رواية #جوليت وأسرها.... الفصل السادس والسبعون 76 - بقلم الكاتبه سمو العراق

البارت الخامس عشر
رواية ...جولييت واسرها..غياهب الإنتقام
بقلمي...نور سمو العراق..

💔💔💔💔💔💔💔💔💔💔💔

موش بوگة
خاطر تذبني بدرب محد يفوتة
هاي سالفتك إذا يسمعها يوسف
جان راح و باس اخوتة..

و انا كتلك..
- لزمةّ الشباچ حاجة
- ولزمةّ الشارب وعد
معركة اني
انتَ لو تربحني لو تطلع خسارة
ماكو حَـل ثالث بعد

- رسل النواب 🖤

..................................

الخوف يخلي الانسان مطيع ومذلول وقابل للعبوديه

الكل بعد تصرفي هذا وروحتي الشيخ كاظم اتهموني بعدم الخووف من جاسر

اي اني جنت اخاف بس هسه ما اخاف ولا متندمه السويته اشوفه هو الصح

الغلطان لازم يتعاقب مهما كانت العواقب ..هاله غلطانه من ساسها الراسها وتمادت وتفرعنت هوووايه واني السويته بحقها صح

وهي يعني روح بشر بيدها وما مهمته ابد المهم ترضي غرورها وعجرفتها

ضمير ما عندها واني سويت اللازم وياها وخلي شيريد يسوي جاسر يذبحني ؟

هو العمر واحد ما يصير ثنين وعمره الخووف ما وقف الموت ...بعد علئ شنو خايفه

بس رغم كووولشي اني اتصنع القوه واتصنع عدم الخووف اضل قاروره هشه ومو كد الي،وياي

واضل وحيده ما املك بس ربي الي هو عوض عنهم كلهم واني املييي بربي كبييير ...

مجرد ما سالني عن مكان اخوويه وعن روحتي للشيخ دب الرعب بين عظامي والرجفه اعتلت جسمي

بعدني ممجاوبته وحسيت بنزف حاااد صار ويايه باوعتله مرعووبه ومصدومه منفاجئة صرخت...دممم دممم اني دا انزف

اباوع الرجليه كلهم دم هو هماتين من شافني اندهش من حالي

ولزم اديه اثنينهن و حاول يثبتني وهو يسالني بلهفه...شبييج شبييج شنو هذا الدم

صارت عندي رجفه مو طبيعيه وجسمي برد ثكل اللساني حتئ لو ما بيها شئ من شفت الدم اني انهرت واعصابي تلفت

اني صايره بس شويه اخاف او انرعب تصيبي حاله هستريه وتتشنج اصابع اديه وينغمي عليه

وهل حاله تصير عندي بس،من اتعرض الموقف قوي او اتعرض الخووفه ورهبه ورعب...

ما حسيت بعد بشئ وحتئ هو ما شفته بس اشوف شكلة ضبابي وشكله الملهوف يبتعد عني ويرجع يتقدم مني....

.....................

ريهام ...

جنت كاعده دا اغسل بالحووش وجولي راحت صاح عليها جاسر

اطفالها كاعدين يمي يلعبون بالمي واني كل شويه واصيح عليهم...عمه حبيبي اكعدوا لا ينكركم الديج

رد عليه مشمش بعناد...عمه انتي ليس وتحه« وكحه » والله ادول العمو عليج يتتلج...« يكتلج »

جاوبتهم بتذمر...هسه يعضكم والله ولا تجوني تبجون

هم ما مهتمين الكلامي اببد وكل شويه ولزموا الديج وحاسبوو عبالك يحجون ويه واحد شخصية...عباب بعد لا اقلع بشارع يعفك العوو...

وهو الديج يرحم بحاله الي يخلصه منهم اني والله اخاف حييل منه من اشوفه انهزم وهو هذا الديج من يشوفني يهجم عليه

ومن يشوف مشمش وروضي ينهزم منهم صدك لو كالو كل قوي الله يسلط عليه الاقوئ،منه ...

انوب لزموا اله تلبس النعال لا تدخل برجلك كزازه

اني هزيت ايدي ياربي هاي جولي وين راحت هاي اطفالها شياطين واخاف واحد منهم يوكع واروح ابتلي،بي

باوعت الغرفة جاسر وما اشوف اله جااسر طلع شايل جووولي وهو مصدوم ومتعصب وهي رجليها كلها دم

اني بصراحه خفت وانرعبت...عزااا ياااا شصاير..؟

رحت اركض عليه وهو تخطاني واتي اركض وراه...شكوو شكوو شبيها جوولي احجي ابو مرتضئ

عاط بيه...بسرعه خلي رضيه تجي وراااي

اني رحت اركض صحت ماما رضيه وخطيه ماما لبست عبايتها وراحت تركض وراهم

ومجتبئ ومرتضئ ضلو يصرخوون يردون يرحون وياهم هم متعلمين منو يطلع يردون يروحون وياه خاصه ابوهم

يعني امهم متطلع بس ابوهم من يروح يضلون يبجون وراه...

اني ضليت بقلق عليها خطيه مسكينه هل بنيه ما ارتاحت

وهي كووولش حبابه من جنت مريضه تحتار شتسوي ويايه مواقفها كلها حلوه

حتئ تغسل ملابسي وتلبسني حذائي تحتار خطيه شتسوي

ضليت ادعي الها بصدق ياربي يسهل امرها ويشافيها

شويه وطلعت سجئ،من غرفة امها وهي تخابر وتضحك

جريت نفس خطيه هل بنيه صغيره ما اكو واحد يراقب تصرفاتها وهل عالم وحوش اخاف انوب تغلط غلطة كبيره وتبتلي بلوه....

