رواية #جوليت وأسرها.... الفصل 113 - بقلم الكاتبه سمو العراق

بارت اضافي

بقلمي... نور سمو العراق

لا نملك ثقافة الإنهيار ودراما الإنكسار، مجبرون على التجاوز دون أن نبكي أو نحِّن، مجبرون على الثبات وإن كان كل شيء حولنا يقودنا للإهتزاز.

💔💔💔💔💔💔💔💔

وسط زحمة مشاعري وروحي الي انجرحت ودوامه الي صرت بيها كرهت كل شي سيطرت عليه حاله من الكآبه

من اخر جمله نطقها .. تدرين هي انخطبت !!

ما انطيت اي ردة فعل جنت مصدومه نوعا مااا

واني بيه طبع ما اناقش باول يوم او بنفس الوقت يمر وقت ع الموضوع يالله احجي بيه

بس هالمره جانت روحي تريد غير شي حجيت بهدوء .. شمدريك

جاوب وهو يتصنع بعدم الاهتمام... شفتها ناشره جنت اكلب بالستوريات بالتلي ويطلعتلي

باوعتله بنظره هادئة وثابته

كمل كلامه وهو يكول .. طبعا اني حاضرها بس بالتلي الحساب يظل وحتى ناسيها مو بالي اجاني اشعار رضا ناشر ع تلي مال تعينات الداخليه ودخلت دشوف وصرت اباوع ع كل الستوريات ومن ضمنها جان ستورياتها

حجيت بهدوء... باركتلها

هز راسه برفض ... لاااا

كمل كلامه وهو يكول ...بس هو هم عراقي

رفعت حاجب بصدمه .. اهاا شمدريك عراقي ؟

كال.. هي كاتبه

ضحكت بسخرية... مو عساس مراح تتزوج من بعدك

رد ببرود... كلهن يحجن هيج وبعدين من حقها تتزوج وتعيش حياتها مثل ما اني عايش حياتي وعندي عائله

تصنعت عدم المبالاة بس گلبي ديحترك والله

درت وجهي ع الجهه الثانيه وهمست .. تصبح على خير

حضني وهو يكول .. بعد وكت كاعدين بيج شي

هزيت راسي برفض ... لا ما بيه

احتضني حيييل وهو يبوس براسي وبعدها لزم ايدي وباسها كال .. تصبحين على خير حبيبتي

حس بيه ضجت وانقهرت واني ما صدكت كلامه جان عندي شك من ناحية مصداقيته وتوقعت هي الداخله عليه وكلتله ان هي انخطبت

مر وقت طويل واحنه عايشين بالعشوائيه ولحد الان بصدري مخاوف وقلق  احس الكلام خذلني بهاي اللحظه ركنت الموضوع على صفحة وفضلت السكوت

بس الروح ما تسكت والكرامة ما تهدء ويروح الموقف بس تأثيره يظل واحس حيل اثر بيه

حسيت بيه وكف وطلع للبلكونه هو ما يدخن بالغرفه صار فتره لان عندي تحسس من الجكاره يطلع يدخن برا ويرجع

باللحظات حسيته خاين باللحظات كرهته حسيت روحي لا شي رغم اني كل شي

شام مو احسن مني واني احسن منها بالف قاط اني كعدت اهدي روحها وافهمها اني احسن اني ام وعندي مسوولية وانجازي كبير بهاي الحياة

الحياة الي علمتني اعيش ويه ناس جانو وحوش اتاقلمت وعشت و سكتت الكل درست وثابرت و وصلت وكله بتعبي وبزودي وهسه اني احسن معلمه عنواني الوظيفي معلم جامعي رابع

واجه كتاب الي ينقلني ع الاعداديه والمتوسطه بحكم شهادة البكالوريوس الي عندي بس اني أفضل الابتدائيه لخاطر اطفالي

ماكو وجهه للمقارنه بيني وبين شام

هديت روحي واني اسايرها ولاطفها .. انتي احسن انتي الطف انتي واجهة مجتمع انتي مربية اجيال انتي انجازج عظيم

خلي يكول ببالج يا جولييت طلاب سادس وما عندهم اي مشاكل واي مسوولية وهم وداخلين مدرسه اهليه وداخلين خصوصي تدريس وما جابو معدلج ولا دخلو جامعتج

انتي احسن من الكل رغم بالج المشوش بس وصلتي رغم الوحوش الي محاوطتج بس ما وكفتي رغم كل شي

صرتي تروحين وتجين وراتب بيدج وعندج صداقات وتضحكين وتغيرن جو والعالم تسالج عن الصح والغلط والاهالي تحبج

صرتي توكفين بين ناس كبار ومشرفين ومدراء وتلقين محاضرتج وانتي بعمر العشرين انتي كل المجتمع مو بس واجهه للمجتمع

حسيت على صوت الباب انفتح غمضت عيوني اتصنع النوم

رفع اللحاف ونام بصفي سحبني صار ظهري ع صدره باس راسي وهو يكول .. احببج كلش احبج اني

