رواية #جوليت وأسرها.... الفصل التاسع والستون 69 - بقلم الكاتبه سمو العراق

البارت الثامن
رواية...جولييت واسرها...غياهب الإنتقام
بقلمي...نور سمو العراق

💔💔💔💔💔💔💔💔💔

لم ييأس زكريا، بالرغم من دواعي اليأس: وهن عظمه، واشتعل رأسه شيبًا، وكانت امرأته عاقرًا..لكنه ظل يحسن الظن بربه . ﴿ ولم أكن بدعائك ربّ شقيا ﴾

......................................

حلو الانسان من يفرح يلكه انسان يفرح الفرحته ومن يحزن..يحزن الحزنه...

هيج اني ورهوومه ما صار ويايه موقف حزين اذا ما جانت واكفه ويايه بي

ولا صار ويايه موقف مفرح اذا ما شاركتني فرحتي

ريهام الانسانه النقيه اطهر قلب واحن قلب عليه ما اتوقع هيج تموت وتتركني الوحدي

اني احس الدنيا واكفه بعيني، وهوايه اخذت عزاز مني للاسف عزازي بعاد عني

بس رهومه ويايه بهل بيت وجانت المدافع الاول الي ما فديوم غثتني ولا فد يوم سمعتني حجايه محلوه ولا فد يوم شهدت زور ضدي،

وحتئ من اخويه قتل عمها وابن عمها وحفيدتهم جانت كوولش حنينه ويايه وتنصحني وتذكرني بمي او باكل

الكلمه الطيبه تعتبر ديين عليه و ريهام ما خلت بالكلب لجمه ولا فد يوم اذاني

درت وجهه عليه انصدمت من الشفته صررخت يصوت عالي...ريهاااام ريهاام اكعدي اكعديييي

اهز بيها ماكو اي نفس مثل قطعة الكنلكس ما بيها اي رووح جانت غالقه عيونها الدامعه وخشنها نازف دم وطالع مثل الوغف من حلكها...

اني كلت ماتت ما دام هييج ضليت اصرخ بصووت عالي دخل جاسر يركض وخالتي ام فلاح وماما رضيه وشهد وبنات فلاح...

ضلن يعيطن من شافنها صفررررره والشفايف جافه

مسحت شفايفها بشالي لان تخردلت اريد اجيب كلنكس رجليه جمدت

كعد جاسر رفعها الصدره وهو يضرب علئ خدها...ريهااام ريهاام تسمعيني

حط راسه علئ صدره ولزم العرق النابض بيدها

باوع علينه كال...بيها نفس خلينه ننقلها للمستشفئ...

شالها بين اديه والحجاب مالتها وكع من راسها جان شعرها ولا شعرايه موقف تنهز اله الابدان

اني انهارييت لطمت علئ وجهي...ريهاام حبيبتي سوده عليه يا عمري

وحتئ خالتي ام فلاح وماما رضيه ضلن يلطمن علئ وجهن

عز عليه هييج رهوومه بدون حجاب وما عندها شعر ركضت شلت شالها ولفيته...

ماما رضيه لزمت كلبها كالت...روحي وياهم اني ما اكدر كلبي راح يوكف والضغط علك

عاط بيه جاسر..... بسرعه بدلي وتعالي ويااااي

رحت اركض فتحت الكنتور سحبت الصايه منها وشال لان شالي خليته علئ حلك ريهام وخشمها..

تطشرت باقي الملابس من استعجالي ما شلتهم والجهال يبجوون لان كلها تصرخ وخطيه شهد تسكت بيهم

كلتلها بتوسل ...فدوه شهوده ربي يوفقج ديري بالج عليهم

اشرت علئ عيونها واني خليت وطلع اركض وره جاسر وهو شايل ريهام الهزيله...

كال بغضب...افتحي باب السياره بسرعه...

اول ما فتحت الباب واشووف صلاح اجه بسيارته من شاف ريهام بيد جاسر وهي متخربطه خطيه نزل يركض

باوع علئ ريهام شافها جثه هامده

صرخ بصوووت عالي وانهيارر...ريهااااام ماتتت ريهاااام

جر قميصه بقسوووه وهو يصرخ شكاه لزمته من كتفه واني اهدي بي واسكته...خويه علئ كيفك ان شاء الله ما بيها شئ بس هي تخربطت ما ماتت والله بيها نفس

صعد جاسر واني كعدت صار راسها علئ رجلي وصلاح كاعد بالصدر وهو يباوعلها ويبجي

لزم ايدها البارده المليانه ندب من الابر والمغذيات والكانولات

مسح علئ وجهه بتوتر...ياربي دخييلك يارب اله ريهااام لا تفجعني بيها مريتي سالفتي والله رهومه سالفتي،ما عندي سالفه غيرها...

واني جنت ابجي وادعيلها بصدق نيه وجاسر طاااير علئ ساعه يسويلنه حااادث...

وصلنه للمستشفئ هم يعرفون حالتها وعندهم ملف الها بالمستشفئ اخذوها بالطوارئ بسرعه

واحنه ضلينه بالانتظار وصلاح خطيه ضل يفتر ما كعد دقيقه ويفرك باديه ويدعي بتوتر

خطيه جاي تعبان من دوامه وانوب انهبط من شاف ريهام جسد بدون رووح

لزمه جاسر كله...علئ كيفك صلاح ان شاء الله مابيها شئ

هز راسه بعذاب والدمعه تلمع بعينه...جاسر يا ما بيها شئ ريهام منتهيه ريهام انطوني مده وتموت كال الدكتور ما تطوول اذا كلش كلش تعيش فد سنه

رد عليه جاسر بغضب...وهم منو رب العالمين حتئ هيج يقررون

رد عليه بحزن وقهر...هذا طب جاااسر هذا طب ومرضها سرطان بالنخاع اقوئ مرض ناس تتعالج بالخارج ومجاي تطيب...