اجه مرتضئ يركض وهو يضحك ومستحي جان يكولي...عمه عمه هاي تتاوي دول هلاو عبيبي ..« جان يحجي ويتماوع ويقلد بصوتها »

رغم صدمتي من كلامه بس بصراحه ضحكت علئ ملامحه الطفوليه وحضنته وبسته كتله...اي حبيبي تخابر بصديقتها

عقد حواجبه والنونه وكال...اني اعب تتاوي هي تطرسني « اني ما احب سجاوي هي تكرصني »...

جريت نفس وبسته مره ثانيه وهمست...لا حبيبي عيب هي بنت عمك

سرحت ببالي للبعيد لو فلاح عايش يصير هيج ببناته وبنته تستهتر لا والله فلاح الله يرحمه جان ما يرحم ويطيح حض حضهن

شويه ودخل صلاح باوعلي وضحك كال...ولج شنو هذا الثور وتشيلينه خلي يولي

باوعله بعصبية ورد عليه...انت تور مو اني

اخذه مني وهو يبوس بي...ابوك جاسر منو يكدر يحجي وياك وبعدين انت ابو اللسان ليش ما تحترم

عقد النونه...انت ما عبني دول عليه توور اني مو تور اني علووو

ضحك صلاح...اكييد حلو وتجنن لك احنه وين نلكه مثلك هسه اني وياك صايرين كسووف انت القمر واني الكسوف ...

رفع ايده بتهديد...اعفك والله

صلاح...ترئ جاي امدح بيك ما اذمك بس انت ثور ما تستوعب

باوعلي ببراءه وهو يريد يبجي...عمه دليله يعووفني

ابتسمت واخذته من ايده نزلته وهو راح يركض الاخو

رفعت حاجب...ليش تحجي علئ  مرتضئ انت احلئ منه

لزم خصري وقربني عليه...بعينج منووو الاحلئ

حذيت ايدي علئ ايده...اني بعمري ممجذبه فحرام اجذب هسه والله رضاوي احلئ منك...لعد الله انشاف بالعين لو بالعقل

رد عليه ...لا بالعقل

ابتسمت...لعد رضاوي احلئ منك انت كسوف وهو قمر

كرص خصري وعض شفته كال...وانتي قشطه بس عمي انتم بيت مهيوب لو نشعل اصابعنه شمع ما يجي بعينكم

ضحكت...انتم بيت مهيوب اني ال عكاب

رد بعدم اهتمام ...العباس اخو الحسين نفس الشئ ماكو فرق بس يا بنت عكاب لو سالتني علئ منو الاحلئ جان كلت انتي احلئ من رضاوي

ابتسمت ونزلت عيوني...انت تجامل

لزم وجهي بكفوف اديه وهمس...لا والله ما اجامل ابد بعيني غييير احلئ من رضاوي واحلئ من ذاك اخوو ابو المشاكل انتي بعيني احلئ من الاميرة ديانا

رفعت حواجبي متفاجئه ورسمت ابتسامه دافيه علئ محياي...ههههه هنيالي وال

سكتني ببوسه غامره اقتحمت انفاسي ابتعد عني واني ارمش واباوعله بخجل كال...بعد لا تحسدين روحج وهنيالي وهنيالي ترئ كوووه صرتي زينه ومعجزه نن ربج جان هسه تلكيني شاك القميص والطم

ضحكت عليه بصوت عالي وهو كرص خدي وخله وراح دخل جوه اباوع شفت سجئ واكفه وتباوع علينه

اشو هاي خزرتني وخلت وراحت لامها اني كلت خطيه مدام راح يسبح خليني اكمل اله الاكل واصبله

ما اشوف اله نوال هجمت عليه لزمتني من كتفي ودارتني عليها كالت...اكلج عيني ريهام بعدج ما طبتي ضليتي تتفنجحين عليه

استغربت من كلامها ورديت عليها...شنو اتفنجح ؟

باوعتلي من فوك ليجوه...اكلج ترئ كلنه عدنه رجوله وعدنه زلم تحبنه بس ما سوينه مثلج بس الظاهر انتي نسيتي ربج وما صدكتي زوجج ضحك بوجهج

هزيت ايدي من كلامها...اكولج انتي اشو متعرفين تحجين شنو زوجج شنو ضحك بوجهج شبيج بيج شئ انتي

تخصرت...باعي ريهام لا تسوين روحج فقيره ولا تتمسكنين استحي شويه وكالي اكو بنات مراهقات

وهذا زوجج عود مسوي روحه شريف براسي وهو يبوس بيج كدام طفله مراهقه لا كال عيب ولا كال البنيه تتعلم بس من يشوفها لازمه موبايلها يجيها يركض عبالك واحد محرضه

جاوبتها بعصبية...هو منو الي محرضه عليها شدخلنه احنه وبعدين هو عمهن حتئ لو حجه عنهن بمثابة ابوهن ما بيها شئ اذا حافظوا عليهن

رجعت جاوبتني بنفس الغضب...اكولج انتم شبيكم ليش تغارون منه اني وبناتي،شمسوين الكم هل مضلومات وترئ والله نشور اليتيم دعائه مستجاب عند ربج

وشفتي اني،بس دعيتلج صرتي زينه شفتي دعائي مستجاب وهسه اذا ادعي عليج ارجعج أسفل السافلين...

ضحكت وهزيت راسي بسخريه...ههههه انتي تحجين صدك لج اني ربي وعدني يشافيني وما خيب ضني واذا انتي فعلا دعيتي اليه شكرا ما قصرتي...