نظمت انفاسي ومجاوبته بس الدمعه بعيني اني ما اعرف ليش اتحسس منه حيل حتى من اريد اجاوبه تخنكني العبره واعبر الموضوع وما احجي بيه

يا ربي يا حبيبي لا تفضحني وتخلي دموعي تنزل يارب صبرني وانطيني القوه بس اريد اواجهه اوكفه عند حده ما استحي منه ولا اخجل ولا ابجي ياربي بس انطيني قوه

ظل يمسح على شعري بهدوء بدون ما يحجي شي واني بعدها نمت

كعدت الصبح على صوت المنبهه مالته طبعا هو عنده موبايلات ثنين وثنينهن يدكن واني اكعده وما يكعد فد نومه ثكيل

عفته كلت ما اكعده حاقده عليه وحتى جان ممتغطي مغطيته اي خلي اخذ دور الخبيثه وياه حتى يحس بقيمتي

دخلت للحمام سبحت غسلت اسناني لفيت الروب على جسمي وطلعت

فتح تك عين والمربايلات هرجن الغرفه هرج همس .. بيش ساعه

جاوبته.. صباح الخير هسه بالسته الا عشره

تثاوب رد عليه .. صباح النور حبيبي شو مكعديتني

رفعت كتفي بعدم معرفه .. ما اعرف كلت بعد وكت

وكف وهو يحك بركبته والنعاس بعيونه ودخل للحمام عاد اني استغليت الفرصه وبدلت بسرعه جان جو بارد شويه يعني جنه بنص شهر ادعش

لبست هاينك تركوازي وبنطرون اسود وقمصله سوده وحذاء باته ابيض وحجاب اسود ما خليت مكياج بس مرطب وكلوس و واقي

طلعت من الغرفه بسرعه لكيت هدار كاعده من الصبح هي وماما رضيه هاي لو بالمدرسه واريدها تكعد لو تنكلب الدنيا ما تكعد ابتسم حجيت بمرح ... صباح الخير الحلوات كاعدات من وكت

باوعتلي وهي تاكل بيض بالشوكه كال.. ثباحوو

بستها بخدها وماما رضيه صبت الجاي الي ريحته عبت البيت كالت .. صباح الخير يمه تعاي تريكي واشربي جاي

جاوبتها .. لا ماما عليج بالعافيه تلعب نفسي اتريك الصبح

فتحت عيونها على وسعهن وضحكت .. حااامل موو

تغيرت ملامح وجهي وعقجت حواجبي.. لا ماما مو اني احبج ليش تغلطين عليه

لطمت خدها ... يااا شوكت غلطت

ابتسمت .. والله ليكولي حامل معناها غلط عليه هههه

اروح اكعد جهالي وراهم دوام

كالت .. يووو شسووو البارحه يركضون وراه دجاجات صبريه وهدار وياهم هذا مرتضى يكول لمجتبى دجاجات صبريه مخلصات دراسه خلي يعلمنك على جدول الضرب

ويضحكون ويركضون وراهن وهذا مجتبى لزم الدجاجه ويكلها ... تسعه في تسعه شكد

ومرتضى يكلها .. ولج كولي واحد وثمانين لا تفشليني

وهاي هدار هم وياهم لازمتلها وحده وتكلها .. دولي دار دوووور

ضحكت بصوت ... ههههههه عزا بعيني ذول ما يتوبون

رضيه ...شسوو بيه ولكم بيبي اكعدو ولكم عيب ابوكم نايم ماكو

هزيت ايدي .. من يطلع الهم ويكعد يمهم شنو الادب والاخلاق مو توم جولييت الملايچة ههه

دخل وهو يكول ... شبيهم توم جولييت

مجاوبته وابتعدت شويه وماما رضيه حجت وياه

كالت .. يمه البارحه ليل كله ما ينامون يركضون وره الدجاج

جاوبه .. جان صحتيلي اريد اشوف شلون ما ينامون

اشرت على هدار وهي تكول .. وهاي هاي للصبح كاعده وهم تركض وره الدجاج

برطمت شفايفها وهي تكول بزعل .. ابيج بيبي زعلت

عض شفته وهو يحضنها ويبوسها ... لا هاي مسموح الها كل شي تسوي تسهر للصبح تسمع اغاني تركض وره الدجاج تزعجنه اني قابل

ماما رضيه .. سودنها بدلالك

رد عليها وهو يبوس بهدار حيل ... افاااا بس اسودنها اطلع الدلال من عيونها

طلعت دريد اكعدهم هم يالله نروح

صاح عليه وهو يكول .. متجين تتريكين ؟

جاوبته بهدوء وثقل .. ما اريد هناك اكل ويه البنات

طلعت لكيتهم كاعدين مغسلين ويبدلون احلى شي بالحياة هم يخافون من جاسر وحيل يحترمون ابوهم وما يكسرون كلمته من هو خفر يشلعون كلبي يالله يكعدون ومن موجود يا سبحان الله الموقت مالتهم منهم وبيهم يكعدون ويبدلون

