رواية #جوليت وأسرها.... الفصل 112 - بقلم الكاتبه سمو العراق

بارت تكميلي
رواية .. جولييت واسرها
بقلمي.. نور سمو العراق

💔💔💔💔💔💔💔💔💔💔💔

مرحبًا مرة أخرى...
هذه التحية البسيطة تحمل في طياتها اعترافًا بالتكرار الذي نعيشه. يومٌ بعد يوم، نفس الروتين، نفس الأفكار، نفس الأحلام المؤجلة، نحاول أن نبدو مختلفين، نغير من مظهرنا، من كلامنا، لكننا في العمق ما زلنا كما كنا، العالم يتغير حولنا، أما نحن فنتظاهر بالتغير فقط، في لحظات الصدق مع الذات، أعترف أنني ما زلت أحمل نفس الأخطاء، نفس المخاوف، كم مرة وعدت نفسي بالتغيير، ثم عدت إلى ما كنت عليه؟ الآن أحاول بصدق، لا لأثبت شيئًا لأحد، بل لأنني تعبت من الدوران في الحلقة ذاتها، تعلمت أن بعض الذكريات يجب تركها وراءنا، وأن بعض العادات لا تستحق التمسك بها، لن أعدكم بأنني سأصبح شخصًا آخر، لكني سأحاول أن أكون أفضل، هذه المرة، سأكون صادقًا مع نفسي قبل أي شيء، فقط أريد أن أقول: "لقد تعلمت من أخطائي.. وهذا في حد ذاته بداية التغيير".

طلعت من المدرسه الي ادرس بيها ولازمه اطفالي بثنين اديه مرتضى ومجتبى منا

وهم يحجولي عن دراستهم وشلون المعلمه طلعت بالاصطفاف وانتطتهم شهاده تقديريه بسبب تفوقهم بالدراسه

رجعت بذاكرتي لقبل ساعات من هذا اليوم من جنه واكفين بالاصطفاف وست هناء وزعت الشهايد التقديرية كانو من ضمن الطلاب مشمش وروضي عيني دمعت واني اشوف ثمرة تعبي كدامي شلون فرحانين وشلون شطار وحلوين

ابتسمت .. يعمري انت ُالشاطرين حيل فرحانه بيكم اني

مشمش باوعلي وهو يكول .. جوكليته اليوم شفت معلمتي ست الاء الاحبها كتلها امي صارت تدرس وياكم كيفت حيل فرحت

ضحكت .. اي حبابه صارت صديقتي

وصلنه للبيت دخلت لكيت عدنا وقار كاعده يم هدوره وهدار تكولها .. عمه الله عليج لا ترحين خليج يمنه فدوه حبابه

ردت عليها وقار .. شسوي ميقبل جابر

عقدت حواجبها بطفوله وهي تكول بحزن مصطنع وتمثل .. كوليله امي تبجي عليه وتريدني يمها ما اكدر اعوفها

ضحكت وقار .. يمعوده ميقبل جربت هاي الخطه

ضحكت وعبالك اجتها فكره جهنميه وحابه تطبقها .. عمه عندي خطه ليش ما نشيل بغير بيت ويجي عمو جابر يدور يدور وميلكانه وبعد يروح ومياخذج

قطعت كلامهن .. يااا عيني العمه وبنت اخوها خوش يخططن راح يبيعنه البيت وهجمنه ههههه

وقار... ههههه تعالي شوفي تفكيرها تريدني اظل هنا وجابر تطرده

بهاي الأثناء اتصل جابر وهدار زهكت روحها ... اهوووو هم دد هم دد دد لزده ( اهو هم دك هم دك شكد لزكه)

وقار فتحت خط... هههههه جابر تعال شوف بنت جاسر شلون تحبك

دخلت جوا جان جاسر مو هنا بالشغل بدلت وكملت اجتني رساله منه كاتب .. ها حبيبي رجعتو من الدوام

جاوبت ... اي عمري رجعنا اليوم مشمش وروضي من المتفوقين انطوهم شهايد تقديريه

رد.. عفيه اسباع ع ابوهم بس شويه نحسين ع امهم

ضحكت.. ههههه نحسين عليك

كتب.. خو ما الطلاب حضنوج

جاوبته... اهووو لا تغار من الطلاب ترى ذول اصدقائي واحبابي مشايفهم من يشوفوني شلون يفرحون ويكولون انتي اعقل معلمه بالدنيا

