رواية #جوليت وأسرها.... الفصل الثامن 8 - بقلم الكاتبه سمو العراق

البارت الخامس
رواية..جولييت وأسرها..غياهب الإنتقام
بقلمي..نور سمو العراق

💔💔💔💔💔💔💔💔💔

مـامش للـحزن شـراي؟

................................

ريهام...

جنت كاعده بالحوش دا اسوي،بالتمر وقريت عليه سورة الفاتحه وثلاث مرات الاخلاص وهديتهم للمرحومين...

جانت هاله وأختها كاعدات قريب مني وهنه يسولفن ويحجن بس،اني بالي ابد مو يمهن...

حسيت بصوت خطوات نازله من الدرج درت وجهي شفته نزل من فوگ

درت وجهي بسرعه...استغفر الله ربي ...اعوذ بالله من رجس الشيطان دخيلك ربي لا تخليني اوكع بالغلط واني،مواعدتك اكون من الطاهرات

اللهم آني استغفرك اذآ اخطيت واذنبت بيوم ..
اللهم احسن خآتمتي بالعمل الصآالح
ولآتجعل الدنيآ اكبر همي

سمعت سماح اخت هاله دكولها...لج باعي صلاح باعي الهيبه باعي الاسووود الياكل ويشرب لج ونبي كوون هسه احضنه وضغب وصيح يا يابه يابوويه ابوك عزيز صلاح اعز من ابويه ههههه

ضحكت هاله وهي تضربها علئ كتفها بخفه...عزا بعينج هاي وانتي متزوجة لعد شدكولين عليه اني العزباء هههه

دفعتها ...روحي احضني يمعوده هذا حضنته جنه وبعدين رجال مكسور لازم ترحين تجبرين بخاطره ههه

باوعتلها ورفعت حاجب...تؤؤ حبيبتي اذا اروح اجبر خواطر اجبر بخاطر ابو غزل فاقد غزوله تسوه جولييت الكلبه وعشيرتها ههه

ردت عليها بتساؤل...اي صدك من دخلتي عليها شكلتلها؟

ضحكت بخبث...رعبتها رعب كلتلها جاسر حكم عليج بالموت انتي وطفلج والكل بالفاتحه يسولفون بيج

ريهام...انصدمت من كلامهن من بدايته لحد جولييت

جريت نفس واني اوجهه كلامي الها...حبيبتي،اني مو حابه اتطفل عليج ولا حابه اكون احسن منج بس نصيحة لوجهه لله

اول شئ غزل اختج وهي،متزوجه بشخص اجنبي حرام لان دتخون زوجها بافكارها ...

تعصبت سماح كالت. بالله رجاءا اسكتي شنو اخون زوجي فكريا شهل مهزلة عيب عليج وحرام تتهميني باطل وبعدين هو مو حرام هو ابن خالتي يعني مو حرام

تفاجئت...شلون مو حرام يعتبر اجنبي بالنسبة الج والي لان هو مو من محارمج

ردت باستفزاز...أخاف تحبينه ودتبيعين فتاوي براسي ..

فتحت عيوني مصدومه من كلامها...استغفر الله استغفر الله لا تتهميني،باطل

عوفينه هسه من هذا الموضوع...ليش،تخوفن بجوليت مو حرام الفتنه اشد من القتل صح اخو جولييت قاتل بس انتن دتسون فتنه وحتكونن مجرمات اكثر منه

هزت ايدها بملل...اووو شكد تلغين وبعدين ليش،يابه مجرمات اخوها قتل تلاثه بدم بارد ومن وراه تهجولو أهلي ابويه واخواني انهزمو وياهم وما ندري بيا مكان

ولو ما خالي حمانه من عشيرتكم اني وامي واختي جان هسه احنه بخبر كان لذلك لا تدافعين الجولييت والله ما اعرف انتي حتئ منطق بالكلام ما عندج تبرين القاتل وتتهمين البريئ ...

جريت نفس بملل...دا اكولج انتي تزرعين فتنه وبعدين جولييت شنو ذنبها وجاسر لو يريد يقتلها هي وطفلها جان قتلها من اول يوم بس،هو مو هيج

سحب سماح بملل...امشي،سماح امشي خلي نروح نكعد يم امي وخالتي احسن من هل حشرات...