باوعلي مشمش وهو يكول ... صباح الخير يا احلى جكليته بالدنيا

ابتسمت بغرور ودلال .. صباح النور يعمري

مرتضى بثقل .. صباح الخير ماما

طبعا عندي مرتضى على ابو عنده نوع من العصبيه وطبع الحاد عكس مجتبى هو هم عصبي بس بيه طكه من جعفر بس مو كلش هههه

جاوبته .. صباح الخير يروحي

يله كملو بسرعه حتى تتريكون بابا منتظركم

تقرب مني مجتبى وهو يكول .. زوجج هذا عصبي

ضحكت .. اي احسن حتى تمشون عدل هاي لو مموجود جان لهسه اكعد بيكم ونروح للمدرسه بالتسعه والمدير يرزلنه

مرتضى ... ما عاش الي يرزلج حبيبتي

ضحكت .. ههه اووووي جهالي مدلليني شنو هاي انتُ احلى ولد لو شنو؟

صاح جاسر ... وينكم

ما اشوف الا اغبارهم طلعو يركضون وكعدو على ميز الطعام كعدت وياهم حتى لو ما اكل

طبع جاسر مثل ابو الله يرحمه يريد الكل متواجد على السفره ومن يبدون ياكلون محد يحجي عنده اتكيت بالاكل

تريكنه وطلعنه هو وصلنه للمدرسه طبعا جنت طول الطريق ساكته وما حجيت شي رغم احنه دائما نسولف ونتناقش بالسياره

باوعلي واني باوعتله غمزلي وهو يكول .. شكوو؟

هزيت راسي برفض ... ماكو شي

بلل شفايفه وسحب نفس وزفره .. من توصلين خابريني

جاوبته .. عندي درس

رد عليه .. كم حصه اليوم عندج؟

جاوبته ببرود.. تلث حصص

رد.. تمام من يصير عندج وقت حاجيني

وكفنه مقابيل المدرسه نزلو مجتبى ومرتضى وهم يكولون .. مع السلامه بابا

رد عليهم وهو يكول .. مع السلامه گلبي

جان نزل من السياره أستاذ قيصر هذا معلم لغة انكليزيه جان ياخذ كل الصفوف 24 حصه باليوم ومن اجيت اني تقسمت الحصص بينه

ركضو عليه الجهال وهو دنك عليهم وباسهم نباوع الهم من بعيد ومجتبى اشر على سيارتنه وهو باوع النه

نزلت عيني والتهيت بالجنطه

جاسر بهدوء.. منو هذا ؟

باوعتله بطرف عيني.. استاذ قيصر معلم لغه انكليزيه

باوعلي وهو يكتم غضبه .. سال عليج ؟

عقدت حواجبي .. شنو سال عليه ؟

رد وهو يشغل بجكارته .. مجتبى من اشر على سيارته معناها ذاك كله جايين لوحدكم لو وين امكم ؟

فتحت عيوني على وسعهن حجيت بعصبيه .. شبيك جاسر شنو هالحجي

نفخ الدخان من شفايفه وهو يكول .. على العموم اذا واحد يضايقج كليلي واذا واحد حب يتلوك هم كليلي

جاوبته ..ترى احنه هنا كادر تربوي ماكو هيج شي من الي تفكر بيه واستاذ قيصر متزوج ثنين

رفع حاجب... شمدريج متزوج ثنين

حسيت روحي جفصت .. العامله الي بالمدرسه هو جمع الها فلوس من عدنا مال جاي ومي وكهوه وكلها الطايف من الفلوس اخذيهم وهي دعتله كلتله ان شاءالله يوم عرسك كلها يا عرسي متزوج ثنين

جاوب بغرور... خيولي نعال عليه

اخذت جنطتي .. تأخرت خليني اروح

لزم ايدي وعصرها وهو يكول .. جولييت لتعامليني هيج

جاوبته ... اوك نعال عليه

كال بهدوء.. انتي شبيج ؟

رديت بعد ما سحبت نفس وزفرته ... ما بيه

كال... انزلي من نرجع من الدوام نتفاهم

هزيت راسي بقبول ونزلت ... يالله مع السلامة

رد بعدم قبول وهو يكول ... هيج مع السلامة لوحدها

عقدت حواجبي.. شلون يعني

جاوب بغيض.. روحي الله وياج

ساق بسرعه وراح وكفت واني اباوع عليه يريد اكوله مع السلامه حبيبي لا والله ما اكول ما انسى حركة كلبي لبارحه

دخلت للمدرسه سجلت حضور ورحت كعدت يم البنات حيل حبابات المعلمات الي ويايه وابد ما يغارن ويساعدني وحتى صرنه صديقات

دخل استاذ قيصر جان طويل حيل يجي بطول جاسر بس جاسر ضخم هذا لا شويه ضعيف وابيض وجان حيل يفتهم بالانكليزي لان هو قديم بالمدرسه جان ينطيني أولويات التدريس وطرق التدريس و وين واصلين والخطه الدراسيه جان يساعدني جنت حيل اخاف من يحجي ويايه اخاف واحد من جهالي يوصل لابو

