رواية #جوليت وأسرها.... الفصل الرابع والثلاثون 34 - بقلم الكاتبه سمو العراق

البارت الرابع والعشرون
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔💔💔

كاسري ..مقيدي
بأاصفاد المكر والخبث
اصفادك تحرقني تؤلمني
فها أنا لان أصبحت كالرماد
ماذا تريد مني؟
اتريدني ان ارجع كالسابق
لا والف لا لن أعود فأنا الان كالرماد المنثور في ذرات الهواء..اجمعني اعدني انسانة كما كنت
لكن هذا غير ممكن فأنا احترقت بنيران
طيشك فهل للرماد ان يعود انساناً

بقلم المتابعه...Doaa989

.....................

تجددت الجروح وزداد الالم غلطه كلفتني هووواي واول قربان لهل غلطه قدمته هو اطفالي نظر عيني..

ركضت بهستريه ورعب وغضب وجنون وراها  ..

هو من ضربني فلش الموبايل قبل بساع وفلش التحفيات

قطع الكزاز جرحت رجليه بس ما اهتميت خالتي ام فلاح ورضيه قيدن مقاومتي واني اصرخ اريد افلت من قبضتهن...

ركضت رضيه جابتلي ثوووب واني مثل اللبوه المجروحه الي اخذوا منها اطفالها جنت اصرخ بصوت عالي احس الاوتار الصوتيه تقطعت...مجتبئ مرتضئئئئئئ لاااااا خلي يجيبهم والله اقتل روحي والله والله ...

دفعتهن واني اركض فتحت الباب دا اشوف وين راح ماكووو ما لكيته...

شفت نوال تباوعلي ببتسامه شامته عفتها وركضت علئ غرفته فتحتها ماكو ...

كعدت علئ الارض واني ابجي ...لاااااا لااااا يمه جهالي اخذهم مني وين اخذكم يمه

الدم ينزف من حنكي بغزاره وانفي ينزف ...

دخل صلاح وجعفر ...

صلاح تكلم بعصبية ..شبييج خووويه علئ،كيفج ان شاء الله ماكوو شئ هسه يرجعهم احجي شنو الي صار بينكم...

باوعتله بعيون دامعه...صلاح فدوه اريد أطفالي منك والله مو من حقه يحرمني من اهلي

صلاح باستغراب...شنو قصدج ...

بلعت ريكي واني امسح الدم من وجهي...ضربني لان لكاني اتصل بعاصم

وكف صلاح وجر نفس كال...الله يهديج انتي ليش تعاندينه ليش تكسرين كلمته انتي مو اتفقتي وياه تتبرين منهم ليش هيج سويتي

ما حسيت علئ نفسي وكعت علئ الجهه الثانيه مغمي عليه وحسيت بي يضرب علئ خدي بس صورته تلاشت من كدامي...

........................

حازم ...

باوعلي عاصم بقلق كال ...معقوووله يكون جاسر عرف بجولييت علئ اتصال ويانه ...

فتحت عيوني مصدوم من كلامه ...

بس هو تركني ومشه لخطوات متارجحه للسياره المركونه بباب البيت المهجور

ركبها بسرعه واني ركبت وياه فرك وجهه بتوتر ...جولييت راحت بيها ومو بس هيج راح احنه نروح وياها ونتبهذل...

ضربت الاستيرن بقوه وغضب...لك انت شنووو جولييت اتبهذلت من ورانه من يوم يومها ورطناها ويه زوجها وشوف هسه شسوه بيها...

ولك احنه زلم ونخاف منه ومهزومين شلون مخليين جولييت الوحدها وياه لك هذا شيطان ما يرحمها...

انت تذكر شلون جانت تخاف منه تذكر بعرسها شلون دمعها تنزل مثل الكزاز حتئ ما عندها فرحة عرووس كله بسببنه ...

باوعلي بغضب وغبن وصرخ بوجهي ...شسووووي شسوووي تريدني اقدم نفسي بطبق من ذهب الجاسر الكلب تريده يقتلني حتئ ترتاح انت واهلك وتنقذ جولييت ...

حازم بجمود...سلم نفسك وفضها فضها خلينه نخلص ترئ تعبنه والله إمي وابوي تعبوا حس بينه يا اخي حس ..

سحب سلاحه بغضب وخلاه بين عيوني ارتعبت من حركته ما يتوب من السلاح ولا اخذ الحادثه بعين الاعتبار...

همس من بين اسنانه ...اسلم نفسي؟ لك اني محكوم اعدام اذا سلمت نفسي لجاسر لو للحكومه شنو راح استفاد لموت مصيري اني لازم انهزم...

