاه 250 ألف دينار گال اله...جعفر روح جيب السمج من ابو المسگوف بسرعه وگله خلي يخلي مسلفن...

جعفر اخذ الفلوس وحسبهن گله...ناقصات خمسين الف

جاسر باوعله بنص عين...ناقصات كفخه روح لا شويه ودكول ناقصات ميه

ضحكنه وجعفر خله وراح يجيب السمج وكفنه بالحديقه اني وياه والرائد رضا ونبيل...

جاسر جان يحجي ويدخن انتبهت على جف ايده بيه عضه قويه مائل لونها للبنفسجي...

انحرجت اسأله بس صديقة رضا ما عنده حيا حضوري كله...خير خير ابو مرتضى ليش لمره عاضتك

استغرب جاسر ورد عليه...يا مره يا عضه

لزم جف جاسر واشرله ..هاي ابو مرتضى حجي شسويت للمره

سحب ايده منه بملل...دكل تبن انت شكد فضولي وبعدين منو كال المره عضتني
رد عليه نبيل باستهزاء...لا اني عضيتك

جاسر بدون نفس...انت انجب

بعدها باوعلي كال...جابر بويه ادخل جوه ذول ساقطين اخاف يخربون اخلاقك

رد عليه رضا...افااا دتهين الداخليه بكلامك وتنسب تهم باطلة الحماة الوطن وبهذا الشي راح نرفع عليك دعوه قضائيه بتهمة السب والقذف والتشهير لاحد قادة الوطن الي هو اني الرائد رضا الموقر...

جاسر بضحكة...مو هم الداخليه لو يدرون بسوالفك جان هم رفعوا عليك دعوة بتهمه تكوين سمعة سيئة الوزارة الداخليه

نبيل...اي الله وانه اشهد

ضلوا يتحاورون بينهم واني واكف وياهم لحد ما صار وقت  الثواب صبينه الاكل للشيوخ وكعدنه ناكل بعد ما ابوي قره سورة الفاتحه على الثواب وهداه لوجه الله تعالى وروح النبي الامين...وروح امواتنا اجمعين...

جاسر جان ياكل وفجأة توقف عن الاكل باوعتله باستغراب والخاشوكه بيدي شفته جر نفس عميق وامتنع عن الاكل كتله...خير ابو مرتضى اشوفك مهموم

باوعلي بجمود كال...ماكو شي اكل بالعافيه

تنهدت وما كملت اكلي..طلع برا للحديقه طلعت وراه شفته يخابر وبعدها خلص اتصاله كتله..شبيك جاسر

رد عليه...ماكو شي اتصلت بابو الكوستر حتى وره المغرب ياخذ العايلة ويروح بيهم للنجف...

جاوبته...انت متروح مو

جاوبني بهدوء...لا تعرف بيه ما احب الجرجره مال النسوان اروح الوحدي باجر اني وجولييت

تفاجئت...لعد جولييت متروح ويانه

رد ...لا متروح اني اخذها

جاوبته بتردد...بس وقار كالت جولييت كلتلها ان هي تروح ويانه وانت موافق معقوله وقار تجذب

جر نفس...لا بالبدايه صدك كلتلها روحي وياهم بس بعدها غيرت رأيي
استغربت...ليش؟

بلل شفايفه بحيره ورد عليه...احسن جابر خليها وياي احسن ما اريد تسمع كلمة تغثها

استغربت وتفاجئت كتله بتساؤل...صاير شي

هز راسه بنفي...لا لا ماكو شي المهم ليش ما كملت اكلك
جاوبته..شفتك مو على بعضك كلت اجي اشوفك

سحب نفس وزفره كال...والله شكلك يا جابر بس ما ادري اليوم حاس بتعاسه مو طبيعيه اليوم انقتل ابوي واخوي وبنتي بنفس هذا اليوم تدمرت عوائلنه وعشنا الحزن بكل حذافيره

بعدها انهزمت مني مرتي وعلى اساس هذا الشي اني طغيت واذيتها مع العلم هي ما الها ذنب ضلت وحيده لا اخ لا اب ولا ام
ومع كل هذا اهلي ما يحبوها محد يحبها غيري

جاوبته باندفاع..لا ليش كلنا نحبها

باوعلي بنظرة حقد اردفت بارتباك...قصدي يعني وقار واشواق والولد وحتى احنه بيت عمك نحبها ونحترمها واخت عزيزه وغاليه عدنا