رغم والله الرجال ما شفت منه الا كل خير وما تجاوز بس مجرد ينطيني شلون اسوي خطه شلون ادرسهم وين واصلين بس اني اعرف جاسر ميقبل

كال .. ست جولييت انتي وياي بالجنة التصحيح

جاوبته بقلق.. بس انت

رد عليه .. لا طبعا اني وياج واستاذ احمد واستاذ حسن واستاذ رعد

ضحكت ست امل وكالت .. ههههه عزااا كلها ولد بس انتي

رد عليها وهو يكول ... اي مو هي الوحيده اختصاص انكليزي رغم بقية المعلمين مو اختصاصهم بس موجودين باللجنة

ما عدنا شي انشوفلنه صف فارغ ونكعد بيه ونصحح وكل واحد ياخذ سوال تدقيق وفحص وتصحيح وابوكم الله يرحمه

جاوبته بهدوء... ان شاءالله

كملت كلامي.. بس للامانه اني ما اعرف للتصحيح ممصححه قبل وذاك اليوم من اجه المشرف وشرح مفهمت عليه

كالت ست امل.. عادي حبيبتي احنه نعلمج هم جنه مثلج منعرف شويه شويه تعلمنه

استاذ قيصر .. باعي عيني جولييت اول شي انطيج سوال والجواب مالته هم انطي الج وتصححي من تكتبين الدرجه تكتبين اسمج بعدها تنقلين الدرجه ببداية الدفتر انوب تدققين السوال الي اني مصححه وتكتبين اسمج وتوقعين وتكتبين دقق وهكذا

وهم من نصلح افهمج اكثر واذا لكيت هسه دفتر افهمج هم

جاوبته بدون كثرة كلام .. شكرا

وضجت لان احسه يتعمد يكول اسمي بدون ست صح اني اصغر وحده بالكادر وناعمه بس اني ام وعندي شهاده مو مال يكول اسمي بدون ست وهو احترام اصلا

كال بضحكه .. اجو مرتضى ومجتبى سلمو عليه كتلهم لعد ماما وين اشروا عليكم اجيت اسلم بس استحيت من زوجج

ابتسمت مجامله مجاوبته وفعلا كلام جاسر صحيح خرب يومه ولا تفوته شغله كال سال عليج هذا يعرف كل الدروب

اجتني رساله من جاسر كاتب ... خو ما حجه عليج المدير

رديت بسرعه.. لا اصلا جان مموجود بالتربيه وسجلت حضور ولكيت ست شروق ماخذه درسي ام رياضيات

رد كتب ... خوما واحد مضايقج

جاوبته ... لااا

رد سالني... شبيج بابا احجيلي

كتبت ... ماكو شي

كتب.. سكوتج مضوجني حيل بويه احجيلي ضايجه من شي تردين نطلع نروح للزياره او ناخذ اجازه نروح للشمال

رديت .. ماكو شي والله وما اكدر اسافر تعرف اني جديد مباشره بالدوام مو مال اخذ اجازه وهم مشمش وروضي عندهم دوام

اجتني رساله... اني بشغلي وبالي يمج مو على بعضج ام مرتضى اني احبج وانتي تعرفين بهذا الشي

جاوبته ... من نرجع نحجي

كتب... خوما حضنوج الجهال

رديت... يووو يا طلابة الجهال المتخلص

رد.. مو غيره بس خاف حامل ويجعصون ابني

كتبت.. ديله بله منين حامل لا تجرحني اكثر

دزلي... ليش اني جارحج احجيلي

جاوبته... لا مجارحني

شاف الرساله وبعد مجاوب

واني خلص وقت الدرس ورحت اخذ بقية دروسي اووف احس مشتاقه لامي واتمنى تجي وتشوف بنتها وين وصلت وشنو صارت كاعده ع كرسي واصلح للطلاب والي مركز و واجهة مجتمع تشوف شلون اني ام وموظفه والناس تحبني وبيتي نظيف وتشوف جولييت الطفله البريئة الفقيره وين وصلت وشنو صارت

....................

جابر

طلعت من البيت بسرعه لبست جاكيتي واخذت المحفظه وما اخذت سويج السياره لان جاسر كلي تعال بتكتك ومن نرجع اني اوصلك

ركبت تكتك لكيته واكفلي بالسياره يم التقاطع نزلت ورحت عليه سلمت وصعدت حجيت باستغراب... خير ابو مرتضى صاير شي

جان الجو بارد شويه وامطر خفيف داخلين على شهر 12

رد عليه كال ... لا بس اريد اروح لبيت عم ام مرتضى امها صار فتره متحاجيها وذاك اليوم من اجتنه صبريه كالت لعمي عكاب امها مواته

باوعتله .. اي صح عساس يكولون كلياتها واكفه وتغسل ورجلها يردون يكصوها سوولها عمليه ومنخور العظم

