رواية #جوليت وأسرها.... الفصل الثالث 3 - بقلم الكاتبه سمو العراق

البارت الاول...
رواية...جوليت وأسرها...غياهب الإنتقام
بقلمي...نور سمو العراق...

ابتدئ اول حلقاتها وما تحمل بين اسطرها اتمنئ ان تنال اعجابكم 😍

مسائكم محمل بأجمل الورود...

💔💔💔💔💔💔💔💔💔💔

تدري يالبارد حنينك
تثگل اعذارك وهزهن

تدري گمت اكتب رسايل
ورجع امن الذله اشكهن

ومن زمان اجروحي تنزف
هسه مدري منين اكضهن

............................................

نايمه علئ السرير ومتضايقه حييل شوويه وابجي وحده وغربه تعصر روحي مع العلم اهلي بنفس المحافظه بس من تزوجت ولحد الان واني احس بغربه ووحده فضيعه...

انتبهت علئ نفسي تزوجت!!!!...اي زواج هذا ليش اني هم معتبره نفسي متزوجه

للاسف اني وياه ابببد ما نشكل جوو اسره معتدل رغم قلة كلامي وياه ورغم زواجي منه وقربي منه لكن للاسف علاقتنه ابرد من الجلييد

ابتسمت بامل مذبوح...خليني اني اجازف وابدي وياه خليني اني الي اتقرب منه واخلي يعترف بحبي لان هاي مو حاله ياخذ الي يريده ويروح...

وكفت بمرح اخذت موبايلي طلعت رقمه كاتبه عليه زوجي...عشتوو امداني هم عندي زوج مثل العالم فرحانه بي...

ابتسمت واني اشوف اسمه منور بشاشة تليفوني كاتبه عليه...الكاسر..زوجي

ترددت اكتب شئ وضليت فاتحه المسوده يمكن دقيقه كامله واني ما اعرف شنو اكتب وشنو اسطر من كلمات...

كتبت...كااااسر اني احببك انت ليش بارد ويايه

ردت اضغط ارسال لكن سرعان ما تراجعت وحذفتها ما اريد اذل روحي اله خلي هو يعترف بحبي مو اني

فزيت من مكاني برررعب علئ صوت الباب وهو ينطرق بقووه

ما لحكت البس نعالي فتحت الباب باوعتلي وهي تطك بعلجها وتكلب بعيونها بدلع كالت باستفزاز...ترئ صار شهرين من تزوجتي معقوله لحد الان تستحين

لو عجبج الوضع انتي كاعده واحنه نطبخ ونقدم كدامج

ابتسمت بهدوء...لا والله بس والله فعلا اني استحي يعني شوية العائله مالتهم ميخلون واحد بسرعه يندمج وياهم...

ردت بانزعاج وبعدها تطك بعلجها ومتخصره ... لا حبي انتي دمج جااامد ومتجاملين شبيهم عييني اشوو صار سنين عايشه وياهم ما حجيت عليهم مثلج هاي وانتي صارلج يومين....

باوعتلها بصدمه...يااا عزااا علئ كيفج يمعوده ترئ همه بيت خالتي قبل كووولشي بس اني ممتعوده عليهم وانتي تعرفين بحياتي مجايه الهم لذلك مستغربه شوويه .

جرت نفس مزعوج وتكلمت من وره خشمها...ديالله يالله روحي للمطبخ سويلنه عشا اليوم نريد ناكل من ايدج

بللت شفايفي بحيره وهزيت راسي بقبول ...

خليت ورحت بدلت لبست ثوب جويتي مخصر وطوويل ولبست شال لونه ذهبي وبي خرز...

رحت للمطبخ طلعت الموجود بالثلاجه ...

همست بكلبي بقهر...شكد مكروها هل نوال هاي مال نوال مال نعال هاااي

اووف استغفر الله ربي...عوود هي مرة الجبير الي تتحمل الحلوه والمره اشوو هاي بس تدور الزله عليه

اني منا هذا مطنكر عليه وهاي متخبله ومحد احس يحبني بهل البيت...حتئ خالتي مدري شبيها تسميني المايعه...

غمضت عيوني باسئ ومسحت دمعتي ...يااااربي اشتاقيت الامي ويين جانت ماما مدللتني دلال كله من وره أخويه حاربني محاربه بس الله يعرف بيها...

اتذكرته من قبل لا اتزوج....

جنت كاعده اقره بكتاب الفلسفه بالخامس الادبي ودخل اخويه..حاازم ...