تفاضيت عن كلامها وشفت عمتي رضيه اخذت صينيه ودخلتها لغرفة جولييت

شووويه وطلعت وجهها مخطووف وعيونها تدمع وهي تندب حظ جولييت برعب...عزاا بعينج عزاا العزاج جولييت

وكفت بخووف ورحت اركض الها لزمتها من كتفها..شكوو عمو شبيج شبيها جولييت

لطمت علئ خدودها بقهر...انهزمت انهزمت والله جاسر يذبحها بيده ويشرب من دمها...

طلعت تركض وهي تصيح من الباب.. جعفر جعفر

دخل جعفر بهلع ...هااا يمه شكووو

رضيه بخوف...اركض صيح جاسر مصيبه ووكعت على روسنه

جعفر تعصب رد بقهر...شكوو شصاير

دفعته...رووح بسرعه صييحه

ثواني ودخل بجذعه المتعب مثل عاصفه هوجاء تقرب من رضيه بخووف...شكوو شصاير ترئ،عقل ما ضل براسي...

جاوبته بصوت مرعب ...جولييت انهزمت

كلمتها جانت كفليه بإثارة جنونه فتح عيووونه بغضب وضرب الباب بقسووه كبيره صرخ بوجهه رضيه....شلوووووووووون انهزمتتتت

ضربت خدودها بجزع وهي تبجي. .ما ادري ما ادري جنت بالمطبخ وما حسيت عليها من طلعت

دفع رضيه ودخل للغرفه مثل اسسد جريح ثائر

دخلنه وراه واحنه نبجي والكل التمت نوال وهاله واخواته وامه وامي وخالته واني

ضل يباوع ثواني،بالغرفه جانت فاارغه والكنتور مفتوح ونص ملابسها واكعة ومتطشره ..

ضرب بباب الكنتور بقبضة ايده الصلبه وهو يزمجر بغضب وصياح....بنت الكلللللللللب ياااا ويلج من قهري ياااا ويلج من قهرررري

قبض باديه القاسية علئ اكتاف رضيه النحيله وهو يزمجر بوجهها بغضب كاااااسر....حذذذذرتج منها حذرتج من عصياااااني انت خليتها تنهزم انتييي

بلعت ريكها بصعوبه وبجت بقهر. والله لااا ومصيبة ابووك ما هربتها ولا ادري بيها من انهزمت والله لو ادري ما اخليها تطلع باب الحوووش...

تركها بثوران هدم كل كيانه واحتار بشنو يبدي وشلون يتحرر من عصبيتة صار مثل البركان الهايج بحيث الغرفه صارت عبارة عن رماد كسر الغرفه تكسر

صاحت امه بغضب...جااسر كااافي استهدي،بالله وليش اصلا تنقهر علئ وحده عار مثلها ما فكرت بيك ولا بسمعتك وسوت الي،برأسها وانهزمت الطلاگ مصيرها واعتبرها نعال ونكطع ...انساها

تقرب من امه وهو يدك علئ صدره بانهيار بحيث شرايين اديه برزت من عصبيتة...انساهاااا انساها شنوووووو هاااااي عرضي عرضييي وانهزمت منيي طلعت بدون علمي والله اذا جنت شووويه الها ذرة عطف بداخلي هسع لاا اذبحها واشرب من دمها ولا يرفلي جفن

دخل ابويه الشيخ عكاب ودخل صلاح وجعفر ..

ابويه اجه لزمه ...شلون حرمتك انهزمت شلون محد حس عليها شلووووووون

عض اصبعه وهو يرجف بتوتر وصرخ ب....ااااااااااه جوووووولييت انتقم منج قبل اخوووتج هيييج تسوين بيه انتي بكفه واخوتج العارات بكفه...

ابويه كال برهبه...خلونه ندورها البنيه اهلها انهزمو ودهورت روحها من طلعت واكيد خايفه

تقرب من ابويه وهو يفح بعصبية...لا والله هل عار اذا ما ندمتها ما اطلع جاسر ابن مهيوب وين تروح مردها الي واشوفها نجوم اليل بعز الضهر ...

والله اذا ما خليتها تتمنئ الموت وما تشوفه زديتي همي همين بنت الكلب ...

وبعدها صاح ...صلااااااااااااااح اخذ جعفر اكيد ما ابتعدت ودورلي المنطقه بسرعه بسررررعه ..

طلعو الولد بسرعه واني خابرت جابر لان مشفته وياهم...