جاوب.. حقهم ميدرون بيج مخبله

جاوبت بحزن .. شبيك خبيث دوم تدثر مواهبي

رد ... تتذكرين من جنتي تردين تصيرين خياطه واني يوميه شاك ثوبج ومفلش المكينه
جاوبته ... اي من وره مشاكلكك انت مشكلجي شكد تعارك يبوووو ولحد الان احب المكينه

ظل يدردم عليه واني اضحك بدلت وكملت طلعت برا طبخت بس تمن محضره غدا من البارحه مرات دوامنه ظهري اطبخ الصبح واذا صبحي اطبخ باليل واحضره ماما رضيه مرات بس تحمي ومرات تطبخ بس التمن لان مياكلو بايت واذا اجي من وكت اطبخ تمن اني

طلعت برا لكيت جعفر موجود جايب بناته شكد احبهن حلوات ولوتيات وكحات بس طبعا مو اوكح من بنتي

ذاك اليوم رحنه بتنه يم بيت صلاح وهي متريد ترجع وخابر جاسر كال خلي يرجعكم صلاح

وهي تتلوك اله تكوله .. خلينه حباب باجر بس باجر

كلها .. لا يابه مو اني وحدي منو يجيبلي مي منو يجيبلي نفاضه منو اسخره

كالت .. ميخالف هسه ادزلك ممش وروطي بتكسي بلي

بربوك مضحيه بولدي وتحب بنت جعفر تكلهم تبيعوها بعشرين الف وانطيكم ممش وروضي يجيبولكم سمون وتمن ( صمون وتمن) تسويلهم اغراءات حتى يبعولها بنتهم ههههههه

اجه جاسر من الشغل سلم علينه وباسها ولعبها وبعدها لزمني بالمطبخ يشاقه ويايه ويضحك وباسني

هي غارت عندها نوع من الغيره خاصه مني هههه

دخلت ماما رضيه وهي تكول جاسر يمه اجتني هدار تكول كولي لابويه اني حنام وهدار بطنها توجعها بس مو تكولين اني كتلج ههههه

ضحك وراح عليه رحت وراها شافها نايمه على وجهها ع القنفه والدمعه بعينها شالها وحضنها وهو يشم بيها ويبوسها ... يروح ابوج شبيها بطنج

ردت بطفوله وحزن وجذب.. ما ادري يمتن لان اتلت سمونه( ما ادري يمكن لان اكلت صمونه )

حضنها حييل ويبوسها ... اكتلها للسمونه اذا وجعت بطنج ابوس بطنج وتطيب؟

هزت راسها بقبول وابتسامه باسها وهي كالت .. بعد ما توجعني طابت

اباوعلها تجنن عيونها مدوره وزرك وشعرها مجعد مثل الذهب وشفايفها ورديه اخاف حتى اطلعها حييل حيل تشبهني عبالك لعابه وكلها تحبها وسوالفها تخبل

همسلي جاسر ... تغار منج

رفعت حاجب وضحك .. مو بس تغار وتسوي افلام هنديه عشتووو بتنها توجعها من السمونه

رفع اصبعه بتهديد ... لا رجاءا غزوله متجذب

دائما احسه يتعمد يسميها غزل وكأنه ما يريد يطمس روح اختها ولا ينساها ويتذكرها بهدار

اني ما اضوج بالعكس اتعاطف ويه الموقف دائما بس يجي ببالي تفكير هل ممكن هدار من تكبر تتقبل ابوها يصيح الها باسم اختها ويطمس وجودها او ما تتحسس

جعفر اجه وهو يكول ... ابو غزل شسالفه وين غداكم لو متصبون الا اروح ناصبيلي كميل ترا ما اروح ظال للغدا هاي شهد طابخه مركة طرشانه واني ما احبها وين اكو واحد ياكل اسكريم قمردين وتمن

جاسر ... واني شنو فاتح مطعم منو ما عجبه اكل مرته اجه ياكل من اكل ام مرتضى

جر نفس وحسره وهو يكول .. اكل ام مرتضى طيب

طبت خاله صبريه وهي شايله طشتها ع راسها كله دجاج وبط مربوط وتصيح بالك بالك ما بيه بريك