جاوبه جاسر بقلق...لا تخاف والله لو اعرف علاج ريهام يكلفني روحي هم فداها الروح وشكد يكلف علاجها اني اتكفله عندي شقه راح ابيعه والبيت القديم كذلك واجمع المبلغ العندي واذا طلعت هسه من هل ازمه نسفرها

اردف بلهفه...مو جابر راح يتبرع الها بالنخاع

ضحك باستهزاء...المشكله ما تطابقت ويه جابر للاسف

فتحت عيوني مصدومه...لا عزززا جان املنه بجابر شلون هييج ياربي دخييل انسد باب افتح الف باب الرهومه والله تستاهل ومن عبادك الصالحيين...

شويه واجت ام فلاح وجابر وامه والشييخ من شافوا رهومه من الباب الزجاجي تخبلو عليها

خاصه ابوها يبجي بقلب محروگ....يا بوية يا رهوومه يالعزيزه

راد يدخل عليها والدكتور سمح اله دخلو هو وامها وجابر

خطيه ابوها يبوس برجليها اتذكرت ابويه الله يرحمه شلون جان يحبني ويبوس ايدي

اختنكت بعبرتي حيييل...الله يرحمك يابه وينور قبرك ويجعله روضه من رياض الجنه مشتاقتلك فدوه يابه

ياريت اني الميته ولا انت جنت دائما اكوول ياربي موتني قبل اهلي لان والله ما اتحمل الم وفاجعة الفراگ...

ابتعدت شويه واخذتلي زاويه كعدت علئ كراسي الانتظار وبجيت بووجع لزمت صدري حييل...ياربي صبرني دخييلك ..

حسيت بشخص احتضني وحط ايده علئ كتفي باوعتله بخووف شفته جاسر جر نفس كال...شبييج تبجيين انتبهت عليج من شفتي عمي الشيخ زدتي بالبجي ومن دخل علئ ريهام انهرتي

ابتسمت بحزن واني اباوعله....تذكرت بابا نفس حنيته وحبه اليه

جر نفس ورجع حضني حيييل حسيت اعضامي تكسرت بحضنته كال...ابوي الله يرحمه نفسي عمي حنيين حييل حتئ علئ جعفر رغم شكد متعبه واني ماكو احن مني علئ بنتي غزل

باوعتله بدهشه من ذكرها وعيوني تلمع بالدموع كلبي ضل يدك سريييع حسيتها رساله منه اليه رساله مبطنه ان هو هم انحرم من ابوو وبنته انحرمت من حنانه بدون إي سبب مثلي تماما...

جاوبته بحنين...ان شاء الله ربي يعوضك باولادك

جر نفس واخفئ ابتسامه حزينه...مرات اشوف بيج غزل نعومتها طفولتها ...احسج بنيتي !

ضليت اباوع العيونه بتفاجئ،وصدمه...يحسني بنيته لااا جذب مستحيل هو ما يحبني،بكد ما يحب غزل شلون يحسني مثلها

ابتسمت ونزلت عيوني باسى...لا متحبني بكدها

جر نفس ورخه ضهره علئ الكرسي كال هز راسه بعدم معرفه وانزعاج...

خلينه ورجعنه لريهام ونشوف خبصه بباب غرفتها تخبلنه كلت ماتت اجينه نركض كالو...لااا بس،زوجها تخربط واخذوا

خطيه رحنه لكينه صلاح متخربط صاير عنده انهيار عصبي وشاديله مغذي ...

خطيه جاسر ضل محتار واحنه لليل علئ هل حطه واني ولا حاطه لكمه بحلكي ...

وجاسر كل شويه وراح الصلاح ويرجع الريهام بس اني ضليت يم ريهام وخالتي صبريه ضلت ويانه

بس كالو الدكاتره لا تخافون عدت مرحلة الخطر وهو هذا مريض السرطان يتعرض لهيج حالات وهي مختنكه ومتقيئه...

صلاح شويه صار زين اجه كعد هو وجابر بالانتظار وجاسر وياهم

واني وخالتي ويه ريهام بالغرفه خالتي صبريه نامت ضلت تشخر...

طلعت برا دا اكول لجاسر يكول للدكتور جان كال...تعالي امشي ويايه

رحت وياه وهناك دخت كووه توازنت لزمني كال بقلق...شبييج

رديت بتعب...دخت

اخذني قاس الضغط طلع هابط هز ايده جاسر كال...اليوم شبيكم مرض جماعي لو واحد ينطي حافز للثاني

ابتسمت...خطيه تبهذل حييل واني دائما عندي هبوط بالضغط بسبب الضعف وفقر الدم...

انطوني هييج مثل القطرات كالو خلي مي وكم قطره واشربي بس،بعد ما تاكليين

هو جاسر راح جابلنه عشا من المطعم لعبت نفسي ما كدرت اكل فجابلي بسكت مالح وميزو...

ضليت كاعده يم ريهام وهم بره هي كعدت باوعتلها رحت يسرعه الها لزمت ايدها...هااا رهومه الحمد لله على سلامتج

جاوبت بتعب وابتسامه...الله يسلمج شنو اني بالمستسفئ؟

هزيت راسي باي...تخربطتي شويه يروحي ان شاء الله ما بيج شئ...

رمشت بعيونها كالت...اممم حسيت الدكتور يضرب باصابعه علئ صلعتي ههههه

ضحكت بحزن عليها رغم حزينه بس متحب تبيين ...هههه ياااا عزااا

كملت...اي ولج كعدت ورجعت نمت والاوكسجين بخشمي

باوعت شافت خاله صبريه تشخر كالت...ياااا حبيبة كنوش شجابها هناا بس لا طردت الدكاتره والممرضات وكالت الهم كنوش افهم منكم ههههههه...