بعدت سلاحه من وجهي وجريت نفس ...وجولييت ترئ، والله هاي حوبتها هيج بهذلتنه وحتئ واحنه مبهذلين ما تشمتت بينه هي اكثر وحده ماكله همنه وتعذبت من ورانه لكل ارحمها خطيه...

مسح علئ،لحيته الكثيفه بقهر...ان شاء الله راح اتصرف بس خلي اضبط اموري...

اتصل موبايله باوعله للموبايل مالته مكتوب جولييت

تفاجئنه رجعت اتصلت هو فتح خط واجاه الصوت اليرعد بغضب ...لك عاصم كووووا...والله اذا ما ندمتك وخليتك مثل الفار محتار وين تختل ما اطلع جاسر...

لك بسببك يا عار جرمت باختك لك والله لحد الان شعرها باصابعي ...

طلعتها منكم وما خليتها ساس بمشكلتكم ليش تدخلونه انتم لك والله لزم شاربك واتفل بي ياااا نذل بسيطه بسيييطه...

عاصم ما نطق ولا كلمه بس جان يستمع بصمت انقفل الخط ...

حسيت روحي طلعت من كال شعر جولييت باصابعي الدمعه لمعت بطرف عيني اذيناها هووواي عذبناها ودمرناها...

صرخت بوجهه بنهيار...شفت من وراك شفتتت جولييت انذبحت جولييت تعذبت ونهارت بسببك جرم بيها زوجها من وراك منين تلكاها منك لو منه ليش عاصم ليش ترئ هاي اختنه مو عدوتنه

هز راسه بجمود و وعيد...بسيطه راح احررها منه قريب ان شاء الله...

هزيت ايدي بقهر ما يجي وياه اي شئ واني خايف اكثر منه لان عمي يكول انت هم مطلوب هسه كون يسلم نفسه اني اسلم نفسي ما اريد اروح بذنب غيري......

......................  .

جولييت...

كووولش صعبه من تتصنعين الصبر وانتي تحسين عظامج حتنفحر من شدة الوجع...

ما اعرف وين اخذ اطفالي ومحد ينطيني آي كلمه لكل ساكت محد يريحني ولو بكلمة وحده...

نومتني ماما رضيه وهي تصبر عليه...كافي يمه جوولي ان شاء الله بس يهدئ يرجعهم الج لا تخافين

جابتلي المضمده للبيت ضربتني ابر مهدئ ومسكن شافت الجرح تحت حنكي كالت...هذا لازم يتخيط الجرح اذا يضل هيج يصير منضره محلوو...

غفيت علئ اثر كلامها تعبانه موجوعه يائسه من الحياة ..

جنت افز بين لحظه وثانية افز مرعووبه نفذ صبري من الوجع واحساس بداخلي حينفجر اسكن ثواني وارجع انوح علئ حالي...

وحتئ واني تحت تأثير النوم بس خيال اولادي مراح من بالي والهج بصعوبه باسمائهم...مرتضئ مجتبئ

الدم لسه ينزف من حنجي راح جعفر خطيه وجاب المضمده خيطت حنجي بس متت من الوجع ضليت اصرررخ وانووح

ليلة كامله وهو ماكو ولا اطفالي اتوسل بيهم محد يحجي وعيوني احس بيهن مثل التراب من الوجع...

رجعت خطيه ضربتني ابره فاليوم...نمت خدرانه من تأثير العلاج...

احلام تخووف وعالم مر ابتسامته مثل الشبح وهو شايل اطفالي افز من اشوفه بحلمي ...

ساعه اشوفه يخنكني ساعه يذبحني ساعه يحضني حيييل اذوووب بيده تناقض بالاحلام ورعب مو طبيعي...

كعدت تقريبا الساعه بسته الصبح احس بدووخه وغثيان فتحت عيوني شفت ماما رضيه نايمه وهي كاعده نايمه كعده يعني...

عدلت نفسي وهي فزت كالت...هااا يمه جولي بسم الله لا تتحركين شتردين اني اجيبلج...

شهكت بنحيب...اريد اطفالي

سكتت مجاوبت ضليت ابجي وانوح مسحت دموعي كالت...حبيبتي خلي يهدئ شويه ويرجعهم لا تضنين يحرمج من ضناج هو مقهور منج وحقه بس يرتاح شويه يرجعهم الج

مسحت دموعي بالم...خاف انطاهم...

رضيه...المن ينطيهم ...لو يريد ينطيهم من زمان اخذهم وانطاهم بس هو ما يريد وذول ضناه طالعين من ظهره مو حقير لهل درجه...