تفاجئت بيها شعجب اجت بدون ما تنطيني خبر بس حيل فرحت بجيتها مفاجئة حلوه منها

بوستني شبعتني بوس وباست الجهال سلمت ع جاسر من وره خشمها ورجعت سلمت ع جعفر وماما رضيه

وجهال شافو بطوط ودجاج وهم طاروا بيهن الدجاج والبط يركضون ويكاكون وجهالي تركض صار هجوم طلعو بالحديقه وبنات جعفر وياهم

جرت صبريه نفس بتعب وهي تكول... يمه حااااره سوده عليه بمبش هسه الگاه غادي نار من بارحه فلاونزا ما ادري شلون انطاني كلبي واجيت لبغداد وهاي ثوله ما تدير بالها عليه ( تقصد امه)

رضيه.. بمبش منوو؟

جعفر ... ابن كنوش الكعده المدلل هذا لو شايفته يا يمه رضيه مو طفل فد محبوووب بس عود شنو كنوش وحاطته

رجع كمل .. صدك صبريه ولا واحد طالع عليج كلهم ع كنوش

عضت اصبعها ... اووووي غير كله من وره لبربوك محاسن صافنه بوجهه كنوش وكاعده وطلعت المطايه كلهم يشبهونه

جاسر عكد حواجبه ... محاسن منو؟

جعفر بحماس.. محاسب ام بمبش مرة كنوش جنة صبريه

صبرية طكت الجكاره... خايبه امداها امده خيرها خايسه اخس من حسنه عود صبرية هم عندها جناين مثل النسوان

عايفه المطايه الصغار لا اكل لا شرب مگايله وكاعده جنها هايشه واضنها طاكه كنوش سحر عبنه صافن عليها ما يوم من الايام رفسها وجتلها وادبها

جعفر كال وهو يستهزء ..وشلون عندها مطايه يخبلون جنهم كتاكيت صدك ينطي لجوز للماعنده سنون

صبريه كملت ...يااا انت شايفها ولو اصيح منا لباجر عود دكول هااا لا تغلس يماحسن يالعوبه يالخايسه كومي اعلفي ماكووو وكنوش صاير مطي ابشركم

جعفر يحرض بيها على الحيوانه.. كرة عينج يصبريه كنوش مسحور الا شني هي محاسن خلقه اخلاق صدك صاير مطي

طفت جكارتها باصبعها ومركزه عليها وهي تكول... ايييي يجعفر مثل يوم لسحرتك نويله وشهيده كل شويه تخابرني تريدك تحاجيها

وانه لطمت وكلت ... شهيده تكول ودوني ع جعفور
شكللج يشهيده جعيفر مسحور ... شهيده تكول ودوني على جعفور احووو احووو

وجعفر يلطم وياهااا... تهديلي يشهيده ولا تلحين وبلكن اشوفلي حل عند السلاطيين وشهيده تكول ودوني ع جعفور

ظلينه نضحك عليهم سوولهم لطميه شكبرها

ردت صبريه كالت .. صدك وقيره شلونه جابر ابو المتعه بعده يروح لإيران؟ يم بيت الغاگة

ضحكت وقار.. خاله شسالفه هههه هو راح مره وبعدها تاب وقسم يمين ما يروح

كالت بتفكير .. اظنه باگو فلوسه وما انطو مره هالمروح خيولي زعلانه عليه انه لا يكول خالتي لا يسال حتى من عرست لوليدي ما اجه

ضحكت وقار محاجتها من تحاجيها تاكلها وتشربها

رضيه كالت ... يووو صبريه ما ظل واحد ما حجيتي عليه دكولي يالله شبيج

شاورتها بهمس وهي تباوع لجاسر .. ظل بس ابو الرياء من يروح احجي عليه

هو حس بيها نزل راسه وهو يخفي ابتسامته هز راسه باسى مراضي بكلامها طفى جكارته بالنفاضه و راح يسبح

باوعت بقرف بعد ما اختفى طوله كالت ... ام عشتووو ما راضي

رفعت اصبعها بتهديد وهي تكول ... كلها تنسى لسواه جويسر جكليته الا انااا ما انسى ويظل ابو الرياء ليوم الدين

نفخت بضجر وضحكت رحت منهم مرات احب العزله احب اختلي بنفسي

وفعلا كلام صبريه اكو كلام ما ينسي واكو تصرفات ومواقف تظل محفوره بالصدر وبالقلب صعب واحد يتخطاها مهما مرت ايام وسنين

احس الحياة مثل كلمة مرحبا قابله للتكرار ونفس الروتين نفس الافكار ونفس الاحلام المؤجله العالم ديتغير بس احنه مثل ما احنه ما تغيرنا ممكن صار اكو فد تغيير بسيط بس الأرواح نفسها

عندي هواجس للماضي عندي احساس شام لحد الان تدور بحياتنا

عندي احساس امي مو بخير !!

