رواية #جوليت وأسرها.... الفصل الرابع 4 - بقلم الكاتبه سمو العراق

البارت الثاني
رواية..جولييت واسرها..غاهب الإنتقام
بقلمي..نور سمو العراق

💔💔💔💔💔💔💔💔
البارت اهداء للفائزة بكروب الفيس..user47463642

مبروك حبيبتي...

.....

والبارحة دكولون كاسر لو جاسر ههه...هو اسمه جاسر بس. جولييت تسمي كاسر ولهل تسمية قصة ان شاء الله تعرفوها بالاحداث الجاية..
..............

كطفلٍ هرول إلى أمه باكياً لتحتضنه ، فتلقى صفعة ليكُف عن البكاء ، هكذا الخذلان

................................................

باوعتلها مصدوومة وخايفة تقربت منها واني اصك اسناني...انت شتحجين حرام طعن المحصنات انتي شدكولين مو عيب عليج والله اكول لجاسر يحجي ويه فلاح...عيب هيج تطعنين بعرضي

هي وكفت بصعوبة... يااا يااا يااا علئ كيفج يمعودة شحجيت قابل سبيت العنب اني السمعته وصلته الج ليش هيج فهمتي غلط

مسحت دمعتي بقهر...غلط شنوو انتي دتطعنيني بعرضي واني كوولشي ولا سمعتي واللة حرام عليج تقبلين هيج احجي عنج

تقربت مني وحطت اديها علئ اكتافي بحزن ...لا والله ما اقبل بس غير اني سمعت هيج واني فضولية حبيت اسمع منج

احس كلبي جمر ...شنووو الي سمعتي باللة ومنين سمعتي

جرت نفس وهي تكلب تطك بعلجها...امج اجت وضلت تحجي وية جاسر ودكلة استر بنتي وهو صار شكد ما متزوج من اجت امج وطلبت يزوجج ويستر عليج هو بسرعه دك صدرة وتزوجج..

بللت شفايفي بقهر احس ريكي جف من كلامها واتهامها هزيت راسي بعدم قبول..ما احجي وياج واللة اخلي هو يحجي وياج

درت وجهي دا اصب الجاي والدمعة بعيني تقربت مني باسف كالت...العفو حبيبتي صح جنت قاسية وياج بس مو قصدي صدكيني كتلج اني فضولية واحب اعرف كولشي وهسة انتي صرتي زوجتة بنية او لا مو مهم المهم هو راضي...

باوعتلها بحده وانطيتها صينية الجاي بلعت ريكها وجريت ...اخذي الهم اني بس اروح اضل ابجي وما اريد يشوفني بهل حالة..

انطيته الها ورحت بس جنت حييل مقهورة..

دخلت الغرفتي صبرت نفسي ما ابجي

بس هو ابببد ما فتح وياية موضوع ولا حجة ولا نطق بحرف..

ردت اخابر امي واشكي الها...اخذت موبايلي دا اتصل هو دخل...رجعت الموبايل علئ الجرباية ما اتصلت...

وكف هو علئ المراية يرتب بقميصة مبين يريد يطلع رغم هو هسة اجة بس عادي متعودة وحتئ ما إسأله استحي...

باوعلي بالمراية كال...ليش تركتي موبايلج اتصلي

ابتسمت ...اجيت اتصل بامي بس تذكرت هي تنام من وكت لذلك كنسلت المخابرة..

تقرب مني وباوعلي صفن بوجهي شوية كال...جنتي تبجين

هزيت راسي بنفي...لااا

تقرب مني اكثر وحط اصبعه علئ طرف عيني مسح دمعتي ضحك بهدوء كال...تبجين لا شعوريا منو وياج اكو واحد مضوجج هنا...