باوعلي كال بقرف...كووومي طكيلي بيضه

اني خليت الكتاب ودا امشي هو عاط بيه...ومرررررض بسررررعه

باوعتله بانزعااج...مو دا امشي

ما اشوووف هذا اله هجم عليه راشديات وضربات واني ضليت اعيط واحاول اخلص نفسي منه

اجت ماما تركض وهي تريد تخلصني من بين اديه لكن للاسف ما كدرت لان طولها ميساعدها...

شالت الدولكه مالت المي وركعته بيها بظهره هو باوعلها بغضب...يممه ليش تضربينيي ...

سحبته بقسوه وهي تعيط بي ...ولك نذل ليش ويه اختك شبييك وياها يعني ما تجي دقيقه اذا ما تخلي مرارة الموت بحلگي..

شد علئ شفايفه بعصبية...خلي توولي حيووووانه ادبسز اكلها طكيلي بيضه تمشي علئ كيف...تتماوع الادبسز...

امي غمضت عيونها باسئ وقهر...ولك شلوون بيك شنو تمشي علئ كيف ولك زمال والله يجي ابووك واخلي يطيح حضك حيوان كادر علئ هل طفله شابعها كتل...

زمجر بغضب...والله حتئ مدرسه بعد ماكووو عوود عبالها ما ادري بسوالفها السافله

امي ضربت علئ خدها برعب وهي تباوعله متسائله هزيت راسي بخوف واني ابجي بعدم تصديق

تقربت منه وهي تضربه علئ بطنه بعصبية..سوالف شنوو ولك شتحجي انت اختك شبيها احجي لا اطمك بگاعک

باوعلي وهو يتوعد بيه...رافعه ردانها ومطلعه ساعتها وتمشي وتتمضحك ويه صديقاتها الكح...

امي باوعتلي بقهر وضربتني بالدولكه لسه لازمتها...امشي ولي من خلقتي الئ متئ اضل اعلم بيج وانتي مثل الكديش لا فهم ولا علم ..

زمخت بوجهيي...امشي ولي

اشوة هذا ما صدك ماما عاطت بيه لزم دفاتيري وكتبي كلها شگگها واني لازمته وابجي واتوسل بي يعوف كتبي وهو كل شويه ورفسني ودفعني

رحت امشي للغرفه الثانيه واني ابجي وامي دخلت عليه كالت بغضب كاسح...شلووون بيج ولج يعني ناويه تموتيني ترئ جزعت منج اني مقصره وياج بشئ مو احرمص علئ روحي واشتريلج الشئ مو وين ما اروح ما خذتج وياي مو من واحد يحجي وياج اصيرلج سيف ودرگه ليش هيج تسووين

مسحت دموعي باسئ...اليسمعها يكووول هي تفتر بالمول واني افتر وراها هي طلعتج الفخمه كلها لسوك المخضر...وبعديين اني شمسويه والله حازم جذاب

عاطت بوجهي ...مو يكول تتمضحكين وتتماوعين بالشارع ...

رديت بشهكات...يعني صديقاتي يضحكن اني اسسد حلكي ليش.. وبعدين صار موقف وضحكنه

امي عضت أصابعها بقهر...الحجي وياج ضايع ومدام ما تاخذين كلامي طبج مرض

كملت بحرقة قلب...واني افتخر بيج اكول بنيتي حليوه ودارسه والكل يحسدني عليها تالها تردين تنزلين راسي والعالم تحجي بعرضج

اردفت بعصبية وهي ترفع اصبعها بتهديد...بالقران يا جوليت وروح امي الزمج اكطعج تكطع لا عبالج كصيره ومو بطولج وحدبتي بظهري لااااا...ترئ بعدج مشايفه شئ ...

خلت وراحت تمشي بصعووبه واني اباوعلها وابجي

طبعا ماما قصييييره حيييل بحيث طولها مثل طول طفل بالابتدائيه وعندها حدبه بضهرها من الولاده...

واتزوجت ابوويه هو هماتين رجال معوق عنده شلل من الولاده يعني هو عادي يمشي بس مبين عليه معوق خطيه...

جانوا يعتبرونهم حاله خاصه بالمجتمع بسبب العاهات الولاديه بس همه خطيه اتزوجو...

وامي جابت اخوويه حازم و اخويه عاصم جانوا ايه من الجمال يعني الكل متعجب عليهم ومتفاجئ ويكولون هاي ام حدبه القزمه هيج تخلف والله ما نصدك احتمال خامطتهم من المستشفئ...