كنت ع تواصل وياها تواصل دائمي افتح كاميرا نسولف نضحك اطفالي يحبوها وجاسر يسلم عليها

لكن هي فجاة اختفت وما صارت ترد على كلامي صابتني حاله من الهلع والخوف كلت ممكن يكون صاير شي

وراها جاوبتني كالت .. والله مشغوله وهم مقهوره ع عاصم حياته انتهت مسجون مؤبد وهو شاب وصغير

هو جان طايش وعصبي وغلط صح هو قتل تلاثه بس مجان بنيته القتل

حاولت تطلب مني اتوسط الها عند جاسر يخفف الحكم عليه ويتنازل عنه وظلت تبجي

آني تفاجأت من تغيّرها المفاجئ امي من يوم الي انسجن حتى ما ذكرته بس من بعد فترة انقطاع اجت وذكرت عاصم

مع العلم احنه متفقين ما نحجي بيه وتسببلي مشاكل لان جاسر لحد الان اصلا ما راضي بالحكم وراد اعدام وتنفذ بيه حكم اعدام ترى وبعدها ما اعرف شلون تخفف الحكم وصار مؤبد

ولحد الان ما طفت نار جاسر ولا برد انتقامه واني حيل اتحسس من اشوفه ضايج احس اهلي السبب بحزنه المفاجى واذا راح للنجف يظل يومين مغيم ويعتكف حتى ما يطلع ويختلط ويانه

كسره بداخله بس هو قوي مقوي نفسه ومواجهه الكل وممقصر لا عليه ولا على اطفاله رغم لحد الان نسمع كلام يغث

مثل هاااي مرته لاخوها كتل بيت مهيوب

ولا واحد ولا ثنين ابوهم واخوهم وبنت ابنهم طفلة ما شافت شي

اني من ام فلاح اطلكها لا محال

صرت اكره التجمعات والاعراس والفواتح واذا عندي واجب ولازم اروح اكثر من خمس دقايق ما اظل والله صرت اخاف حتى ما اسمع كلام يغث

ومرات من اروح ومحد يحجي ولا احد يباوعلي ويبسبس حيل افرح واحس روحي نشطه وإنسانه طبيعيه

زين شلون اني انسى الصار وشلون جاسر واهله ينسون اذا هي العالم لسه ما نست ولسه تحجي بالسالفه

ودائما اسمع لان حلوه مخليها يمه لو ما حلوه طلكها واخذ جهالها لان محد يقبل يخلي اهل قاتل ابنهم يمه

نسو ان اني انسانه عشت بظلم عند اهل جاسر وعمود اطفالي اني بعت روحي وتحملت ظلمهم كلهم وعصبيتهم وحركة كلبهم

اخذت دور القاتله وعشت ويه اهل المقتول

وهاي الجمله تفسر هوايه معاني وليصفن بيها يحس بيها لفاقد عزيز يحس اكثر وشلون يتمنى القاتل يمه ويحاسبه

اني طويت صفحة عاصم مو مال تفتحها امي مو وقتها هسه استقريت

ما عندي الجرئة اصلا افتح وياه هيج موضوع واني اعرف الدنيا حتتكسر ع راسي هو اسمه ما يحب يسمعه مو انوب اتوسط اله حتى يخفف عنه حكم او يتنازل عنه

من بعدها صارت ما تتصل ومن اتصل يطلع اخويه او متجاوب ومرات قليله تجاوب احسها من نبرة صوتها تعبانه واحسها مو ع بعضها

كلت يمكن زعلت كبريائي ما سمحلي افكر اكثر وكلت عاصم مو احسن مني عاصم قاتل ليش ما تفكر بيه ليش مصره ع عاصم يطلع مع العلم تعرف اذا طلع عاصم يخرب بيتي دامه بالسجن جاسر مرتاح ومشاكل ماكو