تنهدت..لاااا بس مشتاقة الامي

رد بجمود...اجيت اخذج الهم بس فلاح كال باجر تجي واحنه ان شاء الله بعد اسبوعين هيج دورة السنة مالة ام ابووي ونذبح ونعزم اهلج

همست..ان شاء الله

ضل يباوعلي ثواني بعدها تقرب مني وباسني بخدي حسيتها مو بوسة نتلة كهربائية

ابتعد شوية واني حطيت ايدي علئ خدي بذهول

هو ابتسم كال...امي رضية دكول عليج مايعة وما بيج خيير صدك هل حجي

ضحكت...لا والله بالعكس معدلة ونادرة وبسرعة دا اتعلم ولا تنسئ اني جنت طالبة وماما هي الي تشتغل وتنظف ان شاء الله منكم اتعلم

ضىربني بطرف أصابعه علئ الخفيف كال...ههه كلتلها علئ كيفكم ويانة البنية ممتعلمة وان شاء الله تتعلم محد طلع من بطن امة يعرف كوولشي

ضحكت بمرح...اي والله وان شاء الله ولا يهمك بس اتعلم ما اخلي اي وحده تشتغل غيري

ضحك..ها هاا خير شنو خادمة عندهم لان هو الشغل مساعدة ما بيها شئ اذا ساعدتيهم واذا هم ساعدوج بس ما اقبل كل شئ يوكع براسج

ابتسمت ومجاوبتة...

بعدها جريت نفس وبتوسل...جاسر تقبل اكمل دراسة

ضل يباوعلي ثواني كال..ما اعرف يجوز بالمستقبل بس حاليا لا

همست..بكيفك

كال...ياللة طالع محتاجة شئ

هزيت راسي بنفي

خلة وراح طلع وهاي حالتة يعني كلامة وياية قليل احس مرات ميحبني ومرات احسة يعطف علية...

يعني مرات اضووج حييل ما اكدر افرض نفسي علية اذا ميريدني يعني مثلا يطلكني...

بس ليش واللة رغم جفاءة وبرودة بس واللة حبيته وحبيت كل عائلتة وحتئ بنتة اموت عليها لان قطعة منه...

خايفه بيوم من الايام ترجع مرتة ويرجعها لان هي مصيرها مجهول...

رحت فتحت الكنتور طلعت الصورة الي اخذتها من الكلبس مالتة ما يعرف بيها عندي

رفعتها اباوع عليها جانت كووولش حلوة لابسة بنطرون اسوود ولابسة كوت طويل اسود ولابسة قبعة وياها لفاف مبين جان شتا وشايلة بنتها غزل جانت طفله احتمال عمرها سنتين وهو واكف بصفها حاضنهل هي وبنتها وماخذين صورة..

هماتين لابس اسود كله ولابس قمصلة جلد مبينة الصورة بغير دولة...

درتها لكيت مكتوب...
أحس بروحي خنگة نآس
والتابوت يتمشة بدرآبيني
وأحس.بگلبي.عصرة.شوگ
والعدلين كلهم مآتو.بعيني

وبعدها مكتوب...شام

رجعت الصورة المكانها همست...ياربي انت جاهي ما اتوكل غير عليك فدوة ريح كلبي...

مرات ليش احسة يفرغ قهرة بجعفر يصيح يغلط المهم ينفجر بواحد احس علية ضغط كوولش كبير

وية الكل جامد بس وية بنته غزل يصير عبالك طفل يحبها بجنووون يعشقها احسها بلسم لجروحه

اتصلت بماما اكثر من مرة مجاوبتني خليت ورحت نمت بس احس كلبي مقبوض...

فزيت الصبح واني احس بشئ ثكيل علئ صدري فتحت عيوني ببطئ شفته نايم بصفي ومخلي ايده علئ رگبتي أبتسمت ووخرت ايدة ..

وكفت رحت للحمام سبحت وهو لسة نايم خليت وطلعت بره...

اجت نوال وهي تلوي بشفايفها وتضرب بخدها خفت كلتلها...خير شكوو

كالت برعب...اجه عمي الشيخ من العمارة وفلاح كلة البارحة جعفر جاي سكران...

وعمي تخبل وكال صيحولي جعفر...

ضربت خدي بخووف...عزا العزاني خطية والله طلع العرگ من خشمة ..

طلعت رضيه وهي لازمة جعفر و دكلة...ياللة يمة رووح ولا تخاف ولك كم مرة كتلك ابوك قاسي ابوك قاسي وانت مثل الكديش لا فهم ولا علم من تروح فدوة للكديش...

جعفر يمسح بوجهه نعسان ومتوتر...

رحنه نباوع من الشباك اني ونوال جنه رية وسكينة ونصنط...

جعفر اول ما دخل باس ايد عمو وعمو سحبها بسرعة

اباوع للشيخ جان لابس دشداشة رصاصية وعباية سودة وبيها خط من الامام ذهبي لابس شماغ اسود وأبيض وفوكاة العكال..

