رواية #جوليت وأسرها.... الفصل التاسع 9 - بقلم الكاتبه سمو العراق

البارت السادس
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔
ف

الموت أصبح كالظل يتبع خطواتي المتعثره.
إن لم يكن قد اقترب من حبل الوريد. إلى من التجأ؟ . إلى القريب الذي رماني في أتون النار هاربا بالنفس.
ام الى وحوش قد استلت حرابها لنهشي وطعني حقدا وقهرا وضلما ليطفؤ نارا تلهب بالحشا وجعا..
ماذنبي انا؟ في كل هذا الجحيم. اذنبي أنني أنثى في عالم متجبر لايرى فيها أنني بشر.
بل لها دور البطوله في إرضاء سيدها كجاريه.ولها كل الحقوق في قتلها ثأرا للشرف المزعوم عندهم. فبالله عليكم افتونا في الشرف الذي يجب أن تراق على حروفه الدم.. هل كان ايه في القرآن؟؟
هل كان حديثا لرسوله الكريم؟؟
بل هو قربان لشيطانكم الذي دوما بالدماء ينتشي الظلم عندكم عاده والصفح شيئا منكرا

الخاطره للمبدعة..Mnmn78

........................

رجف من البكاء هذا طريقي وياه بائس،لازم انهزم واطلع من حدود العتمه الئ دخلني بيها

اني،غبيية غبيية شلون اامن بواحد من رجاله شلون اخلي ثقتي،بي

ياربي حزني فاق حدود السماء وخوفي تعده جبروته وقساوته انطيني شوويه قووه

جااابر يا خاااين ليييش،هيج سويت بيه والله ما راح اساااامحك ليش غدرتني

حطيت ايدي علئ شفايفي،واني ابجي برعب

طلعت رقم جابر برعشه محتله اصابع اديه اتصلت بي واني منتظره رده

ثواني وفتح خط ورد بصوت مليان نعاس.  هااا جولييت صاير شئ

صرخت بوجهه بقهر وبكاء...ليش،جاااابر لييش ..ليش،هيج سويت بيه ليش دليته علئ مكاني،ليش تكرهوني ليش ماخذين دور المظلوم والظالم

رد بلهفه وهلع ...شنووو شلون جج جااااسر لكاج اجه ياخذج؟

رجفت من كلامها ورديت بنحيب... دزلي رساله وكاتب اني جاسر ابن مهيوب العلي

لييش مو امنتك علئ حياتي وحياة طفلي مو حلفت ما تاذيني مو حلفت ما تستغلني ليش غيرت رايك ليش تكسرني ليييييش؟

جاوب بسرعه وقهر...والله العظيم والله العظيم ما كتله ولا حجيت شئ،وبعدين هذا الرقم قديم وكتلج الموبايل قديم يعني عادي واذا راسل

كمل بلهفه.. باعي جولييت لا تخافين عادي تصير ردي عليه برساله

بلعت ريكي واني امسح بدموعي.  شكتب؟

جر نفس برهبه ...هو شنو كاتب؟

مسحت عيوني الي مليانه بكمية كبيرة من الدمووع رجفن شفايفي بقسوه واحسه ميفتهم كلامي من شهكاتي ..ككك كاا كاتب ااني جاا جاسر ابن مهيوب العلي...

نفخ بضيق وجر نفس كال...ليش كاتب اسمه الكامل قابل شنو اني ما اعرفه هذا عنده منوال برأسه باعي جولييت لا تردين عليه واكسري السيم كارت وخلي،صبريه باجر تجيبلج واحد جديد

حسيت لساني انربط والكلمات تلاشت مسحت عيوني من الدموع وكلبي يخفق بقوة حسيته حيفلش القفص الصدري وينتفض ضد جاسر

رديت برجفه وهداوه شوية...يالله هسه اكسره بس،فدوة حتئ لو يجبرك لا تحجي شئ عني

رجع رد بسرعه ...انتظري جولييت انتظري شووفي لا تكسرين السيم كارت اكيد راح يشك اكثر لان راح يطلع عنده خارج نطاق الخدمه

بجيت بحيرة...لعد شسووي جابر لا تحيرني اكثر تعالي رجعني الامي ما اريد اضل هنا فدوووه فدوووه ...تحطمت والله والله احس الموت محاصرني ..

