رواية #جوليت وأسرها.... الفصل الخامس والسبعون 75 - بقلم الكاتبه سمو العراق

البارت الرابع عشر
رواية...جولييت واسرها...غياهب الإنتقام
بقلمي..نور سمو العراق

💔💔💔💔💔💔💔💔💔💔

ثكل جدمي
وصرت متعوب
وصرت ما انعرف كلش
صرت بسوالفي اتعثر
صرت دمعة بوجه عميان
صرت موضوع كلش صعبه يتفسر

....................................

دائما احس مشاعري مستهلكه وحتئ عقلي وروحي وحياتي وأفكاري مو ملكي

احسهم يملون نفسهم بيه ومن احتاجهم الكاهم مختفين محد يحس بيه...

أحس نفسي بزمن غربة الارواح للارواح اي روحي مفاركه روح امي

ودائما ارسم طوق النجاة الاهلي والف حبل الإعدام على عنقي

اي اني اليوم لفيت حبل الاعدام علئ عنقي ورسمت طوق النجاة الاهلي

وقررت اوصل التسجييل والتصوير للشخص المناسب...

رحت الماما رضيه لكيتها بغرفتها كعدت مقابيلها واني ابجي وانحب

هي جانت تضفر بضافيرها الحمر باوعتلي مستغربه...يمه اسم الله شبيج يجولي منو وياج ؟

نزلت راسي باسئ ومسحت دموعي...يمه الدنيا هي الي وياي يمه الدنيا عذبتني ما ارتاحيت بيوم وكل ما ارتاح يوم اعيش ايام برعب

تقربت مني،ولزمت اديه بحنان...الله يعينج يمه ان شاء الله ربج ما ينساج وشسوين هذا حضج من الدنيا

شهكت واني امسح بدموعي ورجعت لزمت ادين ماما بتوسل...ماما طلبتج فدوووه لا ترديني ترئ،والله اقتل روحي وكلهم انتم السبب

ضربتني علئ كتفي بحده...انجبي لج شنو تكتلين روحج اسكتي هذا مو حل احجي واني وياج

رحت اركض قفلت الباب وائمنت المكان وكعدت يمها حجيت بخفوت...ماما عندي موضوع وياج اريدج بس تساعديني بي ما اريد اي شئ منج بس مجرد تمشين وياي

عقدت حواجبها باستغراب...وين اروح وياج ولج معزايه

تنهدت ورجعت لزمت اديها بتوسل...ماما شوفي اريد اروح الشخص اني اعرف مكانه وانتي اريدج بس تمشين ويايه واني اوصل هل امانه للشخص

ردت بغضب...امانة شنو ويا شخص ولج انتي ليش تلعبين بالنار وتدرين بخيالج ما ينگحم ولج ليش تجيبين المصايب الروحج...

جريت نفس بخيبة امل...ماما شوفي،الصار هووايه عليه ولازم اخلي حد للصار واني واثقه من هل خطوه كل شخص حاربني لازم يتعاقب

وهاله تمردت هوايه ومحد يكدر الها لا ابو ولا اخوو ولا ام اني اذا سويت الي خططت اله مراح يصير شئ

باعي ماما عاصم تهرب الغير دوله وهل دوله محد يعرف بيها غير بيت عمي وبيت عمي الشيخ مهيوب

اذا هاله عرفت اخويه وين حتخليها بحلگ نوال ونوال تنطيها الجاسر وجاسر اذا عرف راح يضل وراه ومراح نرتاح

انتي تعرفين جاسر يجازف فليش يجازف بروحه وتصير الخساره خسارتين

خلي ما يعرف الدوله الي راح الها عاصم وبيت عمي الشيخ اكيد مراح يحجون ولا بيت عمي ابو هشام بس هاله تحجي واكيد هي حتنكر ودكول مو اني الي حجيت هاي نوال

بس نوال عرفت منها لذلك اني ما اخذ الذيل واعوف الراس لازم اكطع راس الحيه هوويله ونويله هي الذيل مراح احد ينطيها كلام غير هاله

جانت تباوعلي ومركزه بكلامي حسيتها اقتنعت كالت...اني يمه ما اريد جاسر يصير بي شئ واعرفه يجازف واخوج بعد سافر وين يلكاه اذا ما يعرف بيا دوله

تنهدت...اي مو هاله اذا عرفت دكوله وحيجازف واحتمال يفقد حياته او كووولشي يصير الاثنين بخطر هم جاسر وهم عاصم

هسه انتي بس امشي ويايه واني وداعتج ما اخليها بعد تفتح حلكها بحرف صدكيني

جرت نفس ...زين يمه منو هذا الشخص الي تردين تنطينه الامانة العندج وشنو هي الامانة

ابتسمت بخوف...شوفي ماما هو الكبير العام العشيرتنه اسمه كاظم ابن زبنون وبيته بمنطقة....