عمي الشيخ جان جثل بضخامة وعنده كرش شوية مو هوواية بس فعلا هو مهيوب اسم علئ مسمئ مشي البيت علئ سراط المستقيم نسوان وزلم تخاف منه...

سحب ايده من جعفر ودفعة كله...ليش بوية تبوس ايدي شني ترضيني مثلا

جعفر رد بعد ما بلع ريكة...اي بووية رضاك عندي بالدنيا

اخذ من سبحته ثنين وهو يتمعن بيها بهدوء وبعدها رفع عيونه لجعفر...اهااا يعني ترضيني وما ترضي ربك مووو يعني ما تريد تصير ولد عاق بس عادي تصير كافر موو...

سكت جعفر مجاوب...

جر نفس...خووش بوية جعفر لا تجاوب بس اريد اكلك شغلة وحده ...اني مقصر وياك بشئ؟

رد جعفر بخوف...لا بوية حشاك من التقصير

الشيخ مهيوب...جااا بوية اذا حشاني من التقصير ليش ما تصير ادمي ليش دومك كاسر شيبتي كدام اليسوة والمايسوة

يعني حلوة بحقي يكولون ابن شيخ مهيوب عرکجي وساقط ؟ يعني حلوة بحقي اكعد بديوان وانة متفشل منك

ليش بوية مو ذول اخوتك مو هذا جاسر يعادل الف رجال وهذا فلاح حگة يطلعة من حلگ السبع ..وصلاح امشي ورافع راسي بي لانة ذيب

ليش يا ابوك ليش تكسرني وتلطخ شيبتي ليش ما تحترمني يعني لا النصيحة تجي وياك ولا الكتل يجي وياك

تقرب منه وجعفر رجع خايف باوعلة بقهر الشيخ...أنطيني فد حل واني امشي علية عايل وياااك بوووية؟

جعفر بلع ريكة ...لا يابة ما عايل والله هاي اخر مرة

الشيخ بذهول...اخررر مرة؟ ولك بوووية هاي عاشر مرة ...تدري يا بوية يا جعفر من تجي سكران شلون احس بكلبي ينعصر

ولك بوية حتئ حرام الفيک ابيتي ملفي واحد زنديق فاجر

بعدها لزمة من تشيرته بغضب وهو يقبض علئ السبحة بكل عنفوان ورفع اصبع السبابة بتهديد...واللة يا جعفر هاي اخر مرة تجي بيها سكران مرة ثانية اكتلك وادفنك بيدي وجفن ما يرفلي وافتخر بكتلك افتهمت...

جعفر بسرعه باس ايد ابوو وهو يتوسلة...والله اخر مرة

تقربت ماما رضية من الشيخ وهو تتوسلة..علئ كيفك مهيوب ان شاء الله بعد ما يعيدها

الشيخ بعصبية...والله شحلاتة ويعيدها حتئ الة ادفنه بالبالوعة امشي اطلع من وجهي لا بارك الله بيك ...

جعفر ضل واكف ثواني وبعدها طلع اني خليت ورحت لان بصراحة ما احب اتخاجل وياهم...

بس نوال ضلت واكفه من طلع جعفر باوعلها بقهر ...خيير شكووو واكفه هنا تلمين احداث مثلا

نوال بزعل...شبيك جعفر هاي فوك مجاي سكران

جعفر...هااا نسيت انتي الناطق الرسمي ولازم بكل مكان موجوده ...

نوال بخبث...ناطق الرسمي ولا اجي سكرانة

جعفر بقهر...صدك ما تستحيين وخري من وجهي وجهج جنه طاوة محتركة

عاد هي تخبلت وهو خلة وراح

بصراحة نوال كووولش حلوة تشبة باسكال مشعلاني وبعدها صغيرة بس هي تتدخل هواية بذلك ميحبها جعفر...

رحنه أني وياها واجت ماما رضيه ويانة نسوي ريوك سويت بيض وطماطة واني احس تزوهرت لعبت نفسي من ريحة البيض كووولش

اخذ الجاي والاستكاين وخليت وطلعت خليتهن بالهول وعدلت السفرة

وبعدها رحت جبت باقي المواعين

والبنات كعدن الصغار وغزولة بنصهن كاعدة هنه حيل يحبنها وهي تحبهن...