ونسو ان هم خلق الخالق ...

وبعدها جابتني ماما لان قصيره وعندها حدبه جانت حالتها خاصه يداروها بالمستسفئ فاشرفت علئ ولادتها بيه دكتوره مسيحية...

من انولدت ماما دكول الدكتوره تخبلت عليج وتصيح ...باعوو هاي المره شجابت من تفاحه تجنن وهي سمتني علئ اسم حفيدتها جوليت...

المهم كبرنه وامي ربتنه بمي عيووونه وابويه رغم معاق بس مستحيل اتذكر بيوم قصر ويانه ...بالعكس رغم اعاقته بس هو مدللنه كوولش هووايه...

بس للاسف اخواني جانو همه الي كلمتهم ماشيه بالبيت رغم ما مئذين اهلي ورغم يشتغلون بس حييل مضيقين عليه ...

رجعت الواقعي واني محتاره شنو اسووي عشا والله جنت رغم ماما معاقه وصحتها على كد حالها بس متقبل اشتغل هي نهار كله تشتغل...

تافئفت بقهر كلت...خلي اروح الزوجة ابوهم ماما رضيه هاي إنسانه حيل طيبه وحبابه وتحب الكل بلكي تعلمني شنو اسوي...

دا اطلع من المطبخ لمحته وهو يلاعب ببنته البالغه من العمر سبع سنوات..

ابتسمت بحب الهم همست بمرح...ربي يحفظها الك يااارب...

شالها بين اديه وهو يبوسها بخدها الناعم...شلونها بنت ابوها شلونها غزالة الحلوة...

باسته بخده وهي تتعلق برگبته...زيينه

ضمها الصدره بحنان وهي حضنته بهدوء واني جنت صااافنه وهاايمه بهل منظر الحلو...

باوعلي بطرف عينه ودار وجهه وبعدها رجع باوعلي

ابتسمت بوجهه وهو بادلني ببتسامه هادئه وكأنها ابتسامة مجاملة...

تقدم خطوات مني كال...شدسوووين ؟

بلعت ريكي بخجل...دا اسوووي عشا

عقد حواجبه بتسائل ...ليش محد ديساعدج

جاوبته بنفس الخجل واني افرك باصابعي ...اءء تعرف وقار متكدر من ايدها و نوال ملتهيه ببناتها

باوع لبنته وابتسم....ان شاء الله غزوله بس تكبر تساعدج مو هيج بابا

ضحكت وباسته بخده...لااا لان من اكبر انشغل بدراستي و وما اكدر اساعدها

باسها وضحك..ما خليتلي حل عود اجيبلجن بنكلاديشيه تساعدجن...

جانو يحجون واني مبتسمه ..

كالت...بابا باجر عندي امتحان بجدول الضرب و عمتو وقار متقبل تقريني...تقريني انت

حجيت بصعوبه وحاولت اكون لطيفه...بس اخلص عشا اني اقريج جان كلتلي قبل شويه مجان عندي شئ...

جرت نفس...ما اعرف والله ما كنت اعرف تعرفين بالجدول...

ضحكت...لا شنو السالفه اني بالاعداديه وبطلت ...

هو جاوب بهدوء...لا اني حقريها وانتي كملي عشا وصيحيلي...

هزيت رأسي بقبول...

تلاشت صورته من كدامي بعد ما راح هو وبنته...

طلعت اني المقسوم دا اسوي عشا...همه بيهم طبيعه من ياكلون الهم وقت محدد يعني كذا ساعه العشا وكذا ساعه الغدا...

ولازم الكل يجتمع وابوهم اذا كام من السفره الكل يكووم واني هل عاده كوولش مضوجتني يعني احترام زايد ومرات لسه ما شبعت وكلها راحت غسلت اديها...

احس نفسي وجهة مال مخده ومشرور الوحده بالسطح...

فاظطر اكوم وياهم...

خليت الطاوه والزيت دا اگلي...

ما اسمع اله حركة قوووويه و واحد يدور بدروج الكاونتر...

درت وجهي شفته جعفر يتمايل ودايخ ويفتح بالجرارات تفاجئت وبيدة بطل كزاز اخضر كلت ...شبي هذا

باوعلي بنظره حاااااده بعد ما رفع السجين بلعت ريكي بخووف شكله مو طبيعي ولا نظامي...