بس ليكون بعلمج ربي يكول وجعلناهم في طغيانهم يعمهون شكد ما الانسان يطغئ رب العالمين اله بالمرصاد

واذا المخطئ ما تعاقب اليوم او باجر او عكبه مو معناه ان هو علئ حق لااا والله بس دتكثر ذنوبج

ردت عليه بثقة...الحمد الله هاي انتي وامثالج اما اني انسانه مظلومه وام يتامئ والله دائما ينصفني ويكون بعوني

فتحت صدرها ورفعت راسها للسكف وتحجي بحرقة قلب وصلافه... ياااااربي كل واحد يريد بيه السوء اني وبناتي اريدك تعاقبه وتموته واريد كون بعافيته و بزره كوون كل وحده باطله وحقيره بهذا البيت اريدك كوون ما تشوفها الطفل والعدها اطفال كون تموت اطفالها وتفكنه منها

طلعت وهي تدعي وتصييح جريت نفس من كلامها صدك لو كالو شر البلية ما يضحك

هاي من كل عقلها مصدكه روحها هي مظلومه و مسكينه وصاحبة يتامئ

اشو ام اليتامئ كولة جعفر براطمها من كثر النفخ وصلن للباب الرئيسي

لا والمشكله هي مقتنعه بكلامها انوب جايه تحاسبني علئ زوجي حلالي...

بس هو هم صح صلاح ملازم يبوسني بالبيت لازم بالغرفه لان البنيه صغيرة وشافتنه يمكن حقها نوال تحجي مو صح ؟

تنهدت وبعدها اخذت الاكل الصلاح ورحت ضليت احجي عليه لان باسني وكتله عيب البنيه صغيره وامها ما تقبل

عاد هو ضل يحجي كال...خلي تولي طايحة الحظ والله الها يوم اله اربيها من جديد كلش مستهتره هاي سجئ

حاولت اهدي بس هو متعصب جان حييل...

...............................

جولييت....

فتحت عيوني بغثيان واحس مثل التراب بعيوني شفته واكف هو علئ راسي و ماما رضيه

ماما اول ما فتحت عيوني اجت عليه تركض ولزمت ايديه بيدها الدافيه وهي تسالني عن احوالي...ها يمه جولي شلون صرتي

حاولت اثبت نفسي ما كدرت هو اجه ساعدني بس هو شنو وجهه ما يكصه السيف مدري شبي متخبل

ولو حقه ضربتين علئ الراس توجع هم روحتي للشيخ وهم عاصم طلع عايش

باوعتله بتردد ورجعت باوعت الامي كلتلها...ماما اني شبيه ؟

ابتسمت بمرح ورجعت كعدت بصفي ولزمت ايدي...يمه انتي حااامل وصار عندج نزف من الهبطه

فتحت عيوني مصدومه ومدهوووشه من الكلام ماما كعدت علئ حييلي مهبوووطه....لاااااا لااااا فدوووه ماما لا دكوليها

هو باوعلي بغضب كال...وشبييج مصدومه وما راضيه

هدئت شويه من ثورتي بعد ما نطق هل جمله باوعتله بحييرة....لان اني وياااك مو عائلة متكامله اني وياك علئ صفة الانهيار...

رد عليه بنفس العصبية...وشلووون يعني نرجعه مثلا

جاوبته بعدم استيعاب وبراءة...وين نرجعه يترجع هو ؟

اجه يحجي بس تدارك كلامه كال...نرجعه ...وسكت..

ماما لزمته من كتفه بحنان...علئ كيفك يمه علئ كيفك شبيك تخبلت علئ شنو متعصب

باوع الرضية كلها...ما تشوفيها متريد طفل مني

تنهدت بضيق ...لا يمه شلون ما تريد بس اطفالها بعدهم صغار  و وكحين وهي ما تكدر الهم

هو رجع باوعلي بجمود وجر نفس...

اني حطيت ايدي علئ بطني والقلق اخذ جزء مني ...شلون ورطه حاامل كله من وراه ابو جهال وكحين

انوب زاد الحمل حملين عليه اني مشمش و روضي ومحتاره بيهم

بس اتذكرت اني جنت انزف يمكن الطفل يكون وكع...

باوعت الماما دا احجي وياها وهو كلها يمه انزلي جوه اني اضل يمها روحي جعفر اجه ياخذج

هي ردت عليه بتردد...يمه خطيه جولي خليني اضل يمها

رد عليها بعد ما قطع كلامها...لا يمه اني اضل يمها...

هي اجت سلمت عليه وخلت وراحت

ضليت بس اني وياه عبالك حاصرني ملك الموت وانقطع تنفسي بوجوده

حسيت راح ابجي متت من وجودي وياه الوحدي لان اشوف وجهه يعبر عن القساوة والجلافه

وكل شويه مترقبه تحركاته وجموده بلعت ريكي بخوووف وتكلمت بهدوء....ليش حبستني هنا ليش ما طلعوني

رد ببرود...حالتج ممستقره

كعدت بتعب بعد ما سندت نفسي علئ الفراش...شبيها حالتي ؟

دار وجهه عليه وملامح متعبر عن شئ كال...الطفل لحد الان ما مستقر وحالتج شويه تعبانه

تفاجئت من بروده...وهيج تحجي بكل برود لعد شكد تكرهني ؟

رفع حاجب بعدم قبول ...تحجين بصف الحجي انتي اني بعمان وانتي بشمان

اردف بوعييد...والله بحياتي ما شفت وحده مثلج وكحه رايحه الشيخ عشيرتج ولج زلم مشوربه ما سوتها

جاوبته بتكذيب...ما رحت اني جنت بالدكتوره وهذا دليل ضد كلامك انت اني حامل بس،ما كتلك لان بصراحه انت ما تحبني...

ضحك بصوت عالي ورجع باوعلي وهز راسه باسئ كال ...هاي مال جنتي عند الدكتوره نكعيها واشربي ميها

ولج شنو تضحكيين عليه انتي شنو من مله وجاي تضحكين عليه

انتي جنتي عند كاظم ابن زبووون وهسه اكلج شلون عرفت

رمشت بعيوني بقلق وبلعت ريكي واني منتظره يحللي ...

تقرب مني وهو يرسم ابتسامه شامته علئ شفايفه ...اول شئ ولدج هم الي شهدوا عليج مجتبئ ومصطفئ ما كالو عند الدكتور وهم يعرفون كوولش زين شلون يميزون هاي اولا

ثانيا عم كالو جنه عند جدو ابو جابر يعني جنتي عند شيييخ ما كدرو يميزون بين ابو جابر وبين الشيخ كاظم...