فركت اديه بتوتر...اخاف يحرگ گلبي وينطيهم الاشواق اخته

مسحت علئ ظهري...لا يمه اطمني لا تخافين ما يجازف بيهم والله هو من البدايه من يوم الي كلوله انطينه طفلك ما قبل مو هسه من حلو بعينه ينطيهم...

همست...ياريت يااارب فدوه رحمتك

رحت صليت من توضيت حسيت نار نزل علئ وجهي بسبب الجروح الي بوجهي...

ماما رضيه كالت...لا تحجين وياه ولا تسالينه مثل ما كتلج هذا عقاب مؤقت اصبري شويه وطيعي...

هي تحجي هيج واني كلبي نااار مشتعله بي مقهوره علئ اطفالي ...

مرت الساعات واني مثل كتلة الجمر بداخلي وعيوني ما نشفت ولا لحظه حاولت اكون طبيعية واصبر نفسي ما كدرت صعبه والله صعبه ...

طلعت بره نوال شالت بنتها الصغيره واشرت السجئ تجي كالت..تعالي ماما تعالي الله ما ينسه عبده شوفي شسوه بيج يسجاوي بهذلج تبهذل واكثر واكثر...

عرفته تقصدني تغاضيت عنها ورجعت الغرفتي فرشت سجادتي و وركعت بين يدين ربي مالي غيره هو ملجئي هو حبيبي وهو منقذي...انفذني وريح كلبي يااارب....

..............................

شهد...

طلعت من الغرفه شايله بزونتي شفت مرة ابويه صعدت فووك...

رجعت بزونتي الكاتلها الجفاف للغرفه ورحت صعدت وراها ببطئ وحذر...

باوعت الها من بعييد شفت حبيبها بطل البيبسي طفر علئ السطح مالتنه ولزمها...

تقرب منها هي اطول منه واكبر بس هو قزم وسمين جنه بطل بيبسي

باسها بوسه مقرفه بلعت نفسي وغمضت عيوني من الخجل والقرف الي صابني ..

هو جان متزوج كلها...تروحلج فدوه مرتي جنها سعد خليفه

ضحكت هي كالت...من جمالك كولة شهد جنك بطل بيبسي

رد بحقد...هاي شهيده ام الولد هيج تحجي عني بسيطه لج والله دوم اشوفها يم المدرسه ويه واحد اسمه جعفر ..

ابتسمت بنشوه...صورها اليه اريد اخلي ابوها يموتها كتل واريده يزوجها لاخويه مطلك مرتين ويخلصني منها ام لسان الكح...

عض شفته بسخافه...وشتنطيني

ضحكت بدلع..القاسمه الله

حضنها وباسها ...وشقاسم النه يبعدي

ضربته وهمست...اخر دلع ادلعك والله

جر نفس...ان شاء الله هل اسبوع عندج فيديو ومخلصج منها صدك ام لسان لسانها اطول منها...

بس اوووف بنت الكلب حلوووه وكتكوته مال...

فتحت عيوني مصدومه من كلامها طلعت موبايلي كن جيبي و وجهت الزوم عليهم من شباك البيتونه وصورتهم...

نزلت بوعيد...صبريلي يالدايحه اله اخلي طشاركم ماله والي

حضنت بزونتي ورسلت الفيديو الجعفر

شويه وراسلني كال...هذا شنو

جاوبته بعصبية...ما الك شغل ابو العرك ابو الحبوب حسابك بعدين اني تخوني وتروح تتزوج وجهه الطاوه لك بس منتظره اطلع من البيت اله افضحك فضيحه

رد بقهر...دروحي انوب سبونج بوب يهدد علساس متزوج بطران هسه عوفينه من هل كلام هذا الفيديو شنوو؟

كتبت...خلي عندك من احتاجه إراسلك وبعد لا تحجي ويايه ولا تخابرني سوالف العاطله ما انساهم يا جذاب تروح فدوه المسلمه الكذاب...

كتب...احببببج شهد والله اموووت عليج بس اصبري عليه اهجج وجهه الطاوه والله اتزوجج اتزوجج ما اريده والله مستحيل اقبل بيها اصلا اكرهه اموت منها...

دمعت عيوني باسئ..واني احببك جعفر فدوه تزوجني فدوه ما اريد اضل يم زوجة ابوويه اكرهه

كتب..بسيطه بسيطه

وبعد ما رد عليه بعدني ما باديه وياه كلام طفر موتني موتني والله تعبت منه بس ما عندي غيره والله ماعندي احد اقق بي غيره...

الله المعين لحد الان منقرفه من بطل البيبسي وزوجة ابوية جنها نعال طايح بالخيس مدري علئ شنو يحبوها...

بس صدك لو كالو حظ العواهر جواهر...