اجتمعو كلهم اجت وقار كعدت بصف خالتي واني كعدت بص ماما رضية وجعفر بصف صلاح ونوال يم رجلها...

جاسر صاح علئ غزل...بابا غزولة تعالي يمي اكعدي مشتاقلج

هي وكفت شايلة صمونتها بطفولة وكعدت بحضنه

الشيخ مهيوب ضحك كال...افااا ابني جاسر يكعد بنته بحضنه ويوكلها وانه لا؟ وسسفه

باوع الوقار كلها...بوية وقار تعاي بصفي تعال خلي ابوج يدللج

وكفت وقار بحزن وهي لافة ايدها بباندج وكعدت بصف ابوها ...

الشيخ رفع ايدها الي فاقدة بيها اصابعها وباسها انقهرت عليها حييل مسكينة متستاهل...

وضل يوكل بيها ويكول...عزيز وقار اعز منك كلكم ولا وحگ محمد...اعز من روحي...

هي ابتسمت وغلبت عليها عاطفتها ودمعت باست ابوها بخده ودخلت روحها بحضنه وهو ضحك وباسها براسها...

اني رفعت الصمونه بيها شوية بيض ولعبت نفسي حييل متتت استحيت منهم اكووم بس ما تحملت

ركضت بسرعه وهي كلها صاحت...هااا هااا شكو شبيها

ركضت للمغسلة واني تقيت كوومة ما حسيت غير بيد خشنه ودافية علئ ضهري وهو يكولي...شبييج هاا بعدج لعبانه نفسج

غسلت وباوعتلة بتعب...مدري شبية لعبانه نفسي من البيض يمكن خايس

هو ابتسم واخذ مي شوية وغسل وجهي وبعدها راح جاب كلنكس وانطانيا مسحت وجهي

اجت خالتي ورضية وهنه يسالني واني اجاوب منحرجة منهم

خالتي كلتلها...فدوة رضية اخذيها حللي الها بلكي حامل

رضية كالت..روحي بدلي واني رايحة احظر روحي واكول للشيخ وجاسر بلكي ياخذنه..

رحت بدلت وهو هماتين اجه بدل وباوعلي يتساءل كال...دكول امي رضية انتي يمكن حامل

نزلت راسي...اي يمكن والله نحلل ونشوف

حسيته ضاج كال...ياللة امشي

رحنه حللت كالت ام التحليل حامل فرحت حيييييل وماما رضية خطية فرحت حيل

هو باركلي واكتفئ ببتسامة ..

ياللة شلون مشكلة وياه هذا مال واحد يجيبه براشدي يصحي علئ زمانه ...

وصلنه للبيت وكلهم فرحوا ...

نوال كالت...مبينه بيج بنية

ضحكت ..كلتلي هسه هو شبين منه حتئ بنية بس المهم تمام الخلقة

ضحكت كالت...هسه تطلع علئ امج عندها حدبه هههههههههه

خزرتها بغضب.

حطت ايدها علئ حلكها وهي دكول..العفو العفو ههه

عفتها ورحت بس ضجت منها وخالتي عود هي اخت امي ما حجت وياها ورزلتها...

مرة الايام طبيعية وروتين عادي ماكو احداث مهمه...

وملل مو طبيعي ماكو بس اكل ونوم وشغل...

................ .

بعد مرور اسبوعين ...صادف خميس

اليوم عمو ذبح طلي دورة السنة مالت امة الله يرحمها ويسكنها الجنه...

واحنه محتارين همه جابو طباخ طبخ تمن وتبسي ولحم

بس احنه سووينه الزلايط والخصرة والطرشي وخلينة اللبن بسراحيات والفاكهة وكذا...

عمو جان عازم اخو الشيخ عكاب ..طبعا هذا شيخ عكاب عنده بس ولد واحد وبنية وحده يا سبحان الله مصار غير هل خلفة عنده

الولد ويه اخته فرق بالعمر ما اعرف كم سنة يمكن ثمانية تسعه هيج شئ

اسمهم جابر وريهام...

شويه واجوو الشيخ عكاب ومرته وجابر وريهام الزلم دخلو بالاستقبال والمرة وبنتها اجن سلمن علينة...

راحت ام جابر جوه و ريهام اجت ويانة

جانت بنية مؤدددبة بشكل وخجووولة وهااادئة

اول ما دخلو اذن الضهر كالت ...عفية بس اريد اتوضئ واصلي بلا زحمه

اخذتها للمغسلة جوه نزعت حجابها ولفت بي شعرها ورفعت كم ارادانها وتوضت ...