باوعت الجاسر رفع اصبعه بتهديد و وجهه للكل...والله اذا طلع هذا الموضوع بره البيت ما تلومن اله نفسجن

انطق اخر كلمتين وطلع وهو يفووور من العصبية ومكسور لابعد حد...

.................

حيرتيني....

اخر كلمه نطقها جابر ...حسيت بيها بألم ينهش بروحي بس دا أقاوم بكل قوووة

ابجي واصرخ وانهار واحس مثل الاسيرة بنص الوحوش

من كال..اقام عليها الحد بمعنئ دمي انهدر

كعدت علئ الارض وحطيت اديه فوك راسي وبجيت بوووجع حطيت ايدي علئ كلبي اكيد حتصيبني جلطه

رجع اتصل مره ثانيه وما اسمع بس زئيره وهو يكول...كلي الابوووي اني خابرني المدير ورحت ان شاء الله ساعاتين وارجع...

قفل الخط حسيته مثل الوحش باوعلي بغضب وصرخ بوجهي ...حيووووانه شسووويتي شسوويتي ليش ما حسبتي حساب لهل طلعه الگشره جاسر هدر دمج ليش استعجلتي

رجفت بخووف وجاوبته بتوسل واني الزم بطني بوجع ...الله يوفقك الله يستر علئ اختك لا ترجعني وديني الامي فدوووة ابوس ايدك والله يموتني والله حرام عليكم والله يموتني اني وطفلي والله...

جر نفس وباوعلي بنظره حاقده كال. امشي بسرعه

طلعنه للشارع بسرعه هو اجر تكسي ورجع يخابر كل ما يخابر ينخطف كلبي وينعصر بوجع

اخاف وما عندي ثقه بي اخاف يرجعني ياربي ما يرجعني يااااارب ...

بعدها رجع اتصل بصديقه وهو يكوله...جيبلي سيارتك نسيت اخذ سيارتي تلكاني،يم ....

مشينه مسافه طوويله وبعدها نزلنه كال..غطي وجهج لحد يشوفج

همست برجفه...عفيه اخذني الامي

سكت مجاوبني وضل يخابر ردت انهزم منه لان اتصالاته قلقتني ...

شوويه واجه ولد شاب بسياره وكف وياه بعدها كال..يالله اصعدي

بلعت ريكي بخووف ودموعي ترست وجهي جرت نفس كال..لا تخافين راح اخذج المكان امين بين ما اشوف امج وين...

صعدت ليوره بتردد ولفيت العبايه عليه بخوف ضليت اردد باذكار حافظتهم واقره قران عسئ ولعل ربي يساعدني...

قفل السيارة عليه واني بيها صرخت بخوووف وضليت ادك علئ الجام واتوسل بي يفتحها اكدت النفسي نهايتي قربت وراح يكولهن لكيتها لهل سبب حجزني بالسيارة

ضليت اصرخ برعب وهو بسرعه فتح الباب وباوعلي كال بعصبية.. شبييج

صرخت بنحيب...راح تصييحه راح يجي يموتني

جر نفس واستغفر ربه كال...ضلي هنا بس اشوف الوضع اذا يطمن ارجعج واذا لا اشوف وين اخذج

همست بقهر...جذااااب شفتني منكسره راح تكسرني بالزايد

عاط بوجهي...اشش شنو جذاااب اني ما انطي كلمة واخلف بيها ووعد ووعد الحر دين اساعدج وما استغلج...

رجعت راسي علئ الكشن بتعب واستسلمت للامر الواقع...

رجع قفل السياره وراح ...

ضليت منتظرته وساعه ابجي وساعه استغفر ربي وادعي ...

متت من القهر راسي حسيته حينفجر ...

وهو طووول عليه الدقايق بسنيين عجاف..تعبت توجهت الربي بتعب وهذا اخر حل.. ربي لو تموتني لو تساعدني بعد ما اكدر اتحمل...

ضليت تقريبا ربع ساعه واجه هو فتح السيارة وصعد بالصدر وساق بسرعه

بلعت ريكي ونطقت بحروف متقطعه. هااا

فر السياره وعينه علئ الشارع كال.. الوضع متازم لا تخافين راح اساعدج كلتلهم عندي شغل ..

همست بخوف. وين ماخذني

جر نفس..المكان امين صدكيني

باوعتله بشك وسكتت اخذت الطريق كله ابجي رغم كل شويه افقد وعيي وانام وافز مرعووبه...