........................

صار يومين علئ هذا الحال  الدمعة ما نشفت من عيني

حرمنييي...اي حرمني منهم سوده عليه يمه شحالكم هسه وين اخذكم ويين..

مشيت بخطوات تعبانه وجع عندي مو طبيعي انفي كل شويه وينزف دم ما ادري كسر عظم خشمي مدري شنو كل شويه وطك دم...

باوعت للمرايه الزراک تحت عيوني مو طبيعي ..نذل من يضرب ما يحرم كرهته حييل كرهته ...

رجليه ترجف من القلق علئ اطفالي

اني شغله وحده محيرتني شلون فتح الباب واني قافلته مرتين يدخل واني قافله الباب شلون ما اعرف معقوله ناسخ المفتاح ياربي دخت...

حسيت بحركه بره فتح الشباك شفته دخل يمشي بملل وتعب ويفتح بازرار قميصه ...

شهكت بنحيب...ويين اطفالي ما جابهم وين اخذهم ويين

طلعت بسرعه وجازفت بحياتي رغم كلولي لا ترحيين اله يموتج يذبحج ينهيج من الوجود بس اني ما اهتميت لكل هذا الكلام...

وكفت مقابيل باب غرفته حسيت باختناق فضيع وقلبي انعصر بشددده...

طرقت الباب كم مره بس هو كل عاده لا يفتح الباب ولا يكول ادخلي..

فتحت الباب ودخلت شفته لازم موبايله من شافني باوعلي بطرف عينه بنظره  حااااده

جر نفس كال...ديلا يلا ان شاء الله اخابرج غير وقت ..اي اي افتهمت

فرك وجهه بتوتر...تمام تمام الله وياج

قفل الخط وتوجهه للحمام همست بصوت باكي...كااااسر

التفت عليه بجمود وباوعلي بمعنئ...خير شكوو

بلعت ريكي بصعوبه وعيوني احس نار تطلع منهن مو دموع شهكت بصوت حزين...وين مجتبئ ومرتضئ

رد من بين اسنانه ورفع اصبعه بتهديد...اطلعيييي بررررره

تقربت منه خطوات وعيونه الدامعه بانذباح تتأمل عيونه القاسية المهشمه

احتضنت اصبعه المهدد بكف ايدي الناعمه ركزت بعيونه بنحيب ...ظلمتني يا قاسي ليش مترحمني ليش

ليش ما تهتم لدموعي الغايره بعيني...

ليش ما يهمك تسمع نبضي ولا حتئ ونيني ...

سحب اصبعه بقسوه من ايدي تقربت منه اكثر...ليش احسك تتلذذ بعذابي وتفرح من تشوف دموعي

نظراتي جانت يائسه عكس نظراته الإجرامية همست...تجرحني وتلدغني بسم حيه وتذوگ معاناتي وانت الفرحان لييش ...

بللت شفايفي الجافه وريقي المر كملت كلامي بحزن....اريد اعرف شغله وحده ليش تكرهني لان اخابرت اهلي تريدني اتبره من امي من ابويه الجاب عمره تعبان لخاطري

والله تجرعت الالم بالسر حتئ ما تشوفني أتألم ولو انت اصلا ميهمك ...ما ردتك تشوف دمعتي وحسرتي

جنت احببك رغم قساوتك وحقدك بس هسه لااا اكرهك بكل جوارحي وانفاسي...

صرخ بوجهي بصوووت عالييي ...اكررررهييييني اكرهيييني بس لا تصيرين ضدددددي لج انتي شنووووو انني شنووو

حسيت فكي تكسر من قبضته....انتي انااااانيه ما تفكرين بس بنفسج وكاتله روحج علئ اخووووج المجررم

ركز بعيونه بقسوووه...مقهووووره مفاركه مجتبئ ومرتضئ مقهوووره عليهم ؟

دفعني بقسوة وكعت علئ الارض حسيت عظامي تكسرت ...

دار وجهه عليه وهو يفح من العصبية وصدره يصعد وينزل ...لج بيووووم واااحد دفنت تلاثه بسبب العاااار اخوووج الي داكه وياه سوووالف

بيوم واحد دفنت اعز ناسي دفنت ابوووي الي ما ابدله بمية مثل عاصم الزفتتت

دفنت غزل الي تسوه اهلج وعشيرتج كلهااااااا

تنفس بقهر ودگ علئ صدره...دفنت فلاح الي ما ابدله باخوانج ثنينهم

همست بتردد...ببب بس فلاح هم جان سبب

من نطقت هل كلمه عبالك جرمت تخبل عيونه صارت جمر هجم عليه بقسوة ولزم شعري بفحيح مرعب...فلاح جان سبب الج عين وتحجين تبررين لاخوج الزمال يعني اذا فلاح جان سبب يحق لاخوج يكتل تلاثه من اهلي؟

زمجر من بين اسنانه...اطلعييي بره لا تخليني ارتكب بيج جريمه واخليچ برگبتي...