اصلا هو اعدام بس تخفف عليه الحكم صار موبد

صح اني انقهر عليه هو اخوي مهما كانت الظروف وصارت بس هم السواه مو حلو وجريمه بحق نفسه وبحق اهل جاسر وبحق الانسانيه

يمكن فلاح اله ذنب او ممكن عمو حجه حجايه وحاشاه بس بس غزل بنت جاسر ابد ما الها ذنب

اني هم ابتعدت وما ظليت اخابر هوايه ومن بعدها انقطعت الاخبار ومن سالت حازم ع الفيس كال غيرت رقمها ضاع موبايلها

كتله دزه الي ما دزه وما اعرف ليش كل مره اكوله دزه يكول اي ويغلس

قطعت سلسلة افكاري رساله ع التيلون من مجهول مضمونها ،،،ام عباس شغلها قوي ومضبوط انطيني رقمها!

اني كومه تجيني رسائل كلها غلط ورزايل وخاصه ع جاسر اخذتي وان شاءالله لا تتهنين

جاسر يكولي احذفي بس اني ما اقبل احذف التيل احس متونسه عليه

جاوبت ع الرساله كتبت .. اكو واحد ينطي سر المهنه هههه

مرات احسها شام تدزلي ومرات استبعدها لان هي مو تافهه بصراحه واني ظاله حايره والفضول قاتل لا اقبل احذف التيل ولا اقبل بهاي الرسائل

ومرات تجي رسايل يكتبولي دخونج وديحجي ويايه بس اني ما اشوفه يلزم موبايله ولا يراسل وجاسر هم بعيد عن سوالف النسوان ما يحب سوالفهن

مرات احس هاله تسوي هيج بدافع الغيره والحقد والله اعلم بعد

تغدينه وكملنه وجعفر وخاله صبريه راحو لبيت ابو جابر

البيت هادئ، غروب الشمس داخل من الشبابيج، ريحة چاي تعبي الصالة.
باب البيت ينفتح بهدوء

دخلت واني شايله الجاي خليته ع الطبله ولمست وجهه ...دافي وجهك. اسمع، سويتلك چاي بالهيل، مثل ما تحب

جاسر : ممم... هذا طعمه ما يتعوّض.

جولي(بمزح): لأن بيه نقطة حب، مو بس هيل.

جاسر  ): إذا على الحب... إنتِ الهيل مالت أيامي كلها.

ابتسمت ونزلت راسي خجلانه من غزله

جولييت ...يا شاعر! يلا،  بدّل ملابسك وخلينه نصعد للسطح، الهوا اليوم عليل.

جاسر .. تتذكرين قبل من صعدتي للسطح والديج نكر رجليج وذبحته واكلته اوووف والله ايام

ضربته ع صدره ... حاقده عليك قهرتني وقتها

لزم ايدي وباسها .. ما عاش الي يقهرك بيب

ابتسمت وهو راح يبدل ويصلي ودائما نصعد للسطح او نكعد بالبابكونه اذا الجو حلو جاسر تغير حيل احسه يهتم النه ويحبنه

واني دائما يشجعني ويقويني يريدني اعتمد ع نفسي اكثر واكثر

...................

وقار:  
طلعنا من بيت جاسر وخالتي صبرية رادت تروح ويانا قبلها كل شوية تسألني يمتى يجي جويبر اروح وياكم استاحشت اختي اريد اروح اشوفها من زمان ماشفتها

جانت نظراتها بعيدة عن جوليت وتذب حسىرات ماادري شبيها
استغربت... 

خابر جابر كال حضري نفسج جاي..

كتله انت تعال اخذ خالة صبرية وخليني عدهم بس الليلة

رد هاا احنه شگلنة شنو اتفقنا ليش تخالفين الوعد؟
جان اكو وعيد بنبرته
كتله ها مو والله هدار كسرت خاطري تتوسل ابقى.
كال وقار احنه اتفقنا عود غير مرة

جاوبته وعد

رد شتعرفيني من انطي كلمة

كدها حبيبي يالله اني جاهزة...