....... ..............

ريهام...

البيت انخبص خبص وناس تجر طول وناس عرض وام فلاح دكول يطبها مرض يطلكها غيابي ويخلص منها...

وهاله دكول....عرمه من يوم يومها الله فضحها تستاهل

ونوال تهوس كدامهن دكول هاي حوبتي انهزمت وصارت عار علئ اهلها وزوجها والقتل حلال بيها

حرامات خلت الكل حجه عنها وما واجهت الانهزام جان ابسط حل الها.

رغم هي غلطانه بس خطيه تقهر مو سهل الصار وهي ما عرفت شلون تتصرف من خوفها...

اجه جابر راح دور هو وصلاح وجعفر بس ماكو اختفت ..

وجاسر راسه والف سيف واله يطيح حظ جولييت

ربي يعينها...

خطيه وقار من الخوف والرعب والصياح تخربطت واخذها صلاح للمستشفئ طلع ضغطها مصفر

وبابا كال . ان شاء الله وقار اخذها يمنه اريد شويه تبتعد عن المشاكل لان هي منا نفسيتها زفت انوب هل مشكله راح تتخبل رسمي

ربي يعين هو قادر علئ كل شئ...

..........................

فتحت باب السيارة اطلب منها النزول...

شفتها نايمة والدموع منهمرة علئ وجنتها...وهذا بسبب خوفها وتأثيرها بلي صار...

احس جولييت الحزن والأسى مراح يترك الها اثر من الفرح وصبرها راح يخلص وما يرتوي منها ..

الكاسر عواصف تعصف بجولييت ..ومثواها الاخير هو حضنة وماكو مفر منة

ورغم انقاذي الجولييت بس متاكد راح ترجع اله حتئ لو بقدرة قادر أحتمال عقابي اقل من عقابها وما ندمان علئ الي سويته الها رغم اعرف العواقب

من اخذتها لحد الان وهي ما عندها غير البكاء تكسر بي سفن اشرعتها...وتهدئ بي روحها البريئة من روع المشهد

بس هل البنية بريئة ان شاء الله ترسوا علئ موانئ المودة والسلام...

خجلت منها هوواية اطخها او أمد ايدي عليها ماكو ساعات يمكن من عرفتها جانت نظرتي عليها قبيحة بس من تصرفاتها وخوفها عرفتها قارورة نقية ونظيفة...

فرضت احترامها بساعات قليلة...

تمعنت بملامحة بهدوء جفونها مثل الاطفال وصايرة حمر ومرمة من البجي وجهه اصفر شاااااحب مثل الأموات اهدابها مبللة من دموعها...

اول ما فتحت عيونها الزمردية فزت مرعووووبه وحضنت نفسها بخوف..لمت اديها علئ جسمها وهي تباوعلي برهبة وعنف...

ابتسمت الها اطمنها خطية..منكسرة..وثنايا الانين واطراف والوجع ما خلت عندها ثقة خوفها من جاسر كسر عندها ابواب الثقة

رجعت بحركة سريعة ومدروسة منها لصقت نفسها بباب السيارة الثاني مبتعدة عني مسافة مو كبيرة..

باوعتلي بعيون غاضبة وحياء واضح علئ عيونها البريئة الي مستمرة بهطول الدموع...

مسحت رأس انفها الاحمر بأطراف اصابعها الرقيقة وهمست مثل اللبوة الجريحة....حلفت ما تاذيني ولا تستغلني ...

بلعت ريكي بصعوبة بسبب منظرها ورعشة اناملها وخوفها وجزعها

وجنتها ملتهبة بسبب ضربة قاسية ما عرفت المنو الكاسرها؟.. او لواحد من عائلتة...؟

دموعها تنساب بغزارة ظلم وقهر وعجز...فعلا عاجزة عن فعل اي شئ غير حمايتة نفسها وطفلها النايم بين احشائها

جريت نفس وزفرتة بضيق..اني حلفت ما اذيج ولا استغلج ثقي بية وياللة انزلي...

ضلت تباوعلي مترددة وكل شويه واشاحت بنظرها خجلانة واكيد محد يلومها مبينة البنية فقيرة انحطت بموقف لا يحسد علية

نزلت وهي متردد وبعدها قفلت السيارة ومشيت هي صارت وراية رجعت باوعت الها تمشي بحياء وتعب

درت نفسي علئ صوتها المتعب من البكاء وهي تهمس..بلا زحمة..