حطت ايدها علئ صدرها ...يمه بعيده اخاف انوب جاسر يجي وما يلكانه

جريت نفس...لا ماما شنو السالفه احنه ساعه نوصل وبسرعه انطي الامانه ونرجع لا تخافين

باوعتلي بحيره كالت...زين يمه ليش ما نگله ونروح؟يعني مثلا نگله رايحين للدكتوره أو الأي مكان

فتحت عيوني مصدومه...لا ماما فدوه انتي شتحجين ما تعرفينه جاسر ما تفوته واكيد حيراقبنه انوب اخاف يجبر عشيرتي يحجون الصار خلينه نروح ونرجع بسرعه

ضلت تباوعلي وبعدها كالت...مهيوب جان يگلي اذا طلعتي من دون علمي الملائكة تسبج من مكان طلعتج للمكان الثاني

حطيت ايدي علئ صدري...ماما ميخالف خلي تسبني الملائكه قابله هو اني شابعه مسبه وهذا عمل خيري اكيد محد حيسبني

ضحكت...بس ترئ ابو مرتضئ يموتج

هزيت ايدي...خلي يموتني هي فاتحه وخسرانه واني تعلمت علئ الكتل

كالت...ديله حضري نفسج وفضينه وجهالج اخذيهم وياج لان اذا ضلو هنا راح كل شويه ويسألون عنج ويفضحونح

واردفت بتساؤل...اكلج جاسر اليوم ما يجي من شغله موو يعني يبات

هزيت راسي بأي...اي ماما يبات واني حدخل الغرفتي عبالهم نايمه ولو هنه نوال وخاله ام فلاح لو اموت ما يدكن عليه الباب ويكولن وين راحت

ردت عليه...خوووش يمه دحظري نفسج وخلينه نروح

اني رحت بسرعه حضرت نفسي ولبست وبدلت الاطفالي جان دنيا الظهر بيها...

وماما رضيه حضرت نفسها وخلينه وطلعنه اجرنه تكسي و وصفنه للرجال واخذنه

اني ما جنت اندل بس اعرف مكانه وين بس لا رايحه اله ولا شايفته كلت اول ما اوصل المنطقته اسأل عنه وهم يدلوني

والله وصلنه وسألت واخذونه كبل عليه

وكفت بباب ديوانه تنفست من عمق الوجع وصنعت بارق الامل ...ياربي بلكي ينصفني هل،رجال يارب

باوعت الماما رضيه كلتلها...ماما خلي مرتضئ ومجتبئ عندج لان ذول فتانين واخاف يحجون الابوهم عن الشيخ...

هي كالت خووش،يمه بس لا تتاخرين فدوه اروحلج خلي نرجع بسرعه وبامان بعد امج

اني هزيت رائي بقبول وخليت ودكيت باب الديوان طلعلي ولد شاب مبين بكدي لابس دشداشه ومحدد ذقنه باوعلي باستغراب كال..تفضلي اختي

بلعت ريكي بخجل واني افرك باصابعي بخووف وتوتر كبييير وتنفسي حسيته انكطع باوعتله بحيره وهمست برجاء...الشيخ كاظم ابن زبون مووو هذا ديوانه

رد عليه بفخر...ابشري وصلتي اي هو ديوان الشيخ كاظم

قلبي حسيته يخفق بقوووه حطيت ايدي علئ،صدري وبلعت ريكي كتله ...اكدر اشوووفه اذا متصير زحمه

سوالي مجان كال...اتفضلي هو بديوانه

باوعتله بخووف وشك وهمست برعب...احلف هذا ديوان الشيخ كاظم وانت مو جذاب ولا تريد تخطفني

ضحك بصوت عالي كال...شبييج خووويه علئ،كيفج واهدي اي هو والله ديوان الشيخ وبعدين مو من نشيم ولد الشيوخ يخطفون اني احطج علئ راسي فوتي فوتي

دخلت واني اترقب المكان واتلفت تصدرت الديوان جان كبييير حيييل ويتصدره رجال كبير بالعمر والشيب تارس وجهه بس مبين صلب وقووي وحاد بملامحه

بلعت ريكي الجاف بغصه وجاوبته بعزم...السلام عليكم

رد عليه باستغراب...وعليكم السلام بويه تفضلي تفضلي جيبلها مي

كعدت بطرف الديوان قريب من الباب هو أشر اليه بحزم...تعاي اكعدي هنا بووويه ليش كاعده بطرف الديوان

رديت بخوف...لا شيخنا اني هنا مرتاحه الحمد لله

انطاني الولد مي شربت شويه وخليته مقابيلي باوعت للشيخ ببتسامه باهته...ما عرفتني موو ؟

قبض علئ سبحته الفاخره ورد عليه...لا والله يا بويه بلا صغرا بيج

نزلت راسي وتنهدت جاوبته بغصه...عمي اني منكم وبيكم اني شعره من شواربكم اني بنت ابو عاصم بنت كريم

وكف بصدمه بكل جبروته وباوعلي مندهش رد عليه بلهفه...هلا بووويه هلا ببنيتنه شلوونج تعاي بويه ابوج ابن عمي شلونج شلون عايشه احجيلي

بلعت ريكي مرار وتكرارا وحطيت ايدي علئ وجهي وبجيت ...مو زيينه عمي مو زيينه ابووي مات واخوتي وامي عافوني واني،بنتكم نسيتوني ومحد سال عني

رد عليه بحزن...بويه بينه دم ورجلج تعرفينا منين ما نجيبه يطلعلنه هسه احجيلي شلونج وياه...