جان هي كعدت كالت...هاااا ولجن برابيك تتمضحكن يمن كوون مال الللطم

ولج انتي رهيمه مو قبل شويه بين الحياة والموت شو هسه لسانج شطوله صدك لو كالو بزون بسبع ارواح

ريهام ضحكت كلتلها...اموتج وما اموت لعد اموت الوحدي؟ غير اريدج هناك تونسيني

ردت عليها...اي مو انه عادي الامام...«عادل إمام»

ضحكت اني،بصوت شويه عالي كلتلها...لج عيني رهومه خالتي صبريه طكت ضلت تطلع ليالي حمره تبياته بخمسين الف ههههههه

شمرت عليه باكيت الجكاير...انجبي ولج بت ابيش المايعه شوكت طلعت

اندك الباب رحت فتحته لكيته جاسر طلعت واني اضحك كال...شكوو شو تكركرين

ضحكت...كعدت رهومه وضلينه نضحك وخالتي دكول علينه برابيك تذكرتك هههه

رد عليه بمرح...محد بربوك بالهدنيا غيرج قبل شويه هابط الضغط من شفتي ريهام ضحكتج وصلت لدكتور الخفر

رفعت حاجب...ما تكييف اضحك

رد بهدوء وعيونه الغامضه تخترقني...لا يابه شعندي غيرج ام مرتضئ تراج غاليه

ضحكت...اي اغلئ من صبريه ههههههه تقديرها خمسين الف

كال...ديالله عيني سويلنه طريق هذا صلاح ضل جنه وحده معسره وتطلك خلي يشوفها لا يموت عليه...

رحت عدلت رهومه ودخلوا هم كلهم وخطيه صلاح لازم ايدها ويبوس،بيدها ويحجي وياها بصوت هااامس

وجابر كل شويه وكال...بالله هذا ما يستحي كل شويه وحضن اختي

وجاسر يرد عليه...والله انت ما بيك خيير دكوم ارفسه اضربه لو مكييف

عاد جابر باوعله بطرف عينه ودار وجهه

اني كلبي طك علئ اطفالي كتله انطيني موبايلك اخابر علئ ماما تنطيني الجهال...

هو اتصل وانطانياه خابرت علئ ماما رضيه كالت...ذول ما بيهم شئ مرتضئ نايم بس مشمش كاعد يلعب بكصايبي يحلهن واكعد اضفرهن...

ضحكت...انطيناه ماما اريد احجي وياه

اجاني صوته الطفولي الناعس...ماما اعببج ليس عوفيني وعدي...« ماما اني احبج ليش تعوفيني الوحدي »

جاوبته بمرح...يعمررري انت الحلو مشمشتي لا ماما ما عفتك بس رحت اجيبلك سياره حلوه مثلك

جاوبني بصوت باكي...اني اعببج تعالي اليد نام امج...«اريد انام يمج »

دمعت عيوني علئ كلامه فديتهم وليداتي ما مفاركتهم ابد لحد الان اتذكر اللوعه من اخذت محتبئ اشواق شلون اركض مثل المخبله بالشارع وما سكنت وهديت اله لمن شفته دخل عليه بطلته البريئة...

قفلت الخط منه بعد ما تعبت وياه لان اطفالي مثلي ميعرفون شنو يردون

بست الموبايل حييل وضميته الصدري الحمد لله سمعت صوت ابني...اووف بس رضاوي نايم ضل بالي عنده...

دا ادخل للغرفه ورن الموبايل برساله رفعت الموبايل شفت الرساله من الشاشه الرئيسه لان هو مخلي رمز مكتوب...ابو رضاوي انتهت المهمه

استغربت ...شنو انتهت المهمه ياربي شديصير شكوو يا مهمه جاسر غامض حييل ومدا اعرف شنو يدور بباله شكوو؟

عبالي صار ادمي يتغزل ويكلامه مو متعصب رغم بارد اثاري وراه سالفه

رجعت انطيته الموبايل وكعدت وذهني شااارد جانوا يسولفون ويحجون واني بالي اببد مو يمهم...

بعدها غلبني النووم ونمت واني كاعده ...

فزيت علئ ايده باوعتله بقلق...هااا شكوو صبح الصبح

كال بهدوء..لا يابه كومي نامي علئ ذيج السديه احنه راح نطلع ومن نروح الصبح نجيج...

هو خله وراح واني ضليت اسولف ويه ريهام واحجيلها عن صلاح شلون يحبها

هي خطيه ضلت تبجي كالت...ما اعرف شلون راح افاركه والله جولييت اني حييل احب صلاح امووت عليه شلون اموت واعوفه

حطيت ايدي علئ شفتها...لا يعمري عمرج طوويل ان شاء الله يارب تخلفين منه وتحبلين وتترسين البيت زعاطيط وهااا من هسه ترئ اذا جبتي بنيه لواحد من ولدي

ضحكت...ههههه اوووي فديتج جوولي ولج ولدج مجرمين اخاف يسكطوها...

رديت بغرور...بنت عمهم حلالهم لا تتدخلين وتخربين علئ بنتج اوووف منجن يالنسوان ما تخلن بناتجن يرتاحن

رجعت ضحكت بصوت...عزا العزاني ولج هسه هي وينها عمي بس خلي تجي انطيها الهم ولا اسال،عنها

ضلينه نضحك ونسولف وخالتي صبريه كل شويه وهجمت علينه...شلون بالله اليوم ما نام هاي عود مريضات وحدتهن حيلها حيل المطي...