وكفت مقابيلي وجاوبتها بهدوء...تفضلي؟

رجفت شفايفها برهبة وبلعت ريكها بصعوبة وهي تفرك باصابعها بقسوة وعيونها الدامعة ما توقفت عن البكاء

احس تعبت منها كثر ما تنوح...

همست بصعوبة وتوسل...ويين ما خذني اني كتلك اريد امي هاي شنو المنطقة..

تقربت منها خطوات وهي رجعت خطوات خايفة وتلملم ملابسها علية

رفعت ايدي اهدئ من خوفها وروعها مني حجيت وياها بتفهم جريت نفس وبهدوء...شوفي جولييت اني وكفت ضد عشيرتي بصفج واعرف خايفة مني وما عندج ثقة بية وهذا الشئ احييج علية لان مو كل انسان كد الثقة...

وانتي رغم وحدتج وغربتج وخوفج وذنبج العفيف بس عجبتني ردة فعلج وفعلا ثبتي انتي متربية لان اشوف الخوف بعيونج خايفة من انتهاك شرفج

بس واللة اني حلفت الج وكتلج بينة ابو فاضل وشديت رايتة... ومثل ما اخاف علئ اختي ريهام اخاف عليج ومدام بحمايتي لا تخافيين

شاربي ازينة اذا سولت الي نفسي واذيتج ولا اطلع جابر ابن عگاب العلي اذا استغليتج

فلا تخافين وخليج مطمئنة تمام...

وانتي تعرفين احنة صار 3 ايام ندور علئ أهلج واهلج مطلوبين ثار...وبيت عمي ياخذون حقهم ثالث مثلث ذنب اهلج ما تتحمله جبال شامخة..القاصي والداني صار ضدهم

ترئ اهلج ذنبهم عظيم وزوجج صاحب حق صعبة تطلع 3 جنايز من بيت واحد لا والمشكلة قتل مع سبق الاصرار والترصد

جولييت...

مسحت دموعي باسئ..كلامة شووية ريحني وبعث الطمأنينة بداخل جوارحي...

رغم خوفي من كلامة الاخير وتذكري بالصار ..ليش اني نسيت الصار؟

لا والله مستحيل انسئ الصار مستحيييل...

مشئ كدامي واني امشي وراة بتعب والنزيف ماخذني رغم ماخذة احتياطاتي...

اباوع لروعة المكان باشجار زاهية بحركة باغصانها خفيفة وعطر الريحان تارس المكان...

جانت منطقة زراعية وبساتين كباار اول مرة اشوف هيج شئ رغم هو مشئ بينة مسافة طووووويلة من طول المسافة نمت وكل شويه اكعد افز لان ما عندي ثقة بي اخاف يرجعني الهم وما نسيت هو واحد من ازلامه

جان اكو مثل النهر صغير يفصل بين البيوت والشارع الي بي بساتيين هو مو. نهر جدول صغير ..وعلي مثل السياج يعبرون منه...

مبين عبالك قرية ريف شئ غريب اول مرة اشوووفه المكان يبعث الراحة والسكينة بالنفس ..بس هيهات ارتاح بعد الي صار..

هو عبر السياج وبعدها باوعلي كال...علئ كيفج اعبري لا توكعين بالشط

نزلت راسي بخجل ومشيت وراة احس عيوني ما اشوف بيهن كد ما بجيت...

اثار انتباهي امراة عجوز...جانت شايلة علئ راسها كونية محملة بالخضرة...

باوعت الملامحة مبنية تراكمت عليها السنين بدون عدد وجهه مليان بالخطوط والتجاعيد والنمش ..

وجلدها متهدل علئ عيونها بحيث مدا اشوف عيونها بوضوح..

من شافتنه احتدت ملامحها اكثر وعقدت حواجبها المتجعده كالت بصوت ضخم مثل صوت الرجال...ياهو هذا جاااابر ابن اختي

باوعتله هو ضحك الها وراح حضنها باسها براسها كال...اي جابر مشتاقلج وداعة صوتج الحلوو ههههه

ضربته بعدم قبول ..انجب انجب عود يقلد علئ،صوتي هو كريم منصور..

ضحك ورجع باسها كلها..صوتج غير يجنن ينافس صوت ام كلثوم...