تنهدت...لا عمي الحمد لله اني زينه بس يا عمي اني جايتك بطلب واريدك تحله الي

اشر علئ عيونه...عيوني الج يا بت كريم انتي تدرين باخوج ما ميت بس احنه هربناه

ابتسمت بفرح...اي عمي ادري وفرحت حييل بس يا عمي زوجي عرف ومتخبل

بهتت ملامحه وباوعلي بحيره كال...منو الكال اله عن اخووج وشلون عرف

وكفت بحزم...عمي اني جايتك وطالبتك واريدك ما تردني تعرف بيه لا من اليطلعن ولا من المنافقات ولا من الفتانات مثل ابوويه وزياده عليه

ويا عمي الي اعترفت عن اخويه وخلت زوجي يقتله هي بنت عمي هاله هي السبب

فتح عيونه مصدوم من كلامه وهو قابض علئ سبحته بحده...بت ابو هشام

هزيت راسي بتأكيد...اي عمي هي هي السبب سوت اشياء ما يستوعبها العقل

صفت ويه زوجي بصفة ان هو ابن خالتها وانطته كل معلومه تخص اهلي وزوجي جان يلاحق اخوتي بمساعدتها

وبعدها خطف حازم واني الي نقذته منه وهي الي،قدمت اله حازم بطبق من ذهب

وبعدها صار المشكله بسببها وزوجي قتل اخويه ومن عرفت اخويه ما ميت طشت الخبر

حسيت عيونه طلعت من مكانها كال...افااا احنه النسوان تلعب بشواربنه يا وسفة الوسفه شلون ابو هشام ساكت عنها والله احط ضهرها علئ علوه ونصه واكسره هاي عار علينه التقدم ولدنه للعدو عار علينه

واردف بقهر...هسه تنكر بس اكيد احلفها

ابتسمت بحزن...عمي من تريد تحلفها راح تحلف جذب لان هي ما اجت هل مره وشهدت عن اخويه مباشرة الزوجي لا

هي انطتها الزوجة حماية الي انقتل وهذيج هي الي حجت

عقد حواجبه باستغراب ...شلون بويه ؟

طلعت الموبايل وانطيته التسجييل هو سمع اله وشد علئ شفايفه بعصبية...

رجع انطاني الموبايل كال...خوووش بسيطه اذا ما ادبناها لهل عار ما اطلع شيخ كاظم

نزلت عيوني بارتباك...عمي بس،كولها لا دكول بأي دوله موجودين اهلي لان هسه موضوع ان هو ما ميت انفضح بعد ضل بس بيا دوله موجود

حط ايده علئ صدره بعزم ورد عليه...لا عمي احنه عاصم بلعناه وما ننطي لو شيصير والفضح سرنه يتعاقب

ولو تجي عاصم من الله انريده من بنت ابو هشام واحنه نعرف شلون نتصرف وياها

وانه هسه ادز علئ ابو هشام وافراد العشيره ونقرر شنسوي وياها هي وامها

بلعت ريكي بارتباك وتوتر وخووف...عمي لا تجيب طاريي ولا دكول اني الي اجيتك لان والله اخاف من زوجي وانت بعد تعرفه

ابتسم ورد عليه بهدوء...لا تخافين عمي لا تخافين اسمج ما ينطري بالديوان واخلي اديج ورجليج بماي بارد

ونعم منج انتي اخت عاصم الما ترضين تنطينه للموت ولا تردين تورطينا وتورطين زوجج

ابتسمت وسلمت عليه دا اطلع ودخل مرتضئ ورضيه تركض وراه شايله مشمش من شفتهم انهبطت من الخوف

اول ما دخل وكف ورفع ايده كال...تلام عليتم ستو

الشيخ ضحك ورد عليه...وعليكم السلام هلا بيك والله ابن منو هذا

ضحكت بحيره وخوف...هااا هذا ابني  هم ثنينهم ولدي

هو باسهم كال...والله والنعم منهم

خلينه ورجعنه ولزمنا ازدحام مو طبيعي واني جنت افرك باديه صار دنيا اليل واحنه ما وصلنه

ومجتبئ يصيح ...السرطي يالله حلينه امسي لا حلي بابا يتتلك بددس...« الشرطي يالله خلينه نمشي لا اخلي بابا يكتلك بالمسدس..

مشه السير وهم كل سيطره نفوت منها وصاحو...التلام عليكم...

بعدها وصلنه لحد منطقتنا حمدت الله وشكرته بس جنت خايفه اخاف الكه جاسر وهنا المشكله...

يارب كووون ما موجود....

..........................

وقار...

جاسر گلب البيت گلاب وجان متوعد بجولييت بس،الي اثار انتباهي ان جوولي مو الوحدها مو هنا لا هي ورضيه

استغربت وين يكون راحن هي ورضيه وترئ حييل اتاخرن معقوله رضيه هزمتها وانهزمت وياها

استبعدت الفكره لا مستحييل مو معقوله رضيه لا يمكن تسويها بس حييل اتاخرن

لو رايحات الكربلاء مو هيج يتاخرن

جعفر جان كاعد وبصفه سجاوي تلعب بموبايلها رد بعصبية كال...طبعا هاي جولييت ينراد الها واحد يذبحها ما يصير هييج وحده كلش مستهتره

مو صوجها صوج جاسر ما ذبحها من انهزمت من اول مره

جاوبته نوال وهي تلوي بشفايفها...اي والله كلامك صحيح بس حض العواهر جواهر وهاي عاهره بس حضها جوهره انوب مشتري الها بيت الوحدها حتئ تكعد تكود من وراه ههه