خطيه ريهام وصلت للموت والله عبالي ماتت بس الحمد لله حالتها تحسنت اذن المؤذن رحنه صلينه وبعدها اجه عمي الشيخ ومرته

اني بست ايده هو سحبها ما قبل وحضني كال...بويه اعذريني البارحه ما انتبهت عليج رهومه اخذت كل حيلي

مسحت دموعي...لا عمو فدوه الكلبك اني اعتذر منك والله والحمد لله على سلامة رهومه

مسح علئ راسي وجر نفس كال...الله يسلمج بويه ولا يضرج مشكوره علئ وكفتج ويانه

جريت نفس ورديت بلهفه...افضالك عليه هوايه عمي ولو الصحه تنشره والله ابيع روحي واشتري صحه الريهام...

ريهام ردت بايمان...لا حبيبتي جولييت المرض نعمة من رب العالمين واختبار وحتئ هل شده وهل مرض يبين معدن الناس بالعكس والله اني ما مقهوره لان مريضه الحمد لله راضيه بقضاء الله وقدره...

وحتئ لو متت ما راح اعتبر السرطان تغلب عليه لا اني الي تغلبت عليه بصبري وايماني وثقتي بالله..

ابوها لزم ايدها وباسها...بعد ابوج رهومتي اريدج قووويه بنيتي الما يكسرها المرض

ضلينه نسولف شويه وبعدها خلينه ورجعنه اني جاسر وجابر ...وصلناه بطريقنه

سمعت جاسر يحجي ويه جابر كله...اريد اروح للنجف

اني نطيت من مكاني...اروووح وياك

باوعلي من مراية السياره وضل ثواني مركز بيه وعاقد حواجبه مقبل علئ سرعتي بالكلام...

جابر رد عليه...لا لترحون ازدحام هاي الايام خلي تخف الزياره ورحوا

سكتت مجاوبته ولا جاسر جاوبه...

وصلنه للبيت خليت ودخلت يمه اطفالي تلكووني مكيفين...سكيته اددت...اجت جكليته...

حضنتهم بحناني وهم تعلقوا بيه وراحوا حضنوا ابوهم ..دخلت سبحت ونمت نومه يمكن بحياتي منايمه هيييج تعبت حييل واني ممتعوده اطلع

بس هم الملائكه المحلقه أطفالي يخلون واحد ينام كل شويه..ماما روطي عفني...ماما ممش دلي نعله ابووك ...ماما اقيني حليب ...

وكل شويه ومدو ايدهم بصدري واني كل شويه وكامزه عبالي ابوهم...

منا لمن اجت رضيه اخذتهم ونمت نومه عميقه..

............................

وقار ...

تخربطت ريهام اني،تخبلت عليها ريهام عندي اعز من روحي ومن اشواق اختي ...

ضليت متخبله عليها خابرت جابر وانطيته خبر وهم تخبلو وخلو وراحوو الها...

شويه واتصلت ام نوال تغلط وتسب وتصيح...هسه يجي جعفر يطلك نوال والله هسه يجي،يطلكها شنو بنتي فصلية الخلفكم وهيج تعذبوها...

لييش يا ظلام لييش حامل بطفلكم تضربها شهيده الكح...وتوكع ضناها انووب ولد طرحت ولد ومات مم وراكم ...

ضلت تحجي وتغلط واني قفلت الخط بوجهه بطرانه احنه بيا حااال..

تقريبا للعصر واجه جعفر هاد علينه ويصيح....ويين هاااي الكلبه بنت السطعش كلب والله اليوم اذبحها بيدي والله موتت ابني الادبسز ام الشوارع...

طلعت شهد وهي تباوعله مصدومه وهو هجم عليها بعنف كطعها تكطع رفسات ودفرات وبوكسيات وهي طفله وحامل وتصرخ بين اديه

بالقران مو جعفر واحد ثاني عبالك ...مو بوعيه حتئ،من يسكر مو هييج مخبل وهجم علئ البنيه موتها كتل

حتئ عوود اني رحت افارغها لزمني وضربني،كلت والله اله اكول الجاسر عليه حييل مستهتر...

انوب سحلها سحل ما لحكت تلبس صايتها وشالها وطلعت اخذها الاهلها...

...

شهد ..

جنت كاعده العب بجهال جاسر واشوفهم مقاطع بالموبايل

وما اسمع بس جعفر يصيخ ويغلط ويسب انصدمت شبي هذا طلعت من الغرفه اسوفه وهو بدون سابق انذار كطعني تكطع

الضربات تجيني من كل اتجاها انوب خنكني ويصييح...اكررررهج اكررررهج اتخبل منج ولج انتي ووحش،موووتي موووتي

ضليت اشحط ببلعومي وابجي واضرب بي انوب سحلني راد ياخذني الأهلي...

ما لحكت بس البس صايتي وشالي...

محد جان موجود كولها بالمستشفئ وهو يبسني تيبس بالكتل...

انوب يصيح انتي فاتنه عليه كدام جاسر ودكليلخ جاي سكران اكو مره هييج تسوي هاي بس الاهلها مديحينها هييج تشهد ضد رجلها

اخذت الطريق كله ابجي والدمعه ما نشفت من عيني،والله لا ضاربتها ولا دافعتها

وهو اصلا جان يكول جذابه هاي منين حامل وحتئ لو حامل مو من عندي لان اني،حتى ما شايف خلقتها انوب انام وياها...

طلع جذاب الحقيير الحيوان الشهواني اثاري ينام وياها وحامل من صدك لو ما حامل مجان هيج ضربني

وصلنه للبيت وهو اول ما وصلنه دفعني بقسوه حسيت اعضامي تكسرت والله حتئ نعال لابسه تك وتك...

طلعت مرة ابووي،من الدكان كلتله بغضب...ولك ليش هيج ضارب هل عله شمسويه هل مكموعه

رد عليه بغضب...هاي بنتكم ادبوها ورجعوها اليه...او ليش ترجعوها خلوها تعفن عندكم منا لما اني اطلكها..