جاوبني.. اريد اعرف بيا ولاية كاعده وبيا مستشفى هناك بالخارج حتى اسافر اني وام مرتضى طلبت اجازه اني وبعدها مقابليها هالاسبوع ان شاءالله وهي سهله اسويلها مرضيه واخذها للخارج

رديت عليه... وين تاخذها وجهالها منا منو الهم خو ما تاخذهم وياك

جاسر... اعوفهم يم امي رضيه جولييت لازم تشوف امها حتى لا تظل بنفسها انحرمت من امها هوايه وصارت الوقت الي تروي عطشها حتى لو جان لكاس ما مليان

مشينه لبيت عمها دكينه الباب طلع عمها دخلنه جابو جاي ومي ما شربنه

جاسر حجه بهدوء وهو يلزم طرف النفاضه ... يا ابو هشام لي بينه بينه لا دم ابوي واخوي وبنتي نسيته ولا كتالهم مسامحه وعفت هالامور للدوله والقانون ياخذ مجراها

وهذا كله لخاطر ام مرتضى اغلى ما عندي الا اني لحمي مر ودمي حامي وما ارضى الا بالقصاص بس بعد ام بيتي حكمتني وربطت اديه وما خلتني اذوگ طعم انتقامي

على العموم هذا مو موضوعنا موضوعي اليوم امها ام جولييت واني دائما خالتي اكول عنها ام جولييت لان لا عاصم ولا حازم يستحقون تكون امهم هي امها وبس

عمها حجه باسف... امها مريضه وتريد تموت سوولها عمليه وما نجحت وكل اسبوع تغسل كليات ورادو زرع كلى الها بس ما تطابقت ويه حازم

كلتلهم اني اخذو جولييت وشوفوا اذا تطابق وخلي تتبرع لامها

رفع ايده جاسر وهو يرد عليه .. حدك مرتي ما اجازف بيها وامها اذا محتاجه كلى نشتريلها كلى واني اتكفل بكامل علاجها وهي هم مو غريبه عليه هي خالتي ومثابة امي بعيدا عن الي سوو ولدها

واربيل وسليمانيه مليانه مستشفيات زراعة كلى وهم اكو هوايه ناس تتبرع بكلياتها مقابل الفلوس وشكد تكلف اني وياها من الف دينار لحد لمية مليون

وهذا كله الخاطر ام مرتضى اريد الله يحيي امها وتشوفها وتفرح بيها

ابو هشام ... بالخارج ما قبلو يزرعون الها كلى وهي تريد ترجع للعراق تريد تندفن بصف ابو عاصم وتلح على هذا الموضوع موضوع الرجعة اقصد

بس حازم ما عنده فلس احمر وتكاليف السفر تريد فلوس واحنه هم ما عدنه كناله امك اذا ماتت ادفنها هناك

رد عليه جاسر ... خلي يدزلي  بطاقتة ودزله حواله شكد يزيد وشكد يكلف وخلي يرجع وان شاءالله اذا الله وفقنه ناخذها نزرع الها كلى هنا ونعالجها

جاب ورقه وقلم وكتب رقم مد ايده لجاسر وهو يكول... هذا رقم حازم تواصل وياه واحجي وياه هو محتاج احد يوكف وياه ويساعدنه واحنه مثل متعرف اليد كصيره والعين بصيره

اخذه جاسر وخلاه بمحفظته تشكر من ابو هشام وطلعنه

صعدنه بالسياره كال.. باجر ان شاءالله اتواصل وياه وان شاءالله خير

ظلينه نسولف كتله ..اكو مزرعه يم خالتي صبريه للايجار ليش ما نروح كلنه كعائله هم شويه نغير جو وهم نتونس والله ظالين بس نشتغل ما مونسين روحنه

جاوبني ... مو وكته ام مرتضى اذا درت بامها مريضه ورايحه للمزرعه تتخبل اعرفها حنينه حيل وتظل تاكل بروحها

رديت عليه.. ان شاءالله تطيب وبعد جراءات السفر تطول وخلينا نتفائل بالخير ان شاءالله ترجع للعراق وتسوي العمليه وتنجح وهم من تشوف ام مرتضى تفرح وتتغير نفسيتها وتطيب

فاحنه خلينه نروح هاي الايام قبل لا تبرد حيل هم نتونس وهم نشوف خالتي صبريه وهم نونس العوائل

جاوبني.. نشوف الله كريم

وكفنه بالازدحام جان اكو طفل يبيع ورد وكف يم السياره اسر نزل الجام وكله .. بيش الورده

الطفل.. عمو ب 3 الله عليك اشتري مني والله تعبان اريد ارجع انام

جاسر فتح محفظته كله .. انطيني اربع وردات

انطاه 25 الف الطفل راد يرجعله مقبل اخذهن الك كله

انطاني ورده وهو يكول.. هاي الوقار انطيها

ضحكت .. وهن لتلاثه المن

ضحك.. وحده لامي رضيه وحده لام مرتضى وحده لهدار لان هدار تزعل وزعلها ثكيل تبيتني بالشارع ههه