اباوع الوجهها ينور ما شاء الله بييضه حييل وخدودها حمرة رغم ما مخليه قطرة مكياج ...

بس وجهها نوراني ...

اخذتها الغرفة ماما رضية طلعت الها عباء الصلاة وسجادة

نزعت حجابها خلته علئ صفحه وفتحت شعرها دتلفه مرة ثانية ودخل صلاح وهو يصيح ..يمممه ويينج نريد سجادات

هي من شافته عاطت وصار وراي العوبة سحبت حجابي لبسته وخلتني كدام الولد بدون حجاب...

حطيت ايدي علئ راسي واخذت حجابها لبسته...

وهو ضل صافن وبعدها كال...العفو وطلع

اشو هاي ضلت تلطم علئ خدودها...اووويلي شاف شعري يممة هسه ادخل للنار ياربي شلووون لازم انطي كفارة واستشرع

ضحكت كلتلها...ترئ ممتقصدة عادي ما عليج حرام ..

ضلت تاكل بروحها ...اووويلي عزا العزاني هسه اكعد استغفر الف مرة استغفر الله ياربي يا حبيبي والله مو قصدي ...

عفتها تصلي وطلعت حلو بنية شابة أو يمكن مراهقة وحيل ملتزمة وجعفر بكد الكديش ويشرب خمر...

من طلعت شفت صلاح واكف يم الدرج. من شافني باوعلي بهدوء وراح بس حسيته متوتر...

اجت امي وابوية جابهم اخووية حيل فرحت بجيتهم وماما تسالني شلوني وياهم وشلون الوضع واني اجاوبها بصدق...

كالت ماما...جولييت يمة اشو حماج اخذ الفلوس من عاصم اخوج ولحد الان ما انطانة خبر

استغربت...فلوس شنو

جرت نفس...مو همه مخلينه نبيع بالمحل مالتهم ملابس من زمان

جاوبتها...ايي

بلعت ريكها بتعب...عاصم مو جامع جم فلس وفلاح كله هذا محل بصف محلك يردونه بعشر ملايين تشتري عاد عاصم كال..اي اشتري واكبره للمحل جمع فلوسة وباس سيارته وانطاه 15 مليون ولحد الان ما اشترة المحل عاد اجه اليوم يحجي ويه فلاح ...

سكتت ..هو صح من زمان الشيخ انطه هذا المحل الابوي جانو يبعون بي ملابس باله وبعدها استلمة عاصم وطورة ضل يبيع ملابس رجالية ...

صبينة العزيمة وبعدها التهينه بالمواعيين

خطية ريهام ضلت تغسل وياية

اجت نوال تمشي بصعووبة كالت...رهوومه رهوومه ابشرج

ريهام باوعت لنوال كلتلها...خير شكوو

ضخكت بفرح...عمي الشخ خطبج من ابوج يعني راح تصيرين جنه النه

هي عقد حواجبه بتساؤل ...المن خطبني

ابتسمت بمرح...الجعفر

وكع الصحن من ايد ريهام بصدمة ونوال تضحك ..يمة الخجل يممة فدوه لليستحون ...

رجعت كملت تغسل مواعين بس بقهر واني اشطف علئ ايدها واسفط ...

كملنه مواعين وبعدها صبينه جاي بس البنية تغيرت ملامحها فجاة وبس تصفن...

كالت...ياللة خلي نروح وكل شويه وحجت ويه امها تريد تروح ...

رغم هي علاقتها تجنن ويه وقار بس ما قبلت تكعد وصاحهم الشيخ

اني رحت اجيب مي من المطبخ

سمعت صوت ضحك بالمطبخ وشقه مال ولد طلع جعفر وهو يضحك...

اني دخلت شفت واحد فاتح باب الثلاجه ديشرب مي مشفت وجهه عبالي صلاح...

صبيت جاي هو باوعلي واني انصدمت باوعتله بخووف

وهو ضل يباوعلي مستغرب كال..انتي وقار

كتله بخجل...لا اني جولييت.