ضحك باستهزاء..هه اني عادي لو العالم كلها تكرهها مو مهم عندي المهم اني احبها بس اني خاطري مكسور عليها لان هي تحب لمتهم وتحب تعيش وياهم وما تحب امي تفرقها عن شهد وريهام

سحبت نفس وزفرته ...بعد عمتي ام فلاح ما نست الي صار وحملت جولييت السبب

رد عليه بغضب واندفاع...بس جولييت ما الها اي ذنب بلي صار ابد ما الها ذنب ولحد الان هي ما عندها ذيج العلاقة القوية بأهلها علاقتها شبه معدومه
سبع سنوات جولييت عندي ضاكت وياي المر وجرعته مني ومن اهلي لا اشتكت ولا تذمرت ما اعرف ليش امي هيج حاقده عليها مع العلم جولي هم تعذبت من اهلها...

بس اني الي ما يحب مرتي ويتمنالها الشينه ما اجبره ولا اريده يحبها بس ما اقبل اي واحد يجرحها بالكلام

ترا اني رجال ما اقبل تنهان مرتي ويفرقونها عن نسوان اخوي وحلفت بعد لا اخليها تدخل عليهم ولا شي اريد اعزلها عنهم وهي اصلا شنو الحصلته منهم غير الهم والغم وكسر الخواطر...

جريت نفس...ما اعرف شنو الصاير بينكم بس صدكني البنات كلهن يحبن جولييت ويحترمنها وحتى احنه لان هي فارضه احترامها وتقديرها مو من حق اي واحد يتجاوز عليها

رد عليه بحسره...الله كريم اني ليش اريدها تكمل دراستها وتكون شهادتها سلاح بيدها لان اعرف من بعدي تضيع وتتبهذل اريدها تعتمد على نفسها وتتعين ويكون الها كيان وشخصيه بالمجتمع وما تكون بحاجة اي شخص حتى اني..

سألته بمرح...تحبها جاسر

ابتسم بشغف سكت ثواني من الصمت وبعدها نطق بلهفه ..وياها عشت على طبيعتي من دون تصنع او مجامله احس قربها جنه وبعدها جهنم ..وصلت بحبي وياها للجنون بحيث نسيت ثاري وياها وصرت اراعي مشاعرها...
جربت اكرهها بس كرهت التجربه ورجعت حبيتها من جديد و وصلت للهيام بحبي الها...

رجع باوعلي بجديه وااكد على كلامه كال.. احبها جابر احبها...مجنون بيها ومحظوظ بيها تحملت هواي وصبرت واستحقت جولييت اعز من بناتي..جولييت صقلت شخصيتي وغيرتني هواي ولولا صبرها وايمانها بربها جان ضيعت نفسي وضعت الحمد لله راضي بكل شي وياها واحمد الله واشكره الله رزقني منها ذرية وجبرني من بعد كسرة...جولييت زوجة صالحه وام حنونه ..

تنهدت جاوبته...الله يحفظها الك يارب ويرزقك بعد منها ذريه وهي هم تحبك اتذكر من اخذتها يم خالتي صبريه شلون جانت تدعيلك بضهر الغيب وشلون تبجي عليك رغم خايفه منك...بس جان بالها عندك ودوم تذكرك بالخير

باوعلي بنص عين...كل شي صار الها بسببك اكلك جابر بس مو تزعل مني انت بصراحه اثول كول ليش

تعصبت...لا يابه ما ازعل اثول انوب...اي بالله ليش استاذ جاسر

جر نفس...جان اخذتها لبيتكم ليش بهذلتها يم صبريه وكطعت بيها مسافه طويلة...

رديت عليه...ما ادري قدرها وصلها الصبريه وصارت الها سند مو تريد تطلكها منك هههه

ضحك كال..دخلي تروح شنو بكيف صبريه اني امشي
بعدها خلينه ودخلنه جوه وبعد ما خلصت العزيمه حضرنا نفسنا حتى نروح للنجف نأدي مراسيم الزياره...متلئة السياره لكن جانت تفتقد الجولي...
.............
جولييت..

بعد ما صار الثواب ببيتنا اني وجاسر جنت حيل فرحانه بهذا الشي احس عمو مهيوب يستاهل التعب الله يرحمه جان رجال ونعم منه تشهد اله شيوخ العرب حكيم و رزن و صاحب واجب...

جاسر كال انتن بس سون الزلاطه والفاكهه والخضره يعني الاشياء الخفيفه تمر ولبن والباقي الطباخ هو تكفل بي...