رد بتفهم وصوت حزين...جولييت والله لو اعرف مكان اهلج جان اخذتج بس همه اختفو ومحد يعرف وين ...ادري بيج تعبتي وهو تعبان اكثر منج والله

تدرين اني ما راضي علئ طلعتج وطلعتج غلط بغلط انتي كسرتي كل حاجز بينج وبينه و دمرتي نفسج ودمرتي

ترئ والله صعبه عليه مرته تنهزم منه وهو يعرف اهلج ماكوو وانتي ميعرفج وين التفكير اكل مخه وين راحت ويمكن واحد اعتده عليها ويمكن يقتلوهاويمكن يستغلوها والف فكرة براسه ارحمي خطيه...

اختنكت بعبرتي وخاطري مكسور منه وعليه أنين صوت حزني علئ نفسي بجيت علئ روحي الحزينة شكد مجروحه هم عليه وهم مجروحه منه

همست بصعوبة...جابر ما شفتني من شفت اسمه موجود بالرساله شلون روحي انهزمت مني شلون حاوطني الموت وقيدني تهسترت وانهرت حيل والله.

جر نفس...الله يساعدج بس غلطتج هي من طلعتي ربي يحنن كلبه عليج

بلعت ريكي بصعوبة ...جابر لا تخوفني اني،من خوفي انهزمت اعرف محد راح يرحمني اني خالتي،ونوال ما كدرت اواجهن وبعدين كلها دكولي،حيكتلج انتي والطفل..

جابر...بس كسرتي رغم كسرته الاولئ

غمضت عيوني،بأنين مكسور...والله من خوفي،والله ..انت ما تعرف بيه اني،شكد احبه ورغم ادري بي ميحبني،وادري يحب شام وقبل بس جان يعطف عليه

بس اني،حبيته واحترمته وحاولت بس،ماكو فايده، وبعد الي صار مستحيل اصلا افكر يحبني

سكت مجاوبني بس سمعت طلعت من تنهيده وبعدها كال...الله المعين يالله ديري بالج علئ،نفسج واني اتصرف لان اكيد شك بيه

تحسرت علئ،نفسي،.  يالله مع السلامه  اني اعتذر اتهمتك باطل بس،فدوه لا تزعل مني،وقدر موقفي

جاوبني،بسرعه ..اششش لا تعتذرين واني،مقدر موقفج...

تشكرت منه ومسحت دموعي ورحت طلعت شفت صبريه نايمه علئ ضهرها وفاتحه رجليها واديه وتشخر...وشيلتها مفتوحه وكصايبها وحده مشموره بصفحه والثانيه كذلك

جريت نفس ...مقهورة عليه والله حييل مقهوره هو رغم جاف وياي بس اله موقفين مستحيل انساهم اله مستحييل...والله مستحيل

جريت نفس ورجعت بذاكرتي للماضي...

جنت كاعده علئ السرير وامي رضيه مخليه علبة الضلال بحضنها ولازمه وجهي وتحط بعيوني ضلال وتدمجه باصبعها...

كالت بقهر...غمضي عيونج ولج وخليني امكيجج
شوفي ولج جوليت جاسر زوجج لازم تكونين يوميه مهندمه وكاشخه وعطرج يفح منج لان الرجال يحب المره النظيفه...

هسه من يجي ويشوفج لا تشرديين منه وانطي حقه كامل ولبسي اله المشخل والملمع وانتي ابدي وياه كون اريدن رگبته كلها لمع يطلع النه بوووسي وحضني وضمي الصدرج

رفعت اديه بخبال...ماااا ماااا استحي والله ولا اسوووي هييج وبعدين شكو تمكيجين بيه...وتلطخين ...

ضربتني بجتفي بجزع...امكيج بيج حتئ اجبر بكلب هل مسكين الي ابتلئ بوحده مثلج...صدك لو كالو ...الله اذا احب عبدا ابتلاه...معقولة الله يحب جاسر وبلاه بييج ...

باوعتلها بقهر...ماما رضيه هاي واني احبج سويتيني بلوووة والكاسر مبتلي بيه...