رفعت عيوني بملل ونفخت بضيق...اهوو انتي صدك تحجين هي منيلها حض هل مسكينه هي هاي حضها يدولب بيها

امي ردت عليه كالت...لا والله صدك حضها كاعد هل مره اذا ما ذبحها اني اذبحها بيدي مدري وين اخذت رضيه المسكينه وكعدت تهبت بيها

جاوبته بسرعه وتذمر...يجوز راحن للمضمد للمستشفئ لفد مكان ليش كبل سويتنها انهزمت

رد عليه امي...طلعت من دون علم رجلها وهذا خطأ بحد ذاته هي بت بهيه من البدايه ما ردتها ولا عجبتني بس صووج اخووج

شوفي هسه من وراها مات ابوج واخوج وماتت بت جاسر

واخوج كتل اخوها وتبره من بيت عمه انوب يريد يكون عشيره وحده وهو بيت شيخ مطشر

جعفر ضحك...شلون شيخ هذا مطشر شوكت يلمونه هههه

اني سويت...نننننه بايخه ما تضحك

صاح بيه بصوت عالي...انجبي لج طاح حضج ما عندج تربيه

نوال كالت...هي الي تدافع الجولييت شتترجئ،منها

صفنت عليها ورفعت حاجب رديت عليها بحده...رجاءا انتي لا تتدخلين ولاتحطين علئ الحطب نار احترمي نفسج واني وبنت خالتي،الحمد لله ما بينه شئ واخلاقنا سابقتنه

عاد هي انلصمت علئ حلكها وكتفت اديها ودارت وجهها ما عاجبها الكلام...

وسجاوي جانت تكتب بسرعه وتتبسم وتضحك وبعدها خلت وانهزمت الفرفة امها

شكين بيها عندها شئ امرها مو طبيعي ولا خاليه هل بنيه كل بسبب امها هاملتها وعايفتها بدون تربيه وانوب تجي وتحجي بالتربيه

مثل ابليس يعلم ولده للصلاة وهو ميصلي

شويه ودخل جولييت هي واطفالها وماما رضيه بس شنو وجهها مخطوف

وهي كلها هجمت عليها بذاك الكلام من امي ومن جعفر ومن نوال

وجاسر جان كاعد بغرفته من سمع الضجه فتح باب الغرفه وباوعلها اشر الها باصابعه ...دقيقتين الدقيقه الثالثه اذا ما اجيتي ما تلومين اله نفسج....

............................

اول ما دخلنه وهم تلكونه مثل الوحوش ...وين جنتي ووين جنتي اليوم جاسر يذبحج اليوم يموتج

خلوني اطك رجل برجل من الخوووف والرجفه الي اعتلت كل جسمي ماما رضيه ردت عليهم بكذب...هو شنو وين جنه جنه بالدكتور وتاخرنه

جاوبتها ام فلاح بغضب...يا دكتور هذا لا بيدجن علاج ولا بيدجن تحليل شفتينه سود عبالج هنود تردن تضحكن علينه

ونوال جاوبت بضحكه....ههههههه اي والله يردن يضحكن عليه

عاد ماما رضيه تخبلت عاطت بيها بعصبية...وانتي شدخلج تحاسبيني لو شنو ولج نويله اتقي شري واحترمي نفسج احسن الج

جان هي الخبيثه دكوله...اكولج رضيه انتي علئ،شنو كاعده هنا اشو لا عندج دادا ولا ماما واذا علئ مهيوب مهيوب مات من زمان

ماما جاوبتها بصدمه...تطرديني؟

جعفر وام فلاح ما قبلوا علئ كلام نوال ورزلوها وهي خلت وراحت وماما رضيه ضلت تبجي وخلت وراحت الغرفتها....

والبقيه استلموني واني جنتي وين رحتي والرزايل بفلس

هو طلع من غرفته كال جمله وحده ودخل ...

عاد اني ضليت ارعش من الخووف والارتباك وخليت ورحت اركض

فتحت الباب ودخلت للغرفه باوعت عليه كاعد علئ القنفه باريحيه وهو يدخن

قتلتني هيئته وصورته...عزة شموخ كبرياء جبروت انتقام خبث كل الصفات متجمعه بملامحه الجباره وكيانه المتعجرف

وكفت مقابله مثل سجين ومنتظر عقابه...

واكفه بحضرته منكسره وثنايا الانين تهشم باعظائي واطراف الوجع مدا تصبر عني

رفع راسه ببرود وجكارته بيده ركز عليه ثواني كأن يدرسني او يبين حقيقتي قلص عيونه وتكلم بنبره بارده...وين جنتي مدام حاليا الساعه بالتسعه واني اجيت من السته

رمشت بعيوني وبلعت ريكي بغصه رديت بنبره خايفه...بالدكتور

ركز عليه ورد بهدوء وهو يطفي جكارته بالنفاضه ...بدون جذب

هزيت راسي برعب...مدا اجذب

وكف ومشئ خطوات واسعه صار مقابيلي واني رجعت بخطوات خايفه بس ما ابتعدت عنه ما حسيت غير براشدي شوهه معالم وجهي ..