ضحكت.. هههههه يابه متحبني تكول اهووو هم اجه ياخذ عمتي الجميله شكد مكروه

جاوبني.. اي صدك انت كلش مكروه ليش تاخذ عمتها هسه هي ماخذه عمتك

باوعتله بنص عين.. دافع لبنتك دافع

شويه واتصل موبايله مكتوب امي ام فلاح جاوبها . ها يمه

جان صوت الموبايل عالي كالت... تعال يمه والله مليت شهيده تعاركت ويه جعفر وكتلها شلون بيهم اني ذول

جاسر .. هسه اخابره اشوفه شبي

خابر عليه طلعله جعفر ... هاااا رضاوي حبيبي

جر نفس وزفره... انت ليش ما تصير ادمي شوكت تبطل طلايب ويه مرتك

جعفر... اهووو يمعود الكتل بيها حلال مكعدتني من النوع تريد اندومي بالخضار

جاسر ... ومتجيب الها اندومي نمونه

جعفر.. مو زين مضر بالصحه

ضحك.. باع منو يحجي بالصحه جعفر انت صار هواي ما مكتول بالبوري مال المرجوحه

جعفر ... ترى راح اصير جد بناتي اجو عليهن خطابه وانت يوميه كاتلني بالبوري

جاسر... اي متمشي عدل شسويلك ذاك صلاح منو يحجي وياه لان محترم نفسه ومحترم عائلته

جعفر ... مو تركت العرك؟

جاسر ... لا سويت فضل اشكرك اني

جعفر.. احسك تستهزء

جاسر ... لا يابه اكيد استهزء

طفى الموبايل بوجهه ورجعنه للبيت دخلت وقار جانت تغسل مواعين والطفل نايم حضنتها وحطيت الورده ع خدها

ضحكت واخذتها مني .. شكرا يروحي اليوم رومانسي جايبلي ورده

ابتسمت... لا مو اني ابو مرتضى جابلج

رفعت ... عابت عبالي انت كلت متطلع منك مو رومانسي مثل اخويه

هزيت ايدي ... اخوج هسه صار رومانسي تذكري قبل وجهه بيه سبعين لطام ع كولة جولييت

كالت بحزن ... الله يساعده جانت نفسيته تعبانه بس هو صح عصبي وغيور بس حنين وكلبه طيب وصدك وين جنتو ؟

بستها بخدها .. دكملي المواعين واسولفلج وين رحنه

..................

جولي

دخل جاسر طبعا هو اليوم كله مموجود ولا شفته من الصبح من اخر ما دزنه للمدرسه رحتى رجعنه ويه صلاح خابرته كال هسه ادز صلاح وفعلا رجعنه صلاح للبيت

دخل مبين التعب على وجهه وملامحه جان شايل وردتين ولابس قمصله من شفته نزلت راسي محجيت شي وماما رضيه كالت ... الله يساعدك يمه

رد عليه ... هلا بيج يمه

والجهال هم كالو ... الله يساعدك يابه

جاوبهم... هلا بيكم يابه

اجته لوكيه الصغيرونه وهي تبوس كعد على القنفه وانطاها الورده ... جابتلج ورده جانت عدنا ورده وحده بالبيت وهسه صارن وردتين

اخذتها وهي تشم بيها وتبوسه كص نص غصنها وعلكها بشعرها وباسها

اخذ الورده الثانيه وانطاها لماما رضيه ماما خطيه مثل الفشلت كلتله ... لا انطيها لجولي اني شسوي بيها

جاوبها... بس اني جبتها الج انتي اخذيها لا ترديها

اخذتها منه وراحت خلتها بكلاص مي وحطتها على الطاوله واشكرت منه

كلتله .. ليش ما جبت لجولي

مجتبى من يمه نط كال... هي ورده ميحتاج

رفع جاسر حاجب وباوعله صفح وراح للغرفه

مرة نص ساعه كلت خلي اشوفه متعشي لا شكد حبابه اني ابتسمت ورحت دخلت للغرفه جان متمدد على الجربايه وشعره بيه مي ولابس تراك اسود بيه خط ابيض بارز عضلاته

وكفت كدامه .. تتعشى

كال .. تعالي اكعدي مقابيلي

كعدت وضميت اديه لبعض باوع بوجهي بجمود كال... انتي شبيج اليوم

جاوبته ... ماكو شي

رد بغضب ... لا تكولين ماكو شي لاتخبليني

رفعت اكتافي بعدم معرفه... اي ماكو شي يعني شنو گوه

سحبني من ايدي حييل ضربت بصدره طلع ورقه استنساخ جانت عندي كال ... شنوو هاي

باوعت وحجيت بهدوء بعد ما ركزت بعيونه ... هاي لجنة تصحيح

حجه بانزعاج ... شو كلها زلم بس انتي بنيه

رديت ... كادر الانكليزي هيج بعدين هذا كادر تربوي مكاعده بسوك اني اني الوحيده من بين البنات اختصاص انكليزي