وهااا ترئ ماكو دكتور يجي الشغله لابس دشداشه وعكال وجفيه....

وثالثا يا محفوظة السلامه يا ام اللسان يالعرمه خالتي ام هاله خابرتني وتصرخ وتبجي ودكول هاله معاقبها الشيخ

ودكول عود هي الي موصله خبر موت عاصم الي وهي نوال الي وصلته مو هي

لذلك اتصال خالتي،هو الي،اثبت كل شكوكي

ضليت صافنه عليه ومتوتره همست....جذابات اني شدخلني منو الوصله

ابتسم ببرود...يعني مصره تجذبين ؟

نزلت عيوني ومجاوبته

رفع اصبعه بتهديد...بالقرااان فد بربوووك لا انوب تلوميني من احجي هيييج

ترئ انتي صايره حيييل وكحه منين متعلمه

هزيت ايدي...اهووو انت يوميه عايد هل سؤال عليه واني يوميه مجاوبه نفس الجواب يابه تعلمت منكم وافتخر طبعا علمتوتي علئ كل حيله والبركه بيكم...

اشر علئ بطني...بختج بهل طفل لو ما هل طفل قسما بذات الله اله اندمج علئ طلعتج بدون علمي ادبسز

درت وجهي مزعوجه من كلامه وشويه واجت الدكتوره قاست الضغط وشكلتلي مغذي وخلت بي ابره...

حطيت ايدي علئ بطني وابتسمت بحب...ياروحي بعد امك نقذت امك من هل وحش الكاسر مثل اخوتك هم نقذوني اول مره....

ضلينه اليل كله كاعديين اني وياه والدكتوره كل شويه واجت شافتني

وهو يحجي ويه الدكتوره ويفتهم منها واني مثل الاطرش بالزفه ...

ضاله اخلف واشمر عليه...

هو كعد علئ الكرسي وشويه ونام وهو كاعد واني كتلني الملل وممصدكه لحد الان اني حااامل

باوعت عليه شفته نااام ضليت مركزه بملامحه تذكرت من ضربني راشدي طير مخي

شكد قاسي ولو اني يعني بهذا الموقف جنت متوقعه اموت بس هو كم راشدي ما ذبحني بس،والله يوجعن

اتصل موبايله هو بسرعه فز باوع للموبايل وجر نفس فتح خط كله...الووو هااا يمه  ..شبيهم...اووف علئ شنو يبجون انطينايهم...

جنت استمع اله هو دا يحجي عن اطفالي اكيد لعد منو الي يبجي صلاح وجعفر

كعدت بلهفه وضليت اباوع عليه وهو رد عليهم...هااا بابا شبيكم لا تخافووون لا ماما ما بيها شئ

هو من كال ماما ما بيها شئ طار كلبي من بين اضلاعي

و وكفت بتعب واني لازمه ضهري والدمعه بعيني ومشيت خطوات تعبانه وصرت مقابيله وروحي ذايبه علئ فراكهم

هو رفع عيونه اليه وهو كاعد ورجع يحجي وياهم اني مديت ايدي اله اريد الموبايل والدموع تجمعت بمحاجر عيوني مدا اكدر افاركهم ابببد

هو جر نفس وانطاني الموبايل اجاني صوتهم الطفولي وهو يحجون ببراءه...ماما عبيبتي اين رحتي

رديت عليهم بقلب ملهوف ...هااا يروح ماما هااا يعمر بابا هسه اجي حجيب الكم سياره حلوه

مجتبئ رد بصوت مخنوك وذايب...سكيته اني اعببج تعاي

شهكت من بين دموعي...يروح ماما واني اموووت عليك ان شاء الله اجي يالله نامو لا تتعبون ماما رضيه

مرتضئ جاوبني وهو يبجي...والله اعفها رطيه ما اعبها اعببج انتي

تنهدت بضيق وعضيت شفايفي بحسرة...جايه ماما جايه لا تبجوون هسه اجي حبيبي انتم

قفلت الخط وباوعتله بدموع حايرة...جاااسر اريد ارجع للبيت

رد بهدوء....حالتج ما مستقره

بلعت ريكي بتعب...حتئ لو ممستقره اني اريد ارجع للبيت والله اذا ضليت هنا اتعب اكثر من ما ارتاح عفيه رجعني فدوووه

مسح علئ شواربه بضيق وضل مركز بيه كال...انتي امج متنسيه بيج عناد

حطيت ايدي علئ صدري...كلبي ديذوب علئ اطفالي،وانت متحس بيه

اشر علئ بطني...وهذا هم طفل الي ببطنج

جريت نفس حزين...اذا الله قاسمه ما يصير بي شئ اني بمجتبئ ومرتضئ شفت الويل وربي حفظهم خلينه نطلع

هو عافني احجي الوحدي وخله طلع تنفست بضيق وبعصبية كلامي ابد ما اله اهميه بداخله

حيل مستحگرني ما يصير هييج لا هو عايفني عايشه بسلام ولا هو مهتم الامري

خليت ورجعت كعدت علئ السرير واتي لازمه ظهري بوجع

رجعت بخيالي للبعيد اتذكرت مره من المرات اخذنه بيها مجتبئ للدكتور

وطلب منه نسويله ليزر الرجليه...علاج طبيعي

اخذناه نسويله وهو يبجي ما يقبل خلاه ابو علئ السديه وهو بس يبجي واني لازمه ايده واتوسا بي...حبيبي مشمشتي الحلو يالله حتئ بابا يشتريلك سياره

هز راسه بعناد...مااااا ماااا مااااا اني ان اعبكم...هو ما يحبنا

جريت نفس بخيبة أمل وباوعت الجاسر جاسر لزم ايده وباسها...حبيبي مجتبئ اني اكول عليك سبع وحباب ليش ما تقبل نسويلك علاج حتئ اشتريلك سياره تركب بيها وتكدر تسوقها...