ضربته علئ صدره بضربات ضعيفه واني ابجي....ما اطلع ما اطلللع اريددد اطفالي رجعهم رجعهم لا والله اقتلك والله

رفع وجهي وهو يبتسم بنشوه...مقهوووره عليهم ؟

شهكت بتوسل...اريد اموووت والله حس بيه حس ...

ابتسمت بخبث...زين ليش اني محد يحس بيه ليش بنظرج اني مجرم واني اهلج كتلو تلث اعزاز مني ليش لازم اسامح اخوج ليش اقبل بيج وانتي ضددددي

سحبني من ايدي واني اتوسل بي ...فدوه طمني عنهم فدوه وين اخذتهم لاشواق لو لهاله ..

تجاهل كلامي وضل يمشي بيه سريع صرخت بوجهه باستفزاز...اخذتهم الشاااام اي اعرف بيك هي ما ميته اخذتهم تعوضها عن بنتها. .

توقف من خطواته السريعه جنت عبالك مثل الطفله الي استفزت ابوها

باوعلي بحقد وكأن تكهرب من ذكرت اسم شااام ...

تنفست بصعوبه وجاوبته بانتقام....اخذتهم الشام حبيبتك موو صح الله ينتقم منكم

ما حسيت غير براشدي قاسي رد بتهكم...لا تخليني اطلع حرگة شام وبنتها بيج

زمجر بصوووت صاااارخ....اطلعييي بنت الكلب

سحبني وشمرني بره وقفل الباب ضليت ابجي،بباب غرفته

ضليت تقريبا خمس دقايق كاعده ابجي وانوح خليت ورحت الغرفتي...

وين اخذ اطفالي صرت اشك بكوولشي والله ساعه اكول اخذهم الاشواق ساعه اكول اتزوج هاله وانطاهم الها ساعه اكول مرجع شام واني ما ادري واخذهم الها...

راسي راح ينفجر من التفكير ومن القهر ...تعبت حييل كل شويه استغفر ربي لا اوكع بالغلط وارتكب جريمة بحق نفسي...

لاگتني نوال حطت ايدها علئ خصرها باستهزاء...والله زين منه ولحد الان ما طلكج يا ما تستحين لج شلون الج عين وتخابرين اخوج المجرم...

باوعتلها بحقد...وخري من وجهي ما الي خلگج ولا تكعدين تتشمتين بيه

نوال وهي تضحك...وحد منج شكد تشمتي بيه والله بعد عيني عينه ما قصر خلاني اتشمت بيج شكد طغيتيوكيفتي من فلاح مات وفرحتي من صلاح خطب ريهام وحتئ هسه متشمته لان راح اتزوج جعفر ابو العرگ

ضحكت بحزن...كلمن يشوف الناس بعين طبعه وراح اسكت منج لان سفيهه ..

صاحت بصوت عالي...تعالوو شوفوا تعالوا اخت المجرم شدكلي الله علئ الظالم الله ياخذ حوبتي ويقهرج باطفالج

اني تخبلت من ذكرت اسم اطفالي،...اكلي تبن يا حقيره

هي هجمت عليه لزمتني من شعري واني جانت ايدها الثانيه اقرب عليه عضيتها حييل وهي ضلت تصرخ وتعيط

وتجر بشعري واني اجر بشعرها واعض بيها...

اجوا كلهم يركضون جان اول الواصلين رضيه و جعفر وبعدها خالتي و وقار

جعفر سحب نوال مني بس هي حيوانه هجمت بكل قوتها اني صح عضيتها وملختها بس جنت تعبانه ما بيه حيل...

اجه جاسر يركض على صوت الصياح ...

وجعفر سحب نوال دفعها بقوه طيرها من مكانها وهي ضلت تغلط...شبيك دفعتني خايف علئ ام مشاعر ورديه بسيطه جعفر بسيطه...

وكعت من التعب ورضيه كعدت حضنتني واني ابجي ..

سحبني جاسر بقوه حسيت ايدي انخلعت صرخ بصوت عالي ...شبيهااا وياج

دفعته بغضب واني اجمع بشعري هه صاير حنيين يسأل شبيها وياي

حالتي ام فلاح كالت...شبيجن الله ينتقم منجن ويطيح حضجن متت منجن النسوان ترتاح بجال جناينها واني بس العرك والمشاكل ...