طلعت بسرعه وانضربت بجاسر باوعلي مستغرب كال...شبيج وجهج مخطوف

خفت حيل ...ماكو شئ

طلع الولد من المطبخ ضل جاسر يباوعلي ويباوعله كله...جابر شعندك هنا

ضحك...اجيت وية جعفر شربت مي

رجع باوعلي كلي...كبل الغرفتج ولا تطلعين لو مهيوب يصيحج تمام

هزيت راسي بأي وخليت ورحت حسيت بطني تكطعت لزمت بطني بوجع ..يمة طفلي بس لا صار بي شئ من الهبطة بس والله اني ممسوية شئ هو لكيته بالمطبخ

شويه واجت امي كالت...هااا جوليا يممة فدوة الكلبج ليش كاعده هنا

جاوبتها...جاسر كال لا تطلعين ولد هنا

لزمتني من وجهي وباستني ...محد ضل يمه كلها راحت ضلينه بس احنه

وكفت وبست امي براسها كالت بضحكة ...ام نوال دكول هاي الگرگمة جايبه جولييت شحلاتها خاف بايگتها ...معقولة ام حدبة جايبه كل هل جمال

ضحكت وبست ايدها...تولي يمة تروحلج فدوه

كال بحزن...لا يمة اني ما اضوج افتخر بيج حلوة وحبابه هسه راح تجيبيلي حفيد مثلج حلوو

حضنت امي وبجيت بقهر...مقهورة حييل حيييل وتعبانه ما جنت اعرف يمكن اتحسر علئ هاي الحياة بعد الي يصير..

ما نسمع اله صياح وغلط

طلعنه نركض ونشوف فلاح متزانگ هو وفلاح ..عاصم يغلط وفلاح يغلط وكابه للستار

عمو مجان موجود رايح ويه اخو الشيخ هو وجاسر

بس صلاح وجعفر بنصهم ويهدونهم

عاصم دفع صلاح لان جان لازمه وخله ديريد يطلع كله..انت تقشمرني فلاح وتاخذ فلوسي والله ترجعهن وغصب عنك

فلاح باستفزاز...اكل تبن شنو ماكلك اني حقي واخذته

عاصم..بس انت قشمرتني كتلي ابيع الك المحل الثاني ما كلت اخذ الفلوس ايجار للمحل القديم ومو من حقك تاخذ الفلوس ايجار لان عمي الشيخ انطانه المحل من جنه صغار

فلاح بخبث...لا تخليني احط النعال بحلكك وشوف هذن فلوس ايجار المحل واطردك منه مدام لسانك طووويل

طلع عاصم وهو يتهدد...خوووش يصير خيرر

اخذ امي وابوية وطلع...

انقهرت عليهم حيل بس محجيت بس فارت روحي خطية استغل اخووية...

شوية واجه عمو وجاسر...

ضل يسولفون عن الموضوع.... الشهاده لله عمو مقبل علية...

تقريبا مرة ساعة وما نسمع بس الرمي

طلعو الولد وعمو يركضون واحنه وياهم ...

سمعته عاصم وحازم وهمه يصيحون وينك فلاح لك عار اليوم نترس حلكك رصاص ...

عمو كلهم علي كيفكم يابه انتم شباب لا تخلون الشيطان يغركم كولو ياللة وتعالو ادخلو خلونه نتفاهم وما يصير خاطركم اله طيب...

فلاح صاح بعصبية ...والله مايدخلون وفلس واحد ما انطيهم ادووس علئ الفلس برجلي واخليهم من جوه رجلي ياخذونه

عاصم تخبل وجهه المسدس علية

عمو صاح...لا يابه سلاحك خطر كوول يالله

هو الشيطان زين عقله ضل يرمي عشوائي

خطية عمو يصيح علية...ولك بوووية لا تضربنة

ما اشوف اله عموو وكع علئ وجهه وكعه تخووف والدم غطا

وفلاح ضل يرفس مثل الدجاجة المذبووووحه ...

طلعت غزل تركض واستقرت الطلقه بين اضلع قلبها الصغير...

نهاية البارت...يتبع

كونوا انتم كونوا بخير...احبكم 💔

نور سمو العراق. 😘

من هنا ابتدات الاحداث الحقيقية والصدمات والتدهورات ولكل شخص قصة..لكن كل القصة تدور حوول جولييت واسرها...

لا تنسو التصويت والمشاركة

وشكرا لتفاعلكم الجميل بالبارت الاول 😘

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

اعتذر عن بشاعة البارت 😥