جانت هدار،تباوعلي من خلصت سالتني ها عمة تبقون
اخذتها بوستها خليتها على رجليه رجعت بوست خدودها
كتلها حياتي وعد ع الاسبوع الوراه اجيكم وابات هسه عمو جابر ميقبل

نزلت ظلت تتذمر تكول اووو دعوة دعوة..((شدعوة))
رد عليها اخوها الدعوة عند القاضي..

ضحكت سألته هاي منين سامعها ولك...
وهدار ظلت تتذمر شوفي عمة يعيب عليه 
ظليت اضحك على مراددهم شكد حلوين ولاينشبع من سوالفهم

غيرت لابني  ملابسه وبقينه ننتظر جابر..  هدورة مگابلتني وكاعدة وتلاعب بابني وتتوسل ابقى واني ادور وابوس بيها
فدوة شكد حلوة لعابة الي يشوفها يصفن بجمالها ما شاءالله...

لمن اجه جابر ودعناهم وهدورة تبعتنا للسيارة تباوعلي وتدز بوسات بالهوا وارجعها الها اني همين... 

بقيت اباوعلها بالجامة واكفة ويه اخوانها وتلوح بايدها النا الى ان ابتعدنا عن بيتهم...

وصلنا للبيت تلكونا عمي ومرة عمي وسلموا على خالة صبرية بعدنا كاعدين بالاستقبال وخالة صبرية
وجهت كلامها لعمو..
ابو جابر اريد بچلمة راس... 

رد عليها عمو امري حجية شنو تردين خادم...

هزت راسها بأسى وكالت والله مادري شگلك يا ابو جابر بس هاي ام جوليت مواتة كلياتها واكفة والغسل تعبها وعظامها متواكلة ماتعيش منا لشهر لشهرين...

رد عمو ماتستاهل هالمرة تعبت كلش وشافت الضيم وانحرمت من ضناها حسبي على الي جان السبب بضياعهم

جاوبت اي هذا انه الي جايتك علموده اريد تقنع جاسر تخلي جوليت تشوف امها لا تظل بگلبها حسرة عليها حازم لا حول ولا قوة مسكين ووعمامه وولدهم ضاغطين عليه مايخلونه يتواصل ويه اخته ولا يخلونه يوصللها عن حالة امها شي خايفين من جاسر مدري شبيهم الناس ما بگلبها رحمة جوليتة لازم تشوف امها گبل لا تودع محد يكدر يقنعه غيرك

ظل عمي يهز بسبحته وعيونه بالفراغ..

جاوبها والله ماادري شگلج انت تدرين بموقف جاسر من هالموضوع بس اكيد ما يقصر تجاه امها وهو يعرف شكد البنيه تحب امها ومتعلقه بيها

عمتي ام جابر كالت شلگيتي جاسر يقبل؟؟ والله ولا اظن يقبل هو گلبه لهسه حاقد وهم حقه ترى الي راح منه مو شوويه... انت شتحجي ابو جابر

ردت خالة صبرية بنبرة شبه عصبية؛ جاي اكللكم تريد تموت وحالتها منتهية والله انه مقهورة ع جوليت ينكسر گلبها تسوون فضل اذا تقنعون جاسر يسفرها لامها تشوفها باخر ايامهاا..

بقوا يحجون بيناتهم اني اخذت ابني ودخلت جوه يم جابر لان ضاج وظل يبجي يريد يكمل نومته.. 

بس بالي كله يم الكلام الي دار بينهم...  وحتى امي هم لازم تشوف خالتي قبل لا تموت او ع الاقل يتواصلن بمكالمة ويتبارن الذمة بيناتهن...

اريد اروح لامي واحاجيها لازم تشوف اختها

شكد الدنيا گصيرة وفعلا حياة الانسان مثل ورقة بشجرة ويجي يوم  يوصل اجلها  وتوكع وتحتضنها الكاع...

انقهرت على خالتي جابت عمرها تعب بتعب وخاصة الي سواه عاصم بينا دمرها وحرمها من جوليت وسنين هي ماتشم ريحتها ولا ريحة احفادها.   

لحظة طمع مقابل لحظة غضب  دمرت كلشي خطفت ارواح بريئة وبعدت اهل عن بعضهم وشردت ناس وتبعاتها ومخلفاتها لحد الان رغم مرور سنين بعدها جوليت تعاني وتعاني..

خطيه والله جولييت ع امل تشوف امها بس هيهات

.....................