كعدت علئ بلوكه وضلت تسفط بالخضره باوعتلي كالت...هاي منوو ولك شجايبلي من صوووغه اليوم

باوعلي بنظرات متوتره وقابلته بنظرات مهشمه بلع ريكه كال. بعدين افهمج بس خلي هاي البنيه يمج صبريه

ضربته بباگة الكرفس واني فزيت من يمي...صبريه بعينك ولك كوا...شمسوي من مصيبه وتريد تبركسها براس صبرية .

باوعت الجابر بخووف وهو رمقني بنظره يطمني ابتسم بفشلة..ههه شبيج خاله كتلج بعدين افهمج قصتها ترئ،خطيه منكسره ومسكينه

مدت ايدها بجيب ثوبها الفضفاض وطلعت باكيت جكاير وجداحه اخذت وحده وورثتها باحتراف واخذت نفس،منها كالت ...اي صدك يا گال ابو المثل صايه يصايه حظج وين نايم بالزيزاية...

هذا حظي وين العوجه والعوبه والمنكسره تلفي عليه اي،مو انه الفي،بس المترديه والنطيحه والمغضوب عليهم

هو تقرب منها ونطق بهمس خافت...صبريه علئ كيفج اقسملج بعدين تحبين جوليت

باوعتلي بقرف...ويييع انوب اسمها جكليت ياهو السماها هذا الاسم ولك بس لا تطلع بت ابيش حتئ وروح امي ورووووح امي هسه اغطك بالشط واشرك علئ شجرة الزقوم..

عقد حواجبه بتساؤل...ابيش منوو

نفخت الدخان من شفايفها...هذا ابو الامريكان الي احتلنه هم مثلها اشهب ويضوي

شبيك ما تعرفه هذا ابيش .بوش..وشاونطن

ضحك جابر...واشنطن واشنطن

دنكت وهي تدخن هزت ايدها بملل...يالله يالله اخذ بنت ابيش ولي ما عايزه مصايب انه

لزمت كلبي،يخفق بقووه...ياااربي شلون طردتني هل مره وين ارووح واني ما الي احد وراسي موتني واسفل بطني وجع حااد...

ركضت مبتعده مسافه واني احاول اتقيئ بس،مكدرت اجه جابر وكف قريب مني دنك وهو يحجي وياي بحذر..جولييت بيج شئ

همست بصعوبة...وروح عوفني الوحدي

اجت الحجيه ولزمتني من اكتافي،كالت بجبروت وصوت خشن.. شبيج شبيها منو لاعب بحالها

جابر رد عليها...البنيه حامل واخوها كتل اهل زوجها الي،همه بيت عمي مهيوب

لطمت صدرها بقوة...يممممه لا مهيوووب مااات مكتول والله ابو فلاح خيير ما يستاهل ..بس هو هذا الموت ما ياخذ بس الزين ...هذا ابو اللول مو اغم هل ضال عرج ما يطگه...

جر نفس...بعدين اسولفلج كتلج وهسه البنيه حامل خليها عندج اماانه

ضليت اريد اتقيئ ما اكدر

حطيت ايدها علئ،ضهري كالت.. لا تضغطين علئ الرحم تقيئ بس لا تضغطين لا تموتين الطفل

تمتمت بصوت مبحوح...اني دا انزف

قطبت حواجبها ووكفت كالت...رايحه اجيب عباتي وانت جويبر حضر سيارتك خلي ناخذها للمستشفئ..

خطيه هو راح شغل السياره وطلعت هي،لابسه عبايتها طايره من الجهتين وما سادتها ولبست نعال لاستيك كله صبغ

ساعدتني صعدت بالسيارة

جابر كلها..ادري خاله ما عندج غير هذا النعال كله صبغ

جاوبته بحزم...هذا النعال ابو الخير واتفائل بي احسن من وجهه حسنه وابو اللول...

ابتسم بهدوء...بعدج تكرهينهم

ردت بقهر...زمال ومطييه شينحب منهم

مشينه مسافه وصلنه للمستشفئ شويه بعيده عنهم انتظرت شويه ودخلت اني وياها وجابر ضل منتظر رغم هو كل شويه واتصلو بي واني كل اتصال منه ياخذ روحي واضل ارجف...

اني متأكده الطفل مات لان مستحيل يعيش بعد الصار والصدمات والخوف والضرب...