وجهه اصفر وشاااحب تقرب مني وهو يترنح بمشيته ويتطوطح عااط بعصبية....لك كووو...لك حيوووان انت اصلا كلك قندره ما البسك برجلي...وحلفت بعد سوالفك ويايه اله البسك فستان وعبايه بدل البنطرون والعگال ...

رجعت بخووف ورهبه منه وهو تقرب مني اكثر وهجم عليه بالسجيين ...

صررخت بصوووت عالي صحت.. ماااامااا...

ركضت واني احمي نفسي منه وهو رجع بخطوات غير متزنه وبعده لازم السجين هو سكران ما يدري بروحة بس اني اخاف حييل خاصة من يشرب...

شمر البطل الكزاز علية بس ما اجة بية انضرب بالجام مالت الطباخ وتفلشت الجامة والبطل

رجعت صرخت مرة ثانية

سحبت نفسي بخوف وتنفس مضطرب دا اطلع اجت تركض رضية وخالتي ونوال وقار كلهم اجوو...

شافوو لزمته خالتي وماما رضيه وهي تضربه...عزا بعينك يا ابو العرگ ولك وين اضمك واخوتك موجودين...

دفعته امه علئ ماما رضية وهي دكلها...ضمي بغرفتج خية رضيه لا جاسر وصلاح يموتو ربج فلاح مو هنا...والحجي مو هنا

سحبته ماما رضية واخذته واني ابجي وارجف ...

خالتي باوعتلي كالت...هاااا سوالج شئ ؟

هزيت راسي بنفي واني امسح دموعي همست بصعوبة...لا لا ما سوالي شئ ربج ستر

جاسر صاح...شكووو ليش هاي الخبصة ومنووو عاطت..

طلعنه كلنه من المطبخ واني لسة ابجي وهو باوعلي وعقد حواجبه باستغراب وتساؤل...

طلعت ماما رضية من غرفتها باوعتلة كلتلها بضحكه وهي مبين عليها التوتر...هااا يممه عتوي كمز علئ جوليت وتخبلت ما تعرفها مريتك مايعة ودلوعة...

جر نفس...اي عتووي سكران وطاگلة بطل عرگ موو

ردت بفشلة...ههه لا يممه شسالفة جعفر لحد الان ما اجه طالع ... وهو بطل بعد ما يشرب ويسكر تاب من يوم الكسرة ابووك بالبوري الحديد...

هز راسة باسئ...جعيفر ما تصير اله جارة لو إبليس يجي بجكسارة..تعلميني بي ...

هو طلع من الغرفة ويضحك باستهزاء ويتمايل بخطواتة...هه هذا مم منوو ما متصيرله جااا جاره هااا

جاسر هز راسة باسئ وهو يقبض علئ ايدة....هم سكران والله العظيم اليوم اذا ما خليت صوتك يوصل السابع جار ما اطلع جاسر

هجم عليه بعنف وهو يلزمة من ياخته اول ما هجم علية ضربه ببوكس علئ وجهه كومة بالكااع ...

وطاحلة ضربات وبوكسيات امه ركضت لزمته وماما رضية.بس هو انهال علية بكل قسوة

وذاك ضعيف وسكران فلش وجهه تفلش...

نزل حماية الثاني صلاح يركض من فوك ركضت عليه امه وهو تتوسل بي...يمه فدووة الحك الجاسر راح يموت جعفر من الكتل يممه موووته ولد سكران ما يدري بروحه...

اجه صلاح انوب اشو هذا لزم جعفر وطاحلة رفسات ...

خالتي سحبت كاسر بغضب...كااافي ولكم شنو مجرم و وگع بيدكم حرام عليكم

هو عاط بوجهها بغضب مكتسح ملامحة...حرام علينة  مووو ؟؟ احنه ولد شيخ مهيوب العلي هذا جعيفر تالي عمر يخلي سمعتنه بالطين...

وهم ميخالف قندرة علئ سمعتنه السكران مثل الزاني ...يومية جاي سكران ويتطوطح بنص الشارع والعالم تباوع علية...

هم غاضب ربه وهم غاضبنة...والله والله علئ يوم احط طلقة براسة واكتلة... وارتكب بي جريمة

وبعدها كمل بعصبية وتهديد...لا والله ليش اكتله لهل عار اكسرة واخلي عبرة لمن يعتبر ...