دسوي بدرجات الطلاب وهو ويايه يساعدني لحلو بيه ابد ما يمل ويرفضلي طلب وكلش حاب شغلي بالمدرسه واني اتحمس واسولف اله عن الطلاب وشلون يحبوني

وسولفت اله من اجه المشرف واني ارتبكت وخفت بس سيطرت ورجعت اشرح بكل هدوء وحب وطريقة تدريسي حديثه اتبع طرق حديثه غير معقده وتحبب الطفل بالدراسه اني ادرس انكليزي اول وثاني ابتدائي وعدنا معلم انقل صرت اخذ الخامس همين

واني لازمه الاوراق ولابسه النظارات وقلم مخليته بالكعكه الي بشعري وخصل شعري نازله

حجيت بتركيز ... حبيبي دير بالك تغلط بالدرجه ما بيه اسوي تصويب للدرجه

باوعلي ورفع حاجب.. حبيبي مووو ؟ باع لواكه من ع مصلحتها حبيبي ومن ما عندها شي جاسر هيج بطرك روحي

من اكول بربوك تزعلين

ضحكت،.. هههه لا انت حبيبي من زمان حاجيتها

رد وهو يكتب بالدرجات.. انتي مصلحجيه

رفعت حاجب.. لتكول هيج ترى ما انطيك من راتبي اكطع عليك الراتب وخليك بالضيم حالك

ضحك .. راتبج خلي الج راتبي ضعف راتبج سبع مرات

جاوبت بثقه .. ميخالف مهم عندي فلوس ممحتاجه لاي واحد سند نفسي

سحبني من تشيرتي وجرني عليه ... مو سندج ولج

ضحكت واني امتص غضبه .. ابو مرتضى سندي لروح والريه

ضربني بطرف القلم ع ايدي .. عفيه صيري حبابه لا راتبج يصير حاله حال المكينه

تقربت منه بعناد ... متبطلني مستحيل اترك عملي

ضحك .. غير تستقر ام عملي وبعدين بابا منو كلج ابطلج بس يعني مثلا مثلا مو اكيد راتبج نتبرع بيه للجمعيات الخيريه

رفعت حاجب بسخريه ... ليش يمه فاتحه سبيل اتبرع براتبك

رد بملل... شكد تلغين ليش ما تخلينه واحد يحضن لخ وننام وباجر كملي درجات طلابج واله اكلج حطيلهم كلهم عشرات وفضيها

جاوبته بنزاهه .. لا اكو ميستحقون اني نزيهه صح اساعد بس مو مال عشرات

سحب ايدي .. كومي كومي خلي ننام

جاوبته برفض... لا لا رجاءا خليني اكمل يله

شالني من القنفه واني اتعلقت بركبته واضحك وعايفه الدرجات بنص الصاله

جان الكل نايم ماما رضيه والجهال خفت واحد منهم يكعد ويسويلي كارثه ويشكك الاوراق

حجيت بدلع... جاسر الأورآق عفيه

عض شفته ... انعل ابو الاوراق خلي التربيه تزعل علينه ما ورانه شي

دخلنه للغرفه وهو باسني بشفتي حيييل دائما اتذكر من استحي منه هسه لا مو هلكد استحي مو مثل قبل

جانت ليلة سعيده وحلوه ورمانسيه

طلع من الحمام واني جنت امشط بشعري دنك ع راسي وباسني بشعري

كتله.. نعيما

رد .. ينعم عليج حبيبي

بدل وكمل اجه نام يمي كال .. اريد اعلمج ع السياقه شنو رايج

ابتسمت بحماس...صدك ؟؟؟ والله اني كلش احب السياقه واتمنى اتعلمها

ابتسم بذبول كال.. شام جانت تعرف تسوق

باوعتله مصدمه من ذكرها بس حاولت ما ابين غيرتي ولا انفعل

كمل كلامه وهو يكول ... جانت سباعيه مره عطل لباتري طلعت باتري ثاني وشغلت السياره تفاجئت بيها

حسيت روحي هنا ان اني لا شيء حسيتها هي احسن مني بهوايه امور واكيد معتمده ع نفسها ومتقارن نفسها باحد

جاوبته بملل.. الله يحفظها لازم تكون هيج حياتهم صعبه السوريين لازم تعتمد ع نفسها

كال .. تدرين هي انخطبت

نهاية البارت

يتبع