جنت اني متحمسه حيل لان الكل عدنا حتى خالتي ام فلاح هو عازم هواي عالم حتى عمة سجى ام زوجها...وام رضا وشهد ومرة ابوها...وبعد نسوان من كرايبهم ما اعرفهم اول مره اشوفهن. 

من خلصنه كل شي بالمطبخ اخذت مي ببطل وقريت عليه سورة يس والهاكم والتكاثر ودعاء الأموات

الحمد لله عدت العزيمه على خير والبنات كعدن يحضرن بنفسهن وره صلاة المغرب بعد ما صلن واني صليت حتى بعدها نروح للمقبره هم رادو باليل لان الجو شويه بارد والصبح تصير حاره..وحتى هماتين باليل يزورون امير المؤمنين عليه السلام والفجر يطلعون للمقبره ...

دا احضر بنفسي جان دخل جاسر كال...يله بسرعه السايق منتظر
صاحت عليه وقار كالت...يالله جولي استعجلي حنتاخر

هو رد عليها بهدوء...لا جولي ما تروح

اني انصدمت دا الف بالشال ضليت صافنه بالمرايه ونزلت الشال من ايدي
كالت وقار...يا على بختك خويه ليش ما تروح

رد عليها...لا احسن خليها وين رايحه ومنا اطفالها يتمرضون

بللت شفايفي بحيره جاوبت..أي هذا هو ما اروح

هو خله وطلع بس اني احس بتيزاب موع روحي حيل انغثيت وضجت واني جنت حييل متحمسه وفرحانه بس بعد شسوي ما حبيت اناقشه كدام العالم واخلق مشكله كلت تروح العالم واعاتبه

دخلت اشواق كالت ..يالله يمعودات شنو جولي لسه ما لفيتي شالج يمعوده بسرعه يكول جاسر

كالت الها وقار ...ما يقبل تروح ويانه

باوعت الها اشواق بصدمه...يا ليش شنو الي غيره مو كال تروح

وقار...ما ادري شبي اروح احجي وياه بالله

كلش انقهرت من رفض اروح وياهم حسيت نفسي منبوذه بينهم حسيت لحد الان الانتقام يدور براسهم...

خنگه غصت بحنجرتي ما كدرت اتخلص منها تكلمت بفشله واني اداري مشاعري المجروحه...لا اني هماتين ما اكدر ان شاء الله غير مره لان هاي لأيام تعبانه عادي ان شاء الله غير مره...

كالت وقار بحزن...بس احنه ردناج ويانه واني قبل كم يوم خابرته وهو كال تروح ليش هسه غير رأيه

ابتسمت بفشلة...ما تعرفين اخوج قابل ...بس والله عادي كتلج ممستعجله غير مره اروح

اشواق تنهدت..نروح نحجي وياه بلكي يغير رأيه

جاوبتها بسرعه...لا لا فدوه والله ما يقبل تعرفين جاسر اذا عاند ما اريد اسبب مشاكل والله كتلج ممستعجله ان شاء الله هنا اكعد اصلي الهم واذكرهم وان شاء الله واصل

بعدها اخذت المي الي ختمته وانطيته لاشواق ابتسمت ...هذا رشي على امواتنا ان شاء الله يبرد قبرهم وتربتهم ويسكنهم الجنه مختوم بسور قرآنيه..
طلعو كلهم للسياره وصعدو هو جان واكف بباب البيت ويوصي السايق ما يمشي سريع وينتبه على الطريق

الكل طلع يجدد الذكرى ويأدي واجب الزياره احفاد مهيوب ولده وبناته وجنانيه ...وأقاربه

بس اني واطفالي وهو ما رحنا حسيت نفسي منبوذه بينهم ومو من حقي اكون وياهم وازور جد اولادي...

اباوعله جان واكف مثل تمثال من صخر بكل صلابته وقساوته اامن على كل الركاب ولحد الان يوصيهم ويتطمن عليهم ..

غمضت عيوني وسمحت لدموعي تتسابق على وجناتي غمضت عيوني واستذكرت مأساة الماضي..

تركته واكف تحت الضلام الحالك ودخلت جوه مرتضى كال بانزعاج...عود هو ليش ما خلانه نروح كلها راحت الا احنه هو هيج دوم بابا يتصرف

بللت شفايفي بحيره ورديت عليه...يخاف عليكم ماما من يروح ياخذكم وياه
رد مجتبى مستنكر كلامي..بس احنه نريد ويه العالم ويه العمامي مو نروح وحدنه...

سكتت مجاوبته احس نفسنا مساكين حنعيش طول حياتنه بمشاعر منهكه وحزن دفين..