ولك حيوان شكد سافرت وطلعت وفريت دوول ما يوم من الايام شربت وهو كلة ضال كدامنه

وانت تطلع ساعة تجينه. سكران ادبسز والله والله باجر حسابك عسير الان هسة شحجي ما ياثر بيك عقلك صاير مثل التنكة

هو جان كاعد ومنزل راسه والدم ينزف منه وخطيه ماما رضية تمسح بخشمة وشفته ...

رجع جاسر باوع الصلاح كله بجمود...اخذه غسلة

نطق اخر كلمتين وراح للغرفة...

واني مدري شبية صارت عندي رجفه مو طبيعة حيل اخاف من يجي جعفر سكران ويكتله جاسر لو صلاح لو فلاح ...

ويكولون حتئ عمو من يلزمة يموته كتل اذا شافه سكران...

مرة سولفت نوال دكول الشيخ مهيوب مرة شافه سكران خلاه صحه يالله كتلة حتئ يحس بالوجع...

دكول كسره تكسر ببوري مالت المرجوحة خله دمة بطولة بس هو ابد ما يتوب...

ودكول مرة خلاه بين القنفات وحصر راسة بيدات القنفة الضخمة وكال جيبو سجين اذبحه هل عار

ودكول جان الموقف يهز الابدان بحيث كلنه ضلينه نبجي ونتوسل بالشيخ مهيوب وهو ما اهتم الكلامنه

وجعفر رغم خوفه بس ما يحط عينه بعين ابوة وجان كاعد مثل الاسير عند العدو

واخوانه جانو واكفين محد منهم تحرك لان يردون ينصلح حالة وهو ابد ما ينصلح رغم الكتل والمذلة

وما عافه ابوهم الشيخ مهيوب اله لمن اجت بنته وقار اختهم وحضنت ابوها بحنان وتبجي وتطلب من ابوها يعوف اخوها...

فاجئنه من حضن وقار وباسها وضمها الصدره وكلها...الخاطر هل العيون يا بوية راح اعووفه

ورجع لزم جعفر طلعه من بين القنفات ولزمة بوعيد وجهه محتقن من الغضب وكلة...والله هاي اخر مرة مرة ثانية لا امك تشفع الك ولا وقار...

عمو حييل يحب وقار ويميزها عن الكل وهي فعلة مثل النسمة الباردة وهادئة حييل

ودائما ينقهر عليها لان خطية هي عندها عاهه  بيدها اصابعها مكطمة ودوم لافتها بلفاف طبي .. فقدت أصابعها بحادث...

اخذه صلاح وهو يون راح غسله واخذة الغرفته وبعدها اني رحت اكمل العشا...

حسيت نفسي لعبت من الاكل كوة صبرت نفسي ما اتقيئ...

ركضت للسنك حاولت اتقيء بس مكدرت حطيت ادية علئ وجهي وبجيت ..اريد امي ارييد امي تعبت..

كلة بسبب هالة الحيوووانة هي الي خلت اهلي ينهارون علية وامي تزوجني لابن اختها بس لان خايفة علية من اخواني..

خلصت العشا وحضرته بالاستقبال بعد ما فرشت السفرة...

طلعت شفت حماية الكبير فلاح زوج نوال دخل باوعلي وضحك بيدة علاگة مبين بيها فلووس لان عبالك نفس البلوكات

كتلة...الله يساعدك خوية

ضحك كال...هلا بيج جنت عند اهلج ويسلمون عليج

باوعتلة باسئ وفرحة...صدك جنت عند اهلي ..امي شلونها ابوية واخواني شلونهم هم سالو عني لو لا

ابتسم بهدوء...اي سالو وان شاء الله امج تجيج بهل يومين وابوج دزلج سلام خاص...

حضنت نفسي بقهر وحزن ...يعمري مشتاقتلهم والله امي حبيبتي سودة علية ميتة علئ شوفتها...

ابتسمت...يالله صيح زوجتك وبناتك وتعالو تعشو

ضحك وخلة وراح...هذا حماية الكبير متزوج نوال وعندة 3 بنات منها وهي حاليا حامل عليها سبع اشهر بس ما دكول شنو بيها ولد او بنية كل ما تاخذ سونار دكول ممبين...

بس استغربت شعجب ديروح الاهلي هم اببد مجانوا يجونه شعنده وية اهلي وكل شويه وراح الهم

واني هماتين رحت لغرفتي رغم هو زوجي بس اني حيل اتردد منه وانهبط من اشوفه رغم والله هو ابد ما ماذيني ويحترمني حيل...