ردت عليه زوجتة ابويه وهي تتخصر بغضب...انهجم بيت يا ابو الاخلاق هو انت كلك خلگ سكيير زايعتك الدنيا العتب مو عليك علينه احنه الي انطيناك مره ولا انت منو يقبل يناسبك

جاوبها باستهزاء...ديله الي يسمعج يكول مطيتني انجلينا جولي هي كلها خلك وحده زركه وحوله جنها صبريه بشبابها...

عاد هي مرة ابويه طاحت بي،وطردته وضلت تسب بي وتغلط هو مهند ويقلد ابو العرك...

لزمتني من ايدي حييل ودخلتني،جوه....عرفت راح يرجعونج عليه هو انتي مال زواج امداج امده فركج...

دفعت ايدها وكعدت ابجي...الله لا يوفقج يا وجهه الطاوه يا حيوانه ان شاء الله كون الله ياخذ حقي منج شوكت كتلتج ليش هي تنكتل الهايشه...

بسيطه جعفر والله اله اخابر عمو جاسر عليك واخلي،يموتك كتل مثل ما ضربتني

بعدها تراجعت لااا ما اريد اكون سبب هو جاسر يعرفه وهسه يكتله ويادبه ...

اجه ابويه زوجته سولفت اله كلها...خلي يولي اطلكها وبس تجيب اشمر ابنه عليه

اني تخبلت...لااا كووولشي ولا ابني والله ما انطي والله...

حضنت بطني ونمت واني ابجي...الله لا ينطيج وجهه الطاوه شسويتي بينه...

........................

جولييت...

كعدت من النوم تعبانه حييل ودايخه ضايجه ارييد ابجي...

جاسر مو هنا بالشغل باليل يجي متاخر

ما اعرف شبيه عندي رغبه بالبكاء تجي وتختفي

ابتسمت ونزلت راسي كافي بجي جولييت حتصيرين عميه

غسلت وجهي وطلعت لكيت مشمش ومرتضئ يلعبون بالديج وبنات نوال يلعبن وياهم

من امهن ما موجوده كووولش حبابات من تجي امهن يتخبلن رسمي هي ماخذه بس الصغيره وعايفه الكبار

ابتسمت عليهن ودخلت للمطبخ خطيه محد موجود بس النسوان الكبار و وقار وقار شويه متكدر ضهرها من وكعت ياذيها...خليت لحم علئ الطباحظخ

و رجعت صليت وانوب رحت سويت عشا دخلت وقار ضلت تساعدني وتشكي من جابر

ضحكت.  يمعوده كولي يا الله لو عندج جاسر جان شسويتي

رد بضحكه...يمه اسم الله ما رايده روحي ...بس لا والله جولي،اخويه حنيين وحباب بس مو شويه الصار

جريت نفس...اي والله مو سهل ابببد الله يعينا...

كملنه عشا رحنه تعشينه وجمعت المواعين غسلتهم...

اندك الباب شفت خالتي ام هاله دخلت من دخلت والله احس كلبي انعصر واحس اديه ضلت ترجف ما ارتاحيت الجيتها ابببد...

ضلت تقريبا ساعتيين الجو صار مظلم والجو برد بس اني نومت اطفالي،وضليت احووص شنو دتحجي ويه خالتي شتريد جايه

صاحت عليه ماما رضيه كالت...جولي يمه سويلنه نومي بصره خالتج ام هاله صاعد ضغطها...

تذمرت بملل وخليت ورحت سويت الها اخذته سلمت عليها هي ضلت تباوعلي اني مجنت لابسه شال لان محد موجود وصلاح بالمستشفى...

هي بسرعه باوعت الركبتي كالت...هاي شبيها ركبتج

حطيت ايدي عليها باستغراب...شكو شبيها ؟

هزت ايدها وما حجت بس لوت شفايفها عود ما راضيه

اني خليت ورحت باوعت بالمرايه شفت رگبتي بيها علامات زركه

احس انضربت بوكس ببطني...عزااا العزاني شلون نسيت البس حجابي هذا كل من جاسر من كتله عائله عركجيه...

جنت واكفه بالحووش اعزل بي وطلعت خالتي ام هاله باوعتلي وهي تضحك باستهزاء...ههه صدك انتي وحده صلفه و وكحه ولج اخووج بعده ترابه اخضر وامج الله يعلم بحالها

وانتي مخلصتها بوس ومحاضن ويه چتال اخوچ

بس انتي مثل ما كالت هاله ما تهم غير نفسج وما تحبين بس روحج

وحده غيرج طمت روحها بالتراب والله انتي عااار علئ عشيرتنه

حتئ هشام ابني كال ...هاي جولييت وحده صلفه وحقيره شلون تتقبل تعيش ويه كتال اخوها

وعمج كله ..احنه ما دام هييج سوت ما نريدها بعد ومتبرين منها اليوم الدين

رديت عليها بقسوه...عمي مو اجيته وطلعت من حياة الكاسر وكال امج سدت بابها بوجهج

جاوبتني بعنف...حقها محد يلومها ولج والله لو انتي بنتي وهيج مسويه اذبحج

ههه نايمه وياه وهل اثار تشهد علييج والله عيب عليج من هسه كون اكول العمج علئ هل سالفه ما يهدر دمج

فتحت عيوني مصدومه من كلامها وجاوبتها بحده...شنووو نايمه ويه غرييب

هزت ايدها...مو اكلج وحده صلفه وادبسز مخلصتها ليالي ملاح واهلج بضيم المابي خير لاهله لا تترجه منه خير

انتي وحدددده رخييييييصه...

خلت وطلعت...بعد ما نطقت اخر جمله

كلامها حسيته مثل وحش مفترس ينهش بصدري اعصابي تجمدت ومشاعري تلبدت

كوه صبرت نفسي واعصابي باوع الاديه انعكفت كلامها مثل السم يلدغ ويجرح...