ردت بعناد...اي مبتلي بيييج هل مظلوم هذا ابتلئ بوحده زعطوطه وتزعطط بروحها مثلج...شوفي ولج والله اذا ما سويتي لكتلج عليه اخلي يتزوج عليج...

باوعتلها بغرور...خلي يتزوج شدخلني بي

عضت اصبعها بقهر...مو اذا تزوج راح يكعد مرته الجديده بهاي الغرفة وانتي يشمرج بالسرداب الاظلم ...

حضنت جسمي بخووف...يممممه اسم الله اخاف من الظلمه...

رجعت ضربتني...ديالله كوومي لبسي هذا ثوب النوم وخلي اشوفه عليج ...

باوعتلها بدون نفس وبقرف...هذا اصلا اكثر شئ اكرهه بملابسي وتلعب نفسي منه ويييع مقرف ..

وكملت بمرح...عندي تراك يجنن لونه وردي مثل الورده  يطلع يجنن عليه...

عقجت ملامحها بطولة بال...ولج الله يساعد امج المسكينه عليج والله والله اذا ما لبستي ثوب النوم هذا اخلي جاسر يتزوج عليج والله واني ما احلف جذب...

اخذته بعصبية واني اخزر بيها هاي عاطت بصوت مسموع ...عشتوو تخوزر انوب ما راضيه ...والله شلون هسه افلش راسها بالمزهريه...

اخذته واني اتذمر وادردم بكلبي وكله ذم بماما رضيه

رحت للدكتور لحمام نزعت ولبسته وكل شويه وكلت...منحرفه رضيه طالعه عينها الحجي مطلع عيونها...

استحيت اطلع بي هو جان لونه ازرگ چويتي يصير شيفون خفيف ولنص الفخذ ...

ضليت واكفه خجلانه واحس باحساس محلووو خاصه من رضيه حييل خجلانه ...

اجت هي دكت لباب واني طلعت الها منزله راسي وخصلات شعري مغطيه وجهي...

بعدها باوعتلها واني افرك باديه وارمش بخجل ...

كالت باعجاب وضحكه...يمممه بنيتي عين الحاره بارده ان شاء الله ولج شنو كيمر مسفط ...اني خايفه علئ وليدي جاسر ينجلط ...

رديت بعصبية...لا ما ينجلط بس راح يكول عني هاي قليلة ادب وادبسز ومو راحه لان هييج لابسه ...

لزمتني من اكتافي...لا ما يكووول راح يتخبل ويذوب باحضانج ...

حسيت من كلامها بطني لوتني اخاف يتقرب مني اني اصلا اخاف منه وهو مخليني علئ راحتي بس هي رضيه تلح ..

سحبتني يم المرايه وهي تعدل بشعري....بنيتي جوليا الحلوة اريدنج عاقله وحبابه من يبوسج ويتقرب منج مو تنهزمين لا يمممه حسسي بحبج اله وحسسي بوجودج حتئ يعشكج وينسئ مريته القديمه

باوعتله بخوف وتردد...اخاف بعده يحبها...

رد مسايره اليه...لا ميحبها يحبج انتي انتي مريته الصغيرونه انت طفلته هو يلكه احسن منج ولج انتي صيده وصادج الكاسر علئ كولتج ...

ضليت استمع الكلامها واني احس بنسمات فرح تتخلل لداخل قلبي وانتعشه باريحيه بعدها طردت افكاري وتعصبت....اي بس لا تباوعين عليه عيب

لوت شفايفها بتذمر...احم مستحيه مني جاا شلون هسه جسوري يشوووف الشحم والقشطه ..ويشوف المضموم...

غطيت وجهي باديه منها بخجل....

ضربتني وهي تضحك وطلعت بعد ما وصتني وحجت ويايه والرجال يحب المرة المطيعه وما اعرف شنو وبعدها راحت...

ضليت واكفه واني اباوع الوجهي بهدوء فجأة حسيت بضيق وحسرة بصدري يمكن لان ما متعوده البس هيج

او يمكن لان تزوجت بسرعه بسرعه واهلي ما راضين عليه وهاله مقهورة مني...

جريت نفس وقررت ابدل ما عجبني السوته بيه ماما رضيه

انتبهت للمقبض مالت الباب اتحرك عبالي ماما ..شفته دخل بهيبته وجبروته الاخاف منه...