صرخت وتماسكت حطيت ايدي علئ خدي وباوعتله مهضومه وهو باوعلي بكل عصبية

رجع لزمني مره ثانيه ولزم فكي بعنف كال بغضب...احجي ويين جنتي لا اكسرج هسه تكسر بالقران

رجفت شفايفي وانذبح عندي الكلام ومن كثر القلق ما عرفت شلون احجي الساني التوه...اءء مم مااا اني

جنت بعدني لايسه حجابي جراه مني حييل الدنبوس طك وجرح ركبتي

صرخت بصوت من الدنبوس لزمت ايده هو دفع ايدي و رجع لزمني بحده وصرخ بوجهي...احجييي وين جنتي لا بالقران هسه ادفنج وانتي عايشه

صرخت بوجهه بعد ما خلصت نفسي من قبضته...انت شتريد مني شترييد ويين جنت يعني رحت اني وماما رضيه بشغله

حط ايده علئ الحايط حاصرني بيت وحده ورد بغرور...وشنو الشغله بدون زحمه ؟

باوعتله بخووف...هيج شغله نسائيه

سحبني من صايتي بخده حسيت طرت بيده زمجر بغضب عارم...ولج ادبسز تضحكين عليه لو شنوووو بالقران اليوم موتج علئ ايدي تحجين لا اخليج هسه تبجين دم ...

باوعتله بعصبية والدموع ماخذه مجارها علئ محاجر عيوني صرخت بوجهه...يالله ادفني ياااااااريت ياريتت مليييت والله مليييت لك والله صرت اكرهكم كلكم يااااريت امووت واخلص منكمممم

عاد هو ضربني بضاهر كفه علئ حلكي وصاح بوجهي...انلطمييييي لا تصيحيين لا تعليين صوتج ولج ادبسز والله انتي بدون تربيه واني انطيتج مجال هوووواي

والله اذا ما ربيتج وخليتج تمشين وتتلفتيين ما اطلع جاسر

ولج انتي،ضاله تلعبين من وراااي تف علييج وعلئ تربيتج ولج تتفقين انتي وابن عمي عليه بسيييطه اذا ما ندمتج ما اطلع جاااااسر

ولج هسه تبين الي،انتي وحده بدووون اخلاق

صرخت بوجهه بحده وانهيار.....لا تحجي علئ اخلااااقي لاااا تحجي انت منو وتجيب سيرة اخلاقي والله اني اشرف من الشرف

باوعلي وهو يرسم ابتسامه شامته علئ شفايفه...ماكووو وحده شريفه تسوي سوالفج هاي سوالفج بس السااااقطه تسويها

فتحت عيوني مصدومه من كلامه ومن ادعائه الكاذب رفعت ايدي بحدددده وردت اضربه بس هو لزم ايدي بقوووه ولفها وره ضهري ولوها

صرخت بصوت عالي وضهري صار علئ بطنه انحنيت من الوجع

ضغط علئ ايدي حييل وشد علئ اسنانه حسيت ايدي ماتت من الوجع حط شفايفه قريب من اذني وهمس بفحيح مرعب....هاي ايدج اذا انرفعت عليه مره ثانيه والله اعلكها بركبتج

ضليت اتلوئ،من الوجع بين اديه واريده بس يفك ايدي ما قبل

ارتعش جسمي،بين اديه واديه تعوجت اهتزيت بقووه وكعت علئ الارض واني ارعص بالارض البارده

واسناني صكت من الوووجع

هو من شاف حالتي هييج كعد ركبه ونص وفتح اسناني،بقووه باصابعه

ما جانت عندي طاقه ادفعه رفعني وشالني خلاني علئ السرير وانطاني حبايه

ما كدرت اشربها ...من هدئت شووويه

هو اخذها وشربها اليه غصب عني دفعته وحطيت ايدي علئ شفايفي وركضت للحمام جبرت روحي اتقيئ الحبايه وكل شي جنت ماكلته

باوعت الوجهي بالمرايه رمشت بعيوني شصاير بيه شمسوي بوجهي شفايفي تنزف دم وخشمي ينزف

وخدي صاير ازرك علئ احمر متشوهه وين جولييت الحلوه متغيره حييل متغييره

اوووف يمه اووويلي علئ حالي ما ارتاحيت والله

ولج يمه فدوووه حسي،بيه تعالي شوفيني اريد اشكيلج من نفسي اريد اشكيلج منهم حتئ بعرضي طعنو والله يممه انتي ليش ما تحبيني

والله مو عار عليج والله اني بنتج الغاليه اني نبض گلبج راحت روحي بغيابج يمه

ردت اطلع من الحمام سمعته يحجي ويه مرتضئ ومجتبئ وهو يكولهم...وين رحتو انتو وماما وبيبي رضيه

هم ردو عليه بعدم تمييز...لحنه لستو ابو سابر ...رحنه الجدو الو جابر

اني خليت وطلعت ولا حتئ باوعت بوجهه صارت عندي ردة فعل كووولش قووويه خفت منه حييل

ايدي مدا اكدر احركهه من الوجع موتتني و وجهي احسه ناااار من غير الدوخه والغثيان الي صابني من راشدياته

حطيت ايدي علئ گلبي المتعب الي يخفق بقسوه ..يكلوله جنه عند جدو ابو جابر بس لا يروح يتعارك وياهم ويه بيت ابو جابر

هم اطفالي ما ميزو ابو جابر لان نفس هيئة كبير عشيرتنه....