ركضت طلعت برا بالحديقه الجووو مظلم والاشجار تتراقص علئ الهوا العالي

لزمت صدري بوجع ورفعت راسي لاعنان السماء...يااااااربي لااااا والله احس كلبي حيوكف فدوووه صبرني

بجيت بصووووت عالي مطرت مطر خفيف جان هسه داخلين علئ فصل الشتا والجو حلووو

حسيت بعد ما اكدر اقاوم وكعت علئ الارض زحفت وكعدت علئ طرف المرجوحه

اشهك من البجي ومن كلامها ...اي اني صدك وحده حقيره اني رخييصه مثل ما كالت ماكووو ارخص من هييج

اكل واشرب واكعد ويه كتال اخوووي بس انتم ما خليتو اليه حل اجيتكم والله وسديتو بابكم بوجهي وينكم عنيي وييين

يابه انت اعلم بحالي فهم امي شنو الصار بيه حتئ لو بحلم فدوه يابه ...

شفته دخل كتمت انفاسي وحطيت ايدي علئ شفايفي...ما ا يده يشوفني

هو دخل وهو يمشي بهيبه وشموخ ويراقب حفيف الشجر بهدوء.....

ما خليته يشوفني ابببد ودخل جوه احسه ما اعرف شنو احس من كالت رخيصه حسيت نفسي اسيره عنده لو جاريه ما ادري هذا الشئ الحسيت بي...

ضليت كاعده واديه معكوفه ولامه رجليه لصدري وابجي...

.....................

وقار

جنت هسه دا انام يم ماما رضيه حييل مشتاقه الجابر بنفس الوقت ما ادري احسه ميحبني يعطف عليه اكو اشياء خفيه بداخلي تبين ان هو يعطف عليه

دزيتله سمايل ورجعت حذفته بسرعه هو بسرعه دزلي ضحكه

خليت وطفيت الموبايل بفشله وخليت راسي علئ المخده اريد انام...

هستوني خليت راسي دا انام وما اشوف اله جااسر دخل عليه وعيونه تنطق بغضب فزيت من مكاني كتله ...هااا خويه شكووو

جاوب بغضب...جولييت ويين ؟

رمشت بعيوني...ما ادري غيير بغرفتها

ضرب الباب بقبضة ايده بقوووه...ماكووو بغرفتها البيت كله ماكوو بي انتن وينجن عنها

باوعتله بخوف وتجمدت ملامحي رحت ادور بالغرف صعدت فووك ماكو...يااا عزا العزاج جولي بس لا انهزمت مثل ذيج المره خاف ذيج المره رحمها لا هل مره يذبحها والله...

ماكوو ما لكيتها نزلت لكيته واكف بنص الحووش مثل تمثال من جلييد

كتله بخووف ماكوو...اخاف بالحديقه

كال بعصبية...شيطلعها بهل مطر هسه اجيت ما شفت احد بالحديقه

بعدها طلعنه اني وياه واستوقفنا صوت الأنين المفجع

باوعلي باستغراب وهو عاكد حواجبه كال...تسمعيين

هزيت راسي بأي

فتح الايت مالت الموبايل و وجهه علئ اطراف الحديقه شافها معتكفه علئ نفسها وشعرها الاشقر نازل ومعطي باقي ملامحها...

تبجي !!!

شنو الي يخليها تبجي بنص اليل وكاعده بهل الضلمه والمطر يغسل بجسمها الهزييل...

اشرلي كال...روحي وقار ...

خليت ورحت بس باوعتلهم من بعيد هو يحتضنها بحنانه...وهي نقطة ضعفها حنانه...

جولييت...

تقريبا مرة كم دقيقه من دخل اسمعه يصيح بس ما حجيت شئ وبعدها توجهه ضوء اللايت عليه رفعت راسي وضرب الضوء بعيوني

شفته حجه ويه اخته وتقرب مني وحضني استسلمت الحضنه وبجيت بقلب محروگ

حط ايده علئ خدودي المتصقعه من البرد

حسيت بدفئ من لمساته اخترقت بكل جسمي

مسح علئ شعري المبلل كال بالم...ليش كاعده الوحدج هنا

بلعت ريكي المبلل بطعم الغدر...لان احس نفسي رخيصه واني كاعده ببيتك

سحب راسي وغرسه بصدره ضليت اشهك وابجي واني استمع الدگات گلبه السريعه

حطيت ايدي علئ شفايفي واني انحب...اي والله اني حقيره وما عندي لا ذمه ولا ضمير الجنت خايفه منه صااار شوف العالم ضلت تحجي وتطعني

رد عليه وهو يفرك باصابع اديه المتشنجه...اشش احنه اذا راح نفكر بكلام العالم عمرنا مراح يصير براسنه خيير طنش الحمير وعيش اميير

رفعت راسي اله بنحيب...انت تكدر تطنش وتعيش بس اني ما اكدر ما اكدر اتحكم باحساسي ومشاعري والي دا انطعن بيهم هم اهلي

مسح دمعتة عيني بايده وجاوبني بملامح جامده...لا تهتمين هذا العالم مليان اشواك وانتي ورده بين كل هل اشواك

الي جاي يصير وياج صار وياي وكلام الناس اسمعه واطنشه وحتئ الي يواسيني ياذيني بس صدكيني اني دخلت شوكه بعينهم وقاسييت هوواي بس حتئ احضن هل ورده الي هي انتي...