جاوبني ... صاير لسانج شطوله وبعدين هاي وين تكعدون

ضحكت بسخريه ... وين نكعد يعني غير بغرفة المعلمين والمعلمات ونصحح يعني مراح نروح بيت واحد ونصحح

تعصب وجهه صار نار وعيونه كبت عاط بيه وهو يكول... انجبييييييي لا تظلين تجفصين

سكتت محجيت مجاوبته خفت بصراحه خفت احجي كلمه بعد ويتطور الموضوع

باوعلي وسحب جكاره كال ... جيبلي نفاضه

وكفت جبت النفاضه انطيتها اله جان يكول... هالمره بلعتها مره ثانيه متنبلع احذرج هااا

تعصبت حيل وحجيت بغضب والدمعه بعيني ... اني هم بلعتها من تكعد تتابع اخبار لخانوم وتعرف انخطبت وخطيبها عراقي هااااي هم بلعتها وكوه بلعتها هااا

وكف متعصب واني رجعت خطوات خايفه وملامحي تغيرت من العصبية للبراءة

سحب ايدي وهو يكول ... وانتي گالبه وجهج من البارحه لليوم عمود هذا الموضوع

جاوبته بقهر ... ترى عندي احساس احس والله مو رجل الي اني ومقهوره حيل والله

سحبني لصدره وهو يكول ... ما عاش لي يقهرج والله وترى والله ما مهتم الها ابد اني لو اريدها ومهمه عندي ما اكلج انخطبت بس يعني هيج عادي حجيته

رديت عليه ... لااااا انت تقارني بيها تكول تعرف تسوق وسباعيه

صفن بلل شفايفه وهو يكول... مستحيل اقارنج بيها انتي عندي غير واريدلج احلى واحسن شي وانتي سباعيه وبطله وكيوت وكل شي حلو بيج انتي ام مرتضى ما تتقارنين بكل العالم مو عاد بوحده

وترى من انخطبت ما هزت مني شعره لا هي ملكي ولا هي تعنيلي حالها حال العالم لا ثارت غيرتي ولا تندمت عليها

عكسج انتي اليوم مجرد ما شخص باوع على سيارتنه وانتي بيها الدنيا اشتعلت عندي ورحت واني أفكر بالموضوع ردت انزل اشبعه بوكسات بس كلت متسوه ورجال ما سوه شي

لا تزعلين ولا تتحسسين وهم حقج عليه واني اسف يجوز غلطت من ذكرتها كدامج بس صدكيني مو قصدي

حجيت بغصه.. كلش يحز بخاطري من تذكرها او تحسسني هي احسن مني

سد حلكي بيده الخشنه وهو يكول... ماكو واحد احسن منج انتي احسن من الكل ولا اكدر اقارنج حتى بنفسي انتي احسن مني

لا تضوجين و وعد بعد ما تذكر كدامج ولا اجيب طاريها

حجيت بحزن .. عندي شغله صغيرونه ولو مستحيه احجي بيها بس لازم احجي ولا عبالك اني اكرها لو اني حقيره بس اني لخاطر بنتي

عقد حواجبه كال بسرعه ... شنووو؟

دمعت عيوني كلت ... هدار سميها باسمها

صفن وملامحه بهتت كال ... ليش؟

جاوبته ... لان هاي هويتها وهذا اسمها

باجر من تكبر وتعرف الموضوع بنتي حساسه مثلي تحس انت تفضل اختها عليها طامس شخصيتها وصايره عدم مهمشه ماخذه دور اختها وهي بقبرها

ادري بيك تحب غزل وما تريد تنساها ولا تريد تدثر اسمها بس فكر بهدار مثل ما تفكر بروحك حب هدار لروحها مو لان اسمها غزل

اتمنى تفتهمني وتفسر كلامي بايجابية مو بحقد ولا اريد تكول هدار وامها اخذن لاول والتالي وغزل وامها اندثرن

هيج عشنه وهاي حياتنا وهيج انكتب علينه اني مرتك وهاي بنتك وغزل عايشه بروحنه اني لحد الان ابجي عليها وحاسه بحركة كلبك عليها هاي اول فرحتك وبنتك جبيرتك نارك ما تطفى حتى لو الله عوضك

بس تظل غزل هي غزل ذيج لبنوته الذكيه حبيبة ابوها لماتت مظلومه محرومه عايشه بكلوبنه وبروحنه ومننساها واني اعلم اخوانها ان عندهم اخت تجنن عسوله وحبوبه ونحبها ونزورها وندعيلها وننطي ثواب على روحها

وتظل هدار هي هدار الي جنت من بعد غزل تداوي جرح ابوها الي عمره مراح يلتئم

نفخ بضجر وهو يكول... فتحتي جرح بكلبي جان ساكن ما اريد انسى غزل ودائما اكول يارب لا تصبرني ولا تنسيني ومن اصيح باسمها بالبيت ما اريد انساها واريد احسها موجوده

بس هدار احبها مو لان اسميها غزل لا والله بس هي روحي من الدنيا اعشقها واحبها شلون ما احبج واحب غزل