وانوب اخاف ماما رضيه تعترف عليه بس ماما متحجي ابببد اني اعرفها

وكالت اذا سالني وانفضحنه اكله روح اسأل جولي اني مالي شغل....

نمت علئ فراشي والغصه تجرح بصدري والدموع ترافق عيوني

حطيت ايدي علئ بطني واني ابجي ارييد ارتاح ملييت

بعدها ابتسمت بمرح...رغم هاني جاسر بس والله اليوم السويته ريحني اهم شئ الكل يعرف هاله شنو والمهم بعد يكصون اللسانها ويطيحون حضها

جريت نفس شكد ما اريد احسن علاقتي،وياه تتازم اكثر والصار اليوم مو بس ازم علاقتنا لا محاها ودمرها...

خلي اني بعد ما اريده خلي،يطلع من حياتي

واني من سابع المستحيلات اسافر الاهلي اولا اولادي هو ما يقبل اخذهم واذا اخذتهم حضرر اهلي اكيد

وهو من خلاني اسافر مجان يعرف بعاصم عايش لذلك اليوم اتغير عن ذاك اليوم

واني هماتين ما اكدر اروح اسافر الهم كرامتي ما تسمحلي لان السووه ويايه ابد مو قليل هم باعوني وتركوني وضحو بيه ...

بس احب اشوفهم مرتاحين

اني اعتمد علئ نفسي ولا جاسر ولا اهلي اعيش النفسي وهذا افضل حل...

.........................

شهد...

جنت كاعده بالدكان دا ابيع حلويات واكل مدري شبيه متخبله علئ الحلويات اكل واضم بالبقايا مالت الحلويات بالزبل...

اجه واحد يشتري ضل يباوعلي بنظرات سخيفه هو يخووف شعره سيم مواعين ولحيته  واصله لحد خده واسمر طوووخ يخووف

ضل يباوعلي ويتغزل باوعتله بعصبية...كبر شبيك ما تستحي

رد عليه بذوبان....شلون استحي واني اشوف الخوخ كدامي

هزيت ايدي...خواك البين وركعك چيلتيين علئ كولة خالتي صبريه امشي ولي منا لا اصيح ابويه عليك

جاوبني وهو يسوي حركات سخيفة...وينه ابووج اريد اخطبج منه

صحت بوجهه بغضب...شبييك انت ما تستحي كبر حتئ كبر اني متزوجه وحامل

رد بخبث...ميخالف اني اموت علئ المتزوجات

ما اشوف اله الولد تكوم علئ الارض وصاح بصوت عالي وهو متاذي من الضريه

تفاجئت شبي هذا وكع مديت راسي،من شباك الدكان واشوف جعفر لازم بطله ويتهدد عليه ...لك كووواد ساقط تحجي ويه بت عمي اني واحد يتعده علئ مرتي

هزيت راسي باسئ هم سكران جعيفر شلون بي هسه كون اخابر جاسر والله اله اخلي يموته

طلعت اركض بره والعالم التمت وهذا الي انضرب ضل يتهدد علئ جعفر والعالم واكفين حواجيز بنصهم

اني سحبت جعفر منهم ودخلته للحوش واني اضرب بي وهو دخل وكل شويه واخذله مجعه من بطله

كال بدووخه...اليوم اموووته هذا صلاح ش شا شايف رر روحه عليه ويغازل بمرتي اني شش شفته بعيني

ضربته بقهر...يا صلاح يا مرتك شبيك انت تخبلت

لزم اديه وهو دايخ...اني حيييل احببج شش شهد شووكت نتزوج خلينا ننهزم اني وياج ونسافر

دا اسبه هو حط ايده علئ شفايفي...لا محد يكتلج ويغسل عاااره اني راح اتزوجج انتي راح تكونين خالتي يعني حلال

هزيت ايدي خرب بالحظ اي والله هو هذا حضي

كتله بغضب...ترئ اني زوجتك زوجتك

حضني بفرحه...صدك لا لااا انتي جذاااابه انتي جذابه ما متوقع اني وياج تزوجنه

ابن عمج النهئ عليج كتلته ايي ايي اتذكرت هههه

شفته وعدتج ووفيت بوعدي بعد منا وهيج تغنيلي كله..وقووولي احبببك حتئ تعرض ضحكتي احببج بت الكلب

سحبته وكعدته بالحوووش وهو كعد يغني ...هزي هزي هزي خصرج وهزي طوولج وتعاي اركصي

مدري شيغني ومدري شنو يحجي كلت اخابر جاسر واخلي يذبحه بس استغفرت ربي

انوب بس من يسكر يجيني ويصير بس هو وبس يضل ما يعرف امه من ابووو

خابرت هلئ صلاح لان صلاح اهدئ من اخوو كلت حتئ ما افتعل مشاكل...

خابرته وهو خطيه نص ساعه واجه لكه جعفر شويه صاحي ضل يرزل بي وبعدها اخذه وراح....

تنهدت بضيق شلون بي هذا شصاير وياه مو طبيعي هو مو ترك الشرب هسه شبي ليش رجع عليه

عساها بحظج وبختج يا نويله يا زماله....

...............................

ريهام...