كعدنه والسكوت سيد الموقف هو دخل باوع علينا فعلا عبالك مساكين ما حجينه ولا گلنه شي

هو تنهد بحيره كال..شبيكم ؟

جاوبته ...ماكو شي

اشرلي ..تعالي احجي وياج

خليت الموبايل على صفحه وكفت رحت عنده حط ايده على اكتافي وسحبني كعدنه بالحديقه..

لحضات صمت بعدها كال...احجي اسمعج

ابتسمت بشرود..ما عندي شي احجي

رد عليه..ليش ضايجه ؟ لان ما خليتج ترحين

جاوبته بسرعه ..لا عادي مو لازم اروح قابل اني منو حتى اروح مو ذات اهميه اني حتى اروح القبر مهيوب واجدد الذكرى...

غمض عيونه وهو يصبر نفسه كال...قبل صلاة الفجر نطلع للنجف حتى ما دكولين هذا ضالم وحارمني من الطلعه ومفرقني عن العالم

ابتسمت بتنهيده...لا ما اكول بس اني تعجبت عليك ليش غيرت رأيك بسرعه انت جنت موافق واني جنت حيل فرحانه فرحانه ان اني حزور بابا واهلك بس تفاجئت برفضك

سند راسي على كتفه كال..خليج وياي احسن سياره خصوصي بعيدا عن القال والقيل وكسر الخواطر

همست بعتب...بس ضجت..

مسح على راسي كال...ادري يبوي ادري ضجتي وتحسستي بس المصلحتج والله واني ما اسوي شي اذا ما دارسه ومقتنع بي

رفعت عيوني لوجهه...ما يردوني وياهم ؟

ضحك على كلامي...حتى لو ما يردونج المهم اني اريدج وبعدين اني ما ردتج ترحين لان انتي تعبتي اليوم وهم راح يتعبونج بالزايد لهذا السبب خليتج وياي

بعدها ضربني بطرف اصبعه على خدي...وبعدين ليكون معاجبج ترحين وياي وشايله خشمج الحلو الاحبه عليه

ابتسمت...لا شلون ما يعجبني اروح وياك بالعكس هم بكف وانت بكف والكف دائما يميل الك...

ضحك...ههه لعد خليج وياي

لحضات من الصمت مرة عليه بهاي للحضات كدرت اقره دواخله ارتبكت ثواني وبعدها تشجعت وحجيت...جاسر احد مضوجك بالكلام او ذاكر شي يخصني وانت مزعوج من هذا الشي؟

عقد حواجبه...لا يابه شنو سالفه ماكو هيج شي وبعدين على شنو يضوجوني بالكلام...

ترددت احجي بعدها كتله بتردد...خاف خالتي حجت كلام ضوجك عني او مقبلت اروح

سحب نفس عميق واخذ جكارته ورثها ودخن كال...لا عادي كالت خلي تروح بس اني ما اريد كتلج خليج وياي وكافي تسألين عن هذا الموضوع واني لو اريدج ترحين لا امي ولا العشيره كلها توكف بوجهي

شجعت نفسي وكتله ...اذا خالتي ما حجت شي لعد بس لا تكون لحد الان معتبرني اخت قاتل اهلك

باوعلي بسرعه وبحده وشد على شفايفه كال بجبروت...اسكتي اخر مره تعيدين هذه الجمله على لسانج

وكف بعصبيه ويسحب دخان من جكارته بشراهه وكفت ولزمت ايده..مو قصدي اضوجك

عض شفته السفليه وهو يصبر نفسه كال...انتي تخصيني اني انتي مرتي الي كل شي الج هو الي وكل شي الي هو الج انتي مو اخت القاتل انتي ام مرتضى اني الناس من تحجي هيج اكص لسانه اليحجي فما احب اسمعها منج وانتي تطلقين هيج لقب معفن على نفسج

تنهدت بحيرة...ما اعرف يا جاسر احس لناس ما تنسى ابد ما تنسى الموقف الصار واضل بنظرهم الي سبب ولو جزء بسيط بالحادثه الصارت
احتضني بدلال وكال بثقه..شوفي جولييت الحياة اذا مشيتيها بعقلج احسن من حياة تمشيها الج الناس وباجر تندمين على حياتج لان مشيتيها بكلام الناس مو بكلامج

خلي الناس شنو تحجي خلي تحجي باجر يملون لج هي عباد الله على رب العالمين ما راضيه مو انوب ترضا علينه

بلعت ريكي بحسرة ...بس مرات الكلام يجرح يا جاسر اني اصلا اليوم فشلانه وخجلانه ومتوتره بسبب الي صار بمثل هذا اليوم...