باعي اني صح عصبي بس حنين والله خاصه على لبنيه احسها مكسورة جنح مالها غير ابوها وما عندها قوه مثل جنح الفراشه رقيقه ودائما اكول اهلي يمكن الهم سبب وماتو بس غزل ما بيها سبب ولا الها ذنب

دمعت عيني... هذا المكتوب هيج خطة الله سبحانة وتعالى منكدر نغيرها الحمدلله ذقنه ثمن هالغلطه وتعبنه صار لازم ننسى

حضني وهو يكول ... نسيت لخاطرج والله وسكتت لخاطرج هواي سويت اشياء الخاطرج

حبيت اغير لجو جاوبته... بس مجبتلي ورده

ضحك باسني..بعد لا تزعلين مني

...جولييت: إي بس الكلمة جرحتني! أني شنو ناقصني حتى تحچي بهالطريقة؟وتقارني

جاسر: ناقصني أني إذا أخليچ تبچين. أنتي مو أي وحدة... أنتي نصي الثاني، أنفاسي، صبحي ومساي. إذا آني أجرحچ، شلون أريد أعيش وياچ وما اقارنج مستحيل لتخلين ببالج

جاوبته دلع ... بعدني ضايجه وزعلانه

جاسر.. آني لو أگدر أمسح الزعل من  گلبج، چنت مسحته بإيدي

ابتسمت.. خوش صاير شاعر

هز راسه برفض ... لا شاعر ولا شي انتي دنيتي وكلي وتاج راسي وما اتحمل اشوفج زعلانه

باس راسي كال... فتحي لكنتور بسرعه

فتحت لكنتور ليكت لورده بيها ضحكت خليتها على خدي ... مو اني كلت مستحيل تنساني

ضحك ... اول وحده اجت على بالي انتي احبببج

ابتسمت بخجل ونزلت راسي تقرب مني وهو يكول ... صايره حلوه

رفعت حاجب.. ترى اني حلوه من زمان

ضحك كال.. من صرتي ام حلويتي حييل ومن صرتي معلمه زاد جمالج اضعاف

حضنته مجاوبته رفعت عيوني اله .. نكعد بالبالكونه

جاوبني ... اي وسويلنه من ترتيباتج ايس كوفي كهوه وسط كيفج

رحت بسرعه سويت ايسكوفي وخليت فاكهه وعمرت لاركيله وكعدنه جو حلو يجنن ظل يسولف عليه كال نروح للمزرعه حيل فرحت خاصه هناك خاله صبريه شجعته حيل وهو راح نام واني كعدت اسولف ويه البنات وقررنه نسوي اكلات وناخذ ملابس واغراض

حطيت راسي على المخده اجه طيف امي على بالي حسيت انقبض كلبي والفرحه لجانت غامرتني حل محلها حزنّ وكآبه طرد الأفكار السلبية من بالي بس مكدرت روحي ظلت تفور حاسه اكو شي لعد اهلي ليش ميجاوبوني ومحد يحجي وياي عجيب والله عجيب

.................

حازم

بديار الغرب فلوس ما ضلت عندي مكسور كسره جبيره حمل وهم كله على صدري واني اشوف امي عزيزة روحي مكسوره وذبلانه والموت محاوطها من كل جهه

امي تعبت حيل جانت ما تقبل تحجي ويه جولييت تكول اخاف عليها تضوج وتنقهر واني بعيده شيجيبها وهي عندها اطفال

جانت تباوع لصورها وتبوسها وجانت تحجي وياها وما تكلها اني مريضه ما تقبل تكول اعرفها حنينه وتظل تاكل بروحها اخاف يصير عليها شي منو لجهالها

بعدها كالت ما اريدها تتعلق بيه واني اعرف نفسي مواته وما اظل جانت كل الوقت تلهج باسمها

واخر فتره امي فقدت بسبب غسيل الكلى الي صار كال يومين غسل وتعب جسمها وحتى وريد ما عندها غير رجلها لمتهشمه طلع عندها مرض ولادي ما اثر على رجل

من غير كل هذا امي عندها حدبه بظهرها تضرب على رجلها ثكيله وفقر دم عندها امي فقدت وصارت تنسى

واني فلست وما ظل شي عندي جانت وصيتها وامنيتها تشوف جولييت وتندفن بالعراق ملت من الغربه وملت من كل شي ما ارتاحت من صار الحادث لحد الان

جنت واكف مقابيل الغرفه ومجتف اديه وجهاز الغسل يشتغل دمها يدور بالمغذي او بجهاز الغسل وشيباتها طالعه من حجابها وجهاز لتنفس بحلكها وصايره منفوخه من الغسيل

دك موبايلي تنهدت وطلعته من جيبي جان رقم غريب فتحت خط حجيت بهدوء ... الووو

رد عليه بصوت خشن ثكيل ... الووو حازم؟

جاوبته بقلق... اي تفضل منو وياي؟

رد بهدوء وهو يكول... اني ابو مرتضى زوج اختك

نهاية البارت ... يتبع

كونوا أنتم كونوا بخير... احبكم❤️🫂