طلعت من المستشفئ بعد ما يأسوأ من حالتي بس اني ما يأست من رحمة ربي اببد واملي جان بربي كبير

جنت بالبيت كل شويه وتجيني جوولي رغم هي حالتها اصعب،من حالتي لان جاسر متخبل عليها

وحتئ ما يباوع بوجهها وخطيه محاربها بعيشتها بحيث يفتعل مشاكل حتئ لو بس يصيح بالبيت

يخليها تردم بالبيت ردم وما تعرف وين تنطي وجهها بي طبيعه من يخبث يكره الواحد يعيشته

اني حالتي تعبانه حييل بس ما حبيت اروح الاهلي حبيت اكون هنا

ذاك اليوم اجه صلاح متعصب لان هذا جعفر سكران وثاني يوم من صحئ تعارك وياه ونوال تخبلت شلون رايح البيت شهد

وتعاركت وياه وهو يحلف ما رايح الها بس صلاح شهد عنه

جان هي ضاجت ضلت تباوعلي مدري شلون لان كلتلها هي هم زوجته وحامل واذا راح الها

ردت عليه بخبث...اذا انتي تقبلين بالزوجة الثانيه لعد خلي صلاح يتزوج عليج لو عليج حرام وعلينه حلال

رفعت حاجب...وليش يتزوج عليه زوجي يحبني ويحترمني واني احبه ماكو فد خلل يخلي يتزوج عليه...

جان دكول...ليش يمه ماكو خلل اول شئ انتي بعد ما تخلفين ومستحييل تخلفين

وثاني شئ ما سألني نفسج انتي ليش الدكتور طلعج من المستشفئ،وحالتج ما تسمح

ضليت صافنه عليها وگلبي رجف من كلامها بس ماجاوبتهل علئ تساؤلاتها

ردت بضحكه خافته...لان انتي ايامج معدوده وما ضل الج شئ وتموتين

حسيت بزلزال زلزل روحي ابتسمت بحزن...انتي مو رب العالمين حتئتقررين شوكت اموت يجوز انتي تموتين قبلي الاعمار بيد لله

جاوبت بفزع...تف تف تف اسم الله اسم الله يومج قبل يومياني انسانه مظلومه وصاحبة يتامئ اله انتي من تموتين منو وراج

وبعدين اكولج انتي جايه تحاسبيني اني شدخلني هو الدكتور كال انتي ايامج معدوده قابل اني جايبه هل كلام من جيبي

وهاا حبيبتي لا عبالج اني اكرهج بالعكس اني ادعيلج وانتي غايبه لان اني مو خبيثه حتئ ادعي علئ العالم

بس عفيه كلي الصلاح خلي يكف من بناتي ولا كل شويه وفتش موبايلاتهن

ترئ جعفر هو المسؤؤل عنهن واني مسؤولة عنهن والله اذا صلاح ما كف من سجاوي واخواته والله ترئ اكلجيها بصراحه تصير كاتل ومكتول

لان جعفر والله متحلف بيكم ويكول اي واحد يشك بسجاوي ويفتش موبايلها اشك حلكه

فاحجي ويه صلاح وكفونه الشر وان شاء الله تطيبين يارب وما يتحقق كلام الدكتور من كال كم يوم وتموتين...يمكن كال بعد خمسة ايام

احس كلامها فورني شعل النار بصدري بس ما عندي طاقه الها والنقاشها

مشيت الغرفتي واني اجر ثياب اليأس والقهر...

شمرت روحي علئ سريري واني ابجي بصوت عالي ياربي رحمتك ياربي انت الشفاء وانت العجيب وانت الرحيم ...اريدهم يتعجبون بشفائي

ياربي بحق عليل كربلاء تشافيني ولا تخليهم يتشمتون حتئ بمرضي وموتي

اعرف الموت مابي شماته لان المووت حق وكلنه نموت بس هل انسانه قهرتني انتي كفيلي يارب بحق مريم العذراء اريدك تشافيني

رحت توضيت وصليت ركعتين قريت قران احب سورة مريم دائما ارددها

نمت علئ سجادتي ومن بين احلامي جنت واكفه واني لازمه ورقه بيضه بيدي ومطبكه باحكام و واكفه بباب

والباب جانت العالم لازمه عليه سره واني واكفه علئ صفحه وخجلانه ومستحييه حييل

وطلع منه رجال ضخم حييل و موزر بعلك اخضر وبصفه مره لابسه ابيض بابيض ...بس ما شفت وجهم

صاح عليه كال...تعالي ريهام انطيني ورقتج خليني اشوف حاجتج

انطيته الورقه واني مترقبه بخوف باوع للورقه وكال...وين علتج يا ريهام

اشرت علئ ظهري

هو نزع العلك الاخضر وانطاه للمره كلها شدي علئ ظهرها

هي المره ربطته علئ ظهري وشدته حييل كالت...ريهام هاي ثاني مره نجيج بعد ما نجيج ولا تجينه حاجتج انقضت بأمر ربج...

دارتني علئ ضهري وكالت...يالله روحي وحافضي علئ العشره الاخذتيها وبعد لا تلتفتيين امشي بزودج

خليت ورحت اركض وامشي ملهووفه وخايفه ولازمه العلك بيدي...