جاسر بغضب ..شكوو شبيجن تخبلتن لو تعلمتن علئ المشاكل...

وانتي نوال انتي منو سمح الج تمدين ايدج عليها اني موجود وتجين تحجيلي بس مال تتصرفين من كيفج لا ما اقبلها تكعدين هنا تحترمين نفسج

نوال بغضب...والله محد تدور مشاكل غير مرتك سوت بيه دهر انوب هي المانه فوك ما اخوها مجرم ام المشاكل..

جعفر بعصبية...والله محد يدور مشاكل غيرج انتي نويله تعلميني،بيج...بس انتي زينه والعالم كلها ضدج هو انتي اهلج ما تحملوج وشمروج علينه

هي تخبلت ضل تلطم وملخت شعرها وتصيح..ولك جعيفر تعيرني تعيرني والله اله اكتل روحي وابليكم بلوه بيه

جعفر بعدم اهتمام...دطيري عساس شلون راح اهتم

اخذتها رضيه وهي تدعي وتلطم وتسب...

لفيت شالي عدل واني اباوع الهم بحقد ما ردت ابجي بجيت بما فية الكفايه لازم اعتمد علئ نفسي واصنع لروحي كبرياء...

خالتي ام فلاح كالت بقهر...انتي شبيج ام خنيس ترئ متت منج امشي اعدل لا اطيح حضج

محجيت وياها بس حسيت باديه طوقت جتفي كال بهدوء...جولييت ما حجت وياها هي ذيج حيه

جعفر بسخرية...اذا حيه شكو تبلوني بيها ...

اني بعدت ايده من كتفي وخليت ورحت الغرفتي احس جسمي كله يرجف ...

نمت علئ السرير وارعش من الم والقهر وكفت بلهفه فتحت الجرارات لكيت العلاج مالت مجتبئ

بلعت ريگي بصعووبه ...فتحت العلاج بس شرابات...

رجعته بمكانه طلعت بره رحت للمطبخ بهمه فتحت الثلاجه لكيت بيها العلاج مالت ماما رضيه مالت السكر اخذته بيدي ورحت ...

دخلت للغرفه فتحت  العلاج جانت 12 حبايه باوعتلهن بروح مسلوبه وهنه بنص كفي...

ذنبي برگبتك يا كاسر ليوم الديين

قربتهن من شفايفي حسيت بوجع ببطني شمرتهن علئ الارض ومشيت بخطوات يائسه...لاااا والف لاااا مو اني الي اغضب ربي وانتحر لخاطر الكاسر واطفاله

رفعت ايدي بالدعاء...ربي اغفر الي وارحمني ولا تاخذني بما فعل السفهاء...

كرهته حييل ياريت ينطيني اطفالي ويطلكني...

ياريت والله بعد ما اريده كاسر كسر خاطري وعذب احساسي تعبت حييل وتدهورت احوالي الدمعه ما نشفت من عيني ...

طلعت ملابس اطفالي وحضنتهن بحنان بجيت واني اشم بيهن واشم بعطرهن الحلوو

يممه تعالي شوفي حالي حرمني منج وحرم اطفالي مني يمممه تعبت وينج عني ليش كل هذا يصير بيه

شنو ذنبي من اول يوم تزوجت بي لحد الان واني موجوعه كرهت حتئ نفسي والله...

نمت والدمعه بعيني انتبهت علئ نفسي هوووايه ابجي صايره مثل البومه بس انحب وابجي ...

بس والله حياتي صعبه لو ابجي دم ما ارتاح الكل ضدي حتئ نفسي ضدي وما اعرف شنو اريد

وين خالتي صبريه عني ما تعرف شصار بحالي...

اتذكرت شلون من ولدتهم شلون شفت الموت بعيني

وينهم وين صاروا يبجون عليه لو ساكتين هو يروح ويجي وين خلاهم وين اخذهم منو يدير باله عنهم

حبيبي مجتبى قلبه تعبان سوده عليه يمه بس لا يبجي ويتعب زياده...

همست ببكاء...لا حبيبي مجتبئ يمه لا تزعل عليه اني بخيير وان شاء الله اسوي المستحيل حتئ ارجعكم...

سمعت اطراف حديثهم كالو يريد يطلكني..خلي يطلكني بسس كون يرجع اطفالي...

يارب يا حبيبي مالي غيرك تسندني وتقويني وتصبرني علئ فراكهم والله

.....................

ريهام...

حضرت نفسي لان صلاح كال حيجي ويريد ياخذني البيتهم يكول تعالي شوفي الغرفه اشتريتها تركيه...