جان يساير بي بالكلام

هو باوع الابو بتفكير كال...لاااا ما اليد سياره اقيني سيارة عمو دعفر...يريد سيارة جعفر

ضحك جاسر ولعب بشعره...لك ملعووون ما لكيت فير سيارة جعفر

مد شفايفه بعناد...اني اليد سيارة عمو دعفر

هز راسه جاسر بقبول...ادلل سيارة جعفر سيارة جعفر بس نرجع انطيها الك بس فضنا

باوع الابو بدموع...ليس روطي ما حقله متل اني...« ليش ما تسوي علاج طبيعي المرتضئ قصده »

ابتسم جاسر بكذب...شلون ما مسويله ذاك اليوم جبته وسويتله وهو سبع مو مثلك ولا يبجي ولا يحجي وحباب حيييل

هز راسه بثقه...لااااا اني عباب اني تبع

ومد رجليه ..يالله تويلي يالله...

ابتسم جاسر وراح صاح الدكتور الي يشتغل بالليزر وسواله علاج طبيعي هو الليزر جان مثل الجل دهن بي رجليه وخلاله مثل اللصقات بيهن وايرات مربوطات بجهاز وتنطي يعازات بيها حراره تنشط الاعصاب لان هو العصب تالف

هو من توصل الحراره حد اقصئ يضل يبجي سوده عليه ما يتحمل

وبعدها من يخلص يجيب جهاز بي ذبذبات عليه ويمشي علئ رجليه وهو هذا العلاج المجتبئ من غير الحبوب والابر....

رجعت من مخيلتي تعبانه اني وابوو حييل بعلاجه يارب يحفظهم الي ولدي ما اكدر علئ فراكهم ولا دقيقه...

دخل جاسر وجهه بي سبعين للطام كال...يالله حضري نفسج كتبولج خروج

حطيت ايدي علئ بطني بصدمه...ياااا والبيبي

هز راسه بقهر...شلون اليوم اني وياج نلعب مثل الفاره والبزون يخلوج بالمستشفئ متقبلين يطلعونج متقبلين شتردين بالضبط ارسي علئ بر

رفعت اكتافي بفشله...ما ادري بكيفك

اشرلي احضر نفسي واني بسرعه حضرت نفسي وطلعنه صعدت يمه بالصدر واني اباوعله بقلق كتله...الطفل بي شئ

هز راسه بنفي

موتني بتصرفاته وسكوته وبروده حبجي والله ميصير هييج

غلطه وحده يحاسبني ويدمرني عليها ويطيح حضي اذا ما يضرب يمرمرويتعب بتصرفاته

مرارتي حتطك من وراه السكوت يذبح وما اعرف شنو الي يدور بباله

وصلنه للبيت اول ما دخلت تلكوني اطفالي واني حضنتهم بحنان يبوسون بيه ويجذبون عليه ويالفون قصص واني مستمتعه وياهم كولش مستمتعه

اخذتهم الغرفتي ونومتهم واني اسولفلهم قصص شفتهم ناموو

رحت الماما رضيه سالتها عن حالتي لان هي اكيد تسأله

جرت نفس كالت...يمه طفلج مهدد بالاسقاط ينراد الج راحه انتي يمه ارتاحي ولا تعبين نفسج منا لمن يثبت حملج...

هزيت راسي بقبول  وخليت ورحت نمت واني كل شويه ولمست بطني وبجيت بصمت ...يمه هذا ثالث طفل اليه ويينج والله مفتقدتج حييل مفتفدج اكثر من ما فاقده نفسي

تعبت حيييل تعبانه من كوووولشي حتئ من نفسي خايفه من المستقبل اكثر من الحاضر

خايفه والله يمممه غير كون توكفين بجانبي وتشاركيني بهمي

ليش،ما همج غير ولدج ...والله يمممه والله لو هسه جاسر يكولي سافري الامج ما اجيج صدكيني

والله ما اجيج اعيش بنص الكلاب وما اجيج لان بعتيني اكثر من مره وهل شئ كسر كلبي والله

والله اذا رجعت شام واختارها جاسر وتركني ما اجيج ولا ارجعلج اكعد الوحدي ولا اذل نفسي الكم يا اهلي اكثر من هييج

حسيت بطكطكه بالحووش فتحت البرده وباوعت من الشباك شفته واكف بنص الحوووش وضارب عليه ضوء الاستقبال وهو يخابر ويحجي بهمه وملامحه الحاده متعصبة...

عضيت شفايفي باسئ ما يفوتها علئ خير جاسر مبينه عنده فد مخطط واكيد ما يعديها علئ خيير

يارب سترك يارب دخيلك والله تعبنه اثنينه تعبنه مو بس اني

ماما رضيه ما حجت اني حامل ولا هو جاسر لان نوال وخالتي ام فلاح يتخبلن اذا طلعت حامل

هو ما يخاف منهن بس يخاف من عيون نوال الحربايه....

................................

وقار...

جنت دا اخابر بصديقتي السوريا علمتني علئ اكله سوريه سويته البيت عمي

ومخليه السماعات واحجي وياها واضحك مقضيه وقتي وياها وتعودت عليها من احجي وياها ارتاح واكمل كل شغلي

وحتئ مرات ارسل الها رصيد تكنك بي وتضل تحجي ويايه

بس كلتلي كلمه كالت...لك نحنا بنعرفكون من زمان هههه

ضحكت من خلال استغرابي بس ما سالتها قفلت الموبايل واندك الباب

رحت فتحته دخلت خالتي صبريه وثوبها طاير للكائنات...