رد عليه باستنكار...وانتي شنو ذنبج !! كتلج انتي تخصيني لا تخصين عاصم ولا تنتمين اله

ابتسمت...بس جاسر يضل الموقف واني متأكده انت ما ردتني اروح وياهم خاف اسمع كلام منهم يغث...

ضل مركز بملامحي وسحبني الحضنه كال...سدي الموضوع وكتلج باجر نروح نزور اهلي ومناك نطلع نزور ابوج

همست...الله كريم

احتضن وجهي بكفوف اديه وسألني...بعدج ضايجه

جريت نفس...لا والله ما ضايجه صح بالبداية ضجت بس هسه لا واذا عندك شغل ماكو داعي نروح نخليها غير مره

رد عليه...لا نروح ان شاء الله وتدللين عليه

ضحكت..ههههه تحبني

عقد حواجبه باستغراب...اول مره تسأليني
ابتسمت..ما اعرف حبيت أسأل

رد بغموض...لازم اجاوب

رفعت حاجب...اي لازم

عض شفته...افعالي متكفي ؟

هزيت راسي بنفي واني مبتسمه

جر نفس بلهفه كال...عفت كل نسوان الدنيا وركضت وراج شنو معنى
هذا ؟...من اغمض عيوني الگاج كدامي شنو معنى هذا !! من ازعل من شغله اجي اشكيلج شنو معنى هذا !!

ابتسمت...ههه انت كول شنو معنى هذا

تقرب مني وخله خشمه على طرف خشمي كال...معناها اعشقج
رمشت بعيوني مشاعر مخلوطه بين الارتباك والفرح وما كدرت ارد عليه ولا كلمه بس تنفسي صار سريع

همس من بين انفاسه كال...جنت اكول المشاعري كلولها اني معجب بيها واعشق لون عيونها ومن تضحك اويلي من تضحك من اشوف اللون الوردي يكتسي خدودها...شايفه عذابي انتي !

حبيتج لحد الجنون نسيت ثاري وياج واني لناوي انتقم وما راضي بسجن عاصم بس لخاطرج سكتت

بست شفايفه والحرگه حسيتها دخلت الخشمي همست والدموع شلال جنت حيل محتاجه المشاعره وحبه اليه ..حبيتك يا جاسر حبيت كل شي بيك ما نسيت فضلك عليه صح انجرحت منك وانت انجرحت مني بس هذا قدرنا وهذا المكتوب الحمد لله الكدرنه نوصل بي البر الأمان ونتخطى هوايه مصاعب

جر نفس كال...الحمد لله والله يجازي الي جان السبب بعذابنه سمعت هواي كلام وعبرته ودست عليه في سبيل احميج من كاسر مو جاسر

تنهدت وكملت...اني سمعت الكلام وعشته حاولت اعبره ما كدرت لحد الان ببالي وحده من اقاربكم دكول جولييت لو محلوه واخوها كتال اهل جاسر من زمان طلكها

ابتسم بذهول...هسه طلع جمالج سبب هدوئي وسكوتي عن عاصم !

رفعت اكتافي بعدم ...ما اعرف هيج يكولون

رد بحده ...ياكلون تبن من يوم يومج حلوه من نعومة اضافرج وانتي حلوه بس ما همني جمالج بكد ما همني صبرج وطاقة تحملج حنيتج وحبج لاطفالج برائتج وكل شي بيج

اتذكر مره من ضربت عاصم واعلنو موته انتي جنتي تنهارين وتصير عندج حالة اغماء بسبب الصراخ والنحيب جنت فاقد للوسيله ومحتار شلون اطيب من خاطرج واصحح الخطا

بيومها تمنيت لو عاصم يطلع عايش ولا اشوف الي صار وصلت لمرحله تمنيت بيها عدوي حي يرزق

في سبيل ترجعين لحالتج قبل تعبت بوقتها محتار اتقرب منج تصرخين اعوفج تصرخين احتاريت حيره

جنت اباوعلج وانتي نايمه وتنوحين تهسرت بوقتها ما عرفت شسوي،صرت اروح للنجف اشكي لبنتي اشكي لابوي اني شسويت وين وصلت جولييت ليش هيج كسرت بخاطرها...