خجلت منه كتله...عادي صلاح مو اله شئ فاخر حتئ لو غرفه عاديه

رد بسرعه...شلون غرفه عاديه ..ليش انتي عاديه؟ لج انتي حوووريه من الجنه حبيبتي انتي الماسه جوهره...

ابتسمت وهمست...شكرا حبيبي

عاد هو تخبل كال...اه كلبي عيدي ريهام عيدي والله تكسبين بيه اجر اريد اسمعها مره ثانيه...

همست بخوف وخجل...يالله يالله مع السلامه اجه بابا.

قفلت الخط واني ابتسم شفت بابا دخل كال...هااا بابا رهووومه يالله راح يجي صلاح...

طلعت وياه اجه جابر كال..راح تتزوج رهيمه بعد منو يطبخ ينضف يكنس جانت الميري مالتنه ...

بابا رد بضحكه...اكل تبن وان شاء الله انت تصير الميري مالتنه...

ضحك جابر..زوجوني ونصير ميري اني ومرتي

رد ابويه بلهفه...اخطبلك وقار

جابر اختفت ابتسامته...لاااا ما اريد اتزوج اجذب عليكم

شويه واندك الباب...

اني جنت لابسه نفنوف طوويل زيتوني وشال كريمي بس ممخليه ولا قطره مكياج ...

شفته دخل جان لابس قميص جوزي وبنطرون اسود  ابتسمت علئ شكله واناقته ...

صاح عليه بابا دخلت وهو يباوعلي بلهفه اول ما دخلت اديه رجفت وكلي ضليت ارجف وشفايفي ترجف..

بابا لزمني كال...شبيج بابا شبيج ترجفين منين خايفه اهدي  بابا صلاح صار زوجج...

جابر ضحك...شبيج انتلتي صدك تحجين ههههه هاي احنه واكفين هيج ترجفين شلون هسه ترحين وياه لوحدج لبيتهم

فتحت عيوني بصدمه...شنووو وو وين ااا ارووح

ضحك صلاح كال..شلونج ريهام اريد اخذج اشوفج الغرفه وهم وقار عازمتج

هزيت راسي بنفي ...لاااا ما اريد اروح

بابا جر نفس كال...اروح وياكم لان مناك انريد نروح اني وصلاح للنجف نريد نزور مهيوب الله يرحمة...

ارتاحيت شويه من كال اروح وياكم...

طلعنه اني صعدت ليوره وبابا بالصدر وصلاح يسوق عدل المرايه وباوعلي ببتسامه وغمزلي...

نزلت عيوني بخجل عبالك صوبني بنظراته مو غمزلي...

ضل يسولف هو وبابا واني اسرح بكلامه واباوعله ومن يباوعلي ادير وجهي وهو يضحك ويعض شفته...

وصلنه للبيت دخلنه استقبلنه النسوان وقار من شافتني ركضت عليه حضنتني وتبوس بيه...

نوال جانت كاعده علئ الدرج شافتني ركعت بنتها بالمشط كالت بعصبية...عدلي راسج وسم من اشوفج ما اشوف خير. 

محجيت وياها وهي ضلت تدردم ..وتغلط علئ بناتها عود تسمع بيه ما اهتميت الها...

ضليت كاعده يمهن وهنه يسولف وياي مكيفات ويضحكن ويايه استغربت جولييت ماكووو ...

جنت اتمنئ اروح الها ابوس اطفالها حييل احب الاطفال وخاله صبرية دكول يجننون يشبهون جوولي ...

همست لوقار...وقوره اريد اشوف اطفال جاسر

جرت نفس كالت...اسكتي يمعوده لبارحه كطعها تكطع واخذ اطفالها ما نعرف وين وداهم بس الله ثم رضيه يدرون

حطيت ايدي علئ صدري ياااا عزااا ليش...

تنهدت بضيق...بعدين اكولج

اجه صلاح باوعلي ضحك كال تعالي رهومه وكفت بخجل احس تنفسي ضاق من قربه

كال بهدوء...تعالي شوفي غرفتنا

ابتعدت بسرعه...لا شكرا ما اريد

سحب ايدي بسرعه..هههه شبيج غير اريد اشوف ذوقج

ضحكت رضيه...روحي يمه ادخلي شكو بيها غير تشوفين غرفتج

لزمت بفوطتها...ما اريد ما ارىيييد...

هو سحبني بعناااد وجىني وياه واني اضرب بي وهنه يضحكن لزمت بفوطة عمه رضيه سحبتها ويايه اجت الفوطه بيدي

طلعن كصايبها حمر ونصهن بيهن شيب حطت ايدها علئ راسها كالت...عزا بعينج يا رهيمه يمه ضليت مفرعه كدام العالم ولج وقار جيبيلي حجاب..