بلعت ريكي وباوعتله كلامه ما اعرف ليش ياثر بيه احس نفسي طفله من يحجي ويايه من يقسئ اصير قاسيه ومن يصير حنين استجاب اله

همست بعذاب...خالتي ام هاله دكول انتي رخيصه

رد بسرعه وعصبية...تخسئ ...هي وبنتها رخيصات اجتني الشغلي وعرضت هاله عليها وحتئ مهرها هي تدفعه ورفضتها خلي تشوف نفسها هي الرخيصه مو انتي ...انتي عزيزة نفس وكريمه

حطيت اديه علئ صدره وراسي بنحره وبجيت بالم...تعبانه جااااسر والله تعبت

رفع وجهي من رگبته وباس شفايفي بعمق ابتعدت بسرعه كال...لا يا عمي لا تعبين غير من ضربت اللايت علئ عيونج حسيتج بزونه اليفه وهاجمه عليها العتاوي ...

ابتسمت بحزن...اي خالتك وبنتها عتاوي متوحشه والله دياذني بكلامهن

رد بسرعه...خلي يولن لا تهتمين ان شاء الله اكل الرضيه بعد ما تخليهن يدخلن ولا ليش اخابر عمج واكله ما اريدهن يجن يسببن مشاكل لام رضاوي

مسحت دموعي بكم ثوبي...بس بعدني مقهوره جاسر احس روحي تريد تطلع والله

لزمت رگبتي بوجع...احس مختنكه والله

رجع سحبني الحضنه واحتضني ...جريت نفس والدموع منهمره علئ خدي تعبنه منك وما التجئ اله الك صدك اني ورده وبنص اشواك حقدك...

شالني ودخلني جوه من تجيني هاي الحاله مالت التشنج اديه ورجليه حييل تتعب وما اكدر امشي

خلاني علئ فراشي وطلعلي ملابس كال بغمزه...ابدلج لو انتي تبدلين

رديت عليه بقهر...لا اني

خله الملابس بصفي وراح باس الاطفال وهم نايميين

وبعدها كال...تصبحين علئ خيير ترئ اليوم عذبتيني مره ثانيه لا تعيدها...

طفئ الضوء وطلع رمشت بعيوني...عذبته !!

يارب دخيلك انت المستعان وانت المعول في الشدة والرخاء...

..............................

وقار...

رجعت نوال من اهلها وهي لازمه ضهرها طارحه المدام عشتو امووت واعرف شلون عرفت اني من اخذني جابر طلع الغشاء مطاط

جذابه مستحييل تكون جولي كلتلها لان جولي تستحي من هيج مواضيع بس نويله عشقها المواضيع الجنسية....

هسه هي،اجت مخلصتها نووم والله شنو سويت كورداش وضهري يوجعني مدري شنو ما شنو واني احلف عليها جذابه لا حامل ولا شئ

والتحليل الجابته اكيد تحليل زوجة اخوها وسجلته باسمها عادي تسوي ذيج تسوي،تحليل وهاي تغير الاسم بدل ما دكول اسمها فلانه دكوله نوال

هي من اجت لحد الان شاده حرابه ويه جهال جاسر كل شويه وكرصت واحد ومن واحد يحجي وياها تنزل ثنعش معصوم هي ممسويتلهم شئ

هم وكحين مو عاقليين بس اطفال ما يفهمون ومرات تحرض سجاوي تكتلهم هي سجاوي مو صغيره كبيره

جعفر ضال ينكل عليها من المطعم كباب ومعلاك ههههه

سبحان مغير الاحوال والله جنها ساحرته صاير مخبل رسمي ويتنفس نوال...

وهي جايبه بنت اختها اطياف دكول تساعدني لأن ما اكدر اشتغل موجوعه من الكورداش...

وهاي البنيه حييل مستهتره والله والله بعيني شفتها من شافت صلاح رفعت ثوبها لحد الساق

حتئ صلاح باوع عليها انصدم ومن ارتباكه خله ودخل الغرفة جولي همزين جولييت مجانت بغرفتها جان ضلت تعيط...

شفت نوال سافطه ويه جعفر وتشكي اله من جهال جاسر ودكوله...جولييت ما تصييح عليهم وموتوا رقيه تموت

عاد هو اجه هجم صاح بصوت عالي علئ جولييت...جوليييت وينج تعالي الزمي جهالج لا والله الزمهم اموتهم كتل

رد عليه مجتبئ بعصبية...والله دول بابا عليك تتلك بالددس...« والله اكول البابا عليك يكتلك بالمسدس»

كلها بغضب...شوفيهم جهالج ما عندهم تربيه ماكو هيج اطفال ربي جهالج مو بس تعرفين تنطيهم خبز وتديحينهم

والله اكطعهم تكطع ما عندهم تربيه

هي جولييت ابد مجاوبته سكتت ودخل جاسر طبعا هو جعفر من جاسر يجي يشرد من جاسر يروح يضل يتعيقل علينه

من شاف جاسر خمد وملامحه لانت كله جاسر...منو ما عندهم تربيه بلا زحمه استاذ جعفر

رد بخوف...هاااا اني

كله بجمود...اكييد ومن زمان مو من هسه تعال وراي عندي حساب وياك

هو بلع ريكه بتوتر كال...شيريد هسه والله موتنه واحد ما يتحرك بالبيت اذا ما جابه براشدي والله لو اشيل لو هو يشيل

اني خليت واخذت الجاي الاخويه لان جولي كعدت تغسل بملابس جهالها

انطيته الجاي وهو طفئ جكارته بالنفاضه ودخل جعفر

جاسر وكف باوعله بحده كله...وين موبايلك ؟

رد عليه بقلق...ضااااع

ما اشوووف اله جعفر فقد توازنه من قوة الراشدي الي اجاه من جاااسر

حط ايده علئ خده وبلع ريكه باوع الجاسر وبعدها نزل عيونه

هل موقف شكد ذكرني بابويه هوايه مواقف صارت هيج من ابويه بسبب جعفر

لزمه من ياخة قميصه وهزه بعنف...وسكررران مووو اخذوا موبايلك وفلوسك وانت كل عاده ما تدري بروحك

ومخلي مرتك تخابر وانت تخابر من رقمها ولك انت شنووو من مله انت بس بالجنسيه كاتبين نوع الجنس ذكر ...