ومن امي تعاركت وياج واني اجيت دخلتي للحمام وفقدتي بيومها عاتبتيني احتاريت شنو ارد عليج شلون اطمنج وانتي كارهه وجودي بحياتج قبلت بيومها تصرخين عليه تتجاوزين قبلت بكل شي منج

من فقدتي بدلت ملابسج كسرت خاطري ندبه بضهرج ضاربج من قبل وخليت اثر غمضت عيوني واني مصدوم من نفسي ليا هاويه وصلت يا جاسر صرت الها كاسر وكسرتها

ضعيفه يتيمه بريئة بست الندبه وغطيتج ما جنتي شهوه ابد جنتي هيام اليه جنتي عشق جنتي حب وحرب ودوا للجروح شكد ما جنتي شرسه بس تضلين فراشه بريئه وهشه...

اشر على راسه كال...حبيتج بعقلي

حضنته حيل وحطيت راسي على صدره همست..واني تحملت هواي تحملت ذنب مو ذنبي تحملت امور فوك طاقتي بس ما الومك على شي تعرف ليش لان اعرف داخلك طيب ولرباك شيخ تشهدله العرب اذيتك هواي ما انكر ولا اسوي نفسي ملاك ومضلومه لا هم اذيتك بس صدكني اذيتي الك جان نابعه

من حبي الك وامتناني من انهزمت منك طلعت لسبب واحد والله
هو ما ردتك تكتلني يا جاسر واكون ذنب بركبتك ولا ردتك تعيش بتأنيب الضمير طول عمرك ردتك تهدئ وارجع والله ارجع

مستحيل اعيش ويه انسان غيرك ومستحيل اقبل وحده تعيش عندك غيري
انت ما تعرف اول ما تزوجتك شلون احبك اموت عليك تنافس امي وابويه بحبي الك اتنفسك اني اول ما تزوجتك

رغم انت اكبر مني وعمري مو يم عمرك بس ما جنت اشوف غيرك بهاي الدنيا ولا راح اشوف اشوفك اجمل شخص عاشقتك بكل شي حتى اخطائك اشوفها صح سلبياتك يجابيات عندي لهاي المرحله واصله وياك اني
رغم ادري اول ما تزوجتني ما تحبني بس اني جنت اموت عليك مجرد ما اشوف طولك اني اذوب ابرد ارجف گلبي يضل يدك سريع وبطني تلويني

ضحك...هههه لهاي الدرجه تحبيني واني جنت متوقع متحبيني كلت يمكن تريد واحد من عمرها تريد مثلا عشريني بما ان عمرها 17 سنه مو واحد عمره 32 سنه بعيد عن عمرها وتفكيرها جنت اكول ما تقرب منها اخاف اكون ضالمها ومشاعرها مو الي

جنت اشوفج صغيره انقهر عليج بيضه وناعمه وترفه مو مال زواج احسج مثل غزوله الله يرحمها واني فعلا لو انتي بنتي ما ازوجج بهذا العمر
وحتى لو هذا العمر قد يكون مناسب بس حجمج وبرائتج طفولتج ابد مو مناسبه للزواج

من اخذتج من اهلج مو اني اخذتج لان حلوه لو شهوه وكلت ماكو غيرها طفله وحلوه وفقيره لا بالله بس حسيت بيج غزل حرام هذا الضلم لبنيه بريئه مثلج جنت ناوي احميج اخليج تحت حمايتي بس بعدها انقلبت الادوار وجرحتج هواي...

عضيت شفايفي وعيوني تلمع بدموع همست...مره كلتلي اكرهج
تنهد...اتذكر جنتي بيومها هسه راجعه من صبريه بعد ما انهزمتي مني كتلج جنت عايش بدوامه اريد انتقم من نفسي وصلت مرحله ليش كل شخص اتعلق بي يروح من ايدي قررت اكرهج وابعدج عني لان وصلت المرحله ان هي هم راح افقدها بعد ما صارت الحادثه

حاولت اكرهج بكل طاقتي وشديت العزم جنت دائما انهر نفسي واكول اكرهها لا تحبها خليها تروح بعدها عنك حرمها عن نفسك لا تهتم الها خليها تجزع وتمل خليها تتصرف تصرفات تكرهك بيها كل هذا جنت اسوي،ضدج
شلت عيونج بمخيلتي مثل الخطيئه ما جنتي خطيئة جنتي غفران للذنوب
شكد ما حاولت اكرهج حبيتج صرت بعدها احاسب نفسي ...ليش تضلمها...ليش تعذبها شنو ذنبها ..