شويه ودخلت للدكتوره سوتلي فحص وسونار بس هي تفاجئت من شكلي سألت شنو بيه

كلتلها صبرية ...عدهم فاتحه وهي متخبله وتلطم علئ،وجهها...

تنهدت باسف كالت..ماما طفلج مهدد بالاسقاط واسبابه واضحه انتي متعرضه الصدمه قوويه ومتعرضه الحادث وضربه حاده سببت عندج نزف

اني،لو ما اشوف حالتج تعبانه كنت انطيتج أختيار ثالث وهو وجود اكثر من جنين بداخل الرحم لكن استبعد هذا الشئ كونج تعرضه الصدمه وضربه.

جرت نفس وكملت وهي تكتب علئ الورقه..المهم ماما كتبت الج علاج وانتي،بالاشهر الاولئ وهاي الاشهر خطره لذلك درج لا تصعدين اي جهد ما اريد واريد تستلقين علئ ضهرج تمام اميي..

هزيت راسي بقبول..

طلعت اني والحجيه صبريه وهي تمشي عبالك ماخذه خاووه علئ المجمع اجه جابر جان يخابر كال...هااا بشرو ..

جاوبته خالته ...مهدده بالاجهاض بس،بعده لازك بطنها وكتبت الها علاج ونشوف هذا الفرخ مبين جووي

عقد حاجبه باستغراب..جووي شنو

جرت نفس ..يعني قوووي هسه روح جيب العلاج وتعال احنه ننتظرك بالسياره...

هو اخذ الراجيته واحنه رحنه للسيارة كعدت بالصدر وهي تدور بالاقراص ودكول ...بس كون عنده اقراص لسعدي الحلي

تنفست بضيق هذا البطران وما يحس بوجع غيره

اجه جابر جاب العلاج مشينه مسافه غوربت الدنيا والشمس تلبدت بالغيووم

من صارت الدنيا ضلمه خفت حييل عبالك متت واهلي خلوني بالگبر واول ليلة وحشه اليه متت من البجي...

وصلنه البيت الحجيه

هو كال..اني راح ارجع باعي انتي بديالئ تحديدا بشهربان هذا اكثر مكان اكدر اامن بي عليج

تفاجئت اني ما اعرف بالمناطق واول مره اسمع بهذا المكان...

طلع موبايل من جيبه وانطا اليه كال...باعي هذا موبايلي الثاني قديم ومتروك حتئ السيم كارت مالته متروك لا تفتحين خط اذا واحد اتصل بيج بس اني مكتوب عليه رقمي

اذا اتصلت افتحي خط اتطمن عليج واذا محتاجه شئ خابريني تمام

اخذت الموبايل من ايده وبلعت ريكي همست بصعوبة.. شكرا جابر ربي ينور دربك ويحفظك بس فدوة لا تغدرني

ضحك كال...حقج ما تعرفيني بس اسالي عني خالتي ولو ساله عني جان كلولج منو جابر ابن عكاب العلي لا تخافين ما اغدرج

جريت نفس حزين ورديت بصعوبة...شكرا ربي يوفقك

تشكرت منه وهو راح بعد ما سلم علئ خالته وطلب منها متحجي الموضوع وفهمها علئ موضوعي ...

شوويه وجابتلي روبه وتمن كالت...اكلي حتئ تشربين علاجج

اكلت شويه وشربت علاجي

وفرشت الي فراش ونمت بس لحد الان اصارع بروحي وندب حضي مشتاقه لامي مووت.

......................

ريهام

مر يومين علئ اختفاء جولييت

لحد الان شيوخ تروح وتجي بس باليل كووولش شوويه تخف الرجل علينه

كلهم جانو كاعدين بالحوش ويسولفون بس جاسر مو وياهم يدخن ورجع مره ثانيه يدخن

رغم الضجه بالكلام بس هو مجان مشاركهم الحديث

انطيتهم الجاي هو محد جان غريب بس جعفر وصلاح والبنات وجاسر وجابر ورضيه وام فلاح

نوال جانت مموجوده لان لازمه عده

كعدت كعده وخليت الجاي وجعفر وزع عليهم

ابويه اخذ استكان وخلاه كدام جاسر ضربه علئ كتفه بخفه وهو يكوله...اشرب عمي ادري همك صعب بس ان شاء الله ما تعصب علئ القادر العزيز

جر نفس عميق واخذ الاستكان وشرب منه

امه كالت...يمه لا تموت نفسك لا تهتم لهاي العار اصلا بيك بخت خلصت منها طلكها غيابي وفضها

هو عاط بيها بعصبية...شلووووون ما اهتم شلووون هي اهلها وينهم حتئ تروح الهم بالله واحد تعرض الها اعتده عليها شلون

والله نوووم ما مر علئ عيوووني من وراها عذبتني والله اذا الزمها اووووف ما ارحمها والله بس اصبريلي اصبري اذا ما ندمتج ما اكون جاسر...