وشايله طشتها كل عاده علئ راسها كالت...خايبه بالج بالج ترئ ما بيه بريك لا ادعمج

ضحكت عليها وهي دخلت للصاله نزلت الحموله مالتها

طشت جان مليان عينج وما تشوف خطيه شايلته علئ راسها

كالت وهي تاخذ جيس،مال كوجه وتضمه ...هذا جبته الجكليته مو هاي رضيه كالت جكليته اتنسئ علئ كوجه حامضه وجبته الها

فتحت عيوني بعدم استيعاب...جووولي حامل

ردت بعدم موبالاة وهي تسفط بالاغراض...اي بس لا تحسدنها ترئ عادي تصير عدجن فروخ والزعاطيط مو ذات اهميه بالحياة

ضحكت...لا علئ شنو نحسدها ان شاء الله الله يرزقنا مثل ما رزقها

كالت...اي عفيه وكومي عزلي المسواك وهذا البيض ضمي بالثلاجه اليوم الدين لاعب لعب والدجاجات كلهن مبيضات اخير من جووويبر مابي خير

عضيت شفايفي من كلامها واني اكتم ضحكتي ردت كالت...امداج يا خيه يا ام جابر لو مخلفتلج ديج ولا جويبر لا فرخ لا زعطوط هسه كون صخل هم ميخالف

رديت عليها بتنهيده...خاله ترئ اني حبلت وطرحت

هزت ايدها وطلعت جكارتها وشربتها كالت...هو ابن جويبر لو بي خير جااا ركد ببطنج بس من اول وكعه طاح وتكوم

تنهدت هسه بالله هاي صبريه واحد شيحجي وياها رحت اعزل بالمسواك ودخلت عمتي وابو جابر عمي وجابر سلمو عليها وكعدوا يمها

هي طلعت مسدسها من جيبها وحطته بصفها وبعدها مدت ايدها بجيبها وطلعت منه جيس اسوود...

فتحت الجيس بي لفات مال حرمل ومي ومدري شنو اشياء يعني تدل علئ عمل او ابطال سحر ما اعرف شنو

كالت بثقه...تعاي ولج وقيره باعي هذا تاخذينه ترشي بباب غرفة نوييله وهذا تشربينه لجعيفر

وهذا ترشينه بالبيت

جنت صافنه عليها...شنو شدتحجي تالي عمري انفذ سحوره

كلتلها خاله شنو هذا المن

جرت نفس وسحبت من جكارتها نفس اعمق...هاي بطله مال سحوره جعيفر ابو العرك الي هو اخووج نويله مرته وجهه الطاوه مسويتله سحر ولازم يتبطل

ضحك عمي عكاب كلها...ههههه صدك تحجي خوويه شنو هل سوالف وتثقين بيها

هز ايدها وطفت جكارتها ...خاله اني شدخلني مسويه سحوره غير هاي جنتكم نويله لاعبه بالولد لعب مسويته مثل الاثيول بس مفتش عيونه وشدكله ينفذ

رد عليها جابر...هاي ناس تريد فتنه وبعدين شنو خاله من شوكت وانتي تثقين بالسحره

ردت عليه بتذمر وشغلت الجكاره الثانية...خاب اسكت اسكت امهات السحوره لاعبات لعب وانتم نايمين ورجليكم معطبتها الشمس

تشوفوها تحرك وتشعوط وساكتين الها هسه تسودن الوادم تسخر عليكم جن وطناطل وهسه تخلي رضيه تلبس برموده وتهز باليل

خايبين شمالكم ما تدرون برواحكم ترئ السحر مذكور بالقران وجعيفر لا هو متدين ولا هو مؤمن واقل سحر يسمط اسلاف اهله شني جعيفر ابو العرك محصن نفسه وما يلوحه سحر ؟

جابر حك لحيته وتنهد واني اخذت الشغل الي جابته ورحت ضميته بالكنتور كلت بس اروح انطي الامي وهي الي تسوي

دخل جابر وباوعلي كال...وقوره حبي انتي زعلانه مني لان اني هيج سويت ويه جاسر

رديت بخيبة امل...لا حبيبي مزعلانه انتم ولد عم بس اني بصراحه يعني حاز بخاطري ان انت و جاسر واحد ميحجي ويه الثاني وهذا اكيد ياثر عليه

اني شنو الاريده غير اشوفكم متصافين ومتحابين انت زوجي وهو اخويه وثنينكم اعزاز عندي

وانت يا جابر غلطان من تستر وتنقذ قاتل ابويه واخويه وبنته لاخويه انت منه وبينه انت ابن عمهم بنثابة اخوهم والصار اكيد جرحهم ومو قليل

نفخ بقهر ...بس والله اني الخاطر جاسر والله تدرين اذا ميت عاصم حتكون الشغله عشائريه وقانونيه ومحد راح يخلص من هل مشكله ترئ،هل مشكله عواقبها وخيمه بس جاسر يفكر ما يفكر غير بالانتقام

وبايع روحه وبايع العالم وياه ترئ،اني وابوي صح جرحنه جاسر بس صدكيني نقذناه من هواي امور هو غافل او متغاضي عنها

لزمت اديه بحنان...افتهمك جابر واني كووولش،مفتهمتك بس شسوي اذا هو جاسر هيج تفكيره ويعتبر عنده هل شئ خيانه

لزم وجهي بثنين اديه وطبع بوسات دافيه وصغيره علئ شفايفي وهمس بحب...انتي اهم شئ عندي اما جاسر اعرف شلوت احسن علاقتي وياه

ابتسمت بحزن...احب اشوفكم متصافين ومتصالحين وياريت والله لو تتصالحوون

باسني بخدي ورجع حضني همس بدلال...اكييد نتصالح لخاطر هل العيون الحلوه  ما نريد نعذبهن

حضنته بحب وراسي علئ صدره يارب يبعدني عن المشاكل وجاسر يقتنع بكلام جابر يارب....

................................

جولييت...