صرت بشخصيتين صار عندي ازدواج بالشخصيه شخصيه تحرضني اعذبج وشخصيه تنصحني وتحاول تهديني حسيت شيطان يحرضني عنج حاولت اتحكم بزمام الأمور

تقرب مني وهمس كلت لنفسي...هاي،مرتي جكليتي مرتي محد الها غيري من بعد رب العالمين...

لطافتج هدوئج روحج الصافيه الما بيها حقد كلها خلتني احبج وادوخ بيج وادافع الج ضد الكل...

صرت اثق بيج مثل ما اثق بنفسي حتى الي يجيبلي عنج كلام ما اصدكه...ما اصدك اي شخص الا اذا سمعت منج

تنفست بسرعه وگلبي دكاته الف ما اعرف شصار بيه من كلامه كتله...اي وهذا الي عجبني بيك وهذا الي خلاني اكول ورايه رجال يسندني يسمع مني وما ياخذ بكلام غيري وما ينغلب ولا واحد يكدر يلعب بعقله

ضحك كال...بس انتي لعبتي بعقلي

ابتسمت...قصدك اني شيطانه ولعبت بعقلك

جر نفس وهو يخفي ابتسامته كال...لا مو شيطانه عاد اني ما احب اسلوب اللعانه ولا سوالف المشيطنين ولا احب الأسلوب الرخيص

بس انتي جنتي هادئة وساكته وصابره احس بهاي الفتره الي صارت اني عشقتج صرت ارجع للبيت حتى اشوفج رغم اني مبتعد عنج وعازل نفسي بس ما اعرف شنو الصار بيه

حتى بشغلي عايش متوتر ومشدوده اعصابي مركز بيج اكثر ما مركز بشغلي حتى يسألوني خاصه من تمرضتي

تذكرين من صدرج ورم عليج وجنت زعلان منج جنت محتار شلون اتطمن عليج جنت اوصي رضيه عليج دائما رضيه واكفه بصفج واتكل عليها بهواي شغلات جانت امينه حيل وسريه واعتمد عليها بهواي شغلات جانت دائما تحمد بيج وتشكي حالج

ضحكت..عمري حبيبتي ماما رضيه اموت عليها والله احن عليه من امي
حضنت ايده بحب كتله...اي شنو جنت توصيها عليه

ضحك وحضني كال مره من المرات جنت نايم وفتحت الشباك مالت الغرفه وشفتج تشتغلين بالمطبخ باوعتلج تحوسين بالمطبخ منا ومنا راقبتج جان الجو بارد حيل

جنتي حامل شعرج مفتوح مفتوح ونازل من حجابج مثل شعر الفرس اخذ گلبي بيومها ضليت محتار..جنتي صغيره ناعمه وتعبانه گوه تمشين
بيومها باوعت النفسي بالمرايه شفت بعيوني نظرة حنين الج..الصمود كدام بركان الشوگ محال...

جانت ملامحي صامته يكولون الصمت في حرم الجمال جمال..بس كدامج الصمت يعني الف معركه بداخلي...

عاركت نفسي وصمدت كدامج وكل يوم اخوض معركة بألف معركة...ردت انهزم منج بالواقع بس رافگني خيالج ..

بيومها خابرت على رضيه كلتلها تعالي يمه اريدج خطيه ما قصرت اجت عندي كعدت يمي جنت متردد احجي وياها بعدها شجعت نفسي كلتلها...يمه جولييت مو لازم ترتاح يعني هاي ايام ولادتها وهي بيها توأم يعني مو لازم شويه ترتاح حتى تكدر تساعد نفسها بالولادة وتجيب بسلامة
جاوبتني مستغربه...اي صح بس يمه ليش صاير شي

رديت عليها بتنهيده...لا بس يعني جاي اشوف هي الوحيده الي تعبانه بالبيت ومحد يساعدها غيرج يعني هسه ممجبوره هي تشتغل بنص اليل وتنظف بالمطبخ وهم شفتها هي سوت العشا
ضحكت رضيه كالت..شنو مراقبها هااا ودكول ما تحبها وتريد تطلكها وتاخذ الأطفال منها..

جاوبتها...لا هذا الموضوع خلي على صفحه بس اني ما اريدها تتعب اكثر من اللازم يعني تخلص شغلها وتكتفي حالها من حالكم...حتى لو مهما صار بيني و بين اهلها ما يصير نتخذها ورقه رابحه ضدهم

بيومها كلتلي...اي يا جاسر لا تتخذ مرتك ورقه رابحه ضد اهلها هاي انخلقت من ضلعك قطعه منك لا هي حرضت اخوها ولا هي السبب بموت اهلك حتى هيج تعاملها الضلم ضلمات يوم القيامه يجاسر وابوك لو موجود ما يرضى على الصار بيها والله صير مثل مهيوب حقاني بعمره ما رضى بالضلم ولا جان باطل..