بس تصرفاتة واسلوبة الهادئ يخليني هواية اتردد واخاف منه

وهماتين هوواية اخاف منه من يهدد جعفر ويكتلة حييل اخاف يعني معقولة يكتل اخوو ويحلف يضربة طلقة ويموتة...

دخلت بتردد وابتسمت بهدوء شفته ممتد علئ الجرباية ويقري ببنتة

تحمحمت بخجل هو بسرعة باوعلي بس محجة شئ

جريت نفس خجول.. ياللة كمل العشا تجي تتعشا

هو عدل كعدته وجمع كتب بنتة كلها...ياللة حبيبتي خلينة نروح نتعشا وبعدها نكمل

هزت راسها بقبول ونزلت من الجرباية لزمته من ايدة وطلعو كدامي...

ياللة شكد متعلق بهل طفلة وهي متعلقة بي يمكن يحب امها هووواية لذلك هو متعلق ببنتها...

رحنه كلها اجتمعت تاكل بس جعفر ما اجة...

فلاح كال...شنو جعفر اشوو ماكوو خابرو يجي يتعشا..

جاسر جاوبه بهدوء وهو ياكل بدون ما يرفع عينة...عووفي خلي يولي لا تخابرة

فز فلاح من يمة بغضب...ليش اجة سكران؟

محجو الولد...

جان فلاح دفع الصحن ووكف متعصب خطية ماما رضية وخالتي لزمنة وهنه يتوسلن بي...فدووة يمة والله جاسر لزمة موته كتل لهسه يوون من الوجع

فلاح بعصبية...يطبة مرررض حيوان كم مرة نبهنا لا تشرب لا تشرب والله والله اذا ما كتلتة ودفنته بيدي هل عار فلا ارتاح...

جاسر باوعلة بهدوء..كوول ياللة يمعود اليوم جان من نصيبي باجر يصحئ ونتصرف وياة وهسة تعال اكل لا تزعج نفسك كتلك باجر النة تصرف ثاني وياة...

كعد فلاح بس خطية ما اكل لان جان حيل ضايج ويتوعد بجعفر

خلصو عشا واني ومرة فلاح عزلنه السفرة ...

رحت للمطبخ دا اغسل بالمواعين ونوال دتسوي جاي ولازمة ضهرها لان حامل...

دارت وجهه عليها كالت بخث ممزوج بحنان مصطنع ...حبيبتي جولي اريد اسالج سؤال بس اتمنى ما تزعلين مني...

باوعتلة باستغراب...اي إسألي شنوو

بللت شفايفها وجرت نفس...انتي ليش تزوجتي جاسر وانتي تعرفين بي متزوج وعنده بنية ومرته ما معروف مصيرها شنوو وانتي بعدج صغيرة يعني مو بايرة...

جريت نفس ورجعت اجلف بالمواعين ...اولا عيب كلمة بايرة ثانيا هو رجال ما علية قصور حتئ لو جان متزوج قبل مطار نصة والحمد لله على كل حال ..وهماتين ماما كالت انتي وحيدة وهو ابن خالتج وخالتج تدير بالها عليج احسن من الغريب. 

نزعت حجابها وكعدت بتعب علئ الكرسي نزعت حجابها وهفت بي علئ وجهها كالت...بس الي انحجه عنج غيير هذا

بلعت ريكي بخووف...شنو الي انحجة عني ؟

تنهدت بخبث ...بس فدوة ما تسويلي مشاكل خلي سر بينة

تعصبت واقتربت منها بخوف...اي احجي شنو ؟

ردت بضحكة...شبيج انخطف لونج وتعصبتي دتحسسني الكلام الئ انحجة عنج صحيح...

عطت بوجهها...هو شنو الي انحجة لا تخبليني

وكفت وتقربت مني وهي ترسم ابتسامة خبيثة علئ شفايفها همست بهدوء...يكولون انتي مو بنية والكاسر ستر عليج لهل سبب هو لحد الان ما يحبج

فتحت عيوني مصدوومة ومرعوووبة...

نهاية البارت...يتبع

كونوا انتم كونوا بخير...احبكم 💔

نور سمو العراق...😘

لا تستعجلون بالحكم علئ الشخصيات هذا بارت اول هو مجرد بارت تعريفي بالابطال وان شاء الله الاحداث قادمة بالتسلسل...

لا تنسو التصويت والمشاركة بكم نكتمل...

التصميم للمبدعة وئام الشيخلي 😍
snwn2231