حسيت تصنمت ما كدرت اتحرك خطووة وحده 

خجلت واني ارمش بعيوني رجعت خطوات هاربه منه وهو تقدم بخطوات واسعه...

مشيت بسرعه واني احس نفسي عريانه لازم استر روووحي

لكن استوقفني صوته بأمر....اووووكفي

وكفت واني لسه منطيته ظهري وما درت وجهي عليه تقرب مني ودارني عليه

رفعت عيوني برجفه وخوووف باوعتله واني ارمش حسيت الدمعة تلالي بعيني ...

هو حس بخووفي ورجفتي منه لزمني من اكتافي العاريه كأنه يطمني...

واني نزلت راسي بخجل وشعري حجب عندي الرؤية...

تكلم بهدوء قاتل وهمس...ارفعي راسج

رفعت راسي ببطئ شديد وخجل وبلعت ريگي بصعوبه...

حط اصبعه علئ رگبتي وحركه بهدوء صابتني قشعريره وسرت بكل جسمي من لمسته...

وعيونه مركزه بيه بكل جبروت استقر اصبعه عند شفايفي..

تقرب مني اكثر وحضن خصري همس...شمسويه بروحج جنج مهرج ...

بلعت ريكي بصعوبه وفشلة...مو اني هي ماما رضية هيج سوت

ابتسم ابتسامة جانبية هادئة وعض شفته باسئ...افااا هاي سوالف رضية ...لا اله الا الله اذا رادت شئ تصر اله تسوي

همست بخوف...ما ادري

حط اصابعه القاسيه تحت حنكي و رفع وجهي وهو يباوعلي بتمعن كال...حلووه

بلعت ريكي وتنفسي احسه صعد همست ببتسامه متوترة...شكرا من ذوقك

رفعت عيوني بتوتر...اسويلك عشا

ابتسم بغموض...لا رغم جوعان بس فضلت غير شئ

رديت برجفه...لا ليش شنو تنام جوعان هسه بس ابدل اسويلك عشا واسويلك جاي

تقرب مني بلهفه وحضني.. اششش لعبت باحوالج رضيه ومدام مشيتي وراها اتحملي النتائج

رمشت ببراءة...نتائج شنوو؟

همس...هسه اعلمج

باسني بلهفه وشالني بين اديه جنت مثل الخشبه اليابسه حاولت ابتعد عنه او استر الي كشفه

بس جان اقوئ مني ورغم قساوته بس جان هادئ حيل وحباب

ابتعد عني واني انصدمت صرخت بخووف واني اضم الجرجف الصدري...فدووه فدووه ابوووس،ايدك ابووس ايدك لا تفضحني والله محد لمسني والله انت اول واحد

فدووه لا دكول لاخواني والله يذبحوني والله وعبالهم اتهام هاله اليه صحيح ..والله جذب وتهمتها باطله

باوعلي وابتسم همس...ادرري

بلعت ريكي متفاجئه من ردة فعله ومسحت دمعتي...شنو تدري

حرك اصبعه علئ خدي بهدوء...ادري اني اول واحد اقترب منج...

حطيت ايدي علئ شفايفي بشهكه...لعد ليش ماكو اثار عذرية

ابتعد شوويه وجر نفس سحب باكيت الجكاير من الميز الي بصف السرير واخذ جكارة ورثها وسحب منها نفس واني جنت منتظره اجابته علئ نار.

نفخ الدخان من شفايفه بهدوء كال...لان الخووف سيطر علئ كل جسمج لذلك ما بين شئ وان شاء الله بالمره الثانيه يبين لا تخافين

بلعت ريكي بخوف سألته بتردد وخوف...يعني انت مصدك اني محد لمسني غيرك واني طاهره

جنت عبالي راح تضربني مثل ما تضرب جعفر وتطلكني وتطردني لان ماكو دم

دار وجهه عليه وضحك كال...لا شنو لهل درجه غبي ترئ واضح محد لمسج وبعدين اني هاي مو اول تجربه فا اعرف اذا سبق الج او لا

باوعت بعيونه بخووف...يعني ما شاك بيه

مسح دمعتي وهمست...تؤؤ ما شاك

كال...يالله وهسه اخذي ملابس وروحي اسبحي حتئ اسبح وراج...