دخلني للغرفه وفوطة رضيه بيدي

دفعته بغضب...صلاح خليني اطلع

احتضن خصري بهيام وجاوب بذوبان...مشتاقلج شبيج

همست بالم..عفية صلاح خليني اطلع

لزم اديه الترجف ورفع وجهي باوع لعيوني تدمع رمش بصدمة ومسح دموعي كال..لا تبجين حبيبتي والله ما اريد منج شئ بس ردت تتعودين عليه ...

يالله خلينه نطلع وكعت الفوطه من ايدي من حسيت بقبلاته علئ خدي ...

دفعته مره ثانيه واتنفس بصعوبه ضحك كال..شنو رايج بالغرفه

ابتسمت مجامله...حلوووه تخبل بس خلي اطلع

زفر نفسه بضيق واني فتحت الباب وطلعت وهو راح عند ابويه لاكتني نوال كالت بخبث...هاااا عرس عليج صلوحي

رمشت بعيوني من وقاحتها ابتسمت بحب..عادي زوجي حلالي خلي يعرس...

هزت ايدها ...ليش انتي مو مرتبه انتي عروس خليلج شويه مكياج حمره

ضحكت..صلاح يكول حلوه بدون مكياج مو بحاجه واذا اريد ازورق روحي امكيج بس الزوجي وبس بغرفتي مو استعرض كدام حمويني

نطت عيونها بغضب واخذت بناتها رفس وصعدت الغرفتها...

صلاح وبابا راحوو للنجف واني ضليت عند وقار نسولف ونضحك ومرة جاسر اببد ما طلعت...

سألتها بخوف...اشو جولييت ابد ما طلعت شنو عدله ميته

كالت...ماما رضيه هي كل شويه تروح عندها وما اعرف والله امي متقبل اروح عندها...

اردفت ببتسامه...اكولج ريهام داوود خطبني شدكولين خوش ولد لو لا

جريت نفس...والله ما اعرفه احنه علاقتنه مو هلكد وياهم وخالتي ام داوود كالت ما اريد صبريه تعرف دنخطب وقار لان تخربها وعينها تكتل

ضحكت...يااا صدك تحجي علئ شنو تحسدهم ماخذ منو اليسا كلها وقار

حضنتها بحب وبستها...ياااا غير تجننين والله اموت عليج اتمنئ تزوجين جابر بس هو ميريد يتزوج ..

شتت نظرها وهمست...يجوز داوود من نصيبي

راحت رضيه لغرفة جووولي وطلعت مرعوووبه ضلت تفتر بالبيت وبعدها صاحت...ام فلاح ام فلاااح

اجت عمتي ام فلاح تركض كالت بخوف...هااا رضيه شكووو ؟

بلعت ريكيها رضيه بخووف كالت..جولييت ماكوو بغرفتها

ام فلاح برعب...خاف بالحمام

رضيه بقلق...دورت البيت دورت الحمامات كلها ماكوو هي جانت نايمه ومن العصر لحد الان وهي ما طلعت من غرفتها بس لا انهزمت ...

ام فلاح ضربت علئ صدرها...عزا العزاني وين راحت هاي والله مال واحد يذبحها

ضربه بنحيب...يمه دولبت روحها هل بنيه طفله وما تعرف تتصرف وين راحت

دخل جاسر باوع باستغراب كال...شكووو شصاير

رضيه بخوف...جولييت ماكووو مدري وين راحت دورت البيت عليها

فتح عيونه بصدمه....شنووو

ما نشوووف اله نار مشتعله من السطح ...

رضيه لطمت صدرها...صخام الصخمني بس لا حركت روحها...

ركضنه كلنه علئ السطح وهو ركض كدامنه سوه الدرج بايتين اول ما صعدنه شفنه....:؟

نهاية البارت...يتبع

كونوا انتم كونوا بخير...احبكم 💔

نور سمو العراق..😘

الفائزة بالتعليق...👇👇👇👇👇

وجولييت دكول كل رايي احترمه اذا كان سلبي او ايجابي ما عندها اشكال دكول متحمله اصعب من هاي الامور يهونون وتعتذر منكم اذا حجت البارحه مو قصدها بس حبت توضح...وانتوا تعليقاتكم والله جانت ناصحه غير حاقده الحمد لله

اول بطلة ما تشلع قلبي بالتعليقات فديتها 😍

التصميم اهداء من المتابعه...Raghad-05

وصاحبه الخاطره ما لكيت حسابها بس هي هاي

اعتذر اذا اتاخرت عليكم بس نت ضعيف ولا تنسوا التصويت اوك يبعد روحي😍