ما ادري جنت محتار بين عقلي وقلبي ..عقلي جان يفكر بيج بس قلبي قاسي ما كدر ينصفج ..بس اني مشيت ويه عقلي وبعدها قلبي غصبا عليه ضل يمدح بيج ويحبج لج يعني صارو قلبي وعقلي ضدي شفتي شلون حقاره

ضحكت وگلبي يرجف...ههههههههههه عمري يحبوني قابل مثلك
صفن بعيوني كال ..بيومها كلت الرضيه يمه اريدج تشترين ملابس لتوأم لا تقصرين جيبي كل شي الهم خطيه يعني هي ما طالعه مشتريه الهم ولا عندها ملابس تلبسهم واني ابوهم مسؤؤل منهم

جنت متحمس حيل خاصه من كالو توم و واحد مريض منهم حتى بوقتها كتلها لا دكولين لجولي توم ولا دكولين واحد مريض اخاف لا سامح الله نفقده حتى ما تتاثر وتنكسر فرحتها لان جانت حياة مجتبى حيل مهدده وكالو ما يعيش بس الحمد لله ربي قر عيني بيهم

شهكت بخوف...يمه عزا هيج حال وليدي وما دكولي

سوده عليه مجتبى ..بس جنت بوقتها وحيده وخايفه جنت بحاجتك كولش هوايه جنت اتمنى تحضني تخليني عندك تطمني يا جاسر بس انت جنت متناقض جنت تهددني تاخذهم مني وهذا كله اثر على حملي من غير كلام نوال واستفزازها اليه كل شويه واجت جاسر يكول الطفل راح تاخذه اشواق انطه الطفل الاخته امشي روحي سوي سونار اشواق تريد تعرف جنس الجنين حتى تجهز اغراضه

جنت اموت الف موته بيومها وروحي تشتعل وتطفى نار مشتعله ومتوجره بداخلي اتمنى اصرخ املخ شعري انهزم مره ثانيه ولا اسمع هيج كلام جنت خايفه شلون احمي الطفل منكم خايفه شلون اخليكم تخلوني وياه واكون امه بدل ما تكون اشواق هي امه

اني الي تعبت و وتوحمت وتاذيت اخذ من صحتي عاش وياي لحظه بالحظه باصعب فتره بحياتي هم جانو اقرب الي منكم اقرب من اهلي ومنك بيوم الي انتم تخليتو عني وحاربتوني طفلي جان وياي احجي اله اشكي من ضلمكم ابجي واحس بي مقهور عليه عشت علاقة صداقه وياهم و وهم ببطني حبيتهم وهم بطني كونت عائلتي وياهم وحسيت بأمان من حسيت بوجودهم وجانو هم صمام الأمان بالفعل...

مد راسه مجتبى من الباب ابتسمت عليه كال...شنو ما ناويين تدخلون جوه عاد مو وكت سوالفكم واحنه زعلانين

ضحكت وباوعت الجاسر ضحك جاسر كال...والله هالولد رحمه اجوني عادولي الحياة من جديد عبالك مو ولدي عبالك اخوتي

رد عليه جاسر كله...وليش زعلان حضرة جنابك

مجتبى رد عليه....لان ما رحنه للنجف

جاسر... حضروا نفسكم ونروح فد شويه ماكو مشكلة

مجتبى جاوبه بتذمر...ما ادري ما حبيت الفكره بس يالله نروح احسن من ماكو

ضحكت وعضيت شفايفي وجاسر هز راسه بعدم قبول كال...لسانهم طويل عليج

باوعتله بصدمة وعدم رضا...لا والله عليك اصلا اني بكدهم ما اعرف احجي جملة مفيده وحده بحيث المبرده من جنت بكدهم اسميها مربده هم لسانهم طويل عليك هههههه

ضحك...اي بس من كبرتي لسانج طول صح اول ما تزوجتج فقيره وحبابه بس بعدها لا صرتي وكحه

ضحكت...اي صح والله من تزوجت فقيره حيل حتى اخاف احجي بس بعد ما عشت وياكم وشفتكم اعصاب صرت مثلكم بعد من رافق القوم اربعين يوم صار مثلهم ...

يتبع ....

كونوا انتم كونوا بخير ... احبكم ❤️