لفيت الشرشف علئ صدري واخذت ملابس دخلت للحمام

مقهورة وتعبانه اول ما تحركت خطوتين وحسيت بالدم نزل عليه

بسرعه فتحت الدووش وسبحت وغسلت بدلت ولفيت المنشفه علئ شعري

طلعت لكيته كاعد علئ السرير ولابس ملابسه بس القميص جان ما ساد الدكم

ويدخن ومخلي يده علئ عيونه مبين مهموم يمكن اتذكر شام حبيبة قلبه

اول ما حس بوجودي باوعلي وابتسم مجامله

تنفست بصعووبه احس بوجوده الاوكسجين ينكطع همست...ما اعرف اذا تصدكني بس،هسه من سبحت نزل دم..

بس والله والله وداعة امي غسلت وارتبكت اكول عليه

اول مره يضحك من قلب وبصوت عالي ...ههههههههههه لج بابا شبيييج مو مهم عندي لان اعرف انتي بنيه ليش هلكد خايفه

همست بتعب...هذا شرفي

تقرب مني وحضن وجهي بين اديه كال.. امنت بالله وشرفج محفوظ واني متأكد منه بعد شكوو

بجيت بقهر...خااايفه

ضحك ...اي ليش تخافين اني وياج لا تخافين واني لو ممتاكد جان كتلج بس شرفج محفوظ والله..

تركني وراح للحمام طمانيت شويه وصارت الامور طبيعيه رغم اني اخاف ولا عندي ثقه بأي شخص بس ثقيت بي

ومن رضيه رادت النيشان كلها ما تقربت منها وعوفي البنيه علئ راحتها ولا تجبريها ولا تخوفنها عوفنها براحتها

وره اسبوع تقرب مني وجان يوم حلو لان شاف اثار عذريتي الحمد لله...

وهذا جان موقفه ويايه الي حييل حبيته وكبر بعيني يارب يحنن كلبه عليه

رجعت للواقع واني المس بطني يااارب يا مجير اجرني من هل مصيبه دخيلك...

............................

ريهام....

نضفت البيت مالت بيت عمو وكملت جانت نوال متطلع تسوي اي شغله لان خطيه حامل وهماتين لازمه عده

و وقار نفسيتها زفت بس تبجي وتنوح علئ ابوها...

فبابا طلب من صلاح ياخذنه اني ووقار وامي البيتنا لان ضجه هنا مو طبيعية واكيد تتعب نفسها اكثر

وناس تروح وتجي والشيوخ الله يسلمهم ما صدكو لكو مشكله ناس تجر طول وناس تجر عرض بس بابا جان موقفه محايد

رغم كل شويه وجاسر تعارك ويه ابويه ..وخطيه ابويه متحملة لان يكول مو شويه الصار بي

ابو مات واخو وبنته وجولييت زادت عليهم ونهزمت منه...

وهماتين النفاق بفلس ناس تحجي علئ ناس والنسوان ما صدكن لكن سالفه يحجن بيها

استغفر الله ربي واتوب اليه...اللهم اني بريئة منهم

لبست حجابي وعباتي ولبست جواريبي جان باوعتلي رضيه وابتسمت كالت. ..شنو هل وجهه الي ينور ...ورحمة الله كلها متجمعه بي هنيال جعفر والله

ضحكت...تسلمين عمه بس جعفر شنو دخله بوجهي

ضربتني بمزح...صدك تحجيين غير ان شاء الله راح تصيرين مريته

ابتسمت بتوتر وسكتت مجاوبتها ضحك كالت ..انوب من تخجل والوجهه يصير نار يعينك الله يجعفر

طلعت من الغرفه شفت وقار لابسه صايه سووده وشال اسوود وعيونها مورمه من البجي و وجهه شاحب واصفر خطيه تعبانه حيل

هي جانت تلف بيدها من شافتني ضمت ايدها بصايتها وصرخت بوجهي ...اطللعي برررره اطلعيي

استغربت همست...لييش؟ شبيج حبيبتي وقورة

جرت نفس والدمعة اليتيمه نزلت من عينها بانكسار...ما احب اي شخص يشوف اعاقتي ولا احب يشوف اصابعي

جريت نفس ورحت حضنتها ...حبيبتي وقار ماكو واحد بينه  يختار مرضه .. علّته .. تشوهه او خلقته او اعاقته .. هذا امر رب العالمين وامتحان من الله ديشوف مدئ صبرنا ..ارضئ بأمر ربج والله تنفتح الج ابواب السماء

جاوبت بمشاعر متضاربه بداخلها وحزن عميق...اعتزلت الناس خايفة من نظرات احتقارهم والسناتهم السليطة عليه .. تركت مدرستي واختارت اكون وحيده بين زوايا اعاقتي...