الا انت ما الك اي علاقه بالرجوله اصلا انت واحد عااار وسكط

وبعدين تعال يالخمار يالسكير ليش طارد ذيج المسكينه وكاتلها لان شهدت عليك؟ لو شنو

رد عليه بحده...لا ضربت نوال وموتت ابني

جاسر جاوبه بغضب...امداك امده رجولتك لك عاار تضحك عليك وحده مثل نوال منين حبلت من الهوا تجذب عليك وانت مثل المطي مصدك

شوف لك لا تكعد انت ونويله تسوولنه مشاكل وتحط عقلها ويه مجتبئ ومرتضئ اني ابوهم واني الي اله سلطه عليهم اله لا انت ولا مرتك الكم سلطه عليهم

رد علئ جاسر بهدوء...هم ما يكعدون يصيحون عليها وجهه الطاوه

اني بصراحه متت ضحك هي مو تكرصهم هم صح يصيحون عليها ودهه القاوه...عود وجهه الطاوه

رد عليه جاسر بدون نفس...ليش هو منو علمهم علئ هل سوالف ومنو طلع هل لقب علئ نوال غيرك

انت مثل ابليس يعلم ولده علئ الصلاه وهو ميصلي...

سكتت هو مجاوب ولا نطق بكلمه بس خطيه انقهرت عليه

جاسر كله ...يالله اطلع ومره ثانيه يا جعفر والله اذا سكرت وروح غزل اكسرك تكسر بالبوري افلشك تفليش لا اساسيك ولا هم يحزنون

اسكطك تسكط اخليك تتذكرني سنه ليكدام

هو هز راسه بأي وخله وطلع

جاسر جر نفس وكعد يدخن وهو محتار هز راسه باسى...هذا موتني ما تصير اله جاره لو ابليس يجي بجكساره...

اجوا ولده كعدوا يمه شويه ريحوا من مزاجه هذا يكوله اني احبك وذاك يكوله احببك وتعاركوا وهو يهدي بيهم هههههه

........................

جولييت

مرة فتره علئ الاحداث

كعدت الصبح تحت تأثير حلم مزعج فزيت مرعووبه وخايفه

يااا عزااا هذا الحلم غريب غير عن كل الاحلام هل حلم لا بامي ولا ابويه ولا اخويه الحلم يخص جاسر

فتغاضيت عنه رغم كل شويه وتذكرت الحلم عبالك واقع

يارب معقوله شام ترجع هي مختفيه يعني ما ميته بس اكيد تكون بدوله من الدول

ضليت انضف ودا انضف بالحديقه اندك الباب الرئيس من وره الباب كتلت ...منووو

جاوبت بهدوء...اناا

فتحت الباب شفتها مره تجي تقريبا بالاربعيين شويه لهجتها مختلفه كلتلها تفضلي ردت...بدي صدئه اني عندي اولاد وما عندي طعميهن

صفنت عليها ضليت ارمش ياربي هل سوريا يذكروني بشام واي واحد يجي منهم تصيبني رجفه

كلتلها...اي خاله ادللي تفضلي اذا حابه

ردت بخجل...لا يا بنتي انا وائفه هوون

دخلت اخذت فلوس من كنتوري شئ قليل ونطيتها

كالت بتردد...يا بنتي ما عندك تياب عندي بنت بحلك وما عندا اواعي

هزيت راسي بأي وببتسامه رحت اركض يا سبحان الله اهل سوريا من يطلبوني اتمنئ انطيهم روحي ما اعرف ليش والله مو مبالغه احبببهم حييل

طلعت كم صايه وثوبين وشالات ثنين حطيتهم بعلاكه وانطيتهم الها

رفعت ايدها ودعتلي بصدق...ياربي يا بنتي ازا كنتي ما متجوزه الله يبعتلك ابن الحلال وازا كنتي متجوزه ربي يسعدك

ابتسمت....اشكرج خاله انتي منين من سوريا

ردت بحسره وقهر...انا من حلب

جريت نفس بخيبة امل...الله يعينكم بعدها عندكم حرب

تنهدت بضيق...اي والله يا بنتي بلادنا تدمرت ونسوانا تهجروا

باوعتلها بحزن...الله يكون بعونكم ويرجعكم الوطنكم

هي كالت اميين وبعدها باوعت كالت...فوتي جوه يا بنتي هاد في شاب اجا لهون مي حلوه يشوفك

استغربت شفته من بعيد ابتسمت...ههههه خاله هطا زوجي

هو سلم بدون ما يباوع ودخل

هي صفنت كالت...كانوا شكلو مألوف عندي اي والله انه هل شاب شايفتوا بس ويين ويين ما عم اتزكر

عقدت حواجبي بقلق...وييين

صفنت وطولت بصفنتها كالت...اي اتزكرت انا شايفتو وعرفت وين شايفتوا

نهاية البارت...يتبع

كونوا انتم كونوا  بخير...احبكم 💔

نور سمو العراق..😘

لا تنسوا التصويت احبتي بكم نكتمل اضغطوا علئ النجمه الصفره مثل قاط ختام بقصة هذيان بين جمر وجليد 😁

هذي الغلافات الي فازت بمسابقة كروب الفيس البارت هديه للكل وبالاخص لهذولي البنتين 😍😍😍

نازك البياتي...😍ما عندي حسابج اعذريني ما كدرت اسويلج تاك 😓

الراويه..😍 alraawih

💔💔💔💔💔💔💔💔💔💔💔💔

واكيد هل تصاميم للكاتب المبدع طلحه Talha-25-3