ردت بقهر...طلكها غيابي وخلي تولي وعارها علئ اهلها

رد ابويه شنووو يطلكها غيابي البنيه حامل والنه طفل بطنها لا تحجن بكيفجن

حطت ايدها علئ كفها الثاني...هاي اذا ما مات والله اصلا مات

جابر جاوب من مكانه....لا ما مات مابي شئ

باوعله جاسر بغضب،ونظره حااده...شمدريك انت شدعوة هلكد متأكد

باوع العمتي رضيه بخوف كال...رضيه هي كالت طفلها مابي شئ

رضيه كالت...اي مابي شئ

وكف جاسر بغضب وجابر وكف وياه

ضحك باستهزاء كال...اني الي يخوووني اعرفه من عيونه واخذ حقي منه لو يضل يوم بعمري

جابر ابتسم بتوتر.. لا تخاف اني وياك وواحد من ازلامك

سحب نفس طووويل من جكارته وهمس من بين اسنانه...اني ما اخاف ... اخاف بس من المزنجر بيوم تلمعه الايام

نطق اخر جمله وترك الكل مذهووول وراح

جابر كال برهبه ...شنو قصده شكوو

رد ابويه...عوووفه بويه مقهور

سكت جابر وبعدها جر نفس وخله وطلع. .

.......... ...............

بعد مرور يومين

جنت نايمه فتحت عيوني بارهاق شديد عبالك جنت بغيبوبة طووويله انام واكعد وارجع انااام من التعب

باوعت للبرده تتحرك من الهوا الداخل من الشباك لميت نفسي بخووف

جان ضوء الغرفه خفيف جريت نفس وكعدت بصعووبه دا احس عبالك مقيده جسمي وجع بي مو طبيعي

وعيوني تنغزني بألم اكيد من البجي تنهدت بضيق

لمست بطني اتحسس طفلي رغم صعوبة الواقع لكن هل طفل احسه شريك ويايه بهمومي

همست ببكاء.. ادعيلنه ابوووك يرحمنا

اتذكرته مره من المرات جنت دا اسوي جاي وشالي واكع علئ جتفي

وهو دخل لبسني الشال وابتسم كال...انتبهي علئ حجابج بالمطبخ لان الولد كل شويه واقتحمو المطبخ

ضحكت بتوتر...اي ان شاء الله اني جنت لابسته بس وكع مدري شبي يزتحلگ

لزم خصلة شعري بين اصابعه القاسيه ورجعها وره اذني ورجع رتب حجابي وهو يباوع لانحاء وجهي بهدوء كال. .اي شعرج حلووو ميلزمه حجاب ولهذا السبب ما احب احد يشوفه...

فرحت حييل بكلامه رغم قليل يحجي ويايه هيج لذلك الها وقع بداخلي

شفت الموبايل اتصل ونورت الشاشه

اخذته بخوف يمكن جابر ..

شفته رقم غريب خفت حييل ضليت ارجف كلبي احسه يخفق بقوووه.

رجع اتصل اكثر من مره مجاوبت

رن بوصول رساله فتحتها انلجمت عندي الحروف واصابعي رجفت

قريت الحروف من نار كاتب...ليش ماكو رد اني جاسر ابن مهيوب العلي

انهبطت صابتني رجفه من فووك ليجوه همست ببكاء عالي...الله لا يوفقك يااا جابر الله ينتقم منك دليته علئ مكاني يمممه ويينج وين عفتيني راح امووت

لازم انهزم لااازم...

نهاية البارت ...يتبع

كونوا انتم كونوا بخير..احبكم 💔

نور سمو العراق 😘

لا تنسو التصويت والمشاركة بكم نكتمل

وان شاء الله باجر وئام تنزل الفائز بأجمل تعليق النت عندها ضعيف اليوم وملحكت