ما احب نظرات العطف بعيونهم ولا احب ضميرهم الصاحي حتئ اليعطف عليه اكره واموت الف موتئ ترئ ما اطيب

اكو بيهم يعايروني ويتنابزون بينهم لج يمكن اقرب الناس الي يعيرني نوال دكول البناتها صيحلها ام ايد المكطومه

ابتسمت بتهكم انسيها وجعها شوويه...حبيبتي هذي جاهله...وانعدام الانسانية عندها  مينتهي سلمي امرج الربج ومينساج صدكيني

دارت وجهها وكالت ونعم بالله ورجعت لفت ايدها

طلعت اني وياها صحت علئ ابويه بس جانت هووسه وصلاح شفته ملتهي ويه العالم

حجيت ويه ابويه كال...هسه جابر هو يجي ياخذجن لان صلاح ملتهي اجتنه وادم..

انتظرنه شويه واجه جابر رغم رفض وقار ان تروح وياه لان خجلانه منه ضحكت عليها كلتلها.  يمعوده ترئ جابر حباب لا تستحين منه ..

رحنه ركبنه بالسياره كعدنه ليوره وهو صعد يسوق كال..السلام عليكم يا غراميات

انصدمت..غراميات شنوو؟

ابتسم ...الطف الجو شبيج 

ضحكت و وقار دارت وجهها ما اعرف شبيها ضاجت فجاة يمكن ما حبت جابر

هو كلها...شلونج وقار البقاء لله وان شاء الله خاتمة الاحزان

جاوبته بخجل...شكرا البقاء لله

وصلنه للبيت دخلنه جوه جابر كال...متعشيات لو اجيب عشا من المطعم

وقار نزلت عيونها كالت...اني ما اريد شبعانه

ضحكت كتله...جابر حبيبي ترئ وقورة مماكله شئ وانت كريم واحنه نستاهل

كال...افااا انه ابو عگاب بنت عمي جوعانه وبيتي وما اسويلها شئ والله اليوم المطاعم كلها اجيبها لخاطر وقار

هي ابتسمت واني حضنتها بستها بخدها...

خطيه جابر راح للمطعم جاب عشا واجه

شويه واتصل بي جاسر وهو طلع كال . اقفلن الباب بين ما اجي لان امي اجت تجي ويانه ومقبلت ام فلاح..

راح جابر واحنه ضلينه اني ووقار تعشينه وضلينه نسولف وبعدها اخذتها قرينه قران هدينا العمي الله يرحمه...

..........   .............. ..

طلعت بعد ما خابرني جاسر ركبت سيارتي ورحت بسرعه اله...

مثل ما وصفلي لكيته بالمكاان واكف علئ السياج مال الجسر وسيارته بصفه

تقربت منه ...حيا الله ابو غزل

باوعلي،بجمود وجر نفس ...الله يحييك

سكتت ثوواني تنهد بهدوء...كوول يالله ابو غزووله تهوون

ابتسم ابتسامه باهته تحمل اطنان من الحزن...تهوون شنو الي يهوون ابووي لو اخوية لو غزل الي كل دقيقه وكل ثانيه اتذكر شهكاتها وشلون تصارع بالموت

اتذكر شلون دفنتها وتركتها الوحدها اتمنئ لو امووت واندفن بصفها اطمنها اكلها بووويه غزل لا تخافين اني وياج اني بصفج

شنو الي،يهووون الجمرة بداخلي محد يحس بيها

اشر بيده ...هذا العالم تشووووفه شكبرره ما حمل همي ...همي فاق حدود الحزن والألم

رفع ايده وهو يقلبها ...هااي الاييد دفنت اعز نااااسي وصابر ومحتسب الحمد لله

بس الصبر مل مني وجولييت بعملتها الاخيره كسرت كل احساس،بداخلي

اشر علئ گلبه...هذا ماااات مااااات هذا النايم وسط صدري ماات مجاي احس بي ومشاعر الشفقه عليها مجاي احس،بيها جولييت زواجي منها من يوم يومه فاااااشل