جنت كاعده بالمطبخ وايدي علئ بطني احس هل طفل مو وقته كووولش

بعدها استغفرت ربي لا استغفر الله هذا رزق وحرام واحد يرفس نعمته برجله غيري ما عنده اطفال ويتحسر علئ الطفل

والحمد لله على كل حال رجعت بذاكرتي من حبلت بمجتبئ ومرتضئ اصعب من هاي الاحداث واصعب بحيث مستحيل اكو وحده عانت بكدي من حبلت بيهم

طردت الماضي الأليم من مخيلتي ما اريد اتذكر ذيج الايام مو وكتها ابد مو وكتها...

بس الي مضوجني جاااسر حيييييل حاقد عليه وكارهني...

والله عجيب يعني اذا هو ظلمني اني لازم ما احجي واذا اني غلطت لا صارت جريمه ولازم اتعاقب عليها...

يعني هو عنده مشاعر واني لااااا؟

والله اني حياتي حييل تعذبت بيها  ومريت بصدمات بحياتي حييل فضيعه

ومريت باوجاع والألم مختلفه محد مر بيها غيري ولا احد طيب خاطري غير نفسي ولا احد طبطب علئ كتفي

هو صار يومين مو هنا مجاي ولا شايفته واليوم العصر اجه شويه وطلع ومحد يسأله وين رايح

وهو يطلع ويدخل بكيفه وهو ولي امر نفسه ومحد يحاسبه واني اذا كعدت علئ المكينه يحي يحاسبني ويطيح حضي والله متسلط وييع...

مدري شلون قبلت بي قشمرني عبالي حباب اشوفه هادئ وعاقل وشخصيه تالي طلع مخبل رسمي

انوب كل ما حجه وكال صايره وكحه وصايره عرمه وصايره وصايره ادري هو الي رافگهم شيصير معصوم لو نبي اكيد يصير مثلهم

شويه ودخل هو وياه ناس ما شفتهم بس اسمعه يكولهم...تفضلو تفضلو

خليت وكلت خلي افلت بعد ما بيها مجال ما اريد اشوووفه واغث نفسي

اني دا اريد ادخل الغرفتي وهو صاح عليه بهدوء...جولييت

درت وجهي عليه بذهول وهمست برجفه...هااااا

اشرلي بعيونه البسي صايتج وحجابج عدلي وتعالي للاستقبال

اندهشت من كلامه وانذهلت و رديت عليه باستنكار...شنو ادخل لا والله ما ادخل انت وياك زلم

رفع حاجب بسخريه...مستحيه المدام بس من رحتي وطريتي الديوان ما استحيتي امشي يالله امشي بسرعه وتعالي

اني خليت ورحت الغرفتي واني ما خليت حجايه ما كلتها عليه وخليت ولبست صايتي وحجابي بس جنت حييل خايفه وما اعرف منو ذوول الي راح ادخل عليهم

وصلت للباب ودكيته هو فتحلي الباب وباوعلي من فوك ليجوه حسيته يريد ياكلني وكلبه محترك مني ورغم عصبيته مدري حسيت اريد اضحك يمكن لان حسيت نفسي قهرته...

هو سوالي مجال ودخلت باوعت بصدمه للشيخ كاظم ابن زبون والولد الي فتح الباب اليه وكتله خاف تخطفني

صابتني رجفه من وجودهم والقلق لعب بعقلي كلت...يمكن اجووي يشهدون ضدي او هاله حجت شئ ضدي

بلعت ريكي بخووف وتنفسي ضاق حسيت الاوكسجين انكطع عندي وعيوني حسيتها غوشت

هو الشيخ وكف هو وابنه كال ببتسامه...هلا ببنيتنه هلا ببنت ابو عصام والله شلونج عمي

رديت بحسره بعد ما بلعت ريكي...هااا عموو اي اني هوو اي وعليكم السلام ايامكم سعيده

الشيخ ضحك بصوووت عااااالي كال...شبيج بويه وينه و وين العيد علئ كيفج لا تخافين احنه اهلج اكيد ما نضرج واجينه نشوفج

حطيت اضافري بحلكي وكعدت اعضعض بيهن من الخووف

ما حسيت بس بأيد جاسر تسحب ايدي من شفايفي وهو يضحك بثقل...شبييج ام مرتضئ ليش متوتره ذوول اهلج شنو ما تعرفين عمج الشيخ مو ذاك اليوم انتي عنده ورحتي شكيتي اله من هاله

باوعت اله وبلعت ريكي برجفه...شكد نذل جابهم كدامي حتئ يشهدون عليه كدامه

رمشت بعيوني حاولت قدر الإمكان افهم الشيخ بنظراتي بأن اني ما كتله اجيتك بس هو مدستر السالفه وقابض حقها...

حسيته حوط اكتافي وجاوبهم ببتسامه...جولييت صح تصرفت من ورايه بس بيها طبع حلو ما تعرف تضم عني السالفه وكالت السبب الي راحت بي الكم واني جنت راضي عنها

باوعتله متفاجئه من كلامه وهو باوعلي وابتسم

الولد الشاب رد عليه...جولييت بنت عمنه وتضل من عشيرته والي يمسها يمسنه

جاسر حط ايده علئ صدره ورد عليه بغرور...محد يكدر يضرها واني موجود والكل طالع من عصمتها واني ولي امرها

رد عليه الشاب ببتسامه شامته...بس احسها خايفه منك من اول ما دخلت شلون وين اكو مره تخاف من ولي امرها وهيج مرعوبه

ضحك جاسر ورد عليه بثقه...لا جولييت خايفه منكم مو مني هي ما متعوده تحتك بعالم غرب مو هيج ام مرتضئ

باوعتله وهزيت راسي بأي مدري شبيه انثولت حسيت روحي طايره ولساني ملجوم عن الكلام...