فزيت من الحلم مرعوووبه وخايفه رغم الحلم حلوو وما بي شئ

حمدت ربي واثنيت عليه وكملت قراءه قرآن...
ضليت كم يوم حسيت نفسي زينه وما بيه شئ رغم كالو ايامي معدوده مرت الايام طبيعيه

وصلاح من شافني جان فرحان بيه ومترقب حالتي رجعني للدكتور

سويت فحوصات كامله وتحاليل وسونارات

انطيتهم للدكتور هو باوعلي وابتسم كال...ريهام شمسويه

جاوبته بارتباك...ليش دكتور شكوو

رجع باوع للتحاليل كلهم وضل يقلب،بيهم كال...ما شاء الله ما شاء الله المرض مصفر والدم صاااعد ونخاعج اصحئ من نخاعي انتي هاي معجزه معجزه بابا تعرفين شنو المرض انمحئ منج ؟

فتحت شفايفي مصدومه والدموع غلبت عليه من كلامه باوعت الصلاح الي سابقني بفرحته

سحبني وحضني واني ابجي وهو يحمد بربي ...الحمد لله ياربي الحمد الله ما خيبت ضني الك الحمد والشكر

رجع كال...الدكتور بعد ماكو حاجه تاخذين اي علاج اتركي اي علاج يتعلق بهل مرض اسجلج بس وقايه مارسي حياتج طبيعيه وخلي زوجج يتقرب منج

اذا صار عندج طفل اعتبري المرض بعد ينقتل نهائيا افتهمتي بابا وكل فتره راجعيني اباشر حالتج

ابتسمت واني اهز راسي بأي وفرحانه حيييل وصلاح حاضني ويبوس باديه

كلنالهم اني طبت من المرض خطيه الكل فرح وابويه ذبح طليان و زعها علئ الفقراء

وصلاح ذبح بس عزم اقاربهم وسواه ثواب لوجهه لله تعالى

الحمد لله يارب ما خاب من لجأ اليك الحمد لله ياربي دكيت بابك وما فشلتني الف الحمد لله والشكر

........................

جولييت...

هاي الايام احسه مثل الصباره كل يوم تنولد شوكه جديده

ديحاربني احسه حاقد عليه بس نظرات عيونه تزلزلني متخبل من روحتي كووولش متخبل

ماما رضيه ابد ما انطته اي مجال ضدي و مجتبئ ومرتضئ يكلوله رحنه الجدو ابو جابر

هو رايح سال عمتي ام جابر وهي كلتله لا اببد والله ما اجتنه وهو يعرف اني ما رحت لابو جابر

هذا مرتضئ  ومشمش مو يشوفون ابوهم ميحجي ويايه وبس يصيح ونوال تفتر عليه حيطلكج حيطلكج

هم كل شويه وراحو الجعفر وكلوله...دعفر ابو القيور ابو قلق امي ...« جعفر ابو الطيور ابوي طلك امي »

صدك ضحكت عليهم بيومها ولا يكعدوون

وراحو جابو الديج من الجيران ويركضون وراه بنعال يردون بكتلونه لان شرد منهم وراح عند الجيران

اذا مشمش،يكوله بعصبية...والله عفففك ليس روح بيت عمو هااا

طبعا مجتبئ عالجناه هو يمشي عادي بس شويه رجله اليسرئ يعرج منها وبمرور العلاج يطيب منها اكد النه الدكتور

بس ضلت عنده الفتحه الي بقلبه هم كالو لا تخافون عليه ان شاء الله ما بي شئ

الحمد لله من طاب نوال كله تصيح عليه المعوق

باوعت عليهم وهم يركضون لزموا الديج ونزعوا نعالاتهم لبسو النعال

مرتضئ يكوله بتفاهم...عبيبي لا امشي عافي اقب دزازه بجرك...حبيبي لا تمشي حافي تطب كزازه برجلك

هو الديج بس يريد يخلص روحه منهم وهم لازمي ليش ما نكر مجتبئ بحاجبه وهو ضل يصرخ

ركضت عليهم واشوف الدم ينزل من حاجبه بس قليل والديج شمر نعالهم وانهزم

ومرتضئ يركض وراه ...نعله ابوووك والله عفك اليوم ليش عفيت احويه ...

ومجتبئ يريد يفرغص نفسه مني يريد يروح يعضه ويكولي...عوفيني سكيته لا اعفج

خلص نفسه مني وراح يركض

دخل جاسر وهو بقمته غضبه باوعلي بجبروت كال...تعالي بسرعه

اني من كال تعالي حسيت كل جسمي مات بس قويت نفسي وخليت ورحت ...

باوعلي بجمود كال...ذاك اليوم من طلعتي من دوون علمي ويين رحتي

بلعت ريكي بقلق وهمست واني الزم بطني ورجليه ترجف...للدكتور

رد من بين اسنانه ....لاااااا رحتي الشيخكم كاظم ابن زبوون

رمشت بعيوني وكلبي يخفق بقووه بلعت ريكي المر برعب ومجاوبته

كال ...شعندج رحتي اله وبأي دوله عااااصم

هزيت راسي بنفي

هو صرخ بوجهي بصووت غاضب...احجيييي

حسيت بشئ دافي نزل عليه تجاهلت كلامه الغاضب وباوعت الثوبي شفت الدم صرخت بصوت عالي...يممممه شنوووو هذذذا دمممم دممم

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسو التصويت والمشاركه بكم نكتمل

للاسف ما كدرت اسحب كل الصور من التلي لان النت ضعيف عندي حييل مشتركه علئ الرصيد واكيد الصور من ابداع طلحه 😍😍😍