تعرف شنوو فاشل

ما اذيتها والله ...بس،شام ما نسيتها ابببد ولا راح انساها لو تجي عشرة مثل جولييت

اخر شئ اتفاجئ منها تنهزم مني تخليني حااااير بهمها حاير إنسانه علئ ذمتي ما اعرف بيا مكان

اتمنئ اصرررخ اريد ارتاااح بس ما اكدر ولا راح ارتاااح الا اذا كتلت عاااصم ولكيت جولييت

ضرب ايده بحافة سياج الجسر ...ااااااااه والله يا جولييت اذا لزمتج اخليج تتمنين الموت ما تطوولينه

ضحك باستهزاء...انهزمت مني عساس اني عايز قهر يا ابن عمي  .«.شدد علئ كلمة ابن عمي»

باوعت لعيونه تخفي شئ هو متأكد منه هاي مو عيون جاسر هاي عيون واحد تجرد من الانسانية

جاوبته بقلق...ان شاء الله ترجع

رمقني بنظره حاااااده...ياريت لو ما ترجع لان ما راح ارحمها واني اعرف هي وين وشاك بثنيين بس اتأكد من شكي والله ورب العزة ما ارحمها ولا ارحم اي واحد ساعدها

حسيت وجهي صار مثل الغيمه السوده همست...شتقصد

هدء للحضات وبعدها اردف بكلمات من نار...هي وحده من ثنين يا اما واحد مني وبيه هو الي ساعدها واخذها

يا اما راحت لاهلها ...

ولو استبعد تروح إلاهلها لان موبايلها عندي شلون كدرت تتواصل وياهم ...

كلبي حسيته يغلي همست...كول يالله ابو غزل لا تتهم الناس باطل

حسيت عيونه برقت ببريق من لهب مشتعل كال بضحكه مستهزءة ...اي صدك اتصل علئ رقمك الثاني ليش مترد

فتحت عيوني بذهول وقلق...اي تاركه ما ادري بي اتصل علئ الاول ..

رفع اصبعه بتهديد كال...اعتبرك واحد من ازلامي و واحد من اخوتي اني واخوتي للقاتل...وانت جولييت مهمتك

تخبلت من كلامه مستحيل هذا شاك بيه مستحييل يخلي مهمة جولييت عليه لو ما شاك بيه

دكيت صدري بعزم...تدلل ان شاء الله جوليت هذا الاسبوع اجيبلك خبر منها...

ضرب علئ جتفي بقوة وهو يتنهد...كفوو منك يا صاااحبي

رجع شدد علئ الكلمة...

تركني وركب سيارته وراح وخلاني بحيرة من أمري رغم حسيت روحي تورطت بس ما اكدر اخون ثقة جولييت

يارب ساعدني خايف يتركب الحق عليه ويفهموني غلط..

ركبت سيارتي وضليت اجوول بالشوارع المضيئة بالاناره الخفيفة وبالي عند المجروحة الكسيرة...

..........................

ديالي...شهربان

بعد اسبوعين

كاعده بالبستان واصوات البلابل وزقزقتها مالي المكان

والفراش ينتقل من ورده الورده وهو يستنشق عبيرها وروعتها...

باوعت العصفورة الي احتمت بين اغصان الشجرة وهي تحمي نفسها من المطر

جانت تمطر خفيف

ابتسمت بهدوء الها يالله جنها اني من اخاف من جاسر وروح انهزم لغرفتي احتمي بيها خايفه منه

باوعت للبقرة مربوطه باحكام وكاعده بنص البستان والثور يخوور قريب منها...