رفع حاجب الشيخ...بس بويه احنه مو غرب احنه اهله

جر نفس جاسر ورد عليه...اذا احجي هسه اجرحكم فخلوني ساكت احسن

رد عليه الشاب بحده...لا احجي

ابتسم باستهزاء...هه احجي ليش لا انتم هسه اتذكرتوا عندكم بنيه عندي صار كم سنه علئ الحادث شلون تقبلتوا تعيش عندي ما خفتوا واحد منه ياذيها احنه عائلة مهيوب واحنه فاكدين اعزاز

ترئ محد منكم كلف نفسه وكال خلي اشوف هل مسكينه شلون عايشه وشلون راح تعيش بعد هل حادث المشؤؤم

اخوها سوه مجزره ببيتي والكل حملها السبب مجرد هي اخت كتال اهلنه الناس الموجوده بالبيت كرهتها حتئ لو ما الها ذنب بس هاي فطره بالبني ادم

انتم ناس غلطانين من ساسكم الراسكم وهل البنيه انضلمت منكم ومني وبعدها لحد الان مضلومه

وليكون بعلمك اني واحد من اهل مهيوب تجبرت عليها اشو ما شفت واحد منكم طلع وراها وكال هاي شلون راح تقضي حياتها بنص ناس يدور الانتقام دواره

الشيخ نزل راسه وهو يقبض علئ سبحته باسف

واني غلبني الحنين ونزلت دموعي كلامه صح والله وصح الصح محد نصفني من عشيرتي...

جاوبه الشاب بغضب...بس احنه ما شايفيها ولا جنه نعرفها حتئ ننصفها

عقد حواجبه جاسر ورد عليه...شنو قصدك ما شايفها اشو انت ما تعرف تحجي

هو جاوب بتلكئ ...هاااا لاااا بس،قصدي يعني احنه من اجت وشكت عدنه وعرفنه معاناتها تاسفنه عليها

ضل جاسر خازره ويباوعله بغضب وهو الولد رد بترگيعه...العفو ترئ مو قصدي بس احنه المجزره الصارت نستنه حتئ اخت عاصم

هز راسه بغموض...اي كولو نسيتوها لا دكولون غير شئ

كال وهو يحضني باديه ودارني علئ الباب...يالله بعد عمج روحي سويلنه جاي اليوم شيوخكم دايسين بساطي...

اني خليت وطلعت بسرعه وكلبي يرجف وكلبي مليان حزن سويت جاي وانطيته الهم ورحت كعدت بالحوش العب باطفالي....

شفتهم طلعووا وجهالي يركضون يلعبون هم طلعوا واني لزمت كلبي،بيدي هسه بس لا يجي ويضل يرزل بيه

واني ما الي خلك رزايل تعبانه نفسيتي حييل من الحمل مدري شنوو

شويه ودخل ما حجه شئ ومرتضئ ومشمش اجوو يركضون عليه هو شالهم وضل يبوس بيهم

مرتضئ كله بضحكه...بابا هاي تتاوي تحابر دوول والله اعببك موت عليك ههههه

هو صفن من كلامه وعقد حواجبه ونزلهم من بين اديه وصاح بصوت عالي ....سجئئ

هي اجت تركض و وجهه مخطوف وامها وراها كلتلها...هاااا عمو

باوعلها لثواني ببرود وبعدها كلها...انطيني موبايلج

ردت عليه بخوف...هااا عمو ما بي شحن

جاوبته نوال بتذمر...علئ شنو تنطيك موبايلها هو شبي

هو باوع النوال ورجع باوع السجئ اشر الها بهدوء...جيبي موبايلج عموو لا تخليني اعيد كلامي

خلت وراحت بخطوات متردد وانطته اله كلتله...شوف ما بي شحن

اخذ الموبايل وخلاه بجيبه بدون اي نقاش وخله وطلع

اشو هاي نوال ضلت تصييح عليه وتحجي وتحجي بطريقه غير مباشرة...الله لا يوفقجن الله ينتقم منجن ان شاء الله حوبتي ما تتعداجن وحوبة هل يتيمه ما تتعداجن

حرضتن عمها عليها وذبيتن عليها صاحب وانتن كح...بس عندجن حظ وحضجن كاعد لو تكودن محد يكولجن علئ عينجن حاجب

اني عفتها ودخلت الغرفتي شدخلني هن وعمهن

ما اسمع اله هوووسه استغربت فتحت البرده واشوفها تحجي الجعفر وهو يتهدد

كعدت كلت ما الي شغل ما ادخل ابببد انوب صارت هووسه وهو يصيح يغلط ويتهدد فتحت البرده شفته لازم سجين وماما رضيه لازمته وتتوسل بي

اني ركضت قفلت الباب ومرتضئ ومجتبئ انرعبوا

وهو ضل يرفس بالباب ويصيح...بنت النعال بنت الزمال انتي تحرضين جاسر علئ سجاوي والله اليوم اله ادفنج افتحي الباب ادبسز ام الشوارع

ضليت صاكه بمكاني وما اعرف شنو اسووي ولا عندي موبايل واخابر عليه يجي ينقذني منه

وهو ما خله كلمه بحقي ما غلطها وضليت ارجف وابجي والله ابد مو بوعيه انوب يرفس الباب كل رفسه تطير كلبي من مكانه

انفتح الباب من رفساته وفتح الباب صرخت بصوت عالي من شفته هجم عليه بسجينته واني جنت ملابسه حجاب خليت الثوب علئ راسي وركضت واني لازمه اطفالي وهم يتصارخوون

وهو حصرني بزاوية الغرفه وعيونه حمر ويخوووف وهجم عليه بالسجيين....

نهاية البارت....يتبع

كونوا انتم كونوا بخير...احبكم 💔

نور سمو العراق 😘

لا تنسوا التصويت والمشاركه بكم نكتمل 🌹

الصور الطلحه اكييييد 😍😍😍😍😍 Talha-25-3

ترئ المقطع عجبني لا تسووها قصه وتكعدون تحللون 😬😬😬