وكلاب الحراسة تنبح بس مربوطه بسلاسل

اجت صبرية وشمرت الكونية متروسه خضره كعدت وهي تسفط بيها تجهش صوتها الخشن بغناء...ولج حسنه عرمه وما تكعدين ..ولج حسنه. عرمه وما تكعدين عساج بسكته قلبية وتموتين ولج حسنه. هووي هووي

وترجع تجمع بالخضره وتغني

الثور ضل يزاكط ويحاول يفتح الحبل من ركبته

وجهت صبرية كلامها للثور...شبييك اليوم ثاير علينه يالخبل بس لا متعارك ويه الهايشه وزعلانه منك

رفعت اصبعها تهدده...اكرهك اكرهك لان تشبه ابو اللول وذيج الهايشه تشبه حسنه

فتحت ثوبها من صدرها وهي تدعي بصدق...ياربي ان جاني نكسه وساقطه ..وكح ..وام الملاهي اريدك تستجاب دعائي اريد كون حسنه يصير بيها جنون البقر وتموت ومحد يدفنها...

وابو اللول كوون ينجلط وحاجته جواه ومحد يغسله منا لمن يعفن ويموت...

باوعتلي كالت..شبيج تباوعين متفاجئه اي اكرهم ذووول غدروني

هسه مالنه شغل بيهم كوومي احلبي الهاايشه

فتحت عيوني مصدووومه...لاااااا لاااا فدوة خاله اخاف من الحيوانات حييل اتخبل منهن الله يوفقج لا تخليني اتقرب منهن...

اذا تردين ازرع الج اسفط خضره اقفطف الفاكهه

كالت بتذمر ...خايبه خلي اغم روحي لان ما ساويت النسوان

اقطف فاكهه..تقلد صوتي

ولج شني ليش هييج مايعه وفاهيه ..صيري معدله مره حوووك كوون مثلي طردت حسنه وابو اللول واخذت البستان والهوايش والدجاج وخليتهم بالضيم

وكل هذا وبعده كلبي ما فاخ منهم واتمنئ احطهم بغرفه واهد عليهم الثور واخلي يهجم عليهم

كملت بقهر...كوومي كوومي جكليت بت ابيش جيبيلي ماي يبستي ريجي

وكفت دا اروح اجيب مي كالت...هم خابرج جابر

هزيت راسي بنفي،وبعدها كملت...اني والله كولش مقهوره لان اخذت موبايلج

هزت ايدها بقهر..عليمن مقهوره ما دكليلي اخابر منو انه اخابر ابو اللول الكوا...

عقدت حواجبي...منو ابو اللول هوايه تسبين بي هو وحسنه

كالت وهي تلف بالخضرة...تكي

استغربت ...شنو تكج نعال شنو

جرت نفس..هو هم نعال اقصد رجلي عشتو

عاطت بيه..خايبه روحي جيبيلي ماي وخليني بهمي

فزيت من مكاني ودا اروح شفتها طلعت جكارتها وشغلتها وهي تدردم واسمعها دكول..دنيات نفس لغسل...لانعل ابوجن لابو ابو اللول والله من اتذكر جنت مرته اتمنئ ازوع فوك راسه ..شكالتلي روحي من تزوجته جنه سطل طرشي

رحت للبيت دا امشي اتذكرت امي من جانت تجي تعبانه وما تكدر تمشي من الحدبه الي بضهرها وتجي شايله المسواك علئ ضهرها...

مشتاقه الها موووت اتمنئ انام بحضنها وانام مرتاحه بدون قلق ياربي دخيلك اريد امي

امي يمكن ما تركتني امي يمكن تباوعلي من بعيد تريد تشوف شلون اعتمد على نفسي ...

حجيت هييج دا اواسي نفسي

مسحت دموعي المنهمرة علئ خدي باسئ

بس درت وجهي شفته من بعيييد صار مقابيلي وعيونه حمرر رجعت بخطوات خايفه وركضت من شفته هجم وركض وراي بسرعه اكبر من سرعتي

صرخت بصووت عالي..  مااااامااااااا

نهاية البارت...يتبع

كونوا انتم كونوا بخير.. احبكم 💔

نور سمو العراق 😘

اعتذر عن التأخير لكن اليوم عندي تقرير وانشغلت

ولا دكولون البارت قصير ترئ والله ديتعده ل 3 الف كلمه...

ولا تنسو التصويت احبتي فضلا وليس امرا

والفائزة بالتعليق هي👇حسب التصويت

وتابعو هذي الحسابات فضلا وليس امرا..

-linass-

Sab_oo_sh